رواية #جوليت وأسرها.... الفصل السبعون 70 - بقلم الكاتبه سمو العراق

البارت التاسع..
رواية...جولييت واسرها...غياهب الإنتقام
بقلمي...نور سمو العراق

💔💔💔💔💔💔💔💔💔💔💔

چنت اضنك منتظرني
وسفـه تـالـيهـا لكيتك حيل تفرح من تضرني .

......................................

احس حضي مكسور واحس الدنيا ساخطه بيه

واحس مشاعري مثل طفل صغير بحاجة كووولشي

واني كل ما اواسي قلبي وارفعه للقمم تضربني الحقيقه بالارض بقسوه وارجع لنقطة الصفر

وكل ما نسيت روحي بالأمل..تضيق بيه الدنيا ويخنكني المصيير...

شفته حاضنها بالحوووش وهو ببوس بخدودها بلهفه وكل شويه يرجع يباوعلها ما مصدك ويحتضنها احسها تتكسر باحضانه

باوعتلهم من بعيد والدمعه تلالي بعيني انثئ مكسوره ومتهشمه اجزائي الي ابعد حد

صار الي صار وصارت باحضاني واني مرميه بدهاليز مضلمه

جنت اباوعلهم واشهك من الوجع الي بصدري

باوعت عليه بحقد كلتله ببكاء...هي يلي ائتلت بنتي

هو سحبها من راسها واحتضنها يهدي من روعها وجان صامت

ردت عليه بنحيب وبصراخ...ما بدياها ما بيدها خلي تطلع من هووون ائتله بكرهها كتيير

بجيت بصوت عالي ووكعت علئ ركبي واني ضامه اديه الصدري وابجي واباوعلهم بحزن وضيق شديد

وبعدها صارت مثل النفخه علئ وجهه وسودت الدنيا بعيني واكو ممر ضيق ضاگ بيه واختنكت

وهذا جان حلمي فزيييت مرعووبه ومقبوض كلبي

من اجت هاي السوريه ذكرتني بالحلم من كالت..انا شايفتو وعرفت وين شايفتو

عقدت حواجبي بخوووف...وين شايفته يجوز منطيج مساعده

كالت بجرة نفس....لااااا انا شايفتو بصوره عند بنت كمان لاجئه لما كانا بليبيا...

بلعت ريكي بخوف وتوتر...هااا يعني شنوو انتي متأكده

مجاوبتني بس ضلت تباوعلي بنظرات قلقه وجامده كالت...انتي مرتو يا بنتي ألتيلي...

هزيت راسي بأي

ردت بضيق...اهاات لكان متجوز

لزمت ايدها بخووف...منو هاي البنيه الي شفتي صورته عندها بليبيا وهسه هي وينها انتي تعرفيها

ردت بخفاء وغموض...لساتها بليبيا مع اللاجئين لا ما بعرفها كتير بس كنا سوا وهي ئلتلك كانت لاجئه عنا

بلعت ريكي بخوف...شنو قصتها هاي البنيه وانتي متاكده ان هذا زوجي نفس الصورة العندها

ردت بعدم مبالاة...ما بعرف هي مجرد لاجئه وكمان ماني متاكده بس هيك شبهت كانو شايفتو

سالتها بخووف...انتي صار شكد هنا وهم اكو ناس دلتج علينه لو لا ؟

رفعت عيونها بتفكير...انا كنت بليبا وبعدها رجعت عحلب بس حلب لهلئ متدمره لهيك انه اجيت مهجره من قبل خمسة ايام للعراق وفي ناس بتعرفكن خدوني عليكون وكمان ألو عندكن بنت اسمها وقار هيك شئ

هزيت راسي بصدق...اي صح هاي حماتي وقار تفضلي خاله خلي نستفسر منه

تجاهلت كلامي كالت...عندك اولاد ولا لسه

ابتسمت بخوف...اي عندي ثنين ولد

كالت...كانوا جوزك شوية كبير متجوز من أبل

هزيت راسي باي...متزوج جان بس زوجته اختفت للاسف

جرت نفس...الله يكون بعونها يابنتي ويسعدك باين عليكي طيوبه

ابتسمت...شكرا خاله تسلمين انتو ذهب اهل سوريا

ضحكت وبعدها اخذت اغراضها وراحت

حسيت كلبي طلع من مكانه ويخفق بشده دخات جوه واديه ترجف من الخوف والقلق والدمعه بعيني

احتمال كبير تكون هاي شام وهذا التردد الشامي مو طبيعي

المشكله مو بيه اني ما اريد اصير انانيه هي زوجته والحق وياها لان زوجته قبلي

بس المشكله هو شلون حيواجهها شلون حيكولها بنتج ماتت علئ ايد اخو زوجتي

هنا مصيري يختلف هنا اموووت من صدك اكيد البنيه تنهار وتموت من قهرها والله حقها محد يلومها

اني ولدي لو واحد يرشهم بمي ارشه بدم والله الضنا غالي

وهي خطيه فقدت بنتها ولا وكفت لا جنازتها ولا شافتها والمصيبه جاسر متزوج اخت كتال بنتها...

ياربي دخييلك انت الي تحلها

واني والله هم مظلومه محد ضل الي غيرك بهل دنيا اكيد هي اذا رجعت راح تطلب من جاسر يطردني ويطلكني

اني عادي حتئ اذا طلكني وطردني احاول اجمع شتاتي دا اتعلم خياط رغم والله ذاك اليوم راد يفلش المكينه

يكول شنو كاسره ضهرج بيها وعيونج راحت كد ما مركزه وتوسلت بي توسل يالله عافها

هو صح ما مقصر للأمانه بس واحد يخاف من المستقبل من الي صار اله بالايام الجايه

عادي اذا طلكني وطردني اخذ ماما رضيه وتكعد ويايه ومنا لمن يكبرون ولدي ما اكون بحاجة احد

الله كريم ربي المعيين الحمد لله علئ كل حال

صاح عليه جاسر من غرفته...جوليييت

رحت الغرفته بأمل مفقود وروح ذايبه فتحت الباب ودخلت شفته دينزع بقميصه باوعلي وهو عاقد حواجبه ...هاي منو الي حنتي واكفه وياها بالباب

رديت عليه بتوتر واني افرك باصابعي...مره تطلب صدقه وانطيتها

باوعلي بهدوء وضل مركز بملامحي...لهجتها غريبه حسيته

خليت وكعدت جريت نفس ...لا مو غريبه عليك بالعكس انت معاشرهم هاي من حلب

بسرعه رجع وركز بنظره عليه كال ..اهل سوريا هل ايام هواي يترددون عليه

ابتسمت بقهر...احتمال مشتاقيلك

باوعلي ورفع حاجب اني شتت نظري كتله بتصريفه وهو جان دينزع بساعته كتله...اممم هاي الساعه مبينه قديمه بس تحب تلبسها

ابتسمت بهدوء...اوووه حييل قديمه من زمن العصملي

ضحكت ...هههه تؤبرني عصمليتك والله

عاد هو هجم عليه وكفني بغضب من فكي كال...شكلنه ووووولج

جاوبته بخووف واني الزم ايده...شوووف ادري انت كلت لا تحجين سوري بعد واني صار كووومه ما حاجيه بس انت الي ذكرتني وحجيت قبلي

عقدت حواجبه بتساؤل واستفهام كال...فسريلي بالله

اشرتله بيدي...انت مو دكول بعهد العصملي والعمصلي كلمه سوريه واني كلتلك تؤبرني عصمليتك هاي فوكاها يعني فوك ما افدي فلوسك بروحي...

رفع حاجب بغرور وعض شفته...صايره حيييل وكحه

جريت نفس وجاوبته...اي والله شسوي اذا معاشره ناس العنف يمشي بدمهم والاستفزاز عنوانهم ويشترون المشاكل شرايه...

اردفت بفخر...تربيتك ابو رضاوي سويتني سعلوه اكل الاخضر واليابس

مسح علئ وجهي بثتين اديه كال...لا يابه منيلج سعلوه حلوه حلوه

هزيت ايدي منين حلوه وجهي شاحب وعيوني هالكه السواد....« الهالات السوداء »

رجع خصلة شعري وره اذني وهو يباوعلي بشغف...عادي يحيط بيج السواد تراج يا ام مرتضئ،مثل القمر ولازم يحيط بيج السواد حتئ تبرزين

بلعت ريكي بقهر...اي جذب عليه جذب اقهروني وبهذولوني وانوب كولوا مثل القمر والقمر يبرز بالضلمه...يا قمر استاذ كاسر ترئ صايره صحراء قاحله

لزم وجهي بيد وحده حسيت شفايفي تجمعت كال...ولج شنو اني جذاب شو ما تعرفين تحجين هل شفايف اذا ما يعرفن ينطقن شئ بي خير ارجع اعيد نظامهن من جديد....

حط اصبعه علئ شفايفي كال... وبعدين مدام صايره صحراء قاحله خليني اروييج

تخصرت ...يا والله ترئ محرمتك علئ،نفسي نسيت لو لا

حضني حييل ورجع باسني كال..دنجبي لج محرمتني هي بيا قانون هذا بالله التحريم تردين تصيرين ناشز لو شنو ؟

رديت ببرود...اي عادي واذا يعني

باوع لشفايفي،بذوبان وضل مركز ياربي عوود اريد استفزه مثل ما هو يستفزني بس هو فد واحد مراوغ شوف شلون يهز كياني

حطيت ايدي علئ،صدره...يالله كافي دا اريد اروح اشوف الملائكه البريئه العندي شسوو

جر نفس ...فعلا ملائكه طالعين علئ ابوهم قابل مثل امهم شيطانه صايره ناشز تالي،وكت

كتله بقهر...اله احرك كلبك مثل ما جنت تحرك كلبي ودكولي محرمج علئ نفسي

ابتسم ابتسامه واسعه واحتضني...محروگ گلبج لان ما جنت انطيج حقج لا اله الا الله ولا يهمج والله راح اعوضج اذا تردين من هسه

عضيت شفايفي بخجل كبر كبر كووون الفني شلون غبيه شلون اكوله هييج هو ابد ميجفص ولا يفصح عن مشاعره واني المطيه الثوله ضاله اخيط واخربط

بالله هسه هذا حجي شنو احرك كلبك شنو تحرك كلبي ثووول كووون رضاوي ومشمش والله افهم مني

حاولت الم شتاتي جاوبته بدون نفس...اهووو ترئ النفس ما صارت تهوئ شئ والخاطر انكسر وبعد ما تكدر تصلح الي انكسر

رد ببرود...ما مكسر حتئ اصلح

ابتسمت باستهزاء....مدام مقتنع هذا هوو

رد بنفس البرود...اي طبعا القناعه اهم شئ ...

واردف بمراوغه ..واني جنت مقصر بحقج واريد اقنعج شرايها جكليته

هزيت ايدي،واني اضحك...ترئ،مقتنعه من زمان ولو ما مقتنعه جان طالبتك بس صدكني اني،ولا بيوم من الايام كتلك تعال انطيني ولو بس حنية

كرامتي اهم من حبك وحنانك

عض شفته حيييل...يا يابه ياااا بويه ولج ويلوموني ويكولون شكو مخليها عندك ما يدرون ام كرامه تغلبت عليه

دمعت عيوني باسى...اي والله جاسر لو اضل طول العمر مراح اطالبك بشئ ولا اطلب منك ربع دينار

جر نفس.. اني مقصر وياج ؟

هزيت راسي بنفي...لا ممقصر الله شاهد بس اني هماتين ما يوم طلبتك جاسر اني من اول زواج منك اني تعذبت

روحك وگلبك وعقلك مو وياي ويه غيري واني شابه وفتحت عيني عليك اسلوبك جامد وياي رغم ما ماذيني بس الكتمان يجرح...

شغله ثانيه جنت كل مره تهددني باطفالي وتحرك كلبي تذكر مره من اخذتهم مني يومين تدري والله هل،يومين اصعب من كل الايام الي،صارت ويايه

مثل سنين يعقوب والله

حطيت ايدي واني ابجي وانحب علئ حضي

هو حط ايده علئ كتفي واني ابتعدت بسرعه عنه...لا جاسر لا تجرحني وترجع تداويني ترئ دواك يتضارب عندي،وياذيني

وهذا كله وما حقدت عليك كلت ميخالف كلبه محروك علئ اهله وبنته ميخالف جولييت اعذري

بس من كتلت عاصم خليت حاجز بينه ... انت جاسر واحد قاسي،واني انثئ هشه فمراح تفمهني،لو احجي منا لباجر

وحتحس اني افضل اخويه عليك واني والله العكس

وبعدين اني ردت تسلمه تعدمه بس انت فضلت القتل اذا انت ما تتحسس اني اتحسس

لو شايف كلام خالتي،شلون يسم البدن ترئ اني مشاعر مو كوم حجار

وبعدين ترئ اني صح مخلوقه من طين بس،طيني ترف ما يتحمل مو مثل طينتك معجونه بصخر

تنهد بضيق كال...ولا انتي،راح تفهميني،وتفهميين شعوري مدام كل واحد بينه يحس نفسه هو المظلوم مراح نتوصل النتيجه

هزيت راسي بقبول....اعتقد الطلاق افضل حل ؟

دار وجهه بعدم مبالاة...لا عمي لا مو خووش حل لان ناوي ازيد الانتاج والله

صحت بصوت عالي ...لاااا والله ترئ ممسموح الك تتعدئ الخطوط الحمره وياي

باوعلي،بتفاجئ...صوتج ولج..وبعدين ليش،ما تقبلين نزيد الانتاج اشو حلوين وسباع يعني بالحالتين ما بيهم خساره ...

مخسرانين شئ ترئ مجرد وهم نعيش ليله رومانسيه تحلي الانتاج

جريت نفس...اعتبره اغتصاب والله

رفع حاجب ببرود...لا ليش شنو كافش،شعفتج لو مشكك ملابس ؟هي بوسه وحضنه وابوج الله يرحمه

رديت بعنف...بس ترئ،مو بارادتي

باوعلي وعقد حواجبه وبعدها طلع جكاره...ولا يهمج اخليها بإرادتج بس،انتي خليها عليه

كمزت من مكاني ...لا والله ما اقبل

اشرلي دكوي ملابسي عندي روحه اني،وعمي الشيخ للعامريه وبعدها الله كريم

اخذت القميص بغضب ومشيت واني اخزر بي

عاد هو ركعني،بباكيت الجكاير بس مو عصبي جان كال...اني الج ام عيوون اله افكسهن كم مره كتلج لا تباوعيلي هييج بس انتي وين ب

سديت الباب حييل خلي يروح ما اريد اسمع يفشر عليه لان ما احب هل،كلمه...

رحت غسلت ملابسه وكويتهن وعلكتهن احسن حتئ،ما يلزم لزمه عليه

وسبحت الاطفال وبعدها كعدت اتعلم خياط ماما رضيه عندها قطع سود دا اتعلم بيهن...

كوولشي،يصير بالله صار شئ اجت شام اني،ابد ما متطمنه لتردد السوريات عليه احتمال رجعتها قريبه

......................

وقار

كعدت الصبح نضفت البيت اتصل عليه رقم غريب بصراحه خفت افتح خط كلت اخاف وحده من ذن يسولي مشاكل وتالي صارت مشكله بيني،وبين جابر

اتذكرت جابر والله احببه من جنت صغيره ومراهقه احببه بس هو مدري شبي عليه

اجتني رساله كاتبه...وقار ليش ما عم تفتحي خط انه ارفيئتك اللاجئة...

ابتسمت بمرح...ياااي صديقتي

فتحت خط ضليت احجي وياها وأسأل عنها كالت راح اجيج البيت عمج بس اني،مقبلت لان بصراحه كلتلها اني بيت اهلي،

عاد هي كالت...لا ازا عند اهلك ما بجي

ضليت احجي وياها وتالي قفلت الخط

اتذكرت البارحه دز عليه جاسر كال...انتي زعلانه

جاوبته بارتباك...لا خووويه بس لان مريضه ضليت هنا تعرف قبل فتره طرحت طفل وهماتين وكعت

جر نفس وباوعلي بهدوء...وقار اني اخووج واريدلج الخير جابر ابن عمنه وجابر ماكو مثله

والمره والرجال تصير بينهم مشاكل هو الاخ ويه اخو تصير بينهم مشاكل وهم طالعين من بطن وحده

فلا تسوين مشاكل ويه جابر واني اذا انتي علئ حق ما اعوفج بس اذا جابر علئ حق ترئ الومج ؟

نزلت عيوني،بحزن...لا ان شاء الله ارجع بس كم يوم

وكف وحط ايده علئ كتفي،كال...عفية خيتي،وشوفي اي شئ يصير وياج كليلي،واني،ان شاء الله كل مشاكلج احلئ

هزيت راسي بأي وحضنته وبجيت هو حضني ومسح دموعي...كافي،وقار كافي لا تبجين جابر يحبج ويقدرج بس انتي تحبينه اكثر ومشاعرج مفضوحه

بعدين افهمج شنو تسووين حتئ يطلب منج اكثر مما انتي تطلبين مشاعر منه

باوعتله واني حاضنته...هااا قصدك البسه

كرص خدي وهو يضحك ...شنو ولج تلبسينه هو بنطرون وتلبسينه لااا ان شاء الله بس ارجع من شغلي افهمج

هزيت راسي بقبول وخله وراح ...

اني رحت دخلت للمطبخ سويت شويه اكل لان ريهام بالمستشفئ وامها نايمه وياها

وصلاح راح يجي من دوامه اول ما يجي يتغده ويصلي ويروح ياخذ الاكل للمستشفئ،

اني سويت اكل وانتظرته كلت اروح اني وياه لان اخر مره ما رحت الها من تخربطت

نوال جانت بغرفتها واطياف وياها مدري شنو من مله تجي من الصبح تروح باليل ومره باتت يمنه

ومن باتت ماما رضيه ضاجت ومن عرف جاسر تخبل كال لماما رضيه هاي اخر مره تبات عدنه احنه ناس غربه وعدنه ولد شباب

وجعفر دوم سكران والدنيا تريد الها حجه وهي،شابه انوب يصير بيها شئ،يذبوها براسنه تجي بالنهار تروح باليل مال تبات لا ممنوع

عاد ماما رضيه كلتلها وهي نوال تخبلت شنو احنه كحا....

شنو مو عيب ترئ،ما يصير هيج اطياف بنت اختي الناس كلها تحلف بشرفها

بس جاسر ما عاجبته غير جولييت الانهزمت الوحدها وراحت هي وابن عمه مدري شسوت ما سوت

بس هو حظ العواهر جواهر...

ماما رضيه تلاطشت وياها وتعاركن بس هي،بنت اختها بعد ابد ما باتت عدنه...

كملت الاكل وصلاح دخل للكراج ديحضر السياره

جان اني طلعت واشوفه واكف هو واطياف احس الدم تجمد بعروكي وجسمي كله يرجف

سمعتها دكووله بصوت خجول عود...صلاح اني امم ما اعرف شلون اكولك لا تعتبرها جرئه الله عليك بس اعتبرها مواساة الكلبي

هو رد عليها بقلق وعيونه ابد ما رفعهن كلها باستغراب...انتي،شتحجين اختصري مرتي اريد اروح الها ومو فارغلج والله

جاوبت بحسره وتمسكن...والله صلاح اني روحي متعلقه بييك والله اني احببك

هو فتح عيونه مصدوووم من جرائتها وكلامها بس رد عليها بقسوه.... روحي بابا شنو هل كلام عيب عليج انتي بنية بيت شدعوه هلكد جريئه

وتردين ابدلج بمرتي مرتي اني زوجها وباسمي،تخجل وتستحي مني،ومن تزوجتا لحد الان ما كالت احبك اذا ما غطت بخجلها

وانتي،بدون اي خجل جايه دكولين احببك وتردين اعوف مرتي

روحي بابا روحي الله يكفينا شرج

اني عاد طلعت باوعت الها بغضب وهي ضلت تباوعله بتركيز وخلت ودخلت جوه

صعد صلاح بالسياره وهو يفور رجع السياره وهو متعصب كال...كبر حتئ كبر نسوان زاحن الخجل شنهاي من مله

والله لو هاي اختي اله اطمها بمكانها كلبه تروح فدوه الاضفر ريهام

ريهام الطاهره مريضه وهاي الحثاله حيلها حيل المطي

صدك لو كالو المؤمن مبتلئ الحمد لله يارب لا نسألك رد القضاء ولكن نسألك اللطف فينا...

وصلنه للمستشفئ،صعدنه للطابق السابع قسم الأمراض السرطانية

دخلنه لكينه ريهام تقره قران وامها كاعده تسولف ويه النسوان

دخل صلاح لزم ايدها وباسها ضل يحجي وياها وهي تجاوبه بهمس

حلوه علاقتهم عبالك اصدقاء وطيور حب وكلامهم كله همس

وصلاح عيونه ابد ما تنزل من من عيون ريهام

هي جانت مسويه تحاليل فراحنه اني وصلاح شفناهم كال الدكتور...كال للاسف تحاليل ريهام مو نضيفه والدم مصفر...

عاد صلاح تخبل وخابر علئ جاسر كله اريد متبرعين بالدم

وجاسر ما قصر دز بيهم كم واحد من جماعته تبرعوا الها

بس ريهام مجان اي،شخص يطابق دمها لان دمها o+

رجعنه للبيت وصلاح محتار شيسووي مدتصير زينه ابد

.........................

شهد

جنت كاعده اتعشئ الوحدي مقهوره حييل جعفر من طردني ما جبت بزونتي وياي

كله من وره هذا ابو العرك ما انطاني مجال

ابويه من شافني ضل يغلط عليه يكولي انتي وكحه وعرمه وتستاهلين الي يصير وياج

سكتت محجيت وياه شحجي اذا هو سندي ضدي

طلع هو ومرته واني ضليت الوحدي بالبيت اكل خبز وخيار هاي اتنسئ علئ خيار

ما اسمع بس طبطبه بالبيت خفت حييل كلت هاي يمكن حرامي

فرحت اقفل الغرفه وما اشووف اله دخل عليه باوعت عليه بخوووف شفته جعفر

حسيت كلبي وكف وعيوني،ضلت تدمع لا ارادي ياربي شجابه هذا

لزم اديه وهو سكران عرفته...حبيبتي شش شهوده كتلت جاسر موته موووته

كتله انت شلون تضرب شهووده انت شلون دكول وجهه الطاوه حامل جذب

بس ناس اغبياء اغبياااااء ما يعرفون دوالغ وجهه الطاوه

دفعته بغضب ..امشي اطلع برا من تسكر تصير آدمي ومن تصحئ تكلب عليه ...امشي،يالله اطلع اكرررهك

ولك ليش،تضربني واني حامل

لزم اديه بخووف ...تزوجتي ؟ تزوجتي

هزني،بقوووه....لييش ولج ليييش مو اني احبببج احببج انوب حااامل

يا كاااع انشكي وركعيني

ضل يهجم بنص البيت انوب جاب ماسحه ويركض بالبيت يريد يفلشه

واني اصررخ ولزم بي،اريده بس،يعوف الماسحه وهو يتطوطح...

وطبعا كله ما مفهوم كوه افهمه يعني عجييب...

اجه بابا ومرة ابوووي ابويه طاح بي،وطرده وهو يسب ويغلط

ابويه رجع عليه كال...امداج امده زوجج هو لو بي خير بيت مهيوب ما اخذوج اله

ذولاك خوانه شلونهم وهذا حمار

اني صدك ضليت ابجي ياربي شلون هييج ليش،جعفر لييش والله صار زين وترك الشرب

هسه شبي تخبل عليه والله حرامات والله...

ضليت ابجي حييل واشهك واندب امي خرب بالحظ المصخم

اني لو بعائله بيها خيير مصار بيه هيج ولا تزوجت...

..............................

جابر

خابرتني خالتي،صبريه كالت...تعال لديالئ عندي موضوع ضروري وياك

استغربت خليت ورحت بس كلت لابويه

وصلت لكيت خالتي صبريه كاعده بالبستان وبصفها كنوش

ابتسمت عليها كعدت بصفها كلتلها...خيير خاله شو ضايجه

كالت بحزن...هذا ابو اللول جاب ولده وهد عليه وانوب جايبله واحد ملاكم مدري شني،ويريد يبيع البستان

انه طلعت بمسدسي بس داوود العار غدرني واخذه مني

وهسه يردون ياخذونه غصبا عني، والله هو تعبي،وانوب يكلي لو الحلال،لو البستان لا هسه احركهن

تعصبت...شنو بكيفه دخلي يولي هسه اروح اطيح حضهم اذا يريد بالقانون اني عندي ناس بالقانون

يريد بالعشاير احنه العشاير ...

يريد بالحق الحق ويانه

خلينه ورحنه حجيت وياهم من باب البيت ما دخلت وهم هجم عليه ببواري وتواثي وسجاجين

صرت اشكف بالبواري والتواثي وصبريه وياي عضتلها واحد

بس واحد منهم ضربني ببوري براسي والثاني بيدي

حسيت بالدم غطه وجهي صارت عليه وليه والضاهر هم متحضرين

لزموني يكتلوني كلولها ...لو توقعين علئ التنازل لو نكتله

هي خطيه من خوفها كالت...اتنازل

اني بعد الدم غطاني وانهضمت حييل،صارت عليه وليه مال غمان

اتمنيت واحد وياي تمنيت عندي اخ يسندي صدك لو كالو الاخ نعمه

لو وياي جاسر صلاح حتئ لو جعفر جعفر ضدك سكير بس سبع ....

والقهرني داوود العار جان لازمني عوود حاجوز اني صدك جبته ببوكسي فلشت سنه

الظاهر هم متفقين عليه ومتحضرين وكل واحد يخابر واجتمعوا عليه

هاي اهانه اليه واني مجاي هادود اجيت احجي بهدوء ،بس هم تولوني

وطبعا البستان شركه بينها وبين ابو اللول

اني ذوول الغمان يضربوني يااا حييف اي والله يا حييف والله اله ااتفل بشواربهم....

.......................

جولييت...

صعدت فوك السطح ادور علئ مشمش وروضي،واشر ملابس هم دائما يلعبون بطيور جعفر

رغم جاسر يتخبل من الطيور ودائما يطيرهن بس جعفر يشتري ويضم

صعدت دا اشر بالملابس والكاهم مطيرين الطيور وحابسين الديج بالقفص

من شفتهم تخبلت لطمت علئ صدري ...عزا العزاني ولكم  الله اليوم جعفر يتخبل

رد عليه مشمش...هدا روطي قير قيور دعفر...روضي طير طيور جعفر...

مرتضئ تخبل صرخ بصوت عالي...شدااااب والله هو قير قيور

ذاك جيبه براشدي ومرتضئ يصرخ اله اعفه

مااااااا اعفه اعفففففه

مجتبئ خاتل ورايه ويكوله...نعله ابوووك

كتله بتوسل...يالله ماما حبيبي مو اخوووك خطيه يالله

حط ايده علئ خصره...ماااا اعفج انتي

مديت ايدي عليه بعصبية...يالله عض وفضني

اردفت بحزن...بس،علئ كيف مو حييل

تخصر وجاوب بعناد...لا اعفج حيييل

جاوبته بقهر...اي مو خبيث طالع علئ نوييله

رد بغرور...لاااا ممش قالع علئ وده القاوه

رديت بدون نفس...ديله فضني اريد انزل ...

هو عضني علئ كيف و وخر رد ببراءه...سكيته اني اعبج ما اعفج

ضحكت بفرح...يمه فدوه حبيبي،وليدي

اخذتهم صالحتهم ونزلت جوه بعد ما شريت الملابس

واني دا انزل وجعفر لاكتظني كلت...يبووو هسه يشوف الطيور ماكوو ويتخبل

نزلت بسرعه كلت خلي اسد باب غرفتي واكعد الوحدي واخلي يصيح الوحده منا لمن يحي جاسر من شغله

ما اشوووف اله جاسر دخل وهو يركض وصلاح وراه

صاح جاسر علئ صلاح بغضب...بسرعه صلاح طلع الرشاشه وجيب وياك الشاجووور

اني تخبلت وماما رضيه وام فلاح ضلت تصييح...عززا ولكم شكوو شصار

اني كلت يمكن عركه ويه بيت عمي

ضليت اصرخ وابجي وجاسر ركض اخذ مسدسه كال...جابر ضاربينه واحنه رايحيين لا تخافن

لزمته بخووف...فدوووه جاااسر فدوه علئ كيفك لا يكتلونكم

صرت روح بروح وياه وما خليته يطلع

بس اني لا املك قوة جسمه ولا طوله وضخامته

سحبني من كتفي شك ثوبي من الردن ودفعني واني ابجي واصررخ...جااااسر لا يكتلونك لااا

نهاية البارت...يتبع

كونوا انتم كونوا بخير...💔

نور سمو العراق...😘

اعتذر عن التقصير عزيزاتي ان شاء الله البارت البعده حيكون طويل باذن اللة

لا تنسوا التصويت والمشاركه بكم نكتمل...🌹

التصاميم كلها الطلحه 😍😍😍

اعتذر ما سويتله تاك ما اعرف شبي اليوم الواتباد😥