رواية #جوليت وأسرها.... الفصل الثالث والستون 63 - بقلم الكاتبه سمو العراق

البارت الثالث...الجزء الثاني
رواية...جولييت واسرها...غياهب الإنتقام
بقلمي...نور سمو العراق

💔💔💔💔💔💔💔💔💔

ماشي روحك
و ازرع الضحگه اعلى شفتك
هوه ياهو اليسوه حزنك

- احمد يحيى...

........................................

شهد...

اجت زوجة ابويه جايبه بزونتي،بكارتونه وكعدت يمي ضلت تسولف كالت...شلونهم عيالج وياج

ضحكت ...زينين خوووش ناس بس،وجهه الطاوه خالتي ام سجئ تتعيقل عليه شويه

مرة ابويه كالت...قصدج شريجتج مووو

هزيت راسي بأي...

كالت...خوش بلكي اطكها بسحر اخليها ما تعرف يسرتها من يمنتها

هزيت ايدي ...والله السحار احتار وياجن يصف وياي يصف ويه نويله جعفر ضال بنص وسحر نويله يجرجر بي منا وسحرج يجرجر بي منا لا حبيبتي لا تسوين سحر عوفينه من هاي  السوالف

غمتني وخلت وراحت واني حضنت بزونتي شكد مشتاقه الها عبالك زعلانه ورجعت الجهالها...

رحت الغرفتي من شاف جعفر بزونتي تكهرب وعدل كعدته بسرعه علئ السرير كال...هاي ام الوصخ شجابهه

ضحكت...يااا والله اصلا اليوم سابحه وكاشخه طالعه تجنن اني خايفه تطلكني اني ونوال وتزوجها ...

هز ايده هو اني هذا حضي ...

باوع البزونتي كال...اكلج هاي ذكر مو انثئ لو تشمرينه بزباله لو تلبسين كدامه حجاب

حطيت ايدي علئ صدري...يااا عزا هي حيوان شنو البس حجاب

باوعلي بنص عين كال...حيوان ؟ شوفي عيني اني كلشي ولا عرضي عاد انوب مو عتوي فرعون يباوع علئ حريمي

رديت عليه...غير يستقر السلطان سليمان حريمه انوب

ضحك ...اي والله كون اتزوج اربعه اله اخليجن تترحمن علئ السلطان ...

بس عمي وين اتزوج اربعه اذا اني نويله ما اتحمل صوتها نهار كله بس تلعلع ليكول السماعه مال جامع النداء...

لا والله عمي تروح ستين فدوه لسماعة جامع النداء علئ الاقل نستفاد منها اذان حكمه مقوله حديث نبوي

اله نويله شنستفاد منها هيئة الامر بالمنكر والنهي عن المعروف ...

باوعتله برفعة حاجب...دكول عود انت من اني اروح الاهلي تدغدها وتشاقه وياها

هز ايده...وليس هي نويله تتدغدغ جلدها جنه جلد تمساح

كعدت يمه...لا جعفر انت ليش تجذب الشهاده لله ترئ هي حلوه وتعدل بنفسها وبشرتها صافيه ونافخه حلكها...

رد بتذمر...دخلي تولي براطمها واصله الغرفة جاسر والله هسه لا اطلع وياها المكان ااجر الها تكسي واجر البراطمها تكسي

ضحكت بصوت...كلها لا تنفخين بعد

رفع اكتافه بعدم اهتمام...شدخلني بيها بلكي علئ،يوم تضرب الها ابره وتموت ونذر عليه طلي لابو فاضل واربطه بحلويات المصطفى...

ابتسمت...جعفر ولا شويه تحبها

باوعلي بقرف...اني من جانت زوجة فلاح اكرهه اموت منها ولج هاي حييه حتئ فلاح خبلته علينه

وترئ،هاي نويله ماخذه فلاح علئ حب عشتو وهسه تراودني،عن نفسي..

هزيت ايدي...شنو حب لعب جهال

تقرب مني وهو يشم بعنقي برومانسيه . اذا اموت هم تزوجين بعدي

حطيت ايدي علئ شفايفه..يمه اسم الله لا والله ولا اتزوج انت موت وشوف والله اذا تزوجت تعال اكتلني

ابتعد شويه كال...اي هم نويله كالتها الفلاح وتاليها تزوجت وهو اجاها بالحلم يريد يكتلها

لزمت وجهه بثنين اديه وبسته حييل...اني مو مثل نوال اني احبك من صدك واني معدله ونادره وكلها تحبني

كلها دكول هنيال جعفر عليج معدله ونصبه وام بيت

رد عليه بملل..استقري ام رضا استقري اذكرج بالقميص لو اضل ساكت

ضربته بدلع...اووو لا تذكرني

عض شفته حييل...احتركوا اهل نوال احتركت عشيرة نوال ولج اليوم اكلج واكل الخلفج

تقرب مني وهو يبوس بيه واني مستسلمه اله وعايشه وياه لحظه بالحظه

بعدها رحت سبحت وكعدت امشط بشعري وهو راح سبح ...

عندي اندومي طلعته اكل بي يابس احبه يابس اخلي بي البهارات مالته واكل هو دخل كال..يالمعدله ما توكمين تطبخي اشو حتئ طريقة التحظير كاتبيها الج

وبعدين شنو هل خبز اليابس تاكلين بي كله مواد مسرطنه ويضر بصحه

همست بكلبي.. انهجم بيت العرك مسرطنه وتضر بالصحه لعد العرك ينطيك مناعه شنو...

خليت وطلعت واشوف نوال واكفه وترش بباب غرفتي من شافتني ارتبكت وضلت ترش بالبيت وتمسح بالماسحه...

ضليت اباوع عليها ما مطمئنه كالت...خير خيير شبيج تباوعين مي نضيف وبي عطر امسح بي الكاع

عفته ورحت دخلت جووه طبخت الاندومي كلت خلي اوكل جهال جاسر وياي

رحت ادورهم ما لكيتهم كالت رضيه يم امهم...

شفت خالتي ام فلاح دخلت هي وجاسر دخلوا للاستقبال واني طرت وراهم المحقق كونان البداخلي يحب يستكشف...

حطيت اذاني علئ الباب واني اسمعهم

دكوله.  ليش يمه جاسر ليش تطردني من غرفتك علمود مرتك

رد عليها بهدوء...لا يمه ما عاش الي يطردج اني ما طردتج بس بيني وبينها خصوصيه ما احب احد يتدخل او يحجي وياها غيري

حاجته بعصبية..بس هي طردتني وغلطت عليه وفشرت وضلت تدعي عليه هل بنيه صلفه وفكر من شفناها ما شفنه خيير طلكها وخلصنه منها...

جر نفس...عوفيها هسه ويمه هاي حياتي واني حر بيها واني الي اقرر ماكو داعي تنطون قرارات لان اني اذا حجيت كلمه ما اتراجع عنها وكل رأيي ينطرح عليه اذا اني ما مقتنع بي ما اطبقه

جاوبته...يعني تخليها عله علئ كلبي ولك يمه باع شلون متغير وين ذاك جاسر الصلب ليش احسك متكدر وتعبان والله اعرف كله بسبب هل عله هاي

طلكها واخطبلك تاج راسها اذا تريد هاله بنت خالتك اجيبها الك انت مو تحبها وعندك علاقه بيها

جاوبها بصدمه...شنوووو علاقتيش يمممه هاله مجرد وسيله وبعدين التبيع اهلها شلون اامن بيها واخليها ببيتي

ترئ هاله هي الي باعت ابن عمها اليه وخلتني اخذت حازم ومن عرف عاصم اخو مخطوف اجه وهد عليه وكتلته

الموت واحد والاسباب تعددت لو ما هاله جان حازم اخذ الفلوس وهسه مسافرين

بس هاله هي الغدرت بيهم ترديني اتزوج وحده غدرت باهلها شلون اثق بيها شلون ما باجر تغدر بيه...

هاي جولييت اخوها قاتل وما قبلت تغدر بي

اردفت بحنان..ولك يمه انت ليش ما تفهم هاله لان تحبك وتريد خاطرك كلشي تسوويلك بس ذيج الحيه ما تحبك وتحب بس نفسها انانيه وتتعاير تدافع لاخوها المجرم وانت تتمنالك لسجن..

شلون مره هاااي والله منك اكتلها وادفنها بصف اخوها واخذ جهالها منها ...

ترئ اني متت منها وتعبت شايف من تزعل وتقفل بابها عليها اتمنئ اجيب بانزين وحركها هي والغرفه

تنهد بضيق...مدام هلكد كارهتها راح اطلعها ببيت هي ورضيه وسلام

صاحت بصوت غاضب...لاااا والله صدك تحجي انوب حتئ تاخذك حاصل فاصل والله ما ادري شمسويتلك هل مكموعه حتئ كاتل روحك عليها

شو حتئ مو مثل النسوان قايمه بواجبك طلكها خلي تولي وخلي مجتبئ عند اختك لان هي ما مهتمه للولد وراح يموت من وراها

جاوبها بحده...كاااافي يمممه انتي امي ما اكدر انطق اي كلمة بحقج ولدي خط احمر لا تخلينهم بمشاكلج

ما حسيت اله صار بوجهي اني جمدت من الخووف عزا ضليت اباوع اله بخوف وبراءه وهو جانت نظراته حاده وبعدها خله وراح

حطيت ايدي علئ صدري يمه الله يساعد جولي علئ هل نظرات يموووت من الخووف

واني حاسدتها ثول حتئ ثول...

هو خله وراح اخذ حتئ اغراضه كال لرضيه عنده شغل

وامه من طلعت لزمت اشواق تحجي وياها واشواق ابتسمت وضلت تكلب بعيونها...

مر تقريبا يومين اوضاع عاديه واشواق رادت تروح لعيالها اجه زوجها

اني خليت وصعدت فوك اغسل زوالي وسجاوي واخواتها ويايه يكولن انتي،زوجة زوج امنه ومكيفات

وما اسمع بس صريخ جولي نزلت اركض والكاها جولي تصرخ ابنها ضايع....

.............................

جولييت...

الضنا غالي ..كلمه تنكال بكل زمان ومكان ولا احد يكدر يمحيها..معناها كبير واحساسها اكبر...

الضنا غالي لمن تتوجعين يتوجع وياج ولما تسيل دمعه توكع وياها دمعته تضحكين لضحكته وتبجين البجيته...

الضنا غالي وعمره ما يهون حتئ،اذا كبر وقسئ ونسئ انتي مراح تنسينه ...

كلبج عليه حتئ اذا هو كلبه عليج من الصخر...

لبست عباتي وطلعت اركض ادور عليه اني وماما رضيه ندور عليه واني ابجي وكلبي ملهووف ورايح عليه ما خلينه مكان ما دورناه

وكعت علئ ركبي واني ابجي...يمممه مجتبئ مجتبئ ويينننننننك...

ضاع مني مجتبئ وليدي الكريض ضاع مني

اجه رجال كبير كال...كومي عمي كومي هسه ان شاء الله نلكاها خلينه نصيح بي بالجامع

رضيه لزمتني كالت ..كومي،يمه لا تخافين هسه نلكاها خلينه نصيح بالجامع

باوعتلها ببكاء...يمه مجتبئ معووق وطفل اكيد باكو يمه ياووويلي حبيبي وليدي وين الكاك سوده عليه

شلون غفلت عنك

رحنه للجامع واني كوه امشي وملهوووفه وابجي ومرتضئ يمشي كدامي،ويبجي

وكل شويه وكال...شبه بادو حمامي...مجتبئ باكه الحرامي...

ماما اني حب شبه

شهكت علئ كلامه ولزمت ايده واني امشي وصلنه للجامع صحنه باسمه ماكو

عاد هنا تخبلت ضليت اصررخ وابجي وماما رضيه تبجي وتهدي بيه

لان لحد الان تقريبا ساعه واحنه ندور وماكو

بعدها تتصل موبايل رضيه وطلع المتصل شهد كالت...تعالي ماما مجتبئ موجود...

من كالت هيج اني فرحت وحضنت مرتضئ واني اضحك...يممه حبيبي لكو اخووك لكو

خلينه ورجعنه واني امشي بسرعه وملهووفه اريد احضنه واضمه الصدري واشم ريحته ...

وماما رضيه تركض ورايه واني امشي ولازمه مرتضئ بيدي المعاقه....

وصلت للبيت دخلت باوعت الخالتي ام فلاح ونوال وشهد وريهام لابسه الكمامه وكاعده بتعب

باوعت الهن ببتسامه مخلوطه بدموع...ويين مجتبئ

ردت عليه خالتي،بقسوه...هامج مجتبئ مووو؟ شو لا مهتمه اله ولا شئ ولو ضايع ما تدرين بي واني بسبب اهمالج انطيته الاشواق

فتحت عيوني بصدمه وانفجاع....انطيتي مجتبئ الاشواق

جاوبت بثقه...اي اني كلت الجاسر مرتك ما مهتمه بالولد وهو كال انطي لاشواق لان مريض حتئ تداري ...

شعلت عاصفه بداخلي وعيوني احس مثل الرمل دخل بيهن  بلعت ريكي بتعب من ضلمها صرخت بصوت مزق اوتار صوتي...شلوووون تنطيين ابني باي حق تنطينه

انتي مو ام لييييش ما تحسيييين بيه انتي ام وفاقده ضناج شلووون تحرميني من ضناي

حسبي الله ونعم الوكيل عليكم

ليش شلون تحرميني من ابني وتحركين كلبي عليه شلون انطاج كلبج تقبلين واحد ياخذ ضناج منج

جاوبت بحده...اخوج المجرم مو اخذ ضناي مني

ضربت علئ خدي بنجيب...وقتلتوا ومااات واخذتو حيفكم ابني هل طفل البريئ شنو ذنبه تبعدينه عني

نوال كالت بدلع...ابووو هو انطاه لاخته وجبر خاطرها

رفعت اصبعي المتعووب ورديت من بين اسناني....لااااا مستحيييل جااااسر ما يضحي بمجتبئ مستحييل هو روحه ودنياه مجتبئ

مجتبئ دوه جروح ابوو. شلون جاسر ينطي دواه لاخته ...

نوال...ديله عيني علئ شنو خبصتي الامه هو معوق حتئ لو بي حظ جان شسويتي

صرخت بوجهه...ماكووو معوووق غيرج يا حيوانه

نوال بغضب...انجبي لا احط النعال بحلكج ولج اني ام سجاوي مرة الجبير بهذا البيت مرة الحيد فلاح علئ سن ورمح

جاوبتها بعناد...انجبي انتي الجبير دفنتي ورحتي عرستي علئ الصغير

شهد....

فرحت من هيج حجت جولي اجيت ابوسها بس خفت ترفسني لان جولي مجنونه علئ ابنها ومنهاره

رديت عليها...لا تجذبين انتي مرة الصغير جعفر اصغر اخوانه وجولي هي مرة الجبير

واذا تعتبرين نفسج مرة فلاح تطلكي من جعفر حتئ ما تسقط عنج الدرجة التقديريه مال مرة الكبير

هي خزرتني وكعدت تتلاطش هي وجولي وام فلاح تصيح وتغلط

عاد دخل صلاح وعرف امه انطت الطفل لاخته وهو تخبل ضل يحجي علئ امه

ويحجي علئ نوال رزلها رزاله ناشفه حرامات جعفر مو هنا...

جولي ضلت تفتر بتعب بالحووش كالت لرضيه...ماما انطيني موبايلج اخابر جاسر اكوله صدك هو منطي ابني ...

انطتها الموبايل وهي خابرته وضلت تبجي وتعاتب بي...وهو قفل الخط بوجهه....

...................................

جابر

هسه رجعت من دوامي ودخلت للبيت اتصل موبايلي باوعت شفته جاسر تنهدت بقلق وفتحت خط رديت بهدوء...هلا بابن العم شلونك

رد عليه بجموده المعتاد...هلا بالنسيب وين انت ؟

عقدت حواجبي،من سؤاله جاوبته...بالبيت خير محتاج شئ ؟

لحظة صمت وبعدها كال...اي جابر اني رايح للنجف تجي وياي

انفجعت من كلامه شعنده بالنجف ليش يريد اروح وياه جاسر صاير ما يطمن هذا بس،لا يكتلني ويدفني لان قبل هربت مرته منه

بعدها ضحكت علئ عقلي لا جاسر صديقي واخووي ومن الصغر اني،وياه واثق بي اكثر من روحي بس صارت عندي ردة فعل لان ضرب عاصم

جاوبت بمرخ...تدلل ابو مرتضئ ان شاء الله بس اسبح اجيك وانت غديني عوود هههه بس صدك جاسر انت مو بغير محافظه شجابك

رد بهدوء...اي رجعت اليوم بس روحي اشتاقت للنجف محتاج اسولف البنتي احجي وياها بلكي تدعيلي،من ماتت لحد الان واني حياتي صعبه..

تدري محتاج لابووي اني ابوي جانوا يسمونه كضاي الكلافات والعنده طلابه يبات يمه وماكو مشكله ما يدخل بيها بالخير ...هسه اني ضال بحيره من بعدهم اريد واحد يحل مشكلتي،ماكو

جريت نفس طوويل.. الله يرحمهم ويصبركم وان شاء الله مكضيه هسه ابدل واجيك بالبيت انت؟

رد بسرعه...لا مو بالبيت اني طالع راح اجي اوكف علئ شارعكم واخابرك وانت تعال تمام

جاوبته..ويالله تمام

دخلت استقبلتني وقار باهتمامها المعتاد وضحكتها الحلوه ولهفتها عليه

يوم عن يوم احبها واتعلق بيها واخاف عليها ومنتظر الله يرزقني منها طفل...

كلت لابوي رايح للنجف ويه جاسر وهو مكال شئ خليت وطلعت بعد ما خابرني رغم امي ما قبلت تروح كالت طريق النجف خطر علئ ساعه تمردكم تريله وتموتكم بس اني ما اكترثت الكلامها ورحت ركبت ويه جاسر بعد ما سلمت عليه

انطلقنه لارض النجف الاشرف وجان السكوت سيد الموقف

بعدها اني،قطعت حاجز الصمت وسالته بهدوء وترقب وقلق من سؤالي...شلونها اخيتي ام مرتضئ؟

باوعلي بسرعه وغموض وبعدها مسح علئ شواربه...مو زينه

جاوبته بلهفه...شبيها مريضه لو لان قتلت اخوها

رد بهدوء...مريضه

فشلت من اسالتي،وفشلت اكثر من اجوبته المختصره بس فضولي،اقوه مني كتله...شبيها مريضه

باوعلي بملل وبهدها انتبه للطريق وكمل...اولا هي ما قبلت تروح للطبيب بس قبل فتره صارت عندها هاي الحاله وهل مره تازمت لذلك اتصلت بنفس دكتوره وكال بداية صرع

انفجعت من كلامه كتله بصدمه...صرررررررررع

وكف بنص الطريق وما كمل سياقه غمض عيونه وبعدها باوعلي ببتسامه حزينه...اي صررع

جاوبته...حقها البنيه هواي تحملت زين منها ما انتحرت علئ هل عذاب وحركان الأعصاب الصار صعب وهي الوكعت بينكم بالنص...

رد عليه بعصبية وجبروت ...جاااابر اني الي تحملت هوووواي وساكت ما اريد اجرحها وااذيها اكثر اعترف اذيتها وعذبتها وزعلتها وطغيت

بس اخر فتره تغيرت واخاف علئ شعورها لذلك ما اريدها تكون بدون اهل ترئ اهلها طغوا اكثر مني،

هم بعيدين عنها وما يشوفوها تتعذب بس،اني صايره كدام عيوني اشوفها شلون تتعذب وتنهار وتنصرع وما اعرف شلون اطيب خاطرها لان اني فاقد الوسيله

صعب اجي اكلها اهلج تبروا منج صعب اكلها امج نكرتج وحتئ هسه بعد موت عاصم ...

امها طلعت هي وعاصم من العراق وكالت البلد الي ما احتضني ولا احتضن ابني ومات بي ابني مقتول ما اضل بي ...

يعني بهل حاله اني شلون اتصرف شلون اكلها امج سافرت وعافتج مره ثانيه

جذبت هاله وكلت جذابه احتمال تريد تسويها مثل من مات ابوها واتهموا جولي باطل

بس صلاح بالجوازات وكال حازم وامه طلعوا خارج حدود العراق

بربك مره ابنها ما صار شهر من مات وبنتها اسيره عندي تسافر تعوفها...

جاوبته بحزن.. متعرف شنو ضروفها وشنو السبب الي،خلاها تترك جولييت وتسافر...

نفخ بملل...ولهذا السبب اني،محتار شلون اكلها بعد نوحج ولطمج وونج علئ،امج خذلتج للمره الثانيه

للللك جابر افهم جولييت محد الها غيييري الكل تخلئ،عنها بس اني اعرف محد يريدها غيري

بس بعد موت عاصم صارت بيني وبينها فجوه عميقه مستحيل تتصلح

تدري جابر جوه گلبي غصات مو غصه وحده وكلبي يعتصر ويوجعني،

لك والله دائما ادعي ربي اكله خفف عني،هل غصه الي بصدري احس بالموووت

جابر والله احس ايامي،قليله واحس الموت محاصرني

واتمنئ المووت بس منو الاطفالي شلون بيهم وهي هل خبله منو الها..

حطيت ايدي علئ كتفه كتله واني اواسي...كوول يالله ابو غزل عمرك طووويل ان شاء الله وتشوف احفاد أحفادهم..

سحب جكاره من باكيته وضل يدخن وبعدها انطلقنا لارض النجف...

وصلنه للمقبره وهو وكف بسيارته يباوع علئ قبر بنته من بعيد وهو تضرب بي الشمس وصمت وهدوء مهيب مخيم علئ المكان

ابتسم بحزن كال ...شوووف جابر احساسي يالمني من اشوف الغاليه مدفونه بالتراب واني ما اكدر اسويلها شئ

شايف شلون احساسي يالمني من اجي اعاتبها هي وابويه وهم ما يكدرون يسوولي شئ ولا يطيبون خاطري بكلمه

جريت نفس ...الله يرحمهم يا جاسر شوف غرور النفس وسخريه القدر كلهن بأن واحد وهو القبر ...

والعمل الصالح هو الشمعه الي تنير وحشة طريق القبر ..

ابتسم باستهزاء...واني قاتل وتلطخت ايدي بالدم يعني خاسر الدنيا والاخره ...

جريت نفس...انت دافعت عن نفسك انت مو قاتل واخذت حقك بالقصاص

باوعلي بغضب...اي اني دافعت عن نفسي واخذت حق بنيتي طفله وحرموها الحياة اخذت حق ابو فلاح هل الشيخ المهيوب الداخل ويه الناس بالمعروف ...

اطلق أخر جملة ونزل من السياره وهو يمشي بخطوات مليانه حزن وكسره وصل عند قبر ابوو زاره وضل يقره عليه دعاء اهل القبور..

وبعدها كعد عند بنته وحط جبينه علئ حافتة قبرها اني خليته براحته ورحت قريت الفاتحه الفلاح والعمي الشيخ وجبت مي رشيت عليهم...

وهو كل هل وقت منحني علئ قبر بنته ويحجي وياها بس ما سمعت ولا حرف بس تمتمه بالكلام

الله يصبره ويعينه ...

حطيت ايدي علئ كتفه همست...الله يگويك ابو غزل يالله خلينه نروح للامام علي علية السلام ونرجع مره ثانيه الهم...

هز راسه بقبول وبعدها رحنه زرنه الامام وصلينه ورجعنه للمقبره عاد هو متعلق ببنته حييل يروح الابو واخو شويه ويضل ساعات عند بنته...

وبعدها كال...يالله خلي نرجع البغداد

هزيت راسي بقبول وجاي نمشي جان وكف وهو يدخن كال...اريد اروح المقبرة اهل ام مرتضئ

استغربت وبلعت ريكي بتوتر...المن رايح ماكو داعي ابو غزل

جر نفس ...اريد اشوف قبر عاصم

انفجعت من طلبه كتله....ياابه شتسوي،بي،ترئ اني تعبت وحاره خلينه نرجع وعوف قبر عاصم

رفع حاجب بعناد...لا اريد اشووفه

مشئ كدامي بخطوات واثقه لزمته من ايده واني استوقفه برهبه...جاسر الله يخليك خلينه نرجع والله محلوه رايحين لقبور اهلها انت كتلته بعد هذا هو

نفخ الدخان من بين شفايفه ورد...عندي غايه يا جابر لازم اروح

حاولت وياه ميروح بس هو اصر فركبنه السياره وخلينه ورحنه لاهل جولييت بس اني جانت نار شاعله بيه ما ردت نروح لاهل جولييت..

بعده بالفتحه الرابعه واتصل موبايل جاسر باوع للرقم كال..اووه امي رضيه جابر رد عليها ما الي خلك ...

اني سحبت الموبايل من الجكمجه وفتحت خط شويه جان صوت الموبايل عالي كلت الووو...

اجاني صوتها الصااارخ والناحب...جاااااسر وينك

انصدمت هاي مو رضيه وجاسر باوعلي بصدمه وسحب الموبايل مني كال بغضب...انت شلون تفتح خط

رديت عليه بنفس الغضب...غير انت كتلي

باوعلي بنظره لووم ورد علئ الموبايل كال...الووو هااا جولييت شبييج ؟

جاوبته بنحيبها المعتاد...وييينك انت ويينك تعاال للبيت بسرعه

رد عليها بقلق وهو قابض علئ الاستيرن بقووه...احجي يابه شبيج لا تخبليني شكو شصاير ؟

شهكت بانين موجع وجاوبته بنهيار....خالتي ام فلاح انطت مجتبئ الاشواق واشواق اخذته وراحت للعماره

فتح عيونه بصدمه ودهشه وشد علئ شفايفه...وشلون تاخذه ومنو سمح الهااا

اختنكت بشهكاته وكملت بصوت متقطع...دكول انت انطيته الها...ليش تنطي شلون انطاك كلبك

هز راسه بوعييد وقفل الخط .بعدها خابر علئ اشواق ثواني وفتحت خط اجاه صوتها الخايف...هااا جاسر

صرخ بصووت متهدج...اشووواق يا كلبه اني بالنجف وراجع البغداد اذا رجعت وما لكيت مجتبئ كدامي ما تلومين اله نفسج

ردت بخوف..جج جاسر

قفل الخط وفر السياره واتخذ طريق السريع راجعين البغداد جانت عيونه نااااار مشتعله ونضراته غاضبه كلت راح يسووي بينه حااادث

همست بصوت هادي...جاسر خليني اني اسوووق وانت ارتاح تعبت اليوم

ما حاجاني وجان مركز بطريقه سوه الطريق ساعتين وصلنه البغداد وصلت تقريبا الاهلي وكف السياره كال...انزل جابر

بلعت ريكي بقلق عرفت الوضع ما يطمن وهنه داسن علئ طرف الكاسر اكيد اليوم يحركهن حرك

رديت عليه بحيرة...خليني اروح وياك

غمض عيونه بملل...جابر الله وياك

خليت ونزلت وهو انطلق بسرعه بسيارته البيتهم

هزيت ايدي لا اله الا الله اليوم جاسر يزلزلها عليهم...

.............................

جولييت

كعدت انتظره والنار مشتعله بيه احس روحي مثل مقابر محفوره بلووعه

كل شويه اكول اخاف من تجي اشواق بالطريق تنكلب بيهم السياره ويموت مجتبئ

وبعدها اطرد هل فكره من بالي...يمه اسم الله من عمري علئ عمرك يروحي

احس خلايا جسمي تصرخ مثل عاصفه هوجاء

اجت رضيه انطتني علاج كالت اشربي زين الج حتئ اديج تصير زينه

شربته بدوون وعي،مني ..بس حسيت شويه بتحسن...

ومرتضئ كاعد بحضنه وكل شويه ودخل ايده بصدري

باوعتله بقهر...انت شتبحوش جنك ابوك

رد عليه ببراءه...اليد الوس « فلوس »

ضحكت بحزن علئ كلامه...ولك عيب شنو شعندي البنك المركزي مال ابووك

رد عليه ببراءه...اني اسوف حقين لوس هنا...« يشوف احط فلوس هنا »

صفنت صدك احنه لازم نكون اكثر وعي حتئ الاطفال ما يتعلمون لان الطفل بسرعه يتعلم ويفتهم

اني دائما جاسر يوصيني بس من العجله انسئ واخلي فلوس...

ضربني وهو مبرطم...يالله ليد لوس اني احببج ما حب بابا قيني لوس لا احب بابا

ضميته الصدري واني اخفي وجعي ...من يجي مجتبئ انطيكم حتئ يروح عمو جعفر يشتريلكم

هز راسه باي ونام علئ صدري بسته بشعره الاشكر وضميته الصدري جريت نفس...وينك يمه حبيبي مجتبئ شوكت ترجعلي بعدك عني موت...

انفتحت الباب واني وكفت بسرعه  وركضت ومرتضئ كدامي يركض يصيح...شبه اده...مجتبئ اجه...

هم مجتبئ يسمي شبه... ومرتضئ...ططه ميلفضوا خطيه...

باوعت للباب شفت جاسر شايله وهو يشتكي لابو وعاكد النونه ويكوله...حمامي باد شبه

باس خده بجمود وما نطق بولا حرف ...

باوعلي بنظرات جامده حتئ بعدني ما ناطقه بكلمه خله وراح الغرفته ثواني وطلع...

همست بالم...مجتبئ وييينه

طلعت خالتي باوعتله بخوف كلتله...هاااا يمه الزياره مقبوله

هو مجاوبها بس جان عاكد حواجبه و وجهه نااااار علئ ساعه ينفجر...

بصراحه رغم وجعي والمي من شفته سكتت ..

جان قميصه شويه بي تراب جان بالنجف بس قبل لا يروح للنجف وين جان يومين ما شفته ولا زعجني...

تقريبا عشر دقايق ودخلت اشواق وجهه مخطوف وعبايتها علئ راسها ومبهذله بيها وشايله مجتبئ

هو من شاف ابوو ضحك و فرغص نفسه من اديها وهي نزلته وترجف من الخوف

وهو سوده عليه يمشي برجلي المعاقات كووه وكل شويه و وكع ويصفك ويباوع الابو ويضحك فرحان بابو

واني ابجي عليه ياربي شلون حرمني منه وشلون حرمنه من اخوو وابوو شلون راح اتطلك واشتتهم بينه وهو يموت علئ ابو

جاسر تجاهل مجتبئ الفرحان بشوفته وتوجهه الاشواق

هي كالت بخوف ورجاء وهي ترفع ايدها بتوسل..جج

بعدها ما مكمله كلمتها هو ضربها براشدي ارتد وجهه للجهه الثانيه واهتز جسمها صرخت بصوت عالي وهي تحط ايدها علئ وجهها

امها صاحت بعلو صوتها وهي تركض علئ بنتها الوكعت من اثر الضربه وهي تنحب وتبجي ...

لزمتها وهي تباوعله بصدمه...جاسر تضرب اختتتك

زمجر بوجهه بصوووت عالي...مووو اختي هاااااي مو اختي الي ما تحترمني وما تعترف بوجودي،مو اختي

شلون سولت الها نفسها واخذت ابني بدون علمي شنوو اني رجل كرسي هناااا

والله اليوم احرك البيت علئ روسجن تماديتن هووواي واني كلتلجن كلشي،ولا ولددددي

ردت عليه من بين دموعها...خوويه جااسر

صرخ بوجهه بعصبية...اششش لا دكوليين خوويه اني مو اخوووج اني مو اخوووج شلووون ولج تاخذين ابني بدون علمي وتحرمينه من امه ومن اخوو

ولجن يا مجرمات شخليتن للعالم الغربه اذا انتي اختي هيج تتصرفيين

حطت ايدها علئ خدها وردت عليه...والله امي كالت اخذي

رجع جاوبها بعصبيه وضرب ايده بباب المطبخ الكزاز تفلش بيده ....وانتي بكييف امج ما كلتي هذا ابن اخوي شلون اخذه والله والله بسيطه اذا ما مشيتجن علئ سراط المستقيم ما اطلع جاسر

هي ركضت عليه وتبوس بيده...والله خويه مو قصدي

دفعها بغضب وباوعلي بحده ومشه لغرفته. 

راحت وراه رضيه واني اخذت مجتبئ ابوس بي واحضنه وهو حاضن مرتضئ وكل شويه وباوع الغرفة ابو وكال بزعل...بابا بي اوووا بيده..« بابا مضروب بيده»

هي اشواق وكفتها امها واخذتها وخالتي ضلت تدعي عليه وتغلط ابد ما جاوبتها بس انقهرت علئ اشواق خطيه الله يرزقها بالطفل...

اجت رضيه مخطوف لونها من غرفة جاسر كالت...روحي يمه روحي داوي ايده يردج

اول مره خفت ما قبلت بس هو عاط بصوت عالي كال...وينجن

اخذت المعقم والشاش ودخلت وزعاطيطي ورايه هجموا علئ الغرفه يبوسون بي بس هو يرد بهدوء

ويكلوله..هايه اواا ابوسه وقيب...وطيب

هو يهز براسه الهم بأي وهم يبوسون بيده

ضمدته اله بس كلي ارجف وحتئ ما باوعت لعيونه

كال بهدوء...ان شاء الله السبت الجاي اخذج الامج

باوعتله بصدمه وبلعت ريكي كتله...واطفالي

رد بجمود..خليهم عندج

مسحت دموعي وخليت وطلعت وهم ضلو عنده...

ابتسمت بالم واخيرا راح ياخذني عند امي واخيرا راح اطلع من كهفه وانتمي الامي واطفالي،وياي الحمد لله يارب الحمد لله....

.......................

وقار

راح جابر للنجف شكد توسلت بي اروح وياه جنت اريد اروح ازور بابا بس هو مقبل كال...رايح ويه جاسر وجاسر شويه يتعب

ما حبيت اناقشه وخليت وسكتت

راح هو واني موبايلي كل شويه واتصل ومكتوب اني بينه جاوبي

كتبت...هلاو منو انتي

ردت بسرعه...اني اخت احمد الي جان يحب زوجة اخووج جاسر... خطيب هاله

عقدت حواجبي...اي وشتردين

كتبت...صدك جولي حتتطلك

جاوبتها بملل...لاااا ليش تتطلك عندها ثنين ولد منه

كالت...اممم مو هي مراسله اخويه وكايلته راح اطلك لان عود جاسر كاتل اخوها مووو

استغربت كلتلها...شنو هل كلام منين جبتي هل حجي وبعدين جولي وين شافت احمد مدري منو

كتبت بضحكه.. ههههه والله يروحي باعي هي مو انهزمت لديالئ وجانت تخابر عليه من رقم المره الكاعده عندها

وكم مره احمد راح الها عفيه كولي الزوجها يلزمها ويكفينه شرها ترئ زوجة احمد بنت عمنه ونحبها ومن وره جولي راح نخسرها

يا اما يلزمها ويسكتها يا اما اخلي امي تجي وتفضحها كدام رجلها

فتحت عيوني مصدومه ...عزااا شهل كلام تحجين صدك انتي لو تجذبين

كالت...اي والله اذا تردين اخابرج وافهمج والله خطيه مرته يتيمه وفقيره وهو هسه طاردها بسبب زوجة اخووج هي مو مزوجه شكو هيج تسوي

كتبت...مستحييل ما اصدك

كالت...عندي دليل اذا تردين ارسله الج

كتبت باستغراب ..شنووو

كالت...مقطع فيديو بعرسج هي رسلته اليه من خابرتها ورزلتها كالت شوفيني اجنن اكيد يموت عليه ويطلك جنتكم...

كلتلها انتي مو متزوجه كالت عادي اتطلك...

انرعبت من كلامها كلتلها...ارسلي

صدك رسلتلي المقطع بعرسي وهي جولي تركص هاي قبل لا يموت ابوها او ابوها ميت وما تعرف

انصدمت ...عزا يا كلبه يا ساقطه بسيطه والله اذا ما انطيت المقطع الجاسر وخليته طلكج ما اطلع وقار

لج انتي شنو هل حشره المهتلفه وتخونين اخويه تاج راسج يا حيوانه ..

تنفست بضيق وضليت افتر بتوتر هاي صدك تحجي وبعدها هي البنيه رسلتلي صورة عرس جولييت بس صورة جاسر مكصوصه بس جولي هماتين مرسوله

حسيت نار شبت بداخلي

ضليت يومين متوتره خابرت امي كالت...جاسر،ضرب اخته لخاطر جولييت

ضجت وهاي البنيه ضلت ترسلي سكرينات بين جولييت واحمد كالت...هي متراسل من رقم معين تراسل من اي رقم وتحضره لان كالت ما عندي موبايل...

هزيت راسي ...اي اكيد تراسل من رقم رضيه وصبريه ويمكن حتئ من شهد شكد ادبسز ...

كلت الجابر ياخذني الاهلي اول مره مقبل بس تالي كال يالله امشي

خليت ورحت لكيت جاسر مو هنا تعشيت يمهم وهي جولي مشفتها ولا اريد اشوفها معتكفه الزماله هي واطفالها...

اجه جاسر شفته دخل الغرفته

رحت وراه و دكيت الباب ودخلت سلمت عليه وهو رد ببرود

طبعا جاسر حييل يحبني ويحترمني يكول انتي حبابه واني احبه لذلك ما ردت ينام ورجلي بشمس

كعدت بحزن كال ببتسامه بارده...شعجب جايتني بالعاده دائما يم ريهام

بلعت ريكي بغصه...مقهوره عليك خويه

عقد حواجبه باستغراب...ليشش؟

بجيت بصوت مسموع ونزلت راسي كتله...جولي تخونك

حسيت انعصرت عصر من لزمته الاكتافي،كال بغضب وهو يهزني...شتحجين انتي شنو تخوني ويه منوو وشنو دليلج عليها ادري بيجن تكرهنا بس مال توصل للشرف لا والله اكسر اركابجن

هزيت راسي بنفي وطلعت موبايلي...لا اني ما اكرهه بس هي تخونك ويه احمد خطيب هاله وأخته خابرتني وهذا دليلي عليها...

نهاية البارت...يتبع

كونوا انتم كونوا بخير...احبكم 💔

نور سمو العراق 😘

لا تنسوا التصويت والمشاركه بكم نكتمل احبتي🌹

وتابعوا هل حساب فضلا وليس امرا Zeina199972

من ابداع طلحه 😍😍😍

Talha-25-3