البارت الرابع
رواية...جولييت واسرها..غياهب الإنتقام
بقلمي...نور سمو العراق...
💔💔💔💔💔💔💔💔💔💔
اني ربتني التجارب لا مشيت بزود ناس
ولا صرت تلميذ احد 💔
لا تنسن النجمه البرتغاليه التصويت 🌚🎳💣
.....................................
حسيت انعصرت عصر من لزمته الاكتافي،كال بغضب وهو يهزني...شتحجين انتي شنو تخوني ويه منوو وشنو دليلج عليها ادري بيجن تكرهنا بس مال توصل للشرف لا والله اكسر اركابجن
هزيت راسي بنفي وطلعت موبايلي...لا اني ما اكرهه بس هي تخونك ويه احمد خطيب هاله وأخته خابرتني وهذا دليلي عليها...
سحب الموبايل من ايدي بقسوه وهو يباوعلي بنظرات ناريه وحاقده
رد بغضب...دليل شنووو اي دليل الي تحجين عنه هي جولييت وين شافت احمد حتئ خانتني وياه شهل مهزله الي انتن بيه
يعني انتن ما اتوبن مني تعرفن نااار متسعره وملتهبه بصدري وتعرفن ام مرتضئ لا تطلع ولا تمشي لاي مكان وحتئ موبايل ما عندها منين بعد تخابر وتتراسل وتخوون
رمشت بعيوني وتراجعت خطوات من عصبيته وجبروته...خويه اهدئ لا تزعل روحك لخاطرها هاي متسوه وهاي وحده خاينه
اعرف ما عندها موبايل واعرف متطلع بس هي من اي موبايل تتراسل مثل ما سوت وراسلت اخوها
وانت يا جاسر ما تفوتك فايته شعجب ما لكفتها بس من اتصلت باخوها لكفتها
حسيت طرت من بين اديه سحني من ثوبي بكل قسوه ...لا تشككيني بروحي ولج وقااار ولا تضلين تلوفين وتدوريين مرتي اذا خطت خطوة وحده اعرفها وين اتجاهي
مو اني جاسر الي زلم مشوربه تمشي باموري زتاخذلي تحيه مرتي تخووني ولا منووو جولييت ههه
بلعت ريكي بخووف...بس سوتها من قبل ونهزمت وهي،علئ ذمتك وطلعت لغير محافظه يعني عندها سوابق
لزم وجهي بعنف...ليش تخليني اشوهه وجهج براشدي مثل ذيج اختج
ام مرتضئ من طلعت الها اسبابها ما طلعت خاينتني لااا طلعت خايفه مني ومن التهديدات الي تعرضت الها وطلعت رايحه الامها
وبعدين زوجج هو الي خفاها عني لذلك لا تكعدن تطعن بعرضها لان هي عرضي
وبعدين انتي الي جايه مناك الي جاي جايبه وياج مقطع وصور ما خفتي مني اتهور واموت البنيه بيدي..
وانتي مو انشرت صورج ومقاطع فيديو وجان مو ذنبج ذنب داوود العار يجوز جولييت هم هيج
نزلت راسي ...ما اعرف هي البنيه خابرتني وتشكي،من جولييت وانطتني معلومات مموجوده بس بيتنه ...
بلوعلي وهو عاقد حواجبه كال....افتحي موبايلج وخليني اشووف يا كلبه بنت سطعش كلب تريد تتهم مرتي
فتحت الرمز وانطيته اله باوع بي وقره الرسائل والغزل بين جولي واحمد كلت حيذبحها
ابتسم كال...هذا مو اسلوب جولييت هذا اسلوب هاله
فتحت عيوني مصدومه من كلامه وثقته...شنو اسلوب هاله تحجي صدك شلون عرفت اسلوب هاله
رد بغرور...اسلوب رخيص دائما تستخدمه هاله وجولييت مو رخيصه حتئ تستعمل هل اسلوب
انطيني الصور الفيديو خلي اشووف
فتحت الفيديو جان الفيديو مال عرسي وجولي تركص بي علئ نغمات هادئه وبحركات حلوه ...
وصور عرسها بس هي جولييت حركت صور العرس الالبوم هاي الصور منين
غلق الموبايل وقبض على ايده بغضب كال...هذا التصوير بس عند هاله بنت الزمال وكالت حذفته بعد ما طيحت حضها وهي الي،صورت جولي ورسلته الاهلها...
وهاي الصور عند ام جولي واكيد من انهزموا ضلت الصور بالبيت وهاله الزباله هي الي اخذت الصور ورسلتهن...
رمشت بعيوني بخوف...قصدك هاله هي الي رسلت الفيديو الاحمد وصور جولي عزاا شلون مصيبه شلون هسه صور جولي والمقطع عند احمد
هز راسه بنفي...لاااا مستحييل هاله ما راسلته لان احمد مسجون وساحبين من الموبايل بس هاي هي مسويه حسابات وهميه وتراسل وترد علئ روحها
بسيييطه اليوم يا هاله اذا ما خليتج تتمنين الموت وما تلكينه
رمشت بعيوني وبلعت ريكي...يعني هاله سوت كل هذا زيين لييش؟ كل هذا حقد
هز راسه بوعيد...اي تريد اطلك جولييت وتفضالها الساحه من زمان وهي هاي غايتها مع العلم لا واعدها بزواج ولا كلتلها احببج
حطيت ايدي علئ شفايفي واني ابجي...جااااسر فدووه ابوس ايدك شسوي هسه اني شلون هيج صدكت واجيتك اركض
رفع حاجب بثقه...لان غبيه
شهكت من بين دموعي...وستيين غبيه...
لزمت ايده واني اتوسل بي وابوسها فدوه جاسر يعني بعد متحبني ما تعتبرني اختك لان فتنت علئ جولييت
والله اني لان احببك واعتبرك مو بس اخويه اعتبرك ابويه واجيت وحجيت الك والله ما ردت تنجرح ولا ردتها تتماده وتكسر بيك
باوعلي بجمود وبطرف عينه....انتن النسوان ما تصدكن تلكن حجايه السر عندج خمس دقايق وبعدها انور الحمداني ما يلحكجن
خلي هذا درس الج اتاكدي من السالفه يالله تجين تحجين وانتي اكثر الناس تعرفين جولييت شكد فقيره و تستحي
لج هي جعفر وصلاح وياها بالبيت وهي تستحي منهم هي لا تربيتها ولا اخلاقها تقبل الها تسوي هيج
وهذا جابر شوفي والله يكول ام مرتضئ قليل امثالها مثل ريهام بادابها واخلاقها
بس الذنب مو ذنبج ذنب ذيج العاااار
البسي بسرعه وامشي وياي
انصدمت ولزمت ايده...عزاااا وين نروح
جر نفس ...البسي،ومالج شغل
صدك اني لبست وكملت خابرت جابر كتله راح اروح ويه جاسر كال وين جاوبته والله ما اعرف قبل بس جان فضوله قاتل
باوعت الجولييت شفتها تحجي ويه اطفالها وتلعب بيهم وهم يغردون عليها
حطيت ايدي علئ كلبي واني ابجي...عزا لو ما جاسر اتفهم الموضوع وعنده معرفه بهاله جان هسه اني حرمت ام من اطفالها ويمكن جاسر يكتلها ويدفنها
الله ينتقم منج يا هاله ما لكيتي غيري تورطينه الله ينتقم منج
خلينه وطلعنه تحت نظراتها المتسائله...بس قبل لا اطلع سلمت عليها وحضنتها وبجيت وهي عبالها ابجي علئ اخوها
.......................
جولييت...
من رجع اليه مجتبئ لحد الان واني شويه حالتي احسن حمدت الله وشكرته
وكلت الحمد لله حرجع الامي بس هي امي ويين بيا أرض هسه وليش ما اجت شافتني والله تعبت بس من التفكير
بس مدام كال حاخذج الهم معناها امي تريدني
حسيت شويه صار عندي نشاط ومرح ضليت اهتم باطفالي بس ابد لا اشتغل الهم ولا اسأل عنهم
بس صدك رحت شفت ريهام كعدت يمها شويه
لكيتها تقره قران ومحنيه علئ ضهرها
دخلت اني وزعاطيطي باوعت الها وابتسمت وهي سدت القران وكفت سلمت عليه جانت لابسه كمامه
وجهالي هجموا علئ الغرفه وكحيين ومو مؤدبين رغم اني جنت فقيره من صغيره بس احتمال ولا ليش احتمال اكيد جاسر جان وكح وهم طالعين عليه
بستها وكعدنه نسولف اني وياها هي كالت ببتسامه...حبيبتي جولي الله يرحم اخوج واحنه كلنه علئ هل طريق سلمي امرج الربج
تنهدت بحزن وجريت نفس...الحمد لله علئ كل حال ياروحي انتي اني بعد هذا هو مراح اضل بهل بيت لان حروح الامي وهو كال اخذي اطفالج وياج
لزمتها من اديها بفرحه مقتوله...شفتي رهوومه واخيرا حرجع الماما واعيش وراسي بارد وما شاده أعصابي
حطت ايدها علئ خدي وضحكت...يحبيبتي انتي ان شاء الله تقر عينج بشوفة امج بس حشتاقلج تدرين
حطلب منج طلب اذا متت الله عليج تعالي بفاتحتي
حسيت طعنتني بنص صدري وبلعت الغصه كووه حضنتها وبجيت...لا رهووومه لااا عمرج طوويل يروحي انتي الموت للغمان مو الج يالطاهره
تدرين والله اني حروح وبس انتي وماما رضيه حشتاق الجن واستفقدتجن
ابتعدت عنها وهي ضحكت من بين ادموعها...حبيبتي انتي والله البيت حيكون فارغ بدونج
ابتسمت بعدها كلتلها...اكولج رهومه انتي ليش ما تسوين عمليه اني ما اعرف شلون بس،يعني ياخذون من نخاع جابر اذا طابقج ويخلولج وان شاء الله بعد يروح
يعني لازم اخوج من امج وابوج
جرت نفس...اي سمعت هيج شئ بس بصراحه اني ما اريد اجازف بروح اخويه جابر يعني اني اذا متت جابر يضل الاهلي بس اذا متنا ثنينه شحال بابا وماما
تنهدت بضيق...والله حيره لا ان شاء الله تطيبين ومتحتاجين العمليه...
ابتسمت...ان شاء الله املي بربي كوووولش كبير واني ملتزمه بالقران والقران شفاء لكل داء
بستها بخدها...اميين ونعم من القران ومن رب العالمين
كالت...هسه صلاح حيجي لازم اروح اخلي دم كال لكيت كم متبرع ولازمني اقراص بلازما...
ساعدتها تبدل رادت تلبس الحذاء ما كدرت من ايدها لان مشكله الكانوله بيها...
دنكت ولبستها الها هي تخبلت لزمتني من ايدي...لا جوولي الله عليج استغفر الله مو هييج انتي بغرفتي لازم اقدرج
ابتسمت بحب...لا يروحي انتي اختي واخدمج بعيوني ما استنكف اذا لبستج حذائج ودنكت عليج
ردت بحنان...فدوه الكلبج يروحي ربي يعلي مقدارج
ابتسمت باوع للجهال لاعبين لعب مطشرين الاغراض باوعتلهم بلوم...ليش ماما شبيكم تخبلتوا مو عيب احنه خطار هنا
ضحكت ريهام...لا عوفيهم عادي
مجتبئ ضرب رضاوي علئ وجهه بس حييل خلاه يفرفح من البجي وهو يكوله...عيييب رطاوي العب بيت عموو..
اجيت اركض...يااا عزا العزاني ليش ضربته
رد بغضب...وتح..« وكح »
جاوبته باستهزاء...انجهم بيتك يالمؤدب يالعاقل
عاد مرتضئ هجم عليه يريد يكتله وهو يصرخ وذاك انهزم وختل ورايه واني لازمه مرتضئ،ما اخلي يضربه ويصررخ كلب الدنيا ...اريييييييييييييد اعففففففففه « اعضه »
لزمته واني اساسيه...لا حبيبي،لا ماماتي مو اخووك من راح عند بيت عمتك مو ضليت تبجي عليه هو ميدري بيك وعضاك
ضرب رجله علئ الارض....مااااا اريد اعفه
شلته وهو يبجي ويريد يفرغص نفسه مني،
ريهام صاحت...يا عزا جووولي باعي اطفالج فاتحين قفص الكتكوت وشاربين المي مالته
تنهدت بضيق...شبييكم يمه تخبلتوا حتئ مي الطير الوسخ شربتوا شبيكم مشايفيين
طلعت بره ومرتضئ كالب الدنيا بصريخ
شفته طلع من الغرفه وهو يباوع الساعته اجيت ارجع ادخل الغرفتة رهومه بس استوقفني صوته كال...شبي مرتضئ
رديت بارتباك...اءءء هذا مجتبئ ضربه
عقد حواجبه...ليش ضربه
رمشت بعيوني ...مو شربوا المي مالت الكتكوت وهذا عود صار خير طاح بي وضربه
مرتضئ يريدني اعوفه ضل يدفع بيه وبعدها عضاني بركبتي حييل شهكت...عزا بعينك ولك عووفني
اجه ابو اخذه مني وفك اسنانه من رگبتي همس عند اذان مرتضئ...ولك ليش تعضها ابوك ما سواها قبلك
نزلت عيوني من كلامه حاولت ما اتاثر بي هذا هو احنه حنتطلك ما يأثر بيه كلامه...
اخذهم وهو يسكت بيهم وصالحهم وهم يشتكون واحد من الخ وانوب جذبون عليه هذا يكوله كتلني،وذاك اخذ ابايلي موبايله وهذا اخذ نعالي وهو خلكه طووويل وياهم
باوعت عليهم هو كاعد بالنص واحد منا و واحد منا ويحجي وياهم باهتمام وهم يشكون ولابسين النعالات تك وتك واحد مأخذ تك الثاني...
ابتسمت عليهم اثارني مشهدهم وضل ببالي،معقوله هيج يقبل يفاركهم وهو يحبهم ومتعلق بيهم ...
خليت ورحت الغرفتي خليتهم عنده
اشواق لحد الان تبجي ومعتكفه بغرفة امها وخدها مورم اني مجربه راشديات الكاسر كبل للفتحه السابعه
وحتئ رجلها اجه ياخذها ما قبلت تروح وياه كالت شروح وجهي مشوهه خلي يطيب خدي يالله
هو جاسر طلع واجوني مجتبئ ومرتضئ متصاحبين بس خطيه رضاوي اصابع مجتبئ بخده
ضل جاسر ليل ما اجه وبعدها اجت وقار شافتني بالمطبخ ما اهتمت الي وضلت تخوزر بيه
استغربت هاي شبيها حتئ ما كالت البقيه بحياتج اني هماتين ما رضيتها علئ كرامتي ما سلمت عليها...
وبعدها شفتها دخلت لجاسر تاخرت عنده انوب راحت بدلت وطلعت هي،وياه ...
بعدها اجت سلمت عليه وحضنتني،وضلت تبجي،تفاجئت...شبيهم ذووول قسم بالله مخابيل عقلهم مو براسهم قبل شويه تخوزر بيه وهسه تبجي عليه...
استغربت بس يالله وين اخذ اخته وراح معقوله اخذها يوصلها البيت عمها بس ترئ ولا مره وصلها كله جابر هو يجي يأخذها شعجب هل مره اخذها...
............................
وقار...
وصلنه البيت اهل خالتي،ام هاله وكف جاسر عند بابا بيتهم وباوع الباب اهل جووولي ضل شويه يتمعن بي
كتله..ذول بيت اهل جولي
ابتسم ابتسامه جانبيه كال...اييي ما ادري هل بيت بس ادخله راح تتدمر حياتي
نزل من السياره وايده جانت ملفوفه بشاش نزلت ولزمت كتفه بخووف.جاسر لا تنسئ انت قتلت ابن عمهم اخااف يشوفوك وانوب يقتلوك
باوعلي بغموض...مستحيل لو يردون يكتلوني من زمان كتلوني بس هم ما يردون وراهم غايه اكيد
استغربت منه وبعدها هو دك الباب فتح الباب زوج خالتي ام هاله باوعله بصدمه كله...جااااااسر ؟
جاوبه بهدوء...السلام عليكم عندي موضوع وياك عمي نتفضل لو شلون
رد الرجال بخووف...ليش شكو شصاير اذا علئ عاصم فاعتقد احنه طوينه هل سيره
هز راسه بنفي...لا اكيد مو علئ عاصم هذا هو انطوت صفحته عندي موضوع ثاني
اشوف الرجال وجهه ضل ينطي الوان وبعدها كال تفضلو بس بتردد
دخلنه جوه وهو ضيفنه وبعدها كال...تفضل عمي عندك شئ
جر نفس وبعدها كال...اني انلعب بعرضي والي لعب بعرضي واحد من نسلك واني ما اكدر اخذ حقي من حرمه لان تضل حرمه وتضل مو من محارمي
عقد الرجال حاجبه كله ...شنو منو منه دنس عرضك وشنو هل كلام
هو اخذ موبايلي،وفتح الفيديو السكرينات والصور وانطاهن لابو هاله
هو باوع الهن ورمش بعيونه كله...ما فهمت شئ
سحب نفس من جكارته كله...جولييت بنت اخوك لو اني غلطان
رد...لا بنت اخوووي ليش شبيها
سكت لحضات وبعدها رفع وجهه وجاوبه بحزم...هذا كل الي قريته والمقاطع المرسوله والصور هاي،بنتك هاله هي الي رسلتهن وتريد تتهم بنت اخوك جولييت
وكف الرجال بخووف...انت شتحجي لا مستحيل هاله ما تسوي،هيج وبعدين هاله خسرت خطيبها بسبب جولييت
وكف جاسر بغضب...هو شنو الي خسرته هاله بسبب جولييت شوووف عمي بنتك بكل صوره تريد تدمر جولييت وصلت بيها المرحله قدمتلي عاصم وحازم علئ طبق من ذهب
بنتك ضاله تبث بسمها وانتم ما تدرون بيها اني اله عرضي وشرفي ما اقبل عليه جولييت مرتي والي يرشها بمي ارشه بدم...
الزم بنتك وحاسبها لا والله مره ثانيه اتصرف تصرف ثاني اني لو اخلي جولييت تقدم عليها دعوه بالقذف والاتهام الابطال اخليها تدخلها سجن بس اني ما اريد منكم شئ غير تحذف المقطع الي صورته بعرس اختي واتحذف الصور ولا تكعد تشككني بمرتي
ابوها وجهه خبط الوان ورد علئ جاسر...شنو دليلك عليها
رد عليه وهو يغمزله...عندي ادله مو دليل بس،ما حاب اقدمه لذلك جيبها وجيب موبايلها كدامي وشوف بنتك شتسوي من وراك
يعني اني اليوم لو مرتي كاتلها وموتها ربحي بيمن بهاله لو بأحمد ترئ ما يصير هيج اني رجال واكدر اكاومكم لعبتو بعرضي وصورتوا ونشرتوا
بس اني ما اريد المشاكل اريد احلها بسلميه واريدك بس تتاكد من بنتك وتحاسبها وتحرمها من هل موبايل يلي دمر العالم
اني مرتي فقيره لا عندها موبايل ولا عندها اتصال ويه اي شخص شلون هيج تتهمها وتوزع بصورها
اني وين الكه احمد هسه واخذ الصور منه وبعدين بنتك ما تخاف اخلي ثنين بركبتي اخلي جولي واحمد
وبعدين اذا هاله عندها مشكله ويه احمد وخاينها هاي مو مشكلتي ولا مشكلة جولييت خليها تبتعد عنه
الرجال صارن عيونه بكصته راح شويه وجاسر باوعلي وابتسم
دخلت هاله هي وابوها وامها وهي وجهه مخطووف كالت...هاااا شكو شنو اني شمسويه شنو جولي شبيها
ترئ اني احبها واحترمها واقدرها بس هي خبيثه حتئ من امي راحت تعزيها علئ اخوها تعاركت ويه امي وطردتها...
رد عليها جاسر بهدوء...تمام هسه افتحي موبايلج وعوفي هل كلام
هي انهبطت من كلها موبايلج
كالت بثقه وهي توازن نفسها..اءءء موبايلي طافي مبي شحن اشحنه واجيبه
ابوها كلها بغضب...يالله بسرعه اشحني وجيبي
جاسر استوقفها بجمود...لاااا اوكفي جيبي الموبايل وروحي جيبي الشاحنه
هي باوعتله بحده عبالك تريد تاكله كلتله...شنوو شنو هل حجي ليكون ولي امري واني ما اعرف
كلها ببرود...لا يابه بس هاي دكمه خلي هنا واشحني
ابوها بسرعه خمطه من ايدها وهي صرخت وضلت تتوسل بابوها وتبجي...بابا لااا بابا جيبه بابا فدوه
هو دفعها وانطاه الجاسر جاسر باوع بيه كلها. .موبايلج متخوم من الشحن شلون دكولين طافي ههه
هي ضلت تفح من عصبيتها وامها ضلت تصيح وتغلط...شلون بالله احنه ما نخلص من جولييت ومن مشاكلها بعدها وره هلوله اموت واعرف شبيها ويه هاله وليش تغار منها
شو هي الله منطيها عيون زرك وهاله سود بعد شتريد
ردت هاله وهي تبجي وتصيح...والله ما اعرف والله متت مدري بيها تكرهني فوك ما باكت خطيبي وسوتله واهس واخذته مني
بس حضها كاعد تسوي المشاكل واني اوكع بيها عساج يا جولي بجهالج لان هاي لا يمها ابو ولا اخو ذولاك ماتوا وما رف الها جفن عليهم
اني جاوبتها بغضب...إسم الله اسم دعاويج عليج ان شاء الله بيش طالبه هل اطفال المساكين
رد عليها جاسر...هسه عوفينه من هل كلام وافتحي الرمز
كالت بغضب...ما افتحه ناسيته
عاد ابوها سحبها بقسوه كلها...اشو تفتحينه وغصبا عشيرت ابوووج
ضالت تراوغ بيهم منا لمن ابوها جبرها فتحت موبايلها واني دخلت علئ السكرين شوت انصدمت ..عزا بعينها هاي هي مسركنه
والمقطع هي مصورته من جهازها ودخلت للمراسلات هي الي مراسلتني من حساب جديد وعود هي اخت احمد
شوفتهن الابوها وقارنتهن بلي وصلن الي
عاد هو باوعلها وهو لزكها براشدي ارتطمت بالحايط وصرخت بصوت عالي دفرها علئ بطنها وهو يصرخ عليها...لا بارك الله بيج من بنيه بعتي ابن عمج وتهمتي اخته باطل والله اليوم اذبحج بديه واطمج يالعار يبنت العاار...
ضل يضرب بيها وامها تحمي بيها وطلعت هي ركعت الباب برجلها وضلت تغلط وكل شويه كالت ...تضربني تضربني الخاطر جولي الكح
والله اله افضحها فضيحه ام الولد العايقه الساقطه
عاد ابوها ركعها بالموبايل فلشه براسها وهي مستمره تغلط
جاسر مسح وجهه بتوتر وكال للرجال...عمي سويلنه طريق نريد نروح
الرجال نزل راسه باسف...اني ما راح اعتذر منك لان جولي عرضي قبل ما تكون عرضك وهاي هاله زعطوطه والله اموتها الك تموت
رد عليه بهدوء...اشكرك ما قصرت
طلعنه بره وجاسر باوع الابو هاله كله...ان شاء الله جولييت السبت الجاي عندكم اخذوها الاهلها حضرت الها جواز هي وأطفالها....
هو الرجال فتح عيونه بدهشة وصدمه وفتح شفايفه ديحجي بس جاسر عافه وراح ورجعنه للبيت كتله وصلني البيت عيالي تعبانه حييل وما اكدر اواجه جولي
احس بذنب كبير والله ما اعرف شلون هيج اجيت وكتلك عليها والله اعتذر جاسر سامحني
جر نفس ورتب حاجبه بطرف اصبعه...معذوره بس،بعد مره ثانيه اعرفي اوادمج زين ولا تستثولين
هزيت راسي بأي ومسحت دموعي ورجعت للبيت هو مقبل يدخل
اول ما دخلت لاكاني جابر كال..وين جنتي انتي وجاسر
رحت الغرفتي وهو جان متعصب وضل يسال ويلح فحجيتله الصار كله
عاد هو تخبل كال...طيح الله حضج يا رعنه صدك ما تستحين ولج شنو اني رجل كرسي هنا وما استشيريني لو راكعتني مية نعال
رديت بدموع...والله جابر مو قصدي
كال بغضب...انجبي انجبي صوووت ما اسمعلج والله والله يا وقار حييل نزلتي من عيني
ولج شلون هيج ترحين دكولين الجاسر بالله تهور بالله كتلها هاي تكون بركبتج يالثوله
تقربت منه دا اريد اهدئه عاد هو دفعني وابتعد عني وكعت علئ الجربايه وهو خله وطلع...
نمت علئ مخدتي واني ابجي وضميري يأنبني علئ السويته اليووم اني استاهل كوولشي يسوي بيه جابر استاهل...
..........................
شهد...
لعبانه نفسي حييل من كووولشي لعبانه نفسي حتئ من بزونتي حتئ من جعفر حتئ من الاندومي من كووولشي
من المسج مال ماما رضيه من ريحة اي حييل لعبانه نفسي
حجيت الماما رضيه كالت...خاف حامل يمه
صابتني رجفه بجسمي...يعني اني هسه حامل بنونو
دخل جعفر كال...انتي نونو وحامل بنونو ميصير خخخخخ
ابتسمت هو اجه وجضني وباسني ماما رضيه كلتله..ولك عاد استحي مني،ضال تبوس بيها كدامي
كلها...اي والله يمه حقج طاكج الجفاف من مات ابوي لحد الان اشوفلج رجل ؟
ردت عليه بلوم...عزا بعينك كووون ولك استحي ويني وين الرجل
جاوبها بنص عين...علينه مو حتئ ثلج كلينه وبعدين شبيج وينج وين الرجل يمه ترئ نوال بكدج وتزوجتني وعادي مسويه معالمه وجاي تطالب بحقوقها الزوجيه مني
كلتله...ولك ويني وين نوال ولك يمه نوال بعدها صغيره اني لو مخلفه جان هسه بزري بكد نوال بس الله ما رزقني
هو تقرب منها وباسها ...بالقرران تخبليين علئ الاقل احلئ منها براطمها جنهن جووب مال تاير
هي جانت مموجوده دخلت وياها بنيه شابه تجي بالعشرين لابسه تنوره قصيره لحد الساق ولابسه حجاب مطلعه كذلتها وقميص ابيض وحذاء افلات
كالت نوال...هلاوووو
رديت عليها...هلاوو بيج خاله
هي خزرتني لو جعفر مو هنا جان كالت وخلخلاله لان دائما تكولها اليه
اشرت علئ البنيه كالت ببتسامه...اعرفكم هاي البنوته الحلوه بنت اختي هنا اسمها اطياف
جعفر بدون ما يسلم خله وراح واني رحت باوستها بلهفه بس هي البنيه ضخمه حييل بس اني حضنتها
هلاو كلبي هلاو حياتي شلونج طيوفه اني زوجة زوج خاله ام سجاوي جعفر
ردت بغرور وتصنع...هلاو
كلتلها تفضلي تفضلي هي نوال سبحت ايدها كالت...لا بنت اختي ضيفتي اليوم
بهل اثناء دخلت ريهام وصلاح جانوا مو هنا بالدكتور
جان صلاح لابس بنطرون اسود وقميص جوزي..
هاي بنت اختك نوال كصته كص لو منطيها مجال جان حضنته وهو سلم ودخل بدون ما يباوع الها...
هي ضلت تباوع وبعدها باوعت النوال باعجاب ونوال هزت راسها الها عبالك لغز بينهن
خلن وراحن كعدن بالمطبخ ...
واني طكيتها ركضه ورحت وراهن لازم اتصنت واشوف،شيحجن ...
باوعتلها بسكوت شفتها كاعده وحاطه رجل علئ رجل وجه الطاوه تسويلها فواكهه تكصص
جان هاي اطياف مدري ارياف دكوله...اووويلي لج شنو هذا الدخل هسه يجنننن لج احلئ من جعفر
ردت عليها نوال...غير جنت رايدته وهاي اخذته ام السرطان بس ربج ما قصر هسه تريد تموت شورت بيها
كلتلها بصدمه...هاي مرته بيها سرطان
هزت راسها
جان هاي وكفت وحضنت خالتها كلتلها...ترئ حبيبته خاله ويكولون العباس اخو الحسين واني وانتي مابينه فرق اذا ماتت زوجته احجزي اليه ههههه
ضحكت نوال...اني بعد تزوجت جعفر ومدام لكيت هاي الكشافه اجيبه للطريق اجيبه وان شاء الله اخليها تسويلج واخلي صلاح يطلك مرته ويشمرها علئ اهلها...
ضحكت اطياف...هههه خاله مروتج ترئ اني بشاربج مو دكوليين
نوال بثقه...ولا يهمج بس خلي ارتب اموري
شفت صلاح اجه للمطبخ عاد اني استحيت كلت لا يشوفني سواية جاسر وفشلني خليت ودخلت للمطبخ
سويت روحي اجيب مي
دخل صلاح للمطبخ وهاي اطياف دكزه كز ولا تستحي تريد تأكله
هو كال ...العفو مجنت اعرف انتم هنا بس ردت مي بلا زحمه زوجتي اريد انطيها علاجها
اني كتله...اي صلاح اني انطيك
انطيته مي وهو خله وراح وهذن تخبلن
خليت وطلعت اني لازم اكول الجعفر عليها اكوله تفتر عند السحارات وهسه تبلينه بلوه علئ ساعه تشرب واحد منهم وتطحله طحل...
........................
انـا لـو ادري بضياعي يصير منك
مـا أحبـك....
جولييت....
اليوم السبت من البارحه واني احضر بجنطتي شعور بداخلي قااااتل وشعور سعيد وتناقض مميت
ساعه اكول راح افتك منه وساعه اكول اخاف اندم ما اريد الأطفال تبتعد عنه
زين اني ليش رايحه منه ليش اشو الحزن وصار مني وبيه...
رحت ودعت ماما رضيه و ودعت رهومه وشهد هنه خطيه ضلن يبجن عليه وكالن ما نحب نفاركج اني هم ما اكدر افاركهن بس افراك امي صعب...
رحت اخذت جنطتي واطفالي،بيدي
حسيت باييد لزمتني درت وجهي جانت اشواق وجهه مشوهه من الضربه عقدت حواجبي واني اشوف رموشها مبلله بالدموع
سكتت محجيت شئ وهي شهكت بالدموع...جولييت سامحيني والله اعرف جنت انانيه وحقيره من اخذت ابنج منج بس والله امي لعبت بعقلي،
وكالت هاملتهم ومتريدهم لان من جاسر وجاسر كتل اخوها
غمضت عيوني باسئ...مهما يكون يا اشواق ابوهم قاتل اخويه او قاتل ذاتي اني مستحيل ادخل اطفالي بمشاكله
وروحي الله يسامحج مو اني لان اني،كلبي لحد الان محروك علئ ابني
شلون كدرتن تفرقنه عني وتحرمني منه ومن اخووو
وربي يرزقج ويقر عينج وما يحرمج
قبل لا ترد عليه عفتها ورحت دكيت الباب ودخلت شفته ديلبس بقميصه ضليت واكفه انتظره
شويه ودار وجهه عليه باوعلي تقرب مني واني لازمه الجنطه ضل مركز بوجهي تقريبا خمس دقايق
حسيت كلبي وكف ورجليه ترجف نظراته تحيرني وتعذبني
بس لحظه احس جاسر مو قاتل كلبي يكلي مو قاتل ليش ما احسه مجرم ليش احسه غير شئ
لزمت ايدي وعصرت كلبي بوجع...شكد اذاك هل جاسر وانت تدافعله صدك ما عندك حظ وبخت
احتضن وجهي بثنين اديه كال...نصفي حسابنا يام مرتضئ لو انتظرج ترجعين
بلعت ريكي بغصه ...بس اني اذا طلعت من هل بيت مستحييل ارجع
هز راسه بثقه كال...الج رجعه صدكيني
ابتسمت بحزن...حتئ لو اهلي ما استقبلوني صدكني ما ارجع الك
سحبني من خصري بقسوه حسيته ثار علئ كلامي بعد ما عقد حواجبه...تفضلين الكل عليه ولج ام لسان
ركزت بعيونه ومجاوبته هو لان ميحب هل نظره اني استفزه بيها...
كال...نظرتج يابه نظرتج
عضيت شفايفي من نظراته وايده تتحرك علئ خصري بعبث كتله...يالله خلي نروح
رد عليه بغموض...بدون ما نتوادع
حطيت ايدي علئ ايده ابعدها من خصري...ايييي وخرررر
لزم وجهي بكف ايده الضخم وباسني حيييل ضليت اريد ابتعد عنه وكلبي يرجف من تصرفه
اني زعلانه منه وخاطري مكسور ليش هييج يسوي بيه شلون يتقرب مني واني مجروحه
ابتعد بإرادته مسحت شفايفي وابتعدت
باوعت المرتضئ مغمض عيون مجتبئ يكوله...حمط عنونك عيب
كتله بتذمر...عزا العزاني الاطفال تسوفلو
هو ضحك كلهم...روحوا بابا عمو جعفر جابلكم عصافير
هم طلعوا يركضون مرتضئ يركض ومجتبئ يجر بروحه جر ميكدر من رجلي
كلتلهم بخووف...لا ماما جذب تعالوو
عاد هو لزمني وثبتني باديه كال بخدر...مو عيب دكولين لولدج ابوكم جذاب
رديت بحده ...ممجذبه
ضل يباوع لشفايفي كال...من بستج ليش مسحتيها مو محذرج
رديت عليه بسخريه...ترئ ماكو داعي لهل دراما وداعيش هذا يالله اريد اروح الماما
رفع ايده بتهديد....بوسيني يالله
عقدت حواجبي وكتمت غضبي...والله عمي زين ايدك ملطخه بالدم وتدور بوس
رد ببرود وهو يرفع حاجب بغرور...شفتي شلون ؟
جريت نفس بتذمر...يالله عفيه خلي اروح اذا متاخذني اروح الوحدي
جاوبني بنذاله...عتبي باب غرفتي وشوفي اذا ما طلعت مكسره وتمشين علئ عكازات
كتله...اي ادري بيك وزنك طن وايدك ثكيله والراشدي مالك يسوي ارتجاج بالمخ
عض شفته بهيام...اسوي ارتجاج بكلشي
دفعته...اهووو هسه شلون تاخذني لو لا
كال...واكفج عليج اني... ماكو شي بدون مقابل
سلم واستلم
غمضت عيوني بعصبية...يالله بوس وفضني
حرك اصبعه علئ شفتي كال...ولو ردنه البوسه انتي تطبقيها بس ميخالف تهونين تضلين ام الجهال
بلعت ريكي واني مغمضه حزيت بدفا غامر علئ شفايفي وكلبي يدك مو ابالغ بس اني علاقتي متوتره وياه وادنئ قرب منه يثير خجلي وخوفي
ابتعد عني بارادته فتحت عيوني شفت نظراته تفسر غير شئ
اخذت الجنطه وطلعت والدموع منهمره علئ خدي
اخذت اطفالي وطلعت اني وياه اخذني علئ بيتنه القديم تفاجئت باوعتله بحيره كال...انزلي عمج هو يوديج انطاني ضرف وعلاكه صغيره كال هذا الج من توصلين العمج افتحي
همست...وانت
كال بتنهيده...ما اكدر اخذج اني لان ما اعرف اهلج وين بالضبط...
نزلت والجهال كسروا خاطري يبجون يردون ابوهم فرفحوا عليه تفرفح ...
ضليت ابجي عليهم وهو يسكت بيهم يريدهم يهدون قشمرهم بالكلام وما اعرف شنو
اني دكيت الباب وبداخلي حسره صدك هم بيت عمي بس جان الي جرح منهم...
جاسر اباوعله ابتعد بسيارته واحسه اتخله عنه واليوم حسيته فعلا ما يحبنا ولا يريدنه وبسهوله تخله عنه
طلع عمي شافني تفاجئ كال..جولييت عمي شجابج بهل ليل
ابتسمت وهو سحبني الحضنه وباسني كال...بويه جولييت شلونج شلون اجيتي
ضحكت من بين دموعي كتله...جاسر كال روحي الامج بعد انتي حره طليقه
هو عقد حواجبه وبهتت ملامحه واني خفت من ردة فعله كتله بخووف...امي ماتت
كال باسف...لا بويه بس امج سافرت هي وحازم وكالت الوطن المات بي ابني ما اريده
شهكت وحطيت ايدي علئ شفايفي همست...واني عمي ما فكرت بيه
جر نفس ورد باسى...انتي الج الله عمي
هو حجه هييج واني سحبت جنطتي ولزمت أطفالي ومشيت بقلب محروك وروح مسلوووبه
صاح عليه..عمي جولييت تعاي ضلي يمي
رديت عليه بحزن وحسره مكتومه...لا عمي جاسر منتظرني علئ الشارع
هو ضل ما سد الباب واني ضليت امشي بشوارع المنطقه واشوف الحزن بعيون الماره
والسيارات مثل سرعة البرق بس الصوت اسمعه
مرتضئ فرغص ايده مني والسياره اجت سريعه...مرتضئ مااما...
نهاية البارت...يتبع
كونوا انتم كونوا بخير...احبكم 💔
نور سمو العراق 😘😘
تابعوا هل حسابات فضلا وليس امرا
Maryam_h_99
Zeina199972
التصاميم الطلحه اكييد 😍😍😍
اعتذر عن التأخير النت وسوالفه💔💣
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!