رواية #جوليت وأسرها.... الفصل الثامن عشر 18 - بقلم الكاتبه سمو العراق

البارت الثالث عشر
رواية...جولييت واسرها..غياهب الإنتقام
بقلمي....نور سمو العراق

💔💔💔💔💔💔💔💔💔

سلبت روحي وغمرتني مشاكل  الحياة ونسيت نفسي
نسيت معنئ الاحساس والامل
فتاة عاشقة الكآبة والالم...
انسيت بأني انثئ اهوئ واعشق واحب ؟
سلبت روحي عندما نكرتني هويتي واهلي !!
سلبت روحي عندما نعتني بالمجرمه...
لن اسامحك يا كاسري..فأنا بقربك معذبه...

....................................

رفعت عيوني اله واباوعله بقلق وخووف شديد وحتئ هو حس بخوفي الكبير منه...

تمعن بنظراته الوجهي وضل يدقق بي وبعدها نزل عيونه علئ هيئتي ومنظري عبالك وحده متسووله مخربطه حييل...

جر نفس ورجع باوعلي كال...شرطي هو اولا اريدج تتقربين من هاله بنت عمج وترجعين صداقتج وياها ..

عقدت حواجبي وبلعت ريكي مثل العلقم مر مسحت دموعي بسرعه...بب بس انت تعرف علاقتي بهاله وتعرف هاله شكد تكرهني...

رفع حاجب بجمود...اكسبيها

تنفست بغصه ورجليه وحده تضرب بالثانية من الخوف...شلون اكسبها واصلا ليش شمعنئ هاله...

نزل شالي من راسي وحط ايده علئ شعري بخبث يمسح عليه حركاته جانت مثل حركات ذيب مراوغ ما اعرف شنو الي يدور بباله ليش هيج يعاملني ساعه حنية مغلفة بقسوة وساعه يصير مثل مجرم وقاتل...

ابتعد شويه بعد ما اتصل موبايله شاف الخط بس ما جاوب رجع يحجي ويايه كال...اي انتي بيدج يا اما تسعدين حياتج يا اما تدمريها وهاله طوق نجاة بالنسبه الج...

واذا ما قبلتي بشرطي راح تكونين عندي بس وقت حملج بطفلي وبعدها اخذه منج واطلكج

من كال هييج بجيت بصوت مسموع وشهكت حضنت طفلي باديه وهزيت راسي برفض ...لااا مااا هو طفلي تعبت بي ومتت قهر لخاطره جازفت وطلعت حتئ احمي منك ومن اهلك ...

سحب ايدي من بطني وضعط علئ بطني بقسوه صرخت ولزمت ايده ونحنيت شوويه باوعتله بتوسل ..

وخر ايده ومشئ خطوتين كال...ترئ مو ذات اهميه عندي بس كتلج اذا مات الگلب مات الضمير واني من بعد غزل وفلاح وابووي مات گلبي وضميري سوه

رفع اصبعه بأمر...وهاي الدنيا احقر منج ومن اهلج والمجرم يعيش بيها واني قررت اصير مجرم لهذا السبب اني ساومتج بين طفلج وبين اخووج

رمشت بعيوني بعدم استيعاب ...ساومتني ؟

رد بجبروت وحزم ...ايي لو طفلج لو عاصم الكلب

همست بصعوبه وتعب...شلون يعني ليش هيج تسوي بيه ليش تكرهني والله ما سويتلك شئ ليش تخليني اكرهك...

ضحك باستهزاء...ياريت تكرهيني والله ...

تقرب مني اكثر واني رجعت خطوات كبيرة خايفه منه خفت يبيع ضميرة. يرفسني

بس هو جان اسرع مني سحبني صرت حط ايده عليه عصرني بيه همس عند اذاني...هسه شقررتي ..

صرخت بوجهه بعصبية...شنو شقررت انت تعرف بشروطك مثل سوط من نااار وثنينهن يوجعن...

جر نفس وابتعد شويه كال...ترئ الشرط الاول سهل بس انتي متستره علئ الظالم هو كل الي اريده تقوين علاقتج بهاله وبعدها تقنعينها ان انتي تردين تتواصلين ويه امج ومن عندها اعرف مكانهم..

شهكت برعب...وتقتله تقتل عاصم

سحبني بقسوة وهو يشد علئ شفايفه بغضب جاوبني باستهزاء...لا اعزمه..

اكييد اكتله واكتل الخلفه مفتخره باخوج العار وخايفه عليه...لج هذا بركبته دم تلاثه لا واحد ولا ثنين ...

بجيت بصوت عالي وحركة قلب...بس ما اكدر هذا اخويه مهما يكوون ما اكدر اسلمه الك والله ليش تعذبني بهيج طلب ...

يعني لهل درجه اني خاينه لهل درجه كلبي ميت اسلمك اخويه ابن امي و ابويه بطبق من ذهب ..

صرخت بوجهه بدموع ...شلووون امي شنو موقفها مني من تعرف اني ضحيت باخويه

لزمني من فكي حيييل وضغط عليه بقسوة زمجر بوجهي بصوت عالي هز اركان البيت.. اخوووج مجرم قاااتل وبشر القاتل بالقتل...اخووج دمه مسفوك..اصلا اهلج لازم يسلمونه

دفعت ايده بغضب...اذا تريد تقتله لا تتخذني وسيلة شوووف غيري مستحيل اضحي باخويه حتئ لو مجرم وقاتل مستحييل ...هذا اخويه تعرف شنو اخوويه..

لزمني بقسوة واحتضن وجهي بكفوفه مسح كل وجهي من الدموع بقسوة رد باستهزاء...اهااا يعني انتي صرتي ضدي ويه اخووج ...

اردف بعدم مبالاة...اوك تمام...مدام هييج ما يشرفني
تربين ابني وانتي واكفه ويه عدووي ضدي...تجيبين وبعدها اطردج واني من هسه حرمتج علئ نفسي مستحيل اتقبلج...

صرخت بوجهه بغضب...ما انطي طفلي،

تقرب مني وهو يفح من العصبية كال...لا تنطينه وغصبا عليج اصلا انتي شنوو منو الج ومنو يطلع وراج يا گوا....ليطلع بضهرج..

ضحك بخبث...كلهم عافوج وانهزموا خلوج هنا اسيرة عندي لو ادفنج واذبحج محد يعترض تنازلوا عنج اليه...

همست بنحيب وعيون مليانه حزن...لا تعيرني حرام عليك اني خطيئة بركبتك اليوم الدين..

ابتسم بخبث...شفتي هاله بكلمة مني اخليها تعترف اهلج وين بس اني ما جنت اريد ادخل اطراف مالهم دخل واضلمهم وياي...

تمتمت بألم..مستحيل هاله تفتن عن اهلي

ضحك بصوت عالي ورفع راسه للسكف نزل راسه واختفت ابتسامته كمل بهدوء...تفتن تفتن لا تخافين

كمل بصدق...اني انسان ما احب الثرثره بس احب افهمج فد شغله من يوم الي اسمج ارتبط باسمي وهاله تواصلت وياي حجت هوواي بس مجان مهم عندي..يعني هالة بايعتج من زمان مو من هسه

مسحت دموعي بقسوة ورديت بحرقة قلب...هل كلبه الحيووانه التافهه شنو تحجي عني شدكول الك عليه؟

رد بانزعاج ...كافي لا تلغيين زايد وحظري نفسج ارجعج للبيت ومن تجيبين اخذ الطفل ولي بستين داهية...

صرخت بصوت عالي...مااااا انطيي

هجم عليه بقسوة لزمني من شعري حييل بحيث رگبتي حسيتها طكت صرخت واني الزم ايده همس بهدوء...بالله عيدي شكلتي

باوعت بعيونه بخووف وبلعت ريكي بس مجاوبته

ابتسم بخبث كال.. عيدي ليش سكتي

همست بنحيب...حرام عليك والله وين ضميرك...

ضحك باستهزاء...مو كتلج مات وشيعته ضمييري مات ودفنته ... و لا كل شويه وكلتي حرام عليك اني رجال لا اعرف الحلال ولا اعرف الحرام تمام ؟

نزلت عيوني واني ارمش باسئ ...

تركني وراح كعد علئ القنفه سحب جاكيته وطلع الموبايل مالتي الي اخذته من جابر اول ما لزمني جان بجيب جاكيتي وهو اخذه منه بس خلاه بالسيارة ...

من طلع الظاهر جابه وياه وخلاه بالجاكيت...

فتحه كال...افااا موبايل جابر النذل شجابه عندج

كمل بخبث...يالله خلي نشوف الفضايح ولو انتي من يوم يومج مفضووحه والفضل الي سترتج ...

صرخت بداخلي ...من يوم يومي مستوره اشرف منك ومن هاله يا نذل...

اشرلي اجي يمه خفت حيل كال بهدوء وحنية مصطنعه...تعالي ليش خايفه جاي اكلج مثلا  ؟

ضليت واكفه ما اجيت القلق والخوف من شفت الموبايل عنده سيطر علئ كل اعظائي

رد بتهديد...تجين لو اجي اشيلج واكعدج بصفي ...

اجيت بهدوء وخطوات مليانه تعب سحبني من ايدي بقسوة وكعدي بصفه لف ايده علئ كتفي ...

صرت بين صدرة و ايده انطاني الموبايل فتحت اله الرمز ...

مجان عندي بس رقم جابر...دخل علئ الرسائل يقره وكل شويه تحتد ملامحه ...

اخر رساله كاتب جابر...جكليته جابر بظهرج لا تخافين..

باوعلي بهدوء وضل مركز عليه نزلت عيوني برعب رفع حاجب ...خوووش يدلع النذل...

رجع لزمني بعنف حفر اصابعه بكتفي صرخت ولزمت ايده واني ابجي بعدها حسيت شعري تطاير بين اديه عاط بوجهي...لج حيوووانه ادبسز شكد شفت صلفات وشكد شفت حقيرات مثلج صلفه وادبسز ما شفت...

انهزمتي ويه جابر ومراسله ودلع يااا نعال

كمل بسخرية...باليوم كم مره تتراسلون ؟

همست بوجع ونحيب...والله ما حجيت ويه بس لمن أسأل عليك وعلئ امي ...

دفعني حييل ووكف كال...ما اريد ااذيج يالله بسرعه حضري نفسج نرجع...

وكفت استغربت شحظر نفسي شلون مبهذله يالله لابسه من ملابس،صبرية وجاكيتها يااارب صبرني...

همست بقلق وخوف...اني ما عندي شئ البسه هن ذن ملابسي ...

باوعلي بقرف كال...بالله هو هذا لبس جنج مجديه ..

مجاوبت بس جان الالم يعصر بصدري عصر خوف وقلق احس ساعات احتضار مو ساعات حياة...

اخذ الموبايلات كال...يالله امشي..

طلعت وراه امشي بروح مسلووبه ومصير مجهول ركبت بالسيارة وهو ساق بسرعه...

ما اكدر اواجهم ولا عندي استعداد لأي شخص من عائلتة تعبانه حييل ومقهورة والالم هاد حيلي

احس بعدني صغيرة حتئ اخوض هيج حرب والكل ضدي ...ام مثكولة بابنها...وزوجه ارملة ...واب فاقد بنته ..وابو واخو ...هل حرب قاسيه واكيد اني الخسرانه لا محال...

....................    ...........

ريهام...

صار اذان الظهر صليت ...

اجت نوال كالت...يممه رضيه اكو غده لو اخلي سجئ تروح تجيبلنه لفات من المطعم ...

عاطت بيها ام فلاح...شلون ولج الج نفس تخلين بنتج تروح للمطعم وهي طفله ...

ردت بقهر ...هو شنو هذا المطعم بصفنه علئ شنو خايفه

جرت نفس مبين الانزعاج علئ ملامحها كالت...ولج شكد ام بطن تلحكين علئ الاكل بس هاي بنتج لو ضاعت من ايدج تعضين اصابعج ندم وتتحسفين عليها...

ردت بعدم مبالاة...ماكوو شئ الناس كلها طالعه وبعدين منو تدني نفسه علئ طفله ...

دخل جعفر بغضب كال...والله هل بشرية علئ القرده تدني نفسها والله والله اذا شفت سجاوي موديتها للمطعم احرك البيت علئ راسج...

تخصرت وردت بعدم رضا...بيك خيير روح جيبلنه اكل مو ضال بس تهدد ..

رد عليها بقهر...احترمي نفسج انتي كلتيلي وما رحت جيبي فلوس واني اروح

ضحكت بدلع..شفت تدور فلوس هاي بدل ما دكول خلي ادفع من جيبي واذكر الله بهل يتيمات..ودكول خلي اخليهن بعيني.

رد بسخرية...بالله رجاءا لا تتخذين دور الارمله المفجوعه بنات اخوي احطهن بعيني وانتي خلي اهلج يخلونج بعينهم..

تعصبت حييل وانقهرت كال...اني والله بس يجي جاسر اكله عليك انت حيل دتتماده ويايه واني ممحاجيتك انت شبيك ليش شاد حرابه وياي من مات فلاح لحد الان وانت كارهني ...

وكفت رضيه لزمت جعفر كلتله...اطلع اطلع لا تسويلنه مشاكل مالنه خلك...

هو هز ايده وطلع كال...والله يالله صدك لو كال كيدهن عظيم...

رجعت رضيه بعد ما طلع كلتلها ...يمه نوال شبيج هو هسه اذن المؤذن دروحي صلي واحنه هسه نسوي اكل ..واحنه غير نخاف علئ البنات الوضع ما يطمن

وترئمو بس جعفر يحجي عليج حتئ جاسر وصلاح اذا عرفوا ما يسكتون...

هي كعدت وضلت تتشكئ وتنوح...اني حظي مصخم كلها تكرهني ما صدكتو مات فلاح حتئ تشدون وياي وتكرهوني كلها حاقده عليه جعفر و وقار تبسمر بيه. 

كملت بقهر...شمسويه الكم بس كلولي ليش تكرهوني ليش والله حرام عليكم ...اني احبكم واحترمكم بس انتم مدري شبيكم وياي ...اسوي زين واذب بالشط...

شويه ودخل صلاح بعد ما دك الباب وامه كلتله يدخل...

نوال عدلت حجابها اول ما دخل ضلت تباوع عليه واستبشرت ملامحها...

اني اول ما شفته رجعت اسبح ما اريد اصير مثل نوال من تشوفه تفقد...

كعد بصفه امه ..امه كلتله...هااا يمه صلاح شبيك وين جنت وين اخذتك صبرية...

جر نفس وفرك جبينه بتعب...رحت الجاسر اخذتها شافت جولييت...

امه تخبلت كالت بغضب...شنوو جولييت ما ذبحها جاسر لهل عار الكلبه والله عبالي سبع عبالي أفتخر بي كدام الكل واكول غسل عاره طلع مكعدها وياه المدلله المسعده...

تافئف بهدوء...شتحجين يمه شنو يقتلها شنو يغسل عاره البنيه ما الها ذنب واذا انهزمت من خوفها هو انتي لو شايفتها تبجين علئ حالها وجهه مزوركه تزورك وبعدين البنيه حامل والنه طفل ببطنها..

ردت نوال بقهر...اخر شئ جنت اتوقعه يا صلاح تدافع لهل عااار هاي اخوها كتل اهلك كلهم شلون الكم نفس تلفونها ببيتكم شلون تقبلون باخت كتال اهلكم تكعد وياكم علئ صينيه وحده ...

معقولة انتم ما عدكم مشاعر ما تذكرون فلاح ولا الشيخ ولا غزل لهل درجه ما الهم قيمه عندكم...

مسح وجهه بتوتر...هذا الموضوع راجع الجاسر هي مرته وهو الي يتصرف واذا نريد ناخذ ثارنه ما ناخذه من اخت عاصم...ناخذه من عاصم شخصيا...

وكفت امه بغضب ...والله اني ما اقبل بهل كلبه تدوس بيتي خلي يطلكها ويخلصنه منها...
والله لو اني لو هي...

صلاح رد بدون نفس...يمه يجي وتفاهمو وياه اني دايخ وتعبان صبريه خلصتها عليه ابو اللول وحسنه طيرت مخي والله. 

اجه جعفر كعد كال...هسه خلي يجي وتفاهمو وياه كافي تلحن هو يجي ويفهمكم شيسووي بعد انتن متعرفنه روحه بخشمه...

هنه سكتن ما حجن شئ بس وحدتهن وجهه ما يكصه السيف...

همست بخجل...صلاح خالتي ليش  ما اجت وين راحت..

ابتسم وعدل كعدته كال...راحت البيتها مدري دكول المطي مالتها مريض

حاولت اخفي ابتسامتي..ههه اي خطيه كالت مريض واجت حتئ تحل المشكله...

ردت نوال من يمها...شكد مكروهه هاي خالتج مدخله روحها بكوولشي يييع فضولية

باوعتله بقهر...بس شريفه وصاحبة نخوه وما تتهم احد باطل ...

رد صلاح ...ونعم منها بمية رجال والله كل سيطرة نفوت منها تاخذهم حاصل فاصل وتخلصها عليهم ...الله ينصركم يا حماة الوطن احنه بدونكم نضييع تاكلنه الواويه...

وهي مسدسها بجيبها....

جعفر ضحك كال...اي والله خوووش مره صلاح ليش ما تزوجها ترئ هي مطلقه...

خزرته نوال...واني ضحكت علئ كلامه ..

رد صلاح ...اي والله لازم واحد ياخذ من ريحتها

نوال خلت وطلعت مزعوجه واني رضيه كالت...يمه رهومه خلصتي صلاة ...

جاوبتها...لي عمة خلصت هسه اساعدج بالغده...

اني جنت لابسه حجابي جوه عباية الصلاه نزعت العباية وسفطتها ولفيت السجاده خليتهن علئ صفحه...

حسيت بنظرات صلاح تخترقني

جعفر ضحك كله...صلاح اذا كلولك تزوج نوال شتسوي

رد عليه صلاح بغضب...بلا ما تنجب

جعفر...ههههه والله اني اذا كلولي اكلهم زوجوني صبرية ولا نوال...

انت هم من يكولك تزوجها كلهم...عمي اتزوج صبرية وكعد بصف كنوش ولا اكعد يم نوال جنها كنوش

خزره صلاح هو غير الموضوع وضل يحك بلحيته كال...اكلك صلاح شوكت نزين متتت لحيتي وصلت البطني...

كمل بقهر...ادري حزنانين بس مو هيج صرت جني هذا الي باگ امون رب زليخه

خزرة صلاح مره ثانيه...ولك اسكت لا يسمعك جاسر واني ما الي خلگ ادافعلك

هو ضل يضحك واحنه طلعنه نسوي غدا خطيه وقار اجت ويانه الي تكدر عليه تسوي

صاحت رضيه علئ نوال تساعدنه كالت. .والله ما اكدر لازمه عده وبطني تاذيني..

عفناها سوينه غده تغدينه وكملنه شوويه ودخل جاسر...

اول ما دخل و وراها جولييت واكفه بانكسار وشكلها يرثئ اله مبهذله بشكل...

هنه تخبلن هجمن عليها بافتراس بس هي لزمت بقميص جاسر تحتمي بي منهم...

نوال كلبت الدنيا تصرخ وتصيح وتلطم وتبجي...طلعوووها طلعوها خبصت الامه خبص..

وام فلاح تخبلت وهي دكوله...انطينياها خلي افعصها فعص بنت الكلب بنت الزمال طلعها ما اريدها...

هو ابد ما خله اي وحده تطخها حضنها وقيدها منهن...وبعدها امرها تروح الغرفتها...

هي خطيه خافت وراحت تركض دخلت الغرفتها تبجي...

وعمتي ام فلاح راسها والف سيف اله يطلكها...

هو جاوبها بهدوء...اطلكها بس خلي تولد...

ضلو  شويه يتناقشون وبعدها احنه طلعنه بعدها طلعت امه هادئه شووويه ونوال رأسا رجع الدم بوجهه بس اجت حجت وياها ام فلاح...

طلع هو كال...لحد يتعرض الها ولحد ياذيها مالكم شغل بيها...تجيب الطفل وبعدها تروح لاهلها بس المهم الطفل ...

بعدها خله وراح ...

واني أخذني صلاح هو و وقار وقار كالت اريد اضل يمكم لان تعبت منهم ما اكدر اتحمل هلكد ضغوط تعبانه حيل...

المهم رجعت الاهلي ولكيت ابويه راجع الامي بس امي متحجي وياه وهو هماتين زعلان عليها...

....................................

جابر....

صار يومين علئ هل وضع دووخه وخشمي ينزف كلتها من البداية جويسر النذل كسر خشمي...

وهاي صبريه لحد الان ما اجت واعرف شنو الصار ...والله احس بنار مشتعله بيه علئ جولييت مو علئ نفسي

خطيه محد الها...

طلعت للبستان..شفت صبرية اجت من بعيد الثوب طاير والجواريب صاريت جنن بوت والعبايه مفتوحه صاحت من بعيد وهي اتاشر بيدها...اهلا جويبر بشرني بطلياني شلونهن كنوش بس لا بعده خانس

هزيت ايدي بقهر...هاي بدل ما تسأل عليه تسأل علئ الطليان وكنوش..

اجت وهي تتفحص بوجهي كالت...هاا جابر شلونك خوش والله انت وجكليته جاسر مفلشكم تفلش

لزمت ايدها بقلق...شلونها جولييت بس لا كتلوها

ردت بغضب...خايب يطيرون شحده ليمد ايده عليها هي صدك محصله جم راشدي وجم رفسه بس مثلك ما بيها شئ...

كملت بهدوء...كال ما اكتلها وراح ارجعها البيتي بس شني عود هو حرمها علئ نفسه...بس خلي يولي،يطير هي جويليته منو يكدر يقاوم جمالها وعيونها بس المطي...

اردفت بتفكير...لا والله حتئ كنوش صدك هو مطي بس عنده احساس وذوق انعجب بجكليته...

اخير من ذاك المطي ابو اللول انعجب بحسنه جنها صخله بيها سل ...ماكوو ذوق

جريت نفس بقهر...اهلي شلونهم ؟

جاوبت بعدم اهتمام...ابوووك طلگ امك

فتحت عيوني بصدمه...لاااااا صدك تحجين ابووي مستحيل يسويها...

جاوبت بتنهيده...لا بس رجعها صارت مرته..

جريت نفس ...اكلج صبرية علئ كيفج وياي شنو طلكها وشنو رجعها ..هاي اسرع حالة طلاق ورجوع بالعالم انتي تضحكين عليه...

ردت بعصبية...خاب دروح فوك ما اجيب اخبار اهله ..اروح اشوف طلياتي ونعيجاتي ودجيجاتي احسنلي...

خلت وراحت شويه واجت هدت عليه كالت بغضب كاسح...جووويبر يا ظالم كلهن ضعفانات ولك بس لا اموتهن جوووع...

احلف بالقران مداريهن...

جاوبتها بقهر..والله العظيم كلهن مداريهن وقايم بواجبهن متت جوع وداريتهن...

جرت نفس...يمكن من ضايجات عليه لان مستفكداتني...

جاوبتها...يجوز مغزر بيهن الزاد والملح

تنهدت بحزن...اي جااا قابل هنه مثل ابو اللول الكوا...ناكر الزاد والملح ...لو مخليتله سم بالاكل وموته احسن من الملح...

كعدت كطعت الها خضره وكعدت تاكل وسخ وتلف وتاكل

كلتلها..خاله مو زين هاي كلها مكروبات لا تتلوث معدتج..

هزت ايدها...خايبه محد يموت ناكص عمر ...خلصت عمري اتنسئ ب ليالي طين خاوة

حتئ من جبتها طلعت مطينه و وجهه مصخم...

ضحكت كلتلها...ادري معدة لو مگبره ترستها تراب وطين ...

ردت بعدم اهتمام...اي وشفت ما متت هاي شحلاتها ماكله الطين كله واحله من حسنه الوصخه...

ضحكت عفتها ورحت امشي بالبستان جريت نفس ...ان شاء الله ...الله يكون بعون هل مسكينه المنكسره محد رحمها...

..................................

جولييت

بعد الي صار ومن جابني جاسر الهم الخوف تلبس بجسمي قبل لا ادخل الهم ...

ترددت هووايه بس جنت مخيره غير مسيره لازم ادخل وبامر منه

دخلت للبيت بس احس گلبي وگف من الخوف ومن ردة فعلهن...

اول ما شافني وهنه تخبلن هجمن عليه بعنف من خووفي احتميت بي شكد صعبه من تضم نفسك بحضن قاتلك حتئ يحميك من غيرة...

بس الي فاجئني هو احتضني وحماني ابد ما خله اي وحده منهن تتعرض اليه ...

صار صياح وغلط وفجأة هدوء...

ضلينه يومين هو عزل فراشه مني  عندهم غرفه ثانية استقر بيها وترك كل الغرفه اليه ...

ضليت اكعد الصبح اكلهم صباح الخير محد يرد غير رضيه ..

حسيت نفسي نكرة وهامش بس ميخالف المهم محد ياذيني...

جنت انضف واشتغل اسوي اكل نوال متقبل لازمه عده. ووقار عند بيت عمها...

كل يوم احس ضهري ينكسر نصين وبطني الثكل عبالك بلوكه بيها...

اضل ابجي من التعب والوجع بس ما اكول لأي شخص لان اصلا محد يسمعني

وهو يدخل ويطلع اببد ما احتك بيه ولا سألني ولا اله اي اهمية حتئ بنظره عابره ما ينظر اليه...

صادف يوم جمعه ...

طلعت بره الغرفة فتحت البوري وشكلت الصونده دا اغسل بالحوش

اجت نوال تبث سمها عليه كالت...جابو سمج اغسلي واشوي لان يردون يسوو ثواب...

هزيت راسي بقبول...

ضحكت بخبث كالت...يالله شوكت تجيبين لان والله صدك صايره خدامه وفايدتنه بس بصراحه كوولش ما متحمله وجهج هنا...

سكتت مجاوبتها بس حيل مقهوره اريد امي والله تعبت...

تنهدت وكملت بهدوء...تدرين ليش الكل ساكت منج اكولج ليش

رمشت بعيوني...ليش؟

ضحكت بخبث...لان جاسر كال بس تجيبين راح ياخذ الطفل منج ويطلكج وينطي الاخته اشواق لان لحد الان ما عندها طفل...

عفت الصونده من ايدي ووكفت مرعووبه تعصبت واني ارجف..مو بكيفكم تنطون طفلي حرام والله ما انطي لو تذبحوني ...ليش تيتمونه مني

رفعت اكتافها بمعنئ..ما اعرف

خلت وراحت واني رحت للمطبخ ضليت افور من القهر ...

هو موجود اليوم لازم اروح احجي وياه لازم...

مصدووومه من بعد السمعته ..معقووله كلام نوال صحيح معقوله الكالته هو الحقيقه...

الرجفه اعتلت جسمي والدموع تنزل لا ارادي...

من بعد كلامها ساقني رجليه للاستقبال الي هو دائما قافله وكاعد بيها ومحد يتجرء يفتحها ويعرك مزاجه خاصة اني

اني انتهييييت بالنسبه اله انتهييييت!

ومن بعد ذاك آلحادث المشؤؤم  ومن بعد ذيج اليله الي القمر بيها شيع النجوم ودفنهم بأرض النجف

من هذا اليوم القمر توشح بالاسووود وهو ينعي نجوومه المفقووده....

وكفت بباب الاستقبال برعشه غمضت عيوني باسئ وهزيت راسي بعدم قبووول...مو من حقه والله اببد مو من حقه يحرمني من ضناي وهو بعده ما شاف النووور....

الدموع تنساب من عيوني بغزاره والم يعتصر بگلبي بدون رحمه بدون رحمه...

مسحت دموعي باسئ حطيت ايدي علئ صدري حسيت حتصيبني جلطه من القلق والحرقه الي داخله بگلبي وجوفي....

حطيت ايدي علئ مقبض الباب بيد ترجف ترددت افتح الباب لكن شجعت نفسي

رجليه ماتت من الخووف والرعب والقلق ..

دخلت شفته كاعد علئ القنفه ومقابيله الحاسبه يشتغل عليها لاهتمام

من حس بوجودي رفع عيونه بدون ما يرفع راسه ورجع يشتغل بكل جبروت

ضليت مركزه عليه والدموع تنساب بإهمال من عيوني المتعبة من كثرة البكاء...

هيئته ومنظره كدامي مثل وحش كاااااسر  ما يرحم...

بيبني وبينه مسافه قليله لكن اني اشووفها جبال ووديان تفصل بيني وبينه وللاسف يربطنه جنين ماله اي ذنب بلي صار وفاقد هويته وهو بعتمة بطني

ردت احجي تلاشت الاحرف عندي وتبعثرت الكلمات جريت نفس حزين وراجف ومسحت دمعتي همست بعبره...كاااسر؟

مجاوبني ولا اهتم لنطقي الاسمه

بلعت ريكي بخووف وبلعت حسرتي علئ نفسي تنهدت بعبره وبكاء....صح الي صار صعب والي صار مستحيل يستوعبه العقل ولا يقبله المنطق ...

بس اني شنو ذنبي اني شنو الي سويته حتئ هيج تعاقبني زين هذا الطفل شنو ذنبه حتئ تعاقبه قبل لا يشوف النور

مجان اكوو رد اصلا جان بس مركز بشغله

غصيت بعبرتي جمعت شعري باهمال واني ابجي بغزاره كملت كلامي باسئ .... يعني هييج اببد ما الي خاطر عندك هييج دموعي مالهن اي اهميه بخاطرك لهل درجه كارهني ووجودي عندك مثل عدمه

ترك الحاسبه وباوعلي بجمود وبعدها ارتكئ علئ القنفه ومد اديه علئ القنفه باريحيه ....شترديين

باوعتله بعيون دامعه وتوسل...طفلي

جر نفس وشرب من جكارته وبعدها نفخ الدخان همس ببرود....شبي

بجيت بالم ...سمعت من الحبايب تريد تنطي الاختك اشواق ...صدك هذا الكلام

رد بنفس البرود...وبشنو يهمج

تعصبت وزمجرت بغضب وبكاء...شنو الي بشنو يهمني هذا ابني قطعه من گلبي ما اقبل تنطي والله ما اقببل ...

وكف بجبروته وقامته الطوويله تقرب مني واني رجعت بخووف لزكت بالباب بس ما طلعت

حط ايده علئ الباب والايد الثانيه يدخن بيها ركز بعيوني  هز راسه باسئ...كلامج كله ما يهمني ولا انتي وطفلج تهموني ...

اخذ من جكارته شوويه ونفخ الدخان بوجهي زمجر بغضب...ما اطلع جاسر ابو غزل  اذا ما خليتكم
مثل الفيران ما تعرفون وين تضمون رواحكم ...

عقدت حواجبي ونزلت عيوني واني امسح بدموعي ... ليش ما يهمك الطفل ليش ما تتخذه دوه لجروحك...

رد بجبروت وزمجر بغضب... مو اعز من بنتي ولا يجي بغلاتها ولا يكدر يعوض غيابها وما اكوو احدد يداويني غيير الانتقام ورد الاعتبار

طلعييي برا......لا تفتحين عليج ابواب جهنم ...كلمتي وحده وما أثنيها من يووم الي طلعتي بي وانهزمتي وجازفتي طلعتي من حياتي

وحلفت ارجعج واذلج ...بس اتاكدت ما الج اي اهميه بجوارحي لذلك انتي مثل السراب اصلا مختفيه من حياتي

والطفل تنسينه من هل لحظه مثل ما انتي فضلتي اهلج عليه راح ارجعج الهم بس بدووون ذريتي

لان مستحييل اخلي كتالين اهلي وبنتي يربووونه انطي للجلاب وما اخلي عند اهلج

اما انتي ويين ما توليين ولي مو ذات اهميه عندي

ضربته بغضب علئ صدره ...طفلي ما انطي لو تكتلني وتذبحني ما انطي

سد حلكي بعنف وتقرب مني همس برعب وفحيح شيطاني...لسانج طووولان وصايره تهجمين لج لا تخليني امحيج من الوجود انتي واهلج وحق تراب ابوي

هزيت راسي بخووف وبكاء وترست ايده الي علئ شفايفي دمووع وخرت ايده واني ابجي همست...امحيني اني وطفلي لا تمحيني الوحدي

باوعلي بخبث ورسم ابتسامه خبيثه علئ شفايفه همس بخبث....حلوووو اعتقد موضوعج يفيدني وهسه اطلعي برا ممتحمل وجودج

هزيت راسي بنفي...شنو يفيدك لا تحجي وياي باللغاز لا تجرحني حرام عليك والله...

اتصل موبايله ابتعد شويه وضل يحجي بس سمعت كال...اي اهلا وسهلا بيكم ...

ضل يحجي بس الي عرفته يحجي ويه بنيه..

خليت وطلعت امسح وجهي من الدموع وينزلن اكثر...

كرهت حتئ نفسي كد ما ابجي والصبر مل مني...

رحت الغرفتي نمت علئ سريري ...شفت صورتي علئ التاج مالت الجربايه ...

جانت هي صورة العرس بس بحجم كبير...

جان كاعد ومبينه القساوة والحقد علئ وجهه واني كاعده بحضنه ببرائه وحتئ بالصورة مبين خووفي منه...

اتذكرت من بالتصوير كلتله المصوره اكعد وخليها تكعد بحضنك جنت ارعش،من الخجل منه

صح هو جان هااادئ وما عارض من طلبت منه المصورة هيج لقطه بالعكس

اخذني بحضنه ولف ايده علئ خصري

جانت اول مره عيوني تلتقي بعيوونه ..جنت احبه امووت عليه اعشقه...

بس هسه صرت اكرهه ما احبه احسه مصدر رعب وخووف اليه....

صاحت عليه رضيه طلعت بسرعه كالت...تعالي يمه ساعديني بالغدا راح يجونه خطار

عقدت حواجبي بتساؤل...منووو يجينه بيت عمي الشيخ ابو جابر

حطت ايدها علئ حلكي كالت...انلصمي،ولج لا يجي جاسر يطيح حضج ما تدرين بي شلون متخبل من جابر لو ما صبريه جان موته بس ربج ستر...

خفق كلبي بقوة وبطني لوتني...لا ابببد ولا بعد حتئ ما اذكرة بس فدوة ماما لا تخلين جاسر يحرمني من ابني

جرت نفس كالت...ان شاء الله ربي يهدي عليج

اندك الباب طلعت دا اشوف منو هو فتح الباب كال..اهلا تفضلوا تفضلوا اهلا وسهلا ..

رمشت بعيوني،دا اشوف منو الي اجووي ...

شفت خالتي دخلت...

وهاله وراها باوعت الجاسر وضحكت وهو نزل عيونه ومشه كدامهم كال...امي موجوده جوه ادخلوو ..

خله ورجع للاستقبال...

وهاله تقربت مني وهي تضحك كالت...اووويلي عنودي كوة دا اجيبه للطريق

نهاية البارت ...يتبع

كونوا انتم كونوا بخير...احبكم 💔

نور سمو العراق 😘

تنبية...وئام الشيخلي عندها عزاء انتقلت عمتها الئ رحمة الله ..انا لله وانا اليه راجعون...

لذلك مسابقة التعليق توقفت بس اني اختاريت تعليق اجه كدامي فاختاريته...

مبروك للفائزة البارت هدية الها...😘😘😍😍

لا تنسوا التصويت والمشاركة بكم نكتمل 🌹