رواية #جوليت وأسرها.... الفصل الثامن والثلاثون 38 - بقلم الكاتبه سمو العراق

البارت السابع والعشرون
رواية...جولييت واسرها...غياهب الإنتقام
بقلمي...نور سمو العراق

💔💔💔💔💔💔💔💔💔💔

 ابتسامة عينيك يا طفلي ارى فيها جمال الحياة !! =$ 

...........................

لا تنسوا التصويت احبتي بكم نكتمل 🌹

...................

بلعت ريكي بخووف ركضت غسلت اله بس ما صحه ضليت اضرب بخده واسمع تنفسه من ربكتي كووولشي ما فهمت ...

بس جان روحه رايحه وتخطل بيدي منا ومنا

صرخت بصوت عالي واني اركض....جااااسر مجتبئ مات...

هو تخبل اخذه من بين اديه وهو يضرب علئ خده بخفيف ركض بي للمغسله وخالتي ورضيه واني ركضنه وراه...

غسل وجهه بالمي ومسحه شاف بعده روح مابي ...

عاط بيه ...جيبي سووويج سيارتي

اني من الخوف علئ ابني والحرقه داخل صدري وكعت علئ الارض وصرخت بنحيب ...ما اكدر رجليه ماتت...

راحت رضيه تركض جابت سويج السياره واجت تركض لابسه عبايتها

وكفت بنحيب...ماااا اروح وياااك والله ما اضل اروح وياك

خزرني كال...ارجعي مو وكتج

نبتت اظافري بايده...لا وكتي وكتي والله ما عليه اروح وياك والله

جر نفس وصاح بصوت عالي...روحي البسي شئ وتعالي

ضليت لازمه بي...لا ما اروح تجذب عليه خلي رضيه تلبس غير عبايه وتنطيني عبايتها...

خطيه رضيه انطتني عبايتها ورحت اركض وراه وهي راحت تجيب الها عبايه

صعدت وياه بالصدر وهو ساق بسرعه ترك حتئ رضيه حمدت ربي اخذت العبايه منها جان هماتين خلاني مثل رضيه وراح...

اخذت الطريق كله ابجي وانوح علئ حال مجتبئ وحاضنته وهو يأن بتعب وكل شويه يتقيئ اني والله ابد ما مرضعتها من منعتي لدكتوره لحد الان ليش هيج صار بي...

وصلنه للمستشفئ اخذوا منه بالطوارئ واني ابجي احس روحي ذابت علئ ابني متت

هو لزمني كال ...اهدي مابي شئ

جنت لابسه العباء بدون حجاب واني اصلا ممتعوده البس عباء فجنت ما اعرف شلون الزمها وكل شويه وضهر جسمي وشعري طلع واني لازمتها بحذر

وجاسر كل شويه وكال...عدلي عباتج لمي نفسج رغم هو كل شويه وراح للدكتور يتطمن عن مجتبئ ...

اجت خالتي ورضيه ورانا للمستسفئ ضلت رضيه تواسي بيه وخالتي راحت يم ابنها...

بعدها كالت رضيه...خطيه طلع صلاح يركض علئ صرختج واني كتله يمه ماكو شئ ابن جاسر اجه يوكع من ايد جوليت وربك ستر وخطيه اجه يجي يشوفه وما خليته رجعته الغرفته...

جريت نفس بخوف ودموع تنزل باسئ علئ طفلي

هنه ضلن لليل طلع الدكتور كال...سووله تحاليل وتعالو واشعه ملونه

راح جاسر سواله تحاليل واشعه وهم خلو بالعنايه المركزه كالو..حينضفون صدره لان صاير عنده التهاب حاد بسبب تلف الحليب وحتئ صاير عنده التهاب بالأمعاء...

اجه جابر هو وامه وابو وخالتي صبريه من شفته عبالك لزمني صاعق كهربائي وحتئ انتبهت لجاسر ضاج من وجوده...

رغم جابر جان مبين عليه متوتر وابد ما باوعلي...

خليت ورحت كعدت بالحديقه الوحدي لان خفت اسبب مشاكل بوجودي واني اشوف المشاحنات

اجت خاله صبريه كعدت يمي وضلت تواسي بيه

الكل راحوا ضلينه بس اني وجاسر

اجه كعد بصفي بجمود وجر نفس ...

نزلت دمعتي بحزن كتله...من اجو مرتضئ ومجتبئ نسيت اهلي شويه صرت ام وصرت اخاف عليهم من النسمه الطايره

الله يساعد امي شلون مفاركتني شنو شعورها وهي تاركتني سنه كامله عندك ..

جر نفس...انسيهم كلهم لا امج ولا اخوانج ولا ابوج ولا اي واحد اهتمي باطفالج وعيشي حياتج واذكري نفسج انتي ما الج بهل دنيا غيري

رفعت نظري اله ببكاء...اريد امي اليوم حسيت باحساسها حسيت بقلبها شلون يتعذب على فراكي

باوعلي وابتسم ابتسامه حزينه علئ حالي كال ...ما اريد اجرحج واعرف اذا حجيت راح تتاذين من الحقيقه لذلك مفضل السكوت

رمشت بعيوني الدامعه...شنو قصدك؟

جر نفس ورخئ ضهره علئ الكرسي كال ...طلبت من عمج يوصل خبر لامج وابوج يرجعون بس من غير عاصم وحازم لخاطرج طبعا بس للاسف امج كالت..جولي عند زوجها بامان ما اكدر اضحي بولدي لهذا السبب ضحت بيج...

حسيت الدنيا كلها تكسرت علئ راسي بكل همومها ومصايبها ومعاناتها معقوله امي هييج معقوله امي تفضل .لدها عليه...

هزيت راسي بنفي...لااا جذب انتي تجذب عليه حتئ اكرهه امي واكرهه اهلي امي ما تسوي هيج امي تحبني اكثر من روحها

رفع حاجب بغرور...مو كتلج لحقيقه تجرح...

وكفت بصعوبه والدمعه يتيمه بعيني ...كسرتيني يمه ما ضل الي اي واحد حتئ انتي تبريتي مني فضلتي القاتل علئ المقتول ليش ما الي اهميه بجوارحكم ويني من نفسي ليش اتعذب عليكم وانتم لاا ليش

جانت الحديقه شبه فارغه والجو مظلم والأشجار تتراقص علئ حفيف الهواء الطلق مثل ما الحزن يتراقص علئ خلايا جروحي

حسيت بادبه طوقت اكتافي واحتضني كال...هذا هو ارضي بواقعج اسيره عندي وما الج غير الطاعه والقبول ...

درت وجهي عليه ورديت بحده...مو عبده عندك

هز راسه بقبول وهمس...اكيييد

رجعت كعدت علئ المصطبات وكلبي ناار وصايره لين نارين نار مجتبئ ونار مرتضئ لان عفته بالبيت وحده

طلع الدكتور كال...بابا الطفل استقرت حالته بس لازم يضل بالمستشفئ كم يوم للعنايه وان شاء الله مابي غير العافيه...

تنهدت براحه حمدت ربي وشكرته علئ نعمته المهم زين كووولشي ما اريد من هل دنيا...

وجاسر احي ملامحها استبشرت وفرح لسلامة مجتبئ هو يموت علئ مجتبئ لان مريض ودائما عنده لان يسويله مساج طبيعي وكوولش مهتم بصحته...

حتئ ذاك اليوم لكيته نايم ونومه بصفه تخبلت بوقتها خفت يندار عليه ويموت الطفل جنه رفش..

........................
ريهام...

بروعة الصباح ونسمات صوت الاذان افقت من تلاوة القران ..

ابتسمت بعد ما اشحت بنظري علئ صلاح النايم بإهمال علئ السرير ومتغطي نص جسمه...

اني من اول ما فتحت عيوني علئ الحياة قررت اختم القران ببيت زوجي...

لذلك اني اول ما انخطبت ضليت اقره هوايه لحد ما وصلت للسور الاخيره تركت التلاوة وتصدقت علئ كلمات الله التامه وقررت اول ليلة زفاف اختم البقيه بغرفتي ...

كملت الختمه بس احس ضهري انكسر لكن داخل روحي راحه وسكينه واطمئنان احس حتئ لو اموت اني كتابي ابيض وخاطته بيميني...

وكفت بعباية الصلاة وتقدمت لصلاح كعدت بهدوء بصفه وحطيت ايدي علئ كتفه البارد همست بهدوء ...صلاااح صلاح اذن يالله كوم صلي

دفعني بانزعاج... يمه رضيه عوفيني نايم

ضحكت...لا عيني مو رضيه راح موديل رضيه تكعدك هسه اجت رهومه...

فتح عيونه النرجسيه ببطئ شديد باوعلي ابتسم وسحبني الحضنه واني بعباية الصلاة انصدمت وخجلت نفس الوقت...لا صلاح متوضيه والله واذن الصبح يالله كوم صلي...

همس بهدوء...بس بوووسه ترئ غيري بهل ليلة يسوي مصايب واني خليتج انتي وربج وسحبت روحي بكرامه

جمدت محجيت شئ حسيت بقبلاته اخترقت وجهي واني جنت ارمش بخجل وبلع بريكي...

هو من شاف خجلي كال...يالله خلي نتوضه ونصلي

خليت و رحت توضيت وهو توضئ ...

فرش اليه السجاده وفرش سجادته بي جان متقدم عليه بخطوات...

صلينه الصبح جنت اصلي وراه وهو كدامي من خلصنه صلاه دار وجهه عليه وسحبني وحضني كال...ياربي هاي ريهام امانتك احفظها من كل سوء لان مثل النسمه وانت اعرف بيها طلبتها منك وما قصرت حاشا لله اريدك تحميها وتنور طريقها يارب ..

ابتسمت علئ كلامه وسحبت ايده بستها بحنان

ابتسم بمرح وباس راسي راح وكف فتح الكنتور وجاب شئ بيده...

ضليت كاعده اني اتأمله واباوعله مبتسمه حط الشئ وراه وبعدها كعد مقابيلي اثارني الفضول شنو الي ضماه مني

كال بحب...غمضي عيونج

غمضت عيوني باريحيه حسيت بدفئ ولمس ناعم علئ شفايفي فتحت عيوني شفته ديقبلني ...

بلعت ريكي بس ما بعدته خطيه هو ابتعد بارادته ويباوعلي بعيون تنبع بحب صافي...

نزلت عيوني ومسحت شفايفي بخجل ...

جر نفس وضحك سحبني الحضنه كال...الحمد لله ربي جعلج من نصيبي،والله صليت صلاة شكر لان تخلصت من نوال شكد جنت اضوج من يكولون اتزوجها جنت اكول لو يكلولي تزوج ريهام يمكن كلهم اخذهم سفره الجزر المالديف علئ حسابي

ضحكت علئ كلامه واحتضنت باطن كفه بحنان طلع مثل الوصل وخلاه بيدي رفعته دا اشوف شنو مكتوب ...

رفعت عيوني اله بفرحه عاااااارمه من قريت المكتوب حضنته بارادته وحطيت راسي علئ صدره معقوله صلاح يعني هذا الاسبوع تاخذني سفره للعمره اعتمر وازور بيت الله

همس بحنان...ايي من اول ما خطبتج واني اتمنئ افرحج واكيد هاي اكبر فرحه الج ...

باوعتله ببتسامه نابعه من اعماق صدري..اي والله يا صلاح حييل فرحت امنيتي ازور بيت الله وهاي انت دتحقق امنيتي

جر نفس وابتسم همس بهدوء...ريهام انتي متدينه وعاقله واني الي عندج حق شرعي بس ابد ما مستعجل والله شوكت ما حابه تنطيني اني جاهز وابد ما اجبرج لو اغصبج انتي بارادتج

نزلت عيوني بحياء...انت بكيفك اني ملكك ما احرمك من شئ ربي محلله الك...

ضحك من شاف ارتجاف اديه كال...لا حبي كتلج ممستعجل اريدج تكونين مو خايفه وقريبه مني ومتعوده عليه والله لو تضلين عشر سنوات عادي عندي المهم اشوف عيونج الحلوه بخير...

دحست روحي بحضنه وغلست علئ الموضوع وهو ضل يتغزل بيه ويمسح علئ شعري وكل شويه وكال...انتي ايه حيرتي العلماء بتفسيرج..

اخذني للسرير ونام بصفي بس حضني ابد ما تقرب مني وجان يهدبني ويسولف ويايه محسسني اني مجرد شهوه وجسم لا بالعكس حسيني بقيمتي واكد الي انو جسمي اخر همه...

صارت الساعه بالعشره كعدت من النوم رحت سبحت وبدلت لبست كلبيه بيضه وبيها خرز ذهبي وشال كريمي حطيت شويه مكياج

استحيت اطلع بره بس بعدها تشجعت وطلعت لكيت صلاح ماكو طلعا صلاح موظف بالمطار كلت معقوله راح للشغل وهو عريس رفعت اكتافي بعدم معرفه ...

دخلت للاستقبال لكيت الكل كاعدين سلمت عليهم وهنه باركلي وكعدت بس استغربت منهم هادئين

همست الوقار...شكوو صاير شئ .صلاح اشو مموجود

جرت نفس...ابن جاسر تخربط وبالمستشفئ من البارحه وصلاح راح الجاسر بالمستشفئ

ضربت خدي بخفيف...يااا عزا شبي وشلون صار

وقار...والله مخليله اوكسجين ومسويله تحاليل وبعد ضلت يم الله ...

همست ...ونعم بالله

دخلت خالتي صبريه اجت هي وصلاح جانوا بالمستشفى ركضت رضيه وهي تتطمن عن مجتبئ كال صلاح..شويه احسن الحمد لله مخلينه بالعنايه ومخلين اله اوكسجين

باوعلي ابتسم وخله وطلع اني ضحكت من نظراته ونزلت راسي

كعدت خالتي صبريه بتعب كالت...يمه موت احمر واحد ما يطلع شويه يصير سطل طرشي مدبس

وروح ابووي لو يكلولي حسنه ماتت ما اطلع بعد لو ما جكليته غاليه علئ كلبي لو اخوي ابو داوود يموت ما اروح للمستشفئ...

نوال كالت...شلون صار المعوق خطيه شكد كاسر كلبي

صبريه بتهجم..شماله معوق شو شحلاته الدكاتره يصورون وياها ويردون ليوره عبالك صدام حسين مو مشمش..

حركت اديها بصدق...وعلي جهال جكليت اعز من كنوش

باوعتلي كالت...يااا هاي رهيمه عمي وين انتي الدنيا مكلوبه وانتي ضاله تتمطرحين علئ الجربايه كليلي خلصت شغلتج يابعدها ؟

سكتت مجاوبتها...

لوت شفايفها عرفتج ما بيج خير تشلعين كلب الرجال هسه اكله من تضوجك افتح الشباك واشمرها منه نسوان مايجن اله بالعين الحمره...

ضحكت مجاوبتها وعمتي ضحكت كالت...لا شنو هي رهومه مال ضرب شو وجهه عافيه حتئ حرام واحد يعيط بوجهه هاي تربية شيخ عكاب ونعم منها...

صبرية...اي والله بنيت اختي تربيتي من جابتها امها جانت زعلانه يمي واني ربيتها رهيمه احسها مثل هداوة كنوش وعقاليته وروح ابوي هي وكنوش نفس الهدوء والتربية...

ضحكت كلتلها..خلف الله عليج خاله انوب صرت كنوش

صبريه ...يااا خايبه ترحيله فدوه هذا المدلل وليدي السبع معتمده عليه بكلشي هذا ابو الخبزه كلها حاسدتني عليه

دخل جعفر كال..اي مو هو دكتور وحاسدينج عليه تحسسيني كنوش لابس لابكوت وشايل سجل المرضي ومفتخره بي...

امه ضربت خدها...يااا عزا العزاك ولك جعيفر الساقط ولك شلون الك عين وتجي والله جاسر متحلف بيك يرميك ويموتك وحتئ صلاح متحلف بيك امشي اطلع احسن الك

جر نفس وكعد علئ القنفه..والله شو انتم تقتلون القتيل وتمشون بجنازته هاي فوك سوالفكم الي ما تتسولف وياي انوب انتم اهل الراهي ترئ عيب عليكم خافوا الله بيه

جانت نوال تباوعله وتبتسم وتعدل بشالها وهو ابد ما مهتم الها ...

صبرية ردت عليه...ولك انهجم بيتك ولك سوالفك طرزان ما مسويهن وبعدين انت بشنو احسن من كنوش وتستهزء بي ليكون انت دكتور واني ما ادري بروحي حتئ اذا دكتور اسوي عملية لعويناتي احسن ما اروح اسوي عمليه بإيران واخلصها غاگه ما غاگه

هز ايده ومجاوبه جان ضايج ...

نوال من شافته وكفت بدلع ومشت وهي تترنح بمشيتها وتدلع..يالله ماما حبيباتي خلي نروح فوك

هي طلعتها وهو جعفر سوه ..تفيي عليج اخر عمري اناسب يهود بني قريضه نويله وجهه الطاوه اني قبل لا يموت فلاح ما متحملها مو هسه

صبريه...دخذها وفكنه وعود طكها بمره ورجع شبابك

جعفر بعصبية...اي والله ما اضل عليها ترئ هي أكبر مني اني عمري 30 وهي عمرها 35 سنه ميصير هيج والله ما اتزوج غير شهوده فديتها طفله ولا بيها براءه ههههه اموت علئ ال 14 سنه العايشتها

امه بغضب..وتحبلك طفله عمرها 14 صدك ما تستحي والله انت نوال زايده عليك اصلا ولك هي بيها خير واهلها بيهم خير يخلوها تخابر وتتمعشك وهي عمرها 14 جنت بكدها ما اعرف عمي من خالي وهسه هي مفلفه عليك

رد بذوبان...واني يمه مفلفل عليها

هزت ايدها بقهر...والله انت تستاهل كل الي يجرالك والله بعد اذا ضربك جاسر ما احجي لان انت عار وصدك العار ما يصير بي شئ.

وكف باستهزاء وثقه...اني عار وراضي بروحي انتم شدخلكم موسئ بدينه وعيسئ بدينه شدعوه هلكد هامكم ومدققين بحياتي هسه اني هم ادقق بحياتكم 

هزت امه ايدها وما حجت...

اجت رضيه جابت مرتضئ اخذته منها صبريه وهي تلعب بي كالت...ياهوو الطكه وطلع دمه وما يدرون جعيفر عمه

وياهو الطكه وطلع دمه وما يدرون صليح عمه ...

وجعفر جان يباوع الها بطرف عينه وضايج وجهه محتقن

وكف ديطلع وتلاكه هو وصلاح كلت راح يتعاركون اني بسرعه وكفت لزمت صلاح الي جان موجهه نظره قاسية لجعفر وجعفر اول ما شافه نزل نظره ...

كتله...يالله صلاح عندي موضوع وياك

هو جعفر بسرعه خله وطلع ...

سحبت صلاح ورحت للغرفه وجهه محتقن دخلت للغرفه همست...صلاح خطيه عوفوا ترئ هيج مينصلح والله سايسوا والله صدكني ماكو شئ يجي بالاكراه...

جر نفس ...يمعوده هذا ميجي وياه لا ضرب ولا سياسه هذا اله واحد يكتله ويدفنه يالله يرتاح

حضنته بدلع...لازم تشكره منو خلاك تصير زوجي غيره

رد بلهفه...احتركت عشيرتي بنار ونفط لج هو بس هذا الموقف واكف بعيني اله اني من زمان كاتله

ضحكت ورجعت حضنته وهو كل شويه وقبلني بحنيه وهمس الي بحب ورومانسيه...

سحبني للسرير جمدت من الخوف لكن استذكرت اذكار من القرآن وقريته بخووف حسيت بهدوء..

تقرب مني بكل حنيه وهدوء وجان مستلطف ومستعطف حالتي رغم جنت شبه مستسلمه اله ولمساته الهادئه العذبه...

دمعت عيوني بخووف من شفته حاول يجردني من ملابسي من شاف خوفي ابتعد بسرعه ومسح دموعي وهو يبوس بجبيني...رهومتي حبيبي والله موقصدي لا تخافين كتلج ما اجبرج واذا شفت دمعه منج ابتعد والله وابد ما اتقرب...

سكتت مجاوبته هو ابتعد عني واني وكفت دا اريد اغسل وجهي رحت للحمام دا اغسل ما اشوف اله الدم نزل من انفي بغزارة

غسلت بسرعه وطلعت هو من شاف الدم تخبل لزمني نومني علئ السرير خله مخده جوه رجليه ورفع رجليه

رافع راسي وهو يمنع هطول الدم خله كنلكس علئ انفي وراح جاب قياس الصغط قاس ضغطي طلع مصفر

ضحك كال...هاي حضنتج صفر الضغط من اتقرب منج يمكن تموتين

ابتسمت وضليت لازمه الكنلكس...

مرة الايام طبيعيه هو ابد ما تقرب مني بس جان يضحك ويسولف ويايه وكوولش طبيعي

جولييت وجاسر طلعوا من المستشفى ابنهم الحمد لله شويه احسن ...

وخالتي حجت ويه جاسر حتئ يرضئ عن جعفر هو مقبل جاسر انوب بعدها كلتله حتئ يتزوج بعد عيب من العالم...

كال...خل يرجع وان شاء الله هل اسبوع يتزوج قبل لا يسافر صلاح وريهام

وحددوا يوم للعرس ونوال راحت حفت ونفخت شفايفها وضربت بلازما وصبغت شعرها

و.منتعشه حييل وراحت اشترت ملابس ملونه ومكيفه علئ جعفر...

الله يسعدهم شنريد منهم...

بس كون تنصلح لان هي من زمان هاي سوالفها اتذكر جان فلاح قاسي يموتها كتل وهي مثل الفزاعه توكف بوجهه لا ترد ولا ترنعد...

...............................
دنضف ونشتغل علئ عرس جعفر رغم هو ماكوو اي عرس مجرد يجيبها من اهلها ويدخلها الغرفته...

بس خالتي كالت ميخالف كوولشي يصير اخاف يجونه ناس

اندك الباب راحت وقار فتحته جان دخلت خالتي و وهاله واختها الكبيره شايله بنتها عمرها سنتين ونص ...

باوعلي بنظره استحقار ودخلن كبل قبل احسن جانت هاله واختها تسلم هسه كووولش متخبلات يطبهن سطعش مرض ميته علئ سلامهن...

دا اغسل بالحووش اجيت ريهام بادب اخذ المكناسه والصونده مالت المي من ايدي كالت بحب...حبيبتي جولي روحي اني اكمل انتي مريضه وابنج مريض لا تهتمين للشغل ان شاء الله اني اكمله

ضحكت وسحبت المكناسه...فديتج رهومه الطيبه بس والله ما عندي شئ مرتضئ نايم ومجتبئ عند ابو ديسويله مساج الرجليه حتئ ينشط الأعصاب

ردت بحزن...حبيبي مصار زين الدكاتره انطوكم نتيجة بحالته؟

جريت نفس بقلب ذايب علئ ابني ...لا الحمد لله كالوا بس اهتموا بعلاجه واهتموا بتحريك رجليه واعصابه وان شاء الله يتحسن

اردفنت بحزن واسئ...والله روحي ذايبه عليه مسكين من اشوفه اموت قهر...عنده فتحته بالقلب كل يوم اتوجهه لربي وادعي تنسد ويطول بعمره سوده عليه ...

حطيت ايدها علئ كتفي وجرت نفس...توكلي علئ رب العالمين نعم المولئ ونعم الوكيل والله مينساج

همست بهدوء...ونعم بالله ...

خطيه اصرت تاخذ المكناسه وتنضف رغم مقبلت لان بعدها عروس كلتلها لسه عروس ميصلح ضلت تضحك كالت ما اثق بهل خرافات واني اليوم مصره ما اخليج تنظفين...

بس مع كل هذا ما خليتها الوحدها وضليت انضف صاح عليه جاسر غمضت عيوني لثواني واني استمع لرنة اسمي من بين شفايفه احس اسمي يريد ينهزم من بين شفايفه مم زمجر بصوت عالي...جوليييت

طلعت اركض ثوبي مبلل من اطرافه لكيت شايل مجتبئ ملفوف بالملحف الابيض وجان حاط الجكاره بين شفايفه بس ما مشغلها كال...تعالي اخذي نام

اخذته من ايده ببتسامه حضنته بسته بخشمه وهو جان يتاملني بنظرات جامده ما تعبر عن شئ ...

بلعت ريكي من نظراته دا اروح طلعت هاله كالت بمرح...هلاوووو ابو غزل شلوووونك

رفع عيونه بملل ليفوك وسحب الجكاره كسرها وشمرها كلها...هلا

رمقتها بنضرة غضب ودرت وجهي

كالت...ابو غزل رايدتك بموضوع ضروري اريدك تحلي هل عقده بحياتي

تنهد بضيق كال...تمام

من كال تمام اني اخذت مجتبئ دا اروح للغرفه بس حسيت كسر الدنيا بعيني مو بس كسر خاطري...

استوقفني صوته من كال...جولييت عمريلي اركيله

وكفت بدون ما ادير وجهي اله وبعدها تركته ورحت لغرفتي...خليت مجتبئ بسريره وبست مرتضئ بتوتر وقلق...

شنو هاله شراح تحجي وياه شتريد منه...

طلعت شفته ماكو لا هو ولا هي ...رحت للمطبخ عمرت اركيله واخذتها للغرفه...

طلعت رحت للحديقه شفتهم واكفين بنص الحديقه جانت تضحك وتتماوع وترجع تحجي بجديه...

حسيت بعصره ولكمه قويه علئ صدري من الإحساس الفضيع الي صابني دتحسسني باحساسها من فضلني احمد عليها...

بس والله اني مو بنذالتها ومو نفسها اني ما استغليت احمد مثل ما هي تستغل الوضع الصالحها ...

اصلا جاسر قبل لا يكتل عاصم اهله جان كوولش يكره هاله يتعقد منها يكول خفيفه ما احبه وجذابه وترجم بيوت ..

المنظر رغم مو مخل بالأدب بس ضوجني حييل وعصر الغصه بداخل صدري ما كدرت اشوفه وياها

لحد الان ما مكسوره منه كسره كبيره حتئ اكرهه لحد الان رغم حركت كل شئ يخصه بس بس روحي تعاتبه وترجع تختل بسده...

رجعت للغرفه واني اجر ثياب الذل والخذلان والنار تسعر بصدري قويت نفسي واستعاذيت من ابليس الرجيم وماكو غير هاله ابليس،بجلالة قدرة...

ساقني رجليه لغرفته بكل اصرار دخلت شفت الجمر يلهب علئ الاركيله كعدت علئ السرير واخذت القمجي مالت الاركيله خليته بين شفايفي ودخنت ...

اول نفس حسيت شعوطت وضليت اكح بس عجبني الصوت الي تطلعه الاركيله ضليت ادخن ترست الغرفه ترس....

حسيت مقبض الباب تحرك خفت بسرعه شمرت القمجي وكعدت هادئه ومتوتره...

ثواني واستوطن الغرفه دخل بهيبته المعتاده وباوعلي باستغراب...

وكفت بسرعه دا اطلع بس ما سيطرت علئ نفسي وكعت بدووخه والم كدام رجليه...

هو استغرب وانصدم نزل عليه ورفعني الصدره وهو يضرب علئ خدي...جوولييت جولي شبييج فتحي عيونج ..

فتحت عيوني بخمول ورجعت سديتهن احس دايخه

هو شالني وخلاني علئ السرير بعد ايده من خصري وباوع للقمجي شافه قريب من السرير رجع باوعلي وعض شفته باسئ كال...ما توبين انتي

رجعت سديت عيوني ببتسامه ومياعه وتمغطت

سحب ايدي حييل بحيث فزيت من مكاني بخووف

باوعلي بعيون حاقده واستنشق عبير عطري رفع حاجب بصدمه...جنتي تدخنيين ؟

جريت نفس ورجعت تمغطت بذوبان عبالك سكرانه هزيت راسي...ايييي

حط اصابعه تحت حنكي و ركز بعيوني بحقد واني اباوعله ذايبه من التدخين

همس...ليش دخنتي؟

سبلت عيوني بهيام...ضايجه مثلك من تضوج تدخن

حسيت قرب وجهه من وجهي احتضنت شفايفه شفايفي فتحت عيوني بصدمه حسيت بتقلص اسفل معتدتي...

لكن قطعت عليه اللحظه اسنانه الي اخترقت شفتي السفليه بكل حقد...

الوجع جبااار حسيت شفتي تكطعت بين اسنانه دفعته وضليت ارفس برجله بس مكدرت جان خبيث يرقق ويرجع يقسئ اقوئ ...

جانت ضرباتي عشوائية بحيث وحده من ضرباتي اجت علئ خده ...

سحب ايدي ولواها ليوره بعدها قلبني علئ بطني حط ايدي وره ضهري وقرب راسه من خدي كال بخبث...جولييت صايره وكحه حيييل تدخنين وتضربين ..

سحبت ايدي الثانيه حطيته علئ شفايفي بعد ما حسيت بدفئ غمر شفايفي رفعت اصابعي شفت الدم زين اصابعي

حاولت اخلص نفسي من قبضته وصرت افلت بنفسي..وخررر عوووفني اوووي يمه يا مجرم شفتي تنزف عووفني ..

رجعني الوضعيتي القديمه باوعلي وعيونه تضحك بنذاله...عنفت شفايفج هاي عقوبه الج حتئ مره ثانيه من تدخنين تذكريني...

ضربته علئ صدره بحقد... اله اشتري باكيت جكاير وادخن اني ناويه اشتري...

ضحك...حتئ كل جكاره بالباكيت اخلصها تلسع علئ شفايفج  والله

ضحكت بقهر...لهل درجه مجرم

ابتسم بغموض...و أكثر

ركزت بعيونه ...شتريد منك هاله الزباله ؟

ابتعد عني وسحب باكيت الجكاير ديدخن كال...مو شغلج؟

انقهرت من بروده وجوابه واستفزازه سحبت الجكاره من ايده كال بعقدة حاجب شدسوين.؟

رفعت حاجب وقربت الجكاره من شفايفي.  مو شغلك

لزمني بقوووه وعصرني بين صدره وكتفه ولزم عنقي من وره بقوه بحيث أصابعه احسهن مثل السكين دخلت بعنقني

صرخت بخفوت ولزمت ايده اريد اخلص منه شهكت بوجع...عفيه فدوه الله يخليلك مجتبئ عووفني ..

همس ...ذبي الجكاره

شمرتها بسرعه وباوعتله شفت الحنان القديم الي بعيونه اختفئ وراح وما ضل بس الحقد و الإنتقام...

بعد اصابعه من عنقي واني ضليت افرك بعنقي بوجع ياربي ليش ما اكدر اضربه وااذي ليش منطي ايد شكبرها حتئ يكفخ بيه جنه غوول...

باوعتله بقهر واسئ...تدري اكرهك

هو راسه بقبول...اي ادري

صرخت بوجهه بصووت عالي...اكررررررررهك

ضحك بصوت عالي وكمل باستهزاء...لا جولي فدوه لا تكرهيني جرحتي مشاعري راح تخليني اكل فلفل حار وانتحر...

رفعت حاجب يربي هذا يستهزء...

ضربني بضربات خفيفه علئ خدي كال...بابا بطلي سوالف المسلسلات التركيه وعوفي الدراما عيشي بواقعج مفهوم حبيبتي

وكفت بدلع...اوك يا تؤبرني

هو تخبل من سمع هل كلمه ركض ورايه واني طكيتها ركضه طلعت بسرعه

هو فتح الباب صارت بوجهه هاله ونوال هو بسرعه سد الباب واني اضحك طلعت منه عرفت نقطة ضعفه بعد كوله احجي سوري واخبله والله

نوال شافتني ضحكت وشاورت هاله وهاله ضلت تضحك

فتت من كدامهن كالت...والله ماكو كرامه راكعها بوكس علئ حلكها وتروح يمه

درت وجهي عليها باستفزاز...لا يعمري هذا مو بوكس هاي بوسه عنيفه شمعرفجن بسوالف الزوج العنيف ههه

نوال بحقد...احم احم لعد ليش يركض وراج..

ضحكت...موتني الا تنامين وياي كتله عندي شغل غير يفتهم  ما يفتهم يموت علئ قربي

هزت ايدها بعدم قبول وضلن يبسبسن عفتهن ورحت انضف واشتغل وساعه اروح اشوف اطفالي واتمشه بدلع كدام نوال وهاله وكل شويه يبسمرن بيه...

خالتي صبريه اجت ودعتني لان راح تسافر لايران تريد تعالج عيونها ودعتها و راحت هي وجابر لايران تسوي عمليه...

مرة الايام وصلاح اجل سفرته للاسبوع الجاي لان راد يوكف ويه جاسر بعرس جعفر...
.................................

شهد

سمعت اليوم عرس جعفر نار متوجره بداخلي والم يعتصر بطني من درت زوجه ابويه جعفر اليوم عرس كل شويه تضحك متشمته بيه...

انقهرت منها ومن شماتتها خليت وبدلت ورحت دائما دكولي زوجة ابويه انتي مو راحه انتي كح...محد تسوي سوايتج وتروح البيت حبيبها...

متدري اني طفله تشوهت برائتي بسببهه وبسبب جعفر العار

رديت بانتقام ...اييي اله اروح وافضحك يا جعفر يا عار

مشيت واني ابجي بخطوات يائسه من الحياة اني شكد غبيه غبييية شلووون هيج شلون قشمرني...

اتذكر من جنت اكوله احببك يكولي وينج وين الحب لج اني جنت بكدج عبالي امي تجيب البنات وابوي يجيب الولد...

اثاري هو يستهزء بيه ويلعب عليه واني مصدكته وصلت لباب بيتهم دكيت الباب بدون تردد...

فتحت الي الباب بنيه ايدها مكطومه دفعتها بغضب ودخلت هي تفاجئت مني وغلطت عليه كالت...لج ادبسز شلون هيج تدخلين وتدفعيني

تجاوزتها ودخلت حسيت قلبي توقف من شفت جعفر كاعد علئ الدرج ديلبس بحذائه لابس بنطرون اسود وقميص ابيض ومحدد ذقنه ومزين...

متحضر الها محضر روحه لوجهه الطاوه...

باوعلي ورجع باوعلي بصدمه وكف بقلق ...شهدد؟

نزلت دموعي بقسوه والكل اتجمع عبالك ديحضرون مقتل

رفعت حواجبي بضحكه وسخرية ...وااااو العريس طالع حلووو ما شاء الله مبروك غير دتخبرني حتئ اجيب هاشمي امي واركص بعرسك

وكف وتقرب مني كال بحزن...شهد حبيب

صرخت بوجهه والدموع تتطاير من عيوني...اسكككت لا دكوووول حبيبتي الله ينتقم منك الله يطلعها باختك ليش هيج سويت بيه ليش خليتني أحبك واتعلق بيييك ليش

عاطت امه بوجهي...امشي اطلعي بره لج ما عندج تربيه بكد القندره وجايه هاده عليه اخلاق سز والله لو يموت ما اخلي يتزوجج

تخصرت واني اضحك ...ما شاء الله باع منو تحجي بالتربيه والاخلاق اول مره ربي ابنج وانوب تعالي اطعني باخلاقي

رفعت أصابعي بتهديد...والله كل ليله وكل ساعه وكل دقيقه الله ينتقم منكم وينتهك عرضكم

رجعت باوعت لجعفر بدموع مثل الشلال...جعفر ليش كسرتني واني احببببك

جاسر اشر لمرته تلزمني كلها..دخليها للاستقبال وغسليلها

تقربت مني سحبت ايدي منها وطلعت وانهيارات الحياة كلها بداخلي امشي بالطريق ودموعي تشكي حالي وابجي والعالم تباوع عليه انكسر خاطري والله لان اني حيل احب جعفر وروح امي احببه...

جولييت...

طلعت البنيه منا خلتنه بحالة صدمه من جرائتها خالتي ضلت تغلط وتفشر وتسب وريهام تقره ايات وتهدي الوضع

نوال جانت عند اهلها وجعفر ديروح يجيبها...

بس جعفر من شاف شهد ودموعها وحرقة قلبها حط ايده علئ عيونه وبجه

كلنه بجينه عليه البنات بس اخوانه وامه لااا ...

لبس سترته وطلع و وجهه احمر من الالم والوجع الي شافه بعيون محبوبته الصغيره

لكن للاسف تم الزواج وجعفر جاب نوال خلاها بالغرفه ونهزم للشارع خابرته رضيه وطلع سكران ويهلوس بإسم شهد...

.......................

ريهام

دنريد نسافر بس اجلتها لان اجو خطابه الوقار خطيه داوود متخبل علئ وقوره...

واني اموت عليها لذلك اجلتها شويه...

اجت خالتي ام داوود وخالي خطبها جاسر كلهم بس نسأل البنيه ونسأل عليكم نوديلكم جواب

جاسر راد يسأل عنهم بس ابويه كله اني اروح الهم لان صبريه وصتني غلئ حلالها ورايح اشوفه

صدك خالتي صبريه سوت عمليه وصايره زينه بس بعدها لحد الان ما اجت هي وجابر

ابويه اجه لجاسر كله يحمدون بي خوش ولد وهو غير ابن اخو صبريه اكيد زين.

أعلنوا موافقتهم وتمت الخطبه رحنه اجرنه الها فستان نزعنه منها الاسود وحفوها  طلعت شكد حلوه مجرد ما حفت وجهه...

رحت وياها للصالون بيوم الخطبه طلعت تجنن جانت حيل معجبه بنفسها حتئ من اجينه للبيت جابنه صلاح امي تعجبت عليها كالت امداني لو خاطبتها لجابر حليوه ومؤدبه وين الكه مثلها بس بعد هي قسمه

وقار كالت رغم جنت احلم انخطب بس احس،بوجع بداخلي ما اعرف ليش

يمكن لان جنت اتمنئ ابويه يوكف

بستها بخدها...لا تخافين ولا تنقهرين كووولنه وياج

اجت الزفه وطلبوا عشره بعشرين حاضر وغايب وافقوا عليه وضلت مرة خالي تهلهل وتركص...

...

جولييت ..

تمت خطبة وقار احس الدمعه تنزل بدون سابق انذاى عليها

متستاهل اني كلت الخالتي لا توافقون بس هي سوت بيه فلك وما قبلت علئ كلامي ...

ومن اجت ام داوود هددتني بس احجي تتهمني بداوود عندي علاقه وياه واني الي اتحارش بي

سكتت وكلت ميكدر يسوي اليه اي شئ اني بحماية الكاسر...

صارت الخطبه علئ اكمل وجهه شفته دخل عقد علئ وقار وطلعوا كعدوا علئ القنفه امه واخواته يهلهلن ويركصن

صاحت ماما رضيه ...جولييت جيبي الكيكه

رحت جبت الكيكه خليتها يمهم وهو نظراته السخيفه الحقيرة تخترقني ...

كال...مي مي بلا زحمه

همست بكلبي...تشرب سم يا كلب

رضيه خو ما عندها غيري ...جولييت مي ميي للولد

جبت مي انطيته لرضيه كالت دروحي اخذي شكد فاهية اخذته انطيته اله الحيوان لزم ايدي اني من خوفي وقلقي وكع الكلاص مني ...

هو كال...يالله خيير خيير

دنكت دا اشيل الكلاص وهو يمسح بقميصه دنك كال بهمس...والله اذا ما لعبت بيج لعب ما اطلع داوود

نهاية البارت...يتبع

كونوا انتم كونوا بخير....احبكم 💔

نور سمو العراق 😘

هاي الصور اهداء من طلحه الكم ...Talha-25-3

واليوم القفله حلوه و خفيفه مو صح😍😍😍