رواية جريمة صفية الفصل الأول 1 - بقلم محمود الأمين

القصة للكبار فقط

في منطقه من المناطق الريفية.. بيوصل بلاغ للشرطة عن اختفاء بنت عندها 14 سنة اسمها صفية واللي مقدم البلاغ والدتها وكانت بتقول انها كانت بتلعب مع اصحابها في الشارع ولكن اختفت فجأة ودوروا عليها كتير وما لهاش اثر

ومن هنا بدات رحلة البحث عن صفية، ولكن الموضوع مكنش سهل خالص.. ولكن بعد اسبوع يوصل بلاغ جديد عن جثه محروقة في بيت مهجور في نفس المنطقة.. واللي شاف الجثة كانت عيال بتلعب كوره قدام البيت والكورة دخلت جواه ولما واحد من الاطفال دخل يجيبها شاف الجثة وبلغ اهله، ولما اتحركنا على مكان البلاغ كانت الاوصاف تنطبق على البنت اللي متبلغ عن اختفائها واللي اسمها صفية ومن هنا بيبدأ التحقيق في واحدة من الجرايم المعقدة والبشعة اللي مرت عليا.

...

انا المقدم سامح عبد الحميد.. لما وصلنا البلاغ واتحركنا ووصلنا البيت ده.. لقينا جثه البنت اللي تتطابق عليها نفس المواصفات اللي في محضر الاختفاء، كانت لسه في بقايا هدوم على الجثة ودي الحاجه الوحيده اللي كانت واضحة.. ولكن ملامح البنت كانت مختفية تماماً والحروق كانت واصله لدرجه صعبه جداً

والخبر سمع في البلد وده اللي خلى والده المجني عليها واللي بلغت عن اختفائها تيجي واحنا بنفحص المكان.. العساكر حاولت تمنعها ولكن هي كانت مصممه تدخل تشوف الجثه

واول ما شافتها فضلت تصرخ وتلطم ولكن منعناها انها تلمسها عشان اكيد هيكون في تحقيق ورفع بصمات.. البنت دي اتقتلت ولازم نعرف مين اللي قتلها.. وليه واحد ممكن يقتل بنت بالطريقه البشعه دي؟

حاولت ابعد الام عن البيت على قد ما اقدر، وفي الوقت ده وصل رجاله الطب الشرعي والمعمل الجنائي عشان يفحصوا الجثه ومسرح الجريمة.. وحاولت اتكلم معاها على قد ما اقدر واخد منها اي معلومات

_ انا مقدر الحاله اللي انتي فيها يا ست، بس لازم تهدي امبارح الموضوع كان اختفاء النهارده بقت جريمة قتل وعشان نحلها يبقى انتي لازم تهدي وتساعديني

= حسبي الله ونعم الوكيل.. قتلوها قتلوا بنتي الوحيده اللي مليش غيرها

_ لو تعرفي حاجه يا ريت تتكلمي.. انا هنا عشان اساعدك تعرفي مين اللي عمل كده في بنتك ونقبض عليه وياخد جزاؤه

= اللي عمل كده طليقي ومراته مفيش غيرهم.. هي كانت بتعامل بنتي وحش وكانت بتضربها.. وكذا مره اتخانق معاه عشان الموضوع ده

_ طيب وهما هيعملوا كده ليه؟!.. انا معاكي انه الموضوع ممكن يوصل ان مرات الاب تضرب البنت لكن تقتلها وبالطريقه دي؟!.. وكمان ابوها يكون مشترك في الجريمة

= ابوها ده اللي بيسمع كلام مراته في كل حاجة.. مراته دي اللي انا اعرفها اكتر ما هو يعرفها، كانت في يوم من الايام صاحبتي دخلت بيتي واكلت معايا عيش وملح وفي الاخر خطفته مني وعاملت بنتي اسوء معاملة وضرب واهانه، وكل ده عشان ربنا ما انعمش عليها بنعمة الخلفة

_ يعني حضرتك بتتهمي طليقك ومراته بشكل صريح، انهم هما اللي قتلوا بنتك.. مظبوط؟

= ايوه حضرتك.. هما اللي عملوا كده

...

في الوقت ده نده عليا دكتور الطب الشرعي بعد ما خلص الفحص المبدئي للجثة واتكلم وقال

_البنت دي تعرضت لابشع انواع العن. ف والضر. ب ده غير ان الطريقه اللي اتقتلت بيها كانت دب. ح وبعدها حر. ق

= كل ده.. اللي عمل فيها كده ده لا يمكن يكون بني ادم، ده مريض نفسي.. مجنون.. حيوان

_ اهدى يا سامح باشا، انا مقدر بشاعة الموقف بس لازم حضرتك تكون هادي عشان تعرف تتعامل مع الجريمة دي، وعاوز اقولك ان المكان ده مش هو مسرح الجريمة، ده واحد عمل كده في مكان بعيد وبعد كده رمى الجثه في البيت ده

= لا حول ولا قوه الا بالله.. تمام يا دكتور انا هنتظر نتيجه التشريح النهائي

_ تمام يا باشا وان شاء الله في اقرب وقت هتكون عندك

...

طبعاً المكان مش مسرح الجريمة ومفيش سلاح جريمة والاعتماد هيكون على التحقيقات بشكل كامل وده طبعاً بعد ما نعمل التحريات، واتمنى ان تقرير الطب الشرعي يكون في حاجه تقربنا من اللي عمل كده

بعد ما خلاص فحص الجثه اتنقلت للمشرحة لاستكمال الفحص والتشريح بشكل كامل.. ووالدة المجني عليها واللى كان اسمها عفاف جت معايا على المكتب لاستكمال التحقيق

واول ما رجعت طلبت من الرائد كريم بيعمل تحريات عن المجني عليها صفية سيد ابراهيم.. ويتم استدعاء والدها الاستاذ سيد ابراهيم ومراته سوزان عيسى

ودي الاسماء اللي انا اخدتها من والدة المجني عليها، واتحرك الرائد كريم عشان يعمل التحريات مع رجالة البحث الجنائي واخدت الكلام اللي قالته الست عفاف في محضر رسمي واتهمها لطليقها ومراته انهم هما اللي عملوا كده في البنت

وبعد حوالي اربع ساعات يوصل الاستاذ سيد ابراهيم ومراته دخلته هو الاول وطلبت من مراته تنتظر بره.. وبدأت اتكلم معاه

_ استاذ سيد عرفت زي اي حد في البلد، انهم لقيوا جثه بنتك صفية في البيت المهجور.. وللاسف بنتك اتقتلت وطلقيتك مدام عفاف بتتهمك بشكل صريح انك انت اللي عملت كده انت ومراتك.. فما قولك فيما هو منسوب إليك؟

= بقى حد يصدق ست زي دي.. معلش يا باشا دي ست مشيها بطال وانا طلقتها بسبب سمعتها اللي مش محترمة ومعلش اسمحلى انا مش عايز اتكلم في اعراض ناس، بس انا كنت رافع قضيه في المحكمه عشان اخد بنتي تعيش معايا، ازاي هكون رافع قضيه عشان عاوز بنتي تعيش معايا وفي نفس الوقت هقتلها وهعمل فيها كده؟!

_ لا انا عايز افهم يعني ايه مراتك او طليقتك مشيها بطال.. ايه اللي خلاك تقول كده؟

= مش انا اللي بقول.. الحكومه اللي منها سيادتك هي اللي قالت لما اتمسكت مع واحد لا مؤاخذه، وانا عشان راجل عاقل طلقتها

ورفعت قضيه عشان اخد بنتي... ولو حضرتك مش مصدق ممكن تتأكد من ده بنفسك وهتعرف انها سوابق

_ لا حول ولا قوه الا بالله.. طيب بتتهم مين بقتل بنتك؟

=انا معرفش الله اعلم.. البنت كانت معاها واتقتلت يبقى هي المسؤولة

....

كان لازم اتأكد من كلام الشخص ده اللي لو ثبت فعلا هيكون كارثة.. طلبت منه يستنى بره ودخلت مراته سوزان عيسى

_ حضرتك عارفه انتي موجوده هنا ليه؟!

= عرفت يا باشا الخبر ومش مصدقه.. ربنا يرحمها صفية ويصبرنا على فراقها

_ تعرفي ان والدتها متهماكي انك انتي اللي عملتي فيها كده، وبتقول انك كنتي بتضربيها وبتعامليها وحش

= الله يرحمها لو كانت عايشه، كنت حضرتك سالتها بنفسك ولكن ربنا يعلم اني كنت بعاملها زي بنتي اللي ربنا ما كرمنيش بخلفتها

...

كنت بتكلم معاه مدام سوزان وفي الوقت ده وصلنا بلاغ عن تاكسي مركون في مكان قريب من المنطقة اللي اتقتلت فيها الطفلة والتاكسي ده مش عليه نمر.. وانه لما طول في الركنه الناس قربت عشان تشوف هل في حد ولا لا؟.. ولكن التاكسي كان فاضي هو كان فاضي من الناس ولكن الكرسي اللي جنب السواق كان غرقان دم.. اتحركت على مكان البلاغ وطلبت من الرائد كريم انه يخليه هنا مع وميخليش حد من اللي بيتحقق معاهم يمشي

ولما وصلت هناك وفتشنا التاكس.. لقيت بطاقه واقعه تحت الكرسي والصدمه ان دي كانت بطاقة...