البطاقة كانت بتاعة مسجل خطر اسمه عطية، الشخص ده انا حققت معاه قبل كده في قضية ولسه خارج من شهرين من حكم 10 سنين
المشكلة مش في المدة اللي اتحبسها الشخص ده، المشكلة ان الشخص ده بيتهم في قضايا كتير بتخص الاطفال وللاسف معظمها بيكون حصل فيها اعتداءات، اه هو مش بتثبت عليه حاجة وبيخرج من كل قضية بيتعرضلها وكان لازم اقبض عليه عشان اعرف البطاقه بتاعته بتعمل ايه في التاكسي ده؟
والتاكسي ده اصلا بتاع مين؟
...
كلمت رجاله من المعمل الجنائي واترفعت البصمات اللي على التاكس.. ورجعت تاني على مكتبي عشان اكمل تحقيق مع المتهمين.. واول ما رجعت قابلت الرائد كريم اللي اتكلم وقال
_ ايه الاخبار يا باشا؟.. لقيت ايه في المشوار ده؟
= تاكسي مش عليه نمر، والكرسي اللي جنب السواق غرقان دم ولكن لقيت البطاقة دي تحت الكرسي.. بص فيها كده وحاول تفتكر ده مين؟
_ مش ده الواد عطية مسجل الخطر اللي حضرتك حققت معاه قبل كده؟
= ايوه هو.. ولازم نجيبه في اسرع وقت ونعرف التاكسي ده بتاع مين؟
_ التاكسي ده بتاعه يا باشا
= وانت عرفت منين؟
_ انا قابلت الشخص ده قريب بالصدفه كان سايق التاكس سلم عليا وقال انه ساب السكه الشمال، ودلوقتي ماشي جنب الحيط
وانه اشتغل على التاكسي ده عشان ياكل لقمه عيش بالحلال
= واضح فعلاً انه بياكلها بالحلال.. المهم انه يتجاب وفي اسرع وقت انا شاكك ان في رابط ما بين الجريمة اللي احنا بنحقق فيها والبلاغ اللي جانا عن التاكسي ده وانت عارف انا اقصد ايه كويس
_ تمام يا باشا احنا هنعمل تحرياتنا، وان شاء الله هنوصله في اقرب وقت
...
رجعت دخلت المكتب وطلبت من العسكري يدخل مدام سوزان عشان اكمل تحقيق معاها.. وفعلا دخلت وقعدت قدامي
_ كنت عاوز اسألك عن معامله صفيه معاكي كانت عامله ازاي؟ وهل والدتها حاولت تكرهها فيكي؟
=في البداية مش هنكر ان البنت كانت خايفة مني ولكن لما بدأت اتعامل معاها كويس.. الخوف ده اختفى وبدأت تعاملني كويس وكمان حكت انها بتتعامل معامله وحشه من والدتها وانها دايما بتضربها وهي عاوزه تيجي تعيش مع باباها ومش عاوزه ترجعلها تاني.. انا مكنش عندي مشكلة.. بس اكيد كنت هتفهم غلط وعشان كده رميت الموضوع على سيد وهو رفض
_ طيب معلش.. استحمليني في السؤال ده اللي عرفته انك كنتي صاحبه عفاف، وكنتي بتدخلى بيتها وواكلين مع بعض عيش وملح
ولكن انتي استغليتي ده واخدتي جوزها منها
= حسبي الله ونعم الوكيل.. انا عارفة ان هي اللي قالت لحضرتك كده، رغم ان اللي حصل كان حاجه تانية خالص، أنا وعفاف فعلاً كنا اصحاب وكنت بدخل بيتها.. بس هي كانت ست مش كويسة وكانت بتعرف رجاله علي جوزها وانا حذرتها من ده اكتر من مرة بس هي مسمعتش كلامي، لحد اليوم اللي مسكها فيه وبلغ الشرطة واتحبست واتعملها ملف في الاداب.. بس الناس تدخلت في الموضوع واتنازل عن المحضر وخرجت بس الكل عارف في البلد انها ست مش مظبوطة
وبعد فتره سيد طلبني للجواز، والراجل كان محترم وانا علاقتي كانت اتقطعت بيها.. ومش كل يوم هيتقدملي واحد زي سيد وعشان كده وافقت بس ده كل اللي حصل
...
خلصت كلام مع سوزان وبصراحة مكنتش مرتحلها وحاسس انها مخبيه حاجات كتير ومش عاوزه تتكلم
وبعدها طلبت اتكلم مع عفاف.. دخلت وقاعده قدامي وكنت مش عارف ابدأ كلامي منين
_ شوفي يا مدام عفاف انا مقدر جداً الحاله اللي انتي فيها، وان اللي ماتت دي بنتك ولكن احنا في تحقيقات.. بعد التحقيق مع طليقك ومراته قالوا كلام مش كويس خالص وانك كنت على علاقه برجالة واتمسكتي كمان مع راجل وده اللي خلاه يطلقك، وانك كنت بتضربي البنت وبتعذبيها ومش بعيد تكوني اللي عملتي فيها كده
= لا حول ولا قوه الا بالله.. حضرتك لو دورت عندك فعلاً هتلاقي ملف في الاداب باسمي، ولو مشيت ورا الموضوع هتلاقيني خرجت من الموضوع ده بسبب اني بريئة، الشخص اللي المفروض كان جوزي في يوم من الايام عاوز كان عاوز يبيع البيت ويرميني انا وبنته في الشارع عشان كان بيشرب وقتها.. والناس كلها عارفه الكلام ده
والبيت اللي انا قاعده فيه ده، مش بيته ده بيت ابويا، وانا اللي غلطانه اني رضيت بوضع زي ده، اي راجل المفروض بيجيب شقة وبيتجوز فيها مش بيروح يقعد مع مراته، ولما رفضت ابيع البيت صحيت من النوم في يوم لقيت في راجل غريب نايم جنبي في السرير وقبل ما اصرخ او اعمل اي حاجة لقيت البيه اللي المفروض جوزي داخل عليا الاوضة ومعاه الشرطة وعاوز يثبت حاله.. وحضرتك فاهم حاله ايه؟.. كنت مصدومة اتحبست واتمرمطت واتعملي ملف في الاداب ولكن بعدها هو اتنازل لما ناس كبيره عندنا في البلد تدخلت، رمى عليا يمين الطلاق ورفع قضيه عشان ياخد البنت منى
....
خلصت مدام عفاف كلامها.. ولو كان كلامها ده صح تبقى كارثه كبيرة.. طلبت منها ترتاح بره وانا مش عارف اصدق مين؟
في الوقت ده وصل تقرير الطب الشرعي والمعمل الجنائي والبصمات الخاص بجثة صفية
تقرير الطب الشرعي بيقول ان رغم صعوبة الحروق اللي في الجسم
الا انه توصل ان المجني عليها تعرضت للضر. ب والتعذ. يب والعن. ف وده ظاهر من حقوق جروح سطحيه على الايدين والرجلين وبعدها تعرضت للقتل عن طريق جرح نافذ في الرقبة ولكن كان مكتوب ان المجني عليها تعرضت لاعتداء (ج)
اما عن تقرير المعمل الجنائي والبصمات.. فبيقول انه كان في بصمات على هدوم المجني عليها والبصمات دي بتنطبق مع بصمات مسجل خطر اسمه عطية السجان وان الشخص ده بصماته متسجله على السيستم عشان اتحبس قبل كده اكتر من مرة.. وده معناه ان الدم اللي في التاكس كان دم صفية
...
في الوقت ده دخل عليا الرائد كريم وهو في ايده ملف التحريات وقعد قدامي وهو بيقول
_ التحريات اللي موجوده هنا دي بتنصف عفاف وبتاكد ان اللي اسمه سيد ده بني ادم مش محترم ولكن في نفس الوقت التحريات بتثبت ان عطيه السجان كان بيوصل عفاف اكتر من مرة لما بتكون عند اختها اللي ساكنه على بعد نص ساعه منها، وانها مش بتطلع تشاور لعطيه على الشارع مثلا وبيجي صدفة، دي كانت بتطلبه بالتليفون وبيجي بالتاكسي لحد باب البيت
بس في حاجه ممكن حضرتك تستغربها.. وهو ان عطيه السجان هو اللي شاهد على عقد زواج استاذ سيد ومراته مدام سوزان
وده معناه انه يعرفهم كلهم
...
الرائد كريم كان لسه بيقرأ التحريات.. ولكن في الوقت ده جت اشاره بمكان عطيه السجان عشان كده اتحركنا على طول عشان نقبض عليه خصوصا ان انا اتاكدنا ان هو اللي عمل كده في البنت ومش فاضل غير نعرف مين اللي زقه وبعد اللي سمعته في التحريات.. التلاتة ما زالوا متهمين.. ولما وصلنا مكان البلاغ كنا قدام بيت بسيط من دور واحد حاوطنا البيت من كل حته وكسرنا الباب ودخلنا.. ولكن الصدمه اننا لقينا على الارض جثة والصدمه الاكبر ان دي تبقي جثة.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!