رواية جريمة صفية الفصل الثالث 3 - بقلم محمود الأمين

الجثه كانت جثه طفل صغير.. كان واقع على الارض وغرقان في دمه ولقينا في وشنا عطيه السجان واقف كان بيحاول يشوف مخرج بيبص حواليه واتكلم وقال

_محدش يقرب منى، لو حد قرب انا هموت نفسي

= طيب ما تموت نفسك يا عطيه، هو انت فاكر ان في حد هيزعل عليك.. انت فاكر نفسك بني آدم أصلا

_ ايوه انا بني ادم، ومن حقي ان انا اعيش ومش من حق حد يحكم عليا.. انت لو مريت باللي انا مريت بيه كنت هتبقى واقف مكاني هنا يا باشا، بس انت مش مكاني ولا انا مكانك يباشا

...

وهنا رد عليه الرائد كريم وقال

= يبني انت مش كنت توبت واشتغلت على تاكس ايه اللي حصل وايه اللي رجعك للسكه دي تاني

_ اللي رجعني اني مكنتش لاقي اكل.. صاحب التاكسي كان بيذل انفاسي كل يوم عشان 200 جنيه، ولما زودهم معايا خلصت عليه وخلعت النمر من على التاكس وكنت ناوي اركب نمر مضروبه كده امشي بيها، لحد ما جاتلي المصلحة اللي فيها الهبره الكبيرة

فلوس كتير في مقابل اني اخلص من طفلة صغيرة.. عاملة ازمة ومطلوب منى اخلص عليها عشان تتحل

...

= لا الكلام مش هينفع هنا انت تيجي معانا عطيه عشان نكمل كلامنا في القسم، ده انت واضح ان عندك بلاوي، النهارده هتعترف بكل حاجه بدل ما اشيلك الليله كلها لوحدك ولو كذبت عليا يا ويلك من اللي هعمله فيك

طلبت من الرائد كريم يتابع نقل الجثه للمشرحة ومتابعة الاجراءات، وان انا هرجع المكتب عشان احقق مع عطيه السجان واعرف مين اللي طلب منه يعمل كده.. بس وانا في العربيه وفي طريقي للمكتب كلام عطيه السجان كان بيتردد في دماغي.. بنت عامله ازمه وانه يخلص عليها هو الحل.. كلام ملهوش غير معنى واحد ولكن يا رب يطلع اللي في دماغي غلط.. يا رب يطلع يقصد حد تاني عشان لو يقصد اللي في دماغي، فاحنا كده بقينا عايشين في غابة، واللي عايشين معاهم دول مش بشر

وصلت المكتب وبعد دقايق كان عطيه السجان واقف قدامي.. كان شكله عنده كلام كتير عاوز يقوله.. وبدأت اتكلم معاه

_ عطيه انا عاوزك تتكلم وتحكي كل حاجه من الاول.. عاوز اعرف مين اللي وزك تقتل البنت وتعمل فيها اللي انت عملته، وعاوزك تحكيلي تفاصيل الجريمة بالظبط

=هحكيلك يباشا.. رغم ان الزبون دفع الفلوس بس خلاص انا مش فارقة معايا.. الموضوع بدأ بمكالمة تليفون جتلى من ناس حبايبي وعزموني يومها على الغدا.. كنت عارف ان الموضوع مش مجرد غدا وبس.. ولما روحت عندهم واتغديت لقيت في 100 الف جنيه اتحطوا قدامي على الترابيزه وده مقابل مهمه انا قمت بيها كتير قبل كده.. اقتل طفلة صغيرة، بس اللي صدمني لما عرفت ان البنت دي تبقى بنتهم وانها موقفه عملية بيع كده وان موتها هيهد امها وهيخليها تموت نفسها وراها.

وكان لازم عشان الموضوع يبان طبيعي.. اني اظهر قدام الست والبنت دي كتير بالتاكس، عشان يوم التنفيذ البنت ما تخافش مني وده فعلاً اللي حصل، والست اللي اسمها عفاف ركبت معايا كتير في التاكس، ساعات لوحدها وساعات هي وبنتها

ويوم التنفيذ.. استغليت ان البنت بتلعب في الشارع ولما قربت منها بالتاكس جت وسلمت عليا، فطلبت منها تركب وهاخدها لفة.. والبنت عشان شافتني كذا مره وركبت معايا فعلاً، كانت مطمنة ولما ركبت بعدت بيها شوية عن المنطقه وخدرتها، بس بصراحه البنت كانت 14 سنه بس جسم بنت عندها 20 سنة، ورغم ان ده مكنش في الاتفاق، لكن انا اخدت اللي انا عاوزه منها، وبعدها خلصت عليها وولعت في جثتها.. وكنت ناوي اسيبه في مكانه ولكن لاحظت ان في عربيه جايه من بعيد واقرب حاجه ليا كانت البيت المهجور فرميت في الجثة وهربت، ورجعت للسكه الشمال تاني

_ يعني انت عاوز تفهمني ان اللي طلبت منك تعمل كده هي مرات ابوها صح؟

.....

مش عارف ليه سألت السؤال ده.. كان عندي امل يقول على الست بس وميقولش على ابو البنت ولكنه رد عليا وقال

= الست وجوزها.. وعرفت ان الراجل يبقى ابو البنت وده اللي كان مخليني مصدوم ومش مصدق

_ انت هتواجه الشخص ده باقوالك عشان تكون عارف، ولو طلعت بتكذب عليا.. وديني لاوريك النجوم في عز الضهر وهخليك تعرف ان الله حق

=اواجه يباشا ليه لا.. انا مش بخاف من حد

...

بعد ما سمعنا اقواله طلع اذن من النيابة بالقبض على سيد ابراهيم وسوزان عيسى للتحقيق معاهم فيما هو منسوب إليهم

وبعد ساعات كانوا مشرفين قدامي في المكتب

وبدأت التحقيق معاهم

_ انا مش هتكلم معاك كلام رسمي.. انا بس هسألك ليه؟.. عملت كده في بنتك ليه؟

=عملت ايه يا باشا.. هو حضرتك مصدق الست الخرفانه دي؟

_ لا انا مصدق عطيه السجان اللي قتل البنت اللي موقفه البيعه، عطيه اللي اعترف عليك انت ومراتك وقال انكم انتم اللي زقتوه عشان يعمل كده

= مين عطيه ده؟!.. ده اكيد واحد تبعها وبيفتري علينا

_ بقى يا راجل، مش عارف الشخص اللي شهد على جوازك من الهانم اللي واقفه جنبك.. وبعدين لو على الافتري، فمفيش غيرك اللي افتري على مراته وخلى راجل غريب ينام جنبها في السرير واحد عشان يلبسها قضيه قذرة وكل ده عشان ايه؟.. عشان الفلوس يا سيد

= اه عشان الفلوس يا باشا، انا لما اتجوزت عفاف دي كانت شحاته ولا تسوى انا اللي عملتلها سعر، ولكن هي اتبترت على النعمة.. ولما جيت وقعت رفضت تقف معايا كنت عايزني اعمل ايه؟

_ تقوم تقتل بنتك، وتسيب واحد حقير زي ده يعتدي عليها ويولع في جثتها.. انا مش عارف اقول عليكم ايه بجد؟!.. انت واحد مشيت ورا شيطانة مع الاسف.. لبستك جريمه قتل هتاخد فيها اعدام انت وهي.. حسبي الله ونعم الوكيل فيك وفي اللي زيك انا لو بايدي اعدمك وفي ميدان عام

....

سيد اعترف بكل اللي حصل واقواله هو ومراته تطابقت مع اقوال عطيه السجان.. سيد اللي قدر بكل جحود انه يسلط واحد يخلص على بنته، عشان هو عارف ان عفاف مش هتقدر تعيش من غيرها عارف انها ضعيفه وانها بتستقوي بنتها.. وان خسارتها معناها نهايه الدنيا بالنسبالها.. سيد سمع كلام شيطانة كان عندها غل وكره لعفاف مش بس عشان المشاكل اللي ما بينها وما بين جوزها، عشان سوزان كانت مش بتخلف كانت غيرانه من عفاف فلما الغيره تمكنت منها.. فضلت تزن على ودان سيد عشان يخلص على بنته، وفضلت تكرهوا فيها لحد موافق

وعرفنا من عطيه السجان انه ارتكب كذا جريمه في الفتره الاخيرة منهم صاحب التاكس وكذا طفلة ملهمش ذنب، وده عشان البيه بيقتلهم وبيبيع اعضائهم.

...

كنت منتظر حكم القاضي.. وهما التلاتة في قفص الاتهام.. القاضي اللي حكم عليهم باول جلسه بالاعدام.. ووجه كلمة لوالد البنت وقال

_ تعرف يا سيد انا راجل قانون.. ولكن لو بايدي احرقك وانت صاحي.. الواحد بيتمنى يبقى عنده عيل من صلبه وانت ربنا كرمك بملاك.. تقوم تعمل فيه كده.. صدقني حكم الاعدام مش كفايه عليك.. انت اللي زيك لازم يعيش في عذاب العمر كله ولكن للاسف ده القانون.

...

انتهت احداث الرواية نتمني أن تكون نالت اعجابكم وبانتظار آراءكم في التعليقات