"أقداركم تؤخذ من أفواهكم،
فإن دعوت الله بالنجاح ستنجح،
وإن دعوته بالتوفيق ستتوفَّق،
وإن دعوته بالتيسير سييُسِّر لك أمورك كلها،
كما أنَّ الله لن يلهمك الدعاء
بشيء لا يريده لك ولا ليمنعك أجره؛
بل يلهمك لأنه يريدك أن تأخذ
ما تتمنّى بإذنه.. فتفاءل بالخير تجده،
واعلم أنَّ مادام الله ألهمك الدعاء، فأمنيتك لك."
_________
مرحبا حبايب لا تنسون التصويت والتعليق على الفقرات
حته نستمر
#طفلة النقيب
بقلم زينب العلي
_____
جلنار" يا ريت اكدر اطلع منا بس انتي والبنات
ابوي يذبحني ولله تدرين اني خفت من حسينه
جفلنه اثنينه من الصوت الي فززنه جاي من الباب
حسينه" ضحححى شسوين هنا انتي وهل الصفيره
ضحى" هلا عمه شوكت اجيتي
حسينه" سلامتج بعد عمتج كومممي كدامي يله عزلي المطبخ والمسواك
ضحى" اي عمه كايمه
جلنار" كامت ضحى راحت وره عمتهه حته تشوفهه
واني كمت افتر بلغرفه اروح واجي
رحت سويت للبنات اكل وكلتهن بس بالي كوله
يم كلام ضحى يا ترى اشلون راح اطلع من هل البيت
اووف يربي خلصني نوتمتهن وطلعت من الغرفه باوعت بلمطبخ محد اجيت يم
غرفه حسينه وكفت يم الباب اريد اسمع لو اشوف شي
اسمع اصوات غريبه وكلام نزلت جسمي اباوع
من فتحت الباب بلكت اشوف شي عفت تك عين واني صافنه فزيت ورجعت لي وره خطوات جبيرهه
حطيت ايدي على كلبي
ورحت للغرفه اركض قفلت الباب يا رب الي شفته جذب
ضليت اقره معوذات واقره ايات قرانيه
غمضت اعيوني اجه المنضر بالي
جنت مركزه من فتحت الباب اشوف شنو تسوي بس
عين اجت بعيني عباره عن سواد
فتحت اعيوني انفي هل الفكره
ضليت بلغرفه افتر وانفي كلشي من بالي اباوع على الساعه تمشي بطيئ حيل صار هدوء والساعه صوتهه
تك تاك تك تاك ضليت مركزه بلصوت
حطيت ايدي على اذاني وكعدت ابجي بدون صوت
ضليت اتعوذ من الشيطان وقريت ايات قرانيه
مسحت ادموعي رحت غسلت وجهي ورجعت
شفت البنات نايمات كلت لضحى راح اروح صارت ب5
والبنات نايمات كالت الي روحي
طلعت من الباب اريد اتنفس هوه نضيف
ضليت اسحب نفس قوي حيل بحيث حسيت سحبت الهوه كله وصلت للبيت
فتحت الباب ودخلت للبيت باوعت محد بلبيت والبيت
هدوء مو طبيعي صحت بصوت عالي
ماااامه انتصااار ويينج ررااامي حسسن حسييين
وووينكم محد بلبيت شكله رحت للغرف ابجي
دورت الغرف كلهن اريد احد محد موجود
طلعت اركض لجوارينه مره جبيره او متوسطت العمر كاعده وحدهه لكيت بابهم مفتوح دكيت الباب
مدت راسهه من المطبخ وصاحت بصوت
" تفضلللي اددخلي منوو
" دخلت اركض بدون ما اسلم عليهه حته
خااله فدون امي وين واخواني اني من طلعت الضهر
هيه بلبيت وين راحو
" هدي بعد امج شبيج وجهج نخطف لونه
" خاله فدوه وين امي شلعتي كلبي
" امج تخربطت ونقلوهه للمستشفى واخوانج نايمين جوه بلغرفه يمي بلبيت
" من سمعت هيج احس رجليه نملت كعدت بلكاع
اسحب نفس يربي اشلون فدوه الك خليهه سالمه اذا
راحت اني والجهال نضيع
كمت مسحت ادموعي وحجيت على السريع
خاله فدوووه ديري بالج على الجهال اني راح اروح وره امي للمستشفى
" يمه اشلون ترحين وحدج الدنيه تخوف
مو امان ودنيه راح تضلم
" خاله فدوه بس ديري بالج على اخواني مناك امي وحدهه خطيه خلي بالج عليهم فدوه اروحلج خاله لمن نجي
" روحي يمه انتبهي لنفسج وبابكم اقفليه لمن تجون
" انشالله خاله عفتهه وطلعت سديت الباب
ودخلت لبيتنه سديت الباب وراي رحت على الفلوس الي مجمعتهن هواي بيهن اخذت منهن 100
وطلعت خليت كل بقسم بحد كلت خاف علاج لو شي
باوعت الدنيه صارت ضلمه والاذان فات
رجعت دخلت توضيت وصليت وطلعت
تقريبا المستشفى ربع او نص ساعه تبعد
اتذكرت انو تكاسي قليله بهل المنطقه المنحوسه
الكلوبات كلهه طافيه والشوارع ضلمه وصوت ونين واصوات مزعجه هل المنطقه بليل اتحس راكبه جني
مثل حسينه لعبت نفسي من الاصوات طلعت اركض
وايدي على اذاني وصلت لشارع بس اكيد محد
ياخذني منا لازم اتقدم اشوي
تقدمت شوي وابتعدت عن المنطقه الي اني بيهه
الدنيه ضلمه ما اشوف شي وصلت لمكان بسه اضويه
ومحلات وكفت على صفحى واريد بس تكسي يوكف
انتضرت فوك ال نص ساعه اخر شي وكفت سياره
وبيه رجال جبير باوعلي وحجه باستفهام
" عمي وين تردين توصلين ليش بحدج وين اهلج
ودنيه اليل؟
"وكعن ادموعي وحجيت بخنكه عمو الله يخليك تكدر تاخذني للمستشفى *****
" خير عمو شبيج
" احنه محد عدنه بس اني وامي واخواني واني جنت بلشغل وامي متخربطه وماخذيهه للمستشفى فدوه عمو تكدر تاخذني للمستشفى
" لا حول ولا قوة الا لله اصعدي عمي اني اوصلج
" صعدت الي وره واني ادموعي عشره عشره واحاول
اسكت بروحي بعد مرور وقت وصلنه للمستشفى
نزلت مديت ايدي بلجنطه
طلعت فلوس مقبل ياخذ وراد ينزل وياي بس تشكرت من عنده وراح لهله نزلت للمستشفى
وطبيت على قسم الطوارء وضليت اسال على
امي حته يدلوني عليهه ضليت افتر وسال اخر شي كالو الي المريضه الي اسال عليهه هيه بلعنايه المركزه تعبانه
حيل ضليت كاعده بلباب وابجي اجتني
وحده من الممرضات كالت انتي ويه المريضه الي بلعنايه
اسمهه انتصار عدنان كتلهه اي
كالت الي
" اتكدرين تتفضلين ويانه الطبيب رايدج
"حاضر هل الجايه عدلت حجابي ودخلت وراهه
دخلت لغرفه الدكتور باوعلي بنضره بيهه شفقه اشر
على الكرسي وكعدت
اشر للممرضه تطلع وتسد الباب وراهه خفت
شويه ضليت افرك بيدي ومتوتره حيل منتضرته ينطق شنو يريد واخيرا نطق وهوه يكول
" باباتي اسمعيني ونتي واعيه وجبيره
انتو ابوج وين عندج اخوان كبار منو وياجن
" صفنت بوجهه شريد اكول ابوي وين صارلنه شهور مشايفينه حركت راسي ايد كلامه اي دكتور عندي اخوان اصغار اني جبيرت امي خير خوفتني صاير شي
" بابه اسمعين اول شي كلشي يصير بحكمت رب العالمين
وماكوشي ما اله حل
"ونعم بالله دكتور
" امج بيهه مرض السرطان ولازمهه كيمياوي وتبقه هنا بلمستشفى هل كم يوم لان حيل تعبانه
لحد متاخذ الجرعه الاوله اتمنه فهمتيني
" رفعت راسي لي فوك ادعي،ربي بقلبي واحاول ادموعي ميطيحن ما اعرف شنو اسوي احس اديه امربطات
ضليت استفسر من الدكتور واساله شنو اسوي
كال اني اخلص كلشي بس الدفع عليج
طلعت من عنده واني احس الدنيه ضايكه بيه
اختنكت حيل كلت اطلع اشوي اتنفس بره
امي نقلوهه لغرفه ثانيه
اجيت اتمشه بلممرات وصلت قسم الطوارء
ما نحس بس المستشفى بدقيقه صمت صارت هوسه
بعدني ما واصله للباب والباب صار هوسه وبس اصياح
واحد ايصيح على نقاله وخبص المستشفى بصياحه وعياطه تقربت من الباب حته اشوف شنو هل الصوت والخبصه ليش هيج يصيح رج المستشفى بصوته
لكيت الباب عباره عن سيارات عسكريه
وزلم كولهم لابسين مثثل الجيش
صليت واكفه بمكاني من كد الرهبه والمنضر
كل واحد اطول مني يمكن بعشر مرات
اكو شخص بس يصيح على نقاله هذا الي خابص نفسه
حسيته راح يكتل احد من كد العصبيه
جابو نقالات تلاثه وكفت يم السيارات
ونزلو اتلث اشخاص فاقدين الوعي وكلهم دم
اخذوهم وهذولي البره كلهم دخلو جوه
ضل للموقف بالي طلعت للحديقه حته اشم اشوي هوه
كلت الصبح اروح للبيت وقبل ما اروح اسال الدكتور شكد يريد فلوس واجيبهن اله واجي
ضليت كاعده على الكرسي البره وادموعي تجري
ما مستعده اخسرهه اني واخواني لساتنه صغار
لا ابو بيه حض ولا عمامهم لو خوالهم بيهم حض
رفعت ايدي امسح ادموعي اذا ماتت منو النه معقوله ابوي يودينه يم امي لاا عزاا هوه اني بتهه شسوت بيه مو اله ولد شريجتهه
جنت صافنه بلنجوم الي بلسمه اووف يا الله ساعدنه مالنه غيرهه
نزلت راسي اباوع محد بلحديقه بيهه ضوه خفيف
بس اني كاعده بيهه غلبني النعاس حيل
عيوني ضلن يلزكن مكدرت افتحهن
مدريت بشي نمت واني بمكاني مدري شكد مر من الوقت
فززني صوت خشن وايد على كتفي
" اكعددي يبنييه يبنييه ووين نايمه معندج اهل
" فتحت اعيوني بنعاس ما مستوعبه شي
او منو هذا الي اكبالي رجع مد ايده على وجهي ضربني
خفيف وهوه يكول
" الووو شنو نايمه كاعده صحصحي بابه
" فتحت اعيوني مخروعه وبتعدت عنه امتار
ضل واكف بمكانه يباوعلي خفت حيل
حس بيه خايفه منه كال
"لا تخافين ما اسوي الج شي بس ليش هنا نايمه الجو بيه بروده
" نعست اشوي ونمت جنت احجي واني مدنكه
رفعت راسي فتحت عيوني هذا الشخص
نفسه الي اول مطلعت للمستشفه
ضل يصيح على نقاله لخاطر اصدقائه
دنكت راسي وردت اكوم كال
" منو الج هنا بلمستشفى
" امي هنا
" شبيهه
" مريضه
" ليش انتي وياهه قصدي ابوج اخوج عمج خالج
" معدنه احد
" ابوج متوفي
" لا عدل
" لعد وينه
" يم امي الثانيه
" لعد شكد ك****
"شنو
" هيج شبيهه امج
"مرض خبيث
" هاا صدك
" اي حجيت بكلبي شكد يسال يربي
ردت اروح بس خفت منه شكله حيل يخوف
" شنو اسمج
"جلنار
" اني اسمي ليث
" عاشت الاسامي
" شفتك باب المستشفى اتصيح اول ما اجيتو
" اخخ اخخ
" شنو
" صديقي الروح بلروح تصاوب بدالي
" اشلون
" اني اهلي متوفين وبلدوره مالتنه مال الضباط
اتعرففت على شخص وصرنه اصدقاء الروح بلروح
واليوم تصاوب بدالي لذالك شفتيني هيج منفعل
" الله يكومه بلسلامه
" انشالله غضنفر صديقي واخوي اتمنه الله ياخذ من عمري وينطيه اذا صار اله شي
اموت وراه
"فجائه حسيت العلم توقف عندي للحضه حسيت سمعت غلط مدري شوكت طاحت دمعتي
حجيت بدموع
شنوو اسم صديقك
" اشبيج تبجين
"شنو اسم صديقك
" غضنفر
"غضنفر عبدالله اسمه مو صح
" انتي شمعرفج باسمه
" ضلن ادموعي يجرن على السريع وكلبي يدك سريع
اخخ يربي مو معقوله هوه
يا يمه مو مصدكه وكفت على حيليه واشرت اله
كوم الله يخليك وديني اله اريد اشوفه
" ياهو تشوفينه
" غضنفر وديني اله الله يخليك بسرعه
" وين تعرفينه
" خليني اشوفه واكولك
" ولج ام شبر ونص ليش تبجين خبلتيني لو ادري محجيت
" ديله خلينه نروح الله عليك بسرعه
" يله تعالي وراي خلينه نشوف شنو تاليته
" مشه كدامي واني وراه عبالك طفله صدك شبر ونص
وصلنه للغرفه الي بيهه امي وعبرناهه
فرق 3 غرف عن غرفت امي
ليث" بس ميصير تبقين هواي لان قبل اشوي طلعوه
جلنار" وعد ما ابقه هواي
ليث" يله اني منتضرج هنا
جلنار" ضليت واكفه بلباب يا ترى هوه لو مو هوه
معقوله هوه كلبي وجعني اشلون راح اشوفه بهل الحاله
سميت باسم الله وفتحت الباب
ودخلت شفت رجال نايم ركضت عليه وركزت بملامحه
سبحان الله. جان تقريبا يشبهه حيل
اتذكرت العلك الي شديته بايده
باوعت على ايده لكيت علك ضعيف مشدود بايده اليمنه
لزمت ايده وكعدت ابجي من كل كلبي
ما مصدكه هوه نفس الشخص الي عفته من كم سنه
معقوله هوه ضليت ابجي وابجي واحجي ما اعرف احس فقدت بهذيج الحضه ضليت ادعي ربي يكومه بلسلامه
يمكن مرت نص ساعه واني لازمه ايده وابجي
مسحت ادموعي من سمعت الباب اندك
وكفت واني اباوعله اشلون نايم
طلعت من الغرفه ودي ابقه يمه وياخذني وياه
لكيت ليث لساته واكف بره
اول مطلعت شافني اجه يمي
" ول يابه شهل التاخير خو ما خنكتيه
" هههه لا شنو السالفه
"اشو ارفعي راسج
" رفعت راسي اباوع اله
" يا يابه شوف العيون شوف الخشم شكو كوليلي
"هيج ماكو شي
" بربج احجي شكو منو انتي ياهي وعليش هيج اعيونج
" لونهن قصدك
" لونهن وصايرات جبده
"جنت ابجي
" عليش
"شوكت يكعد
" يول شلعتي كلبي احجي
" من يكعد اتمنه تكولي او كوله بطه تريد تشوفه
" نوب منو بطه
"هههه اني
" يول صدك بطه تجين بطولهه
" ردت احجي بس شفت ممرضه دخلت لغرفت امي
بس جانت مستعجله
عفته وركضت وهوه ركض وراي يريد يفهم شبيه
دخلت للغرفه لكيت امي متخربطه والممرضه جاي اتسويلهه مساج على القلب ضليت ابجي بصوت عالي
واصرخ ضلت اتصيح الممرضه حته يجون الدكاتره
واني اطلع من الغرفه ضليت بمكاني وابجي حسيت
شخص وسحبني بره الغرفه واني منهاره بس ابجي
حجيت بصوت عالي
يررربي فدوووه رحتلك احفضههم معندي غيرهم
اذا راحت مامه انتصار منو النه يرربي ما اريد ارجع يم امي يااا ربي دخيلك
"هدي ميصير هيج
" اذا صار الهه شي نضيع كل احنه
" ولو اني ما مفتهم شي من سالفتج بس انشالله ماكو شي وربج يكومهه بلسلامه بس كولي يا الله
" يا الله كعدت بلكاع احس معندي قوه لا نايمه لا مصليه لا اعرف اخواني وين شصار بيهم راح يطلع الصبح علينه
ضليت رافعه راسي للسمه وادعي يربي
تكوم بلسلامه باوعت ليث كاعد اكبالي وعيونه حمر
صافن بوجهي رفعت ايدي ومسحت ادموعي
ليش صافن عليه شبيهن اعيونك
" تعرفين ذكرتيني باختي الله يرحمهه
" الله يرحمهه اشلون ماتت
" نقتلت هيه واهلي هاي الي جوه امج لو مربيتج
" ليش
" اشوفج تكولين مامه انتصار
" هاي مرت ابوي
" ها صدك
" اي امي عايشه صار 4 سنوات يمكن مشايفتهه
متريدني
" ليش الي عنده هيج بطه لازم ميخليهه تطلع
" ردت احجي طلع الدكتور من الغرفه كمت اركض اله
ها دكتور بشر شنو صار
" هدي بابه امسحي ادموعج الحمد لله امج شوي احسن
راح نضربهه هسه صارت زينه بس الفلوس
انريدهن الصبح حته
نباشر بشغلنه وتكدرون طلعون من المستشفى
" ماشي دكتور هنه شكد اني اروح هسه اجيبهن واجي
وانته باشر بلاجرائات
" انشالله بس لا تتاخرين
" عفت الدكتور ومشيت سريع جاهله ليث يمشي وراي اصلا نسيته هوه موجود يمي وصلت للباب طلعت
طلعت على الشارع ورت اوكف تكسي
بس انسحبت من ايدي قوي فرني عليه وهوه يكول
" شكد عيب عليج يول ولج اني وشواربي صار ساعه اركض وراج امشي اني اوصلج اشلون تاخذين
تكسي مو عيب
" ها لا ماكو داعي هسه اروح وارجع ضل هنا خاف يحتاجون منك شي
" اششو انجببي وكدامي ما طول انتي تخصين صديقي
مستحيل اخليج ترحين بتكسي
واعتبريني اني سايق تكسي يله كدامي
"ضليت ساكته رحت وياه صعدت بلسياره واني الف فكره بالي اشلون راح يوصلني هذاك اليوم بيوم رحنه ابو التكسي مقبل يوكف بهل المنطقه
وهذاك الولد هم يكولون منطقه مو زينه
اشلون راح اوصفله العنوان يربي ساعدني
فزيت من صفنتي على صوته
" يوول وين رحتي لا تصفنين وين بيتكم.....
_____
يتبع....
لا تنسون التصويت والتعليق على الفقرات حته نستمر
تدرون اني اكتب يوم ونص تقريبا وانتو تقرونهه ب 5 دقايق🤣🤣
توقعاتكم...
🥺💕
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!