الفصل الثالث

رواية جثة متفحمة الجزء الثالث 3 بقلم محمود الأمين جثة متفحمةرواية جثة متفحمة الحلقة الثالثة البطاقه كانت باسم ابراهيم عيد، الشخص اللي انا لسه عامل ليه الاستدعاء، وده الشخص اللي المفروض نقل الدكتور عزت نصار للمستشفى لما جتله غيبوبة السكر الجثة كانت ملفوفه في بطانية وحالتها صعبة جداً، بصيت لرئيس المباحث وقولتله _مش شايف انها صدفه غريبة شوية، الراجل اللي كان هيشهد في موضوع الدكتور عزت نلاقيه مقتول قبل ما نستدعيه

= اكيد مش صدفه يا باشا، مفيش حاجة بتحصل في الدنيا دي صدفه = ما هو احنا لو فكرنا وسالنا نفسنا مين ليه مصلحه انه الشخص ده يتقتل.. ولو جينا قولنا من مصلحه الدكتور عزت هنلاقي ان الكلام متناقض، اصل الشخص ده هيخلي موقف الدكتور عزت سليم لانه ببساطة هيعرفنا للدكتور عزت فين والساعه كام ونقلوا المستشفى ازاي.. ووقتها كانت دكتور عزت هيخرج من الحسابات لان وقتها كان في المستشفى

_قصد حضرتك ان اللي عمل كده، عاوز يخلي الدكتور عزت ميخرجش بره الدايره دي.. ويفضل متهم في القضية = بالتفكير المنطقي اه، ولكن لسه مش عارفين يمكن مع التحقيقات تظهر حاجه تغير وجهه نظرنا دي في الوقت ده لقيت واحد واقف على جنب الطريق وكان باصص في الارض، وعرفت ان ده الشخص اللي بلغ قربت منه وسألته _انت اللي بلغت عن الجثة؟ = ايوه انا.. كنت ماشي بعربيتي وعطلت هنا ولما نزلت شوفتها مرمية على جنب الطريق _مشوفتش حد تاني؟

= لا يا باشا، انا كل اللي شوفته كانت الجثة وبس هو في اللحظه دي وصل رجاله الطب الشرعي والمعمل الجنائي، وكان واضح طبعاً ان ده مش مسرح الجريمة، وعشان كده بدا دكتور الطب الشرعي فحص الجثة واللي كانت مشوهه في الوجه فقط، ولكن باقي الجسم كان سليم وزي ما يكون الشخص اللي قتله عاوز يخفي ملامح وشه بس، ولكن من الواضح انه نسي ياخد منه اثبات الشخصية او خاف ان حد يشوفه فهرب بسرعة وبعد شوية دكتور الطب الشرعي اتكلم وقال

_كفحص مبدئي الشخص ده مفيش اي جروح في جسمه، ولكن في اثار لوخازات في دراعه.. ابر يعني، وانا مش عايز افكر غلط جايز يكون مريض، ولكن المتوقع ان الشخص ده مات اوفر دوز، يعني كام بيتعاطى المخدرات = بيتعاطى مخدرات؟! .. شخص مدمن وبيتعاطى هيساعد واحد عنده غيبوبه سكر ويوديه المستشفى.. جايز _بتقول حاجه يا باشا؟! = لا يا دكتور كمل في ملاحظات تانيه؟!

_في جرح قديم في الجنب ومتخيط.. بس ده مش هيبان من بره هيبان اثناء تشريح الجثة ولكن واضح ان الشخص ده كان مع حد ولما مات اوفر دوز خاف يجر رجله معاه في الموضوع فشوه وشه بالشكل ده وبعدين رمى جثته هنا = تمام يا دكتور.. احنا هننتظر منك تقرير الطب الشرعي بس اتمنى حضرتك ما تاخرهوش علينا

كلام الدكتور كان منطقي، بس انا كنت مصمم ان اللي حصله ده، ليه علاقة بالدكتور عزت نصار والشهادة اللي كان هيشهدها في صفه… وقتها طلبت من المباحث انها تعمل تحريات عن ابراهيم عيد، عاوز اعرف كل حاجه عنه قبل ظهور تقرير الطب الشرعي ********

النيابة طلبت مننا نعمل تحريات عن المجني عليه ابراهيم عيد بعد ما اتنقل المشرحة، وكلام دكتور الطب الشرعي في الفحص المبدئي بيقول ان ابراهيم عيد ده وراه حكاية كبيرة، ومنطق وكيل النيابة بالنسبالي هو صح 100%، المدمن او المتعاطي بيحاول يبعد عن المستشفيات والاقسام واي مكان فيه لبش

فازاي الشخص ده هو اللي ساعد الدكتور عزت نصار ووصله للمستشفى وهو عنده الغيبوبة.. وعشان كده طلبت من الرائد حسن الكردي عمل التحريات عن ابراهيم عيد وتكون عندي في اقرب وقت وبعد 24 ساعة ظهرت التحريات واللي فيها كلام مهم اوي، وممكن يقلب القضية دي

ابراهيم عيد شغال ميكانيكي سيارات.. شخص عازب وعايش لوحده بعد وفاه اهله.. حالته الماديه في الارض وكان بيستلف من صحابه من ناس كتير.. دخل في سكه الادمان من حوالي اربع سنين واتقبض عليه في قضيه تعاطي واتحبس فتره وخرج

وبعد عن السكه دي لفتره مش صغيرة ولكن بعدها الناس اتفاجئت ان ابراهيم معاه فلوس، ومش الفلوس العاديه اللي بتبقى مع اي حد لا.. ابراهيم كان معاه فلوس كتير ولكن رغم الفلوس اللي كانت معاه الا انه فضل في نفس البيت ورجع لسكه المخدرات تاني.. عشان بعدها الناس تكتشف ان ابراهيم باع كليه من الكليتين اللي عنده.. بس الصدمه مش هنا الصدمه من اللي عمله العمليه دي اصلا.. هو الدكتور عزت نصار

قفلت ملف التحريات واتصدعت حرفيا من اللي قريته، ازاي دكتور كبير زي عزت نصار يورط نفسه في مصيبه زي دي؟! .. وهل صدفه ان نفس الشخص ده هو اللي يلاقي الدكتور عزت نصار عنده غيبوبه سكر وينقله للمستشفى.. الموضوع ده فيه ان، ووكيل النيابة عنده حق وبعد ما خلصنا ملف التحريات بعتناه للنيابة ******

المباحث بعتت التحريات، اللي بعد ما قريتها كنت مصدوم، معقول دكتور بحجم عزت نصار يتورط في حاجه زي دي، وكان لازم احقق معاه عشان افهم ولكن كنت منتظر تقرير الطب الشرعي واللي وصل أخيراً بعد 48 ساعة

فتحت التقرير واللي كان مكتوب فيه ان ابراهيم عيد ميت اوفر دوز.. تعاطى كميه كبيره من المخدرات اكبر من الكميه المعتاد عليها.. وبالنسبه لتشوه الوجه فتم باله حاده بعد وفاه المجني عليه لاخفاء الملامح.. اما بالنسبه للجرح فاثناء التشريح تبين ان احد الكليتين غير موجوده هو من الواضح انها تم استئصالها من قبل في تدخل جراحي.

قفلت تقرير الطب الشرعي وفي الوقت ده لقيت باب المكتب بيخبط واللي دخل من الباب كان الدكتور عزت نصار.. وقولتله _تصدق اني كنت لسه هستدعيك، بس شكلك جاي مبسوط فانا هسمع منك الاول خير يا دكتور؟! = الحمد لله.. انا روحت وكشفت والعلاج اللي كنت باخده وجاب نتيجة، انا ظلمت مراتي.. الولد اللي في بطنها ده كان يبقى ابني وده الورق اللي يثبت كلامي

_تمام عظيم جداً، طيب يا دكتور انا اسف فى اللي هقوله، حضرتك دكتور كبير.. ازاي تعمل عمليه استئصال كلية لمريض، معندهوش مشكلة فيها.. وسبحان الله نفس المريض ده هو اللي ينقذك من غيبوبه السكر ويوديك المستشفى

= انا عملت العمليه دي قبل كده فعلاً.. بس الشخص ده جه واترجاني ان والده تعبان وعنده مرض وحش، وان في حد محتاج الكليه دي وهيدفع مبلغ كبير، انا في البدايه كنت رافض الموضوع ده.. بس صعب عليا، وانا لسه دلوقتي عارف من سيادتك ان هو هو الشخص اللي وداني المستشفى وانا عندي الغيبوبة

_انت عارف ان الموضوع ده يعرضك لمسائله قانونية.. بس لما نخلص الاول من الموضوع اللي احنا فيه نبقى نشوف الموضوع ده يا دكتور.. بس حضرتك مصمم انك متعرفش الشخص ده = والله ما اعرفه.. وبكره الايام هتثبت لحضرتك ده مشي الدكتور عزت نصار وانا مش مصدقه… ولكن بعدها بساعة الباب خبط ولقيت واحد عاوز يقابلني اسمه شوقي ولما دخل وشوفته افتكرته، ده يبقى بواب العمارة اللي فيها شقه الدكتور عزت نصار واللي اتقتلت فيها مدام صابرين

الراجل قال كلام في منتهى الخطورة.. قال ان في واحد كان بيتردد على شقه مدام صابرين في غياب جوزها، ولما سال مين ده عرف ان هو الدكتور النفسي اللي بيعالج مدام صابرين واسمه كريم السيوفي.. وانه كان بيطلع عند مدام صابرين وبيقعد عندها بالاربع ساعات

وانا بتكلم معاه جالى تليفون من المباحث وطلب مني رئيس المباحث افتح الواتساب عشان باعتلي حاجه مهمة.. فتحت ولقيت صورة ورقة.. والورقة دي تخص الدكتور عزت نصار والصدمه انها بتثبت ان الدكتور عزت كان…