الفصل الثالث

رواية جثة يسرا الجزء الثالث 3 بقلم محمود الأمين جثة يسرارواية جثة يسرا الحلقة الثالثة سبب الوفاه كان تسمم، تسمم ازاي؟ بصيت للرائد عزت واللي كان قاعد مستغرب زيي بالظبط، سبب وفاه الاستاذ ساهر واللي المفروض مات مشنوق ولكن مكنش فيه اثار تبين انه حصل اشتباك بينه وبين حد، مفيش جروح على الجسم ولا حتى خدش صغير.. وهنا اتكلم الرائد عزت وقال _طيب مش مكتوب يا فندم عن السم ده اي حاجة تبين اذا كانت اتحط في اكل او في شرب؟

رجعت بصيت في التقرير تاني وفعلا كان مكتوب ان السم ده كان سريع المفعول لدرجه انه عمل هبوط حد في الدوره الدموية في ظرف ربع ساعة ودكتور الطب الشرعي بيقول في التقرير ان نوع السم ده بيتفاعل بشكل كبير مع المواد التي تحتوي على الكافيين يعني معنى الكلام ده ان المجني عليه قبل ما يموت كان شارب قهوة او مشروب في كافيين والمشروب ده هو اللي كان في السم وهو اللي تسبب في وفاته فرد عليا الرائد عزت وقال

_يبقى احنا لازم نستدعي مدام صابرين وناخد اقوالها، وخصوصا انها هتاكد المعلومة، اذا كان جوزها كان بيشرب قهوه او اي مشروب تاني بيحتوي على الكافيين كنت موافق عزت في كلامه، وفعلا استدعينا مدام صابرين واللي قالت كلام مهم اوي _مدام صابرين.. تقرير الطب الشرعي اثبت ان جوزك مات مقتول فعلاً يعني منتحرش، ولكنه مات قبل ما يتشنق مات مسموم فكنت عاوز اسأل حضرتك.. هل جوزك كان بيشرب قهوه كتير؟

= الله يرحمه كان مدمن قهوة، وكان بيجيب نوع نادر شوية وطعمه حلو.. دي حتى العلبه اللي شرب منها اخر كوباية قبل ما يموت كان لسه جايبها _طيب هو بيجيب القهوه دي منين؟! =مش عارفة والله.. مش عارف بس العلبة لسه موجوده في البيت _طيب هكون شاكر جداً لحضرتك لو جبتيلي العلبة دي

مشيت مدام صابرين من قدامي وكنت حاسس اني بقرب من حل القضية وبعد حوالي ساعة، رجعت مدام صابرين وفي ايدها علبه قهوه متوسطه الحجم وقالت ان هي دي القهوه اللي بيشرب منها، مسكتها في ايدي وكان فعلا نوع اول مرة اسمع عنه، وعشان كده اديت العلبة للرائد عزت عشان يتم عمل تحليل للبن اللي داخل العلبة ونشوف هل مخلوط فيه السم اللي مذكور في التقرير ولا لا؟

عشان لو كانت النتيجة سلبية فكده مدام صابرين هتكون هي المتهمه الرئيسيه في قتل جوزها.. اصل مين اللي عمل القهوه وحط فيها السم ده ولو عملها لنفسه مش هينتحر بسم وبعدين يعلق نفسه في السقف وبعد ما تحرك الرائد عزت، طلبت من مدام صابرين تروح وهنكلمها في اقرب وقت عشان تعرف كل حاجة، وبعد 48 ساعة يظهر تقرير الطب الشرعي الخاص بتشريح جثه الحاج بكر ولقيت الدكتور بيتصل بيا وكان باين على صوته التعب واتكلم وقال

_زي ما حضرتك كنت متوقع بالظبط في شبهه جنائيه في موت الحاج بكر، ورغم التحلل اللي وصلتله الجثة ولكن واضح كده ان القاتل ده امه داعيه عليه عشان الحاج بكر اتقتل بسم سريع المفعول وبيتفاعل بسرعه مع اي مشروب يحتوي على ماده الكافيين

اول ما سمعت كلام الدكتور ابتسمت، اللي خلص على ساهر هو هو اللي خلص على الحاج بكر، واكيد هو كمان اللي خلص على مدام يسرا رغم ان طريقة القتل مختلفة، واكيد هلاقي نفس العلبة دي في بيت الحاج بكر، وعشان كده جبت اذن من النيابه بتفتيش بيت الحاج بكر ورغم اننا ما لقيناش حاجة لكن البنت الخدامه اللي كانت في البيت قالت انه في علبة قهوة فعلاً كان بيشرب منها الحاج بكر القهوة بتاعته.. ولكن الاستاذ سعيد رماها بعد وفاه الحاج بكر

كلام الخدامة خلاني افكر صح، سعيد اللي معاه سوبر ماركت وبنسبه كبيره هيكون بيبيع علب القهوه دي عنده هناك، وسهل جداً انه يفتحها ويخلط البن اللي فيها بالسم.. واكيد هو اللي خلص على والده بعد الوصية اللي ظلموا فيها وحرموا من كل حاجة، ولما اتحركنا على السوبر ماركت كان سعيد وقتها مش موجود فيه ولكن لقينا فعلاً نوع القهوه ده عنده وبكده اتحلت العقدة وعرفنا مين الشخص اللي مدوخنا واللي خطط لكل حاجة من البداية.. لحد ما طلعت تقرير

اللي اكد ان القهوه فعلا مخلوطه بسم سريع المفعول واول ما خرج التقرير ده، جبنا اذن من النيابه بالقبض على سعيد بكر، اتحركت انا وقوه من القسم على بيته وقتها كان نايم ودخلنا عليه جبناه من فرشته كان عمال يزعق ويقول في ايه انا معملتش حاجة واول ما وقف قدامي واجهته بكل حاجة عرفتها.. بكل الحقايق اللي كان بينكرها وبالترتيب ولما حس انه خلاص اتكشف، قرر يعترف ولكن اللي قالوا يخلي ابليس نفسه يسقفله ويقف احترام لي

_انا هقول كل حاجة، انا واحد الطمع عماه.. عمري ما اتمنيت موت ابويا وعمري ما كنت شخص وحش بس هو قرر يظلمني، الموضوع بدأ لما كنت قاعد مع دكتور صيدلي وعرفت منه بالصدفة موضوع السم اللي بيتفاعل مع ماده الكافيين بسرعة وان السم ده بيعمل هبوط حد في الدوره الدموية وبيخلص على الشخص في خلال ربع ساعة.. كلام الدكتور خلاني فكرت في مصلحتي وعرفت ان علبه القهوه بتاعه ابويا خلصت وكان باعتلي رساله مع الخدامه اني وانا راجع من الشغل بالليل

اجيب علبه قهوه عشان اللي عنده خلصت وقدرت من واحد من الناس الشمال ان اجيب نوع السم اللي ذكره الدكتور الصيدلي وسلمت العلبة الخدامه اللي عملت بيه اخر فنجان قهوه لابويا، والعلبه وقتها كانت فيها نسبه كبيره من السم.. عشان بعد اقل من نص ساعة ابويا يموت.. كنت ندمان على اللي عملته معاه

وبعد ما مات قعدت كذا مره مع اخويا عشان اخليه يتراجع عن موضوع الوصية واننا نقسم الميراث بينا بالتساوي ولكنه رفض، وساعتها فكرتها اعمل فيه نفس اللي اتعمل في ابويا ولكن المشكلة ان علاء اخويا مش بيشرب قهوة، ففضلت افكر ازاي ممكن اخلص من مراته واللي في بطنها عشان ساعتها الوصية تتلغي وكل حاجه ما بينا تتقسم بالتساوي سهرت ليالي كتير وانا بفكر هعمل ايه؟!

.. لحد ما وقعت على الحل السحري وهي اني اشكك علاء في مراته وعشان اعمل كده، قولتله ان التحاليل بتاعتنا اتبدلت وانت اللي مش بتخلف، مكنش مصدق خصوصا ان مراته حامل ولو كلامي صح يبقى مراته على علاقه بحد تاني.. وساعتها انا كنت عارف انه هيجري على اقرب معمل زي المجنون عشان يشوف نفسه بيخلف ولا لا؟

وده فعلا اللي حصل ولكن انا كنت سبقته وظبطت اللي بيعمل التحليل واخد مبلغ كويس ولما راح ياخد التحاليل الشخص ده بلغه انه مش بيخلف وانه عقيم.. ويومها رجع على بيته وفضل يضرب فيها ودبحها.. ولكن بعد ما اخلص كان مش مصدق نفسه انه اتورط في الدم وفي لحظة لمح الاستاذ ساهر واقف قدام الباب واللي كان على ملامحه الذهول من اللي عمله اخويا في مراته وقرر الاستاذ ساهر انه يرجع شقته بسرعة بعد ما علاء شافه

وساعتها علاء نزل وراه وهدده انه لو اتكلم هيحصل يسرا، ولكن اللي استفز علاء ان ساهر ده ضحك وقال انه هيسيبه عايش في الرعب ده شوية وبعدها هيبلغ عنه عشان ينتقم منهم بسبب ابنه اللي مات.

وقتها علاء ما لقاش غيري، جه واعترف بكل حاجه قدامي وقال انه خايف ان ساهر ده يتكلم.. وانا كان عندي الحل نفس الحل اللي خلصت بيه على ابويا علبه القهوه اللي من النوع نادر جداً وكان بيعجب الاستاذ ساهر جداً ونفس الجرعة من السم اتحطت في العلبه بتاعت الاستاذ ساهر.. وبعدها كلمت اخويا وقولتله ان ساهر جالي المحل وقال انه هيبلغ عنك الليلة وانه لازم يخلص من ساهر قبل ما يعمل كده.. ولما دخل على ساهر كان السم بدا يشتغل وساهر كان تعبان وبكل سهولة قدر يخنقه بالحبل ويشنقوا

عشان يكون خلص على الشخص اللي عارف كل حاجة وكنت فاكر كده ان الموضوع خلص، لكن عرفت ان الواطي واطي عرفت انه متهمني في التحقيقات ان انا اللي قتلت مراته، فقررت اوصله الحقيقة اللي هتخليه زي المجنون وهي اني عرفته بشكل غير مباشر انه بيخلف وانه قتل مراته وابنه ظلم، ومن يومها وهو حابس نفسه في اوضته مش بيخرج.. بس ده كل اللي حصل

خلصت كلام مع الشيطان اللي خطط لكل حاجه عشان الوصيه تتلغي ويتقسم الميراث ولو عليه كان عاوز يخلص على اخوه وياخد الميراث كله.. وقبضنا على الاستاذ علاء واللي اعترف هو كمان بكل حاجة، وقال ان سعيد لعب بيه وضيعوا بس السؤال اللي انا سألته لعلاء كان نفسي اعرف اجابته وهو انه ليه كسر كالون شقته ورغم انه كان يقدر يدخل بالمفتاح وليه كسر كل حاجه فيها وكذلك في شقة الاستاذ ساهر؟

فكانت الاجابه على السؤال ده انه كان بيحاول يوهم رجال الشرطة ان الجريمة تمت بايد حد غريب وانه كان في غرض من السرقة وده برضه كان تخطيط سعيد وبعد ما خلصت تحقيق معاهم قبضنا على الدكتور اللي زور التحليل بتاع الاستاذ علاء والخاص بالخلفة واتحكم عليه ب3 سنين حبس، واتحكم على علاء وسعيد بكر باحاله اوراقهم الى فضيله المفتي حكم عادل يليق بشياطين عملوا كل حاجه عشان الفلوس ونسيوا ان الدنيا فانية. تمت لو عايز

الرواية كاملة اضغط على : (رواية جثة يسرا)