الفصل الثاني

رواية جثة يسرا الجزء الثاني 2 بقلم محمود الأمين جثة يسرارواية جثة يسرا الحلقة الثانية كانت جثة الاستاذ ساهر.. الشخص اللي اتذكر في التحريات انه احد المشتبه فيهم في جريمة قتل مدام يسرا

الناس كانت كلها متجمعه قدام الشقة، ناس من العمارة وناس من الشارع، فطلبت من الرائد عزت انه يفك اللمة اللي قدام الباب، عشان نعرف نشوف شغلنا.. بصيت على الشقة ولاحظت انها كوبي من اللي حصل في شقة مدام يسرا كل حاجة كانت متكسره ومتبهدلة بس الفرق ان الراجل ده اتشنق متقتلش بنفس الطريقة اللي اتقتلت بيها مدام يسرا، وعرفت ان اللي قدمت البلاغ هي مراته مدام صابرين واللي كانت واقفه على جنب حاطة ايدها على بوقها ومنهارة من العياط

قربت منها وبدأت اتكلم معاها _حضرتك مدام صابرين اللي قدمتي البلاغ مش كده؟ = ايوه انا.. انا مش عارفة ايه اللي حصل انا نزلت عشان اجيب شوية طلبات للبيت وهو كان نايم، ولما رجعت لاحظت ان باب الشقة مفتوح.. قولت اكيد هو قاعد في الصالة بس اول ما دخلت لقيت المنظر ده. اول ما خلصت كلامها فضلت تبكي بحرقة فطلبت منها تهدى وتقولي اذا كان في بينها وبين حد مشاكل ولا لا؟

= ساهر كان عصبي وبيعمل مشاكل مع ناس كتير، بس اكبر مشكلة اتعملت كانت مع الاستاذ علاء جوز مدام يسرا الله يرحمها

اللي مش هقدر اسامحها انها كانت السبب في اللي حصل لابني، انا كنت طالبه منها بس مساعدة عشان هي خريجة تمريض، بس بسبب اسلوب جوزي في الخبط على الباب وطريقته في الكلام هي خافت ورفضت تفتح الباب الا في وجود جوزها وللاسف ابني مات وده اللي خلى ساهر كان هيكسر الباب عليها لكن الاستاذ علاء وصل في الوقت المناسب وكانت هتدور بينهم خناقة لولا تدخل الجيران

_وساعتها جوزك هددوا انهم مش هيتهنوا على ابنهم اللي جاي في السكة.. وجايز يكون هو اللي قتل مدام يسرا = لا يا فندم انا بأكد لحضرتك ان جوزي معملهاش.. وانا هاجي المكتب وهتكلم مع حضرتك عشان في حاجات لازم تعرفها بس انا مش قادرة اتكلم دلوقتي حضرتك شايف الوضع _تمام يا مدام صابرين، وانا هكون في انتظارك في اي وقت

خلصت كلام معاها ووصل رجالة الطب الشرعي والمعمل الجنائي للشقة وبدأ فحص الجثة ومسرح الجريمة، وكنت منتظر كلام دكتور الطب الشرعي معايا كالعادة واللي منه هفهم اذا كان في شبهة جنائية ولا الشخص ده انتحر فضلت مستني شوية لحد ما الدكتور اتكلم وقال _الفحص الظاهري للجثة بيقول ان مفيش شبهة جنائية، مفيش اثار كدمات او جروح على جسم الجثة = يعني الشخص ده انتحر؟

_بشكل ظاهري اه، ولكن لسه لما تتشرح الجثة هيبان اذا كان الشخص ده انتحر ولا اتقتل كلام دكتور الطب الشرعي كان عكس كلام رجالة المعمل الجنائي ولتاني مرة تحصل حالة التشابه اللي كانت في الجريمة الاولى وهو كسر في الكالون الخاص بباب الشقة، وبكده انا كنت متاكد ان تقرير الطب الشرعي النهائي هيقول ان الموضوع في شبهة جنائية ولكن كان لازم استنى

اتنقلت الجثة للمشرحة وسمحت لمدام صابرين انها ترجع لبيت ابوها بسبب انها منهاره ومش قادره تتكلم ووعدتني انها في اقرب وقت هتيجي عشان تتكلم معايا ورجعت على مكتبي انا والرائد عزت.. اللي اتكلم وقال _انا مستغرب حضرتك ازاي تكون عارف ان الست دي عندها معلومات في جريمة قتل مدام يسرا وتسيبها تروح كده بيت ابوها وعادي رغم ان جوزها لسه ميت وبنسبه كبيره هيطلع اتقتل

= عشان الست زي ما انت شايف كانت منهاره وتعبانة، وانا عايز اخد منها معلومه كاملة، مش شوية كلام بيتقال في لحظة زعل، خصوصا انها قالت انها مش مسامحه مدام يسرا وشايفه انها سبب من اسباب موت ابنها.. فانا عايز ياخد منها كلام مرتب ومنسق يفيدني ويعرفني مين اللي عمل كده.. ودلوقتي انا عاوز منك اننا نعمل استدعاء للاستاذ سعيد بكر اخو الاستاذ علاء وده مشتبه فيه في الجريمة الاولى ولازم ناخد اقواله ونحقق معاه

وفعلا طلع اذن باستدعاء الاستاذ سعيد والراجل ما تاخرش وبمجرد ما وصلوا الاذن كان عندنا.. وعرفت ان الاستاذ سعيد مع سوبر ماركت كبير وقاعد في معظم الوقت وبدأت اتكلم معاه _حضرتك عندك علم احنا استدعناك ليه؟! = في الحقيقة لا، ولو على موضوع مرات اخويا فانا بعيد عنه بقالى فترة من يوم ما رفض ينفذ شرع ربنا ومشي ورا تخاريف ابويا في اخر ايامه _بس اخوك متهمك بشكل صريح انك انت اللي عملت كده

= علاء اتهمني ان انا اللي قتلت مراته، طيب هستفيد ايه لما اقتلها ما خلاص ابويا ومات _لا يا استاذ سعيد هتستفيد، عشان الوصية بتقول ان في حالة موت الطفل قبل الولاده او حتى بعد الولاده، الميراث يتوزع ما بينك وبين اخوك بالتساوي.. يعني لو بالعقل انت المستفيد الاول في موت مدام يسرا

= وانا بقول لسيادتك اني مقتلتهاش، انا ممكن اختلف مع اخويا في موضوع الورث نقاطع بعض لكن اقتل مراته وابنه عشان الفلوس، انا مستحيل اعمل كده ورغم ان هو اتهمني انا مش هردها رغم اني قادر اقول على اللي عندي

_لا يا استاذ سعيد، لو عندك حاجه قول لو خبيت ممكن تلبس في حاجه انت معملتهاش زي ما بتقول، وعاوز اقولك انك المتهم الرئيسي في الجريمة.. انا بس انا استني ظهور تقرير الطب الشرعي وتقرير المعمل الجنائي والبصمات عشان يكون عندي دليل قوي على القاتل = انا اللي كان عندي وعاوز اقوله..انكم لازم تشكوا فيه هو برضو هو اتجوزها مصلحة وكان بيمد يده عليها كتير وفي مره من المرات كان هيخلص عليها لولا ابويا الله يرحمه اللي لحقها من تحت يده

خلصت كلام مع سعيد واللي قدامي ان كل واحد بيرمي على التاني التهمة بس مش عارف ليه كان عندي احساس ان موت الاستاذ ساهر هيكون هو مفتاح الجريمة الاولى وبعد 24 ساعة ظهر تقرير الطب الشرعي والمعمل الجنائي والبصمات الخاصه بجريمة قتل مدام يسرا.. ولكن مكنش في جديد اقدر اتسند عليه في التقارير دي حتى تقرير البصمات اللي اكد ان البصمات اللي موجوده في مسرح الجريمة هي بصمات المجني عليها بس

وفي نفس اليوم وانا قاعد بفكر لقيت العسكري داخل بيبلغني ان في واحده عاوزاني بره ولقيت مدام صابرين هي اللي داخله عليا سلمت عليها وطلبت منها تقعد وبدأت تتكلم وتقول الكلام اللي عندها وبعد ما خلصت.. كلمت النيابة بسرعة عشان نطلع تصريح استخراج جثة اتدفنت من حوالي اسبوع ونص وبمجرد ما حصلنا على الاذن اتحركت انا والرائد عزت على المقابر ومعانا قوه من القسم وتم استخراج جثه الحاج بكر.. عشان على حسب كلام مدام صابرين ان يوم وفاه

الحاج بكر قابلت مدام يسرا وكانت منهاره من العياط وكأن اللي مات ده ابوها مش حماها ومع انهيار مدام يسرا قالت ان الحاج بكر اتقتل على ايد ولاده ودفع تمن الوصية.. اتنقلت الجثه للمشرحة رغم وصولها لمرحله صعبه اوي من التحلل.. والدكتور قال انه هيعمل كل اللي عليه والتقرير هيطلع في اقرب وقت.. رجعت على مكتبي ويا دوب لسه هقعد ولقيت الرائد عزت داخل وفي ايده تقرير الطب الشرعي وتقرير المعمل الجنائي والبصمات الخاص بقضية الاستاذ

ساهر.. فتحت التقرير الخاص بالطب الشرعي وكان مكتوب ان في شبهه جنائيه في موت الاستاذ ساهر زي ما كنت متوقع ولكن الصدمه مش هنا الصدمه كانت في سبب الوفاة والسبب هو..

لقراءة الفصل التالي : لو عايز الرواية كاملة اضغط على : (رواية جثة يسرا) مدونة كامومنذ 15 ساعة 0 5 دقائق