الفصل الرابع

رواية جثث العيلة الجزء الرابع 4 بقلم محمود الأمين جثث العيلةرواية جثث العيلة الحلقة الرابعة السلاح كان خارج من عند نجلاء، واول ما شافت السكينة وهي خارجه من اوضتها، مكنتش مصدقة نفسها، الصدمة لما تكشف حد كان فاكر ان طول عمره هيفضل مستخبي، والخوف اللي كان باين في عينيها كان بيوضح كل حاجه قربت منها وقبل ما اتكلم هي اتكلمت وقالت _انا معرفش حاجه عن السكينة دي، معرفش ايه اللي جابها هنا اصلا

= الكلام ده بقى تقوليه في النيابة يا مدام نجلاء، احنا مخرجين السكينه اللي غالبا عزت اتقتل بيها من اوضتك مش من اوضه حد تاني، وطبعا هنرفع البصمات اللي عليها وهنطبقها ببصامتك ولو كانت متطابقة هتبقي متهمه بقتل عزت ودي جريمه قتل مع سبق الاصرار والترصد يعني فيها اعدام _وانا بقول لحضرتك، اني مقتلتش حد = هنعرف، وكل حاجه هتبان

اتقبض على مدام نجلاء ورجاله الطب الشرعي والمعمل الجنائي خلصوا شغلهم في المكان.. والدكتور قرب مني وقال _مفيش شبه جنائية ظهرت لحد دلوقتي ولكن بعد التشريح هنشوف اذا كانت الست دي ماتت موتة طبيعية ولا حد قتلها = تمام يا دكتور وانا في انتظار نتيجه التشريح خلصت كلام مع الدكتور واتنقلت الجثه للمشرحة ومدام نجلاء راحت على النيابة عشان يبدأ التحقيق معاها ونشوف هي قتلت عزت ليه وازاي؟

اول ما قعدت قدام وكيل النيابة كانت خايفه وبتترعش وده اللي خلى وكيل النيابة يدوس عليها شويه في الكلام عشان تعترف وتقصر علينا السكة.. وبعد تحقيقات اربع ساعات متواصلة قررت أخيراً انها تتكلم _انا هعترف باللي عملته، بعترف اني قتلت بس انا كنت باخد حق ابني من عزت لكن انا مقتلتش الحاج سيد ومقتلتش نبوية الخدامة، ومعرفش مين اللي عمل فيهم كده = طيب بما انك قررتي تتكلمي، تحكي كل حاجه من البداية عاوز اعرف ايه اللي حصل كله

_الموضوع بدأ من اليوم اللي كتب فيه الحاج سيد كل حاجه باسم سيف ابني، اليوم ده انا فاكره كويس كانت مشاكل لرب السما ولاول مرة الحاج سيد يشوف ولاده بيعلوا صوتهم عليه وكان عاوز يقوم يضرب كل واحد فيهم قلمين عشان يفوق بس كانت صحته خلاص بقيت في النازل، يومها بالليل سمعتهم وهما بيتكلموا مع بعض _فضلت تبعدوا عننا لحد ما خليته كتب كل حاجه لابنها واحنا طلعنا من المولد بلا حمص وده على جثتي انه يحصل

= عندك حق يا عزت دي وليه شرانيه، انا مش عارف ابوك اتجنن عشان يروح يتجوز واحده اصلها غجري ولا ايه، لا وراحت خلفت عيل عشان تكوش على كل حاجه وهي الاقرب لابوك دلوقتي يعني لازم نلحق المصيبه قبل ما تحصل. = هنعمل ايه؟ .. عندك حل للموضوع _عندي حل يا عزت، بس عايز قلب جامد، قلب ميخافش ولا يحسبها

_بعد ما سمعتهم خوفت على نفسي وعلى ابنى وكنت ناويه اتطلق من سيد واخد ابني ونسافر، مش عاوزه فلوس ولا ورث.. بس للاسف ملحقتش عشان الحادثه حصلت وابني راح فيها

ساعتها قررت اني اخد حقي، لازم احسرهم على عيالهم زي ما حسروني على ابني، الموضوع مكنش صعب هي شويه سموم اتضافت على بعضها، السموم دي بتعمل مضاعفات خطيره في الجسم ومش بتبان في اي تحاليل وعرفتها من اخويا الدكتور اللي مسافر بره واللي قرر انه يساعدني لما عرف اللي حصل، ويوم التنفيذ خليت ابن عزت شرب من كوبايه العصير وبعدها بدات تظهر عليه الاعراض، ما حدش كان فاهم عنده ايه ومات قدام عينيهم وهما متحسرين عليه

وكنت ناويه اعمل كده في عيال طه، لكن سمعت طه في يوم بيتكلم في التليفون مع اخوه وعرفت من خلال المكالمه ان اللي ادبر الحادثه هو عزت، مكنتش شايفه غير منظر ابني قدامي وهو بيموت يومها اتأكدت ان مراته بره البيت وهو نايم وكنت عارفه ان هو بيسيب نسخه احتياطي تحت الدواسه اللي قدام الشقة روحت واخدتها وخلصت عليه وهو نايم، ملحقش يقاوم انا كنت بضرب فيه زي المجنونه لحد ما اتأكدت انه مات، وانا مش ندمانة اني عملت فيه كده

= طيب بالنسبه للحاج سيد والست نبوية مين اللي عمل فيهم كده؟ _اكيد عزت او طه، بس ليه معرفش؟! .. انا عارفه اني كده كده هتعدم فلو انا اللي عملتها هتكلم ولكن صدقني انا اعترفت باللي عملته وبس وكل النيابة خلص تحقيق مع مدام نجلاء، وبعد 24 ساعة طلع تقرير الطب الشرعي الخاص بوالدة طه التقرير اللي اثبت ان الوفاه وفاه طبيعيه ناتجه عن ازمه قلبية حادة، واضح ان الست متحملتش خبر موت ابنها وماتت

وبعد ما عرفت نتيجه التقرير.. النيابة استدعت الاستاذ طه عشان يدلي باقواله بعد كلام مدام نجلاء وطبعا انكر كل حاجة وقال ان الست دي بتاعة سحر وشعوذه ودجل وانها من اصل الغجر وانها اكبر غلطه غلطها ابوه

بس في نفس الوقت بتظهر نتيجه البصمات اللي على السكينه اللي اتلقت في اوضه مدام نجلاء ومكنش عليها غير بصمه واحده بس وباقي البصمات كانت ممسوحه واضح ان القاتل ما لحقش يمسح الباقي، ولكن الصدمه ان الدم اللي على السكينه مش دم عزت ده دم الست نبوية.. وزي ما كنت متوقع البصمه اللي على السكينه طلعت متخصش مدام نجلاء.. طلعت بصمه طه

اللي كان لسه في التحقيق مع وكيل النيابة والدليل وصل على المكتب وهو بيحقق معاه وده اللي خلى وكيل النيابة يبتسم ويواجه طه بالحقيقه والدليل اللي وصل وخلاص طه عرف ان هو اتكشف وان الانكار مش هيفيد وان الافضل ليه والاحسن انه يحكي جايز ده يحسن موقفه في القضية واتكلم وقال

_اه انا عملت كده، انا اللي قتلت ابويا خنقته، عشان راح كتب كل حاجه باسم ابن الغجرية واحنا اللي عشنا نشقى ونشتغل عشان نكبر اسم العيلة وفي الاخر نلاقي نفسنا طالعين من المولد بلا حمص، ليه ده احنا عياله ومن صلبه، حتى لو كنا بنغلط كتير خلي بالك انا مش ندمان اني خلصت عليه ده كان اب جاحد حرمني من حقوقي وكان بيعاملني اسوء معامله من وانا صغير، اما ابن الغجرية كان بيتعامل احسن معامله وكانه ما خلفش غيره، بس وانا بخلص عليه من حظي

الوحش ان نبوية شافتني وعشان انا عارف انها جبانه هددتها اني هخلص عليها لو اتكلمت وكنت فاكر ان الموضوع كده خلص، لكن نبوية بدأت تخطط هتستفيد ازاي من اللي شافته.. صوتها بقى عالى وبقيت تتكلم بجراءه وطلبت فلوس كتير في مقابل سكوتها وافقت عشان اخليها تطمن، وفي اليوم ده خلصت عليها بايدي، ولما الظابط جيه البيت عشان يشوف تسجلات الكاميرا اللي في المطبخ واللي انا كنت بوظتها، عملتله فنجان قهوه في حبوب هلوسة وفي نفس الوقت بدات ازرع

جوه عقله فكره ان نجلاء بتمارس السحر والشعوذه عشان التهيؤات اللي هتحصله

1 2الصفحة التالية مدونة كامومنذ 3 أيام 0 4 دقائق