رواية جيت مابيك تحقرني جيت أبيك تعز شاني الفصل 114 - بقلم r010ee

: مصعب أنا جايه يمك وأنا مابي اسمع عتب وخلي الماضي وراك

مصعب بسخرية سند ظهره على الكنبه :وش حكايتكم مع الماضي الكل يبيني انساه
الصبح أبوي والحين أنتِ

نوفه طالعته سبحان الله نفس اسلوب النايفة تتحول بالكلام وتغير شخصيتها وتخدعك ترفعك للسماء وفجأة تنزلك للأرض قالت :أبوك صادق ليه تجلس تنبش بالماضي

مصعب : ودي اعرف الماضي كله

نوفه بضيق : يمه مصعب خليك الحين

قاطعها بصوت مخنوق : أمي ظالمة ولا مظلومة

نوفه توترت حيل من سؤاله وش تقوله بالله
وأكثر شيء صدمها يوم وقف وبسرعة نزل على ركبته قدامها وقال وهو ماسك يدها وعيونه دموع : سألتك بالله تريحين قلبي بموت تعبت مدري مين اصدق فيهم أنا بين نارين أمي وأبوي
تكفين قولي مين المظلوم فيهم

نوفه آه وجعها حيل مسكت وجهه وقالت ودموعها تنزل معاه : يابعد قلبي وش تبي بذا الكلام

مصعب وقف وصرخ بقهر : لا تضعين الكلام
قولي الصدق

نوفه وقفت وقالت بحده : لا تصرخ وبعدين انا ماهو جايه عشان اعرفك بحقيقة أمك ولا أبوك
جايه اسلم عليك وقاصده الوصل ومابي القاطعه تستمر ويالله بحفظ الله وجت بتطلع بس وقف بوجهااا وقال وهو منهار : أمي كانت على علاقه مع عمي راشد

نوفه صعقت من كلامه بحده : لا تكلم بشيء انتهى

مصعب ابتعد وهو مصدوم : يعني فعلاً كانت على علاقة معاه واللي قاله أبوي صدق

نوفه حزنت عليه قربت منه وقالت وهي تمسك كتفه وقلبها موجوع عليه وبعد مايهون تتكلم بأختها مهما صار تظل أختها وبعد حرام ينظلم صقر وهو الي انقذها وأنقذ أخوها لا يبتلي فيها حتى طلع احسن من اخوه اللي بعد غلط معاها : أمك غلطت وربك غفور وانتهى الموضوع

قاطعها وهو يصرخ : انتهى كذا

نوفه قالت بحده : مصعب لو تبي الماضي يسيطر عليك صدقني مافي أحد بيخسر غيرك

مصعب جلس على الكنبه وهو يحس بضيق
بصدره طالعها والدموع بعيونه :كانت بعيوني ملاك

نوفه قاطعته : مهما صار تذكر شيء واحد بس انها أمك وبتفضل ملاك بعيونك

مصعب هز رأسه بلاااااااوهو مصدوم حده الحين تأكد مين هي أمه ...والكلام اللي ينقال عنها طول ذي السنوات كان حقيقه ...وهمته انها مظلومة
وزرعت فيه احقاد للي حوله خلته .. يكره الكل

نوفه قلبها عورها عليه بس صعب تقدر تأخذ وتعطي معاه بذات هالوقت قربت منه وهمست بحنان : أنا أمك أتمنى تتقبلني بحياتك واللحين بخليك ترتاح وبخلي ياسر يرسلك عنوان الشقه اللي أنا جالسة فيها أتمنى يوم تهدأ تجي لي شافته بيتكلم قاطعته أتمنى ارجع اشوفك قبل لا اسافر ...لبست نقابها وطلعت
شافت ياسر واقف وكأنه مستعد للهاوش قالت وهي ناقده عليه ليه عاندها ونزل : وش قلت أنا

ياسر بقهر طالع جهة باب المدخل : قهرش زعلش والله ادخل واحوس خشته ...

نوفه حطت يدها على كتفه : امش بس وخليك من عصبيتك ذي وتحركت تمشي قبله
أول ماركبت وهو ركب نزلت دموعها وقالت بحرقه :الولد متدمر على الآخر ياسر مسحت دموعها ماراح نمشي لأبها حتى اشوف وضعه

ياسر فتح عينه بصدمه : عمه دوامي

نوفه : ارجع وأنا بجلس بالشقه ومعي البنات

ياسر انصدم حده من كلامها :وأبوي وش اقوله رجعت بدونهم أكيد بيعرف وقتها

نوفه بحده : مايهمني اللحين يهمني مصعب مستحيل اطلع من الرياض قبل اطمن عليه خلاص ياسر لا تزودها معي

ياسر شوي وينجن من كلامها : توش متطمنه عليه
وش تبين بعد

نوفه هزت رأسها بلااااا: الحين وضعه صعب وبكون بدون قلب لو تركته وهو بذي الحالة ...ابيه يهدأ وبرجع اجلس معاه والعقد اللي حطتها فيه النايفه انا الي بقدر اخليه يطلعها من حياته

ياسر هز رأسه بعجز عمته ذي ناويه على فصله قال : بشوف دوامي والله يستر بس لا تطلع منه العقد وأنا اتعقد بعده

نوفه بحده : قلت لك روح وانا بجلس هنا والبنات معي ماعلينا خلاف

ياسر بصبر مايبي يعصب وتزعل منه : صعب صعب اخليكم بلحالكم هنا وبعد دراسة نور بعد إسبوع يبدأ الفصل الثاني

نوفه بجمود : وش علينا الحمدلله الدنيا أمان
وتطمن عمتك بمية رجآل وطالعته ولو ميت وراء زوجتك خذها معك .. ونور تجلس معي لما تبدأ الدراسة واحجز لنا وحنا نرجع حتى لا تعب نفسك وتجي

ياسر يستاهل هو من الاول قالها عنه و اعطاها على جوها ....واللحين وشلون يرجع بدونهم عشان أبوه يذبحه تنهد بعجز : اللهم طولك ياروح
@
@
@
(الديرة )
شمسه حطت يدها على بطنها وزفرت بتعب اليوم كله بطوله واقفه على رجولها أم عواد مسويه عزيمه لبسوم بعد مارجعت من السفر وبعد ما الكل راح طالعت ابتسام وبيدها العبايه :وين رايحه خليني احط لنا عشاء ونتعشى مع بعض ميته جوع

ابتسام : لا مابي اتاخرعلى بسام دق علي من توو

شمسه :إلا على طاري بسام وشلونه معتس بس باقي بثر ولا اعتدل

ابتسام تنهدت براحه : لا الحمدلله اعتدل

شمسه : الحمدلله يارب أخيراً عقل

رن جوالها وقالت بخجل : تونا بسيرته

شمسه بسخريه : ذيب

ابتسام طالعتها : غصبن عنتس

شمسه ضحكت عليها : مسرع ضيع علومتس ذا البسام

ابتسام بقهر : عدوة الرومانسية خليتس بعيده عنا لو سمحتي وفتحت الخط وهمست بخجل : هلا

: تعالي المجلس اخوتس يبي يسلم عليتس
قبل نمشي

همست برقه : ان شاءالله
طالعت شمسه اللي تطالعها بصدمه قالت بقهر : خيرر

شمسه : معقول وصل تأثيره عليتس حتى تغيرين صوتس وين الي صوتها يردح

ابتسام وقفت وهي تلبس العباية : معاد اقول إلا الله يساعد أخوي بس

شمسه بثقه : تطمني اخوتس مبسوط واشرت لها وهي تنعم صوتها تقلدها : ويالله روحي لبسام لاتبطين عليه

ابتسام راحت للمجلس وهي خجلانه من أخوها أول مره تشوفه بعد العرس دخلت المجلس ردت السلام وقربت من عواد الي رحب فيها : هلا والله بالعروس
ابتسمت بخجل وسلمت عليه ضمها بحنان : والله على بثرتس بس البيت مايسوي من دونس

بسام بلقافه : لو سمحت زوجتي ماهي بثره
عدل ملافظك لا اردها لكم ونقفل ذا الباب واريح نفسي من بثرتها

عواد بصدمه : أنت اللحين تدافع عنها ولا وش السالفة انا عجزت صراحه افهم

ابتسام طالعته بقهر صدق هذا اللي مايعرف يحكي
وانقهرت أكثر يوم قال : افهمها مثل ماتحب

عواد مسكها من كتوفها وقربها منه ورفع حاجب : أجل اللي فهمته نقفل ذا الباب ونرتاح

بسام قال بعباطه : اي باب

ابتسام فشلها قدام أخوها هذي عين شمسه توها تمدحه عندها قالت وهي شوي وتصيح من الفشله : الباب اللي من تو تبي تقفله وتريح رأسك

بسام وقف : قدامي بس اشغلتونا بذا الباب انتِ وأخوتس

عواد أشر للباب : بتنقلع انقلع بلحالك بسوم ماهي جايه معك وطالعه بتحدي

بسام طالع ابتسام وقال : مصيبه لو تبي تسمعي كلام ذا الغيور ترى حياته عدم مع بنت عمه ويبي الكل مثلــ......بس ماكمل كلامه إلا هو مسحوب لفوق من ياقة ثوبه

صرخ بعصبيه وهو مقهور منه : وشل دخلك بحياتي مع بنت عمي

بسام وهو مخنوق :فكني كح كح

ابتسام بخوف عليه وهي تشوف وجهه قلب أحمر وشوي وينخنق مسكت بعواد : عواد حرام عليك
فكه لا يموت بيديك

عواد فكه وقال بقهر : مدام خايفه عليه قلعتكم الاثنين لا اشوفكم

بسام اعتدل بوقفته وهو يعدل ثوبه ويسبه بصوت واطي

عواد صغر عيونه: لو رجال ارفع صوتك

بسام مسك ابتسام وابتعد شوي وقال : يالله اعتذر

عواد صرخ : وشهوووووو

بسام بسرعة قال : أنا اعتذر منك ومبروك على رجوعك للرياض

ابتسام بفرحة : صدق عواد رجعت هنا ومعاد برايح للحد

عواد عض شفته بقهر منه يبيها مفأجاة كان خرب عليه :ايه حالياً جابو كتيبه ثانيه بس الله اعلم باي وقت يرجعونا

بسام قال وهو يصلح اخلاقه : وأنتم قدها ياصقور العرب الله يحميكم

عواد رفع حاجب :ايه اعتدل

بسام مسك يد ابتسام وطالعه بنظره تقهر : امشي بس ذا بيضع وقتنا

عواد هز رأسه بعجز من هذا الآدمي قال وهو يرفع صوته :الله يصبرتس وأنا اخوتس عليه

بسام : انكتم بس وطالع ابتسام الحين لازم ننحاش العمر مش لعبه

ابتسام بقهر : مدام جبان ليه تتحرش فيه

بسام :هوايه

أول ماطلعوا طالعها بخبث : بما انتس تعرفين تسوقين خذي سيارتي وأنا بزرف سيارة اخوتس
عندي نسخه من المفتاح اخخخ بس نسوي فيه دقه ونرجعها له تمام

ابتسام ضرتبه على كتفه : يالله من اللي ناوي يموت الليله

بسام : تكفين خلينا نمقلبه شوي يقوم الصبح مايحصلها وينجن

ابتسام وصلت معاها خلاص :والله كلمه ثانية برد البيت واشوف كيف تقدر ترجعني معاك

بسام بقهر عض شفته : ماشي منتس نسخة اخوتس طلعتي نفس الحده ماتعرفون بالمزح والمقالب

ابتسام فتحت عينها بصدمه : تسرق سيارته وتقول مزح ومقلب

بسام بتصريفه : خلاص انسي المقلب واركبي ساكته

ابتسام ودها تدخل تذبح شمسه والله هي السبب من مبطي ماستهبل تسذا
@
@
@
دخلت جناحها وبيدها العشاء اللي أخذته معاها من تحت راحت للمطبخ وحطته وراحت غرفتها غيرت ملابسها ورجعت حطت لها عشاء وطلعت جلست قدام الشاشه تأكل ...
طالعت عواد يوم دخل قالت وهي فرحانه : ربي جابك تعال تعشى

هز وأسه بلاااا : لا شبعان غريبه انتِ ماتعشيتي

شمسه : مامداني كرف ماشاءالله امك عزمت أهل الديرة كلهم عيني على بسوم ماتعشت زين وراحت مع رجلها

رمى نفسه جنبها بتعب وقال :قلنا يسافرون شهر العسل وننفك منهم شهر بس لا رجعوا بعد اسبوعين ورجلها زايد بغثاه

شمسه ابتسمت على كلامه : حرام عليك عواد والله البيت مايسوى بدونها وعضت شفتها بحزن عليها كان بعد كل عزيمه نتجمع أنا وهي واللحين شوفني لحالي بدونها

عواد بسخريه : وتجلسون تبلعون وتحشوون بكل وحده جت للعزيمة

شمسه : لا تظلمنا

عواد قال بخبث : اففف ورايه طيارة الفجر

تحس نفسها انسدت يوم ذكرها بالسفر
: عواد ليتك تأخذ إجازة لما اولد بس

عواد عض شفته وهو يمثل عليها : مقدر وأنتِ عارفه وشلون الوضع هناك

شمسه: آه والله تعبت
كل لليله أبيت وأنا قلقانه عليك وكل وقت اسأل نفسي وش يسوي الحين وش صار عليه وبذات يوم جوالك يكون مقفل هنا انجن

عواد بثقه : عارف والله بدوني ماتسوي شيء

تنرفزت من رده وقفت وهي تأخذ الأكل : عواد لا تبدأ واعطته ظهرها ودخلت المطبخ
حضرت حلا وقهوة وطلعت حطته على الطاولة وجلست جنبه وصبت له فنجان قهوه وناولته وهي تقول : على الآقل حلي معايه

عواد أخذه منها وهو يقول : يلاااا كملي

شمسه عقدت حواجبها : وش أكمل

عواد رفع حاجب بغرور : كملي كلامتس عني وهالله هالله ماوصيتس كثري من الكلام الزين

شمسه ميلت فمها بسخرية و صبت لها فنجان قهوه وقالت بخبث وهي ناويه تكسر مجاديفه بعد ماشاف نفسه عليها : امممممم طيب اعطيني فرصه افكر
شافت ابتسامته بدت تختفي وقال بصدمه : الحين عشان تمدحيني قبلها تفكرين

شمسه أخذت رشفه من القهوة وحطت يدها على رأسها يقال تفكر :اممم طالعته شافته يطالعها وهو مقهور

ابتسمت بخبث : سوري عواد ماحصلت شيء سويته لي ينذكر وامدحك عليه

عواد قال بعصبيه وهو يقوم : اللحين بسافر ماراح انتظر لما الفجر

شمسه مسكت يده وهي تضحك نفس ضحكته اللي قهرها فيها وقالت بسرعة : آسفه
رجع جلس وهو ينتظرها تراضيه بس انقهر يوم شافها رجعت يقال تفكر

وقف بقهر : أجل لهادرجة صعب عليتس تحصلين كلمة حلوه بحقي

شمسه بضحكه : افف قطعت افكاري

عواد بتهديد :ياوليتس تتكلمين عاد

شمسه وقفت معاه وقفت بوجهه وهي تضحك عليه : خلاص مدام تبي المدح ابشر بس بظلمك والله

شافته يطالعها وهو ماهو فاهمها كملت بصدق : عشان مهما مدحتك وقلت بكون ظالمه لك هي كلمة وحده أقدر اقولها لك أنت كل شيء صرت لشمسه

عواد قال بسعاده : وعواد مايبي غير ذي الكلمة تكفيه عن كل شيء وعشان كذا عندي لك مفأجاة
بس أتمنى تحبيها

شمسه عقدت حواجبها : مفأجاة ايش

عواد : اممم استبدلو بالكتيبه الي أنا فيها وبرجع لمقري هنا

صرخت بفرحة : تقولها صادق

عواد ابتسم على فرحتها :ايه

شمسه وهي ماهي مصدقه : والله احسن خبر سمعته وضربت على كتفه وأنا مقطعه نفسي من الحزن وأنت جالس تمثل علي ليه مافرحتني من قبل

عواد : كنت ابيها مفاجأة لتس ولأمي
بجمعكم مع بعض واقولها بس بسام خرب علي وقال لابتسام قلت اقولتس قبل هي توصلتس
وأمي بكرة ببشرها ان شاءالله اللحين مريت عليها حصلتها نايمه

اعطيته دواء ..ومن وقت لوقت المس حرارته بس نفس الحكاية احسها ترتفع عليه زيادة قلبي وجعني عليه ..ومابي اروح واصحي أمي وأبوي وازعجهم ... أخذته بحضني وأنا أضمه ...بس لا لا احسه شوي ويروح مني من ارتفاع حرارته وقفت بسرعة وأخذته وطرت لغرفة أمي دقيت الباب وأنا متوتره ..أول ما أمي طلعت قلت وانا اصيح : يمه ولدي بيروح مني

أم اصايل : بسم الله عليه وش ذا الكلام أخذته منها وقالت بخوف : حرارته مرتفه يمه وكملت وهي منحرجه : روحي صحي أبوي يوديه للمستشفى

أم اصايل بقلق وخوف : أبوتس ماهو فيه راح للمزرعة دق عليه العامل معاه وحده من الحلال تعسرت وراح يشوفها

اصايل صرخت : ماهو فيه ولدي بيضيع مني

أم صايل وهي تهديها : لا تفاولي عليه ماعليه شوية سخونه ماتضره ان شاءالله وتعالي خلينا نكمد له
على ماندق على أبوتس يجي يوديه

اصايل أخذتها منها وقلت : بسرعة يمه روحي دقي
أم صايل أخذت جوالها ودقت ...بس رن عندها بالغرفة عضت شفتها : ناسيه هنا

اصايل صرخت معترضه : لااااااا ماهو وقت ينساه

أم اصايل وتترتها حيل بصياحها قالت وهي تشوف وجهه عادل أحمر وعيونه ذابله حيل : هاتيه وأنت دقي علي شمسه سرعة خلي عواد يروح فيه

اصايل أخذت الجوال من يد أمها ودقت رقم شمسه
..ماردت رجعت دقت ودقت ماترد .. قالت وهي تصيح : ماترد أكيد نايمه ذا الوقت ..آه بفقده يمه ليتني رديت لأبوه وتحملت كل شيء كانت قدرت الحقه وحصلت من يوديه ولا يروح من يدي

أم اصايل : تعوذي من إبليس ودقي على عواد وكاد يرد

اصايل بسرعة دورت اسم عواد ودقت وهي تدعي الله انه يرد ...بس نفس الحكاية مايرد ..رمت الجوال وهي منهار : يمه الناس نايمين مين بيرد علي الحين

أم اصايل : اسمعي خلينا نجرب نكمد له
وكاد تنزل حرارته

اصايل لا لا مستحيل تسكت قالت وهي مجبوره : بدق على أبوه يجي ولا اخسره

أم اصايل بصدمه : يجي من الرياض لرماح كم يبي له حول ساعتين

اصايل : ساعتين نتظر ولا نجلس لما الصبح
وبسرعة دقت رقمه بس حصلته مقفل صرخت : لاااااااا ماهو بوقته مصعب

أم صايل توترت حيل من خوفها : يمه اهدي
ولدتس ماعليه خلاف
@
@
@
( الإستراحه )
بعد ماطلع ياسر ..حط يده على كتفه وقال وهو يشوفه باقي معصب عليه : بكره شرفنا مع ياسر وسوي مثلي شوف وشلون كرمته الليلة

عادل طالعه بتصغير : ماقصرت بالمضغوط اللي طلبته

منيف بدون مبالاة : وش اسوي قالي لا تكلف على نفسك وبعدين تدري وشلون جاء غصب مابغى يرضى بالعزيمة

عادل : ماشاءالله وأنت على طول قالك لا تكلف على نفسك نفذت الي قاله الله يفشلك دبلت سبودنا عشاء وعشاء وابشرو بعزكم الليله
وجايب مضغوط وبعد حبه دجاجة يالبخيل

منيف : أقول لا تبطر كلها نعمه

عادل بقهر : بس اكرام الضيف واجب

منيف قاطعه بقهر : ياخي شايف حاله متكبر نفس ولد عمته الكلمه نشحتها منه شحت بعدين هو قاللي ماحب أكل لحم وش تبي يعني اجيب له تونه

عادل بصدمه :تونه

منيف بضحكه : مدري عنك مافي إلاالدجاج بدل اللحم وبعدين والله هو حلف علي ومارضي يجي إلا يوم قلت خلاص بعشيك مضغوط

عادل عض شفته وهو مقهور : حتى لو مايحبه حط لحم ودجاج وسمك وهو يأكل على راحته أفضل
ما تحط لنا دجاجه بالنص وتقول تحاشروا عليها

منيف : وليه التبذير والفشخره الكذابه قال مايحب اللحم اقوم احط له كله الاصناف وبعدين ليه ماهو حاب تفهم أقولك والله حلف علي

عادل وقف وهو وده يذبحه ياهو تفشل يوم شاف العشاء : صدق وجهك وسيع

منيف : ياخي ياسر يمون صديق أخوي عادي ماهو غريب علينا وقت ماكان يدرس هنا بس مقلط عندنا ويالله بس دق على مصعب واعزمه بكره خليه يجي وحشني ودي اغلس عليه اليوم كله وأنا ادق عليه وباقي جواله مقفل

عادل كور يده بقهر : بعد بتعزمه

منيف بضحكه: ايه وكنت بخبي له من الدجاجة
بس ماشاءالله شوفة عينك انفرمت فرم منكم

عادل لازم ينضرب بس لا بيضع وقته معاه قال بعصبيه :تصدق الحين حسيت اني غبي إلا لو كنت صاحي ماستمريت بصداقتي لك

منيف ببرود مستفز : ايه ماتحب إلا اللي دمهم حار ويصفقونك من وقت لوقت بس اللي مثلي مبدئهم السلام هذولا مايجوزون لك

عادل صفق يد بيد وقال وهو مقهور منه : اصلاً من بعد ماشفت الدجاجة غسلت يدي

منيف وقف وقال : عاد لا تذلنا بذي الدجاجة
ويلاااا بالله وصلني بطريقك صالح مطول وأنا وراي دوام ماهو ناقص خصم

عادل بقهر : ليه ماجيب بسيارتك

منيف تقدمه وقال بضحكه : البنزين غالي

عادل بسرعة لحقة وهو يمسكه من وراء ويطرحة الأرض اعطاه كم بوكس يبرد قلبه فيه وقال وهو يزفر بقهر : الحقني السيارة

منيف تألم من ضربه له قام وهو يعدل بلوزته وهو يسبه : الله ياخذكم نفسي يوم اطلع من ذي الاستراحه بدون ما أتعرض للعنف

عادل صرخ عليه بعصبيه : اخلص علي بس

منيف صرخ : والله لا تضمنون سكوتي وتستغلون
ضعف جسمي ترى فيه حلول ثانية اسهلها ادق على الشرطة ويأخذون حقي
عادل سفهه وطلع ودها يحرك ويخليه بس على طول جاء وركب وقال : والله كنت حبيب بس
مع الآسف تطبعت بطبايع اللي مايتسمى

عادل طالعه بتحقير : بعد ماتبي تذكر اسمه

منيف: ايه الله يجيرنا من ذكر أسمه

عادل عض شفته وهو يتحلف فيه : بعد الله يجيرك ابشر والله

منيف طالعه : أكيد بتوصله يا أم مصلح

عادل بصدمه : مين أم مصلح ذي بعد

منيف بكل برود :جدتي الله يرحمها كانت ماتقدر تحفظ الكلام مثلك

عادل : الله يرحمها حتى الاموات ماسلموا منك

منيف طنشه وجلس يقلب بجواله أول ماوقف قدام بيتهم طالعه وقال بتحذير : لا توصل لمصعب اوكيه وترى ماهمني بس مابيه يتأثر من الكلام تدري فيه حساس ونزل وقفل الباب بقوه وركض يوم نزل عادل يركض وراه وهو يصرخ عليه ويسبه

بسرعة دخل حوش بيتهم وقفل البوابه وهو يلهف بتعب نفسه انقطع سمع تهديد عادل وسبه عليه قال وهو يضحك : لا تنسى بس بكره بيض وجيهنا مع ضيوفك ولا تقلدني
@
@
@
@
يوم العزيمة قال وهو يأكد على خواته : اللحين دق علي وقال جاين بالطريق تأكدو من اي شيء ناقص عشان اجيبه مابي اتفشل تكفون مابيكم تنسوون شيء ابيكم تبيضون وجهي معاهم

سعاد بطفش : عادل اللي يسمعك يقول أول مره تعزم ماهو بس مشقينا بعزايمك

أم عادل بحده : الحين ذا كرم الضيافه عندك ياسعاد

سعاد بهمس لأختها : اوه لا بدينا بموضوع الكرم الحين مين يفكنا منه

عادل طالع أمه وقال : ماعليك فيها يمه وأنا متأكد بسناعتها وبسناعة أم حمزة أخته الكبيره

أم حمزه ابتسمت له بحب : ابشر يالسند باللي يبض وجهك واي شيء ينقص بنوصي عليه أنت روح الحين وخلك بستقبالهم

سعاد بخبث : متى بس الله يفك عقدتك وتتزوج وننفك

عادل رفع حاجب : بعد حطيتني معقد

سعاده : ايه ولا وش سبب تأخيرك للزواج الي قدك قد عيالهم طولك وأنت مكانك سر

ام عادل بعصبيه : بسم الله على ولدي من العقد لا تفاولين عليه وطالعته وقالت بضيقه صدق يمه ليه ماتزوج عيال عمك وخالك كلن فيهم فتح بيت وهم اصغر منك

عادل عض شفته بقهر من أخته هوو وقت ذا
الموضوع ينفتح الحين سلم فوق رأس امه وقال : يابنع الحنان خليه بوقته والحين خولنا بالعزيمه شوي ويوصلون

أم حمزة قربت منه وناولته البخور وقالت : حطه بالمجلس لا هنت
اخذه منها ورن جواله طالع الاسم قال بتوتر شكلهم وصلووا فتح الخط : هلا والله حياكم وطلع بسرعة يستقبله أشر لياسر مدخل الحريم ... بعدها نزلوا ورحبوا فيهم وضيفوهم ...

شدن طفشت وهي ساكته : طفشنا خواته مره خجولين

نوره : مؤدبين ماهو مثلش

شدن وعينها من الشكولاته : يارب يرجعون يلفون فيها نفسي جايه عليها

نور بفشله خايفه يسمعونها همست لها : الله ياخذش توش بالعه منها وبعدين كلي من الضيافه هذي قدامش
شدن طالعت طاولتها وشافت عليها انواع الحلا هزت رأسها وقالت : مالي نفس في اللي قدامي نفسي جايه على سلة الشكولاته ودي امسكها وأكلها كلها

نور هذي اللي بنفضحهم صدق ....

أم عادل وهي ترحب : ياهلا والله نورتونا يا أهل الجنوب إلا ماعرفتينا عليك وعلى الحلوين الي معك

نوفه ابتسمت لها : الله يسلمش يارب أنا عمة ياسر وبمقام أمه وطالعت لنور وشدن وهذي أخته وهذي زوجته

أم عادل ابتسمت لهم : ماشاءالله تبارك الله الله يسعدهم طيب مين زوجته فيهن

سعاد همست لأختها : وراء ذا التحقيق شكلها أمي اليوم ناويه تخطب وحده فيهن بس ماهي عارفة مين المتزوجه وماتبي تفشل وعمته ماوصفت بالتحديد

أم حمزة : أول مره أمي تسأل كذا يالله احسهم انحرجوا فشله والله

نوفه أشرت على شدن : هذي زوجته

أم عادل : ماشاءالله تبارك الله ونور ماهي مخطوبه

أم حمزة همست لأختها وهي متفشله : لالا زودتها أمي اليوم

سعاد :شكل كلامي أثر فيها وحالفة تخطب لعادل

نور همست بضيق : وش ذا التحقيق

شدن بضحكه : مدري والله بس شكل مكياجك جاب فايدة وبعدين لا تجحدين أنتِ جايه وانتِ تدوري العرس

نور انحرجت حدها.. ابتعدت لجنب عمتها أفضل مالخبله هذي تحرجها وبعد ودها تقول لأمه تفكهم من التحقيق ذا شوي وتوصل لشجرة العائلة كاملة .... طالعت جهة شدن اللي جالسه تتبسم بخبث البنت ذي فضيحه ...طالعتها بتهديد وهي تتحلف فيها الليلة مافي حد بيفكها من يدها ...هين بس نطلع من هنا