رواية جيت مابيك تحقرني جيت أبيك تعز شاني الفصل 115 - بقلم r010ee

بعد اسبوع
( بيت أبو مصعب )
دخل عليه بغرفته ....قرب منه وطالعه ..بشفقه من الحالة اللي وصل لها ندمان حده ...ليته ماقال له وكان صبر مثل العادة ...جلس جنبه يحسه بعالم أخر قال بخوف وقلق عليه خايف لا يصير مصيره مثل أمه اخرها جنون :مصعب لا تقهرني فيك

أبد ماطالعه ولا التفت صوبه ولا تغيرت نظرته
مسك يده وهو يتمنى يتجاوب معاه : الليلة نروح للديرة وبردكم لبعض سكت يوم طالعه ورجع صد كمل وهو عنده أمل موضوع زوجته ولده هم الي بيغيرون نفسيته : صدقني شوفة زوجتك وعادل بس ماقدر يكمل وهو يشوفه يغطي ..رأسه بالمفرش دليل معاد فيه يسمع منه اي كلمه ...
وقف وطلع من الغرفة ...وهو متضايق ... فكر يخلي عادل يجي يمكن يطلعه من الي هو فيه دق على رقم عادل أول ماسمع صوته وهو منحرج : عذبتك يبه معي بس مصعب حالته ماتسر

عادل : والله توني وبدق عليك بسألك عنه لان للحين جواله مقفول وجيت أكثر من مره ورفض يقابلني ...

أبو مصعب وهو منحرج : تقدر تجي يبه تشوفه أنا بدخلك له

عادل عارف مصعب ماراح يتقبل اي كلمة منه قال : ابشر بس قبلها بكلم ياسر عشان يجيب خالته وتشوفه يمكن تقدر عليه أفضل مني

أبو مصعب بصدمة : خالته
عادل معقول مادري بزيارتها له : ايه خالته جايه من ابها تشوفه وهذاك الاسبوع جت وشافته ماخبرك مصعب
أبو مصعب للحين مصدوم من الي يقوله : لا وأنت ليه بعد ماخبرتني

عادل عض شفته منحرج : والله فكرت تدري

أبو مصعب زفر بضيق : لا لا تدق عليهم خايفه جيتها تزيد عليه

قاطعه عادل : صدقني ماراح أحد يطلعه من اللي هو فيه غيرها

أبو مصعب بضيق : والله يا أبوك مدري وش السوات طيب اعطني رقم ياسر أنا بنفسي بكلمه وبتفق معاه مدام باقي هنا

عادل : ابشر اللحين ارسله لك
وكلها ثواني وصله رقم ياسر دق علية وطلبه منه يجيب خالته ....

وفعلاً كلها ساعة وجت .. أول ما الخادمة فتحت لها وقف وصد باحترام واعطاها ظهر وقال بضيق : رجيتك يابنت محمد مابي اخسره

نوفه بغصه : الله كريم

أشر للنانو تدلها لغرفته وهو طلع لياسر
يقلطه للمجلس

أشرت لها على غرفته قربت من الباب ودقت بتوتر ماسمعت صوته سمت بالله ودخلت شافته متمدد قدامها قربت منه وهي خايفة من رد فعله يوم يشوفها همست بحنان : وشلونك يمه

طالعها وابتسم بسخرية : بعدك هنا

نوفه جلست على السرير وهي تشوف شكله
متغير عليها ونحفان غير عن يوم قابلته أخر مره قالت بضيق : ليه يمه كذا مسوي بنفسك وبعد شكل الزاد ماطب فمك

مصعب طنشها ورجع سوى نفس الحركة اللي سواها مع أبوه .. وغطى نفسه بالمفرش
عشان تفهم انه مافيه يتكلم او يرد وتطلع

نوفه حطت يدها على كتفه وهمست : مصعب

زفر بضيق ودف المفرش وصرخ : وش تبين بواحد أمه كانت استغفرالله ماقدر يكمل ...... صرخ منهار اتركيني بحالي

نوفه نزلت دموعها من كلامه بس مسكت نفسها وقفت وهي تقول : بقوم اسوي لك أكل وبعد بذوقك بالعصيده الجنوبيه

مصعب بحده : مابي شيء بنام

طنشت كلامه : قوم وخلي النوم عنك والحين بجيب لك الغداء وبتأكل غصب عنك
شافته يطالعها بقهر قالت بحده : يا أنا ي أنت ياولد النايفه قالت كذا تفكره مهما صار منها تظل أمه وفوق رأسه

مصعب ابتسم بسخرية وكرر كلمتها : ولد النايفة ليته لحقها قبل يعرف حقيقتها وكاد كان ارحم له

نوفه ضربت على صدرها مفزوعه : بسم الله عليك ورفعت يدها بتهددد لو تفاول على نفسك ثاني مره بذبحك أنت ناوي تقهرني باقي عمري

مصعب ميل فمه بسخريه : من متى المعرفة طال عمرك عشان تنقهري علي

نوفه طنشته وقالت :قوم وخذ دش وصل صدقني راح ترتاح
وطلعت من الغرفة نزلت تحت وهي خجلانه خايفه لو تقابل صقر تحت ...اشرت للخدامة اللي تنظف بالصاله : وين المطبخ

اشرت لها راحت له ...أول مادخلت شافت الخدامة اللي من توو طلعتها فوق ...ماشاءالله الخدم اكثر من اهل البيت .قالت : بسوي غداء لمصعب

نانووو : ماما جاهز بس هو يرفض يأكل

هزت رأسها : بسوي عصيده
نانووو طالعتها مستغربه وش تقول ذي

بدت تحضر لها اللي تطلبه منها ...وبعد ماجهزتها
حضرتها وقالت وهي تناولها الحافظه : هذي ارسلي فيها للمجلس خلي أبو مصعب يذوقها

هزت رأسها : طيب ماما
أخذت االأكل وطلعت فيه لفوق ودخلت الغرفة عضت شفتها يوم شافته متسند على ظهر السرير ويدخن قالت وهي ناقده عليه : ليه تضر نفسك كذا

مصعب طنشها ومارد
نوفه تنهدت بصبر وقربت منه الأكل وقالت : طفي ذي البلا بيدك وسم بالله

طالع الأكل وأشر بيده : مابي شيء قلت لك

نوفه : طيب أنا جوعانه يمه

مصعب ذي اللي بتجننه : كلي مين ردك

نوفه يالله على العناد اللي برأسه : حلفت ان تذوقه قبلي
مصعب جلس يكح نزلها من يده وطفاها

نوفه بعتب : شفت وش تسوي بنفسك جالس الله يهديك بس

مصعب هز رأسه بتعب وشلون تفهم انه مايبي يتكلم ويبي يجلس بلحاله .... وده يطردها بس ماهو قادر في شيء يمنعه ...

نوفه بترددد سألت : عندك صورة لولدك
بشوفه حلو مثلك

مصعب طالعها وابتسم بسخريه على كلامها

رجعت سألت : لو عندك بشوف حفيدي طالعته شافت بعيونه السخرية قالت ايه حفيدي مدام هو ولدك

قفل عيونه بصبر : وقال حفيدك كان عندي له صور وش كثرها بالجوال بس مع الآسف تكسر وضاعت صوره

نوفه الجوال تكسر يعني ماقفله قاصد مثل مافهمت اتاريها ظلمته ابتسمت له بحب : طيب ليه ماتروح وتشوفه صدقني شوفته بتنسيك كل شيء

مصعب صد عنها وقال بغصه : يتربى بعيد عني أفضل واثق بتربية اصايل

نوفه فرحت انه تجاوب معاها قالت بتردد : طيب ليه ماترد زوجتك وتربون ولدكم مع بعض

مصعب بسخرية طالعها : هي رفضتني أول بس أنا اللحين اللي برفض رجوعها لي

نوفه : ليه يمه ترفض رجوعها لك

مصعب :عشان تستاهل اللي أفضل مني وسكت ماقدر يحس بحرقه بقلبه مايتخيل تكون لغيره

نوفه اففف ماتبيه يرجع لسالفة أمه قالت تغير السالفة : أكيد قمر

مصعب عارف انه تحاول تغير الموضوع : روحي لها وشوفيها بنفسك

نوفه تقهرها ردوده الجافه عسر مره تحس ياسر يعتبر رحمه معاه قالت وهي تبي تستفزه أكثر : طيب ليه ماتبي تقولي أنت

مصعب برد فعل عنيفه بسرعة ضرب صحن الأكل الي قدامه وصرخ : جايه تحرقين دمي اطلعي برااااا

نوفه انصدمت من رده فعله هي قالت كذا ...عشان تخليه يطلع من اللي هو فيه ... بس ماتوقعت يصرخ عليها ويرمي الأكل كذا طالعت الأكل وشلون مرمي بالأرض هزت رأسها وهي تستغفر الله وطالعته بعصبيه : النعمه هذي رميتها تذكر غيرك يحتاجها ....وأنا بطلع يامصعب من غير ماتطردني

وبسرعة طلعت من الغرفة ...ونزلت الدرج وهي تصيح ..لا لا صعب يتقبلها مهما حاولت
أفضل شيء تنسحب من حياته ...ويمكن بعد هي زودتها يوم تبيه بالغصب يتقبلها ..وهو صعب التعامل معاه مهما... كابرت وقالت بتقدر ..بس مع الآسف صعب صعب وتخاف تزيد عليه اللي هو فيه أفضل شيء تنسحب من حياته ...مدام رافض يتقبلها ... وحرام ياسر تشغلها معاها أكثر من كذا الليلة آخر ليله لها بالرياض وماتمنت ترجع خايبه كذا ..... مسحت دموعها وربطت نقابها جت بتطلع
بس انصدمت يوم حست فيه ينزل الدرج وجاء يمها ومسكها وضمها وصاح وقال بضعف :محتاجك لا تروحين
@
@
@

( الديره )

جلست جنبها وهي يالله تأخذ نفسها من الركض
طالعت اصايل وقالت :أنا يحق لي اركض وزني كل مايجي يزيد بس الخبله ذي تركض ليه كلها عظمتين ولا ناويه بعد تبرزهم أكثر

ضحكت لما عيوني دمعت على كلامها : خليها تركض مالتس دخل فيها

كشرت بقرف : والله من التقليد العمى استغفر الله ماغير تقلد فييني وأنا ماطيق ذي الصفه احب اللي يكون تسذا مستقل

اصايل ضربتها على كتفها وقلت : يالمستقله تقلعي سوي لنا شاي وجيبي بعد المهز حق عدول معتس
وجعني كتفي وأنا شايلته ...

قالت بعناد : معاد إلا هي اخدمتس فارقي بس

اصايل رفعت عادل اللي بدأ يصيح : وينك ياحمودي شايل عني

بسخريه : ليت أبوي ما أخذه للقنص
الحين يدبل سبودنا بالكذب اللي يسطره

اصايل بضحكه : جاي توني دقيت عليه قال دخلوا الديرة

: الله يعينا بس على بطولاته اللي بيسردها لنا المهايطي

جلست جنبها وهي تلهف :ليه وقفتي

دفتها بقرف : والله يوم شفتس تهابدين وراي كرهت الرياضه

طالعت اصايل وهي شوي وتصيح : شفتي وش تسوي فيني كل مره تسذا ماتحبني تدرين ليه عشان تغار مني لانها سمينه وأنا رشيقه وتسذا حلوة والبنات كلهن يمدحون جسمي وماينادونيي إلا يالبنانيه

ضربتها على ظهرها بقوه : وجعه توجعتس اغار منتس ليه مخبوله وبعدين مين قالتس اني دوبه
ليه شايفتني اصايل وانا مدري

اصايل قهروني الثنتن : لا لا أنتم جالسين تغلطون علي ولا وش السالفه

: اوه اسفين جينا على الوتر الحساس
بس صدق اصوله قومي اركضي معي وقفت وهي تسحبها معاها وكاد ينزل وزنتس

اصايل تحمست معاها اعطيتها عادل وقلت وانا اوصيها : انتبهي له طيب ياويلتس تلعبين بحسبته مثل عادتس

هزت رأسها وبسرعة رفعته لفوق على طول نزلته يوم صرخت صايل : توني اصويتس
حرام عليتس روعيته

أشرت لها تروح تركض : خلاص اسفين وطالعت عادل اللي مفزوع أنت بعد بلى دراما اللحين لا اسطرك كف

أول ماسمعت دق على البوابة على طول وقفت وهي تحمل عادل معاها وتافف اووف شكل محمد رجع ليت أبوي رقده بالبر الليله بصوت عالي : طيب طيب جايه لا تكسر الباب لا اكسر عظامك أول مافتحت شافت قدامها مره

قالت وهي منحرجه : أمش موجوده

عقدت حواجبه استغرب من لهجتها بعيده عن لهجتهم قالت وهي عاقده حواجبها : ايه تفضلي وصاحت بنات

اصايل وقفت وهي تشوف اللي دخلت عقدت حواحبها : غريبه أمي ماقالت لنا حد بيسير علينا اليوم
قربت منها وهي ترحب سلمت عليها وقالت : تفضلي اقلطي حياك وبسرعة أشرت للبنات يقولون لأمها
دخلتها مجلس الحريم
نوفه فتحت النقاب وهي متوتره حدها من جيتها كذا فجأة قالت : الله يسلمش يمه

همست لاختها : وشلون ندخلها تسذا لا يكون هذي وحده من العصابه للي يحكون عنها والله بروح خذي ولدتس انا ابي عمري

اصايل بقلق من كلام أختها وهي تطالعها بخوف

نوفه تفشلت وهي تحسهم مستغربين وجودها

اصايل طالعت جهة البنات ...يوم طلعووا انقهرت حيل منهم تركوها بلحالها معاها ..تطمنت يوم شافت أمها الي دخلت
وبعد شكلها مستغربه منها قربت منهم وسلمت عليها وجلست وهي ترحب فيها أشرت لأصايل تروح تجيب ضيافه ...
اصايل
رحت للمطبخ وبسرعة حضرت القهوه والضيافه
وطلعت وانا معصبه من خواتي اللي واقفين يألفون قصص اللي تقول وربي عصابه يدخولون البيوت ويسرقون الذهب والي تقول
لا يكون اللي يسرقون البزران يقولون هابين هبه ذي اليومين ويبعون الاعضاء وضرخت يمه عدول وينه

قلت بحده : توتس تدورينه

: ايه خايفه عليه يسرقونه

بقهر صرخت : وشلون يسرقونه قدامنا وبعد وشلون يدخلون البيوت ويسرقون الذهب وحنا موجودين

: يمكن رسلوها عشان تخدرنا وتسذا يرشون علينا وهي تمثل قدامها وبعدها تدخلهم ويأخذون مقصدهم من السرقه

اصايل تكذب لو تقول ماسببت لها قلق : أجل خلونا يد وحده وتقلعو قدامي وكاد نقدرعليها لو سولت لها نفسها ونفذت اللي تقولونه من تووو

صرخت معترضه : لا الثنتين نروح مع بعض صعب لا زم وحده تروح وحده تجلس عشان لو رشت عليكم مخدر قد به وحده فينا صاحيه وتقدر تبلغ الشرطه

ضربتها على كتفها : صح كلامتس يالله روحي

: لا انتِ

: لا انتِ

اصايل : أنا استاهل جالسه ومعطيتكم وجهه

: نسذوب والله إلا خايفه تروحين

اصايل سفهتهم ورحت للمجلس
وأنا أفكر بذي الضيفه الغريبه حتى لهجتها غريبه عليها ودليل لها انها ماهي من ديرتهم ...
ارتحت يوم حسيت الخبلان ذولا وراي دخلت بالضيافه على كلامها : اعطيني الحلوو ذا نسلم عليه

اصايل حسيت بقلق تبي ولدي طالعت أختي اللي طالعتني بنظره كانها ..تأكد الي قالته ...من توو بسرعة قربت بخوف : معليش الحين موعد رضعته وبسرعة أشرت لأختها تأخذه بس الغبيه ماتحركت من مكانها

أشرت لها عشان تفهم بس وين مفهيه

نوفه
فهمت منها وقدرت خوفها وابتسمت وهي تذكر وصف مصعب لها عرفتها من بين خواتها من الوصف الدقيق اللي وصفه لها قالت : يجعله بالعافية

وهي صاكه على سنونها :خذي عادل وتقلعي

بقهر همست لها وهي تاخذه :بلشتينا بذا الولد لا تشغليني خليني اعرف ليه جايه

اصايل انقهرت حدها ورفعت ضغطها. من توو خايفه وجالسه تفلم عليها حتى سببت لها قلق والحين رافضه تطلع

أم اصايل طالعت اصايل وش تقولها هذي خالة مصعب أشرت لبنتها قربت منها همست لها : حضري ضيافه وارسليها للمجلس أبوتس الحين دق علي يقول وصل وعنده ضيوف ..
هزت رأسها وطلعت ..
نوفه ابتسمت وهي تطالع اصايل وحابه تلعب بعصابها : هاا أم اصايل وش قلتي موافقه على وليدي يأخذ بنتش وطالعت اصايل جايه من الجنوب مخصوص لش عشان اطلب يدي لوليدي

اصايل طالعت اختها الي جنبها معقول جايه من الجنوب متعنيه تخطب أختها بس باقي صغيره عقدت حواجبها يوم شافتها تطالعها ماطالع أختها صعقت يوم نطقت أسمها : هااه ورايش اصايل

اصايل وقفت بعصبية : لو ماتدرين اني متزوجة
وذا ولدي
وطالعت أمها تبيها تتكلم تقول شيء ماغير ساكته وتطالعها ...

نوفه ابتسمت وهي تشوف وشلون عصبت : ايه عارفه كل شيء عنش بس وش اسوي ولدي مايبي غيرش

لا لا هذي الي بتجننها ...شوي وتفقد ..اعصابها ولدها مايبي غيري وش ذا الحتسي اللي تقوله ودها تصرخ عليها وتقولها عيب استحي ..
بسرعة وقفت بتطلع قبل تغلط عليها وتسبها هي ولدها ... بس حست بيد أمها تمنعها طالعتها
قالت : هذي خالة مصعب

فتحت عينها بصدمة ... خالة مصعب ...وش لم الشمل ...اللي تعرفه ان مابينهم وصل ... عضت شفتها ..ماينفع يامصعب لو ترسل مين لي ....
طلعت بسرعة مافيها تسمع اي شيء عنه

نوفه تضايقت حيل ...يوم طلعت ... ...

أم اصايل بضيقه وزعل : والله يعز علي اقولتس تسذا بس والله البنت اعطته ردها من مبطي وخلاص تقفلت ذي السالفة

نوفه وهي مقدره وضعهم : لا ماتقفلت وانا عارفه مافي اي أم تبي بيت بنتها يخرب ومتأكده بتفرحي يوم ترد له

أم اصايل بزعل منه : والله ولدكم فعايله ماتسر عشان نفرح لو رد لها

نوفه بحزن عليه : والله ياحاله بدونها مايعلم به غير ربي

ام اصايل : خلاص مدام هو طلقها برغبته
يتحمل

نوفه حست انها عسره حيل قالت : ياليتش تخليني اجلس معاها بلحالها

ام اصايل تفشلت تردها : حياتس البيت بيتس
@
@
@
بالمجلس

قال بعد مارحب فيهم وضيفهم : والله حنا جاين وأملنا ماتردنا يا أبومحمد

أبو محمد بحده وهو يطالع بمصعب :والله جيتكم على عيني ورأسي ويعز علي ارد حد بمجلسي مير ذي السالفة انتهت

مصعب قاطعه بسرعة قبل يكمل : لا مانتهت أنا شاري رضى أم عادل واللي تأمر فيه أنا حاضر وحط الظرف على الطاولة وقال : وهذا مهرها

أبو مصعب انصدم من كلام مصعب والله ماهي هينه ذي الاصايل طيحتك عندها ابتسم : سمعت ولدي شاري رضى بنتك وياليت تحط لنا قدر وماتردنا خايبين

أبو محمد بحده وهو يطالع الظرف : أنا عطيتك هي عطيه بس ماقدرتها والحين تبي تدفع مهرها
عشان تحس بقدرها

مصعب عض شفته لا فهمه غلط طالع أبوه يبيه ينقذه
على طول أبوه قال : لا ي أبو محمد هذي رضوة اصايل

أبو محمد قال بحده : قلتها لمصعب مدام بنتي ماهي راضيه برجعتها له والله مايطولها ولو رضت يأخذها معاه بس اهم شيء شورها لأني مع الآسف ماصبت في اختياري لولدك يكون زوج بنتي والحين لو تبي ترجع بشورها وبشروطها ولو رفضت وقالت ماتبينه يخسى ويعقب يطولها وأنا أمحمد

مصعب كور يده بقهر ذا الشايب اللي بيجيب أجله صدق طالع أبوه ...وش السوات

أبو مصعب طالعه شافه بدأ يعصب اعطاه نظره كلها تحذير مايبيه يتهور ويخرب على نفسه زود
: يا أبو محمد وحنا نقدر كلمتك وعلى رأسنا ومانقدر نثني عليها ..بس مايضر لو تشاورها مره ثانية وكاد غيرت رأيها بس قبلها تكفى طلبتك تخليني أجلس معاها وكاد اقدر اصلح بينهم

أبو محمد وهو منحرج يرده وقف وقال وهو يطالع مصعب بزعل : ابشر خليني اشوف وارجع لك

أول ماطلع قال وهو معصب حده : والله كان حبيب بس انقلب فجأة وصاير يغلط واجد

أبو مصعب ودها يقوله بسبب فعايلك بس مايبي يعصبه زود حط يده على كتفه وهو يطمنه : ماعليه أنا واثق اصايل ماراح تردني ...
@
@
@

اصايل
زفرت بضيق تعبت وهي تعيد وتزيد بنفس الكلام : معاد بيني وبين ولد أختس شيء وكل الحتسي اللي تقوليه معاد ينفع

ابتسمت :خليش من المكابره يمه ترى ولدنا جاي متعني لش يدور رضاش

بعد وشهوو يدور رضاي بعد ماانفاني من حياته بطريقة كلها ذل عضت شفتها وهي تحس قلبها مكسور : ولدكم مابيه

نوفه : لا لا أنا جايه هنا وأنا واثقه بغلاه بقلبش

صايل بعد قايل لها بحبي له اللي شاف نفسه زود بسبته قالت بقساوة : معاد له بالقلب غلا

نوفه وهي تشوف دموعها اللي تحاول تخفيها عنها وتدري ان كل كلامها من وراء قلبها حبها له واضح :مصعب يحتاجش اصايل حيل جنبه

اصايل بغصه شوي وتنهار : مدام طلعني من حياته صدقيني ماله حاجة فيني وخلاص لعاد تضغطين علي

نوفه بحده : اقول ترى أنتم الاثنين بتقضون علي

اصايل ابتسمت بألم يعني بعد هو جلست تقنعه عشان يردها : جاي مغصوب منتس وتقولين يدور رضاي

نوفه فتحت عينها بصدمة :مين قال كذا

اصايل بوجع : توتس قلتي

نوفه هزت رأسها بلاااا : لا والله يمه فهمتيني غلط
إلا يرتجي شوفتش وقبل نجي قالي قولي لها تامر على كل شيء وأنا حاضر بس ترجع لي ‏

اصايل ابتسمت بسخرية : آسفه أقولتس تسذا بس والله ذا أبد ماهو ب كلامه

نوفه عقدت حواجبها :ليه يمه كذا والله انه ضايع دونش ونزلت رأسها بحزن مصعب لو ماترجعي له تأخذي أثمه تراه تعبان ويحتاجش بذات ذي الفترة وجودش وجود ولده قدام عيونه ينسيه تعبه

اصايل قلبها عورها عليه سألتبخوف : من ايش تعبان

نوفه ابتسمت بخبث يوم شافت خوفها عليه : وتقولين ماتبينه حرام عليش تضيعين حياتش وحياة ولدش بسبة مشاكل تحصل بين كل زوجين

اصايل سبت نفسها على عدم تحكمها بمشاعرها قالت بوجع :اللي بيني وبينه ماهي مشاكل عاديه
اللي بيني وبينه شيء انكسر خلاص

نوفه :عارفه انه جرحش بس عاقبيه وأنتِ بوسط بيته خذي حقش كله منه

اصايل هزت رأسها برفض : انتهى من وقت طلاقه لي
نوفه : ردش له
اصايل خلاص راح تنهار ...طالعت محمد اللي دخل وهو يقول بحماس : أبوي يبتس ياصايل بسرعة

اصايل توترت ..حدها عارفة .. وش يبي فيها
بيرجع يسألها

نوفه مسكتها من كتوفها : طلبتش ماتردينه وتكسرين قلبه ويرجع مكسور
مثل ماجاء

اصايل قالت بسرعة : تكفين لا تحرجيني زود
وفكت يدها مافيها تستلم للضغوط وترجع للذل والمشاكل اللي كانت عايشتها ..طلعت شافت أبوها واقف قدام الباب الرئيسي ويكلم حد جنبه توترت لا يكون مصعب لا لا تراجعت لوراء بس وقفت يوم قال : محمد تعال
ارتحت يعني يكلم محمد طالعني وقال :تعالي يبه سلمي على عمك صقر ينتظرك بالمقلط شافها بتعترض قال : بلحاله مصعب المجلس

عضت شفتها منحرجه وبعد مافيها تقابله
بس ترده صعب ...مشت مع أبوها وهي متردده أول مادخلت ..قربت منه وسلمت فوق رأسه
قال وهو حزين عليها : وشلونك يبه

اصايل والعبره خانقتها : بخير

أبو محمد بحده : جاي يبي يسمع رأيتس بنفسه
قلت لهم بنتي معاد تبي ولدكم

قاطعه أبو مصعب وقال : بنتك عاقله وماهي من النوع الي تخرب بيتها من أول مشكله تواجهها

اصايل
أول مشكله تواجهني حرام عليك أنت أكثر واحد كنت شاهد وحاضر ...مشاكل ولدك : ياعم والله مافيني اردك بس أنا اعطيت رأي بذا الموضوع لأبوي وخبره يوم جاء قبل وتكفى لا تزعل مني والله يعز علي زعلك

وقف وجلس جنبه وهمس لها :اسمعي رجعتك له اعتبريها من باب الانسانية بعد الي دري فيه عن أمه كان بيفقد عقله على الآخر لو الله ثم وجود خالته والحين وعدناه نردك له كان حالة مايعلم فيه غير ربي وقال وهو يضغط عليها : عارف قلبك كبير على الكل ومابالك بمصعب اللي روحك متعلقه فيه ولا تحاولي تكابري

اصايل يالله لهالدرجة مفضوحه قدامهم كلهم كل ما أحد كلمها ذكرها بغبائها وبغباء قلبها .. جت بتكلم بس صدمها يوم قال : يا أبو محمد اهنيك على ذي التربية وفديت البنت اللي ماتبي تخرب بيتها
وتشتت ولدها

جت بتكلم بتعترض بس ماقدرت يوم قال أبوها
: مدام رضت من نفسها إنها ترجع له معاد أقول إلا الله يسعدهم و تذكري يبه اني ماغصبتس وهذا قرارتس أنتِ والبيت مفتوح لتس
وقت ماتبين تجين ماتنضامين

أبو مصعب بسرعة قال : تجي زيارة ان شاءالله

اصايل جت بتصرخ بتقول لهم لا لا مستحيل اعطيكم عاد فرصه تتحكمون بحياتي بس ماقدرت
جت تنطق مافيها بذات يوم قرب منها أبو مصعب وسلم فوق رأسها وقال بهمس : من وقت ماشفتك وقلت انك لولوة نادره حتى لو ماتبينه وقلبك حاقد عليه تذكري ولدك حرام يصير يتيم وأبوه حي وصدقيني مهما حولك مايقصر بس محد بيقوم بالمهه ذي غيره صدقني بخدمونك مره مرتين وبيعحزون

فعلاً يوم مرض عادل جلست مقطوعه ماحصلت أحد إلا يوم صحي عواد الفجر وفعل فيها خير وراح فيه للمستشفى ...مافيها عاد تقدر تمسك نفسها صاحت بغبنه ...مقهوره من كل شيء ...خايفه فعلاً لو رفضته ولدها أكثر واحد بينظلم ولو رجعت له بعد هي أكثر وحده بنتظلم .... بس هي تبدي ضناها عن روحها وفعلاً مهما الكل ماقصر مصير الواحد ينشغل ...طالعت أبوها يوم طلع

يعني خلاص بيعطيه موافقتي طالعت عمي يوم قال : آسف يبه لو احرجتك قدام أبوك
بس عشانك وعشانه وعشان عادل قبلكم

محمد دخل وبيده عادل : اصايل أخذت عدول بروح اوديه لأبوه يمكن يرضى عني ويجيب لي السووني اللي وعدني فيه

ابو مصعب : هلا هلا بعادل جيبه جيبه وأخذ منه وقال ولا يهمك يامحمد يجيبه لك غصب عنه
ولو ماجابه اعتبره عندي

اصايل تفشلت حيل من محمد اللي يسمعه يقول محروم.. مير الشحاته تمشي ..بدمه

اصايل
انسحبت وهي مخنوقه ...ترجع له بعد الي صار
صعب شافت خالته وأمها بوجهاا ...بالصالة
لا لا معاد تتحمل ضغط أكثر ...
نوفه بغصه : رفضتيه

اصايل بسخرية : ولد اختس ذا حد يرفضه