رواية جيت مابيك تحقرني جيت أبيك تعز شاني الفصل 118 - بقلم r010ee

حضرت.. لعمي القهوه وحطيت من الرطب اللي جابه ...وجلست اتقهوى معاه ...
طالعته يوم قال : دق عليك مصعب اليوم

توتر وتفشلت وش ارد عليه من وقت ماسافر لا سأل ولا فكر ... قلت بتوتر : لا ماكلمني

أبو مصعب بقلق : خليني اشوفه
رفع جواله ودق نفس الحكاية مايرد ..دق على عادل جواله مقفل نزله وقال وهو مايبي يقلقها يدري فيها تنهبل اللحين : خايف مبارك يصعبها على عادل ويقوم مصعب يعصب وتصير بينه هو خاله وقف أول مأذن وقال بروح اصلي يبه تبين شيء اجيبه معي بعد الصلاة

اكذب لو ماحسيت بقلق عليه ...وبعد ماصدقت عذر عمي ... وين مختفي ذا
: لا سلامتك بس عمي بالله لو رد عليك دق طمني

أبو مصعب : خير ان شاءالله

اصايل ...جلست العب عادل ..ابش شوي التهي
عن قلقلي ...بس ماقدرت .الله يسامحك ياعم

شغلتني وطلعت ....أخذت عادل وطلعت غرفتي
صليت ..وأنا عيني من الجوال أتمنى عمي يدق يطمني .. رن جوالي بيدي ..فزيت بفرحه يوم شفت اسمه بالشاشه حطيت يدي على قلبي وأنا أهدي شوي وامسك نفسي لا انفضح قلت بثقل : نعم

:وشلونك وشلون حبيب أبوه

رفعت حاجب ودي اقوله توك تسأل : بخير ماعلينا

مصعب : أبوي يقول تبيني خير ايش فيه

عضيت شفتي متفشله الله يسامحك ياعم قلت بسرعة : لا كنت اكذب عليه عشانك ماقصرت فشلتني ولا اعطيتني خبر بسفريتك

مصعب : أخر وحده تشرهي أنتِ اوكيه

اصايل بقهر : ماشرهت بس قولي عشان ماجلس اكذب

مصعب : ماراح اقولك لاني عارف مايهمك

اصايل : تبي شيء مصعب ولا أقفل

مصعب : ابيك ترجعين اصايل اللي احبها

اصايل توترت من رده قلت : ماتت خلاص

بس الزفت قال بستظراف ماهو بوقته : ابي اثابت

اصايل عضيت شفتي اثابت أجل صرخت بعصبيه: مصعب انقلع

مصعب : افااااا تسبين والله لا ادق على أبوك يشوف حل

اصايل قفلت عيوني بصبر : ايه دق وقولي وش يقولك

مصعب بضحكه عارف انه رفع ضغطها بس تستاهل : ابشري عض شفته يوم قفلت بوجهه فتح الباب الرئيسي .. ودخل ...رقى الدرج وهو يطالع هديته اللي مغلفها بباقة ورد ...خايفه لا تحذفها بوجها الله يستر ...دخل الغرفة شافها وقفت مفزوعه تطالعه وصرخت : روعتني

ضحك وقال وهو يمثل الصدمة :يلا ابيها مفأجاة كان
اصايل ابتسمت بسخرية وأنا اشوف الباقة الأخ رمانسي راجع ...

حط الباقة وقال :تعالي تعالي اقرى عليك وقرب منها وحط يده على رأسها دفت يده وصرخت : بلا استهبال اوكيه

مصعب عض شفته :مين قالك اني استهبل شافها ودها تذبحه ابتسم بستفزاز ..
ونزل نفسه واخذ ولده وجلس يبوسه
قال : ذا احلووو صح

اصايل رفعت حاجب : حلو من يومه ولدي

مصعب : لا والله تكذبين

اصايل : حتى لو ماهو حلوو اهم شيء ماطلع يشبهك

مصعب ضحك على ردها وأخذ الباقة بيد واليد الثانية حامل فيها عادل ..طالعها وهو عارف بترده لو اعطاها قال وهو يكلم ولده : عدول حبيبي تتوسط لي عند أمك تقبل هديتي

اصايل ضحكت غصب عني يوم عادل بسرعة مد يده يبي يأخذها منه ..
بس نزلها مصعب وهو يقول : قلنا لأمك ماهي لك

قرب مني وقال : قولها بعد ياليت ماتكسر خاطري

ابتسمت بخبث وأنا اخذها منه : وشلون اردك يمه هذي أجمل هديه حصلتها بحياتي يكفي أنا منك ياروحي

مصعب صرخ معترض: يخسى والله أنا الي جبتها
وحط عادل على السرير استاهل أنا توسطت به

اصايل وأنا ماسكه ضحكتي : الله يخليه لي حبيب أمه بار فيني وهو طفل بس ماقدرت عاد اتحمل ضحكت .. غصب عني يوم قال وهو يمسكني من عندي كتوفي : والله مني ماهو منه ..

مصعب يوم شاف ضحكتها استبشر خير : افتحيها طيب

اصايل ابتسمت وانا منحرجه فتحتها كان طقم الماس فتحت فمي مبهوره من ذوقه جيت امد يدي بطلعه بس أخذه قبلي وقال بهمس : أنا بلبسك هوو

نزلت رأسي منحرجه مافيني ارده يادوب يبدا يلبسني إلا عادل صاح ...صرخ وهو مقهور : انكتم

شافها تضحك صغر عيونه : ولدك ذا مستقعد لي ليه
اصايل ابتسمت بتشفي وجيت بتحرك بأخذه بس مسكني وقال : والله ماتروحين له لما تسامحيني

اصايل فتحت عيني بصدمة : مصعب بلا هبل
الولد جيعان

مصعب هز رأسه برفض : لاااااا يلا ياتسامحيني وتروحي لولدك ولا خليه يصيح

اصايل قاطعته بقهر : وش ذا السماح اللي
تحت التهديد

مصعب : ماعليه سميها مثل ماتحبين
أنا وصلت المنتهى من حقدك

اصايل آه ودي اقوله انا اقدر احقد عليك وترني صياح عادل قلت بسرعة : طيب سامحتك

مصعب هز رأسه بلاااا : ماوصلني احساسك الصادق

اصايل دفيته بقهر بس رجع يمنعي : مجنون ولدك يصيح وأنت تثقل دمك

مصعب فكها وقال بضحكه : لا ابشرك تعديت الجنون بمراحل

اصايل ابتعدت عنه وأخذت عادل اللي يصيح
جلست ابوسه عشان يرضى بس رافض حتى يرضع
طالعت مصعب بقهر : شفت زعل لانه طول وهو يصيح حتى رفض يرضع

مصعب : دلوع ذا خليك منه ودوري رضى أبوه احسن لك

اصايل عضيت شفتي : آه من أبوه بس خلينا ساكتين

مصعب وهو يأشر لها تجلس جنبه : تعالي تعالي اجلسي اعطيك دورس عن التسامح وشلون تسامحي من قلب

اصايل رفعت يدها : لا مشكور

مصعب قرب منه وجلس على ركبه قدامها وقال : أتمنى غلاي موجود بقلبك عشان اظمن انك راح تسامحيني بس لو معاد لي غلا ورجعتك لي مثل ماقلتي عشان خاطر ولدنا عاد هنا عرفت اني خسرت اللي أسرت قلبي

اصايل حسيت قلبي بيوقف من فرحته بكلامة أشرت على نفسي وقلت :أنا اسرت قلبك ..

مصعب بصدق : ايه من وقت ماشافك
وسكت شوي شافها ساكته ماردت عرف انها ماهي قادره عاد تتقبله وقف وقال : والله معاد فيني اتحمل صدك

قاطعته وقفت بوجهه وقلت : وأنا اقوى اصدك

مصعب صرخ بفرح : يابعد حي والله

@
@
@
{ بعد مرور عام )
قال وهو منحرج بعد مامصعب طلع الدرج : يبه اصايل وش رأيك بخالة مصعب

اصايل طالعته بصدمة اللحين يعني عينه من خالة مصعب كل مااخترت وحده رفضها وقال صغيره ومايبي يظلمها معاه ..لدرجة طنشت ذ الموضوع من فتره : من جدك عمي راح توافق ترجع تتزوج
بعد زوجها

أبو مصعب وعينه من الدرج : ماظنتي بسهوله بس توسطي لي عند مصعب واقنعيه يخليها توافق وعاد تدرين وشلون متعلقه فيه

اصايل بخبث ابتسمت : بعد توسطت بالثقيل
تدري فيها ماراح ترده وهمست له وهي تشوفه نازل ظمنت لك الموافقه مبروك

أبو مصعب وهو يضحك : الله يبارك بعمرك

مصعب عقد حواجبه وجلس مقابل أبوه
: على وشهوو تباركون لبعض

أبو مصعب طالع اصايل وقال : العلم عند مرتك تقولك بعد الغداء

اصايل ابتسمت : متأكدياعم راح تصبر لما بعد الغداء وهمست بينها وبين نفسها عاد خالة مصعب مره وحده ...

مصعب طالعهم بعدم فهم : اقول وش فيه

اصايل طالعت عمها.. وقالت وهي تشوفه يلعب بالسبحه يقال اللحين منحرج ابو النسوان

: والله أبوك حاب يخطب خالتك نوفه

مصعب صرخ بصدمه : وشهووووو

أبو مصعب وقف وقال :والله اني شبعان مالي بالغداء يبه بروح

اصايل ضحكت من قلبي توه يعجل علينا بالغداء وهو ميت جوع ..يقول ..وقفت امنعه يطلع: لا والله حلفت ان تجلس

مصعب للحين تأثير الصدمة : من جدك يبه
الكلام الي قالته اصايل

أبو مصعب جلس وهو متوتر ومنحرج : اي والله صادق شاورها أنت وشوف

مصعب عض شفته وقال بقهر : بعرف أنا وش قصتك مع الارمل مافي ارمله إلا اعرست عليها

اصايل مافيني اسكت والله ضحكت غصب عني : هههههههههههه بس سكت يوم شفت عمي منحرج قلت . : حرام عليك مصعب يبي الأجر

أبو مصعب : اقول أنت ومرتك بتخطبون لي ولا دقيت على ياسر

مصعب :دق على ياسر أنا متفشل

أبو مصعب : افااا ماهقيتها منك والله

مصعب قال وهو مايبيه يأخذ بخاطره منه : ماعليه انا اقنعها بس أنت دق واخطب وعاد ماشاءالله عليك خبره ماتبي حد يتكلم بدالك

@
@
@
@
( الجنوب )
رجع من الدوم ... حصلها نايمه ..وبنتها جنبها ابتسم بحب لهم...همسه لها : شدون

فتحت عينها وهي تأشر له على نور : اوشش تكفى ماصدقت تنام

ياسر : قومي طيب جايب معي فطور

شدن دفيت المفرش وتسحبت... بشويش ..وقمت
وهمست له بتحذير : والله العظيم تصحيها ذبحتك
وذبحتها بعدك وريحيت عمري منكم الاثنين عيله هم ابتليت فيها ..

ياسر : احمدي ربش بس وأنا وبنتي راضين تكوني أم لها وزوجة لي ..

شدن رفعت يدها بتهديد : صحها وشوف وش يحصل

بس اختفت من حوله على طوله نزل نفسه وجلس يبوسها يعشقها ويموت فيها ...
شافهها طلعت وتطالعه بحقد قال بسرعة : مشتاق وش اسوي

شدن قربت منه ومشته بيدها : امش بس يالمشتاق
برا ...طلعت معاه ..وفرشت السفرة وحطت الفطور .. وجلسوا يفطرون .. بس غصت بالأكل وهي تسمعه يقول : تخيلي أبو مصعب دق علي وخطب عمتي نوفه

يوم غصت ناولها المويه وقال وهو يشوف وجها أحمر : بسم الله عليش

شربت مويه وكحت.. أكثر منه مره وقالت بصوت محبوح من الغصه : خطب أمي ذا الشايب خرف حده

ياسر للحين مصدوم : ولا احرجني يقول مهد الطريق مع أبوك عشان نجي نحضر عرس عادل ونملك مره وحده

شدن رفعت يدها وهي تحسب : لو وافقت أمي بيكون رقم 3 اخخخخ

ياسر ضحك عليها وهي تحسب : ماهي هينه نوفه

شدن ضحكت معاه وقالت : المصيبه مافي حد يجلس معاها غير سنه ويموت

ياسر بضحكه : اجل جاء لمكتوبه ذا الشايب

شدن عضت شفتها : والله لو تسمعنا تزعل

ياسر : تبين الصدق والله ودي توافق عليه بدل وحدتها بعد خالي ... وبذات يوم حنا نقلنا ابعدنا شوي عنها

شدن أشرت على الأكل : افطر بس ذي اليومين مشتغلي خطابه

عضت شفتها يوم عصب وأشر على نفسه : خطابه صدق ماتستحين

@
@
@
اصايل
اليوم موعدنا نسافر للجنوب ..نحضر زواج نور
وعادل ... وبعد نخطب ..لشيخ الشباب .. بعد ماجت الموافقه .. مصعب أخذ فترة يقنعها.. ويالله رضت ...سافر للجنوب عشان يخليها توافق بس بعدها ياهو ...لعب في حسبة أبوه ..لدرجة شفقت عليه الي يشوف وشلون متشوق
وفرحان يقول أول مره يعرس ..طالعت نانووو يوم دخلت : ماما بابا صقر يقول يلااااا

عضيت شفتي اشغلنا الله يسامحه مديت يدي واعطيت نانوو عادل : خذيه وروحي للسياره
وقولي لهم الحين نازله
شكيت على الشنطه ..وتأكدت
على اغراضي للعرس وبعد
من هدية العروس نوفه من خطيبها اخخخخخخ
ونزلت ..ركبت السيارة وانا اسمعه يهاوش وشهوله أخرتينا وطالع مصعب : حرك وش تنتظر أنت بعد

مصعب طالعه وهو ماسك ضحكته : أنتظر عادل قال نمشي سيرة وللحين باقي ماطلع

أبو مصعب : وشهوله نحتريه آه ليتني سافرت طيارة مثل عادتي ولا تبهذلت معاكم وجلست تحت يدكم
وصرخ بعصبيه دق واعجل عليه لا تجلس تطالعني كذا

اصايل لا لا اتوقع يوقف قلبه ..بس ضحكت على مصعب يوم قال : ليتنا أخذنا لك ام عادل كان
قد ربي يرحمك من السفر والبهدله

توقعت يهفه بس صدمني يوم قال : كم عمرها
شفتووو ياعالم قلت لكم انه ابو النسوان

(في القاعة )
عرس نور وعادل

همست لها :صدق مين قال المكياج يغير قبايح

نور بقهر : كلي تبن

شدن بوستها وقالت : وربي بفتقدش
احسني ضايعه بدونش وأنا انتقلت بيت بعيد شوي
مابالش اللحين بتسافري للرياض

نور بغصه : اسكتي شدون والله كل ماتذكر اني بفارقكم وبفارق الجنوب تخنقني العبره وبذات سميتي
شدن ابتسمت : اخيراً اعترفتي في سميتش
نور وهي تحاول تمسك دموعها وقالت بمكابره : وش اسوي شيء وانكتب علي لازم ارضى

شدن شافت عيونها وشلون بدت الدموع رفعت يدها : لا لا تكفين لا تخربين مكياجش ويطلع وجهش المتخبي ويتروع الرجال

نور عضت شفتها وهي تطالعها بقهر ...ماراح ترد عليها
تدري فيها ماراح ترتاح إلا تخليها تصيح طالعت حور يوم دخلت وهي تقول : شوي بس وتبدأ الزفه
شدن تعالي بنتش تصيح وعمتي تدورش

شدن عضت شفتها وطالعت نور : تكفين خذي سميتش معش للرياض اسمنها من ريحة أهلش ومعاد تحسين بالفراق

و طلعت وأخذت بنتها من يد أمها وجلست جنب اصايل وهمست : اقنعي أمي نسوي ليلة قبل يأخذها شايبكم

صايل ابتسمت لها : برسل لها حبيبها يقنعها حنا مانقدر لها

شدن عضت شفتها : تصدقين رجلش ذا
ودي اذبحه ماحد نافسني على غلا أمي غيره

اصايل ضحكت من قلبي على كلامها البنت ذي ماخلت حد بحاله ..
كلها دقايق وبدت الزفه وانزفت نور
شدن طالعت نور بحب تحبها حيل وفرحانه لها وبنفس الوقت حزينه ... عليها ... بتسافر وتخليها
@
@
@
أول ماوصلوا الفندق
دخلت وهي خجلانه حدها منه
ماشافته غير يوم ..النظرةوالملكه ...صارت قبل العرس بيوم .. نزلت رأسها يوم طالعها
همس لها وهو متوتر أكثر منها : مبروك

بخجل : الله يبارك فيك

قرب منها وحط يده على رأسها وقال الدعاء

نور توترت حيل ..

عادل شاف وجهها قلب مية لون قال وهو مقدر وضعها : خذي راحتك وأنا بطلب العشاء
وطلع ...

نور تنفست بعمق .. طالعت جوالها يوم نور برسالة
شافتها من شدن فتحت عينها بصدمه
عضت شفتها بقهر ....ارسلت لها ( الحين ذي نصايح ولا خراب بيوت )
ثواني وصلها ردها ( شكلي الليلة بحظرش ولا تفشلينا بالرجال وانتِ منشغله بالجوال )
رمت الجوال بقهر توها تحرضها عليه والحين
ماتبي تفشل فيه ... قامت غيرت فستانها وعدلت نفسها .. وطلعت شافته ينتظرها ..تحسه خجول أكثر منها ...
@
@
@
قال بتردد يخاف يتضايق ويتذكر أمه : يبه طلبتك ماتردني ودني تحضر ملكتي على بنت محمد بكره وابيك بظهري وبعد الشموخ معك

عناد يدري بموضوع زواجه بس انصدم انه يطلبه يحضر عض شفته مافيه يرده ويفشله طالع الشموخ الي تسمعه معاه على اسبيكر : ابشر بعزك والله

الشموخ قربت منه وقالت : تستاهل ياعم مين يلبي لك وبعد مين عندنا أعز منك نحضرله

أبو مصعب بحب لها : الله يرفع قدرك يبه
@
@
@
بالمجلس
همس لمصعب وهو يشوف عادل داخل وهو متضايق : والله ياعادل حاقد على أبوك
حلف عليه يحضر ملكته وهو يبي يطير بعروسته ويهج يقضي شهر العسل

مصعب بخبث ابتسم : تصدق انا سويت في ذي الدقه خليت أبوي يستلط عليه ياما ازعجني خليه اللحين يذوق ...

منيف فتح عينه بصدمة :أنت وأنا اقول غريبه عم صقر نشب له كذا

مصعب صغر عيونه بقهر وهمس : أكيد بتقوله

منيف رفع نفسه وقال بحميه : افااا شايفني نقال وشيه وقف وهو يسلم على عادل وهمس له: ماعليه تصبر وأنا أخوك

مصعب بسخريه وهو يسمع كلام منيف : ميت له حد لا سمح الله

عادل بعصبيه: ماراح أجلس معاكم وابتعد وجلس جنب أبو مصعب ....

مصعب ضحك عليه ..طالع أبوه وقت مارفع صوته يرحب ..انصدم
من اللي دخل ورد السلام ... شاف نظرة أبوه الي وجها له كانت كلها ...تحذير لا يغلط عليه ..ابتسم بوجع وشلون يغلط عليه وهو ذاق نفس الكأس اللي ذاقه صح تختلف المواقف بس الاثنين تجرعوا العذاب والوجع من أمهاتهم ....تذكر وشلون يجرحه .. كان ويتشمت عليه بأمه يوم شافه ..سلم على الكل وقرب منه بس يحسه مترردد يقرب صوبه وقف وتقدم منه وسلم عليه وهمس له بغصه : ادمح الزله وأنا أخوك

عناد طالعه افتكر يفشله مثل العادة بس انصدم
يوم انه قام سلم عليه وبعد .. يعتذر .. ابتسم له وجلس جنب عمه صقر اللي رحب فيه وقال وهو يحط يده على كتفه : هذا ولدي عناد يا أبو ياسر

أبو ياسر بحمود : حياه الله

منيف همس لمصعب وهو مصدوم : لا لا اليوم شيء بيحصل أنت وعناد مع بعض

مصعب طالعه بتهديد بس كمل كلامه ضامن انه مايقدر يسوي شيء قدام الحضور : ياخي ليه صاير حبيب مع الكل إلا معي بعرف ليه

مصعب طالعه بقهر وهمس وهو صاك على سنوونه : أنا ودي اعرف أنت مين مخليك تجلس حتى ذا الوقت ليه مسافرت بعد عرس عادل

منيف : ولووو اسافر قبل ماحضر لعموو صقر
وطالع ياسر اللي قرب وهو يقهويهم : ياسر أخر مره شفتك فيها كنت نحيف اليوم اشوفك معضل تكفى ياخي وشلون تمرنت وصلت عضلاتك كذا يمكن الله قادر يفك فيني واقدر أخذ حقي من ذا المجرم جنبي

ياسر ضحك عليه : ترى يبي لها صبر وجسم يتحمل وطالع جسمه النحيل وقال ياخي ماظنتي ذي الأمنيه بتحققق

منيف ندم انه تكلم بقهر طالع مصعب يوم ضحك طالع ياسر وقال : ياخي الكلمة الطيبه صدقة
@
@
@
دموعها رافضه توقف ...فقدت نور وبعد أمها
شيء كبير عليها ... مهما تظاهرت بالفرح
بس خاطرها مكسور ...حاولت ماتوضح عشان أمها ماتنكد طالعتها بحب وقفت وجلست جنبها وقالت : ليه كذا ساكته

نوفه طالعتها والعبره خانقتها : ذي الزواجه كلها مابيها شفت نصيبي أكثر من مره وحظي واحد وبعد كبيره ولا انا حق عرس بس ياسر ومصعب
اتفقوا علي ومقدرت اكسر خاطرهم بس والله بيني وبين نفسي متفشله ...

شدن وهي تحاول ماتصيح : يمه وش ينفع الحين ذا الحكي وهم شوي ويعقدون

نوفه مدت يدها وضمتها : مدري وشلون
بفارقش

شدن بغصه وهي تحاول تستظرف عشان ماتصيح : لا تخافي بخلي ياسر يأخذ لي طيارة خاصه وبقضيها رايحه راده

حور بسخريه : ليه زوجة أمير وحنا ماندري

شدن طنشتها ..وهي تخبي رأسها بحضن أمها ومعاد فيها تسكت خلاص دموعها اللي كاتمتها انزلت صاحت بصوت يقطع القلب

اصايل
انصدمت من صياح شدن ...بس يوم شفت
وشلون خالتي نوفه ..بعد تصيح معاها عرفت وشلون متعلقين في بعض قربت منهم وأنا قلبي متقطع عليهم الثنتين : ليه ليه كل ذا تعوذا من إبليس والليلة ليلة فرح ليه تقلبوها تسذا نكد

ونزلت نفسها لشدن وهمست لها : هذا وانتِ طول اليوم شايلته على رأستس وجايه بالاخير تسوين تسذا تكفين اسكتي عشان أمتس لو صدق تحبينها

شدن رفعت راسها ومسحت دموعها وهي تطالع أمها اللي تصيح معاها : خلاص يمه ماراح اصيح
وسكتت وهي تطالع البنت اللي دخلت مع أم ياسر
وبيدها طفل عقدت حواجبها مستغربه
بذات يوم صرخت اصايل وراحت لها تركض تسقبلها وهي تقول : الشموخ

ضمتها وهي ماهي مصدقه وشلون جت هنا هسمت لها : وشلون

الشموخ ابتسمت بتوتر وخجل : عمي صقر عزمنا
واحمد الله اني شفتك قدامي دخلت وأنا خجلانه موت

اصايل بسرعة مسكتها من يدها وانا ارحب فيها يالله ماتوقعت عاد نجتمع ... قربتها من خالتي نوفه وقلت : هذي عروستنا الي تعنيتي لها من مكه

نوفه طالعته وهي ناقده عليها .. قالت بعد ماسلمت عليها : وش عروسه يمه عيب استحي

اصايل ضحكت : واجمل عروسه

شدن وقفت وسلمت عليها
ورحبتت فيها ... همست لاصايل : مين ذي عرفينا عليها

اصايل : هذي الشموخ بنت عم مصعب

نوفه انصدمت صدمة عمرها يوم قالت بنت عم مصعب تذكرت الماضي ....هذي بنت راشد ...
يالله شوفوا القدر كيف بنت رأشد موجوده بينا ...

شدن ابتسمت لها : ماشاءالله نورتي الجنوب ياقلبي ضيفتها وبعدها جت نور وتجمعنا كلنا
وبعدها جت لحظة الفراق ... نور سافرت من هنا وأمي من هنا ...
@
@
@
وحنا رادين لمكه تفأجات بعناد يوم اتجهه لطريق جدة
طالعته وقلت وأنا عارفه : معاد فيني اتحمل صدته

قال بضيق : شموخي صدقيني ماراح يردك بذات وهو يشوف حفيده ذي المرة عندي أمل

الشموخ هزت رأسها وقالت والعبره خانقتها : تذكر كيف رفض يقابلني أخر مره رحنا له حتى مافرح بحملي صدقني قلبه قسي خلاص إلا لو به أمل كان يوم ولادتي تمنيت اشوفه ..ماغير أمي باركت لي بالجوال ..دليل انه منعها تجي تشوفني ...

قاطعها بضيق : عارف من داخلك غصه بسبة فراقهم وعشان كذا بسوي المستحيل عشان ترجع علاقتك مع أهلك

صحت غصب عني ... صادق مهما كنت سعيده بحياتي بس فراق أهلي ..مأثر علي
كلها ساعتين وصلنا ..أول ماوقفنا قدام البيت
طالعته .. مسك يدها وقال بتوتر أكثر منها : ذي المرة ماراح انزل معك ويرفض يقابلك مثل أخر مره
خذي ولدك وأنزلي أنا بكون بنتظارك أفضل صدقني لك

الشموخ هزت رأسها برفص : لا مقدر ابيك معي

عناد هز رأسه : عشاني اسمعي الكلام صدقيني
وجودي معك بيعصب أبوك
الشموخ عضت شفتها وهي حزينه عليه بس سوت اللي قاله ..ونزلت وحملت ولدها وقربت من البوابه
ودقت الجرس .. شوي والخادمة فتحت لها وكانت جديده توها تشوفها عند أهلها قالت : مين

دخلت وأنا احس قلبي بيوقف ...
طنشتها و مشيت لداخل وأنا اقدم خطوه
وأخر خطوه .. فكرت ارجع لعناد بس لا ذي المرة بسوي اللي قاله لي ..وكاد الله يحننن قلبه سمعت الخادمة تقول : ماما وقف

مارديت عليها ...دخلت و شفت أمي وأبوي جالسين وقفت وأنا احس رجولي تضرب في بعض

الخادمة وهي تعتذر : ماما هذي يدخل على طول

أمها طالعتها بصدمه ورجعت طالعت زوجها بس مافيها عاد تتحمل بعدها ..راحت يمها وهي تضمها وتصيح معاها وتضم في ولدها وتبوسه
شافت أبوها قام بيروح غرفته أخذت ولدها من يد أمها بسرعة وقفت بوجهه : عشان قصي بابا ماتردني

أبو أميرة طالعها وطالع ولدها االي يطالعه ببراءة
ماقدر يقسى أكثر هذي دلوعته اللي كان ..ياويل مين ينزل دمعتها ...اللحين هوو سبب دموعها عارف فراقه.. ماهو سهل عليها ..مثل مافراقها دمره نفسياً مهما تظاهر بالقساوة ..ضمها هي ولدها مع بعض وهو يقول والغصه خانقته :ماعشت لو رديته ورديتك وحرمتك وحرمت نفسي منك يابعد رأس أبوك

الشموخ كانت تصيح وهي منهاره بس ذي المرة كل دمعه نزلت منها دموع فرح ...
همست وهي بحضنه :بابا عناد

قاطعها قبل تكمل وقال : وينه
انصدمت وضمته زود وهي تقول : والله أحبك بابا ومسكت يده ورمت غطاها وطلعت معاه وهي تبي تفاجئ عناد ...‏

أول ماشافها طلعت وهي ماسكه بيد أبوها ...
ابتسم بدون شعور ..تمنى هذي اللحظه من زمان
يوم شافهها وقفت قدام البوابه وهو قرب من السيارة ..

على طول نزل بحترام له ..انصدم منه يوم قرب وسلم فوق رأسه وهو يعتذر حاول يمنعه وهو خجلان انه سلم فوق رأسه وهو أكبر منه : قدرك غالي والله

أبو أميرة وهو متفشل منه : تفضل

عناد ماقدر يدخل قال : اسف اعذرني والله حدي تعبان جاي من ابها توني
قال وهو عارف انه باقي زعلان : أعتذر منك يبه اعتبر اللي صار لحظة شيطان ...وتفضل حياك
عشان اعرف ان مافي قلبك شيء

عناد حاول يعتذر بس ماقدر وقت ما حلف عليه إلا يدخل ويتعشى معاهم خجل يرده ...طالعة جهة البوابة شافها اختفت مالها وجود مشى مع أبوه ودخل شافه واقفه تنتظرهم
قرب منها وقال بحده : طالعه معاه ليه للشارع

ابتسمت له وقالت : تبيني افوت اللحظة ذي
بس والله على طول دخلت

عناد عض شفته : لا ياشيخه

الشموخ وهي حدها مبسوطه : حياك بس يالغيور
@
@
@
ابتسمت بخبث وهي تذكر تهديده لها لو تحمل مره ثانية بعد الي سوته فيه رفعت بنتها وهي تبوسها وقالت وهي ناويه تصدمه : نور حبيبي افرحي جاي أخوش بالطريق ان شاءالله

ياسر صرخ معترض : لاااااااا

شدن مسكت ضحكتها وقالت : ليه

ياسر هز رأسه بصدمه : لا لا تكفين ماتقولين حامل

شدن مسكت ضحتها : لها الدرجة تعقدت

ياسر : ايه والله جتني فوبيا بعد

شدن عضت شفتها : والله حامل

ياسر قال وهو يتذكر اللي سوته فيه وقف وأخذ بنته منها وقال :أنا وبنتي بنختفي لما تولدين بشرينا

قالت وهي ترفع صوتها وهي تشوفه يرقى الدرج : ماراح ابشركم ولااشوفك أنت وبنتك تجيون تباركون لي

ياسر : تفعلين خير والله

ضحكت عليه ... وحطت يدها على بطنها وهي تذكر وجع الولادة عافت الحمل والولادة بس وش تسوي ربي كتب تحمل مره ثانية الله قادر يهونها عليها
@
@
@
@
اصايل
اليوم مصعب مسوي عزيمة لأبوه وخالته ياهو مجنننهم .. ومنكد عليهم .. حياتهم تجمعنا بعد الغداء على القهوى ...مديت لعمي الفنجان أخذ مني وقال وهو متذمر : والله مالها داعي ذي العزيمة بذي القايله

طالعت مصعب يوم قال وهو يتريق عليهم : والله خفت اسويها عشاء تسهرون والسهر يأثر عليكم وأنتم بذا السن قلت غداء افضل لكم

أبو مصعب بقهر : والله اني اقوى منك يالهامل

اصايل همست له وانا اضحك : حرام عليك مصعب
الحين عازمهم عشان ناوي تتطنز عليهم

مصعب همس لها : يستاهلون شيبان الفلس
اصايل عضيت شفتي خفت يسمعون

مصعب وقف وقرب من نوفه وجلس جنبها ولزق
فيها وهو يطالع أبوه الي مقهور وقال : الليلة امي بتبات عندي اصولة خلي نانوو تجهز غرفتها

أبو مصعب بحده : اقول اقطع واخس

مصعب همس لها : تكفين يمه وافقي لا تفشليني

نوفه طالعت صقر وقالت وهي ماتبي تفشل مصعب : وأنا أقدر يمه افشلك وهو وش بيضره يبات ليلة بلحاله

مصعب صرخ وهو يضمها : فديتك والله

اصايل حزنت علي عمي قلت : حياك معاها

أبو مصعب وهو زعلان : مشكورة يبه ماقصرتي احسن من ولدي وطالع نوفه بزعل : خليه ينفعك

نوفه طالعت مصعب وقالت : يعز علي اردك بس بعد أبوك غالي

مصعب : مسرع خونتي فيني عض شفته بقهر غصب وافقتي عليه وهاتي يادموع .. وسويتي مناحه .. والحين غالي

اصايل اخخخ احرجهم الاثنين والله عمي وجهه قلب وبعد خالته تفشلت .. واللي يغبن بعد ماولعها بينهم

وقف وأخذ عادل من الأرض وناول أبوه وقال وهو يقرب اصايل منه : بالله خذوا عادل معاكم عشان يتعود عليك هذي الفتره عشان بأخذ الحلوة هذي وبنقضي شهر العسل ومانبيه معنا وبعد يسليكم ...

اصايل همست له: توك تحس تبي شهر عسل ولدك صار يمشي

مصعب أشر لولده وهو بيد أبوه : خلاص تخلصت منه وتبنوه الحلوين هذولا

أبو مصعب بقهر : خذ ولدك أقول فاضين حنا
تشقينا معاه ونزله بالأرض وهو يقوله روح لأبوك
يلاااااا

نوفه وهي تضحك على مصعب اللي يطالعها يبيها تأخذه : حرام عليك صقر خليه معنا وهم يأخذون راحتهم

مصعب شاف عادل قرب منه وهو يمسك فيه يبيه يحمله ..بسرعة نزل نفسه وقال : روح لجدوو حبيبي يلاااا
بس عادل لزق فيه غصب بسرعة رفعه ورماه على أبوه وقال : خلاص مدام نوفه موافقه أنت توافق تأخذه

اصايل حزنت علي ولدي ..وأنا اشوف كل واحد فيهم يرميه على الثاني وبعد عادل ..يصيح ويمد يده وهو يبي مع مصعب ..مايبي جده ..متعلق فيه يس مصعب نذل حتى مع ولده ... قلت بسرعة وأنا أخذه منهم : ولدي مايبي واحد فيكم وطالعت مصعب تبيني اسافر معاك ولدي قبلي

مصعب بعتراض : لا اصايل ولدك ذا ماهوب حق جزر المالديف بيحوسنا هناك

اصايل : لا والله ماسافر بدونه

مصعب : وشلون شوفي هنا ماخلى شيء إلاكسره
تبينا نأخذه معنا عشان يشغلنا

اصايل فعلاً حركته زايده كل شيء يروح له ارهقنا لدرجة حتى نانووو لأول مره أهلها يوحشوها وتطلب تسافر لهم وأنا عارفة بسبة عادل تعبت منه ابتسمت وأنا اضمه : فديته خليه يكسر الي يبي
وصغرت عيونها ماراح بعيد طالع لك ولا ناسي

مصعب عض شفته متفشل .....من ردها

أبو مصعب وهو يطالع مصعب بشماته : ايه يبه حني عليه اليوم يبر فيك لاكبر وطالع نوفه : يلا ومشاها معاه وهو يقول : الغداء اللي ذلنا عليه اتاريه ماهو لله يبي يدبسنا بولده

عضيت شفتي بقهر يوم عادل يحاول يفك نفسه مني ويبي مصعب يشيله ناولته هوو وقلت : المصيبه يحبك وأنت قاسي عليه

مصعب بوسه وقال وهو يطالعها بحب : والله احبه بس اغار منه نساك مجنونك

ابتسمت له بحب : ولا مليون نتفه مثله ينسوني ويأخذون مكان ( مجنوني )

ابتسم لها وهو يقول : لا أجل مدام مكاني محفوظ ومافي أحد يوصله نأخذه معنا ونزله وهو يأشر له يروح يلعب وطالعها بحب : والله ماشفت السعادة إلا بوجودك بحياتي وابتسم بخبث وهمس لها لدرجة أحب أبوك ياشيخه

اصايل كنت مبسوطه بكلامه ..بس طالعته بصدمه وش دخل أبوي اللحين ... ولا خلاص هواية عنده يلعب بمشاعري : مشكور على حبك لأبوي

مصعب ابتسم لها وهو يشوف الصدمه واضحه بعيونها : تدرين ليه لانه اعطاني أجمل إنسانه

{{ تمت }}