دخل عليها الغرفة شافها جالسة على جوالها
وطبعاً مثل العادة ماعبرته حتى بنظرة ...
قال : يلااا بسرعة تجهزي بنمشي لأبها
من وقت مادخل عليها وهي متوتره بس حاولت ماتوضح ...وركزت بشاشة جوالها ولا عبرته بس يوم قالها بنمشي لأبها طالعته بصدمة
كمل بسرعة وهو يقول : أمي محتاجتني حيل زوجها توفى
جلست وقلت بحزن: يالله توفى حبيبتي الله يصبرها
مصعب : تكفين بسرعة اجمعي كل اغراضك من هنا وخليني أنزل انهي حجزي من الفندق تمام
اصايل هزت رأسها : ان شاءالله
كلها دقايق ورجع أخذ الاغراض وأنا أخذت عادل وطلعت معاه أول ماحرك السيارة قال بصوت مخنوق : ليه الي يقرب صوبي لازم يتألم
اصايل صدمني كلامة جيت بقوله لا تقول تسذا مايجوز بس مدري ليه الانتقام مسيطر علي طالعته وقلت : فعلاً القرب منك يقلب حال الشخص وأكبر دليل أنا أخذتني انسانه محبه للحياة وحولتني لأنسانه صارت تشوف الايام متساويه بعيونها كلها سواد
مصعب تمنى يسمع كلمة تجبر خاطره بس ردها خلاه يتأكد انه فعلاً صار ماله مكانه بحياتها
اصايل
توقعت يرد ...يرمي كلمه تغثني ..لان مستحيل
مصعب ينهزم لازم الرد الأخير يكون له ...
بس هذي المره مسوي فيها يفتكر راح يخدعني
ناسي اللي سواه من شوي في الفندق ....
وقف قدام كوفي وطلب لنفسه ...من غير مايعبرني الخايس ..بس قلت أكيد راح يعزم ...مستحيل يتحرك قبل يطلب لي ..جلست انتظر واقول
اللحين بيطلب ايه اللحين ..بس الحقير مد يده وأخذه من العامل وشكره وقفل الدريشه وحرك ...واللي قهرني ريحة القهوة شهتني زود ... والخايس يتلذذذ بعد وهو يشرب ...
والله فكرت أمد يدي وأخذها منه بس لا لا اصايل ...هو تسذا بيشمت فيتس طالعته وأنا بدعي عليه مايتهنى فيها بس ماقدرت ...طالعني وكأنه حس فيني بسرعة صرفت نظري بس عضيت شفتي يوم مد يده قدامي بوقاحه وقال : تبين تذوقين خذي
طالعته وأنا مقهوره ومتفشله وانقهرت زود يوم شفت باقي ربع القهوه يعني توه يفكر يعزم : لا مابي
مصعب ابتسم بخبث :ليتك قلتي كان طلبت لك
أشر على قدام وقال أقرب كوفي بطلب لك
اهم شيء لا تزعلين
اصايل
لا لا يتمسخر عليه الحقير ... قلت لكم هذا مايخلي له حق ...لازم هو المنتصر بالآخر .ودي اسحبها من يده واسكبها فوقه يوم قال : خلاص اصوله بطلب لك
لالا لا قمة الاستفزاز صراحه زودها حيل صرخت بقهر : مافي حد طلب منك تطلب ويجعله سم
مصعب مد يده بستفزاز : طيب ذوقي
اصايل برد فعل عصبيه دفت يده بس مصعب قدر يتحكم بالكوب صرخ بعصبيه : يامجنونه كان طاح وحرقني ولا وسخ السيارة
بقهر : تستاهل عشان ثاني مرة ما تجلس تستعبط علي
عض شفته وهو يأخذ فاين ويمسح يده : احمدي ربك بس انه مافي غير الربع إلا كان حاسنا وحستك بعده
اصايل رجعنا للتهديد المستفز أفضل شيء ينفع التحقير ..ميلت رأسي وأنا اقفل عيوني ادور النوم
عشان ارتاح ...بس والله المسافة طويله من الرياض لأبها طالعته بقهر : كان حجزت وريحتنا من البهذله هذي
مصعب طالعها ورجع طالع الطريق: اكيد ماراح احصل حجز بنفس اليوم وصراحه مابي اتاخر عليها
@
@
@
الجنوب
نور
الحمدلله أمي هدت ..كنا خايفين عليها لا تتعبب طالعت شدن بقهر ...من صياحها المبالغ فيه كلنا موجعين عليه ...وصحنا بس كل ما أمي تسكت رجعت شدن تصيح بصوت عالي تخليها ترجع تنهار علينا ..لا لا زودتها.. ماقدرت اسكت قربت منها وهمست : خلاص حنا يالله نبي أمي تسكت وبعد شوفي حالة عمتي نوفه وشلون تصيح هدي عليها بدل ذا الصياح
شدن طالعتها بقهر وهي تمسح دموعها : صدق ماعندش قلب وهذا وهو خالش
نور بقهر : قلتيها خالي أنت وش يصير لش
عشان ذا الصياح
شدن وهي تصيح : صح حزينه عليه لانه طيب مره معايه وحبيب بس أنا اصيح على أمي نوفه
نور طالعت جهة عمتي نوفه قلت وأنا صاكه على سنوني : وليه ان شاءالله إذا هي صابره لحكم ربي
شدن : قلبي موجوع عليها رملت مرتين
نور ودها تفرمها يعني ذا الصياح كله ماهو على خالها مثل ما افتكرت ... عشان بس عمتها رملت مرتين همست لها وأنا عيني من الموجودين : هيا كفي دموعش ولا افلحي من المجلس وتقلعي
اي مكان وصيحي حنا يالله قدرنا نسكت أمي
شدن بقهر وهي تمسح دموعها : حسبي الله عليش جالسه على رأسي حتى ماتخلين حد يعبر عن مشاعره
وقفت وسفهتها وجلست جنب أمها وحطت رأسها على كتفها وقلبها عورها عليه ...صح كان ماهو محرم عليها ...وتغطى منه ...بس والله موته كانت لهم صدمه جت مفأجاة لهم ... مافي شيء كان
@
@
@
ياسر
دق جواله برقم مصعب طالع أبوه بتوتر وهو جالس متوسط المجلس ....
طلع ورد عليه قاله وصل أبها بس مايدل المكان بسرعة راح يستقبله بعد ماحدد له وين ..موجود يالله وش بيكون رد فعل أبوه يوم يشوفه أكيد يعرفه من وفاة أمه يوم رآح ...الحين بيعرف بينا وصل بذات وهو يشوفه معي ... رفع جواله ودق على شدن قاله تعطيه عمته ...كلمها وخبرها بجية مصعب ....
أول ماوقف قدام البيت
طالعها وقال بصوت مخنوق : احس بضيق مدري وشلون أقدر اتحمل وسكتت وش يقولها بيفضح أمه زيادة قدامها ...
تكذب لو ماتقول شفقت عليه : أنت جاي تسوي الواجب لأخالتك وتطلع
هز رأسه بضيق : الله يستر بس المهم انزلي وقولي لها بشوفها
اصايل : ان شاءالله
نزلت ..ودخلت ..كان فيه حريم حيل ..حسيت
بتوتر وخجل ...طالعت حولي ماعرف أحد فيهم
ماغير خالة مصعب ..أول مادخلت المجلس دورتها بعيوني
شدن فزيت يوم أمي قالت : اصايل
طالعت وين ماتطالع ...شفت قدامي وحده أول مره اشوفها ..وقفت مع أمي يوم وقفت واستقبلتها
اصايل عضت شفتي منحرجه بس ارتحت يوم شفتها اقبلت علي وهي تسلم علي وتضمني
: ياعمري والله
اصايل سلمت عليها وعزيتها ...
همست بحزن : الحمدلله يمه
تعالي أجلسي
اصايل : مصعب بيشوفك بس ماعرف مع زحمة النسوان وقت مايخفون يجي
نوفه هزت رأسها : فديت قلبه
شدن يعني هذي زوجة مصعب .. قربت منها وسلمت عليها ..وخليتها تجلس وجلست جنبها
وأخذت ولدها وجلست ابوس فيه
اصايل كنت منحرجه .. حدي . بينهم
حور همست لنور وقت ماطلعت من المطبخ : مين هذي جت وجلست جنب عمتي وشدن
نور : مدري أول مره اشوفها
حور : روحي سحبي كلام من الخبله شدن وتقولش مين
نور طالعتها بقهر : لو ميته عشان تعرفيها روحي لها بنفسك واسأليها ورجعت طالعت أمها ..وهمست لها : يمه تعالي للغرفة الثانيه وكلي شي وخذي علاجش قد مر ساعيتن من موعده وياسر موصي علي عشان تأخذينه ..
هزت رأسها برفض بدون ماترد ..
نور ..شكلي ماعندي إلا ادق على ياسر يجي يشربها غصب ...
( بمجلس الرجال )
طالع الي دخل مع ياسر سلم على الحضور ..وجلس شاف ياسر ...يضيفه بالقهوه والتمر .. عقد حواجبه وجهه ماهو بغريب عليه ..دقق فيه ...فتح عينه بصدمه وهو يتذكره ... هذا ولد ( النايفة )
ايه ولدها ...يحس نفسه بيقوم يثور فيه وبولده ... بس مهما كان مستحيل يفضح نفسه بيصبر حتى الكل يروح وبعدها يعرف وشلون يتصرف ...عصب زود من نظرته اللي يطالعه فيه اللي كلها تعالي ..وغرور ... صد.. وهو يتحلف بولده ... أكيد له يد بوجوده هنا ...
بعد مافضي المجلس ..والكل قام للعشاء
ياسر وقف وقال : تفضل مصعب
مصعب هز رأسه : لا مشكور مابي
ابو ياسر بعصبيه وهو يطالع ولده : هذا وش يسوي هنا
ياسر وعينه من باب المجلس مايبي حد يدخل : يبه مايصير تذكر حنا وين
مصعب عصب حده بذات وهو حتى مانطق أسمه
سند ظهره على وراء وقال وهو يحاول يمسك نفسه لا يقوم ويخلي العزاء يكون فيه : والله جاي اعزي بزوج أمي
مبارك بعصبيه من أخته وشلون تغدر فيه وتتواصل معاه : مالك أم هنا أمك ماتت من 30 سنه
شد على يده وهو يقول بنفسه هدي مصعب هدي
طالع ياسر اللي يحاول يهدي أبوه وقف قباله وقال بتحدي :لا تزعل نفسك كذا صدقني عزاك ماراح أجي بس شيء يخص أمي نوفه لا بجي وغصب عن الكل وأشوف وشلون تمنعني
وطلع من المجلس ...شاف ياسر وراه ينادي عليه
وقف وطالعه شافه منحرج : مصعب آسف والله بس
ابتسم بوجع : لا تعتذر
ياسر وهو منحرج : طيب حلفت عليك الليلة تبات هنا
مصعب بسرعة قال : لا والله حجزت لي شقه لمدة ثلاث ايام وبعدها اطمن على أمي وبمشي
======
===
بعد ماالبيت فضي ..والكل راح جاء مصعب ودخل على خالته نوفه ...وجلس معاها ...وعدها قبل يسافر يرجع يشوفها .
ياسر وهو يحاول يمنعه مايروح لعمته نوفه : يبه الولد تسهل ليه تروح تزيد على عمتي وبعد تذكر امس دفنا خالي الدنيا ماتستاهل كل ذا الحقد والكره وبعدين ليه تحمله ذنب ماله فيه
راعية الذنب قد سلمت روحها لربها
أبو ياسر بقهر دفه وتوجهه لبيت نوفه صرخ بعصبية : نوفـــه
شدن كنت جالسة ارتب المكان مع نور بعد مالبيت فضي بس انصدمت من صوت خالي مبارك
فزيت بخوف وأنا امسك بنور : ايش فيه
سكت يوم شفته داخل وهو مدرعم علينا
وياسر وراه قلبي وقف خفت على أمي لا يمد يده عليها بسرعة طرت لها وقفت جنبها كانت تطالعه ببرود ومأكان ذا الشخص اللي قدامها شوي ويذبحها
بعصبية صرخ : تغدريني فيني
ياسر وهو خايف على عمته من أبوه : يبه تكفى
نوفه طالعته وهي تعبانه حدها خلاص معاد فيها تتحمل ظلم وتجبر اخوها : ماغدرت فيك
بس مابي اقضي من الدنيا وأنا مقاطعه اللي
من دمي وبعدين ماجاء يمك جاي لي أنا
واسمع مني يامبارك ولد أختي ماراح اقطعه عجبك ولا كيفك
مبارك بعصبيه : بعد تتحديني عشان ولد ال*******
نوفه هزت رأسها وهي موجوعه منه حتى ماقدر وضعها وانها توها فقدت زوجها
ياسر أشر لنور وشدن يطلعون وقال بقهر : يبه وش تقول تذكر مهما كان تراه عارك
نوفه وقفت وقالت وهي تترجاه : تكفى ياخوي
افتح له قلبك وعده مثل ولدك ترى ماهو لحالك كسرتك النايفه حتى هو كسرت قلبه وحطمته
على الآخر لمتي ياخوي ذا الحقد لمتى قولي
مبارك بعصبيه قال : أجل اجمعي وصلش معاه ومن الساعة ذي تراش بحسبة النايفه
نوفه بسرعة وقفت بوجهه وهي تترجاه : لا ياخوي لاتساومني على فرقى مصعب روحي تعلقت فيه وفراقه بيقضي علي ولا توجعني فوق الوجع اللي أنا فيه وفوق الوحده اللي أنا فيها تبي تقطعني من كله لازوج ولا ولد ولا أخ بعد
ليه تبي تزيد القطاعه والدنيا ماهي دايمه لأحد شوف محمد مافيه شيء مات فجأة وجع قلوبنا عليه بس يابخته راح وقلبه نظيف والناس كلها ذكرته بالطيب ... وانهارت تصيح على فقده
ابعدها عنه وقال وهو مايبي يشفق عليها : انتهى
بسرعة طاحت عند رجوله وهي تقول : ارحم وحدتي
ياسر حزن على منظر عمته طالع أبوه بعتب لمتى بيتحلمون قساوته جاء بينحني يرفعها ويقولها ماهي وحيده بس انصدم يوم أبوه سبقه نزل نفسه ومسكها ورفعها وسلم فوق رأسها وقال :افاااا نوفه توطي قدامي لا عشت والله وبعد مين قالش انش وحيده وأنا موجود وياسر ولدش ومصعب ولدش زادت بصياحيها يوم جمع مصعب معاهم
ياسر انسحب عل طول لبرا شدن على طول طارت له وهي مفزوعه : ليه تركتها معاه الحين يذبحها
ياسر طالعها وطالع نور وقال وهو للحين تحت تأثير الصدمة : لا لا أنا شوي وانجن من أبوي
شدن بخوف وهي تطالع جهة باب الصالة: وش صار طمني على أمي ولا أقولك أنا بطمن عليها بوقف بوجهه إلا أمي ...
ياسر مسكها وهو يمنعها تدخل: خليهم مع بعض
سكت يوم أبوه طلع على طول شدن طارت لأمها
قرب مبارك منه وقال : ودني لمصعب
ياسر لا لا هذا اللي مايبه يخاف الحين طيب خاطر عمته عشان برأسه شيء يأذي فيه مصعب : يبه
قاطعه بحده : تدل مكانه ولا تحاول تكذب مثل عادتك وتقول سافر ترى عمتك قايله لي انه هنا
ياسر :ييه وش تبي فيه
مبارك : دلني له
ياسر بصدق : والله مدري وين مستأجر
مبارك وقلبه موجوع فعلاً لمتى القاطعة هذي وبعد موت محمد أثر فيه ...الدنيا ماهي مستاهله وبعد طلعته من بيته اليوم كسرته ..وغصب حن عليه
مهما كابر وعصب ..فيه شيء بداخله صوبه
: بسبقك للسيارة وأنت دق عليه وخله يعطيك وين مكانه بالضبط
ياسر لا لا مستحيل ينفذ اللي يطلبه منه
قال بعتراض : يبه الله يطولي بعمرك خليك منه
بس سكت يوم سفهه وطلع لحقه بسرعة
دخل لعمته نوفه يخبرها مايبي يتصرف بشيء وبعدها ينرد عليه اللوم بس قالت له وهي تصيح : روح فيه ياياسر وكاد الله يجبر القلوب تعبنا خلاص
ياسر انسحب وطلع شافه بالسيارة ينتظره مثل ماقال دق على مصعب ..وطلب مكانه وصف له العنوان وراح له ... ياسر بعد ماقفل
طالع أبوه وهو ومتوتر حده
بتردد : يبه لو نيتك شر تعوذ من إبليس
أبو ياسر : سق وأنت ساكت
ياسر عض شفته مابيده شيء ...كلها دقايق
وصلووا مكان الشقه طالع أبوه يوم قاله : دق عليه خليه ينزل
وده يمنعه بس مافيه تنهد بعجر ودق عليه وقاله انه برا كلها دقايق ...وشافه طالع ..من باب العمارة
طالع ابوه يوم نزل ...نزل وراه بسرعة بس وقف
بمكانه يوم شاف أبوه يأخذه بحضنه قال بصدمة :
لا لا اليوم الوالد بيجيب أجلي .... الحين بعد ذاك التهديد يأخذه بحضنه ...
مصعب
صدمة عمره وهو يسحبه له ويضمه عقد حواجبه وهو يسمعه يقول : والله ياطلعتك وأنت زعلان الليلة كسرت قلبي وجيت قصاك اللحين أعتذر واقولك حقك علي يبه
تكرررت الكلمة ... يبه وتعتذر ..... جاء بتيكلم قاطعه وقال : لا تجيب الماضي لو تبي وصلنا
وبسرعة ابتعد وهو يأشر لياسر يلحقه ...
مصعب مصدوم حده كل شيء صار بسرعة ضمه وبسرعة ابتعد طالع ... ياسر يبي يفهم بس شافه ماهو أقل صدمه منه بسرعة انسحب وراء أبوه
طلع الشقه ...ودخل شاف اصايل باقي جالسة بالصاله انسحب للغرفة ....وقفل الباب دموعه اللي كابتها من وقت ماجاء هنا ..انزلت ...
اصايل
مانسحب كذا للغرفة واعتزل بلحاله إلا فيه شيء ...ياترى ايش قاله ولد خاله خلاه يرجع تسذا حالته ...صح هوو زعلان ومتضايق من وقت
مارجعنا من بيت خالته ...انتظرته يطلع ...
عدت ساعتين ...ماطلع أكيد نام ... أخذت عادل .... اللي كان نايم على الكنبه وفتحت الباب ..ومديت يدي وفتحت النور ومشيت على مهل مابيه يصحى
بس على طول وقف وطلع ...ويصد بوجهه عني
حسيته مايبيني اشوف وجهه ...بس اللي اتضح لي انه كان يصيح ..جلست أفكر ياترى وش قايله ذا خلاه تسذا ... تمددت جنب ولدي وقفلت عيوني ادور النوم بس على التعب.. اللي فيني ماقدرت انام
وهو تسذا حالته ...ودي اطلع اشوفه جلست ..
وأنا افكر ...لا لا اصايل ماعليتس فيه ... خليتس بعيده عنه ....لا لا قلبها مايطاوعها ...
طلعت من الغرفة شافته متمدد على الكنبه
وعلى طول يوم حس فيني رفع يده وحطها على عيونه
الحين تأكدت انه قاله شيء وجعه بدون حس قربت منه وسألته بتردد: مصعب ايش فيك لا تخوفني
بس صقعت يوم طالعني وقال بصوت مخنوق : ليتني مت معاها وكاد ارتحت من ذا العذاب
بسرعة قلت وأنا اقرب منه واجلس جنبه : بسم الله ليه تقول تسذا الحين مارد علي همست وأنا امسك يده : ايش قالك مارد عليه أبد .. ماغير سحب يده من يدي ..وقال : حتى بعتذارهم يمننون علي
عقدت حواجي بعدم فهم ... جيت بسأل بس قاطعني وقال : صدقيني موتي راحه لهم ولي
بدون حس صرخت : لا تقول تسذا قدامي
بس خفت يوم جلس ومسكني من كتوفي بصوت مبحوح : صدقيني راحه لك بذات
اصايل طالعت عيونه اللي صايره حمراء من كثر ..الصياح دعيت من قلبي على ذا الياسر ..حسبي الله عليه وش قايله ..
قلت بصدق : ماعليك فيني ولا فيهم تذكر بس ان عندك ولد يحتاجك ومافي احد بعوض مكانك
طالعني بنظره وجعت قلبي ... عضيت شفتي مابي اضعف قدامه ..شريط طلاقي وطرده لي من حياته قدام عواد وشمسه كله رجع قدامي .. وقفت وانسحبت للغرفة ...
@
@
@
{ مكه }
ضحكت من قلب وهي تشوفه كيف منشد يتفرج
قالت وهي تبي تستفزه : متأكد راح يفوز
عناد طالعها ورجع طالع المباراة : ياشيخه ذا الزعيم
الشموخ رفعت حاجب : طيب وشهوله ذا التوتر مدام واثق كذا
عناد أشر بيده : شموخي برا
الشموخ بصدمه وقفت وهي تتظاهر الزعل : تطردني اوكيه عناد
عناد ابتسم لها :تعالي بين الشوطين اوكيه
الشموخ صغرت عيونها بقهر : وقت مايبدا الشوط الثاني ترجع تطردني
عناد وهو عينه على الشاشه صرخ بقهر يوم ضيع اللاعب : لا لا وحط يده على رأسه لاااااااااا
الشموخ حطت يدها على اذونها من صوته العالي يوم صرخ : هييي انتبه على عمرك
ترى والله سمعت قصة انه واحد مشجع مات من كثر التوتر والتعصيب
عناد بحرقه : وشلون ضيعه وشلون وهو دايم يجيبه
وطالعها شموخي حبيبتي فارقي
الشموخ بقهر : اللي فهمته منك ان عيني حاره عليه صح
هز رأسه وقال : مع الآسف
الشموخ وقفت وهي معصبه رفعت يدها : يارب مايفوز
عناد صرخ معترض : لاااااااااااا تكفينننننننن
@
@
@
طلعنا من عند خالته بعد ما جلسنا معاها شوي ودعناها ....طالعته وقلت : يازين جوهم
ليت نستقر هنا
طالعني وقال : صعب اخلي أبوي
اصايل سبحان الله متغير حيل من ناحية أبوه الله أعلم ايش اللي صار وخلاه ..تسذا يتغير معاه ..لدرجة يكلمه بالجوال ..بستمرار تشوفه عكس أول ...معقول عشان السي دي ولا فيه شيء ثاني بينهم .. بس والله خاطري ضايق ودي اتمشى ماودي ارجع للرياض بدون مااستمتع بذا الجووو ...
طالعته يوم قال : ولا يهمك ي أم عادل نمشيك
ولو تبينا نمددد زيادة نمدد
اصايل لا لا اليوم رايق غريبه توقعت تطول الحالة الي كان فيها قبل امس .. صدق ماينعرف له
أول ماوصلنا السودة ...يالله صح متعه بس خوف بنفس الوقت طول الطريق وأنا ماسكه على قلبي
على طول مصعب جهز الجلسه
جلست وجلس مقابلني ... ومد يده أخذ عادل مني
وقال : قول لماما من الذوق تشكرني
اصايل بدأ والله بستفزازي بسخرية : اسفه ماعندي ذوق
مصعب رفع حاجب : جوو الغلاسه والثقل ذا ماحبه
اصايل صديت وقلت بقهر : مصعب أنا جايه ابي استمتع ياليت تخليك بحالك ولا تنكد علي
مصعب بضيق : تصرفاتك تدل انك فعلاً بعتي ياصايل بس أنا شاري وبتحمل
اصايل بغصه : موجوع قلبي منك ومن صدامتك له
مصعب بندم : عارف والله بس متأكد ان مكانتي فيه بعد كبيره
اصايل جيت بقوم اركب السيارة
بس منعني اقوم ومسك يده وقال : لا لا خلاص لا ترمي نفسك من الجبل سامحتك
فتحت عيني بصدمة شوفو الخايس وش يقول : ميته والله وراء سماحك لي
مصعب ضحك وقال : مايجوز تنتحرين والله
اصايل بصرخة : مصعب
مصعب ابتسم : طيب سامحيني ولا انا اللي بنتحر
اصايل أشر على الجبل وقلت : ياليت والله وانفك من وجهك وبعدها تدخل النار ان شاءاله يكون أخذت حقي منك كامل
مصعب فتح عينه : اوف اوف عوذ من شرك لهادرجة وصل بك الحقد أستغفري ربك وش ذا الكلام
صديت عنه ومارديت نكد علي ...بسخافته
رن جواله استغربت يوم فتح الخط وقال : استح على وجهك لا يكون داق تبيني اخطب لك
انثبر انتظر شهر على الأقل ولا معاد به تقدير للميت فعلاً ماتتت الإنسانيه
ضحك بصوت عالي : لا ياشيخ
طيب تقلع ايه جالس مع المدام ...
ميلت فمي بسخرية المدام مالت بس .. طالعته يوم قال : تخيلي يبي يخطب نور
عقدت حواجبي : مين نور
مصعب : أخت ياسر
اصايل حسيت انه مايبي يقول بنت خالي احسه للحين حاقد عليه سألته بفضول : وش عرفه فيهم
مصعب : عزم ياسر وأهله وامه يقول اختارتها له
اصايل وأنا اتذكر شكلها : الله يسعدهم
مصعب : ويسعدنا بعد شافها تطالعه بسخرية رفع جواله وقال بتهديد قولي آمين لا ذا بوجهك
اصايل : همجي تسويها
مصعب نزل الجوال وقال : لا الحمدلله تبت
اصايل فزيت بخوف يوم السماء بدت تمطر أخذت عادل وقلت برعب : يالله مشينا
مصعب بسرعة مسك يدها وقال : حرام عليك توها زانت تكفين لا تحرمينا وتنكدينا على بخوفك
اصايل فكيت يدي منه : والله لو تموت ماجلست
ركبت السيارة وأنا قلبي يدق بخوف
شفته جاء ركب وهو مقهور ..أول ماحرك السيارة
قال بسخريه : بعد تبي تستقر هنا ماهوب حقك ذا الجوو يالجبانه واللحين تبينا نمشي للرياض ولا نمددد شوي
طالعته وانا مرعوبه بذات وأنا اشوف البرد ينزل علينا : مشينا الله لايعوق بشر وانسى سالفة السكن هنا بعد
مصعب ضحك عليها بصوت عالي: هههههههههه
@
@
@
بعد مرور ثلاثه اشهر
رن جوالها بيدها فزت بفرحة : أخوي فتحت الخط
وعينها من ياسر اللي مكشر تدري فيه يموت غيره منه : اهلاً اهلاً
: عماله ايه يابت والاهبل بتاعك عامل ايه
شدن ضحكت عليه : بخير ياحبيبي والاهبل بعد ماعليه ..أنت اللي طمني عليك وعلى ماما والحجه وخالتووو
: كلهم بخير وعاوزين يكلموكي بس مش راح اعطيهم
شدن ابتسمت : ليه طيب
: مايكلموو من مبوايلهم ولا هي عند فيني وخلاص
شدن ابتسمت وأنا اسمع خالتي تقول: يابنت ياشدن عاوزه اجي عندك السعودية
ابتسمت : قولها تنور السعودية
: طيب طيب يلا مع السلامة ماما حضرت الأكل
ولو مالحقتش مش هاحصل حاجه معاهم دي خالتي وجوزها مابقاش حاجه ويكلونا
خذي ماما وماطوليش معاها ورايه مستقبل
ضحكت على كلامه : ازيك ياروحي عامله ايه
ابتسمت : الحمدلله وقلت اذكرها وعدتيني تجي عمره وتزوريني
ابتسمت بحزن : قولي ان شاءالله ولو مقدرتش تعالي انتِ زيارة حاولي ياماما ماتحرمينيش منك
شدن طالعت ياسر وعضيت شفتي متردده اروح زيارة قلت مابي اكسر بخاطرها : ان شاءالله
بعدها كلمت جدتي وخالتي وقفلت
وطالعت ياسر وقلت : ليه يوم اكلم أهلي تضايق
ياسر طالعها وقال : لا مين قالش اضايق بس كل مافي الموضوع ماهو متعود بس ان لش أهل غيرنا
شدن بتردد : ماما تبيني اروح لها وبيني وبينك وأنا بعد محتاجه اشوفها واشوف اخواني
ياسر : ابشري تولدين وبعدها يصير خير
شدن ابتسمت بحب له وقلت : الله لا يحرمني منك
ياسر ابتسم وقال : يالله كان عندش فوبيا من موضوع مصر والحين بنفسش تطلبين تروحين
شدن : ياسر احساس حلووو لما يكون عندك أهل يحبونك تدري أنا جلست فتره طويله كنت افكر بس أمي نوفه اللي تحبني
ياسر رفع حاجب : يالجاحده وأنا ونور وأبوي وأمي وين رحنا
شدن هزت رأسها بلااااا : انت توك حبيتني بس نور ايه ايه تحبني وبعد أبوك بس الحين طبعاً تغير الحال وصارت العلاقه بينا رسميه حيل بس أمك ...لا والله ماتحبني لازمان ولا اللحين
ياسر حزن عليها وقاطعها : مفروض حبي لش يكفيش عن الخلايق
شدن ابتسمت له : ايه يكفيني
ياسر قال بجديه : شدن نور انخطبت
شدن بصدمة صرخت : ايششششش
ياسر فز من صوتها : اسكتي الله يفضحش
شدن بحماس : صدق انخطبت
ياسر : ايه و تخيلي مين
شدن : مين
ياسر : عادل
شدن عقدت حواجبها وهي تحاول تذكر الأسم
طالعت ياسر يوم قال :اللي عزمنا
شدن ضحكت بصوت عالي : لا تقول
ياسر ابتسم : اي والله ليتنا شلنا حور بعد
شدن كشرت كان ودها تقوله حور نحسيه
بس سكتت ماتبيه يزعل الحين ..
ياسر : روحي نادي نور
شدن فتحت عيني بصدمه : تبي تقولها الحين
ياسر : ايه ابي اشاورها مصعب يقول يبي يضمن الموافقه أول
شدن بضيق وأنا اذكر أمي : صعب اللحين
اخاف يطلع الكلام وخالك توه يادوب كمل ثلاث اشهر
ياسر : بشاورها ماقلت بزفها وأشر لها تروح
شدن هزت رأسها وراحت دورتها بعيونها بالصالة مالها أثر راحت لغرفتها وقفت قدام الباب وقالت : نور كلمي ياسر وطالعت حور لا تجين معاها طيب يبيها بلحالها
حور بقهر : ليه شايفتني ماسكه فيها
شدن رفعت حاجب : لا ادري فيش راح تلزقين فقلت اكد عليش
نور قامت بطفش : خير وش تبون فيني أنتِ ورجلش
شدن اشرت بيدها : الحقني وحطت يدها على ظهرها ومشت بدلع ... وهي تحاول تبرر بطنها
نور بسخرية : لو تتمايلي اكثر بعد باقي بطنش ماظهر
شدن طالعت بطنها اللي يادوب برزت شوي سفهتها وأشرت له تدخل
نور دخلت وطالعت ياسر رجعت طالعت شدن يوم قفلت الباب بالمفتاح حست بتوتر من جوهم : ايش فيه
ياسر أشر لها تقرب
شدن سحبت المفتاح بيدها وجلست جنب ياسر
وهي تطالع نور
ياسر عقد حواجبه وطالع المفتاح بيد شدن : ليه بيدش
شدن ببرود : لا بس اخاف تشرد
ياسر بقهر : ليه بنقتلها
نور برعب : يمه بتقتلوني
ياسر بقهر طالعها : يالله انتِ بعد عومي على عومها
نور بقلق : والله ماسويت شيء
ياسر أشر لها تجلس جنبه وهو يتنهد بقهر ليته ماكلف شدن تروح تناديها سوت جوو رعب ماله داعي
نور قربت منه وجلست حط يده على كتوفها وهو يطمنها : فيه شخص تقدم لش
نور طالعته بصدمه وصرخت قبل يكمل كلامه : ايششش وقفت متوتره لا لا
شدن وقفت بسرعة وهي تمسكها : شفت قلت لك بتشرد الجبانه
ياسر مد يده ومسك يدها وجلسها جنبه وقال بجديه : عادل خويي واللحين يبي موافقتش
وتأكدي ماجيت وشاورتش إلا سأل عنه وبنفسي بعد عارف باخلاقه وطالع يدها اللي ترجف بيده ابتسم : خلاص شوي وتموتي
شدن ضحكت عليها : ماعليك فيها ياسر الرجفه ذي من الفرحة
نور متوتره حدها وقفت وقالت : لا لا ياسر مابيه
ياسر عقد حواجبه : ماراح اخذ بردش الحين
فكري وتعالي قولي لي
نور انسحبت بسرعة بس وقفت وهي تطالع شدن
عشان تفتح لها شدن قربت منها وهمست لها : وافقي عليه احسه اخلاق من كلام ياسر عنه
نور ماردت عليها طلعت وهي متوتره حدها ..
@
@
@
اصايل
طول ذي الفترة ..علاقتي مع مصعب ...مثل ماهي ... حتى حسيته هو طفش بعض مرات يحاول يغلس عليه .. بس الفتره هذي معاد يحاول حتى يدور راضي ولا عليها ..جالس يعاندني بذوقي واختياراتي لديكور واثاث البيت ...واللي يقهر في الموضوع ...ذوقه صعب كله شيء مايحبه ...مدري السالفة عاند ولا فعلاً ماهو حاب اختياراتي ...احسه صاير مثل الرجال الي يتقاعد وينشب لأهل البيت .. كل شيء يعلق عليه ...وكل شي ينتقده
وبعدها انشغلت بولادة شموس فديت قلبها
أول مادق الجرس طالعت نانووو اللي جت وطلبت تشتغل عندي ... على طول وافقت ... لأني مافي أحد أثق على بيتي غيرها وبعد عيني ميري كان ودي بعد تجي ...بس سافرت نهائي ..
وقفت يوم شفت عمي صقر ... تفأجات من جيته ذا الوقت ... قلبي عورني لا يكون مصعب فيه شيء
قربت منه وسلمت فوق رأسه وقلت بقلق : هلا والله تفضل حياك
أبو مصعب : الله يحيك يبه جلس وقال اخباركم
واخبار حفيدي
اصايل : الحمدلله كلنا بخير نايم نانووو حبيبي روحي جيبي عادل
أبو مصعب : لا لا يبه خليه نايم .. أنا جالس هنا واحتمال اقامتي تطول الله اعلم متى يرجع مصعب من أبها ..ابتسم وهو يتذكر توصيته له وبعد وصاني عليكم وقالي يقول اصايل تخاف تجلس بلحالها غصب وافقتي بسفريته مع عادل إلا لما اجلس معاكم
اصايل
يرجع من أبها .. ... متى سافر ...وبعد الأخ ماقصر يوصي حضرته شوي وافضح نفسي اني مادريت بذي السفرية
قلت وأنا احاول امسك نفسي : حياك ياعم البيت بيتك ايه مثل ماقالك اخاف بلحالي ويوم قالي أبوي بيجي يجلس معاكم تطمنت
أبو مصعب وهو يضحك : والله يبه بيبني وبينك ماصدقت بذي العزيمة البيت عندي صار يجيب ضيقه بلحالي ماغير الخدم حولي
اصايل حزنت عليه وقلت بصدق : ليتك تعيش معنا
أبو مصعب : لا يبه صعب مارتاح إلا بيتي
وبضحكه إلا زوجيني لو تبي تسوي فيني معروف
اصايل ابتسمت وقلت : ايه هذا مقصدك
ابشر بدور لك بس ذي المره بجيب لك وحده من ديرتنا وش رأيك
أبو مصعب : ايه ابيها سنعه وبضيقه ماتوفقت ولا في وحده كلهن فيهن من العيوب اللي تكسر الظهر
اصايل عضيت شفتي وأنا حزينه عليه : ابشر بعزك بجيب لك اللي تردك عشرين سنه وراء
أبو مصعب : لا لا من الحين اقولك مابيها صغيره يكفي اللي صار لي منهم ابيها بأخر الاربعين وكاد تفهم علي وتريحني
اصايل ابتسمت له وأنا اتذكر حريمه من الجوهره لسوسو ...كلهم في الأربعين ....مين لاعب عليه وقايل له انهم صغار...
وقفت وقلت : ماعليك ارقد وامان بذوقي
والحين ريح لما احضر الغداء
أبو مصعب : الله يعافيك والله اني ميت جوع عساه بس انت اللي طابخه ماهوب نانوو
اصايل وأنا اضحك : لا لا انا الي طابخه
واسكت لا تسمعك نانوو وتزعل
أبو مصعب : تزعل ولا كيفها دلبت سبدي بطبخها ذي السنوات متحمل وساكت ...
اصايل
رحت للمطبخ وأنا قلبي يغلي ..من الكذاب
الحين أنا الي وافقت على سفريتك أنا دريت قبلها يالخايس ...عشان اوافق .. عضيت شفتي بقهر ..من نفسي ليه انقهر وازعل .. يسافر ولا يجلس مع نفسه هذا هو طبعه من زمان مصعب والصدمات كل مره يسوي شيء معي.... حضرت الغداء ..وتغدينا .. وعمي بعدها راح يريح ..وأنا طلعت لغرفتي ... مسكت جوالي ...توقعت احصل مكالمة منه
@
@
@
الشموخ
طالعته بطفش ... مشغول بذي القضيه له فتره
: عناد
رفع عينه من الورق الي قدامه : لبيه
الشموخ وأنا اتذكر مكالمة عمي لي : متى بتفضى
عناد قفل الورق اللي قدامه ورجع ظهره لوراء وقال : أمريني ايش تبين
الشموخ خفت اقوله قلت بتصريفه : اممم والله طفشت وأنا وأنت ماغير ماسك بذا الورق
عناد تنهد بتعب : ماعليه القضيه ذي مسكتها صعبه حيل وصاحبها واثق فيني
الشموخ ابتسمت له بحب : وشلون مايوثق وهي بيد أبو قصي
عناد بتوتر : تصدقين والله خايف ذي المره القضيه صعبه وهو طرف مظلوم وخصمه ماهوب سهل مدام قدر ينصب عليه بهذا المبلغ
بس الله قادر يقويني ويقدر يأخذ حقه
الشموخ : الله كريم وسكت شوي وقالت صعب ماتوصله سؤال عمها عنه : عناد
عناد طالعها وقال وهو مصغر عيونه : عندك شيء من أول صح قوليه
الشموخ بتردد خايفه ترجعه وتذكر باللي صار : عمي صقر دق علي يقول كل مره يدق رقمك وهو مقفول ... قلت له غير رقمه ..يبي يطمن عليك
عناد عض شفته صعب يكلمه بعد الي صار وصعب يحقره مهما كان هذا أبوه الثاني ..ويكفي سؤاله عنه الحين قال بحب له : هو الوحيد اللي ماخيبني
ويوم قلت عنه أبوي يستاهل
الشموخ ارتحت يوم رد كذا ...الحمدلله مارجع تضايق ...وقفت بوجهه وقالت وهي تأخذ الاورق من قدامه : اقول مافي حد مظلوم مثلي
يالله اجلس معي ولا طلعني ودي اروح المول بتسوق للبيبي
عناد طالعها مصدوم : من الحين وتوك بالرابع
الشموخ وهي متشوقه : ايه بأخذله كل شيء
عندك مانع
عناد هز رأسه بلاااا ووقف وقال وهو يمد يده : ابشري اوديك وتسوقي للبيبي بس قبلها اعطيني الاوراق
الشموخ فرحت حدها ناولته وقالت :اخيراً بنطلع اعطني بس عشر دقايق اتجهز
عناد أخذها منها وابتعد يركض للغرفه وهو يقول : تجهزي بس وقفل الباب بالمفتاح
الشموخ بصدمه صرخت وهي تشوفه خدعها : بعد تقفل على نفسك هين عناد والله لا تطلعني غصب
وادفعك اللي قدامك وراك ولا ماكون أم قصي
انقهرت منه يوم قال : بدون ازعاج أم قصي
@
@
@
نيمت بنتها بمهدها ...وطالعته شافته متضايق حده بعد مشكلته مع أخته حياة وقالت بصدق : شوف عواد أنا اشوف خليها على رأحتها مدام هي موافقه تسيفها
عواد بزعل : وشلون توافق على شايب وش ناقصها هنا في بيت أبوها معززه مكرمه ولا قصدتس تصرفينها عاد هنا موضوع ثاني
شمسه عضت شفتها وقفت وهي تقول : استاهل أنا تدخلت
عواد بضيق : شموس يابعد رأسي والله مابيتس الحين تزعلين بس الموضوع ذا مايصير يتم
قاطعته شمسه :تكفى عواد خلاص قفل على السالفة وطلعت من الغرفة وهي تحس بندم ليتها ماتدخلت ..دق باب جناحها وقفت وفتحت الباب شافت.. حياة قدام الباب استغربت ..
ماتجي جناحها أبد
قالت بنفس خايسه : أبي عواد
أشرت لها على الغرفة ...دخلت ...له وقفلت الباب
بقهر همست ليته صدق يوافق وتفارقي بشرتس
عنا ...سمعت صوت بنتي تصيح ..وقفت بروح لها
بش شفت عواد طلع وهي بيده وحياة بعد معاه
أخذتها منه ...وجلست ..جلس جنبي وقال : على قولتس مدام موافقه الله يستر عليها
ماعلقت أبد وقفت وناولته تالين وقلت :خلي بالك منها حتى اسوي لها رضعه
أخذها منها ..وابتسم وقال :اوه ام لسان طويل زعلانه
شمسه رفعت حاجب وقلت : ليت معاد تفكر تعتذر من أحد ثاني مره
عواد ضحك وهو يرفع بنته يوبسها : سمعتي أمتس
وش تقول ترى صابر عليها وعلى لسانها من مبطي بس وش نسوي لا القلب اختار
شمسه ابتسمت بغرور وقلت : يازين ماختار بس
وطالعته بتحدي ولا بوه كلام ثاني سيد عواد
عواد ابتسم : وهو يجي بعد كلامتس كلام
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!