رواية جيت مابيك تحقرني جيت أبيك تعز شاني الفصل السادس والثمانون 86 - بقلم r010ee

طالعها مصدوم حده من اللي يصير ..ومن اللي يطلبه ..
توقع يحرجه ويطلب يردها ...ماهو يطلقها
طالعها وقلبه يتألم عشانها ...وبعد ماحب طريقة أبوها بتعامله لها قدامه ...حسه قاسي حيل صح يحس بغبنته وقهره ...بس مهما كان مفروض يكون أحن ...نقد على .. نفسه بعد يلوم أبوها عليها ...لازم يقسى ومايضعف ... حتى لو هي صادقه ...مثل ماتقول
يكفي ...رفضها له بالطريقه الوسخه الي سوتها
وهي وصلت ...نفسها لذي الحاله تستاهل ...ماشاف اي رد فعل منها ماغير... منكسه رأسها ...ولا رفعت نظرها له ...مد يده ورفع رأسها جت عينه بعينها ذبحته نظرتها يسحها نظرة وحده منتهيه مذبوحه على الآخر ... طالع أبوها وهو وده يقول اتركنا شوي ...
الشموخ ماقدرت تطالعه تحس بالعتب واللوم بعيونه ... تتمنى مايخذلها ... وينفذ اللي أبوها يطلبه منه ويطلقها ويتركها جثه بعده .. عارفة حالها مالها حياة بدونه مهما تجرعت منه العذاب ... تحسه احن حد بالدنيا عليها مهما حاول يقسى عيونه كلها حنان لها وهذا اللي خلاها تعلق فيه.... بس هي ماسوت كذا إلا تبيه يطلقها عشانه هوو يرتاح اما هي ودعت الرآحه من يوم غلطت غلطتها ..

نزل يده وقف وهو ناوي يقول ...من غير ماتطلب
اني اطلقها حالياً ...من الأصل امشي بأمور الطلاق وبنتك عندها خبر اني منهي كل شيء يربطنا في بعض ...نزل عينه لها ... شافها رفعت رأسها وطالعته بنظره كسيرة ذبحته كأنها تقول انقذني ماقدر يقول اللي ناوي عليه قال بكذبه وبصوت حاد :يعني سويتي الي في بالك يالشموخ وكذبتي على أبوك كله عشان اطلقك

وحط يده على كتف أبوها وقال وهو يحاول يلم الفضيحه اللي سوتهالنفسها بيحاول ينقذها ب إلا يقدر عليه : بنتك ماتبيني ماهي راضيه بالضره وأنا رافض الطلاق وهددتني قبل تطلع من البيت انها بتكذب بمصيبه حتى لو تصل للشرف عشان وقتها عارفه برد فعلك وماراح تخليها على ذمتي وبتأخذها عندك عشان تستر المصيبه غبيه مافكرت زين ان بهالطريقه تخسرك وتخسرني ويمكن تردها لي وهي مذلوله ...وموطيه رأسها ....

وطالعها حس نظرتها تغيرت من المنكسره للصدمه
من كلامه أعطها نظره تسكت عن اللي يقوله ولا تفتح فمها وقال بعصبيه :الحين كله عشان ترجعي للدلع والحياة اللي تبينها يالله اشبعي بالطلاق بعد ماخسرتي ثقة أبوك بطريقه غبيه او تهور منك عشان اشياء تافهه
وطالع أبوها اللي قال والصدمه واضحه بصوته قال : وش ذا الكلام الجديد بعد

سب قلبه أكثر منه مره وكمل وهو يحس بقهر وقلبه محروق على يسويه بس ماعنده غير كذا مستحيل يشوفها كذا ويسلمها لأبوها اللي شكله ماراح يرحمها :بنتك ماهي راضيه بالمستوى الي عايشه فيه معي وكل مره تقارن بين عيشتها عندك وعيشتها معي تعبت وهي تعاير فيني حاولت أكسر عينها وأتزوج وكاد تتربى بس أبد ماغير صياح وتهديد وصوت عالي ويشهد الله علي
ماقصرت معاها باللي اقدر عليه وقلت لها بس اكمل تشطيب البيت وابشري بتلبسي نفس الماركات وبتعيشي نفس العيشه بس مع الآسف بنتك متهوره لدرجة دخلت الشرف بكذبها ومافكرت بالعواقب يوم تجي تقولك قبل تطلع قالت أبوي يزعل شوي ويرضى يوم يدري بكذبني وعشان بنفك منك اسوي المستحيل
والحين ياعم خلاص أنا اللي بطلق بنتك من غير ماتطلبه مني وطالعها وقال بصوت موجوع
من الموقف اللي هو فيه وشلون كذا نزل من نفسه
عشانها بس مافيه إلا يكمل كذبته :وراح اطلقك
بس ممكن تقولين لي وش مكذبه عليه فيه عشان اكون عارف كل شيء وطالع ابوها الي توتر

وقال وهو معصب : مكذبه بكلام ماينقال وتبي ذبح عشانه وطالعها بعصبيه وقال يازفته وشلون تسوين كذا يعني مافكرتي برد فعلي ويمكن كان ذبحتك ولا رحت فيها أنا من مصيبتك اللي قلتيها

سكت يوم قال عناد بسخريه : كانت متوقعه ماراح تزعل منها وطول عمرها تقول أبوي مدلعني ومستحيل يصدق فيني مهما قلت لو جبت مصيبه بوسط بيته والله ياعم صابر على لسانها بس مدام وصلت كذبها للشرف لا مابيها أبد أنا رجآل أخاف على سمعتي

أبو اميرة فقد اعصابه من كلمته الآخيرة رفسها بقوه وقال بصرخه : يامجنونه السواليف هذي مافيها دلع شوفي وش رجلك يقول هو اللحين اللي خايف على سمعته بسبب كذبك وش بتستفيدي كله عشان تطلقي من رجلك اللي مامثله اثنين
الشموخ
صرخت بألم بس تمالكت نفسها وهي تطالع عناد يطالعها للحين ماهي مصدقه اللي هي فيه
وشلون كذا قدر ينزل من قيمته ويتكلم على وضعه المادي عشاني اي رجال أنت ياعناد قفلت عيونها من صرخة أبوها يوم قال : ليه سويتي كذا ليه

مافيها ترد او تفتح فمها وش تقول له
شافته يحذرها بعيونه ترد عليه قالت بصوت ضعيف وتعبان ويالله ينسمع من قوة الألم اللي بجنبها من الرفسه اللي جتها عليه : قلت لك تمثيل بس رفضت تصدقني وكنت معصب ماتدري وش اقول ولا أعطيتني فرصه افهمك وأجلس معك

تذكر فعلاً طول مايضربها كانت تقول انها تكذب
وكله تمثيل عشان تتخلص منه .....بس وقتها مافكر ان السالفة كذا توقع تداري على الفضيحه اللي سوتها وبعد لو هي صدق سوت مثل ماتوقع
كان مافضحت نفسها بهذي السهوله أكيد فعلاً
كذبه وجهل وتهور منها مثل ماقال عناد كله عشان ترجع لعيشة الترفيهه يعرف بنته ودلعها بس ماتوقع توصل لكذا.....على القهر اللي فيه من كذبها
بس يحس براحه بعد كلام عناد يعني بنته ماسوت هالشيء صدق ولا وطت أسمه وفضحته ...
بس حس الدنيا لفت فيه ...:
تراجع لوراء وهو يمسك بيد الكنبه حس بعناد يمسكه وهو يقول : بسم الله عليك ارتاح

وقفت بخوف وهي تقول :. بابا وش فيك

رفع يده وقال بحده : أنا تلعبين فيني كذا يالشموخ

عناد طالعها بحده وقال :ماعليه ياعم بنتك متهوره
والحين خلاص النفس عافتها وأنا الي بطلق وأنت ربي يخليك لها ومتأكد انك راح تسعدها

نزل نفسه شوي وهمس لها : لمصلحتك كذبت
وعشان تقدري تعيشي بسلام مع أهلك

همست له : والله ماكذبت هذي الحقيقه اللي رافض تصدقها

حذرها تسكت : اوش معاد ينفع اللحين ومسك يدها ورفع صوته شوي وقال يالله سلمي على أبوك واللي صار منك ياليت معاد ينعاد وفكري بعقلك قبل اي شي تسويه وعناد الي متعليه على العيشه معاه الحين بيفكك منه
واشر لها تقرب تسلم على أبوها ويطلع وهو مطمن عليها يوم علاقتها تزين معاه ويبي ينهي ذي المصيبه ...

قربت من أبوها وسلمت عليه وضمته وقالت : بابا والله كذبت بس عشان اطلق منه مثل ماقالك ورفعت يدها وطالعت عناد وقالت بصدق اقسم برب الكعبه اني صادقه ياعناد واللي سويته كله كذب حست بنظرة عناد تحذرها عشان أبوه مايشك
بشيء بينهم فهمت عليه وقالت بصوت ضعيف ويأس انه يصدقها مهما حلفت لعناد ماراح يصدقها : بابا آسفه مافكرت انك بتعصب كذا وتكفى سامحني
أنت عارف بنتك ماراح تسوي كذا وبتردد حطت رأسها على صدره مثل أول يوم تجي تطلبه شيء وتدلع عليه وقالت بهمس ودموعها تنزل :بابا دلوعتك ماتردها صح مثل ماكنت تقول ..
سكتت وهي تشوف أمها داخله عليهم ..
وعلى طول قالت وهي تطالع عناد
بصوت مكسور : لا تفضحنا عند أمك نخيتك مافينا على كلام الناس استر على بنتي تكفى يمه

ابتسم بسخريه وقال:مع الآسف باقي ماتعرفي عناد وبعدين على وشهوو افضحكم البنت كذبت عشان تبي الطلاق وسكت يوم قال أبوها : شوفي وشلون
الغبيه ذي وهو يبعدها عن حضنه كان بتضيع حالها عشان تتطلق من هالرجال اللي والله نادر وجوده
قد شفتي غباء مثل كذا

ام أميرة بصدمه : وش السالفة

عناد بسرعة اعطاهم ظهره وقال وهو يحس عمره مخنوق : يالله بحفظ الله

الشموخ
بسرعة وقفت بعد اللي سواه لها والله ماتخليه حتى لو هو مايبيها وبتجي معه وبتتحمل... لو يعذبها باليوم مية مره على المعروف الي سواه فيها وبترجع له كرامته مثل مانزل من قيمته عشان يحميها قالت بسرعة قبل يطلع : عناد

وقف من غير مايطالعها
قربت منه وتقدمت وقفت بوجهه وقالت وهي تمسك يده بتملك : والله وقدام أهلي أقولها انك رجال و صدق نادر وجوده مثل قال أبوي والحين تكفى ونزلت على رجوله تسامحني قدامهم
الله يخليك

انصدم حده توقع تفرح ..يوم فكها من السالفة والطلاق بعد بيطلقها وبيفضى لها الجووو مثل ماتبي ...
قال بسرعة وهو يرفعها همس لها :لاتنحني لأحد
همست له : أنت مو اي أحد

يكذب لو يقول مافرح من كلامها بس القلب مجروح منها قال بحده : حتى لو مين فاهمه وسكت شوي وهو يطالع عيونها اللي تترجاه مايتركها قال بوجع معاد ينفع خلاص والعيشه الي تبينها تتهني فيها

وسكت يوم قال أبوها : تستاهلي ضيعتي حالك الحين وشلون يرجعك بعد سواتك فيه وبقهر صدق ماعرفت اربيك وطالع زوجته صدقتي يوم قلتي بدلعك لها بتخليها ماتثمن حركاتها
أم أميرة للحين مصدومه وماهي فاهمه السالفة
قالت بقهر :ممكن اعرف وش صار
هز رأسه بقهر وقال : اتركها ياعناد وروح الله يحفظك وين ماكنت
وربي يسعدك يبه مع اللي تستاهلك وبنتي بعرف وشلون أربيها من أول وجديد

الشموخ كلام أبوها ذبحها يوم حسته تحرك بيطلع مسكت فيه وهي حالفه ماتخليه اي جنون كان برأسها يوم سوت سواتها عشان تخسر هالآدمي ...
قالت وهي تطالع عيونه الي كلها عتب همست له:طلبتك مثل مانقذتني توو كمل جميلك وتأخذني معك وربي الشموخ بدونك ولا شيء

قال بقهر من ترجاها له وبعد الفضيحه اللي سوتها : بعد وشهووو
الشموخ وعينها من أمها وأبوها :تكفى طلبتك ماتردني وخذ حقك مني مثل ماتبي بس تكفى لاتخلي أبوي يرجع يقلب علي

ماقدر يردها وشلون يقدر ياناس هو مسير
ومافيه يختار أبد قدامها قال بقهر من نفسه: انتظرك بالسيارة

وطلع وهويسمع أبوها يقول:كنتي بتضيعيه
من يدك ولو غيره معاد يقبل يخلي مره كذابه على ذمته ...بسرعة طلع وهو يقول ليتها كذابه بس ..إلا خاينه رفس كفر السيارة بقهر ليه ليه قبل ترجع له فتح بس سيارته وهو معصب حده مايبي كذا كان ...فزع لها عشان تعيش رافعه رأسها مع أهلها بعد مايطلقها ..وبعد يلم الفضيحه
اللي كان بتصير ...بس ماتوقع تطلب تجي معه
صدمه له كان..ماعليه يأخذها معاه شوي لما تهجد السالفه وبعدها يطلقها وقتها أبوها ماراح ياذيها يوم يعرف انه طلقها..

بالمجلس
للحين مصدومه من الي تسمعه قالت بقهر :بنتك ذي من زمان قلت بتضيعنا بتهورها أولها زواجهابدون حفله
وبعدها رضت يوم جاب على رأسها ضره
والحين كان بتسوي مصيبه ودخلت شرف وكان بتروح حد فينا وبسرعه ضربتها على وجهاا بقهر
ليه ليه كل مره تقهرين قلبي كذا ليه ماطلعتي مثل أميره مايطلع منها إلا اللي يرضينا

الشموخ صاحت متالمه من الضرب على وجهااا طالعت أبوها تبيه يفزع لها
بس ماغير يطالعها بقهر ...صرخت بوجع : يكفي ماما والله معاد فيني خلاص أخذت جزاي وأكثر

صرخت منهارة وقالت: كنتي بتذبحينا من قهرنا وتبينا نرحمك

أبوالشموخ على قد زعله منها بس والله فرحان حده بعد ماعرف من عناد ان السالفة مدبره منها
قال وهو يشوفها تصيح حزن عليها : خلاص ياساميه اللي جاها يخليها تثمن تصرفاتها

الشموخ مسحت دموعها ونزلت رأسها وقالت: ماما آسفه وربي مدري كيف كذا فكرت

أم أميرة بعصبية : وش آسفه و الضرب اللي اخذتيه
وشوي وتموتتي بسبة كذبة ليه كذا سويتي بعمرك كله عشان ماتبينه كان جيتي وقلتي لأبوك مابيه وبيطلقك منه غصب عنه ولا تنسين جينا عندك لما البيت وقلنا لك اتركيه وش اللي تغير الحين وسويتي كذا

الشموخ توترت من كلام أمها قالت وهي تبلع ريقها : كنت أول ابيه بس يوم فضل علي عبير ماقدرت وطلبت يطلقني رفض

أم أميرة : طيب رفض تعالي وقولي لنا ماهو تكذبين

قالت بسرعة : كنت اقولكم تمثيل بس رفضتم تصدقوني مافي إلا أميرة صدقتني لأنها تعرف

أم أميرة بصدمه : تعرف وخلتك تسوي كذا

الشموخ بكذبه : ايه عشان انقهرت يوم تزوج علي وقالت تبي تفكني منه

طالعت زوجها وصرخت بقهر : بناتك ذولا بيجيبون أجلي بس قالت بشك : ليه تزوج عليك طيب

الشموخ أمها مارآح تمشي السالفة مثل أبوها قالت وهي تذكر عذره اللي توه ذكره لأبوها :عشان تعليت على عيشتي معاه قام راح جاب وحده يقال يكسر رأسي وقتها عرفت اني ماراح انفك منه إلا لو كذبت بس بعدها عرفت ان مالي عيشه بدونه والحين أبيه خلاص

أم أميرة : الدنيا فوضه عندك مره ماتبينه ومره تبينه أنا خلاص عجزت منك بس والله كله منك ياراشد طول عمري اقولك يكفي دلع لها شوف الحين وش النهاية

أبو أميرة بقهر قال بتحذير :اهم شيء الحين
لا تقولين ايش قلتي لي بالضبط والي صار
عشان ماتوقع راح يسامحك مافي رجآل يتحمل
فاهمه

الشموخ آه لو تدري يبه بس قوت نفسها وكملت تمثيلها وقربت منه وقالت وهي تضمه : بابا مستحيل افضح نفسي قدامه واقول اللي قلته لك يكفي كنت بخسرك
أبو أميرة بقهر : والله ينخاف من لسانك وتهورك

الشموخ ودهاتطلع و تروح لعناد وذي السالفة تتسكر قالت :بابا تكفى سامحني

أبو أميرة بحده : ماوعدك بعد اللي صار منك اسامحك

الشموخ بغصه : بابا والله كذب طالعت أمها بفرحة يوم قالت الحمدلله يا راشد والسالفه شيء من رأسها ولا كان مصيبه وحذرت عليها مثل ماقال أبوك لايوصل له ايش صار بالضبط حنا يالله مشينا اللي صار
بس هو ماظنتي والله ماغير يرميك قدام الباب ولا بيسأل عنك

الشموخ تسمع لهم ماتدري وشلون تشكر عناد نقذها ...من عيشه ماتدري وشلون بتكون
طول عمرها بتكون ممنونه له قربت من أمها وضمتها وهمست لها: تكفين ماما سامحيني وخلي بابا بعد يرضى عني ورفعت نفسها وهي تمسح دموعها يالله عناد ينتظرني وبرجع ازوركم بس أتمنى تستقبلوني

وبسرعة طلعت وهي تحس عمرها بحلم ..يالله بدقايق تغير كل شيء .. دخلت مذلوله طلعت رافعه رأسها قدام أهلها صح قدامها عناد و عقبه كبيره بعد ..انه يقدر يصدقها ..بس خلاص بتضحي لآخر يوم بحياتها اهم شيء تكون معاه ...ومتأكده انه يبيها بس اللي خايفه منه انه مايسامحها طول ماهي عايشه معاه ... شافت أميرة قدامها بالصالة والقلق واضح عليها على طول قربت منها وصرخت : وش صار معك قلبي بيوقف والله لدرجة ماما ماقدرت تتحمل وطنشت تهديد بابا وراحت لك
الشموخ ابتسمت بألم تطمنها وبسرعة قالت خايفه امها تجي وتسألها : اسمعي عناد نقذني وبعد كذبت فيك وقلت اني متفقه معك عشان اكذب بالسالفة الي تخص اخو تغريد وساره

أميرة بصدمه :ايشش

الشموخ سمعت صوت أمها وهي تنادي على الخدامه قالت بتوتر: أميره أمي اي شيء
تسألك هوو قولي ايوه كنا متفقين لما بس ادق عليك وافهمك باللي صار كله الحين مايمديني عناد ينتظرني برا شافتها معترضه رفعت يدها ومسكت وجهاا وقالت بهمس تكفين عشاني تحملي

أميرة للحين مصدومه حدها من اللي تقوله قالت: وشلون
قالت بسرعة : سوي اللي طلبته منك بس

أميرة هزت رأسها وقالت : طيب واللحين أبوي ردك له

هزت راسها بلااا: لا انا طلبت منه يرجعني

أميرة بصدمه : وشلون وانتي طالعه وتقولين ماتبين ترجعين له

الشموخ قالت وهي مستعجله : اوه أميرة سالفة طويله بعدين ادق عليك وأقولك ايش صار بس تكفين لا تنسين سوي اللي طلبته منه عشاني والله كنت شوي وأموت

أميرة بقلق: الله يعيني بس على بيصير الحين أبوي وأمي بيزعلون مني والله

الشموخ بحزن عليها ضمتها: ماعليه يا قلبي تحملي عشان أختك حبيبتك كنت بعيش مذلوله طول عمري ترضين لي

أميرة هزت راسها وقالت بحب : لا والله ويالله بابا وماما مقدور عليهم وخلي بالك من عناد ترا يستاهل تضحي بعمرك عشانه ونزلت رأسها وقالت بحزن اتمنى تحضرين خطبتي يمديك ترجعي
الشموخ ابتسمت بألم خطبتها مابقي منها شيء
وهي خربت كل شيء قالت بأمل : ان شاءالله اخلي عناد يرجعني الاسبوع الجاي ....

أميرة همست بحزن : ان شاءالله

الشموخ دموعها نزلت ماتدري وشلون ظروفها بتكون وقتها ...بسرعة ابتعدت ورقت الدرج ودخلت غرفتها وأخذت شنطتها ورتبت اغراضها بسرعة ولبست العباية ونزلت بسرعة سلمت على أمها وأختها وأبوها اللي تحسه للحين زعلان وسلم عليها بجفاوه ...عكس أمها اللي ضمتها وصاحت
وطلبت منها تسامحها على الضرب اللي ضربتها
ابتعدت عن حضن أمها وقربت من أبوها ورجعت حضنته وقالت ودموعه تنزل: متأكده يوم اطلع من هنا بتقول سامحتك يادلوعتي تكفى سمعني فيها قبل اطلع بس حست انه مارآح يقولها ابتعدت عن حضنه وطلعت ...وهي تصيح مسحت دموعها وهي تشوفه جالس بسيارته حمدت الله انه ماخلاها ...لا اخر شيء ماخذلها ياعالم ماتدري وشلون تشكره طلعت السيارة وهو على طول حرك
جت بتتكلم وتشكره بس على طول قال وهي تحسه قرفان : ولا كلمة

هزت رأسها احترمت اللي طلبه وماقدرت تفتح فمها ... اصلاً خلاص يكفي انقذها مالها وجهه تتكلم ....أو تزعل لفت بعينها له شافته يسوق وهو معصب حست بقلبها ...وجعها على ..نفسها رجعت منذله له مايبيها بس والله لو تموت ماتطلع من جزاه .. طلعها من جحيم بتعيشه كان طول عمرها ...
كلها نص ساعة وقف عند الفندق نزل جت بتنزل وراه قال بسرعة :مكانك لا تنزلين بنهي حجزي وبأخذ اغراضي وبنمشي

همست :تمام
سندت رأسي على المقعده
وأنا احس بوجع بجسمي كله كشرت بألم .. يوم
جنبي رجع يضرب علي ...من قوة الرفسه اللي أبوي اعطاني هي ...الله يسامحك يبه ماقصرت فيني ...طالعت عناد وهو طالع من الفندق
يمشي وهو معصب حده ...يالله قد ايش تحس عمرها ثقيله عليه ... حرام اللي سوته فيه وفي عمرها ...أول ماركب السيارة ...قفلت عيونها وسندت رأسها ..وهي تدعي الله يقوي قلبها على الي جاي عارفة عيشتها صعبه حيل معاه وبتعاني وراح تصبر وثبتت ...له انها صادقه ..وقتها متأكده بتعيش ملكه معاه وهي قادره ترجعه لها ...آه وشلون مع وجود عبيررر ..ايه مالها دخل بعبير وبتعيش حياتها بدون ماتفكر بوجودها ...
وبترضى بقليلها اهم شيء ماتخسره ... وتخلي ذا العنيد يصفى قلبه عليها ..
طالعته بصدمه يوم قال :اسمعي قبل كل شيء لا تظنين أني ساعدتك حب بوجهك لا بس عشان كرامتي كارجل لأن بنزل بنظر أبوك يوم خليتك على ذمتي وأنتي مسويه سواتك الوسخه
وبعد شفقت على أبوك وشلون يتحمل يعيشك عنده وبنته كذا مسويه بس مع الآسف جيت اصلح الموضوع واطلعك من الي انتِ فيه تدبست في الآخير كنت ودي تثبتي على طلب الطلاق وخلاص ينتهي كل شيء ويكون سبب الطلاق عشان كذبك على أبوك ماهو الفضحيه اللي سويتيها

الشموخ
وجعهاا حيل ياناس صعب تعيش مع أحد وأنت تحس بعمرك ثقيل عليه وعارف أنه ماهو طايقك بس هي حبت ترفع رأسه قدام أهلها وسوت كذا عشان تثبت لهم انها غلطانه وتبيه وراضيه فيه وهي فعلاً تبيه ... صبرت نفسها وهي تقول تحملي الشموخ تحملي ذا عناد اللي سوى معك معروف
بس انصدمت حيل يوم كمل كلامه وقال : اسمعي هي فتره بسيطه بس حتى أبوك يهجد وبعدها
تقلعي له وأنا بطلقك اهم شيء بعدها اعطيه سبب مقنع غير اللي هبتتيه الحين ولو مره اثبتي لي
أنك عاقله وتفكري بعقل وصرخ بقهر وشلون وشلون كذا تفضحيني وتروحي تقولي كل شيء
عجبك يعني اللي صار ... عجبك ضيعتي ثقة أبوك فيك لدرجة أجرم فيك اتوقع مافي شي بعظامك سليم سكتتت مايبي يحسسها بشفقته عليها اخخخ دايم قلبه يفضحه عندها

الشموخ بلعت ريقها بخوف وقالت: أنت طلعتني من طوري ومعاد فكرت من كثر الضغط وتهديدك قلت يمكن ارتاح وأبوي يصدقني بس طلع كلكم نفس بعض

قاطعها بصرخه : مهما كان مايصير تقولي المصيبه الي مسويتها مابيها كان تطلع من بينا عارفه اللحين ابوك لو ماصدق الكذبه كان ايش موقفه قسم بالله كسر قلبي عليه

سكتت ماتكلمت حسيت لو تكلمت بيرميني برا السيارة ..معصب حده ...أول ماقربنا نطلع من جدة قلت بتردد: ليت قبل نرجع الرياض نروح عمره
مارد علي رجعت قلت برجى : عناد ودي بعمره معك
سكت يوم طالعني وقال بقساوه: يوم اردك لأبوك روحي معاه
صديت عنه ...ومارديت عليه مسكت على جنبي
أحسه الوجع قوي مره مافيني اتحمله طالعت حولي دايم اشوف حبوب صداع بسيارته بس الحين ماشفت سألت بتردد : فيه مسكن معاك بس طنشني ومارد علي
حطيت يدي على جنبي وأنا اسمي الله واهمس بيني وبين نفسي ( بسم الله الذي لا يضر مع اسمه شيء في الأرض ولا في السماء وهو السميع العليم )
((اللهم رب الناس، أذهب الباس، واشفه وأنت الشافي؛ لا شفاء إلا شفاؤك، شفاء لا يغادر سقماً))
حاولت اقفل عيوني يارب انام وانسى ذا الوجع
بس أبد ماهجد ...الله يسامحك يبه كان قوي ضربك لي واحس من الجلسه زاد علي نزلت يدي و نزلت المقعده وتمددت وأنا احط يدي مكان الوجع وارجع أقر عليه يارب يخف .....