رواية جيت مابيك تحقرني جيت أبيك تعز شاني الفصل السابع والثمانون 87 - بقلم r010ee

رايحه جايه بالصاله تنتظر ...بقلق وش يطلع مع أخر الجنون اللي بيسويه .. شافت الخدامه طالعه تركض من المطبخ وقفت بطريقها وقلت : ايش فيه

قالت وهي مستعجله : بابا صقر دق الحين طلب نجهز المجلس وبسرعة خلتني وهي تنادي ميري تلحقها

عضيت شفتي يعني سوى اللي برأسه ...مدام
عمي طلب يجهزون له المجلس ...
طالعت جوالي بيدي يوم رن شفت رقم عمي رديت بسرعة وقلت بقهر : يعني نفذ اللي يبيه

قال بصبر :وش نسوي وربي الدكتور رافض ويقول اي انتكاسه يتحملها هوو

اصايل بخوف : وشلون

قاطعها وقال وهو يشوف اخوياه يدفونه بالكرسي : الله يلطف فيه والحين اشرفي على الخدم قد اعطيتهم خبر يجهزون المجلس من كل شي ضيافه وبعد تصرفووا بسرير له من أي غرفه من الغرف

هزيت رأسي وقلت بصبر : ان شاءالله
بسرعة اتجهتت للمجلس وقفت معاهم نظفووا المجلس وفضوو مكان للسرير ..طلعت من المجلس ورقيت الدرج عشان السايق يدخل ويأخذ السرير ... قربت من عادل اللي يصيح رضعته وأنا للحين مصدومه ..وشلون عمي طاوعه تسذا ...آه يااصايل وشلون بيقنعه كانك ماتعرفينه ...نيمت عادل وبسرعة أخذت دش ...وعدلت نفسي .استعداد لأستقباله ..ونزلت تحت دخلت المطبخ سويت القهوة ونانوو رتبت الفناجين وحطت الحلاوطلعت فيه للمجلس ..
وكلها نص ساعة إلا عمي جاء وقال بسرعة بعد مارد السلام : وصل مصعب

اصايل قربت منه وقلت بقلق: عساه طيب وماتعب من مشوار السيارة

قال بغبنه : والله اتعب نفسه واتعبنا معاه الله يهديه

قلت بحزن عليه : طيب كيف الحين بالمجلس وتمدد و...

قاطعها وقال: تطمني اخوياه معاه وماراح يتركونه
ودها تقول له بشوفه بس خجلت يوم قال اخوياه مصيرهم يروحون وتروح له ...

زفر بتعب وقال : بأخذ دش وبرجع المجلس
يابوك جهزتي القهوة

قلت : كل شيء جاهز بالمجلس
طلعت غرفتي بنتظر لما يروحون اخوياه وبروح اشوفه ...والله يعيني على مزاجه ....

======
==
بالمجلس

قال وهو يزفر بتعب : ثور ماهو ادآمي
كسرت ظهري الله يآخذك ...

ضيق عيونه بقهر وقال :منيف حبيبي لا تستغل رقدتي واجد ترا والله لا اقوم لك

منيف طالع سامر وقال : تتوقع يطلع معاه شيء هالمكسح وضرب على رجله وابتعد لنهاية الغرفه
وضحك بصوت عالي مستفز وهو يسمع صرخة مصعب اللي كلها وجه

سامر نقد عليه وصرخ بعصبيه : ي غبي وش سويت هيا شوف الحين كيف وجعته وقرب منه وقال بقلق مصعب ...

منيف بتشفي : يستاهل ياما طرحني خله يذوق

مصعب عض شفته بقهر وقال وهو متوجع : ودي اعرف وش عرفك اني بطلع ونشبت لي كذا

منيف جلس وأخذ حلاوه من الفازة وصب له فنجان قهوه وقال : والله أبوك يقول دق على عادل وصرفه ومافي إلا أنا ماقدرت ارده وطبعاً بعدها تدبست
و أخذت خوينا سمور وجينا ضرب كتفه سامر تعبك مصعب وأنت توك جاي السفر ماعليه أجر وأنا أخوك

سامر قال مستغرب وهو يطالع مصعب : غريبه عادل تعذر أبوك وبعد ماله أثر أبد توقعت مايفارقك

منيف طالع مصعب بعتب ومثل الي يقول
رد لو تقدر ...
مصعب حس بضيق أكثر من اللي هو فيه
مايبي سامر يدري وش بينهم وده يذبح منيف على لسانه المنفلت ...وأكثر شيء قهره يوم قال عادل صرف أبوه طيب ضروري يوصل حسبي الله عليك يالفتان ... قال وهو يغير السالفة : خلي بس عندك ذوق وضيف سامر بدل ماتبلع لحالك

سامر بسرعة قال: مصعب ماني غريب صاحب بيت ولو ابي بصب لنفسي أنت بس قولي اللحين مرتاح

مصعب هز رأسه :الحمدلله

وقف وقال: يالله منيف نخلي مصعب يرتاح
وبعدها نرجع ومعانا عادل الجلسه بدونه ولا شيء

منيف وهو يتلذذ بالحلا: ياخي شوي خليني اشبع وبعد برتاح كسر ظهري ذا

سامر جلس وقرب منه وقال بهمس : مصعب أبد ماهو طايق نفس امش ساكت قبل يطردنا وشكلنا وقتها بيكون فشله

قاطعه وقف وقال: يسويها عديم الأخلاق والله ورفع صوته وقال بنجي بكره لو امدانا

مصعب بقهر منه : لاتعب نفسك

منيف بخبث : ولوووو أنت حبيبنا

سامر همس له : امش ساكت

طلعووا شافوا أبو مصعب جاي يمهم قال بسرعة : ماجلستم يبه حلفت ماتروحون العشاء شوي ويجهز

قاطعه منيف : لا والله ماتحلف ولا تكلف نفسك
عشانا أم منيف مجهزته لولدها بالرضاعه وطالع سامر تحبه أكثر منا بس معاد نقول إلا الله يطول بعمرها
سامر بقهر : امش شوي وتشرح له حياتك

أبو مصعب ابتسم على كلام سامر وقال : مدام أمك متعبه نفسها الله يحفظكم ويحق لها تحب سامر محترم وحد يطول يكون عنده ولد مثله

سامر بخجل قال: تسلم والله

منيف قال بسرعة : لا لا والله اللحين اثبت لي انك ساحر بسرعة أبو مصعب حبك ... وهو أول مره يشوفك ...
سامر مسك يد منيف ومشاه معاه وقال بصوت عالي : مع السلامة ياعم وهمس بقهر كذا قدام اي احد تطيح الميانه

ابتسم لهم ورفع يده وقال : الله يحفظكم ودخل على ولده وهو يتأكد من نومته على السرير قال بقلق وهو يحط يده على كتفه : عساك بس مرتاح

هز رأسه وقال: الحمدلله مرتاح

ابتعد عنه وجلس مقابل له صب قهوه وشرب
شافه صد وقفل عيونه ...أفضل شيء يطلع
ويخليه ينام ...اللي صار ماهو شوي عليه
الجهد اللي بذله أكيد اتعب جسمه ..وقف بيطلع بس طالعه يوم قال: يبه دق على اصايل تجيب عادل

أبو مصعب : ابشر يبه الحين ومن اصله هي تحتري بس اخوياك يطلعون

رفع جواله ودق عليها ...وفعلا كلها دقايق وجت

اصايل
على طول طرت يوم عمي قالي بلحاله
أول مادخلت قربت منه وقبت بهمس : الحمدلله على السلامة هز رأسه وقال الله يسلمك وعينه من عادل مد يده وقال بحب : هلا والله بحبيب أبوه

طالعت عمي يوم قال: يلا اخليكم مع بعض

قلت بسرعة : لا تقهوى أول وبعد ميري الحين جايبه العشاء وخلينا كلنا نتعشى مع مصعب اليوم وطالعت مصعب مابيه يكسفي ودي اشوف علاقتهم تكون زينه واقربهم من بعض

جلس عمي وقال: يالله دقي عليهم خليهم يعجلون بالعشاء وراي مشوار

طالعت مصعب اللي ابتسم بسخرية مدري وش قصده بذي الإبتسامة ... هزيت رأسي وقلت :
ان شاءالله وطلعت وبنفسي شرفت على العشاء
ورجعت المجلس والخدم وراي ...حطيت لمصعب
عشاء على الطاولة جنبه ...وقلت وأنا ارفع الملعقه : يلا سم وهاتي عادل عنك
بس رفض يمد يده وقال ببرود يقهر :مابي

طالعت عمي اللي قال : تعالي يبه تعشي وهو وقت مايبي بيأكل ...

جلست مقابله عمي على الأرض
وجلسنا نأكل طالعت عادل يوم بدأ يبكي جيت بقوم بس رجعت جلست يوم قال بحده: خليه
اعرف له

طالعت عمي وقلت وأنا أستفز مصعب :شكلي بشغله داده لذا الاقرع والله

ابتسمت على ضحكة عمي العاليه وقال : يأبوك كأنك تتريقين علي

عضيت شفتي وقلت بصدق:قد قلتها والله أخذ منك القرعة

رفع يده وقال: اوش اوش لاعاد تجرحيني بس

اصايل ابتسمت له ياناس بديت ارتاح له وعلاقتي تضبط معاه وطلع حبيب أفضل من ولده ذا المعصب دوم ...طالعت مصعب بطرف عيني احسه ماهو عاجبه علاقتي مع أبوه بذات يوم قال: لو خلصتي أكل تعالي خذيه

هزيت رأسي بعجز تعبت افهمه من تو رفض واللحين يبيني أخذه قلت بعناد وأنا اغرف لعمي زيادة :ماعليه تحمله شوي هذي شغلتك من اليوم ورايح ولا أعطيك رأتب على الفاضي

مصعب انقهر من استفزازها له قال بعصبية :احاول اضحك على سخافتك بس مافيني والله

اصايل رفعت حاجب وقلت : ليه ياخي اضحك وطالعت عمي وقلت ولدك يبي عيال مايبي يربي

أبو مصعب قال: خافي ربك الرجال مكسر وين يقدر يربي

وقفت وضحكت وقلت : في ذي صادق والله
ويلا نعتبره ذي الفترة إجازة ويرجع لشغلته بس يقوم بالسلامة ...
ونزلت وأخذت عادل بس ابتسمت بتشفي يوم قال
: مسويه ظريفه

طنشته ورجعت قابلت عمي وأنا مخليه عادل بحضني ...بس انصدمت يوم الجوهرة دخلت وقفت قدام الباب وقالت بصوت عالي : ماصدقت يوم سألت عنكم ميري وقالت لي بطلعتك وقربت من مصعب وقالت وهي تطالعه بحقد وبنفس الوقت شمتانه حدها فيه: الحمدلله على سلامتك ومدت يدها

حسيته انصدم من جيتها وبنفس الوقت عصب بس اعجبني صد عنها ومارد عليها وحتى طنش يدها الممدوده طالعت أبوه حسيته توتر ...من حقه مافي حد يتعب من مشاكلهم مثلي ومثله ... الله يعينا

الجوهرة قالت بقهر : من الذوق ترد السلام
ولا هذا جزاي جايه اطمن عليك وعلى الحالة الي وصلت لها وهي تطالع رجله المجبسه بتشفي ....

اصايل اللحين أنا اللي توترت حدي لا يعصب ويصير فيه شي قلت بقهر وأنا ابعد طاولة الأكل لا يمد يده ويهفها بالصحن : خلاص مارد عليتس فارقي تكفين مافينا

بس الزفته سفهتني وقالت وهي تطالع عمي : الحمدلله على سلامة مصعب ي صقر فرحت بطلعته بس ولدك الله يسامحه ...

أبو مصعب قال بجمود: الله يسلمك وقال بشك من تغيرها ذي الفترة ..وينك فيه من الظهر ماشفتك

الجوهرة ابتسمت بقهر متغير الشايب عليها تحسه
ولا الزفت الي ذي الفترة يمشي معاها لاعبه بعقله ...المخرف ...اف الحين ماهو وقته أبد الحين لازم تتطمن ان السي دي طار ولا مصعب باقي ماسكه عليها بس اللي تحسه انه مايملك شيء والقهر اللي فيه أكبر دليل قالت بتصريفه : وش اسوي جالسة عند سوسو
الله يسامح اصايل أمس غلطت على عبير وقالت أمك خطافة الرجاجيل واليوم دقت علي تشهره وتبي تفهم وش قصدها بذا الكلام ورحت لها وحاولت أعتذر فضحتني بصديقتي ...

اصايل انصدمت ماتوقعت تقول كذا طالعت عمي اللي وجهه انخطف ...وطالعني بعتب.. وزعل لا لا مابي علاقتي تخرب معاه بسبة هذي الخبيثه ...طالعت مصعب اللي شكله عصب وقال والقهر واضح بصوته :تعبان بنام

الجوهرة بسخرية :كأن ولدك طردنا ياصقر

اصايل ودي اذبحها ثقيلة الدم ...عارفة العقرب وش ناويه عليه ترفع ضغطه وتطلعه من طوره وتدري فيه ماراح يقدر يقوم لها بحالته ذي عشان كذا مأخذها راحتها الجبانه..

مصعب وده يقوم يذبحها قال بثقه وهو يبتسم : قريب قريب ان شاءالله تنطردي ماهو بس من البيت من الدنيا كلها وقولي مصعب ماقال

الجوهرة
حست الدنيا لفت فيها من كلمته بسرعة انسحبت تأكدت الحين ان السي دي عنده ياويلي على حالي

اصايل
بعد ماطلعت الزفته وعمي طلع بعدها قربت منه وقلت وأنا ابيه يروق : طنشها ماعليك فيها

مصعب قال بعصبية : ليه كذا قلتي لعبير

اصايل بلعت ريقي وقلت بتوتر: تكذب ماعليك فيها

مصعب صرخ : وش تكذب

اصايل بسرعة قلت : مصعب توك طالع و ...

قاطعها وقال: اصايل قولي ليه قلتي كذا يعني حابه تسوي مصيبه ولا آيش ومن متى تسوي فتن ماعرف ان ذا الطبع فيك

قلت بقهر : يعني أنت اللحين بتقنعي يهمك مشاعر الجوهرة لو درت بزواجه

قاطعها بصرخة : بحريقة تحرقك أنتِ وهي بس أبوي مابيه يكون موقفه كذا ضعيف قدامها الزفته

اصايل اخس يا البار أفضل شيء عشان يروق نعطيه ذا الاقرع بسرعة حملت عادل وحطيته جنبه وقلت :انتبهه له لما الم السفرة بس

وبسرعة اعطيته ظهري ولميت السفرة وطلعت وأنا استنشق هواء اففف ...الله يأخذها اللحين ورطتني مع الأب وابنه ...رحت للمطبخ وبسرعة طلعت مابي اتقابل مع عمي منحرجه حدي ...جلست شوي بالحوش ابي مصعب يهدا شوي ...بس ذبحني البرد ..دخلت وأنا أقول بتوتر : حيا الله أبو عادل تووو مانور البيت وربي فرحانه حدي بشوفتك متعافي قدامي

بس سفهنني وجلس يبوس بعادل ...اخخ يافلشتي بس .. وش يقول عني اللحين ..جلست شوي بس حسيته ماهو طايقني أفضل شيء اطلع
جيت بقوم بس وقفت يوم قال :وين

اعطيته ظهري وقلت : ابيك تأخذ راحتك

مصعب رفع حاجب وقال : طيب وعادل

قاطعته وقلت :وقت ماتمل منه دق علي اجي له

مصعب ابتسم وقال: طيب للحين زعلان منك على اللي صار بالجوال أنا تشمتي فيني كذا وبعد تسوين فتن من وراي على أبوي وأنا اشوف علاقتك معاه كويسه حرام عليك كذا تخوني فيه

اصايل عضيت شفتي وأنا منحرجه وقلت : والله مايستاهل بس الغثيثه بنتها استفزتني وحدتني أقول تسذا يوم تكلمت على الشموخ وأنا مارضى حد يزعلها وسبحان الله مره وحده شفتها وحبيتها وربي تسذا دخلت قلبي واحسها مظلومة بينهم

عقد حواجبه وقال : الشموخ وش يعرفك فيها وين شفتيها ...

اصايل توني استوعب اني استرسلت بالكلام يالله وش هببت أنا مصيبه مصيبه ...وش يفكني الحين ... بلعت ريقي أكثر وقلت وأنا يالله أقدر أنطق : مره شفتها جت للجوهرة هنا

مصعب عقد حواجبه وقال بشك : جت هنا غريبة علاقتها ماهي كويسه مع الجوهرة وشلون تجي

يالله وش يفكنا اللحين قلت بسرعة:ايه شكلها مغصوبه على الجيه من ولدها عشان تدري أمه
وكذا وشكلها حبت ترضيه وتجي تزورها وقلت بتصريفه يالله ماعلينا فيهم اللحين طمني بس وشلون تحس بألم

طالعها شوي وقال :وعلى طول صارت صديقتك وصرتي تدافعي عنها

يالله مستحيل يمشي الموضوع بخير ..حاولت ابعد التوتر عشان مايحس قلت :وش اسوي حبيتها وارتحت لها من أول مره شفتها عكس الغثيثه بنت سوسو وربي ماتستاهل يجيبها على رأسها وبقهر صغرت عيوني كنت بتجيبها على رأسي

مصعب يحسها تكذب وتصرفه بالحكي قال :يالله ماعلينا وين شفتيها بالضبط المهم ورطتي الشايب

اصايل آه وربي عارفة مايمشي عليه اي تصريفه
وحاسه اني مكشوفه عنده قلت وأنا احاول اغير السالفة : ترى احسك شايف نفسك علي ليه كذا
طالعني بسخرية حسيت نفسي غبيه بالتصريفه اللي قلتها بس قلبي وقف يوم أشر لي اقرب منه قربت وأنا اقدم خطوه وأخر خطوه بس ارتحت يوم قال : عشان عادل بسامحك

اصايل طاح قلبي يسامحني على وشهوو بالضبط بلعت ريقي وجلست وين مأشر لي وصرت مقابله له
مصعب بوس ولده وقال بهمس وهو مقهور من خوفها وتوترها يحسها مفضوحه قدامه : ذي أمك ودي اذبحها ...

اصايل بخوف بس حاولت تقوي نفسها عشان مايكشفها أكثر ويشك : اسمعك ترى وبعدين لا تحش فيني عند ولدي تكفى لاتقسي قلبه علي يكفي قساوتك علي نزلت دموعي غصب عني من الموقف اللي صار من توو ومن خوفي منه لا يدري بروحتي للزواج بدون علمه ...

مصعب حس بحزن عليها من الي قالته قال :أنا قاسي عليك

اصايل ودموعها تنزل : حدك قاسي مصعب ماعمرك طيبت خاطري بشي ماغير محسسني انك ماهو بطايقني بكل لحظه حتى بذي اللحظه وانا فرحانه بطلعتك واشوفك قدامي

مصعب فتح عينه بصدمه ماتوقع تسمعه ذا الكلام وبذات ذا الوقت :اوف كله ذا بقلبك

اصايل مسحت دموعها تحس عمرها طايره من الفرحة وهي قدرت تنسيه قالت بخبث أكثر : ليه ماتحبني ودايم تشوفني أقل منك لهالدجة ماقدرت تتقبلني بحياتك

ابتسم لها وقال بحزن : افااا مين قالك اني ماهو متقبلك بالعكس أنتِ عندي شيء ثاني

قلت بفرحة : صدق مصعب

هز رأسه وقال : الله يسلمك شوفيني رديت عليك يالزعول

صغرت عيوني يتريق فيني حضرته والحين توه يتذكر يرد علي ماغير ماسكني تحقيق ...
قلت وأنا طايره من الفرحة اني خليته ينسى : ميته عشان ترد علي يالمغرور

مصعب ابتسم : مجنون ولا مغرور ماعرفت لك

اصايل ابتسمت وقالت : كلها فيك وقفت اقرب منه الأكل وقلت :يمكن الحين انفتحت نفسك للأكل وتنام قبل انجلط

ابتسم بسخريه وقال: لا تنجلطي
روحي نادي نانوو وهي تقوم بخدمتي ماني بحاجتك

اصايل يمه يمه شوفوا بس كيف قلب بسرعة أخذت نفس وهي تصير نفسها ماتبي تبدأ معاه مافيها على طولة لسانه قالت: ماشاءالله تفهم الكلام على كيفك
وقربت منه وأخذت عادل من على صدره خايفه يوجعه حسيته بيعترض قلت بسرعه : بنيمه جنبك
تطمن ماراح أخذه بس خايفه يعورك

هز رأسه وهمس : آسف لو قسيت عليك بس تدرين بعض مرات اعصب ومافي بوجهي غيرك اطلع حرتي فيه والزفته هذيك شوفتها نرفزتني وقلبت مزاجي إلا كنت مشتاق لشوفتكم أنتِ وعادل

انصدمت ماتوقعت أبد يقول كذا ويعتذر بس ودي كان اقوله ياسلام أنا الطوفه الهبيطه تبرد قلبك فيها بس ابتسمت له وقلت: ماعليك خذ رأحتك وهمست رقدة المسشفى شكلها خلته يعرف يحكي عضيت شفتي يوم قال : اعرف احكي من زمان بس أنتِ ماعندك ذوق بالكلام

اخخخ أنا اللحين اللي ماعندي ذوق قلت بسخرية : اسفين نتعلم الذوق منك
والحين بس ريح وانتبه لصحتك هذا اهم شيء وطلع الجوهرة من بالك شفته بيتكلم
قلت معترضه : مصعب تكفى لا تتعب حالك وترجع تتعب وقربت الصحن منه وقلت بهمس : سم
حسيت فيه قفل عيونه بألم يوم جاء يحرك نفسه

قلبي وجعني علي وقلت بشفقه : ليتك جلست شوي حتى تحسنت سكت يوم حسيته عصب

رفعت الملعقه وهمست : بساعدك

مصعب أكل شوي وقال: مابي خلاص شبعت

اصايل كشرت وأنااطالع الأكل مثل ماهو : ليه ماكلت شيء لازم تأكل عشان ترد عافيتك شوي شوف وشلون نحفت
مصعب هز رأسه وأشر على المويه قربتها منه شرب شوي وطالع عادل وقال: لو صار لي شيء انتبهي له

خافت حدها قالت برعب: وش تحس فيه
وربي قلت ليتك ماطلعت آه ماغير بتوجع قلبي عليك

مصعب يالله نشب فيها قال بسرعة : بنت بدينا بالتهول اقولك لو صار يعني الواحد مايضمن عمره

اصايل هزت رأسها بلاااا: وربي تحس بشيء صح حطيت يدي على صدره يوجعك شيء ورفعت يدي وحطيتها على رأسه يوجعك قولي وين بالضبط

مصعب مسك يدها وقال :وربي مافيني شيء
بس كذا اقولك احذري على عادل وبذات الجوهرة انتبهي منها وقفل عيونه وقال بوجع كنت اخاف عليك منها بس الحين بعد عادل اخاف تلعب لعبه وسخه مثل حركاتها دايم وتضرني به أموت والله وقتها

اصايل طاح قلبي قلت بصدمه: ايشش
مستحيل مصعب لا تكبر السالفه الجوهرة وش تبي في بزر وسكتت وأنا اتذكر سواتها فيني

مصعب قفل عيونه بألم وقال : ماتعرفيها وربي ذي تقتل بدم بارد مايهمها ....

اصايل حسيت فيه يتألم بس يكابر قلت وأنا عيني على كيس العلاج اللي قايل لي عنه عمي أخذته واعطيته المسكن شربه وهمست له : بالعافية يارب ونام الحين وربي كريم لا تفكر بشيء وعادل بإذن الله له ربي كريم يحفظه من شرها
وتطمن أنا مافارقه
مصعب بتحذير :حتى الخدم فاهمه ترى كلهم خاتم بيدها ويخافون منها وينفذون بدون مايفكرون

هزيت رأسي وقلت: تطمن نام بس أنت الحين
وفعلاً كلها دقايق وحسيت نفسه انتظم ...جاني وسواس ..اخلي الباب مفتوح كذا قمت وقفلت الباب بالمفتاح ورجعت تمددت على الكنبه جنب عادل وعيني من مصعب ..ماهو مصدقه للحين
أنه رجع البيت وبخير قدامي ويارب اشوفه
يقوم ويرجع طبيعي همست له الله لايحرمني منك
احس بوجوده الامان رجع لي بعد مافقدته الفتره اللي فاتت ..
قفلت عيوني ادور النوم بس رفض يجيني أفكر بكلامه معقول الزفته تأذي طفل ....بس مصعب مايقول شي إلا انه واثق منه يكفي أول حذرني
وماسمعت كلامه وكنت بروح فيها ...لو الله انقدني منها كان الله اعلم بحالي ....وبعد ياترى سالفة الشموخ مشت عليه ولا بيرجع ينشب لي فيها
....