رواية جيت مابيك تحقرني جيت أبيك تعز شاني الفصل الثامن والثمانون 88 - بقلم r010ee

وصلووا الرياض
دخلت الشقه ...وأنا اتلفت يمين يسار مابي أشوفها
..بس حمدت الله يوم شفت الصالة فاضيه ...والشقة هادئه ..حسيت براحه بسرعة تقدمت لغرفتي مابي اسمع منه ...اي كلمة توجعني ...قفلت الباب وفكيت العباية وجلست على السرير
وأنا اشوف الغرفه الكيئبه مثلي ...توقعت معاد برجع لها ...أستغفرت الله وقفت وأنا ودي أخذ شور ...حدي قرفانه ..تذكرت اني أخذت كل اغراضي وملابسي والدولاب فاضي ...والشنطه أكيد عناد حطها بالصاله ...وأنا ماودي اطلع من الغرفة ...بس اطريت اطلع ..أخذ الشنطه
كان ماله أثر معقول ...طلع ولا دخل غرفتهم ...
سحبت الشنطه... وأنا اهمس بغصه استخسر حتى يوصلها لغرفتي ..فتحتها وأخذت منها بجامه ... وبعدها أخذت شور ....
وطلعت وأنا اشوف وجهي بالمراية ...يالله عيوني منفخه وخدي الأيسر عليه اثار الضرب ...حطيت يدي مكان الوجع الي بجنبي ..تذكرت يوم طلبت مسكن وطنشني ...قلبي عورني والله عناد كان حنون مهما قسي علي ..بس الحين قلبه قسي على الآخر ...
أكيد مقهور ليه احرجته وطلبت يرجعني ... احسني جرت على كرامتي حيل ..هزيت رأسي وابتسمت بالم اي كرامه خلاص راحت من زمان.. حتى أهلك ماظنتي عاد لك غلا مثل ...قبل بعد اللي صار ...

ورجعتي له ...مدري صح او غلط هزت رأسها بتجننن خلاص رجعتي وبرضاك ...خليك قد الخطوه هذي ...سحبت المفرش واندست تحته ورجعت غطت نفسها وهي تحس بالبرد ...
يالله الجوو بارد حيل ب الرياض ..
عكس جدة بس جلست ...وماقدرت وجع جنبي رافض يخف حسيت بقلق ..لا يكون الضربه سببت لي شيء لا قدر الله دفيت المفرش وقفت ..وطلعت من الغرفة ...رحت للمطبخ وأنا ادور اي مسكن يهدي علي ذا الوجع ...بس مع الآسف ماحصلت
طالعت جهة غرفتهم وقفت ...احسني مغبونه حيل وقلبي نار شابه فيه ...بس تعوذت من إبليس مدام رضيت باللي أنا فيه احاول ابعد الغيره عن قلبي
بس تذكرت عناد قال فتره مؤقته ويطلقني ابتسمت بسخرية على نفسي مشيت بس حسيت
بالباب ينفتح طالعته بدون شعور حسيته انصدم بوجودي ...عضيت شفتي واتجهتت للمطبخ
بس مر من عندي وقال : سوي فطور بروح اجيب عبير

نعم .....نعم
اسوي فطور له ولعبير لفيت له وطالعته بقهر :تعبانه
مافيني وياليت لا تنسى تجيب لي مسكن معاك وأنت جاي بس سكت يوم قال وهو معطيني ظهره
: اشوف بس اجي وماحصله جاهز وطلع وقفل الباب

حسيت بقهر من تهديده ... أنا تعبانه حدي
مافيني اسوي ...له فطور هو والسنيورة حقته تراجعت وجلست على الكنبه بقهر افففف ...وش طلعني من غرفتي ...وقفت ورحت لغرفتي ..وتمددت على السرير وأنا اقول قلعتك أنت وعبير ..وش يطلع معاكم ...لوماسويت ...جلست اتقلب لمدة نصف ساعة ماجاني نوم وتذكرت موقفه معي وكيف ماقصر معي قدام أهلي ...تحاملت على نفسي وقفت ورحت للمطبخ....خليك أفضل منه يالشموخ
فتحت الثلاجة وسندت عليها يالله وش اسهل شيء اسويه يطفحونه يجعله سم بس أستغفرت وقلت عناد لا بس عبير ليته ...اممم اسهل شيء بيض واحط معاه جبن ...وزيتون ...ويخب عليهم بعد عصافير الحب ... تذكرت انه مايحب الشكشوكه
ابتسمت بنذاله... طيب عناد قلت تبي فطور ابشرر
بسرعة سويت لهم شكشوكه .. ..وطلعت الجبن بس بعدها رجعته بالثلاجه مايستاهلونه يكفيهم البيض
حتى شاي ماراح اسويه ...عضيت شفتي ..يوم سمعت صوت الباب يفتح لا لا مابي اشوفهم مع بعض ....
ليتني عجلت أكثر ولا اشوفهم ..بسرعة حضرته على الطاولة وبطلع بسرعة .... بس انصدمت يوم شفت عبير دخلت مدرعة وقفت بوجهي ..وجهااا أحمر... شكلها كان تصيح انقهرت يوم قالت: افف ايش رجعك ليه كل ماقلت بنفك ترجعي لي ايش اللي سويته بعمري عشان يصير فيني كذا وضربتني على صدري بقهر
دفيت يدها وقلت وانا بموت من غيضي : عملك الأسود سكت يوم شفت عناد دخل وراها

وقال بحده وهو يطالع الطاولة
وكأنه كاشفني: ماحبه

الشموخ مثلت الصدمه و قلت بدلع اقلد عبير : لا عناد ليه افتكرت تحبه افف تعبت فيه تكفى عشاني حتى لو ماتحبه والله سويته وأنا تعبانه طيب خاطري لو تأكل شوي منه ...
حسيته ارتبك ...اتجهه للطاوله ..وسحب كرسي وجلس وبدأ يأكل
ابتسمت بخبث وطالعت عبير اللي صرخت : تأكله وأنت ماتحبه كله عشانها ...
وراحت تركض غرفتها منهارة من الصياح
كشرت بقرف ...كنت احب الدلع والله بس كرهته بسبتها ...قلعتك ... عساك ماتفطرين طالعت يوم قال والعتب واضح بصوته : ليه كذا دايم تقهريها وش سوت لك اللحين

هزيت رأسي وقلت بسخريه : أبد ماسوت شيء
بس أخذت عناد مني

رفع حاجب وقال : عناد مايبيك ومايبي غيررر اللي طلعت تووو وهو يأشر للباب هذي أم ولدي فاهمه طول ما أنتِ جالسة بذا البيت تحترميها

الشموخ اصبري اصبري لا توضحي له أثر كلامه عليك سحبت كرسي وقابلته وقلت وأنا احاول اطنش كلامه داخلي مذبوح : لا تزعل بقابلك بدالها
بس رفعت عيني له يوم وقف وقال وهو يضرب على الطاولة بعصبيه : خليت المكان كله لك
ودف الكرسي بعصبيه

قفلت عيوني من صوت الكرسي القوي اللي ضرب بالأرض ..حسيت بقلبي انكسر ...دموعي نزلت غصب عني ...طالعته وقلت قبل يطلع : لو مت بتحزن علي
طالعها مصدوم من سؤالها بس قال بمكابرة
:وقتها معاد تجوز على الميت غير الرحمة

نزلت رأسي ...على الطاوله وصحت وأنا احس بذل
لمت نفسي ليه رديت له ...احسني استعلجت ليتني فكرت قبلها مدام اهلي مشت عليهم الكذبه ..
وقفت وأخذت الفطور اللي مانلمس غطيت عليه
وطلعت من المطبخ اتجهت لغرفتي وانا اسمع صياح عبير وصوت عناد وهو يقول .(فتره بس مؤقته وجودها هنا اوعدك ذي المره ويكون صادق ) .

همست بغصه ..بعد توعدها ياعناد ...حسيت مالي وجود بينهم ...أول مره احس بكره عناد لي ...لدرجة يتكلم فيني عند عبير ..مسكت جوالي حصلت مكالمة لأميرة
ماحبيت ادق عليها وتسمع صوتي وأنا اصيح وتقلق علي رسلت لها اني وصلت وبنام يوم اصحى ادق عليك .....

بعد يومين ...
نزلنا من بدري والثلج ينزل علينا الجووو خيال كان
طالعته وأنا مبسوطه حدي ضميت يدي في بعض وأنا احس ببرد وقلت بحماس : ياسر بالله جوها والمناظر الي فيها مايذكرك بالجنوب

هز رأسه وقال وهو يضم الجكت من برودة الجوو : ايه يشبهه كثير بس جنوبنا احسن هنا بردهم يذبح

شدن : لا والله في ذي ماصدقت هنا أفضل

ابتسم لها وقال :مبسوطه

هزت رأسها وقالت بصدق : مره مبسوطه
سكتت شوي ونزلت رأسها وقالت تصدق بنفس الوقت عارفة انها راحه مؤقته من اللي جاي تقدمها وقال بحده:شدن تكفين لا تبدين

عضت شفتها يوم حست انها نكدت عليه بس هي فعلاً خايفه ..بسرعة قربت حده وقالت بهمس : آسفه نكدت عليك

ياسر طالعها وقال :خليش واثقه فيني بس
والحين ياليت نغير ذي السالفة ونروح نفطر وهو يأشر على المطعم

كتفت يدينها وقالت: طيب ودي افطر كويماك

ياسر عقد جواجبه وقال: وش ذي بعد

شدن :اممم يتكون من جبن وطحين ذرة مشهورين بها أهل طرابزون ومدري كيف طعمها شفتها وحابه اذوقها

ياسر كشر وقال: تبينا نغامر ونطلبها وأنتِ بعد ماتعرفين طعمها

شدن همست :اوه نسينا عن بخله

صغر عيونه وقال : مدام شدن ارفعي صوتش شوي

شدن ابتسمت وقالت وهي تصرف :اطلب طبق ثاني جنبه لو ماحبينا طعمها عادي اهم شيء اسمنا جربنا

ياسر عض شفته بقهر وقال: الحين ذا اللي قلتيه من شوي

شدن وهي تضحك : ايه وتكتفت وهي توقف بوجهه ولا تبي تتبلى علي حضرة الدكتور

ياسر صغر عيونه وقال : دكتور ذي يوم تنطقيها احس الشماته تمشي الف من قدامي

شدن ضحكت بصوت عالي وقلت : سبحان الله المؤمن يحس

ياسر هز رأسه بعجز ومسك يدها وقال وهو يمشيها معاه :والمؤمن بعد دايم مبتلى ‏

شدن بغرور : احسن ابتلاء مدام ابتليت فيني
وطالعته يالله اجحد بعد

ياسر ابتسم وقال: وحنا نقدر نجحد

شدن ابتسمت بنتصار الحمدلله الرجآل بدأ
يصير مسير بيدي ...اللحين بديت اصدق كلام البنات عن أخوهم ...أخر شي اتخيله يويسر يدلعني ويسمع كلامي ...

أول ماوصلنا المطعم ...طلب الفطور
وأنا طول الوقت اصور اللي حولي وقلت بحسافه : اففف ليت فيني اقدر انزل بالسناب

طالعته مصدومه يوم قال : نزلي

قلت بسرعة : وأنت رافض وشلون

ياسر وهو يتسند على الكرسي :مصيره يعرف بوجودش معي وبعد بسفرنا

شدن هزيت رأسي وقلت بقلق : لا لا خلاص مابي انزل شيء بحفظها عندي ذكرة

ياسر هز رأسه وقال: براحتش

رجعت التهيت بالتصوير ..وبعدها شفته كذا يطالع
وهو مسرح وباله بعيد ...قلبي وجعني ياترى في ايش يفكر ..بس اعجبني شكله .. بسرعة لقطت له صورة انتبه لي ورفع حاجب قلت بسرعة ابرر : أول مره احب شكلك قلت والله ما افوتها قمت صورتك

ياسر عض شفته من تبريرها وقال بقهر : ليه ماتعرفين تحكين

شدن مسكت ضحكتي غصب الأخ انقهر قلت
:خلاص اسفين وربي حلوو وبذات شعرك ذا حاسدتك عليه

ياسر ميل فمه بسخرية وقال: معاد ينفع خلاص
والرجال ماهو مناظر مخابر ورفع حاجب بثقه

شدن يمه ياشينه هو وغروره هذا وأنا مدحت شعره بس ....أجل وشلون لو قلت انه وسيم ..دقايق وجاء الفطور ...
سميت بالله وأنا اشوف شكل الطبق طالعت ياسر اللي يطالع شكله مستغرب قال: هذا وشلون يأكلونه

قلت بضيق : ياسر خلاص كرهتني فيه والله أشرت لطبق البيض كل البيض ولا ذا بعد بتسوي ماتعرف له

ياسر طنشها ومد يده أخذ الخبز وجاء بيأخذ منه بس تمغطت قدامه قال بتكشيره : الله يديم النعمه
وبالعافية عليش وقرب صحن البيض وبدأ يأكل

شدن مديت يدي وأنا متحمسه لطعمها بس
والله ماحبيتها كثيرر احسها كلها اجبان مخلوطه
مع بعض و أكلها ...مره متعب ..يبي لها حد متعود عليها ..مديت يدي لصحن البيض وأكلت منه طالعت ياسر بقهر يوم قال : ايه حبيبتي خليش على اللي نعرفه

قلت وأنا مقهوره منه : حبيته بس قلت بذوق البيض بعد

ياسر طالعها بسخرية وقال: ايه واضح حبيتيها مره

شدن بطفش : خلاص بدفع لك قيمتها لا تجلس تذلنا

ياسر ضرب الطاوله بقهر : اخخخ يبي لش اعادت تهذيب وقرب الصحن منها وقال وربي حلفت لا تأكلين الصحن كلها

عضيت شفتي وقلت بمكابرة : بأكل بس أنت خلني على راحتي افف

تكتف وسند ظهره وقال وهو يراقبها : بخليش على راحتش بس لا اشوف فيه لو مقدار ملعقه وعليها تدفعين قيمته

شدن طالعت الصحن الله يديم النعمه بس ماحبيت طعمه مره قلت بسرعة : ادفع قيمته دبل بس تكفى فكني منه

ضحك بصوت عالي وقال: مره وحده دبل

شدن : ايه دبل افرح يالبخيل

ياسر سكت شوي وقال وهو عاقد حواجبه : تعالي تعالي من أول اسمعش كل مره تقولين بخيل واطنش ممكن أعرف وشلون حكمتي علي اني بخيل ولا إشاعة مثل عادتش

شدن سندت على الطاولة وقربت شوي وقلت : لا مو إشاعة صدق وب الدليل امممم تذكر ايام عرسي طلعت عيوني عشان توافق على الي ابغى وآخرها ذا الصحن اللي عيا ينبلع لي وأنت ناشب لي عشان دفعت فيه كم

ياسر قال بضيق : أولاً أكثر وحده أنتِ عارفة وشلون كان زواجنا وثانياً ترى ماهو بخيل وراح اثبت لش
وبطلع ذي الفكرة الباطله أخذتيها عني

شدن بحزن طالعت عيونه :ايه كان ماتبيني ليه ياسر كان تكرهني ايش السبب ممكن أعرف

ياسر بضيق : ما أكرهش بس ... كان أكره تصرفاتش

شدن : كذاب والله تكرهني لدرجة البنات يخافون يجلسون معي بسبتك

ياسر بسرعة قال وهو حزين عليها : وأنا عارف قد ايش انوجعتي وقتها عشان كنتي تحبيني

شدن بصدمه قلت وأنا أشر على نفسي : كنت أحبك هزيت رأسي بلااااا مين قال وربي كنت ماحبك واكره اسمع سيرة اسمك

ياسر وقف وقال وهو يقاطعها بعصبيه: يلا يلا قدامي الفندق لأبو من يسفرش ...

شدن عضيت شفتي وقلت بسرعة : وربي امزح
حسيته زعل ...وعصب بس ماسك نفسه ..قلت بصدق : بس والله الحين ماقدر اعيش بدونك ودايم ادعي لك عشان أنت الوحيد الي حنيت علي وانقذتني وطلعت احن علي حتى من أمي نوفه
اللي أبد ماعمري توقعت بتخلى عني ..

ياسر هز رأسه وقال: طيب يالله نرجع احس البرد دخل عظامي .... وحطي برأسش عمتي نوفه ماتخلت عنش بس انحطت بموقف صعب

شدن هزيت رأسي ومشيت معه ..احسني حزينه عليه كسرت خاطره ....ليه قلت كذا بس مابي اكذب عليه ...تذكرت كذبتي عليه أول وقلت له احبه وهو صدقني شكله وقتها ومسكها .... افف وشلون نسيت ليتني قلت ايه وفكيت عمري
...
مشيت وراه وشبكت يدي بيده ..حسيت مسكته لي باردة عكس أول ..انقهرت همست له: آسفه
بس مارد علي أحترمت نفسي وسكت ...
حسيت بالثلج ينزل بكثرة عن أول لدرجة الجكت حق ياسر تغطى ...قلت بصدق : ماودي ارجع البيت

قال بصوت متضايق : تعبان شوي شدن
ارتاح شوي وبطلعش

هزيت رأسي وقلت :اوكيه ...
أول ماوصلنا الفندق ...بسرعة ياسر جلس على ركبه قدام الدفايه ...وهو يفرق يده في بعض جلست على السرير اطالعه بحسره خربت عليه وعلى نفسي ..قلت :بردان مره احسك

سفهني وقف ...ومر من عندي وفتح الشنطه
حقته وطلع حبوب قلت بخوف : تعبان

هز رأسه وقال: شكلي أخذت برد برتاح شوي ويخف وتمدد على السرير وهو يسحب المفرش ويتغطى
خليته على رآحته ...وطلعت للصالة ...مسكت جوالي ...جلست اقلب فيه شوي ...حسيت بطفش وقفت قدام النافذه ..وأنا مستمتعه بالمناظر اللي حولي والثلج حكاية ثانية ..خساره ودي كنت برأ
ذا الوقت ...

فتحت عيني بصدمه وأنا اسمع حكي ابتسام
قلت : لا لا كذا فجأة

قالت بقهر : عواد استعجل والله وبسام كان راضي

شمسه : وين راضي ابتسام ناسيه مشاكلكم بسبب تأجل موعد الزواج

ابتسام : ايه بس بعدها رضي بس عواد أمس صدمني والله وقال اشوف وشلون تقدرين تثني كلمتي وصغرت عيونها بشك تصدقين شكيت في بسام هو سلطه علي بس شكلي بدق عليه وأتاكد

شمسه قلت بصدق:عيب عليتس والله تدقين عليه
بيحس انتس ماتبينه وأنتِ تسذوب تموتي فيه

ابتسام بقهر : آه من عواد جاي ذي المره وهو معصب على الكل

شمسه تذكرت زعلي منه ..واللي قهرني أكثر
مسوي الزعل له بذات ليه نمت عند ابتسام مسوي سالفه عليها وموضحه زعله على اللكل ...أول ماشفت ابتسام مسكت جوالها قلت :انصحتس ماتسوينها وخلاص وشهوله تأجلين تصدقين بعض مرات اشك بتس انتس ماتبينه

ابتسام عضت شفتها وقالت : مافي حد فاهمني والله
شمسه طلعت من الغرفة واتجهت لشقتي ودخلت شفت عواد بالصالة يتفرج ...اتجهت للمطبخ سويت قهوة وشاي وحطيت حلا ومكسرات وطلعت وحطيتها قدامه على الطاولة وجلست مقابله له وقلت : مفروض تعطي ابتسام خبر قبل ماتحدد الموعد ذا زواج ماهو لعبه ويبي له تجهيز
وكل شيء حجز
طالعها وقال ببرود : مالتس دخل

شمسه رفعت حاجب وقلت: إلا لي دخل ذي ابتسام حبيبة قلبي واعتبرها بنتي ماهو أختي بس

ابتسم بسخرية وقال: يا الأم الحنون لو رسلتس وهي عندها أمل تغيرين رأي قولي لها والله ولا ميلون شمسه يغيرون رأي

انقهرت من رده بس صدمني يوم قال : احذرتس ياشمسه ثاني مره ياليتس تساوي بالغلاااا لخواتي كلهن

قاطعته وقلت بقهر: تبيني اساوي حياة مع ابتسام لاوالله فرق فرق بينهم

بعصبية صرخ: وش الفرق بينهم وبعدين حياة اللي ماهي عاجبتس وربي مافي حد بغلاها عندي
ولو تبي حياتي معتس تستمر احترمي حياة ولا والله ثم والله مالتس مكانه عندي

مصدومه مصدومه حدي من كلامه قلت بهمس :يعني مالي مكانه عندك لهالدرجة رخيصه

عواد صد وقال بقهر من نفسه وشلون قال كذا :جاتس العلم وبس

شمسه حاولت ماوضح قهري منه طول عمري
ماعتبر له وجود مهما حاولت ابدأ معاه من جديد وقلبي يميل له ويصفى وينسى سواته يرجع بجرح أقوى وأقوى قلت ببرود ظاهري وأنا اميل نفسي شوي وأسحب صحن المكسرات : نفس المشاعر سبحان الله

طالعني واحس نظرته كأنه انصدم من ردي رفعت كتوفي وقلت وأنا امد له الصحن : تبي

هز رأسه وقال بسخرية : لا عليتس بالعافية
وقف وقرب منها ونزل نفسه شوي وقال: كل مره اصدق حياة أكثر وأكثر

دفيته قرفانه منه ومن سيرة أخته وقلت بعصبية :ماتهموني الآثنين ومدام بتصدق حياة خليها تنفعك

ضحك بستفزاز وقال :انتبهي بس على عمرتس وعلى ولدي لا يصير فيه شيء من كثر التعصيب

نزلت رأسي وصحت بضعف لا أول مره اوضح ضعفي له وأثر كلامه علي بس حسيت فيه يمسكني وهمس لي : افف ليه نوجع بعض الله يأخذني
مدري ليه افقد اعصابي بسرعة

حاولت ابعد عنه مابيه يشفق علي بس رفض وقال : والله آسف مدري وش فيني يمكن عشان اني مقهور منتس بسبب تطنيشك لي

احس كل مايتكم ازيد بصياحي بذات يوم قال : ليتني ماجيت شكل أفضل لي ولتس البعد

طالعته ومسحت دموعي وأنا ندمانه مابيه يشفق علي قلت بقلب محروق : الله يأخذ حقي منك ومن أختك
حسيته أنصدم من دعوتي قال بسرعة : ادعي علي بس على أختي لا يكفي اللي فيها ترى اليوم تطلقت
وعشان كذا أنا معصب بسبب زعلي عليها وجعتس بدون قصد

شمسه دفيته عني وقفت :أختك ظلمتني ودمرت حياتي معاك

عواد بسرعة قال: لا أختي مالها دخل أنتِ اللي ماتبيني وكل مره تدورين الزعل عشان تبعدي عني
تدرين هذي وشلون تذبح الرجال شمسه عارف انتس ماتحبيني ومغصوبه علي ...

شمسه مايستاهل ازود بالكلام معه قلت :قلتها توو أفضل البعد بيني وبينك لأني تآكدت الوصل بينا مستحيل مدام أنت تسذا تفكيرك

عواد ابتسم بألم وقال :طيب اعطيني مبرر يغير تفكيري

اعطيته ظهري وأنا معصبه ومقهوره حدي
بس وقفت يوم قال :والله ماستاهلك الله يفكتس مني قريب
طالعته وأنا مصدومه من دعوته .قربت منه وقلت بدون حس وأنا امسك يده : ليه تدعي بالبعد
بدل ماتمنى نكون مرتاحين

هز رأسه وقال : لانيي واثق البعد طريقنا مدام نفستس عايفتني

هزيت رأسي بلاااا: لا عواد بس أنت لو تفهمني وتبعد حياة عن حياتنا صدقني بنرتاح

حسيت وجهه انقلب كبرت عقلي وقبت بمحاولة أخيرة :تبي نفهم بعض وحياتنا تستقر هز رأسه بدون صوت بعض مرات اشفق عليه مدري ليه ويمكن عشان قلبي اللي بدأ يميل له ...شكلي من كثر مااعلق على اصايل وسميرة جالسه امشي على خطاهم آه يابنات أبو محمد ...كملت وأنا عيني بعينه : نطلع من هنا

انصدم ماتوقع تطلب منه كذا قال : تبيني اخلي أهلي شموس اطلبي غير ذا الطلب وأنا مستعد

شمسه عضيت شفتي بقهر وقلت: أجل والله مانشوف الرآحه واعطيته ظهري بدخل الغرفة
بس جاء وراي وقال :وش رأيتس نكبر تسذا عقولنا ونفهم بعض ونقول للهواش ابعد بعيد

رفعت حاجب وطالعته : لا بالله كذا نقول له بذي السهوله ابعد بعيد

ابتسم وقال : ايه تكفين ماترديني خلينا نجرب

ابتسمت وقلت بدون حس : يبعد غصب عنه

ابتسم عواد بفرحة وقال : عاشت والله بنت أبوها

شمسه تذكرت كلامه قلت وأنا ودي اكسبه بصفي وبحاول أنا معاد احيب سيرة حياة ومتأكده بكسبه : ترى بوضح لك شيء أنا ماعمري رفضتك أوكرهتك مثل ماتوقع لا والله
لك مكانه بقلبي مافي حد وصل لها وتدري فيني
لو كارهتك كان ماتكلمت ولا تقبلتك أبد

قاطعها بفرحة : صدق يعني ماهو حاقده علي

شمسه : من زمان صفيت لك وبعد لا تنسى جاي طفل بالطريق

قاطعها وقال وهو عاقد حواجبه: عشان الطفل

قاطعته وقالت بسرعة : لا عشان قلبي بس تكفى ترفق به ترى معاد يقوى تكسره .....

ابتسم وهو يحس بسعادة :مين يقدر يكسره بالله ياشيخه ماصدقنا نطوله ..... وأنا اعودك حياة معاد لها دخل وبعرف وشلون اوقفها عند حدها بس قبلها ياليت تحترميها ...

فرحت من قلب هي العقبه بينا ماعلقت ولارديت
.....

@
@
@
اليوم عمي كان مسوي عزيمة بمناسبة خروج مصعب ...وضيوف رايحين جاين يسلمون عليه
وبعد اخوياه ماخلوه ....جالسين معاه ...
بس اللي مستغربته شيء واحد وش دخل الجوهرة تعزم.... صديقاتها ... وبعد العزيمه عمي مسويها للضيوفه وللرجاجيل ... نزلت من الدرج بعد ماهدي الجوو شوي ...وخبرتني الخدامه ان كلهم راحووا ...بس نزلت شفت الزفته وجنبها سوسو
غريبة ذي بعدها جالسة ...ماراحت مع الباقي معقول الضراير ...متفقين يسهروا مع بعض ...رديت السلام وحطيت عادل على الكنبه وأنا اسمي عليه ...
وابتسمت بسخرية كان هذي لو شافتني تنشب لي وتمدح وتحببب فيني اليوم تشمق مالت والله
مسويه نفسها واو ...وهي خاينه ... بس بعد والله احبها عشان عرفت للجوهرة وقدرت تأخذ عمي صقر منها ...قربت منها تسذا بعناد وسلمت عليها
احسها سلمت علي وهي ودها تذبحني جلست
وقلت بسخرية :وشلونتس

رفعت حاجب وقالت وهي توقف وتلبس طرحتها : أنا بروح وبينا الوو جوجو اوكيه

الجوهرة ابتسمت لها : ابشري ياعمري
وطالعت اصايل بشماته فيها انها فشلتها وماردت عليها

اصايل ابتسمت بخبث ومديت يدي وسحبت صحن المعجنات وبديت أكل وأنا مستناسه على شوفة الضراير مجتمعين .... قلت بستفزاز : أجلسي باقي ماسولفنا

قالت الجوهرة وهي مقهورة منها : جايه تدورين مشاكل

اصايل هزيت رأسي وأنا مستمتعه بالأكل : لا بس جيت أسولف معاكم بس شكل سوسو مستعجله
حلفت عليتس تجلسي شوي بأخذ اخبارتس

طالعتني وهي ودها تذبحني بس تقربت من ضرتها جوجو وبوستها وع قرفت من الخداع والكذب اللي بينهم صدق مستنقع ...أول ماطلعت قربت مني الجوهرة وقالت بعصبية : لو رسلك مصعب عشان تستفزينا وتجلسي تستظرفي علينا
وتكرهين صديقاتي في بيتي لبعدك حبيبتي

قاطعتها وقلت بقهر من تفكيرها التافهه: الحين مصعب يرسلني لتس يقال هوو مايقدر يحوستس أنتِ وصديقاتس مع بعض ورفعت يدي يلا مابي اتكلم معاك ماهو ناقصه مشاكل مع زوجي بسبتس
صرخت بقهر : الله والزوج اللي كله عاهات

لا لا ذي زودتها قلت بقهر :ماغيرتس عاهه

صرخت بقهر وقالت وهي متجهه للمطبخ :متى ارتاح منك ومن رجلك

طنشتها ورفعت جوالي ورسلت لمصعب ( اخوياك باقي موجودين ) ثواني ورد عليه ( لا )
بسرعة وقفت ...وأخذت عادل ..وطلعت
الحوش ...وقبل ماقرب من المجلس لمحت خيال
خطف ...قلبي طاح تذكرت تحذير مصعب لي
بسرعة ركضت للداخل لأني ماراح أقول لمصعب وهو ماراح يقدر يسوي شيء بحالته ذي ...ابي السواق ولا عمي يتصرفون
دخلت المطبخ وقلت برعب وأنا مامسكه بعادل بخوف : نانوو بسرعة دقي على السواق شوفي مين وراء البيت ولا عمي

الجوهرة وجهاا انخطف ....وهي تذكر أولا من طب كان زيد معقول رجع طب بس ذاك اليوم بأمر منها
الحين وشلون يطب بدون علمها وش ناوي عليه تذكرت الكاميرا اللي مركبها مصعب
بسرعة تحركت وقالت برعب: شكلك تتوهمين

قالت بخوف وهي تذكر الخيال : لا لا وربي صادقه
وين عمي طيب بسرعة قبل يهرب ..

الجوهرة بسرعة قالت وهي تطالع الخدم : لا تقولون للسايق وعمك ماهو فيه طالع وطلعت وهي تقول : الحين بشوف مين وطلعت وهي تدعي على زيد الله يأخذه لو فعلاً هووو ...هذا حالف يورطها

اصايل حسيتها توترت معقول من الخوف ..طلعت وراها وأنا شاكه فيها ....وكلام مصعب ينعاد ...
معقول بترسل حد يأذي عادل ....مشيت وراها بس وقفت بتردد ...واتجهت للمجلس اركض خايفه على نفسي وعلى عادل ومافي هنا حد يقدر يحمينا بعد ربي غير مصعب ... بس وقفت يوم سمعت صرخة الجوهرة ....قلبي طاح
لا يكون سوى شيء فيها الحرامي ....صرخت بخوف وأنا اشوف ميري اللي جايه تركض على صوت الجوهرة بسرعة اعطيتها عادل وقلت بسرعة : اعطي بابا مصعب بس لا تقولين له طيب عن اللي صار واتجهت لوين ماراحت الجوهرة وأنا اصرخ : على خدامة الجوهرة اللي واقفه تطالعنا بخوف دقي على بابا صقر ... وبسرعة ركضت وأنا خايفه بس لازم اساعدها ..بس وقفت مصدومه وأنا اشوف عمي وسوسو ........ والجوهرة تصرخ منهاره وهي تقول : لا لا لا وفي بيتي بعد
.........