رواية حب جنوني الفصل التاسع وسبعون 79 - بقلم سوزان ليث

غرام... للعصر اجتني رونق شايله جمال يبجي كالت ... مسكت ماعرف شبي خاف يريد ينام

غرام... اخذته منها وحاولت انومه بس حسيت حرارته مرتفعه
بسرعه خابرت على جلال حتى يرجعني للبيت حتى اشربه دوه
وفعلا جلال رجعني اني ورونق وايمان للبيت
بس وصلت شربته دوه حتى تنزل حرارته
بس حرارته تنخفض شويه ووبعدها ترتفع مجنت اعرف شسوي
رونق...  خل ناخذه للدكتور مادام بعد وكت
بسرعه دكت على جلال وخطيه رد اجانه اخذنا للدكتور
جان قريب عالبيت
فحصه ونطانه علاج اله رجعت ظليت متخبله اول مره يصير بي هيج
خطيه امي وعمتي سمعن بجمال رجعوا للبيت
امي وعمتي  كالن بعد متوصلين للفاتحه انتي عندج طفل ابقي يمه بالفاتحه من ايد لايد يتبهذل
اني ظليت ليل كله ارقب بجمال حرارته نزلت شويه وردت فجأه صعدت وكلشي سويت متنزل نزلت على عمتي
كعدتها من نوم كتلها على جمال لان ماعرف شسوي
بسرعه صاحت على فهد  كالت خل ناخذه للمستشفى يشوفوه
اخذنا فهد اني وعمتي وللمستشفى خطيه ظل دكتور كال همزين جبتوا لان جان نشمر من الحراره
ظلينا بالمستشفى الليل كله مقبل دكتور نطلعه صبح كعد جمال جان احسن حتى يلعب ويضحك
بس دكتور كال نسويله فحوصات قبل ميطلع جان فايروس عده وجان منتشر بين الاطفال وبسببه ترتفع الحراره ودكتور الي رحناله نطانه دوه ميشتغل لهذا المرض
طبعا اني مشوفون حالي الليل كله منايمه خايفه على جمال لازمه تليفون ادك على اسد اريده بس يفتح خطه
كملنا فحوصات جمال ورجعنا للبيت اجتي رونق ونبأ كالولي انام شويه وهمه يبقون يم جمال لان شافوني كلش تعبانه
اني دخلت سبحت ومددت ماعرف شكد نمت حسيت على ايمان تكعد بيه كمت مفزوعه على جمال
بس كالت ..مابي شي بس اسد راجع اني كمت بسرعه اريد انزل كالت مو هنا بيت جدي كبل رايح لهناك
اني رجعت كعدت عالسرير ماعرف افرح رجع مادري احزن لان رجع وعرف بجدي واعرف اسد علاقته بجدي
لازمت تليفوني ادكله بس هم تليفونه مغلق شنو هالخط ٢٤ ساعه مغلق كرهني بالتليفون .

كمت بسرعه رحت لغرفه البنات اشوف جمال لكيته نايم ورونق ونبأ يمه
نبأ اول مشافتني كالت ... شبسرعه كعدتي وندارت على ايمان كلتلها انتي الي كعدتيها مو

ايمان... اي اني مشوفيها صارلها كم يوم وهي مفرفحه على خبر من اسد

غرام... وليش متكعدني
رونق .... مو كلنا شويه ترتاحين ومن تكعدين اول وتالي حتعرفين راجع
غرام ... نداريت على ايمان كتلها .. معليج بيهم احسن شي سويتيه كعدتيني وبشرتيني برجعه اسد

سئلت على جمال كالو مرتفعت حرارته بعد الحمدلله وجان يلعب قبل شويه نام
كتلهم معرفتوا اسد شون عرف بجدي توفى

نبأ.... محمد كلي فجأه لكينا داخل علينا

غرام ... نزلت جوه اريد اكل شي لان من بارحه مماكله ومن سمعت راجع اسد احس نفتحت شهيتي
سويت اكل وكعدت اكل ونظفت البيت ورديت سويت اكل للبنات
ومظل شي ماسويته بس اريد الوقت يمشي حتى يجي اسد
وكل مادك مغلق صعدت على نبأ كتلها دك على محمد تسئل على اسد
دكتله.... هاحبيبي شونك
.... الحمدلله
.... اكلك اسد يمك
.... لا جوه يم جده حكمه
.... ها شو تليفونه مغلق
..... مادري يكول عطلان
.... ها من يطلع كله يرجع حتى يسبح يبدل يرتاح شويه
.... صار اكله
.... واذا مقبل كله جمال ترى مريض

غرام ... نبأ جانت فاتحه المايك طبعا اني كتلها بس تسئل على اسد الباقي من عدها اني ضربتها من كالت كله جمال مريض
هي خزرتني حتى اعوفها تحجي
سمعت محمد يكلها ... صار كولي لغرام اكله عود

اني نطيت حجيت كتله محمد اني معليه والله هاي من كيفها اني كتلها بس تسئل

هو نحرج خطيه ميدري مرته فاتحه مايك كال ... لا لا عادي مصار شي

سدت المايك نبأ وصارت تحجي ويه محمد اي ميخالف لا اي

سدته باوعت عليه كالت ترزلت من وراج لان فاتحه مايك هسه شكو حجيتي

غرام...لعد هسه شيكول عليه عباله اني اريد اسد يرجع للبيت

نبأ... عساس متردين يرجع

.......
رونق.... نزلت جوه اريد اروح لبيتنا فتحت الباب دخل فهد كتله ... ها شونك شنو الاخبار

فهد... شو صايره ميانه ويايه خيرج شرايده
رونق... مو صوجك كلت اسئل عليك
فهد.... اشاقه شبيج زين شبيه قابل
رونق.... شخبار حوراء
فهد.... ماكو اخبار واصلا اني بعد ماريد خل تفض فاتحه جدي وكل واحد يروح لحاله

رونق .... ليش ماتحجي وياها محاوله اخيره

فهد.... ماتفيد بعد انطيتها فرص هواي وكل مره  اساهل بس كافي اني مو رخيص على نفسي حتى هيج  ارضى يصير ويايه

رونق... صدكني هي الي خسرتك

فهد.... اكيد هي وين تلكى مثلي

رونق...يوووو جاي نواسيك وانت نفس سوالفك يله باي

عفته رجعت للبيت جان البيت هدوء يخوف لان امي ماكو اني صعدت لغرفتي اخذت ملابسي ودخلت اسبح
كملت ورجعت لغرفتي لكيت الباب مفتوحه مع العلم اني متاكده سديتها المهم كلت عادي يجوز منسدت بدلت وجنت امشط شعري سمعت اصوات قويه بالبيت اني بسرعه اجه بالي امي رجعت شي لان صوت احد جوه
فتحت الباب صحت ماما رجعتي بس صوت اختفى ظليت اصيح ماما
ماكو جواب رجعت لغرفتي دكيت على امي اشوفها رجعت لان مابيه حيل انزل بعد اريد اصلي جنت
جاوبت امي وصوت يمها سئلتها انتي وين كالت بيت جدج
اني هي كالت بيت جدج ركض عالباب قفلتها ظليت ارجف هذا منو جوه لعد

سديته من امي خابرت فهد كلت هو اقرب واحد وهسه شفته راجع لان جلال بيت جدي
ظل يدك مجاوب سديته دكيت على غرام بسرعه جاوبت كتلها غرام اكو صوت جوه بالبيت واني بالغرفه اخاف انزل دزي فهد خل يشوف شكو  لاتجين انتي خاف حرامي
كامت صيح عليه   شرجعج وحدج وقفلي باب عليج وهي طبعا مبين تصعد درج بسرعه وتحجي
سمعتها تحجي ويه فهد دكله الحك اكو حرامي بيتنا ورونق وحدها
اني اكلها هسه يجوز مو حرامي بسرعه سويتيه حرامي
مطول شويه وسمعت باب غرفه تندك اني شنو لزكت عالحايط من الخوف بس سمعت فهد يكول رونق اني فهد فتحي
اني كال فهد بسرعه لبست عبايتي وحجابي لان جنت لابسه دشداشه قصير فتحت الباب من شفت فهد
ردت احضنه من الخوفه الخفتها
كتله ها فهد شكو جوه

فهد ... ماكو شي جوه تعالي اوديج لبيتنا من ننزل درج سمعنا صوت باب السطح الهوى يفتحها ويسدها قوي اني جلبت فهد كتله هاي شنو
هو خطيه اخذني بسرعه رجعني لبيتهم ورجع هو لبيتنا اني جنت واكفه بكراج بيت عمي ونبأ وغرام وايمان كلهم واكفين يمي وغرام شايله جمال وطالعه
دقايق وطبكت سياره نزل جلال يركض علينا اجه كبل عليه مبين خاف كال ...شكو صاير
رونق.... مادري فهد بعده بيتنا

بسرعه طلع جلال لبيتنا ظلوا بنص ساعه نوب نخاف روح لبيتنا دكيت على جلال نطاني رفض
شويه و اجه جلال وفهد كتلهم شكو
فهد كلي...باب السطح مكسور ومبين حرامي داخل البيت

اني هو كال حرامي داخل البيت يمه رجلي احسها نشلن
غرام ضربت على صدرها كالت يمه وفوكاها جانت رونق وحدها بالبيت

جلال اجه يمي وكف كلي شنو شفتيه انتي

رونق... لا مشفته بس اني رجعت سبحت ودخلت للغرفه شفت باب الغرفه مفتوح واني سادته بعدين سمعت صوت جوه عبالي امي رجعت ظليت اصيح عليها مجاوب وتعاجزت انزل دكيت عليها كالت اني بالفاتحه اني بسرعه اجه بالي اقفل باب واخابر فهد

طبعا اني احجي وصوتي يرجف من الخوفه بحيث بس كملت كلامي نبأ حضنتني كالت يمه الله سترج عزه لو سوالج شي جان شون

اني كمت ابجي من الخوفه هي لحظات بس شون خفت بيها
يعني صدك لو داخل عليه للحمام لو للغرفه ومسويلي شي جان شون
دخلنا جوه واني من صدك ارجف ونبأ لازمه ايدي وغرام عيونها مدمعه
جلال اختفى مدري وين راح فهد كال غرفه عمتي مفتحه الكناتير جانت بس ميعرف شنو ماخذ مماخذ منها

رجع جلال كال حرامي طافر وكاميره مالتهم الي بسطح مصورته بس مبين كلش لان الكامره على سطح بيت عمي وطالع شويه من سطحنا وياهم  جلال كال هذا عباله البيت فارغ ونزل عليه يجوز سمع صوت رونق ونهزم

اني همه يحجون واني بس اسمع واتخيل الموقف مره ثانيه عزه ماعرف شيصير بيه
اخذني جلال وفهد لبيتنا كالوا تعالي شوفي مبيوك شي
صح بيتنا بس اخاف ادخله رحت لغرفه امي اني اندل مكان الفلوس الي امي ضم بي باوعت موجودات  مماخذهن وذهب امي بعلبه بين الملابس هم موجود اظاهر مشايفه او سمع صوتي ونهزم بسرعه
رجعت لبيتنا جلال صاح عليه لغرفه امه بس دخلت حضني ظل يبوس براسي يكلي ولج ردت اموت لو صاير بيج شي جان سويت بروحي اني ويه حجيه صرت ابجي
كلي ممنوع بعد ترجعين للبيت  وحدج افتهمتي
كتله ... اني رجعت اسبح
جلال... هنا سبحي شكو راجعه ياعيني ولج كل ماذكر مادري شيصير بيه
رونق... عزه خاف امي تدري وتنهبط
جلال ...لازم تدري حتى تقبل نشد كاميرات الكم مو يبس حلكي واني اكللها

رونق.... اي  نكللها لازم  بعد ...رد حضني ويمسح على  راسي .

دخل فهد فجأة للغرفه نصدم بينا بحيث من دخل كال .... خرعتوني شعدكم بغرفه امي وابويه
رونق.... اني بس حسيت احد يفتح الباب ابتعدت عن جلال فيعني فهد كلشي مشاف

جلال.... شدخلك انت
فهد.... ها تتحمدلها السلامه لتخاف هاي كلشي ميصير بيها هسه لو غير وحده بالبيت جان حرامي خلص عليها بس شوف حتى الحرامي من سمع صوتها خاف ونهزم وانت بعدك لازك بيها

رونق.... خلاني اضحك كتله ... والله ليسمعك هسه ميصدك قبل شويه شون اجيت وخايف عليه

فهد....شسوي ابتليت بيكم مو اكللكم يوميه سالفه عدك
وبعدين شكو خابرتيني مجان خابرتي رجلج لو تخافين عليه خاف الحرامي يسويله شي

رونق..... هههههه اي كلت خل اضحى فهد هو وجوده وعدمه واحد منحس فرق اذا صار بي شي

فهد.... رشاشه مو لسانه

رونق...فهد يباع على جلال ويهز بيده يكله فوكاها خايف عليها هاي تخوف بلد .. عافنا وطلع

باوعت على جلال جان لازم جتفه المضروب كتله ...شبيك

جلال... مادري شو وجع عندي بي يمكن لان جنت اشتغل بيت جدي شيل وحط
ومن خابرني فهد كلي حرامي بيت عمي جمال ورونق جانت وحدها من خبصتي ركعت الباب بجتفي

رونق.... سوده عليه تعال خل اشوفه خاف صار بي شي
رفع ردانه وخرت الضماد لكيت دم نازل
بسرعه رحت جبت معقم وشاش وعقمت الجرح وخليت ضماد جديد
جنت اشتغل وهو صافن عليه كتله بعد مشيل شي جرح بعده

جلال... تدللين
رونق.... حروح اجيبلك دواك تشربه حتى يسكن الوجع صعدت ادور دوه لكيت دخل ورايه كتله ليش صعدت جان بقيت جوه

جلال... ماريد اريد امدد شويه

رونق.... جانت مفتوحه باب الغرفه الي يصعد يمر من غرفه جلال لباقي الغرف جان فهد مر يم الغرفه جان يرجع بسرعه علينا كال ...  هسه جنتوا جوه شنو هالانتشار السريع الي عدكم

رونق.... هههههه ..... عافنه وراح انطيته دوه لجلال كتله اني حنزل جوه
جلال.... مو تروحين لبيتكم
رونق... لا يمه بعد ماروح وحدي

عفته ونزلت جوه ايمان ونبأ لابسات ينتظرن فهد ياخذهن لبيت جدي كتلهم لعد خل اجي وياكم شعندي باقيه
اخذت لبس من غرام وفهد اخذنا لبيت جدي
رحت على امي كعدت يمها اني كلشي مكلت لامي كلت بعدين من ترجع للبيت نحجيلها شويه وجتي مرت عمي عليه وكدام امي

عمتي.... ولج رونق صدك حرامي طافر عليكم
ام غرام ... ياستار ياحرامي هذا

رونق.... بكلبي كلت خرب يومج ايمان مجوزين من سوالفج كعدت احجي لامي وعمتي
خطيه امي صار بيها تهسترت مقبلت تبقى رادت ترجع للبيت شوف خاف ممبيوك شي منه عاد رجعها فهد للبيت
اني بقيت ويه البنات اشتغل وكلسع جايه وحده سائلتني عالحرامي كل عرف بسالفه

سئلت على اسد لان غرام دكت تسئل عليه كتلها مشفته سئلت الي موجودين كالو اجه شاف جده حكمه ورد طلع بره
وره شويه رجعت امي كالت همزين الفلوس وذهب مشايفهن
بس جانت كلادتج وتراجي مالتي خلتهن عالميز ماكو يمكن ماخذهن
كلش نقهرت على كلادتي هاي شون احبها من نجحت من سادس امي جابتها هديه بس اني نزعتها قبل بيوم لان جنت اريد اروح لبيت جدي كلت خاف توكع ضيع

لليل رجعنا للبيت بس اني ماقبل ابات بي حتى عمي مقبل كال ابقوا اليوم يمنا بين ماباجر نصلح باب السطح ونشد كامرات للبيت
اجتي نبأ كالت حروح لان محمد رجع عاد اخذت غراضها ورجعت

...........
غرام .... جنت احجي ويه صديقتي بالتليفون اشوف شخبار دوام كالت ماكو دوام علمود المظاهرات ومتعرف شوكت يرجع دوام
سديته منها اخذت جمال وكلت انزل جوه فتحت الباب شفت اسد يصعد درج
ماشوفون شكلي ماعرف اضحك بوجهه ماعرف اخذ من خاطره رحتله ركض

غرام... حمدلله عالسلامه.... كلي الله يسلمج وباسني من راسي
اخذ جمال من ايدي ظل يبوس بي كلي ... شبيه محمد كلي مريض وماخذيه للمستشفى

غرام .... دخلنا للغرفه كتله اي حرارته جانت مرتفعه بس الحمدلله هسه احسن
ظل يبوس بي يكله بيه ولا بيك حبيبي

ظليت اباوع عليه رفع راسه عليه شافني اباوع عليهم
فتح ايده الي رحت حضنته اني هم
كتله ... البقيه بحياتك
اسد.... حياتج الباقيه 
غرام.... وجهك تعبان ليش تليفونك مغلق والله ردت اتخبل
اسد.... تليفوني عطلان وكع من ايدي وشاشه نكسرت ولارقم حافظ  جلال مخابر صديقي علي وهو دز عليه واحد
عاد اخذت تليفون صديقي  خابرت علي كتله دزلي رقم جلال بس اريد اطمنكم ذاك من دكيتله اهذ من خاطري اتخبلت من كلي جدي متوفي جلال كايله
بسرعه اخذت اذن ونزلت

غرام.... الله يرحمه كل نصدم بوفاته

اسد.... مات وحتى ماجنت بدفنته
غرام.... جان يحجي وكلش مقهور كتله...دعيله الله يرحمه ويصبر جده حكمه

اسد... جده حالتها مو طبيعيه هادئه اكثر من اللازم حتى ماكدرت ادخللها من رجعت بس بعدين كايليلها ودزت تريد تشوفني
من شافتني كالت ..شفت جدك عافني وراح

خلتني اكعد يمها ابجي عود جنت متحمل  واصبر نفسي بس من حجت جده ماعرف صار بيه
كعدت هي تواسي بيه .

غرام.... الله يرحمه ... رديت حضنته ونمت على جتفه كتله... الحمدلله رجعت متعرف صار بيه.... ظل يمسح على ظهري
بعدين دخل سبح وبدل ورجع للفاتحه جان اليوم ثالث يوم

لل ١٢ بالليل يله رجع نزل اسويله اكل صعدت اصيحه لكيته نايم
اسد جان متغير كلش هالمره وفاه جدي ماثر عليه كلش حتى حجيه قليل جان .
بعد فاتحه جدي الكل رجع لبيته وصرنا كل نهايه الاسبوع نزور جده حكمه
وره فتره من  الايام بدت كورونا تظهر وبدت ناس الي مصدك بوجود المرض والي ممصدك ويكول كذب اشكال سمعنا من الاشاعات الي تطلع
حتى دوام تعطل فتره وصار تدريس الالكتروني
هاي فتره اعتبرها من اكره الفترات بحياتي لان صار الكل خايف اذا احد يجيه او اذا طلع لمكان
هواي من طلاب كليتي صاروا يرحون ينضمون للكوادر الطبيه يساعدوهم
حتى اسد من يرجع من دوامه اخبصه بتعقيمات كرهته بيهن اني جنت اخاف على جمال لان صغير  حتى جوه قليل انزله
وعمي يمشي بالبيت ويصيح ماكو كارونا هاي الحكومه تخوف الناس بيها
لحد ماوكع وصار بي كارونا يله صدك

بمره جنت فاتحه الفيس وداخله لكروب جامعتي وطبعا اغلب المنشورات جانت هذا نصاب هذا مات
نصدمت من شفت صورته من ضمن الطلاب الي ساعد مصابين كارونا
والي بسبب هذا نصاب وتوفى جانت صوره فراس
ماعرف صار بيه من قريت وفاه الطالب فراس اثر اصابته بفايروس كوفيد
لحظه صمت بداخلي صار كلش نقهرت عليه من قريت اسمه متوفي شهكت بصوت عالي بحيث اسد جان كاعد يمي كال شكو
وجهت تليفون عليه كتله توفى ظل يباع عالصوره كال الله يرحمه

محسيت على نفسي غير دموعي تنزل عليه نقهرت لان بعده شاب وجان شاطر وعنده طموح تعب كل هالسنين حتى بالاخير هيج

اسد من شافني ابجي عليه محجه شي بس كال .. ادعيله الله يرحمه وعافني وطلع من الغرفه
بوقتها كمت صليت اله ودعيتله برحمه جان كلش حباب واخلاق حتى اسد حجاها كال صح جنت ماطيقه بس صراحه جان بقمه الاخلاق
صح اسد منساها هالسالفه وكل فتره يكعد يكلي شون ردت اكتلج من شفتج تبجين عليه يحجي ويذكر هو توفى يكعد يترحم اله

عرس رونق وجلال تاجل موبس علمود وفاه جدي بس حتى علمود انتشار كورونا ورونق جانت فرحانه لان تاجل بس تمثل كدام جلال هي زعلانه

فهد فصخ خطوبته من حوراء على رغم رجعت تتوسل بيه بس هو جان قافل عليها هالمره
............
حبايب قلبي البارت القادم هو  البارت الاخير  قراءه ممتعه 💚

سوزان ليث❤️