رواية حب جنوني الفصل الثامن وسبعون 78 - بقلم سوزان ليث

ثاني يوم جانت جمعه جنت فوك انظف غرفتي سمعت عياط صار جوه وسمعت عمتي دكول يبوووو بصوت رج البيت اني طلعت من غرفتي بوجهي ايمان الي طلعت مخروعه من العياط الصار جوه نزلت الدرج
اسمع فهد يصيح شون مات
وكفت نص درج احس رجلي ثبتت ماكدر اتحرك شفت عمي طلع من صاله يلطم على راسه وعمتي صراخها مالي البيت
كعدت عالدرج حرفيا ماكدر اوكف ايمان حاولت تكومني بس ماكدر هو موقف لحظات بس اني احسه صار سنين
ايمان عافتني ونزلت صاحت على امها منو مات
عمتي نفسها مكطوع من الصريخ
بالكوه كالت جدج
ايمان كعدت يمها تبجي اني على نفس كعدتي حسيت دموعي صارت تنزل
نزلت رحت يم عمتي حضنتي وصرت ابجي وياها

عمي وفهد طالعين عمتي
بسرعه كالت .. كومن لبسن خل روح لبيت جدكم
اني بسرعه صعدت لبست عباتي وحجابي واخذت جمال ونزلت بوجهي صارت رونق الجانت جايه ويه امي لان سامعين بالخبر وياهم نبأ جانت يم رونق
رونق من شافتني حضنتي وتبجي اخذونا ورحنا لبيت جدي اني ادخل وبكلبي اكول لا هسه ادخل نشوفه كاعد بمكانه مثل كل مره
دخلنا لكينا عماتي نصهن وكاعدات يلطمن بسرعه البيت صار مليان عالم فجأه
اجوي اخذوا جدي وطلعوا مبقوا لان عماتي نهارن
رحت على مرت عمي ايه الي كاعده وياه نفس البيت كتلها شبي مو جان مابي شي

جانت تبجي وتحجي ويايه دكلي ... صبح كعد مابي شي تريك وسبح وكال لعمج نصلي روح للمستشفى
جان فرحان لان حتطلع جده حكمه دخل يصلي بس تاخر دخل عمج عليه لكاه متوفي

اني من حجتلي صرت ابجي اني وياها بزايد وجمال من العياط والبجي بس يبجي
طلعت بالكراج اريد اسكته اجوني جهال عمي متوسطه اخذوا مني
ظلينا للعصر ونفس وضع كل يبجي ومنهار وكلسع داخلين نسوان يعيطون وعماتي كلسع وحده متخربطه
وعماتي اثنين باقين يم جده حكمه يخابرونا يكلون حتى منكدر نبجي ونطلع حركت كلبنا على ابونا لا امي تدري بيه متوفي ويصير بيها شي
وهي كلسع سائله عليه وكلسع كايليلها جذبه
اني متت قهر فوك قهري عليها
اجتي امي عليه كالت رجعي للبيت انتي عندج طفل خطيه تبهذل من صبح لهسه من ايد لايد
عاد طلعت اريد احد يوصلني للبيت ماكو احد كل رايح للدفنه شفت كم واحد من ولد عمي يحضرن الجادر
دزيت على واحد منهم  يوصلني للبيت
عاد خطيه اخذني اني ورونق
رونق متتحمل تدخل فاتحه وعياط بحيث من دخلنا هي ظلت كاعده بالمطبخ تخاف من هاي الاجواء
رجعت للبيت ماكو احد  صعدت فوك غسلت وبدلت لجمال ونزلت انطيته لرونق وسويت اكل رونق كعدت توكله
صعدت اشوف تليفوني لكيته كلشي ماكو من اسد لا مكالمه لامسج كعدت لازمه تليفون ابجي ماعرف على جدي ماعرف لان اسد ماكو
خابرت عمتي الي يم جده حكمه خطيه ظلت تشهك وتبجي دكول ماصدك تليفون يدك حتى اطلع بره الغرفه ابجي
سئلت على جده حكمه كالت ماتدري وكلسع سائله على ابويا دكول مدري شبيها اليوم من كعدت وهي تسئل عليه مثل الكلبها عالمها بي شي

لليل رجعوا فهد وعمي وجلال اخذت من خاطر عمي خطيه تعبان وكل مثل الي ممتوقع جدي كل يكول من خابرونا كل عبالهم جده حكمه بس بعد لا اعتراض على حكم رب العالمين
سويتلهم اكل اني ورونق و كعدوا ياكلون عمي ماقبل ياكل عاد خطيه اخذتله اكله للغرفه لكيته يقرا قران ويبجي اول مره اشوفه هيج نوب من شفته يبجي صرت اني هم ابجي
انطيته الاكل كتله اكل بس شويه حتى تاخذ دواك
بالكوه قبل
سئلني على اسد كتله ماكو اي خبر منه كلي من يخابرج مو  بسرعه جدك توفى كليله متخربط شي هو بعيد ومايكدر ينزل خاف وينقهر بزايد
هزيت راسي ب اي وطلعت من الغرفه رحت اخذت جمال من رونق وصعدت انومه لان متنحس اليوم هواي باجي .
..................
رونق... جنت كاعده اني ونبأ وجنا نسولف ويه امي
دك تليفون امي
امي كالت هاي مرت عمج ايه شعجب داكه خاف جده حكمه بيها شي جاوبتها واني ونبأ نباع على امي امي جانت واكفه بسرعه كعدت عالكرسي وكالت لااله الا الله شوكت
اني اباوع على امي اكولها شكو بالي جده حكمه الي صاير بيها شي
سدته وكالت جدكم نطاكم عمره اني طبعا ممستوعبه اكلها جدي
كلش نقهرت على جدي وماعرف هيج اني جنت احبه الا من راح ظليت ابجي عليه بحركه من كل كلبي
بعدها رحنا لبيت عمي ومناك رحنا لبيت جدي
اني ماكدر افوت بيت بي جنازه اخاف يمكن عندي خوفه من مات ابويه واني جنت صغيره
ومو كلش افهم يعني شنو الموت وفجأه لكيت بيتنا مليان نسوان لابسين اسود يبجون ويصرخون وامي فاقده اني من ذاك الوكت ماكدر ادخل فاتحه
تعتبر هاي ثاني فاتحه بحياتي ادخللها بعد فاتحه ابويه

بقيت كاعده بالمطبخ نسوان تصرخ واني احاول اسد اذاني ماكدر  اسمع صوتهم
صعدت فوك لغرفه عمي توضيت وصليت وكعدت اقرا قران
للعصر رجعت ويه غرام للبيت اجذب لو اكول لكيتها فرصه حتى اطلع من البيت ماتحمل ابقى اكثر
غرام صعدت فوك اني ظليت كاعده دكيت على جلال الي هاي اول مره بعد ما سديت تليفون بوجهه وهو مابطل يدك واني ماجاوبه
بس دك مجاوبني وره شويه دك عليه جاوبته بسرعه
..ها جلال شونك
...شون اكون يعني
... انتوا وين هسه
.... كملنا دفنه وحنرجع
..... ماشي توصلون بسلامه
.... الله يسلمج

سديته منه جان مبين على صوت جلال مقهور لليل اجوي
اول مادخل جلال تفاجئ بيه بس سلم وصعد
اني وغرام حضرنا العشه وصعدت اصيح جلال دكيت الباب ودخلت لكيته مدد رحت يمه كتله ... يله كوم حتى تتعشه

جلال... ماشتهي
رونق.... رحت لزمت ايده جريته حتى اكومه
كام وكف كلي... والله ماشتهي

رونق... اكل بس شويه علمود دواك هز راسه وصلت للباب بعدين التافيت عليه رحت حضنته هو مثل الي مصدك حضني كل قوته ظليت امسح بظهر كتله لاظل كاتم القهره بداخلك
وجهه بركبتي حجه وصوته يرجف كال ... ممصدك لحد الان

رونق... من حجه اني صرت ابجي كتله ... واني هم ممصدك لحد الان

بعد عني وهو يمسح عيونه كلي.... رحتي لبيت جدي

رونق... اي العصر رجعنا اني وغرام علمود جمال

نزلنا جوه جان كاعد فهد وحده رحنا كعدنا وياه هو محد يشتهي ياكل فهد جان ساكت ابد محجه كلمه كلش نقهرت عليه حسيته هم كاتم دموعه مثل جلال بس عالاقل جلال اني يمه واحد يساند الثاني بس هو وحده اكل شويه وطلع بره
كتله ...جلال عادي اذا باجر ماروح للفاتحه
جلال.... بعدج تخافين
رونق... شمدريك اني اخاف
جلال... اذكر بوفاه عمي طول ايام الفاتحه انتي يمنا تخافين ترحين لبيتكم
رونق.... هزيت راسي ب اي اخاف ابويه من مات اني دخلت للغرفه اكعده بس مكعد واني جنت مافتهم شفت امي منهاره وشفت ابويه شالوا بصندوك وسدوا عليه الصندوك مجنت اعرف هذا تابوت ظليت خايفه امي محاسه علينا ونسوان تبجي
هزيت راسي مثل الي اريد اوخر الذكريات الي محفوره براسي
جان جلال مركز ويايه كلش كلي ... خلص لاتروحين ابقي هنا
بعد العشه جلال جان كل شويه يدك تليفونه ويكعد يجاوب الي ياخذون من خاطره اني باوعت عالكراج لكيت فهد كاعد وحده بالمرجوحه
طلعت عليه رحت كعدت يمه كتله... ليش كاعد وحدك

فهد... بعد شويه اروح لبيت جدي
رونق.... شونك انت
فهد.... تعرفين محد سئلني غيرج بس الحمدلله على كل حال
رونق.... كل مصدوم بالي صار بس واحد مابيده شي
فهد.... اي صح كل مامصدك جدي يروح تعرفين جنت هلكد ماشوفه قويه وكل تخاف منه اكول هذا حتى الموت يخاف منه

رونق.... الله يرحمه
فهد.... تعرفين حوراء ابد مدكت واني متاكد عرفت بوفاه جدي لان شفت ابوها بيت جدي من مات

رونق.... شسويله هي الخسرانه
فهد..... بس شون واحد يكدر هيج يسوي ميوكف ويه الي المفروض يحبه بااصعب المواقف

رونق.... ظليت ساكته ماعرف شنو اجاوبه

فهد.... بس رب العالمين يدزلنا مواقف حتى تبين معدن الناس على حقيقتهم

رونق.... صح بس الي رب العالمين يحبهم يكشفلهم ناسهم على حقيقتهم حتى يكللهم انتو تستاهلون الاحسن منهم
. باوع عليه كلي .. كلامج صح

سمعت صوت خطوات التافيت شفت جلال جاي علينه وكف يمنا كال... تليفون ماسكت كلسع احد مخابر حتى تعبت هلكد ماعيد نفس الكلام

فهد... اني سويت تليفوني صامت لان هم ماسكت
يله اني حروح لبيت جدي اشوف شنو محتاجين
انت شويه وشوف ابويه ترى تعبان لاتبقيه وحده كاعد

رونق....سلم وراح اجه جلال كعد بمكانه كلي ...شبي فهد

رونق... مابي بس مقهور على جدي جان يسولف

جلال.....ترى سمعته يحجي على خطيبته اعرفج مطلعين اسرار احد بس شبيهم

رونق.... مو عيب تسمع لكلامنا

جلال .... مجنت اقصد اسمع بس فهد ميحجي لاحد عن مشاكله
رونق.... لان محد سائله شبيك
جلال .... هسه شبيه
رونق.... مشاكل ويه حوراء ماعتقد يكملون شفت جلال ضحك ضحكه استهزاء كلي ... عرفت

رونق... شون يعني

جلال.... هي من البدايه من كالو ابوهم ميحل ولا يربط كله بيد امها اني غسلت ايدي منها لان اذا الرجال الي كلمته المفروض تمشي عالكل ميكول لا بنتها دكول لامها لا

رونق... بس هو يحبها
جلال .... يعوفها هسه احسن ما يزوجها ويخلف منها وميكدر بعد يتركها هاي اذا زوجها دمره لفهد

رونق..... ظليت ساكته كتله ... اسد عرف بجدي
جلال... هواي دكيت عليه مغلق
رونق... غرام كالت ابد مادز اواتصل من يوم الي راح
جلال.... متعودين هسه يتصل من يلكه فرصه
رونق.... حروح اشوف غرام
جلال... ماشي روحي اني حروح لبيت جدي

رونق... صعدت لغرام لكيتها كاعده وصافنه على صورتهم هي واسد
من شافتني كالت تعالي
رحت كعدت يمها كتلها.. مخابر اسد
غرام... لا ماكو خبر عنه حموت من القلق
رونق... ماكو شي ان شاءالله هسه يتصل تلكين ماكو شبكه
غرام... تعبت اني من هذا الوضع تعبت من القلق وتوتر من يروح لحد ميرجع تعرفين اليوم من سمعت عمتي تعيط اجه بالي اسد صار بي شي متعرفين الخوفه الخفتها بالحضتها تعرفين من عمتي كالت جدي مات اني كلت الحمدلله مو اسد وصلت لهيج مرحله

رونق.... كافي حبيبتي لتبجين يعني هو ليش هيج معرض نفسه للخطر وعايش بالهبطه غير حتى يوفرلكم انتي وجمال عيشه زينه

غرام... ماريد ماريد يوفرنا عيشه زينه كافي اشوفه يمنا زين وشوكت ماريد الكاه والله تعبت اني تعرفين كم حسبه جيبني وتوديني من ميتصل كم خوفه وهبطه صير عندي من تليفون احد من البيت يدك ويسمع فد خبر موزين ووتتغير ملامحه اكول خاف اسد بي شي

رونق.... حبيبتي الله يحفظه صدكيني حتى اذا  يمج ٢٤ ساعه اذا يريد يصير بي شي يصير هذا جدي قابل من مات جان بواجب جان داخل يصلي والله اخذ عمره

غرام... اعرف والله اعرف بس ماكدر مافكر هيج
رونق.... كافي تفكرين بهيج شغلات سلبيه ترى جذبيها الج تفائلي ودعيله يرده سالم

غرام... ان شاءالله

رونق... هم خابرتي امي شوكت ترجع
غرام.... اي خابرتها حتبات هي وعمتي هناك خطيه ايه كلشي متعرف سوي وعماتي دكول بغير عالم منتهيات
وكالت خل تبات رونق يمج

رونق... عادي يعني تقبلين انام بمكان اسد

غرام.... يله شنسوي نكسب بيج اجر

...........
غرام .... نزلنا جوه رحت شفت عمي جان نايم خطيه
طلعت كعدت يم رونق شويه ودخلن ايمان ونبأ جلال مرجعهن
اجني كعدن يمنا يسولفون شصار وره ورجعنا

ايمان.... باجر حيكولون جده حكمه على جدي
غرام.... صدك سوده عليه خاف متتحمل الخبر لو ينتظرون شويه
نبأ... والله حجن عماتي ويه عمي ثامر وعمي علي ماقبلو كالو لازم تعرف واذا متعرف تزعل علينا كلنا

ايمان... بس عمتي بثينه كايله امي كلبها حاسسها ابويه بي شي من صبح تسئل عليه للعصر بعد ابد مجابت طاريه

رونق.... الله يساعدها ويصبرها لحظه التعرف الخبر

نبأ.... حروح اني ابدل وغسل اذا اكو اكل بربكم سولي كلش جوعانه

غرام.... اي اكو يله بدلوا وتعالوا اكلوا انتي وايمان

نبأ... صعدت فوك غسلت وبدلت دكيت على محمد مجاوبني
عفت التليفون ونزلت اكلت وكملت وكعدنا اني والبنات نسولف وسوالفنا جانت كلها على جدي وكل وحده بينا تتذكر شي مسويه جدي الها الكل جان حزين عليه صح كلنا جنا نخاف منه يجوز حتى نخاف منه اكثر من ابونا وامنا بس من توفى حسيته هو شكد غالي علينا
نمنا من وكت حتى نكعد روح لبيت جدي
كعدت صبح على تليفوني يدك جان محمد
بسرعه جاوبته ... كلي وين انتي
نبأ ... بيتنا بعدني انت وين
محمد... اني بيت جدي
نبأ.... ها شوكت وصلت
محمد...قبل ساعه يله شوكت تجين
نبأ....هسه حشوف البنات ونجي
محمد... اذا ماكو احد يجيبكم اني اجيكم
نبأ.... تمام خل اشوف واردلك خبر

كمت بسرعه كعدت ايمان وطلعت غسلت ومريت على غرام جانت ماكو بغرفتها بس رونق نايمه كعدتها
ونزلت جوه شفت غرام واكفه تغسل اماعين

نبأ.... صباح الخير
غرام... صباح النور هسه كلت اكمل واجي اكعدكم حتى روح
نبأ.... اي خابرني هسه محمد وكعدني لعد وين ابويه
غرام.... الكل راح قبل شويه لبيت جدي وجلال
كال خابرني اجي اخذكم

نبأ.... ومحمد هم كلي لعد حخابر محمد ياخذنا
غرام... بكيفج
نبأ.... مخابر اسد .. طبعا اي شخص يسئل غرام على اسد تحسيها تريد تبجي
غرام .... لا ماكو اي خبر بس جلال كلي يخابر واحد وياه هناك بالكي يعرف شي

نبأ.... يله ان شاءالله مابي شي خل اصعد ابدل
صعدت بدلت اني وايمان
رحت على رونق لكيتها كاعده كتلها ها شو مبدلتي

رونق.... يصير ماروح
نبأ.... خاف عيب زين تعالي وكعدي بالمطبخ اليوم مو مثل البارحه اليوم نلتهي بشغل

رونق... ماشي هسه حروح لبيتنا حتى ابدل

رحت لبيتنا بدلت ورجعت لبيت عمي خطيه غرام مسويتنا ريوك اكلنا شويه وجانت نبأ داكه على محمد يجي
اجه محمد نبأ قبل متطلع كالت انتظرن هنا خل اروح اسلم على محمد هذا من يشوفجن يستحي يسلم عليه

احنا واكفين بالمطبخ نباوع عليها اني وايمان

نبأ... دك محمد يعني واكف بره طلعت بسرعه عليه فتحت الباب جان كاعد بسياره من شافني نزل من سياره اجه دخل بالكراج
من دخل حضنته كتله حمدلله عالسلامه

محمد ... الله يسلمج ها مكملين
نبأ.... باوعت عليه اعرفه ميكدر حتى يباع عليه عود هو قوي  اعرف محمد كلش قريب على جدي هو واسد لان همه احفاده الاكبر بين الاحفاد فيعني اعرف متدمر هسه بس مسوي نفسه قوي

اني ماكلتله شي نقهرت عليه كتله اي كملنا يله حصيحهم
دخلت صحتهم وصعدنا غرام من صعدت اخذت من خاطره لان تعرفه هو شون قريب لجدي مثل اسد بحيث مجاوبها بس هز راسه من نزلنا ودخلنا جوه جانو هسه بادين شغل ويحضرون وكفنا وياها تعاونا
وياهم
اجوي كالو حيروحون لجده حكمه يبلغوها بالخبر
متعرفون البيت فوك حزنه ظلوا خايفين على جده حكمه
رحت على غرام لكيتها كاعده عالدرج شرب ممه لجمال

نبأ.... ليش مرحتي لغرفه جدي هنا هسه خطيه حتى ميكدر ينام

غرام... ماكدر ادخللها اخاف احس جدي جوه كاعد

نبأ.... اي حتى اني خفت ادخللها جلال مخابر صديق اسد

غرام.... اي مخابره بس رجال مو وياه بس كله اشوف منو وياه وانطيك خبر

نبأ.... نوب الوضع مو زين مظاهرات قويه صايره

غرام....اي شفت بالفيس هالمره كلش مو مثل كل مره

نبأ.... هو اسد مو يم المظاهرات لتخافين ترى مكانه بعيد عليهم

غرام.... اي بس متعرفين شيصير اني لو بس يدز شي يطمني عليه والله ماهتم اعرفه لاسد حتى لو بنص المظاهرات مياذي احد وتلكين يساعد المتظاهرين هم بس يطمني عليه

نبأ.... الله كريم ان شاءالله يطمنا عليه

رونق .... طلعت اني والبنات وره البيت نحضر المكان يردون يطبخون هنا
جنت اطلع من الممر لمحت انمار واكف ويه ولد عمي بس شون وجهه خريطه وايده مشدوده
كلت والله اسد عاشت ايدك حتى واحد ميتعرف عليه من وره الضرب الماكله

اجتي بت عمي صغير ه كالت ... جلال يكول دخلي جوه

اني رفعت راسي شفت جلال واكف مقابيلنا بس يمكن يستحي يجي لان نسوان هواي يمي
من شافني باوعت عليه اشرلي ادخل جوه اني بسرعه دخلت

رحت طلعت تليفوني من جنطه لكيته داز مسج .💬 ممنوع طلعين بره

رديت💬 اوكي حبيبي بس جنت اساعد البنات
💬 انتي مو كلتي ماجي للبيت جدي
💬مو البنات كالن عيب متجين واصلا ملتهيه بشغل
💬ماشي ساعديهم جوه البيت لاطلعين للكراج زلم طابه طالعه
💬 تمام بعد ماطلع

للظهر دخلو جهال يكلون جابو جده حكمه
رحت ركض وكفت يم غرام ونبأ اخاف من الي حيصير اكيد حيعيطون ويصرخون على رغم من عمامي نبهوا الكل محد يعيط او يبجي كدام جده حكمه
دخلوها للصاله احنا جنا نباوع عليها من شباك المطبخ
جانت تمشي بالكوه
دخلوها جوه بس الكل خاف يبجي كدامها راحت غرام شوفها اني ماكدرت ادخل

غرام.... من دخلت جده حكمه جنا كلنا خايفين عليها

دخلت اشوفها جانت كاعده بصاله ونسوان داير مدايرها بس جانت هادئه كلش وبيدها سبحتها وسبح
طلعت عمتي الي جانت وياها بالمستشفى كعدت بالمطبخ تبجي
سئلناها جده حكمه من كتولها شسوت خوما تخربطت
صدمتنا كالت اني كتلكم امي جانت تدري ابويه بي شي

بارحه العصر نامت شويه ومن كعدت بعد ماسئلت على ابويه اليوم من شافت عمامكم جايين تعرفون شكلتلهم اول مادخلوا كلتلهم ها دفنتوا

خلت الكل مصدوم ميعرف شيحجي كعد عمج ثامر يحجيلها وهي جانت هادئه كلش وره مكمل حجي كالت هو احسن منكم هو قبل ميروح اجاني بالحلم ودعني كلي حكمه اني حروح كتله وين حتروح كلي حروح لبيتنا الجديد انتظرج هناك

عمتي من حجت هيج كل الموجود صار يبجي
يعني الكل جان متوقع جده حكمه تنهار بس مشفت بصبرها جانت هادئه وبس تسبح واي احد يحجي وياها ماكو غير كلمه الحمدلله على كل حال
اخذوها عماتي لغرفتها ترتاح ومقبلت احد يبقى يمها كالت خلوني وحدي ارتاح ...... يتبع ❤️
............
قراءه ممتعه حبايب