رواية حب جنوني الفصل الثالث 3 - بقلم سوزان ليث

شويه واسد صاح شعدجن هنا يله جوه

فزينا من المرجوحه ونبا ظلت دردم دكلي كله من وراج فوتنا صارنا شكد كاعدات بس اجيتي كال جوه

اني صراحه كلش ضجت ونقهرت ليش هيج كل ميشوفنا مجمعين يفرقنا مفرق الجماعات
اني فتت من يمه كالبه خلقتي
رحت اخذت كتبي وكتلها لرونق امشي نرجع للبيت
سلمت وطلعت جان اسد ماكو مشافني من طلعنا

بالليل خابرت هاله صير بت عمي ويايه بنفس المدرسه كتلها تمر عليه باجر وتاخذني لان اخوها يوديها

بالليل امي دخلت عليه لازمه تليفون دكلي اسد يريد يحجي وياج اشرت بيدي دكله نايمه يربي ماخلص منه هذا لاحكني بتليفون
سمعت امي دكله لا مو هاله كلتلها تمر عليها انمار يوديهم كلتله هاهيه براحتك وسدته

كلتلي باجر اسد يوديج خابري هاله كليلها لتجيج اني ظليت اكمز والله معليه منو كله اريد اروح وياه
امي كلتلي اني كلتلج مو بعدين دكليله مادري وسوينا سالفه وتعرفين اسد
اخذت تليفون امي كتلها حخابر هاله اكلله متجي
فخابرتها كتلها خلي انمار يودينا من وكت حبابه عدي قرايه دريد صديقاتي يفهموني جم موضوع كالت تمام  لان هاله اكبر مني بسنه
ثاني يوم صبح نزلت كتلها لامي هاي هاله بره جتني حطلع عود كولي لعمو اسد وفلتت بسرعه طلعت وركبت ويه هاله وطلعنا  للمدرسه

هاله ... شبيج يولي تركضين عبالك واحد لاحكج
كتلها مو عمو اسد يريد يوصلني واني فلتت منه
انمار .... ههههه ولج بعدج تخافين منه
غرام... عساس انت متخاف منه تذكر من صلخك بالماسحه على ظهرك
انمار.... غير من وراج لان شكيت دفتر التلوين وانتي ظليت تعوين
غرام.... هههههه تستاهل لعد
وصلنا للمدرسه سلمنا ونزلنا

انمار ... اني انمار 21سنه اني اصغر اخوتي وره ماخلص دوام ارجع اشتغل ويه ابويه عده مكتب مال دلاليه
مكعد بي اخويه اسعد واني اشتغل  وياه
تعلمت كلشي من اخويه اسعد الي جان اكبر مني وخليته يعتمد عليه بهواي امور

اسد : كعدت صبح من وكت كلت حتى اوصل غرام فتريكت بسرعه وكتلهم حروح رحت لبيت عمي دكيت الباب طلعت مرت عمي كتلها وين غرام كالت راحت ويه هاله
اني صدك ضجت كتلها مو كتلج بارحه اني اوديها

ام غرام: مو جانت نايمه من خابرتني وصبح كعدت مالحكت تخابر هاله عيب جتي البنيه

اسد : باوعت على عمتي كتلها عمه هذا الحجي ميمشي عليه
ام غرام .... هههه ولك اسد والله صراحه كتلها بس هي ماقبلت شسويلك اذا هي تخاف منك

اسد ... يعني تدري اني دريد اوديها 

ام غرام ... اي تدري عود من ترجع حاسبها  يله تعال اتريك ويايه

اسد... عمه تريكت عود اتغده يمج سلمت وطلعت  طبعا كلش ضجت من غرام ادري شبيها هيج تخاف مني كاتلها اني شو كضيت عمري كله اني مدللها اودي واجيب
رحت للدوام صارت ب10 ونص طلعت رحتلها نزلت شفت انمار واكف دينتظر اجه عليه

انمار... هلا ابو الاسود شونك
اسد ... هلا بيك الحمدلله انت شونك ماتمر
انمار... والله دوام وشغل مدالحك
اسد... اي الله يساعدك  ماطلعو
انمار ... لا بعدهم

اسد ظلينا نسولف لحد ماطلعت هاله شافتنا جتي سلمت كتلهم روحو انتو اني ارجع غرام وفعلا سلمو وراحو

ب 11 طلعت غرام ظلت دور منا ومنا دور على هاله وانمار بس اني ظليت اباع عليها داشوف شحسوي
دخلت جوه مره ثانيه للمدرسه
رحت صحت عليها
واجتي طبعا وجهه كام ينطي اللوان
صعدت للسياره
اني كتلها شونج بالامتحان

غرام ... طلعت من الامتحان واني فرحانه كملت امتحانات دورت على هاله انمار ماكو كلت معقوله عافوني رجعت دافوت سمعت صوت اسد يصيح غرام لتافيت عليه اشرلي بيده تعالي
اني رحت وكلبي كام يدك نوب لابس مناظر شمسيه ممبينه حواجه مخنزر لا
ركبت بسياره سئلني شونج بالامتحان

كتله .. الحمدلله

اسد... مو البارحه نطيت خبر اني اوديج للمدرسه
غرام... مو مو مادري جنت نايمه قبل ماكمل لتاف عليه
اسد... من شوكت جذبين عليه
غرام ... دنجت راسي عرفت امي خارطتله كلشي
اسد... احجي من شوكت متعلمه جذبين
غرام ... اني  بسرعه دموعي نزلن من الخوف
اسد... شفتها كامت تبجي  كتلها على شنو دتبجين احجيلي كليلي اني هيج سويت لان كذا وكذا لاظلين هيج

غرام ... لان ردت اروح ويه هاله لان بعد ماشوفها
اسد... ليش حسافر هاله مو 24 ساعه لو هي يمج لو انتي يمها
غرام.. ظليت ساكته
اسد... دجذبي مره ثانيه عليه وشوفي شسوي
غرام... هزيت راسي اي .. اكرهك اكرهك الله يخلصني منك
اسد... نقهرت عليها  كلش لان عيطت عليها كتلها جوعانه
غرام .... هزيت راسي لا
اسد ... تردين روح نتغده بره
غرام... هي هاي العايزه اروح اتغده وياك حتى سوي سم عليه كتله لا عمو ماريد  لاول مره اسد يكلي

اسد.... غرام اني ابن عمج ترى ماكو داعي دكليلي عمو جنتي صغير ومن دكليلي اكول متفتهم بس هسه انتي كبرتي

غرام... ظليت ماعرف شحجي كتله لعد شكلك
اسد... كليلي محمد جا غير اسمي اسد
غرام... هزيت راسي ونداريت للجامه

عدت الايام وصرت ثالث متوسط واسد كام يغيب هواي عن البيت بسبب دوامه صراحه اني جنت كلش مرتاحه لان ماكو هو بيوم الي يجي اختل بيتنا لحد ميروح ظل فتره الثالث لو مره لو مرتين شاوفنا ودقايق وافلت من كدامه متنازلت وظليت اصيحله عمو
طبعا جنت مشغوله بقرايتي هواي اريد اطلع معدل بثالث لان اكو تنافس بيني وبين وحده بصفي

اسد... صح جنت مشغول هاي الفتره كلها بس كل اخبار غرام توصلي واصلا دايما اسئل واخابر عمتي اسئل عليها  جان دوامي  بين سبوع واسبوع والاسبوع الي انزل بي ماشوفها اصلا لان كاظيتها بس قرايه
لحد ما جنت بالدوام وخابرتني عمتي ام غرام دكلي غرام نجحت ومعدلها 98  كلش فرحت لنجاحها وحسيت اني النجحت مو غرام طلبت اجازه من دوام في سبيل انزل حتى اشوفها واباركلها

غرام ... هاي فتره كلش جان لود عندي بالقرايه تعبت مجنت اضيع دقيقه خاصه بالاربعين يوم كظيتها لازكه الكتاب بوجهي الحمدلله نحجت وجبت معدل 98 ‎%‎  جنت ممصدكه نفسي امي كلش فرحت بحيث من كتلها ناجحه ومعدل كذا كامت تبجي
جدي سوانا عزيمه احنا للناجحين لان 4 من ولد عمي هم ثالث مثلي بس اني جنت اعلى معدل بيهم
سوانا غده عزم بي عمامي ونسوانهم ولدهم كلهم بيومها اني لابست تنوره سوده طويله بيها جاكه من كدام حصره عليه جانت ولابست بدي وردي وفوكاه جاكيت
وحجاب وخليت كحل بالكوه قبلت امي بالتوسل يله رضت

ورحنا بيت جدي طبعا جنت كلش فرحانه بهذا اليوم جان البيت هوسه وبنات عمي وعماتي كلهن جايات ولدهم هم احنا تربينا كلنا سوه

اسد .... ضبطت اجازتي ويه العزيمه الجدي المسويها ونزلت قبل ماروح للبيت رحت اشتريت هديه لغرام مال نجاحها ورجعت البيت فارغ طبيت سبحت وبدلت ورحت لبيت جدي
طبيت الكراج هوسه عمامي ولدهم سلمت عليهم وباركتلهم على نجاحهم وطبيت جوه من باب الاستقبال شفت جدتي كاعده وجدي رحت بست راسهم واكيد ماخلص من لسانها

جده حكمه : ها ولك اسيد اليوم يله بينت
اسد.... والله جده دوام ومالحك ارجع اكظيها نوم
جده ... شمالك تعبان هيج جن عمرك 50 سنه
اسد... هههههه جده متعوب الدنيا متعبتني
جده.... دتعال ازوجك حتى يروح هذا التعب مادام وردتك زهرت
اسد.... جريتها بضحكه لان اعرف جده تقصد غرام  كتلها الله كريم جده
  ظليت اسولف ويه جدي ونحجي اشوف وحده دخلت علينا صيح بيبي  من شافتني ظلت  متبسمره  ظليت اباع عليها ممصدك عيوني ..... يتبع ❤️

&&&&
تعليقاتكم الحلوه حتى استمر ❤️