رواية حب جنوني الفصل الثاني وستون 62 - بقلم سوزان ليث

وكفت سياره والكل ندار يباع منو بسياره امي وكفت عن البجي وتباع عليه واني انزل نزلت واني اتقدم على امي كتلها شكو امي جانت كاعده اكو بلوكه كاعده عليها بس وصلت يمها كامت واجاني راشدي قوي وصرخت بوجهي وين جنتي ......

اول مره امي تضربني والكل واكف ظليت مصدومه ظلت تفشر عليه وتحجي من حركه كلبها
عمي استلم جلال رزاله غسل ولبس واني بعدني مصدومه من الراشدي

امي ندارت على غرام عاطت بيها حتى تدخل دخلت وندارت على بيت عمي كلتلهم اني ماريدها اخذوها يمكم عافتنا وطبت وسدت الباب جلال
تخبل كام يحجي على اهله ادري هي طالعه ويه واحد غريب شبيكم
نوب يرجع يوكف مقابيلي ويحجي ويايه ويهدء بيه لتبجين اروحلج فدوه واني ازيد بالبجي

اكو مره بصفنه طلعت شافت الهوسه سئلت شكو مرت عمي كالتلها الحجيه بيبيتهم بغداد متخربطه ولمت السالفه
عاد مرت عمي دخلتني يمهم
دخلت كعدت عمي رد استلمني واستلم جلال
كله انت متستحي تاخذها وامها متدري انت مو جنت طالع شرجعك

جلال... يابه هي جانت جايه عليكم واني كتلها حروح للاسواق تجين ولحيت عليها وجتي شنو سويت جرمت

عمي ... ولك امها اجتنا تلطم عبالها مخطوفه كايلتلها حروح لبيت عمي وجايين ملاكيها والله صعدت ضغط والسكر الله لاينطيكم

وعافنا ودخل وفهد واكف خربان ضحك
يكلنا
فهد... انتو تخيلو غرام نزلت من فوك عايطه وين اختي
كمنا كلنا دورنا ماكو رونق كلنا هاهيه هاي من طلعت من بيتهم احد جرها وخطفها خرب عشيرتكم من الهبطه بعد ماخلف

مرت عمي لابست العبايه وكالت كومي خل روح لامج بوسي راسها واعتذري منها الله يساعدها مماتت من الهبطه

عاد رحنا لبيتنا دكينا الباب فتحتها غرام عيونها وارمه من دخلت حضنتي دكلي ياحيوانه عبالنا صار بيج شي
واني ابجي طلعو الطلعه من عيني ياريت باقيه بالبيت ويه ضوجتي ولا هالفضيحه والاكشن
عاد دخلت امي كاعده وخطيه شاده راسها من شافتني دارت راسها اني رحت ركض نمت بحضنها ابجي
ودفعتني كالت ماعندي بعد بنيه البنيه الجذب عليه وتطلع بدون علمي مو بانتي وعافتنا وطبت لغرفتها عاد طبت وراها مرت عمي
تهدء بيها

كعدت غرام تحجي الصار
دكول
غرام ....طلعت وراج لبيت عمي اجيب جم شغله دكول رحت لغرفتي كملت الاريده وطلعت على غرفه البنات شفت بس ايمان ونبأ كتلهم وين رونق كالو مجتي هنا طلعت اني وجسمي يرجف هسه صعدت من جوه وسلمت وماكو يمهم وين راحت
نزلت جوه وصار الكل يدور ورحت لامي وامي ماقصرت طلعت بشارع تعيط بنتي انخطفت وعمي خابر على اسد واسد تخبل يكلنا دوروها زين اصلا كله هسه حنزل كلشي بكوم ومن وكفت سياره جلال ونزلتي منها كوم مدري افرح مدري اريد اكتلج

رونق.... عاد انسدت السالفه بعد الاثاره والكشن الي صار والكل عباله مخطوفه وطلعوا الطلعه سم عليه جلال يدك عليه ماجاوبه فشلانه شون راشدي انضربت كدامه وامي متحجي ويايه اول مره اسوي هيج
وكل ماصفن مدري اضحك مدري ابجي

امي متقبل تحاجيني وكل ماروح احجي وياها تدفعني
خلص رمضان يوم العيد نزلت من فوك جنت لابس تنوره وبدي وفوكاه يلك وكاشخه اروح للبيت جدي غرام كلتلي من تنزلين عايدي امي واني حجيت وياها اصلا ومهدتلج الطريق نزلت شفتها رحت عليها بست راسها وايدها وعايدتها واعتذرت منها وكتلها بعد ماسويها والله عاد قبلت وردت حضنتني
كملنا ورحنا لبيت جدي واني كله ماحجي ويه جلال فشلانه منه
...........
غرام .... راح اسد واني ماعرف الله ذب عليه النوم اكوم واكعد انام والكأبه فول عندي دكيتله جم مره ميجاوب دزيتله مسجات هم ميجاوب
كلش نقهرت من تصرفاته سئلت نبأ عليه دكول كال ينزل قبل العيد بس شو ماكو اليوم اول يوم ومختفي
لابست فستان مال حوامل زهري وبي فيونكاه فوك بطني جديد واول مره البس فستان حوامل مكياج ولفيت الحجاب ونزلت شويه واجه فهد اخذنا ورحنا لبيت جدي
نزلت شفت سياره اسد بالباب ماعرف شنو الصار بيه مثل الطير وحرروا بس اريد ادخل جوه اشوفه كلش مشتاقتله

دخلنا جان قسم من عمامي بالكراج ولد عمي سلمت عليهم ودخلت
ادور على اسد دخلت سلمت عالكل وهو ماكو رحت كعدت يم جده حكمه كالت شونه حملج

غرام ... الحمدلله جده
حكمه ... مارحتي عرفتي جنسه
غرام ... لا والله بيبي وره العيد عندي مراجعه واعرف
حكمه... اهم شي اتمام الخلقه وشيجي نعمه من الله
غرام ... اي الحمدلله .. وين اسد
حكمه ... ماتعرفين زلمتج وين خايبه
غرام ... جده زعلان عليه وميحاجيني
حكمه ... ماجوزون من سوالف المزعطه حيصير عدكم طفل
غرام ... شعليه اني كوليله اله
حكمه... جوه بغرفتي اجه ودخل نام كال كعدوني عالغده
غرام ... خل اروح اشوفه

طلعت صار بوجهي قصي كلي
قصي ... هابطيخه شونج
غرام ... ههههه زينه
قصي ... هاي صاير بيج
غرام ... صاير
قصي... شو خشمج كبران
غرام ... لا ولي مكبران
قصي.... شوكت تفقسين
غرام ... ههههه بعد 4 اشهر تقريبا
قصي... اي بيها الخير بس اذا بنيه محجوزه الي من هسه
غرام ... داجاوبه جان اسمع صوت واحده من وره يكله ليش مارايدها حتى انطيها الك نداريت شفت اسد جاي علينا اني بداخل فرحان بس مبينت هذا الشي
قصي ... يابه مريدها هاي اذا احجي وياها يمكن جيبلي ابوها
اسد... اجيبلك العشيره كلها
قصي ... هههههه خليها على كلبك منو ياخذها وانت ابوها
اسد... لا يا......
غرام ... ههههههه حجاها وركض قصي
اني ظليت واكفه اسد حجه
اسد... دخلي كعدي جوه شكو تفترين
غرام ... باوعت عليه وكملت طريقي للمطبخ
شويه واجوي جهال ابن عمي كلولي جده حكمه تريدج
رحت يمها كالت كعدي يمه شعندج واكفه هناك كعدي موزين عليج
شكيت بااسد كتلها لازم الباشا كلج صيحيها هي ضحكت كتلها عرفت
ظليت كاعده وهو كاعد شويه بعيد عليه فاني كمت كلت اروح امدد شويه بغرفه جده ظهري كام يوجعني
كمت وطلعت رحت للغرفه نزعت الشال ومددت هالايام ظهري يوجعني صاير شويه ونفتحت الباب اسد مد راسه
شافني ودخل وسدها اجه كعد يمي اني ظليت امسح على بطني ماباوع عليه كلي

اسد... شبيج اكو شي يوجعج
غرام ... لا
اسد... تريدين نرجع للبيت ترتاحين
غرام ... لا
اسد... استغفر الله شبيج
غرام ... لسوي نفسك مهتم وخايف عليه
اسد... اني مهتم باابني وخايف عليه مو عليج
غرام ... باوعت عليه كتله ها زين لعد عفته ونطيته ظهري
هو شويه ومدد حضني من وره وخال ايده على بطني يمسح بيها
كتله وخر
اسد... شعليج انتي اني دالعب ويه ابني
غرام ... اسد وخر والله اكوم اطلع شفته دحس راسه بخدي وظل يبوس بي ويكلي
اسد... اشتاقيتلج
غرام ... جذاب ولو مشتاق جان سئلت صالك شكد من رحت بالجذب مدكيت حتى مجاوب على اتصالاتي
اسد... غرام مناسي عملتج ترى وتعرفين شسويتي
غرام ... مامسويه شي
اسد... هسه كافي بس ياويلج اذا سمعت حاجيه وياه متلومين الا نفسج والله
غرام ... ماحجي وياه بس انت بس شك بيه
اسد... اكو فرق بين شك والغيره عيوني واني اغار عليج اكول ليش هيج صايره حلوه
غرام ... من يوم يوم حلوه بس ناس متقدر
اسد.... ههههههه
غرام ... دنحجي ونفتحت الباب اسد لا ف راسه واني اريد اكوم ماكدر
دخلت حكمه
كالت
هاولكم مو متخاصمين
اسد... حكمه زعل حبايب
حكمه ... دكوم كوم اكعد يم اعمامك كاعد يمها تحب بيها
اسد... حكمه والله انتي تغارين وينه جدي خل اكله يحبج
حكمه ... ايا ماتستحي اخجل شويه حصير اب الله يساعد ابنك ابوه فاسد شون حيتربى
غرام .... ههههههه جده اني اربيه
حكمه ... كومي ملعونه كومه نايمه بحضنه
غرام .... هههههه كمت واني خربانه ضحك كتلها جده والله هو اليتحارش
حكمه ... كومي يومه كومي موزين على البطنج
اسد... الله واكبر حكمه حتى البنطرون منازعه شنو سالفه
غرام ... هههههههه
حكمه... ماتستحي يله طلعو لا بارك الله بيكم اريد اصلي
غرام ... طلعنا اني واسد وخربانين ضحك رحت كعدت بالاستقبال
.......
رونق ... رحت لبيت جدي فدخلت سلمت عالكل وورحت كعدت او ختلت ماريد اشوف جلال
فكمت يم البنات بالمطبخ واكفين نسولف اجتي ايمان كالت جلال بره يريدج
كتلها كليله ماموجوده
كالت امشي شافج من دخلتي اصلا جان بالكراج
كلتلها اي هسه اروح عفتها ورحت كعدت بالاستقبال وره شويه جتي بت عمي صغيره بعلو حسها كالت جلال يريدج بره
خلت الكل يندار عليه امي باوعت عليه كالت ديري بالج تكومين اكسر رجليج هزيت راسي اي وكتلها كليله امها متقبل
وهي راحت ركض
وره شويه اجتي ايه مرت عمي صغير وكفت يم الباب صاحت عليه كالت تعالي ويايه نزل جم شغل من فوك فاني كمت رحت وياها صعدت فوك شفت جلال كاعد على الدرج الثاني الي يروح للسطح من شافني كام ايه ندارت عليه كالت حروح للغرفه شوفي شيريد خبصنا ابتسمت الها وراحت
رحت يمه كتله هلو

جلال ... شبيج
رونق... مابيه
جلال ... صار شكد محاجي وياج صاير
رونق... مصاير بس امي جانت متحجي ويايه وكلشي طالع من عيني
جلال... شبيها كبرت السالفه طالعه ويه واحد غريب
رونق.... لا مو غريب بس لان منطيتها خبر اكلك عبالهم مخطوفه
جلال ... اني الخطفتج
رونق... ههههههه حنزل
جلال ... اوكفي
رونق.... شكو شفته طلع فلوس كلي
جلال ... هاج هاي عيديتج
رونق... ههههه جلال حسيتك جدي من ينطيني العيديه
جلال .... ههههههه هاج ام حلك
رونق.... شكرا يوم زواجك
جلال .... دخل يجي واراويج شسوي بهذا اللسان
رونق.... ههههه سلمت عليه ونزلنا اني وايه
رحت كعدت وره الغده الكل كاعد
جدي ندار على امي كللها ام غرام عندي كلام كدام الحاضرين كلهم اطلب رونق لاجلال وانتي تعرفين جلال ورابي كدام عينج فشنو رائيج
صار سكوت واني ظليت مصدومه والكل يباع عليه ويباع على جلال الكل نصدم من طلب جدي
جلال يباع عليه ومبتسم واني الخجل كاتلني

امي طبعا استحت من جدي لان الكل كاعد كالتله حجي هي بنيتكم وشتفصل نلبس
جدي... لا بويه هذا زواج وانتي امها ولي امرها شنو رائيج

امي باوعت على جلال طبعا متحجي وياه من وره سالفه ذيج
كلتله حجي يكبعون وياخذون

مرت عمي هلهلت وهلهوله جر هلهول
جدي كال بيها الخير الجمعه الجايه المشيه
كام جلال بوس الكل واجه باس راس امي واعتذر منها وامي سامحته اني طبعا منزله راسي ومستحيه كلش امي تكرص بيه حتى اكوم ابوس ايد جدي واستحي عاد كمت بسته وعمامي استلموني شقه شافوني مستحيه وكلسع وحده من زوجات عمي تهلهل

انمار كاعد جان بس امي وافقت ترك المكان وطلع
بس محد انتبه عليه
.......
نبأ .... جنت انتظر التليفون يفتح وصارت سالفه رونق والتهينا صراحه وره مخلصت السالفه ذكرت التليفون وصعدت ركض شفته
فتحته وايدي اشوفها ترجف يربي هسه بي بلاوي اكيد نصدمت خلفيه مال التليفون صوره الي ولمحمد بالخطوبه ماخذيها
فتحت الرسايل فارغ معرض الصور بي جم صور الي ولمحمد جهات الاتصال فارغه حتى شريحه مابي تليفون كلشي مابي ماعرف افرح ماعرف انصدم ظليت مثل الطفله اضحك وايمان بصفي دكلي شكو شلكيتي كتلها فرح كلشي مابي بس صورنا اني ومحمد
غلقت الجهاز وكعدت الحمدلله ربي يمكن لو شايفه بي شي جان متت
بس كلت ليش عده هذا الجهاز وليش اني مادري بي زين ليش مابي شريحه اكيد هو ضامها من يريدها يخليها
ربي صايره شكد اشك بمحمد اخلص من سالفه تجيني سالفه
خل اسئله وافضها لان تعبت
صار اول يوم العيد فاني لابست بنطرون جينز وفوكاه قميص شيفون ابيض ومكياج وشغلات خابرت محمد يدك ميجاوب هو صبح خابرني وره صلاه العيد عايدني كعدني من النوم
وينه هسه دزيتله مسج حروح لبيت جدي
رحنا لبيت جدي سلمنا عالكل والكل جاي دورت محمد ماكو بس اهله موجودين سئلت هديل اخته كالت بالبيت نايم
كلت يجوز نعسان بارحه لساعه متاخره جان يم الحلاق وراها صارت الصلاه يجوز منايم
ظليت اسولف ويه البنات ودخلت هاله اجتي سلمت وكفت اني ردت اطلع من المكان بس كلتلي ها شخبارج ويه محمد كتلها برود ماكو احلا من عدنا كالت بطريقه استفزازيه الله يثخن لبنكم وعافتني وطلعت هديل واكفه كبالي سوتلي معليج بيها خل تولي هزيت راسي وطلعت للكراج ظليت ادك ادك على محمد ماكو ادري حتى لونايم على هذا الدك جان كعد
رحت كعدت بالمرجوحه كبالي ولد عمي ديحضرون المنقله حتى يشوون
ندار قصي هز ايده من بعيد ها جوليت وينه روميو
خلاني اضحك كتله نايم
اجه كعد يمي بالمرجوحه كلي
قصي ...شوكت تزوجون
نبأ....بعد مو هسه وانت شوكت تزوج
قصي ... ازوجكم واطمئن عليكم وازوج
نبأ... ههههه ليش امنا انت
قصي ... اريد اطمئن عليكم قبل ماموت
نبأ... خرب قصي ههههههه اكبر شويه
قصي ... اكلج وين الزوج مالتج
نبأ... ليش اني حذاء وعندي زوج
قصي.... هههههههه لا اقصد توأم مالتج
نبأ... ها رونق جوه
قصي... هاي هم حزوجها لجلال واخلص
نبأ... هههههه والله منعرف شنكلك على جهودك

وره شويه وصار يفر المرجوحه قويه واني لا لا قصي حتوكع المرجوحه وهو يزيد سرعه وخربان ضحك وكف المرجوحه واني وياه بس نضحك
نداريت شفت محمد واكف يم ولد عمي ديسلم عليهم كمل واجانه قصي
كلي اجاج روميو
اجه علينا
كام قصي ديسلم بس محمد سلم عليه من وره خشمه قصي يمكن افتهم ندار عليه كلي اعوف عصافير الحب وحدهم وعافنا وراح
محمد ظل واكف كبالي كلي
محمد... جم مره محذرج من قصي ليش مدجوزين
نبأ... محمد شمسويه كاعدين كدام الكل وسوالف عاديه والله
محمد... نبأ شويه اسمعي الكلام ترى تعبتيني
نبأ... ليش متريدني اسولف ويه قصي والله حباب وكلبه طيب وفطير والله
محمد... حباب لنفسه ماتشاقين وياه افتهمتي
نبأ... وانت وينك من شوكت ادك عليك
محمد.... جنت نايم والله وراها كعدت سبحت واجيت
نبأ... ممممم دشداشه حلو عليك
محمد... وهذا القميص متلبسي بعد
نبأ... ليش
محمد... مطلع هذا حلو
نبأ... عيونه على صدري كتله مابي شي بس انت تفكر بهيج سوالف
محمد... هههههه اي هم متلبسي بعد لان يخليني افكر بهيج سوالف
نبأ... ظلينا كاعدين بعدين كلي تعالي روح نفتر بسياره شويه هوسه هنا عاد رحت كلت لامي وطلعنا
هو ظل يمشي بسياره بكلبي كلت خل اكله عالتليفون
كتله محمد اريد اكلك شي
محمد.. كولي
نبأ... قبل ايام خابرتني هاله ( هنا محمد بسرعه دار وجهه عليه )
محمد... وشكو جاوبيها
نبأ... لان ردت اعرف ليش مخابره
محمد... وشرادت
نبأ.... دتحذرني منك
محمد... شتحذرج مني بيه جرب قابل اوكفي خل روح للبيت هاي سالفه مو مال هيج تنحجي
نبأ... يابيت
محمد... بيتنا شبيج
نبأ... وفعلا لاف ورجع لبيتهم ( لبيت عمتي ) دخل سياره جوه ونزلت فتح باب الجوه ودخلت كعدت بالهول هو سد الباب واجه كعد يمي كلي اي
محمد..اي احجيلي شلاغيه بت النعال

نبأ... كعدت احجيله كلشي كالته هو ظل ساكت ويهز رجله صعد راسه كلي
محمد... وانتي مصدكتها
نبأ...محمد اني دماغي مديستوعب شي انت عدك سوابق يعني هيج كلام طبيعي اتاثر بي واصدكه
محمد... دخيل ربج ياسوابق شفتيني نايم ويه وحده
نبأ... محمد صوتك احنا دنتفاهم
محمد... ماشي سكتنا كملي
نبأ.... هي من كلتلي على سالفه التليفون ليش الجذب ظليت افكر بهاي سالفه وذاك اليوم من نفطرت يمكم من ترجعني ونزلت تشتري جكاره
محمد... فتحتي الجكمجه وشفتي موبايل واخذتي مو
نبأ... ظليت اباوع عليه عزه شعرفه واستحيت من نفسي حسيت نفسي حراميه
محمد... شو سكتي نبأ اني مو جاهل ترى اعرف وعرفت انتي ماخذته بس محجيت شي ردت يبرد كلبج لان اكيد حظلين تفكرين ليش عده هذا التليفون مو
نبأ... محمد اي اني منا اشك بيك وحجي هاله وشفت التليفون كلت هاهيه بانت الرؤيا
محمد.... فتحتي التليفون شفتي شنو بي
نبأ ... اي كلشي مابي بس صورنا
محمد... باعي نبأ قبل كايلج اني مونبي وعندي حياتي الخاصه قبل ماعرفج وحتى من عرفتج اني صرت ابتعد شويه شويه عن هاي سوالف بس لان احبج ادري حدكليلي جنت تحاجي غيري هاج هذا تليفوني شوفي محادثه وحده اسمها سما هاي اقسم بالله العزيزهاي مجرد صديقه وهي اصلا مو هنا باامريكا ومن حجيت وياها ذيج المره جان عدها مشكله وبسبب فرق التوقيت حجيت وياها بهيج وقت ولان ماعدها احد خابرتني بس اقسم بالله ماعندي اي شي وياها مكلتلج لان ماعرف يجوز متفهمين الموضوع مثل ماني اشوفه
حتى من كتلها صارت مشكله ويه نبأ لان عرفت احجي وياج كامت تضحك كالت انت اخويه وحقه متعرف علاقتنا
وحتى اسد يعرف بعلاقتي شنو وياها وسئليه مشوفيه محجى شي ويايه لان يعرف شنو ذيج بالنسبه الي مجرد اخت وصديقه
وحتى وياها ابتعدت وره المشكله بس حتى لاضوجج ولااخليج تفهمين موضوع غلط
اذا على هاله دكلج خابرتها وره خطوبتنا فااي خابرتها تعرفين ليش لان رزلتها ولان طيحت حظي بس دك عليه ودز مسجات
اكيد مكلتلج رزلني
يانبأ والله اني احبج ومشايف غيرج هذا التليفون الشفتيه اي جان قبل عندي رقم ثاني اخابر بي البنات ليش الجذب بس ورح الاموات كلهم من حبيتج كسرت الشريحه وشفتي انتي التليفون حتى مقفول مابي شحن ونزلت بي صورج لان بتليفوني هذا ماكدر انزل بي صور تعرفين شغل بي وخاف يضيع من اشتاق لعيونج اكعد اكلب بصورج

نبأ... هو يحجي واني مدري شبيها صرت ابجي كتله محمد والله اني هم احبك لتخليهم يشمتون بيه هاله منتظره يوم الي شوفنا اني وياك واحد تارك الثاني

محمد... طلعي هاله من دماغج لاعاد تفكرين بيها والله ماكو احد بكلبي غيرج انتي الي بكلبي كافي تخلين هيج سوالف تعكر هاي الايام والله مستعد كلشي التريديه اسوي بس ماشوف دمعه منج

نبأ... سوي حظر لهاله
محمد... مسويلها
نبأ... ومضم عليه شي
محمد ... صار
نبأ... ومن نسافر لدبي انشر صورتي اني وياك واغورها
محمد... هههههه لا هيج حيضربونا عين
نبأ... يله خل نرجع تاخرنا
محمد... ماشي كومي يله

نبأ.... رجعنا لبيت جدي ويه الغده عاد نصهم اصلا ممنتبه لغيابنا لان هواي جاين

وره جم يوم عدت ووعلاقتي بمحمد رجعت مثل قبل اما هاله فحضرتها من حياتي كلها
بيوم النتائج محمد جان يمنا يطلع بالنتائج التحمل جان ثكيل اني ورونق فوكاه وكلسع ها مطلعت ها مطلعت

امي وام غرام خطيه كاعدات بس يدعون النا
غرام رايحه جايه علينا ودكول لتخافون ناجحات والله وهي قلقانه اكثر من عدنا

محمد كال فتحت اني ورونق كعدنا بحضنا وراسنا بالابتوب ريد نقرا
طلع مدرستنا واني ردت اتخربط من توتر

لازمه ايد محمد اكله اذا راسبه لدكلي

جان اسم رونق قبل اسمي صاح رونق ناجحه وامها كامت تهلهل وتبجي واني ابجي وياها نزل جوه اني وخرت راسي كتله ها محمد واني هو باوع عليه وكلي ليش هيج رونق
اني كال هيج صرت ابجي بزايد
كلي ولج ناجحه ناجحه اني كمت اكمز من الفرحه وامي تهلهل وام غرام تهلهل

معدلي 89 جان بس جنت فرحانه بي صح مو ستحقاقي لان جواباتي جانت كامله بالامتحان بس اهم شي خلصت

......

رونق... حددوا الخطوبه قبل الخطوبه صار اعلان النتائج بعد عناء وسهر وتعب نجحت بمعدل 94 جان هم على كلبي ونزاح
جلال جان طالع ويه عمي وكلسع يخابر يسئل من نجحت خابرته وكلتله ناجحه كلش فرح
ومن رجع اجه كدام الكل باس راسي وباركلي
وره ايام صارت الخطوبه جان يوم كلش حلو فرحه التخرج وفرحه الخطوبه
لابست بيومها فستان طويل اوف وايت الصدر مالته كله شغل كرستال جنت خايفه لاانمار يسوي شي بيومها بس الحمدلله ماجاي اصلا بس قبل الخطوبه داز رساله بيد هاله بس مخليت هاله دكولها اصلا
صارت الخطوبه والكل فرحان صاحو عليه عقدنا اني وجلال وراها دخلو جلال جلال اول مره يشوفني لابسه هيج فستان طالع كلش منه 🙈 منزل عيونه وكلسع يهمس يكلي صرتي مرتي
وره الخطوبه كعدنا وحدنا وجنت كلش مستحيه منه عكسه الي حسيته مو ذاك جلال اليستحي او الي يستحرم يلزمني شفته جريئ من اول ماصرنا وحدنا سحبني لحضنا وحضني حسيته يريد يدخلني بي رفع راسي وباسني جانت بوسه كلش هادئه مشاعري جانت خايفه على فرحانه على خجلانه كلبي الي صار يدك سريع
ابتعد عند شفتي واني احس وجهي صار حار من الخجل وماكدر اباع بعيونه
بس هو رد عاد السالفه مره واثنين وو لحد ما دكو الباب ركض دفعته عبالك جان مخدرني وشال حركتي ظل يضحك
حسيت اني محبيت ولا ححب غير جلال الشخص الي يحترمني ويقدرني والي يتمنى الي الرضى الي يفضلني عن نفسه الي يخاف عليه دعيت من رب العالمين يخلي الي لان ماشفت انسان مثله ولا اريد اشوف غيره

........
غرام ... التهيت بخطوبه رونق ومارحت للدكتوره جان موعدي بيوم الخطوبه كلش تعبت وحسيت من صدك ظهري نقسم من الوكفه وروحه والجيه حتى الكل انتبه عليه تعبت رحت كعدت واني احس بالم بظهري قويه وبطني هم بس ماكلت لاحد ماريد احد يقلق كلت يجوز لان تعبت هسه ارتاح ويروح وره ماانتهت الحفله اجه اسد اول مشافني كلي شبيج. ظليت اكله مابيه وشويه تعبت
رجعت للبيت بسرعه بدلت ومددت ورفعت رجلي خطيه اسد ظل كاعد يمي لان مبينه تعبانه ظل يمسح على بطني ويقرا ايات ويبوس بايدي وشويه يرزلني لان تعبت نفسي
واني ظليت اكابر مابيه شي ومابيه شي
كلشي اوكي ثاني يوم كلتله اريد اروح للدكتوره المهم رحنا للدكتوره طلعت مسافره ابد مو وكتها كالو بعد يومين ترجع
اسد ماقبل لان عرف تعبانه اخذني لغير دكتوره بعد سره شطوله فتت فخلت السونار وظلت تحركه وشويه نامي هيج وشويه تعالي هيج والقلق بان على وجهه الدكتور والخوف صار عندي كلش قويه نظراتها متبشر بخير واخاف اسئلها

كلتلي ماما نزل عليج شي
كتلها لا ماكو شي كالت بنتي جنين مابي نبض اني كالت مابي نبض حسيت متت ماعرف صار بيه دموعي صار تنزل لزمت ايدها كتلها الله يخليج شنو مابي نبض تاكدي فدوه ردت تاكدت كالت مابي نبض الجنين ميت اني هنا المتت ظليت اشهك وابجي وصار هي تهدء بيه كالت مجاي احد وياج كتلها رجلي بره كالت طلعي صيحي
طلعت من عدها اسد جان واكف بره العياده بس شافني ابجي اجاني ركض كتله اسد دكتور تريدك

اسد... شكو حبيبي ليش تبجين صاير
غرام ... طبعا اني اشهك وابجي كتله الدكتوره دكول الجنين ميت
هنا اسد حسيت وجهه تغير ظل ساكت ويمسح بوجهه بسرعه باس راسي كلي كافي تبجين حبيبتي واني اكله كله بسببي اني الموته وابجي دخلت بالعياده الكل يباع عليه عاد دخل اسد عالدكتوره دكتور ه شرحتله حالتي وكلتله لازم عمليه والطفل جبير وحجي يكطع الكلب
كتبتنا ورقه وحولتنا على مستشفى اني شنو
الطريق كله ابجي ماسكتت اسد ساكت ماحجه بعد شفته وكف يم عماره لاف فتحلي الباب كلي تعال يله كتله وين كلي هنا اكو دكتوره هم نسائيه خل تفحصج ونتاكد
اني نزلت والطريق كله ادعي مابي شي
نزلنا طبعا جان اكو بي 4 كاعدين اسد حجه ويه السكرتيره وكالت ماكدر سره ولازم تنتظر الكاعدات سئلوني ليش ابجي كتلهم همه خطيه نقهروا عليه كالوا خل تدخل قبلنا حالتها حرجى
المهم دخلت اني الدكتوره شافتني ابجي بسرعه كامت من المكتب جتي عليه جانت مريه جبيره كالت شبيج ماما ليش تبجين عاد اني ماصدك اشهك وابجي اكلها كلولي ابني ميت
هي رستا اخذتني عالسديه بدت تفحصني وتمشي السونار عليه وكلش جانت طبيعيه واني مابطلت بجي شويه وسمعت صوت نبضه
اني ظليت صافنه على شاشه السونار اكلها شنوهذا

دكتوره... هذا دكات كلبه
غرام ... يعني مميت
دكتوره... لا ماما مابي شي مو دسمعين نبضه منو كلج ميت
غرام ... دكتورتي مسافره واضطريت اروح لدكتور .... وهي هي كلتلي وحولتني للمستشفى حتى اسوي كورتاج
دكتوره ... استغفر الله يربي شون صارت دكتوره هاي لااله الا الله كومي ماما كومي مابيج شي ومثل الورده
غرام ... ظليت اضحك وابجي كتلها والله مابي شي
دكتوره ... مابي شي بس يحتاج راحه
غرام ... اني طبعا مجنت مصدكه ظليت بس احمد الله واشكره كتلها ولد لو بنيه

دكتوره ... ولد
غرام ... ظليت الضحكه ماليه وجهي
كتبتلي على دوه وشغلات اني من فرحتي لفت على مكتبه وبوستها للدكتوره
طلعت على اسد جان واكف يم باب العياده يدخن ركضت عليه كتله ابني عايش عايش مابي شي
هو من فرحته بسرعه حضني وحسيته عيونه مدمعه
الكل بالعياده خطيه فرحوا لان شافو حالتي كلش تعبانه
نزلت واسد لازم ايدي ويسب بذيج الدكتوره ويكلي والله الا اسجنها
بت الكلب موتت ابني وكلسع يكلي موتت ابني جان يندار عليه كال

اسد... هو ولد لو بنيه
غرام ... ولد شفت اسد ابتسم وباس ايدي كتله اي كيفت لان ولد
اسد... لا والله ولد بنيه المهم يجون بصحه زينه

رجعنا للبيت سولفت لمرت عمي خطيه كامت تبجي
عاد كالت صعدي رتاحي كلشي بعد مسوين نبأ وايمان عندج شتردين همه يسوة
صعدت فوك شفت اسد ديصلي كمل كتله شدصلي كلي صليت صلاه شكر لان ابنا مابي شي
رحت حضنته واني هم صليت صلاه شكر بعد نمت ورافعه رجلي الكل يجي لحد عندي مدلله وره يومين رجعت لدكتورتي واكدت كالت مابي شي وحالته زينه بس راحه
وره اربع اشهر من الدلال نزلت جوه واني احس حنفجر جنت داخله بتاسع وصار يومين يجي وجع خفيف
نزلت جنت اتمشى بالكراج رايحه جايه اوامر امي وعمتي
شافني فهد كلي شبي وجهج اصفر جنج حسويها اليوم
ووفعلا للعصر وجع صار يزيد يزيد لليل صرت اصرخ اخذوني للمستشفى واني اوصي اسد اذا صار بيه شي لتزوج عليه والله اموتك والكل يضحك فهد يكلي بس توكلي والله كريم حتى ابنج نذبه بزبل
اسد طبعا مسوي نفسه هادء بس ادري الخوف كاتله وره 12 يله شرف ولي العهد اجه جمال سمينا على اسم بابا وزادت عائلنا نفر جان كلش صغير حجمه مع العلم جنت اكل هوايه
بس مادري وين راح الاكل

اسد فرحته جانت غير اكيد لان اول طفل يصير عده وفرحته صير مختلفه
بيومها جمال من ايد لايد جده حكمه وجدي فرحوا بي فرح جوي اثنينهم للمستشفى ومن عرفوا سمينا جمال جده صارت تبوس بي ذكرت ابنها بي

حياتنا مابيها شي مختلف بس بيها جمال الي كل ميقرب اسد مني يجبجي يخلي اسد يسب بي ويرجع ليوره

البنات داوموا كليات نبأ طلعت علوم ورونق هندسه خطيه رادت طب بس معدله مقبلها
امي جانت فرحانه صار عدها طبيبه والمهندسه
اسد بدا يعمر البيت الحنكعد بي لان جلال وفهد يريدون يزوجون
فهد خطبوله الزرافه على كولت جلال خوش بنيه وحبابه وفقيره كلش واحد يحب الثاني

.......
نبأ... بعد تحضيرات الطويله اجه يوم العرس عرسي محمد سوينا بالعطله الجبيره
اني ومحمد سوينا بالقاعه كلش حلو صار

بيومها جنت اسعد وحده بالدنيا
العرس جان بس الاهل والاصحاب الي تحبنا هاله مجتي للعرس
ولا للحنه
بيومها ظل الكل يركص وفرحان اسد اجه سلم علينا وطلع
محمد كلسع يخابره يكله اكلك جنت دكلي بعرسك ماخليك تتهنى اظل ادك عليك لو اعرف اجيك للفندق هسه شنو ترى العروس اختك واسد يسب بي ويسد التليفون بوجهه ههههه

انتهى العرس وزفونا للفندق مانكر جنت خايفه بس محمد كدر يخلي هاي الليله من احلا الليلي الي بعمري بهاي الليله على كد خوفي من كلشي بس جنت فرحانه
من دخلنا للفندق جانت ويانه غرام واخت محمد الجبيره محمد طلع من الغرفه نزل جوه الولد صاحو
اخت محمد شروق دكلها لغرام دعلميها انتي مو مرت اخوها الجبير
غرام .... هههههه شعلم تلكيها صايره استاذه بهاي سوالف
نبأ.... انجبي غرام
دخل محمد وراها سلمو وباركولنا وطلعوا اني ظليت واكفه اني وبدلتي محمد اجه عليه باسني من خدي كلي اليوم اكلج
اني بسرعه كتله محمد جوعانه وخر من يمي

محمد... اروح فدوه للجوعان بدلي حتى نتعشى واشوف حجتج شنو بعد
نبأ... ديله اطلع خل ابدل
محمد... لا اني كلولي ساعدها بالبدله
نبأ... دفعته للغرفه ثانيه وقفلت الباب ظليت واكفه كبال المرايه وصافنه على نفسي ومحمد سوه البابه طبله انواع الدك صار يدك عليها
بدلت دخلت للحمام غسلت وتوضيت وطلعت لابست سيت النوم وفوكاه الروب وطلعت زي الصلاه ولابسته فوكاه ورحت فتحت الباب محمد جان نازع وباقي بشورت من شافني نصدم

محمد... بلازحمه مرتي جوه جانت وين وديتيها
نبأ.... ههههههه وخر لتلزمني متوضايه
عاد كلي تعالي اكلي وبعدين نصلي عاد نزعت وهو كلسع يكرص ويحجي شغلات +18 كملت اكل وكمت غسلت ورجعت توضيت ولابست مال الصلاه ومحمد لابس دشداشه وصلينا هو خلص صلاه واني ظليت كاعده متحججه عود ادعي دعيت للامه الاسلاميه كلها مابقيت نفر الكل حتى لصديقاتي مال الابتدائيه ذكرتهم بدعائي طولت هواي واني ادعي بالاخير محمد حس اني اسوي هيج حتى ماكوم
اجه كعد يمي كلي
محمد... حبيبتي شنو حتنتظرين اذان الفجر
نبأ... ظليت اضحك هو كومني ونزعني مال الصلاه وباس راسي
وسحبني للجربايه وووووووووو صرت مرته فعليا 🙈
ثاني يوم رجعنا للبيت
الكل جان مجمع بيت محمد الكل فرحان محمد خابر اسد ثاني يوم كله اكلك شو مجيت باركتلي ها نسيت اني مزوج اختك ويخلي اسد يسب بي ويرجع ليوره ههههه
وره يومين سافرنا لدبي لان هو وعدني بيها من جنا اصدقاء
وكلشي كاله سواه والحمدلله حياتنا مستمره رغم الغيره الي محمد صارت عنده من داومت كليه
اني ومحمد حياتنا مستمره وحاليا حامل ومكملين ......

رونق.... اني وجلال انخطبنا بعد مااسد يكمل بيته وينتقل هو وغرام جلال ياخذ غرفتهم يفتحها على غرفته وصير غرفتنا
زواجنا حيصير عالعطله الجبيره مال مرحله الثانيه
تحضيراتنا وطلعاتنا وونستنا حياتنا حلوه جلال يحبني واني احبه وهذا كافي وحياتنا مستمره.....

غرام .... محد جان يصور فديوم اني ازوج اسد ولا نبأ تزوج محمد ولا حتى رونق تنخطب لجلال كلشي نصيب واحلا نصيب
حياتنا حلوه متخلى من المشاكل اكيد بس بحبنا نكدر نواجهه اي مشكله
وجمال مالي حياتنا اني واسد والكلب يحب ابوه اكثر مني لان اسد يطلعه ودايح وياه 24 ساعه بس بالليل يدورني لان يريد ممه
احبهم والله يخليهم الي

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

قصتنا انتهت بحلوها بمرها انتهت بس اكيد حياتنا مستمرا واحنا بدينا نكدر نخلي ايامنا كلها حلوه
اشوفكم على خير احبتي ❤️
🥰النهايه🥰
سوزان ليث 🌸
..........

شكرا للمتابعه والي تفاعل ويه الجزء الثاني ادري قصير بس لان محبيت اطول بي وهو احداثه قليله ومكمله للجزء الثاني

حبايبي دخلو للصفحتي sosanlaith90. وسوا متابعه الي حتى توصللكم كل القصص النشرها

انتظروني بقصتي الجديده ( هل مازلت في قلبك )
غدا موعد البارت الاول اتمنى تعجبكم 🌸🌸🌸