حب جنوني الفصل الثاني وثمانون 82 - بقلم سوزان ليث

بعد مرور سنتين .......

خلال هاي سنتين ماكو هواي احداث صارت بيها مثل اي بيت واصلا من بدء الوباء ينتشر وصار الواحد يشوف حبايبه الي ينصاب الي ممنوع تروحله او ممنوع يجيك
صارت الحياه ممله لفتره من زمن واكيد الكل مر بهيج شي

غرام.... اليوم وبعد تعب سنين جان يوم صوره تخرجي جنت فرحانه بهذا اليوم ونفس الوكت ضايجه لان اسد مكدر ينزل حتى يجي ويايه وطبعا طنكرت عليه

كعدت من صبح وجنت لابسه قاط التخرج و رونق ونبأ يمي واكفات لان رادن يشاركوني فرحتي بهذا اليوم
كملت وجنت مشتريه لجمال قاط وجان ضايج منه لان ممتعلم يلبس هيج شي يقيده

دخلت ايمان علينا كالت .... اوي غرام شون حلوه طالعه
غرام... ابتسمت الها كتلها ... يله بعد كم سنه يجي هذا اليوم ونجي وياج من تاخذين صوره تخرجج

ايمان.... حيل بعد كومه
رونق.... هي ٣ سنين هسه لاحكتي تتونسين حتى تردين تتخرجين

ايمان....تردين اتونس وقصي مثل ظلي بالكليه
رونق... يووو هو مو مسائي دوامه وانتي صباحي
ايمان .... يجي من الصبح ويه الصباحي ويبقى للمسائي حتى مصادق كم ولد من شعبتي

نبأ..... ههههههه والله خوش ولد بس انتي مدري شبيج قافله عليه

ايمان.... يبقى بس هو ماخذه

غرام..... ههههه والله ياايمان ماشوفج غير حتاخذين قصي قبلج هم جنت قافله على اخوج

ايمان... اجاب هذا على اخويه

نبأ.... شنو انتي متاخرتي

ايمان .... لا مو حجي وياكم غيرت رائي

رونق.... لعد خابري قصي كله ليروح للكليه من صبح هههههههه

غرام..... نزلنا جوه لان جلال يوصلنا لان الخط ميكفي
جلال من شاف البنات كلهم ويايه

كال... شكو هي صوره كلجن رايحات

نبأ.... احنا نحب نشارك غرام فرحتها

غرام... باوعت على نبأ بكلبي اكول جذب بارحه خابرتني دكلي اجي وياج اشوف الحلوين الوياج

وصلت للجامعه ومثل اي صوره ناس جر عرض ناس جر طول
مرت ب ساعتين واحنا نفس الوكفه ننتظر المصور يكمل تعديلاته
جنت واكفه واباوع على البنات واكفات مسافه من عدنا
واكو طلاب هواي واكفين يباعون علينا
وجانو حايرين بجمال حتى كلت لو مجايبته خطيه حاره وتعب بس جانت امنيتي اخذ وياه صوره بهذا اليوم

جنت لازمه تليفوني اهتز شفته مسج من اسد قبل مافتحه كلت اكيد يريد يراضيني لان مااجه فتحتها كاتب 💬 ضحكي حتى تطلع صوره حلوه

رفعت راسي اباوع عالبنات تلفت منا ومنا بس ماشفته جانو هواي ناس واكفه

رد دز مسج 💬 شكو دورين عليه مو تكرهيني

المسج خلاني اضحك لان بارحه من جنت احجي وياه كتله اكرهك ولتجي اصلا ماريدك

باوعت عالبنات واكفات ويسولفن هذا وينه بدأنا ناخذ صور لمحت اسد يابه مشوفون ضحكتي شون صارت من الاذن للاذن
بحيث نص صور اني اباوع عليه ممنتبه للمصور عبالك شفت ابويه

جان شايل تليفونه ياخذلي صور اشرتله عالبنات شافهن وراح يمهن شال جمال

كملنا اخر صوره نزلت عليهم ركض هو جان شايل جمال بيد فتحلي يده ثاني عباله يحضني بعدين انتبه لنفسه نزلها

اخذنا صور هواي اني والبنات واني واسد وجمال
جانت اجواء حلوه صح حاره

جمعوا شعبتي ياخذون صوره سلفي الولد ويانه جان يلم بطلاب يجمعهم صاح غرام يله
اسد باوع عليه بنظره خزره خزره الولد بسرعه ندار
باوع عليه ميكدر يحجي كدام البنات كتله يجمع الطلاب مشوف يمشي وصيح عليهم

كملنا كلشي عاد اخذنا للمطعم نتغده جنت كاعده يم اسد وجمال بحضنه تقربت عليه كتله ... لعد ليش كلت مااجي خليتني هيج انقهر

اسد... كل مره تحجي عليه انت مسيطر على اعصابك شوفي نفسج البارحه

غرام.... مو نقهرت ياعيني صار شكد احلم بهذا اليوم وتالي تكول مااجي

اسد.... واني اكدر ماجي غير اشوف بنيتي وهي لابسه روب تخرج

غرام ... احبك
اسد... مو بكدي

نبأ..... اي عيني من لكه حبابه نسى صحابه
اسد... ولج انتي مو عندج دوام شكو جايه
نبأ .... غير حتى اساعدها بهذا اليوم
اسد.... وشساعديها ضحكين بدالها مثلا بصوره

رونق.... همست لنبأ... هسه زين من قصفج
نبأ.... ولي لج.. هاي شبيها كالبه وجهه

رونق... لتافيت على ايمان جريتها علينا كتلها شبيج وجهج يبجي

ايمان ... باعوا

رونق... انطتنا تليفونها وجنا نقرا مسجات قصي الها
كومه مسجات 💬وينج شو ماكو بشعبتج
💬وين واكفه
💬صديقتج كالت ممداومه شبيج
💬مريضه
💬صاير شي وممداومه

رونق... اوي هذا شكد داز

ايمان... ماعده المكالمات كلسع داك والله مال اكول لاسد

نبأ.... انجبي لسوين مشكله جان دزيتيله اني ويه غرام وخلصتي منه

ايمان... ولج والله مااستبعد يجينه
رونق... لدرجه هاي
ايمان... اخ لو شوفيه شيسوي بالدوام لاحكني مثل ظلي حظي هالسنه صار شاطر ويرد يكمل دراسه

رونق.... هسه انتي مناطيته ريك حلو شكو هيج مجلب

ايمان... والله لو شوفين شون اعامله عبالج يزعل يضوج
نبأ.... هاي متستحي ذاك اليوم شون رزلته كدامي من دكلها عبالك يشتغل عدها حتى اني رزلتها لان حجت هيج وياه

رونق....لعد خطيه يولي خاف يحبج
ايمان... شيحب مني يمعوده

غرام... بعد الغده رجعنا نبأ لبيت عمتي ام محمد خابرت محمد طلع علينا
ظل تعالو دخلو شويه وتعالو
اسد....يابه منريد ندخل بس اخذ مرتك خبصتنا خبص
محمد... حتى تعرف اني شنو عندي
نبأ.... عاد انت مصدكت احد يحجي عليه
محمد ... عاد هذا مو اي احد هذا اخوج الحجه
نبأ.... اخويه يشاقه اصلا
اسد... والله ولا اشاقه راسي وجعني هلكد ماحجت طريق كله
محمد... شفتي حتى تعرفين بس اني اتحملج
نبأ.... والله زعلت بعد ولا اجيكم عافتنا ودخلت
اسد.... تعاي مخبله

محمد....يمعود هسه بالليل تجيكم

غرام رجعنا للبيت على امي لان صبح ملحكت اروحلها خطيه كامت تهلهل وطش جكليت
كتلها بعدني ممكمله كالت مادام شفتج بملابس تخرج كانما تخرجتي
ظليت حاضنتها وابوس بيها ..
رجعت للبيت غسلت وبدلت لجمال وخليته بفراشه ينام

واني بدلت وغسلت وكعت اتفرج صور وجنت فرحانه بهذا اليوم كلش

دخل اسد عليه شافني اباوع بصور كلي ... صار كم مره شوفيهن

غرام....والله اسد ممصدكه يجي هذا اليوم جنت كلش فرحانه
اجه كعد يمي يباوع ويايه عالصور كلي... واني فرحتي جانت غير اليوم

اخذني بحضنه ظل يبوس بيه يكلي ولج مامصدك بعد كم شهر تكملين

غرام ... بس انت وعدتني اشتغل ماكعد بالبيت

اسد... اكيد لعد شكو درستي غير حتى تشتغلين
غرام.... حضنته قويه اكو لحظه تمر عالانسان يكول هاي احلى لحظه مرت بحياتي واني جانت صدك هاي احلى لحظه

عدت ايام وبدت امتحانات اخير السنه وجنت اقره بغرفه ايمان لان جمال واسد هوستهم ماكدر اقره حلبه مصارعه الغرفه صايره

تليفون ايمان كلسع داك وتوتر سوه عندي كتلها مدكليلي منو الي كلسع داك

ايمان ... هذا قصي

غرام... شبيه
ايمان.... اني ادري هو اليوم امتحانه بدا تلكين يخابرني حتى يكلي زين لو مو زين بالامتحان عساس مهتمه اني

غرام.... صدك والله بله انطيني اني احجي وياه

اخذته للتليفون وفتحت خط اجاني صوته واخيرا حنيتي عليه وجاوبتي

غرام... ها قصي اني غرام شثبرت البنيه كلسع داك

قصي... ها ولج غراب شونج
غرام.... غراب بعينك زينه شكو شرايد دوختنه ترى
قصي... شعليه بيج داك قابل عليج
غرام.... يعني البنيه عدها امتحانات مدكول اعوفها تقرا لو ماكو حساس
قصي.... مو اليوم سحلت نفسي يم استاذها حتى ينطيني مهمات الها
غرام... ياعيني منين نزلت الحنيه
قصي... من زمان بس محد يقدر
غرام... هاك احجي وياها بس بسرعه وراها اقرايه

انطيت التليفون لايمان الي تأشرلي لا متريد كتلها جايبلج مهمات للامتحان اخذته تليفون اني جنت اباوع عليه واضحك
طبعا اخذت المهمات منه وسدته كتلها شوفي شون حباب كله يجيب مهمات

ايمان.... حتى شوفين حتى اساتذتي صادقهم

غرام.... هههههه خطيه والله نقهرت عليه شبيج هيج وياه
ظلت ساكته مجاوبتني
خلصنا امتحانات وجان اذا اكول اسعد يوم بحياتي ماجذب رجعت كبل نمت بحيث اسد يكعد بيها واني ماحس كمت بالليل يكلي شبيج مضروبه بنج
غرام... والله جنت ميته نعس بودي اكمل نومتي

اسد... منو الكالت باجر بس ارجع من دوام نطلع للسوك نكمل نواقص البيت

غرام... والله ماحسيت باجر عود نطلع

وصدك ثاني يوم طلعنا كملنا جزء من نواقص اصلا البيت كامل بس هيج شغلات بسيط وعمي كال مادام تاجل عرس جلال ابقوا لحد ماكمل امتحانات حتى اتفرغ للبيت

وبعدها نظفنا البيت اني والبنات ويايه وكعدنا بيه جان اول يوم النا بيه ماعرف احس نفسي ممتعلمه
واني اسد كلسع متناكرين على شغله
وليوم الي يلتحق اني اروح بيتنا ابات
.......
رونق .... مرت سنتين خلال هاي الفتره تاجل زواجنا وفاه جدي انتشار المرض اسباب هواي خلتنا ناجله يعني مو بسببي
بس اتفقنا بالعطله بس اخلص امتحانات مرحله ثالثه نزوج
وبدأ العد التنازلي للعرس خاص من انتقلوا اسد وغرام للمشتمل
وجلال فتح غرفته على غرفه اسد وسواها مثل السويت بس الحمام بره واني جنت ملتهيه بتجهيزات
يوميه بسوك اني وامي وغرام مرات عمتي ونبأ ويانه

وتحدد موعد الحنه والعرس وجانت ايام منكعد بيها بالبيت من مكان لمكان حتى عمتي دكول صارلكم كم سنه مخطوبين لو كل شهر مشترين شغله جان منخبصنا هيج

طبعا جلال ماشوفه لو احجي وياه بتليفون قبل مانام ولو مرات اشوفه دقايق سريعه

بيوم الحنه جنت كاعده بصالون انتظر البنات يكملن لان اني كملت اول وحده
اجه علينا اسد رجعنا يابه شبعنا تصنيف كل وحده لازمها تصنيف الا غرام كعد يتغزل بيها نبأ تهمس باذني طبعا يخاف يحجي ويه غرام لا اليوم تنومه بالصاله

رونق...والله جنها هي الحتنام بصاله من وره فستانها

رجعنا لبيتنا لبست بدلتي اختاريتها لون احمر جان جلال عاجبه البس احمر بس كلتله ماريد احمر كلت من يجي يتفاجئ بيه
وجان بيتنا بنات خالي وخالاتي وبيبيتي هم جايه
غرام راحت لبيتها تبدل وترجع
دخلت ايمان ونبأ
ايمان اول مشافتني كالت ... شون حلوه طالعه تخبلين
رونق ... صدك الاحمر لايكلي
ايمان... ولج اذا انتي ميلوكلج يلوك لهاي .. وتاشر على نبأ الي ضربتها من شافت ايمان تأشر عليها

نبأ... هاي الاجواء اني عايشتها قبل بحنه غرام واسد هم من طلعنا من بيتنا امي كالت وين انتظروا روح سوه
بس احنا نهزمنا كتلها اني اخت العروس حتى تعوفني اجي

رونق.... بدت الحفله وناس تجمعت وصارت اجواي حلوه اغلب الموجودين صار فتره ممجمعين هيج جمعه بحيث كل يحضن ويبوس ويركص من كل كلبي
البنات مقصرن بركص وكل شويه احد جارني اركص
كل الناس موجوده الا غرام مختفيه
كلت لايمان تروح شوفها وينها هي كالت البس واجي

ايمان... بهذا اليوم جنت لابسه فستان اخضر بس مستر
بس بي جاكه لفوك الركبه واصله بحيث ياهو يتعجب من جمال الفستان واصلا الكرايب صار فتره مشايفيني بحيث من شافوني نصدموا بيه يكلولي شبسرعه كبرتي هيج
لابست العبايه وحجابي وطلعت اروح للمشتمل اشوف غرام وينها لان تاخرت
بس بت عمي كالت شفتها راحت لبيتكم دخلت لبيتنا واني جنت مستعجله حتى ارجع للحفله ومنا فستاني طويل كلسع متعثره بي
منتبهت الا واحد كمز من المرجوحه عليه شون فزيت عبالي فد بزونه جلب يعني ممنتبه نهائيا احد كاعد
باوعت لكيت قصي يضحك يابه اني شفته قصي شبعته رزاله بالاخير سكتت لان هو ابد مجاوبني ظل بس يباع عليه حتى اني ستحيت من نفسي لان حسيت جاوزت عليه ردت الطف جو كتله... اكو واحد يسوي هيج والله كلبي راد يوكف

قصي ... اسم الله على كلبج عيني شمدريني هيج سرحانه وتمشين شطولني شعرضني مشفتيني

ايمان ... عبرته اريد ادخل لبيتنا كلي ... شكو طالعه هيج ولج

ايمان... نداريت عليه كتله... تجي ويايه ... شفته ابتسم وطلعت غمازته كلي ... وين

ايمان... ندور على الي اخذ رائيك .. عفته ودخلت جوه

لكيت غرام وامي خطيه يحضرون بتجهيزات حنه الولد
وكفت ساعدتهم وامي كلسع مرزلتني الي ونبأ لان عفناها ورحنا يم رونق كملنا شغل ورجعنا للبيت عمي
غرام نزعت العبايه شون حلوه طالعه الكل تعجب عليها
وهي شويه سمنانه من خلصت امتحانات يعني طالعه تخبل
تمشي ويصيحون وين اسد عليج شون طلعج من البيت هيج وحتى اني استغربت شون قنعت اسد بفستانها هذا

نبأ.... جنت متونسه كلش بحنه رونق عبالك حنه اختي اني كلش قريبه على رونق اجتي عمتي ام محمد فلزمتها حتى اكعدها لان رجلها متكدر تمشي خطيه لزمتني تبوس بيه وتغور عماتي الباقيات دكلهم عدكم هيج جنه حلوه يعني خجلت شويه من حجيها 😂

غرام ...رجعت من صالون لبيتي
جان اسد ماكو هو اصلا خفر رجع بارحه بالليل فيعني راد يشوف فستاني مقبلت كلتله باجر شوفه من البسه هو جان تعبان معاندني استسلم ونام وكعد صبح جان عنده شغل ويه جلال وفهد علمود حنه الولد ورجع وصلنا من الصالون ورجع يجيب شغلات والاكل الي موصيه للحنه فيعني نهائيا مشافني
لابسه فستان قصير وقصير كلش 🙃 والفوك مكشوف بدون ردان لونه اسود وصدر بي ذهبي
لبست العبايه وحجابي ومريت على عمتي لكيتها خطيه وحدها وتحضر شغلات حنه للولد
حضرت وياها وكملنا ورجعنا للحنه امي بس شافتني كالت يمه غرام شدعوه هيج فستانج قصير
كتلها ياعيني هي بس نسوان ومحد يصور وباجر الستر كله حنلبسه بالعرس
كالت والله ماعرف شون قبل اسد عالفستان هذا ابو شبرين
التهينا بالحفله جان يوم كلش حلو وصار مده ممجمعين هيج وفرحانين خاصه وره وفاه جدي

حتى انمار من زوج زوج بكارونا وهيج بس زفه لاحد راح ولا شي فيعني كل جان عده طاقه مكبوته

اجتي امي كالت اسد بره يريدج يمه من كالت اسد يريدج كلت هلا اجه لبست عباتي وحجابي وطلعتله جان واكف بالكراج ومبين مضوجه جمال
بس شافني جايه ابتسم كال هلا يكلون عالكتها جوه بركص
غرام... ابتسمت اله كتله... من دخلت لحد هسه ماكعدت

اسد... عاد انتي منو يكدر يكعدج شكو لابسه هاي خل اشوف شنو لابسه

غرام ... بعدين عود بالبيت وابتسمت اله
ضيك عيونه كلي والله جنج جايبه العيد جوه العبايه

غرام .... لا اصلا لابسه متحشم
اسد... اي مبين
غرام.... انطاني جمال ورجع للحنه مال الولد

....
رونق... اجتي عمتي كالت جلال اجه يريد يدخل يلبسج الذهب لان جنت ملابسه نيشاني
فجاءه الكل صار مستور 😂
دخل جلال جان طالع بالقاط يموت اول مدخل منزل راسه يستحي من وصل يمي رفع راسه شافني بسرعه رسمت الضحكه على وجهه وكف يمي تقرب همس باذني شطالعه بالاحمر
رونق... عجبتك البدله
جلال ... الي لابسه البدله عاجبتني اكثر

رونق... اجتي عمتي انطته الذهب يلبسني وجان يتحجج بتلبيس الذهب ويهمس باذني ولج ياريتني ماكلت لبسي لون احمر كمت ماشوف دربي وعلي

يخليني اضحك اجتي نبأ بصفي دكلي جان يحجي وياج وانتي ضحكتج واصله لاذنج

ظليت مبتسمه الها اعرف تغار عليه 😂 اني صراحه هم اغار عليها من محمد

كمل وطلع بس طول ماهو واكف بس يباع عليه هو هم يستحي يباع عالموجودين مع العلم كلها كرايب

كملنا الحنه واني لابست بدلتين وبعدها ناس بدت تخف وبقى الي بس بيته بعيد
نزعت بدلتي ونزلت حتى اشتغل ويه البنات نظف البيت بس خطيه محد قبل اشتغل يكلولي عروسه روحي رتاحي
......
غرام .... كملت الحنه اني كتلهم حروح ابدل واجي حتى نساعد بالتنظيف اخذت جمال وطلعت دخلت البيت جان هدوء كلت همزين اسد ماكو حتى ابدل بسرعه وارجع
ظل جمال يبجي لان نعس غسلتله وبدلتله وخليته بفراشه ينام
هسه فتحت الكنتور اشوف شلبس باب الغرفه نفتحت
نداريت بطئ اشوف رده فعل اسد لكيته صافن عليه مصدوم اني لزكت بالكنتور
ردت اسوي الموضوع عادي كتله... ها كملت الحفله

اسد... شنو هاللبس
غرام .... ابتسمت اله تقدمت خطوه وتخصرت اله كتله ... حلو .. شفته دخل وسد الباب تقدم عليه كال ... اسئلج سؤال انتي مقتنعه بهذا فستان

غرام... نزلت راسي عالفستان كتله ليش شبيه
اسد... انتي مقتنعه هذا فستان
غرام... هزيت راسي ب اي . قابل شنو
اسد ... والله اني اشوفه قميص نوم الطالع اكثر من الي مضموم

غرام.... ياحبيبي هي بس هالمره ... قاطعني كلي.. وشنو يعني بس هالمره لازم ننزع هدومنا

غرام.... ظليت اباوع عليه نظره الفقيره بس كلشي ميفيد ويه اسد
عافني وطلع من الغرفه باوعت على نفسي بالمرايه كلت .. والله حلو شبي
طلعت وراه لكيته كاعد بصاله يدخن ويصفح بتليفون رحت كعدت يمه نوب من اكعد الفستان يصعد اكثر
خليت ايدي على رجلي
باوع عليه هز ايده ورد باوع بتليفون
نمت على جتفه كتله .. سوسو شنو زعلت ياعيني قابل يوميه اني لابسه هيج

اسد.... يعني والله اذا احجي هسه طلعيني اني الغلطان فاسكت احسن

غرام ... تقربت عليه بسته من خده كتله .. بعد مالبس هيج

لتاف راسه عليه كال... والله ياغرام اذا سمعت او عرفت احد ماخذلج صوره بهذا لبسج ادفنج مكانج

غرام... والله محد صور ممنوع جان تصوير ابد.. رجع ندار كتله ... هسه شنو
اسد... شنو

غرام ... صالحنا . شفته ابتسم كرصته من خده كتله ... شكد حلو انت هيج حباب

وكفت حتى اروح ابدل كال خرب عشريتج على هالفستان
تقصدت افتر كدامه بي كتله والله يخبل الكل تعجب عليه
شفته راد يحجي عرفت يريد يفشر كتله يله حروح ابدل
دخلت بدلت ورحت لبيتنا
ساعدنا بتنظيف البيت وسوالف وضحك اجتي بت خالي ميار هاي لعابه نصيحلها من الجمال الشايلته اجنبيه شعر اصفر وعيونها زرك بس شايله ادب بحيث نكللها انتي من صدك جمال واخلاق

كالت نغسل الكراج اني وياج لان بقى بس الكراج
كتله يله حتى نخلص منه
طلعنا عليه غسلنا هي اخذت صونده مني وجانت ترش بالماي واني انشف الكراج
دكت الباب صحت منو كال .. اني ولج فتحي

رحت فتحت الباب طب فهد ممنتبه لميار كال .. لازم خلصت حفلتكم

غرام... اي من زمان ونظفنا البيت
فهد... شوفيلي شي اكله بربج ميت جوع

غرام ... فهد جان مركز ويايه رفع راسه شاف ميار ظل فاتح عيونه عليها هي ممحجبه وجانت ممنتبه هو يباع عليها ملتهيه تغسل الكراج
سويتله نحن هنا وين رحت يابه... تقرب عليه همس بصوت ناصي.. هاي لعابه منو

غرام ... بت خالي ميار
فهد...هاي اجنبيه
غرام... اكله بت خالي يكلي اجنبيه
فهد... وانتو شبيكم مطلعتوا هيج
غرام ... ليش عيني شبينه اصلا هي طالعه على امها
كتله انتظر خل اشوف باقي اكل حتى اصدق بي الك

غرام كلي... صدقيلي بهاي ويأشر على ميار

خربني ضحك عفته ودخلت اشوفله اكل دخلت شويه ودخلت ميار ورايه كتلها ... ها شو دخلتي

ميار ... والله هذا ابن عمج شكد حباب كلي عوفي اني ا اكمل الباقي واغسل بدربي الشارع

غرام... باوعت على ميار كتلها .. فهد
ميار ... اي
غرام... ظليت بكلبي اكول ياعيني يافهد كمت تتلوك الها

اخذت الاكل وطلعت عليه لكيته يرش بشارع
كتله ... والله معرفت بيك هيج خدوم

فهد... بربج هي هاي مال تغسل الكراج هاي واحد يكعدها كباله بس يباع عليها ويكول سبحان الخالق

غرام... هزيت بايدي كتله ... للاسف تحبون بس المظاهر

فهد... اي اذا هيج المظاهر قابل
غرام..... هاك هاك .. اخذ العشه وراح

دخلت جوه على رونق جانت كاعده تراسل جلال ومرسومه ابتسامه على وجهه اخذتلها صوره بدون متدري
ودزيتها لجلال كتبتله لو اعرف سر ابتسامتها شنو

دزلي.... ام جمال الورده كثرينا هيج صور

دزيتله... تدلل

كملت كلشي كتلهم يله حرجع اني مقبلوا بنات خالاتي وخالي الا ابقى ابات بس كتلهم خطيه اسد وحده واصلا ساعه ب٣ مظل شي للصبح
خابرت اسد طلعلي وكف بالباب وطلعت اني تمشيت اله
دخلت وهو يمشي ورايه كلي .. جان بقيتي شعندج راجعه هيج وكت

غرام... نداريت عليه كتله .. والله محسسني جنت افتر بشارع غير هسه كملنا واصلا رادوني ابات بس اني مقبلت كتلهم اسد يبقى بوحده خطيه

اسد... ياعيني دمعت عيوني

غرام.... ههههههه والله شبيك ...دخلت جوه سبحت وكملت ودخلت للفراش جان اسد خال ايده على عيونه
شلت ايده وخليتها ونمت عليها كتله ..شنو نمت

اسد... لا
غرام... بسته من خده كتله ... احبك
يحجي وهو مغمض
اسد...هواي تتحارشين بيه صايره
غرام ... فجاه صار فوكايه كتله ها ابو الاسود ترى باجر ورانه عرس

اسد.... واني هم اريد اعرس

غرام.... حاوطت ركبته كتله .. تحبني
اسد... اموت عليج
غرام... حلوه طالعه اليوم
اسد... تموتين
غرام... حضنته قوي و.............
..............

رونق..... كعدت على صوت امي دكلي يله ماما مظل وكت شوكت ترحين للصالون وراج جلسه التصوير
جنت نايمه جوه ويه الحبايب كمت لكيت نص كاعد نص نايم رحت غسلت وبدلت انتظرت نبأ اجتي هي وغرام واخذنا فهد للصالون ...... يتبع
.............
القسم ثاني والاخير يكمل وينزل حبايب اسفه عالتاخير ❤️❤️❤️