حب جنوني الفصل الثالث وثمانون 83 - بقلم سوزان ليث

رونق..... كعدت على صوت امي دكلي يله ماما مظل وكت شوكت ترحين للصالون وراج جلسه التصوير
جنت نايمه جوه ويه الحبايب كمت لكيت نص كاعد نص نايم رحت غسلت وبدلت انتظرت نبأ اجتي هي وغرام واخذنا فهد للصالون
...
غرام... كعدت صبح من وكت اريد اروح ويه رونق للصالون
جان اسد وجمال نايمين بدلت عالسريع
تقربت على اسد بسته هو برعه حس كال ... هاحبيبي وين
غرام... رايحه للصالون ديربالك على جمال اوكي
اسد... ماشي حبيبي عندج فلوس
غرام... اي عندي
اسد... ماشي مو تتاخرون
غرام ... ان شاءالله منتاخر يله باي
طلعت لبيتنا فهد اليوم ماكو منه فد خدوم
صعد بسياره ظل واكف كناله يله امشي كال شنو بس انتو ترحون

غرام... اي بس احنا ... اني اعرف قصده على ميار بحيث ظليت اضحك عليه يكلي انتي مو مال واحد يحجي شي كدامها تفضحيه بضحكج

وصلنا للصالون اني ونبأ بس سوينا مكياج
حتى رونق جانت بدلتها مال محجبات ومن لبستها شون حلوه طلعت بيها الكل تعجب عليها
بدلنا اني ونبأ بصالون لان ماعندنا وكت نرجع لازم روح لجلسه التصوير وياهم
واجه جلال حتى ياخذنا من شاف رونق ظل صافن عليها عبالك مشايفها من زمان

....
رونق.... شعور التوتر والحماس بنفس الوقت من اجه علينا جلال حتى ياخذنا نصور جنت منتظره اشوف رده فعله واني لابسه الفستان الابيض
جانت نظرته كلها حب تقدم عليه لزم ايدي حتى يساعدني اصعد للسياره ميكدر يحجي شي غرام ونبأ ويانه بسياره بس وهو يسوق كل شويه يباوع عليه ومبتسم
وصلنا للمكان تصوير واخذنا كم لقطه ورجعنا لبيتنا
امي من شافتني ظلت تبجي واني صرت ابجي وياها
الموجودين صاروا يسكتون بينا اني جنت شايله هم كلش جبير شون اعوف امي بوحدها اني يوميا اكعد بنص الليل انزل اكمل نومتي يمها بغرفتها ومرات اصلا انام يمها اني كلش متعلقه باامي
يعني صح فرحانه حزوج الي احبه ويحبني بس ممتملكني شعور الفرحه بشكل كامل لان حتبقى امي وحدها .

اجتي نبأ عليه ... دكلي شكال جلال من شافج
رونق... كلشي مكال
نبأ... يعني مكال طالعه حلوه شي
رونق... والله كلشي محجه
نبأ... يا شبي خاف متوتر
رونق... باوعت على نبأ كتلها ناس كلها تتوتر الا جلال
نبأ.... بس هو مشفتي شون نصدم من شافج بالبدله
حتى غرام كالت هسه يروح يحضنها

رونق.... هههههه هاي غرام متاثره بالاعراس الشوفهن...
اني هم استغربت ليش محجه شي بس اني اعرف جلال مو من نوع الي يحجي كدام احد الا نكون وحدنا يله يفتح كلبه الي .

وره ساعه تقريبا سمعنا صوت المزيقه عالي جان والكل طلع يشوف
اجتي بت خالي كالت هاي المزيقه بيت العريس
شويه واجتي الزفه دخل جلال اول مدخل باس راس امي
وكف يمي لزم ايدي قوي اخذونا صور ويه العائله شفت امي تبجي واني وياها ابجي صرت
من طلعت عمي حجه ويه امي من شافها تبجي كلها ترى هي يمج شوكت ماترديها بس خابريها لو انتي تعاي عليها
التافيت على غرام اريد تسكت امي لكيتها هي هم واكفه تبجي عاد هاي ام دميعه بس شوف احد يبجي تبجي وياه
بالكراج جماعه جلال وفهد سوو اجواء حلوه
بعدين طلعنا للسياره

جان جلال يسوق السياره سولنا فره والاهل جانوا الكل فرحان

وبعدها رحنا للفندق الكل يريد يدخل ويانه بس اسد مقبل كال الي اشوفه نازل من سياره ياويله

الفندق جان هديه من اسد كال حتى تاخذون راحتكم
صعدنا للغرفه وجانت غرام ونبأ وعمتي ام اسد ويانه

دخلونا للغرفه وكفت عمتي تحجي ويه جلال
ونبأ وغرام يمي نبأ كالت ... ها ياحلو شو الوجهه صار ليمونه

رونق.... صارت صدك السالفه 🙄
غرام.... الحظه الاخيره للهروب
رونق.... هههههههه لالا خطيه جلال
نبأ.... خطيه باعيها هي فرحانه اكثر من جلال
رونق..... ضربتها على ايدها كتلها وليش ماافرح
غرام.... حبيبتي ان شاءالله دايما فرحانه
رونق... غرام مو تبقين امي وحدها
نبأ.... لتخافين بيت بيبتج كلها يمها باقيه
غرام.... لا ماعوفها حرجع يمها ابقى
رونق..... اي حبابه والله بالي يمها
نبأ.... لا اليوم اريد بالج يم جلال

عمتي .... يله يابنات خل ننزل
رونق.... اجتي عمتي بوستني و باركتلي
وغرام هم
نبأ ظلت حاضنتني بالاخير اجه جلال سحبها كلها كافي شون لازكه
نبأ التافت عليه كلتله ديربالك عليها
جلال... ميخالق يله عاد حتى بهذا اليوم لازكه يمنا

بعدين سلموا وطلعوا التاف عليه جلال كال ...اف واخير صرنا وحدنا

رونق.... ابتسمت اله كتله ... بس العرس جان شويه بسرعه خلص تقرب عليه حاوطني من خصري كلي ... هو هذا المطلوب

رونق.... ظليت ساكته شويه ارفع راسي عليه شويه انزل مستحيه منه كلي... تعرفين اول مشفتج بالبدله اجاني فدشعور غريب حسيتج صرتي الي من صدك

رونق.... حتى اني من شفتك وضع غريب جان بالنسبه الي ماعرف كل مره اشوفك وارجع لبيتنا او انت شوفني وترجع لبيتكم

جلال... هالمره مرجعنا لالبيتنا ولابيتكم
رونق.... ههههه اي
جلال.... طالعه تخبلين بالبدله
رونق.... ها بعد وكت
جلال..... مو مشفتي امه محمد كلها فوك راسنا اريد احجي كلمه الكه نبأ بنص
رونق.... ههههههه .. انت هم طالع حلو
جلال.... اني دايما حلو
رونق.... بس مو احلى مني
جلال.... متعبتي من هاي .. وياشر عالبدله
رونق.... مو كلش يعني احس بعدني مشبعت منها ... ابتعد عني كلي يله بدلي ملابسج حتى نتعشى ترى من صبح مماكل

رونق... ماشي ... رحت عالجنطه اخذت ملابسي وكفت ماعرف وين ابدل باوع عليه كلي ... ها حرتي وين تبدلين
رونق... ابتسمت اله وهزيت راسي باي
جلال... اغمض عيوني وبدلي
رونق.... ظليت اباوع عليه وهي يضحك اعرف ضحكته مال خباثه كتله ... لا حدخل للحمام

ظل يصيح تعالي بدلي هنا بس اني ماقبلت بدلت وصحت عليه اخذ البدل
غسلت وبدلت فتحت شعري جان مسشور عدلته وظليت واكفه بالحمام استحي اطلع بعدين اشجعت وطلعت لكيته نازع الستره والرباط وقميصه مفتوح كلي ها واخير طلعتي
دخل هو غسل واجه شافني تفرج من شباك جان اطلاله حلوه وكف يمي خل ايده على جتفي كلي عجبج المنظر

رونق... اي كلش حلو ... تعشينا وصلينا وبعدها كعدنا بالبلكونه سولفنا عالعرس وصنفنا وضحكنا محسينا عالوقت الا لمن سمعنا اذان الفجر
كمنا صلينا وبعدها سد الضوه وبقت الغرفه بيها ضوه خفيف اجه لزم ايدي باسها و وحضني كل قوته همس باذني احبج رحنا اني وياه لغير عالم زاد حبي اله لان حسيته فاهمني بهذا اليوم مجبرني على شي خل الموضوع يمشي بهدوء ......

......
غرام.... من رجعنا من صالون لكيت اسد وجمال بيت عمي اني جنت مستعجله اريد ابدل حتى ارجع لبيتنا لبست فستان طويل سمائي ونهايه الردان بي شغل كرستال جان كلش شكله راقي حبيته كلش ولابست حجابي
وجنت البس بالحذاء دخل جمال عليه يركض شلته بوسته وجان مشتاقلي ظل نايم على جتفي دخل اسد وراه شافني مبدله كلي ... ولج شطالعه

غرام كمت وكفت وافتر بالفستان كتله حلو

اسد.... اي هذا حلو مو مال بارحه الي بكد جف الايد.

خلاني اضحك عالتشبيه بدل وبدلت لجمال وطلعنا لبيت عمي دخلنا بالحديقه اخذنا صور ومجلبه باسد لان لعبت نفسه بصور
طلع فهد علينا كلي تردين اخذلكم صور كلتله اي ياريت ظل ياخذنا ونسوي حركات تالي اسد زهك عافنا ودخل
اجه فهد عليه كلي غرام بيت خالج بيا سياره حيصعدون بزفه

غرام.... باوعت عليه كتله وليش تسئل
فهد.... اذا مجايبين سياره سيارتي مابيها احد بس امي
غرام.... ماعرف بيا سياره يصعدون همه خالي جابهم ورجع عود اذا مالكوا سياره اصعدهم وياك شفت فهد ابتسم كلت بكلبي اكول مو عوايدك تتبرع تاخذ صور

عفته ودخلت جوه سلمت عالموجودين وكعدت شويه وتالي رحت لبيتنا من اجتي زفه اني مادري صار بيه بعرسي مجيت هلكد يمكن نقهرت على امي من شفتها تبجي
اجه اسد عليه انطاني كلنكس كلي... شكو تبجين ياعيني قابل مهاجره هي شو قربت عليج بزايد

اشرتله على امي عاد راح حجه وياها وظل يشاقيها
طلعنا نصعد بسيارات اشرلي فهد على ميار
رجعت على مرت خالي كتلها تعالي صعدي ويه اخو اسد سيارته بس ام اسد بيها عاد صعدوا مرت خالي وميار واختها ويه فهد وعمتي ام اسد وياهم
مشوفون فهد يراوغ بين سيارات والا يوكف يم سياره جلال
جانت اجواء حلو تونسنا ايمان جان صاعده ويانه هي وبنات عمي
وصلناهم للفندق ورجعنا لبيتنا امي جانت كاعده وسولف ويه خالاتي كلت همزين التهت بعدها دخلت للغرفه مالتها دخلت وراها لكيتها تبجي رحت يمها كتلها ... هسه شكو تبجين ياعيني
ام غرام.... والله صح البيت مليان ناس بس احسه فارغ بدون رونق

غرام... تخصرت الها كتلها ... ها يعني بس رونق تحسين بغيابها واني

ام غرام.... لا والله اثنينكم عزيزات بس انتي تعلمت عليج تروحين وتجين بس رونق وره ما زوجتي صرنا بس اني وياها تعلمت عليها دايما يمي

غرام.... حبيبتي هسه هي وين راحت شو بصفج يوم تروحين يمها يوم تجين يمي واصلا منو كلج حتبقين وحدج ترى متخلصين من عدنا حتى اذا زوجنا

ام غرام.... شعندي غيركم اني الله يحفظكم الي

غرام.... رجعت للبيت اني وجمال اريد ابدل لكيت فهد يمنا
اول مادخلت كلتله ... اهوووو يعني شلت بيت وحد ومخلصت منك

فهد....اهووو باع منو تحجي .
اسد.... تعالي هذا من شوفيه كاعد هالكعده كولي عنده موضوع
فهد.... والله ياابو جمال بس انت تفهمني
غرام.... رحت كعدت يمهم وجمال راح كعد بحضن فهد الي مطلع عينه بتليفون
كتله ... خير شكو
فهد.... هسه ثبرتونا يعني مااجي لبيت اخويه
اسد.... لا يابه هلا بيك بس هو اني هسه عفتك لحكت تشتاقلي

فهد.... اشتاقيت لجمال
غرام.... جمال واهزله بحواجبي

فهد.... خوبن انتي ولا يكدر احد يكلج شي تفضحيه

غرام.... هسه شكو احجي عاد

فهد... بت خالج مزوجه مخطوبه
غرام... لا هاي ولا هاي بعدها تدرس
فهد... ها لعد سمعت امها دكول لامي انتو هم حضروا نفسكم بعد كم شهر تجون يمنا العرس

غرام... اي مو ملاك اختها مخطوبه وحتزوج بعد كم شهر .. شفته خل ايده على صدره كال... هسه رتاحيت عبالي مخطوبه

اسد.... منيه هاي
غرام... ميار بت خالي
اسد...هاي طالعه من فلم كارتوني
غرام..... هههههه اي هي
فهد.... هسه شنو اهلها ينطون لا
غرام.... ماعرف والله
فهد ... شوفي البنيه يعني لمحيلها شوفيها شدكول

غرام... ميخالف ابدل واروح اشوفها لان باجر يمكن يرجعون
بدلت ورجعت لبيتنا ظليت اسولف ويه بنات خالاتي بعدين صعدت اني وميار بحجه نجيب الفراش حتى ينامون
كتلها... عندج احد معجبه بي بالكليه
ميار... لا والله ماكو
غرام... اذا اجاج احد منا تقبلين بي ... شفتها ضحكت كالت شنو جايبتلي عريس

غرام... اي وشون عريس يخبل جمال واخلاق وعلم وفهم

... ظلت بس مبتسمه كتلها شنو تقبلين لا
ميار .... والله مادري غير اشوف اهلي يقبلون بي لا
غرام... يقبلون بي اهلج لتخافين بس المهم انتي
ميار ... زين منو هذا شايفته اني
غرام... فهد اخو اسد
ميار... الي صعدنا ويه بسياره
غرام... اي
ميار ... مادري هو شكله حباب بس يعني غير اشوف اهلي
غرام.... يعني اذا اهلج وافقوا انتي موافقه .. ظلت تضحك كالت مادري ... مبين مستحيه
نزلت جوه ساعدتهم بالفرش وبعدها امي مقبلت ابقى كالت رجعي لبيتج
رجعت للبيت بس دخلت للبيت ندك جرس اسد كال .. هذا فهد
طلع فتح الباب وودخل فهد مبتسم بس شفته كتله ... يله دز اهلك البنيه ماعدها مانع اذا اهلها موافقين

كلش فرح كال حيحجي ويه امه ويشوف شون ترهم حتى يرحون يخطبها
.......
ايمان.... بيوم عرس جلال جنت واكفه بالكراج نهوس ونصفك من اجتي مزيقه اني واكفه اصفك بت عمي تقربت عليه كالت باعي قصي صاير ثكيل رغم الدك وركص بس باعي ولا تحرك
انتبهت عليه صدك جان واكف بس يتفرج وهاي مو من عوايده
اذكرت بااخر امتحان من اجه عليه وجان هو مكمل قبلي بيوم
اجه سلم وظل يسئلني شونج بالامتحان واني جنت احجي وياه على كد السؤال وبوكتها شكد حاول يلمح الي بس اني جنت اسوي نفسي ماافهم .

من شافنا اريد نصعد بسيارات عاف بنات عمي اجه عليه كلي ... تعالي صعدي ويايه بسياره ماكو احد بس امي ونغم اخته كتله ... لا شكرا حصعد ويه اسد عفته ورحت بسياره اسد
بت عمي واكفه يمي كلتله .. اني اصعد وياكم هو ظل يباع عليه مثل الي يريد يحجي بس استحى يمكن من بنات عمي
راحت بت عمي وياهم اني رحت صعدت ويه ا سد

هو طول الطريق يجيب سيارته الا يم سياره اسد
نزلوا للفندق بقى اسد واكف ويه ولد عمي لان غرام نزلت للفندق
واني وبنات عمي بقينا بسياره عاد نزلنا ناخذ صور بالحديقه مال الفندق بس وكفنا اجانه قصي ظل واكف لحد مكملنا وصعدنا وحده من بنات عمي كالت هذا قصي شبي وين مروح لاحكنا
كتله... مادري ممنتبه بالليل من رجعت جنت اريد انام اجاني مسج من عنده كاتب جمعه مباركه

هو مسج مابي شي بس ظليت اضحك عليه يعني يدور حجه حتى يحجي ويايه دزيتله اني هم جمعه مباركه

رد دز اغنيه سمعتها جانت اغنيه حب وغرام وعشق
دزيتله حلوه
ظل يدز كل شويه اغنيه نص اسمعهن نص اغلس لحد منمت

.....
رونق....كعدت على دك تليفون شفته نبأ جاوبتها بسرعه عبالي بيها شي بس كلت الو جان اسمع هلاهل
نوب طرشت اذني
كالت ... صباحيه مباركه
رونق ... ها ولج شكو من صبح داكه
نبأ... كومي عيني حصير ب١٢ وانتي وجلال لاحس ولا خبر
رونق..... التافيت على جلال الي جان يباع عليه كتلها نايمين بعدنا
نبأ.... امي دكول يله كوموا حتى تجون الكل ينتظركم هنا
رونق... ماشي
كمنا جهزنا نفسنا ورجعنا للبيت جان الكل مجمع يستقبلنا جان يوم حلو العصر رحنا لبيت جدي نسلم على جده حكمه لان مكدرت تجي للعرس واصلا بعد وفاه جدي صارت متطلع على كد اذا عده دكتور
خطيه من شافتنا كلش فرحت بينا ظلت تدعينا من نطلع انطتني هديه لبستني كلاده ذهب
اني وجلال حياتنا متغيرت ظلينا مثل مااحنا منضم على بعض شي اي شي يصير ويانه لازم الثاني يعرف شغله مرات الانسان يضم لان يخاف من العتاب الي يصير اذا حجه اني وجلال تعلمنا منعاتب بعض اذا صار ويانه شي

ظلينا اني وغرام روح ونجي على امي وخاص غرام باايام اسد ماكو تبقى يم امي ومن يرجع اسد اني اروح هي جانت متقبل نعوف ازواجنا علمودها بس منكدر نعوفها وحدها وهذا الشي جان دايما شاغل بالي

فهد حجه ويه اهله وراحوا خطبوا ميار بت خالي
خالي كلش يحب عائله عمي ابو اسد وكلش رحب بفهد
نسيب اله

من قرر فهد يزوج اقترحت على جلال روح نعيش ويه امي رفض الفكره كلش ومقبل عليها نهائيا
خليت غرام تحجي ويه اسد حتى يقنع جلال
واسد كدر يقنع جلال بطريقته
من فاتحنا امي بالموضوع كلش فرحت وكالت الفوك اخذوا كله الكم سوه
وفعلا جهزنا طابق الثاني بيت اهلي النا غرفتي اني وغرام فتحناها عالمخزن وصارت غرفه جبيره النا
وسوينه كعده النا صار عبالك بيت كامل فوك

وفهد اخذ غرفتنا صح عمتي مقبلت جلال يعوفها ويطلع لان كلش متعلقه بيه بس بنفس الوقت هي تحب امي وشافت اني وغرام شون مشلوع كلبنا
جلال شخص يعتمد عليه بكلشي
امي جانت كلش فرحانه بكعدتنا وياها دكول جنت اتمنى الله يرزقني بولد بس هسه صاروا عندي اثنين بس أشر يجوني ركض .

غرام..... اما اني فبعد مااتخرجت صرت اشتغل مساعده ويه دكتوره اسنان حتى اتعلم منها جانت نعمه المعلمه الي مقصرت ويايه بشي مرات شغلات البسيطه تخليني اني اشتغلها حتى يصير عندي ممارسه
وحياتي بين عياده والبيت اني واسد متخلص معاركنا بس اسد صار يجاهل هواي امور حتى ليسوي مشكله
وصار يحب يسمع مني كلشي يصير ويايه
مبطل يحبني ولا اني بطلت واحس كل مايروح للدوام يزيد حبي واشتياقي اله
وحياتي عاديه باايام الي اسد بالدوام اني ملتهيه بالعياده وبجمال ومن يرجع التهي وياه

.....اما ايمان فقصي اكثر من مره دز امه تخطب ايمان وجانت ايمان ترفض بحجه اني اريد اكمل دراسه بس
بعدها قصي تغير وياها خاصه من صارت مرحله ثانيه صارت مشوفه الا صدفه وحست هي خسرته
وصارت دور اخباره
وره فتره اجاها مسج منه كاتب 💬اخر مره باجر تجي امي عليكم هالمره اذا رفضتي بعد خلص

بوقتها اجتني تشوفني مسج وكعدنا نحجي اني وياها
هي جانت شبه مقتنعه وخاصه حست بمكانه من غاب
ومن اجتي امه على عمتي تخطب عمتي جانت خجلانه منها لان تعرف ايمان هم حترفضه
بس من سئلتها جان جواب ايمان موافقه
الكل ستغرب شون وافقت جانت رافضه
بس هي حست نفسها تعلقت بي وحبته وهو انسان مرح ويحب الحياه تفقوا يكملون جامعه ويزوجون

عكس فهد الي جان مستعجل على زواجه وجان الكل يجهز لعرسه

نبأ.... اما اني فحياتي مابيها اكشن هواي غير قبل سنتين من عرفت من صديقتي استاذ علي هو سائل عليه عباله ممزوجه ومااجه عليه بس سئل دكتوره عدنا وسائل طالب ويانه ومن عرف مزوجه ابد بعد ماشفته يباوع عليه
ومو هو الي داز جماعه عالبيت يسئلون عليه جانوا غير ناس بس صدفت التوقيت جان سوه
من عرفت بهذا الحجي اني صراحه ظل ضميري يأنبني الا احجي لمحمد احس اذا ماحجي يعني مسويه شي غلط
وحجيتله صح محمد تقبل الموضوع بس بعدها محمد غيرته صارت اقوى من قبل حتى اكثر من مره اريد اعوف البيت واطلع بس عمتي ام محمد متقبل وصالحنا اني ومحمد يمكن مشاكل وغيره محمد قوت لان جان يريد نسوي طفل واني ماقبل وهو جان يتخبل كل مااني ماقبل
بس من جنت اداوم مرحله رابعه صارت عندي اعراض بوقتها جنت اجذب نفسي واكول اوهام هاي بس بعدها اكتشفت نفسي حامل
محمد كلش جان فرحان بالحمل عكسي جنت خايفه لااعيد تجربتي الاولى حتى جنت اخاف افرح ليصير شي
لحد ماشرفت ست الحسن ودلال فاطمه الي خلت الكل يتعلق بيها محمد وين ميروح ياخذها وياه واني اتعارك اكله حسويها ولد هلكد مطلعها وياك
ومرات اسد يجيب جمال علينا يكله لمحمد جبت ابني حتى يلعب ويه بنتك
ومحمد من كل عقله يضوج من اسد يكله هيج بس اسد يعرف شون يستفز محمد 😂

... ماكو شي يظل على حاله يوميه شي جديد يصير ويانه شي زين شي موزين
بس المهم نتعلم من الي يصير ويانه
اتمنى حبيتوا هذا الجزء اعرف هواي تعلقوا باابطالنا بس هي قصه اول وتالي الها نهايه بس اتمنى عجبتكم نهايتنا ❤

شكرا لكل الي تفاعلوا ويه القصه ودعموني بكلامهم الحلو وانتظرونا بقصص جديده وابطال جديده

احبكم 💙
سوزان ليث....