رواية ??هجير الشتاء?? الفصل العشرون 20 - بقلم Shaqraa

مساء الجوري حبايبي
هجير الشتاء
الجزء السابع عشر

عهد تتوسل بسيوان..بس هو يتصرف ببرود ومسيطر...
اسكتي بت عمي ليش الخوف؟؟
قابل خليل ميدري بيج جنتي مطلقة؟
قاطعته اني..
لعد وزهير شنو دوره وحملها الهددتها بي؟؟؟
جاوب ببرود ..
ابوج مطفي وصوجه..
بقيت اعيط عليه...
هااا صار مطفي مووو؟؟؟
بسيطة الا افضحكم اليوم يمه اخلي يذبحكم...
اباوع لعهد تقربت منه وتضرب بي وتعيط...
كله منك يا ناقص انت راح تهجم بيتي..
مدام تدري بشتاء موجودة ليش حجيت وخليتها تسمع الله ينتقم منك..
شوف اذا مااخلي ابوها يطلكها منك بسيييطة...
دفعها ع كيف وعله صوته...
شوفي ولج رعنة..
ذاك ماضي وراح وخليل اذا يحبج صدك ميحاسبج..
واذا حاجاج ع مرضج كليله لخاطرك سويت هيج
ردت اساويك بالزلم واخليك تتباهى عندك ولد..
وهو بكل الحالات ميعرف تطمني...
اباوع لعهد هدات صدك وسالته..

شلون مو راح تكله شتاء؟؟؟
تقرب مني صاريمي كلش وحجه...
لا مراح تحجي شتاء حبابة مو مشمش كلامي صح؟
رجفت وخفت من كلامه القريب مني...
جاوبته واني ادعي القوة ..
لا احجي لازم اكول لابوي انتو مستغفلي وتخونوه...
لزم زندي قوي...
لزمي لسانج لااكصه ..
محد خانه ابوج ومرته شريفه وصاينته والصار بالماضي طيش ومو بيدها...
همس باذني...
اذا انفضحت عهد اكول لابوج انت مو بنية واني حبيتج وسترت عليج...
اباوع لعهد نظراتها تتنقل بخوف بيني وبين سيوان...
واني انصدمت من كلامه..
باوعت بوجهه بخوف...
هز راسه وكمل...الصار بينج وبين كرار احجي لابوج ..واني متاكد انت مو بنية لان قصة تركج وماكمل...
سولفيها ع الدبة...

عهد تحاول تسمع شنو نحجي بس هو منصي صوته...
كمل كلامه وكال..
اني رايح هسه وموضوع الطلاك شيلي من راسج متفقين؟؟؟
يلا عهد تطمني بتج الجبيرة عاقله متفتن...
سلمينا..
طلع واني مصدومة من حقارته ومحتارة نفس الوقت..
هذا شلون رح ارتبط بي...
اباوع لعهد تقربت مني..
شتاء عفية لتحجين اني احب ابوج واريده ..
وحتى سيوان يحبج بس هو يسوي هيج حتى ليخسرج..
خنكتني العبرة ..باوعت بوجهها ونزلت دموعي...
شدعي عليج انت وس...
قبل لا اكمل كلامي حطت ايدها ع حلكي وشهكت...
اروحلج فدوة لتدعين..
دعيتي علي وخسرت طفلي ورحمي انشال لان ظلمتج..
ضلت عيونها تصب ..

خزرتها...هسه عرفتي انت ظالمة؟؟لج امي خسرت ابوي بسببج ...
وبعدين خسرت حياتها من قهرتها...
مو بيدي ابوج ماردت اضيعه..
لان حبني واحترمني ومستحيل افرط بي...
وامج موتتها قدر لان هي اصلا مريضة..
امج بيها سكر من طرحت الطفل الصار وراج...
عهددد لتبررين وتصيرين شريفة براسي..
اني باذني سمعت كلام سيوان وياج...
جرتني من ايدي ..اكعدي اني احجيلج كلشي...
وانت بكيفج حكمي بس لتدعين...
كعدت واجى مهيمن يزحفلي شلته بحضني وهو يلعب بالنجمة الي بتشيرتي...
كعدت عهد ومتوترة ووجهها ينطي الوان...

شوفي شتاء احجيلج كلشي بس بروح امج ابوج لا يعرف..
اكيد متردين البهذلة لاخوانج ويمكن ياخذهم مني...
يصيرون يتامى مثلي لا ام ولا اب...
وانت جربتي اليتم ...
هزيت راسي الها واني مصدعة كلش ودايخة..
بس مركزة وياها عدل اريد اعرف مدى صدقها...
بلشت تحجي وتفرك بوجهها
.......
شوفي اني جنت بالخامس علمي...وحبيت اقاربنا صايغ اسمه زهير...
هو يصير ابن عمة ابوي بس شاب مواليد 78...
وحيل قريب من العائلة..
يعني يعتبر بيتنا بيت اهله...
صارت بينا علاقة حب مدة طويلة...
وراها خطبني جنت بالكلية ..
وبهالفترة هو استقل بمحل لوحده قبل جان وي ابوه ...
وهواي تغير بس بقى حبي اله يزيد اكثر...
ضلينا نطلع لوحدنا ومرات الظهر ياخذني للمحل...
ويصير بينا مثل كل مخطوبين بعد تعرفين شنو...
بداخلي اكول كلش اعرف شيصير..هو ابن عمج متوحش ميفرق بين خطوبة وزواج...
والجان معارض سيوان ..
وكم مرة يحذرني يكلي ميفيدج وحجه كلام هواي الى ان خربت علاقتي بي وتقاطعنا بسبب زهير....
هه ع اساس سيوان احسن منه المهم كملي..
لا غلطانة هواي سمعي للنهاية وحكمي...

اي كثرت لقائاتنا وضل ياخذني لبيتهم وشوي شوي ضلينا نتمادى..
الى ان ...اخذني ...حجتها وبجت وغطت ايديها بوجهها...
مهيمن ضل يبجي بحضني...
كتلها سكتي ابنج اخترع..
اخذته بحضنها وسكتته..
استرسلت بالكلام...
ورا مااخذني خفت كلش وكتله نتزوج بسرعة...
كال اطلب واحد ٧٠ مليون...
بس يرجعلي نتزوج...
واني ابد ماشكيت بكلامه...
بالاول جنت خايفة تالي صارت عادي وصارت علاقتنا اكثر شي فراش..
حسيته ضل يتهرب..
الى ان حبلت وكتله..
كال لتحجين لاحد اني اسوي حل...
وضل هالحال خمس اشهر ونص...
كل مااكله يكلي صبري ومابقى شي وصبري...
الى ان فد يوم خابرته ومن الليل للصبح اخابر جهازه مغلق...
يوم ثاني العصر رحت لسيوان للمحل...
لان هو قريب علي واعرفه يوكفلي...
رحت كلت احجيله كلشي حتى يساعدني اخاف زهير شرد لان اخر فترة بقى يتسحب...
دخلت للمحل وسيوان يمه زباين مشاهم وباوعلي...

شعجب اجيتي شنو حلمانة؟؟مو احنا نبزز وبينا كخة....
باوعتله بجيت ...
عفية سيوان زهير وين؟
اجه يمي متفاجأ وخايف من وضعي...
شبيج ولج؟؟؟؟
جاي اسألك جاوبني زهير ماكو من امس لليوم...
ليش هو مو طلكج؟؟؟
كمت لطمت صدري واني ابجي شنووووو شلون طلكني صخااام بوجهه...
جاوبني وينه...عليت صوتي وسيوان متمشي عليه هالسوالف حس اكو مصيبة...
كال امشي نروح لبيتنا ونحجي فضحتيني بالسوك...
طلع وحاجه صديقه كله عزل المحل...
وصلنا للسيارة واني ولا كلمة...
من صعدنا كتله وينه احجي ولك مو راح اموووت....
نفخ بعصبية...
سافر امس للاردن...
صخااام شلووون ليش؟؟؟!!
شنو ليش؟اني السمعته طلكج امس وسافر ...
ولك اني انتهيت يا زهير يا نذل يااحقير....بقيت الطم ع خدودي وابجي...
هو ماسالني ليش هيج ردة فعلي لان جان مفتهم اكو شي...
الى ان وصلنا لبيتهم...
امه ع طول العصر وابو مو بالبيت...
دخلنا بس احنا...
شمر السويج علي حيل اجه بكصتي عطت....
كال..احجي ولج .....شمسوية ويا احجيييييي؟؟؟؟؟؟
باوعتله واني ارجف...
اعرفه اعصاب ويخوف بس ماكو واحد يساعدني مثله ميتركني...
حجيتله مختصر..
بس فهمته العلاقة صارت زوجية واني هسه حامل ...
بس كملت وهو لزمني ودك ضرب وغلط..
خلصت نفسي كوة...
بعدين كعد مقهور علي ...كال لتحجين شي لا يعرف اخوج ويذبحج..
خليني ادبرلج حل...
اني فكرت اذب الطفل..وكومة دكتورات رحتلهم رفضووحذروني كالو ترى تموتين لو رحمج ينشال لان الطفل كامل...
بس اني اصريت اسقطه واخذت حبوب اسقاط دبرتهم بالكوة...
وذبيت نفسي من الدرج صار عندي نزيف بوقتها ...
واخذتني مرت اخوي للمستشفى...
وطلع ميت ببطني وسوولي عملية بس حذروني من الحمل لان رحمي ميتحمل ..لازم اقل شي سنتين..
اخوي عارف وسيوان مفهمه الموضوع..
ومدورين ع زهير ماكو مسافرله سيوان ومالاكي حتى بالاردن...

اخوي قاطعني فترة بس سيوان تدخل وتقريبا تحاجينا...
وكالو الحل لازم تتزوجين واثق فترة ويطلكج ...
احنا حجينا وهو قبل وكال اساعدكم...
واثق ابن عمي ومطلك..
تزوجني فترة راواني بيها الويل ...
جان كل يوم يضرب ويسب وعيشني مرار...
بس طول هالفترة متقربلي...
الى ان طلكني...
وزهير اخباره اختفت حتى اهله ميعرفون بي وين
وكثر الكلام علي لان مرتين تطلكت..
طبعا عرفت بزهير مطلكني غيابي قبل ليسافر وانت ماجنت اعرف...
سيوان ضل فترة ميحاجيني الى ان شوي رجعت خوتنا سوا...
وبيوم ابوج جاي لمحل سيوان واني جنت يمه اجت صديقتي تشترتي منه واجيت وياها...
اول مشافني ابوج مشال عينه مني...
ومن طلعت من المحل شفته ورانا بسيارته الى ان وصلت لبيتنا...
وتابعني بالكلية وراي وراي...
الى ان تعرفنا وحبيته بس كتله اني مطلقة...
وهو كال سالت عنج بالجامعة وعرفت انت عاجبتني واريدج...
رغم الكلام هواي عني بعد شابة ومطلقة مرتين ومن اقاربها ...
اكيد اشاعات اشكال الوان...
والعرفته بعدين زهير مخزيني بالسوك وكايل مو راحة وعفتها...
المهم بقيت وي ابوج هواااي...
وكل ميفتح موضوع الزواج ارفض...
بس ابوج الوحيد العاملني عدل وحبني صدك...
وخلاني اغير لبسي وهواي تصرفات غيرتها...
الى ان تزوجنا واخوي واثق بي لان عمامي يعرفو...
وكلش يحترمه لان شافه عاملني عدل ورايدني كلش...
بعدين صار الحمل وكال لازم تعرف عائلتي وطمني مراح اواجه مشاكل..
بس جان يحمد بامج كلش ومقدسها بكلامه..
لهذا كرهتكم وكرهتها وحاولت ااذيكم بالاول...
بس الايام كشفتلي الزين منو والشين منو....

بقيت صافنة عليها انقهرت ...
لان حياتها هم ضيم بضيم..
وهي يتيمة ولعب بيها زهير وتركها...
كتلها تطمني مااحجي...
اني جنت خايفة انت موشريفة وتتلطخ سمعة ابوي تالي عمره..
بس بعد السمعته تطمنت..
لان اشوف ابوي سعيد وياج...
صدكيني اموت عليه وحبلت مرة ثانية ردتله ولد رغم حذرتني الدكتورة بس جازفت...
يعني ابوي ميعرف بيج مريضة؟؟
لا ميعرف بس جان يسالني من يشوفني اعرك بسرعة وانهت...
لو وجههي يصير احمر يستغرب ..
اكله اني طبيعتي بسرعة اعرك خصوصا زادت حالتي ورا ولادتي باخوانج...
يلا الحمدلله جبتيله هيومي وميري...
اي الحمدلله...

كلام عهد خلاني شوي اتطمن ع مصلحة ابوي...
و من جهة سيوان واعترافه هو حاجي هالكلام بس ليش؟؟
ماعرف بسنو يفكر من خلاني اسمع...
لازم اعرف هالشي...
بالليل بالوحدة ونص خابرني جاوبت ...
اجاني صوته مشمش مشتاااقلج..
من جرته للكلام شارب حسيت...
تنهدت ...سيوان اعتقني لوجه الله ...
اوووف ولج مااعتقج غير دكيتي براسي هسه...
كون الزمج ياااابه اريد اطبع الوشم بشفتي ولساني...
فزيت من مكاني ...
صخاااام وين ش ش فته ؟؟؟

للحكاية بقية
بقلم شقراء(قمر كانون)
حطيت لعهد بارت كامل حتى اخلص من اتهاماتكم والكاركم الشيطانية