رواية ??هجير الشتاء?? الفصل الرابع 4 - بقلم Shaqraa

هجير الشتاء
الجزء الثاني

رحنا اني وسماء نركض ندور بالبيت ونعيط ..
عدنا غرفة مسويها للضيوف ينامون بيها ..سريرين واثاث كامل..
دخلنا الغرفة ظلمة..
فتحنا الضوا..ماما متمددة بالارض !!
رحنا عليها نكعد بيها ماكو ..
رادت سماء تصيح ابوي كتلها يوليي لتصيحي...
سندناها اني وسماء واخذناها للمستشفى..
سماء هي تسوق واني حاضنة ماما وابجي....
خابرت خالو عزيز ..
كال ..رح يلحكنا للمستشفى..
سديته منه واني عيوني تغوش من الدموع والخوف عليها..
وصلنا واخذوها من عدنا بالباب ..
ساعدونا وفوتوها واحنا وراها نبجي..
اباوع اني وسماء بملابس البيت .. سماء تراك شتوي رصاصي ...
واني بنطرون ازرق بي ورد قديفة وبدي حياكة ردنه ثلث ارباع..
حتى مااهتمينا ولا انتبهنا..
جنا كل تفكيرنا بأمي..
دخلوها طوارىء واحنا روحنا تلوب ..
ورا شوية وصل خالو عزيز..
اخذنا بحضنه مثل الاب الحنون يهدي بينا...

كعدنا ننتظر وراه شوية يلا كدرنا نفوتلها..
سكرها مرتفع وفاقدة الوعي..
كالو انتظروها شوية وتكعد وطمنونت عليها..
بقينا يم رجليها نبجي ونبوس بيها...
هاي جنتنا وكل دنيتنا ..
خالو كال خلوها ترتاح شوي وتفيق الدكتور كايله...
ماقبلنا نطلع وكعدنا يمها الى ان تحركت...
اجينا يمها ثنينا ونبوس براسها ..
كعدت تطمن بينا رغم مرضها بس متريدنا نخاف...
اجه خالو عزيز الي لحد الان ماسأل عن سبب وكعتها ..
لان شاف وضعنا مو مال نكدر نحجي...
حاجته ماما لخالو...
عزيز خوية اخذني وياك لبيتك...
كلها ..طبعا اخذج لعد شلون اتطمن عليج..بس اروح اشوف اذا نكدر نطلع او لا..

راح ورجع ويانا ساعدنا وطلعناها..
بس ماسألها ولا هي حجت..
احنا نباوع بعيون بعض وخالو يباوعلنا بأستفهام..
وصلنا واستقبلتنا خالتي وميقات وساعدونا دخلنا ماما للغرفة..
بقينا يمها الى ان ارتاحت ونامت وطلعنا..
كاعدين مصفنين بوجه بعض..
اجه خالو كعد بنصنا وباسني اني واختي براسنا..
كعدو ميقات وامها يمنا كالو تعشو وارتاحو لتقلقون امكم مابيها الا العافية..
بس خالو كال اريد اعرف شسوى ابوكم هالمرة؟
طبعا هو ابوي مو جديدة يضرب امي وتتخربط مرات يعني طبعه هذا..
بس كل مرة منكول لخالي ع المستشفى ويجي...
امي متقبل تكول تصير مشاكل..
بس هالمرة امي امبينة مو مضروبة انما مصدومة..
الي شفناه احنا صدمنا ..
مو هي زوجته وتحملت سوء خلقه كله ..
ويجب مرة لغرفتها وبيتها.......
حجينا لخالو الي شفنا تعصب خطيه وانقهر ..
كال..راح اروح لابوكم دربالكم ع امكم ولتكلولها اني رحت...
كتله خالو لتعصب نفسك وتنقهر صحتك اهم..مالنا غيرك بالدنيا احنا...
لتخافين ياعين خالج بس اروح افتهم واجي...
الله يحرسك ويسهل يارب...

راح خالو احنا اكلنا شوي من بعد ماالحو علينا ميقات وامها..
رحنا يم امي تمددنا ونباوع عليها وجهها اصفر وذبلان ..
سودة عليه الصبح جانت مثل الوردة وجهها منور..
شسويت بيها يابابا شلون كسرتها ودمرتها..
شوية فتحت عيونها وصاحت على سماء...
كمنا يمها نحاجيها ونتطمن عليها..
سألتها اني..
ماما شنو الصار وحالتج هيج وصلت؟
ابتسمت بحزن كالت..
من وصلتكم ورجعت للبيت..
لكيت ابوكم بالمطبخ وياه بنية..
اول ماشافوني كام هو كلها..
عهد هاي ام سماء زوجتي!!بقيت صافنة بوجهه ..هي كالت واني زوجته وام ابنه قريباً..!
وابوكم كلمة ماحجه ولا برر!!فات جوا وهي راحت ورا وتغمزلي..
حضناها وبقينا نبجي..
تولي ماما تروحلج فدوات تاج راسها انت..
لتنقهرين تعرفي لبابا مامنه امل..
احنا بناتج وياج ومنعوفج ماما طيبي وصيري قوية لخاطرنا..
بقت تمسح ع شعرنا واحنا كاعدات منا ومنا..

ورا شوية دخل خالو خطية مقهور باس امي براسها وكلها.. تبقين يمي متروحين...
لا عزيز لازم ارجع هذا بيتي واني عندي بنات ..
شيكولون امهم تطلقت وهي بهالعمر ..
تعرف الناس شلون ماعدها ذمة واخاف ع بناتي وقسمتهم تتوقف بسببي...
وشوشة بعدها سادس ومستقبلها اهم من كلشي..
لتخاف عليه خوية اني لو احتاجيتك اعرفك سند ومتقصر..
ياعين اخوج يالغالية ..
اني رحت طيحت حظه ولا نطق بحرف مثل الخروف صاير ...
كتله ماارجعها الك..كال لا ام بناتي وزوجتي وهذا حقي..
ماحجه غير هالكلام الجبان..
تزيز بعد اختك اني ماحاطه بي امل ومخليته بس اسم وواجهه لحد مابناتي يتوفقن..
وساعتها مرايده شي ابقى بعيده عنه..
واسمه زوج كدام المجتمع التعبان...
على امرج خيتي تدللين..
كام باس راسها وطلع..
يوم ثاني عدنا دوام وخطيه امي رجعتنا للببت..
ومرت ابوي لابسة كلابية مصريات ..
بيها فتحات من الصفحتين وخرز..
وهي طويلة وجسمها مرتب وعدها بطن صغيرة..
وشكلها كلش حلو..
عيونها صفرة وكبار وشعرها كاريه صابغته اصفر وملامحها حلوة..
بس شيطانة ولسانها متبري منها..
دخلنا لغرفنا وماحاجيناها..
امي كالت روحو للغرفة..
تالي عرفنا امي ماخذة اغراضها لغرفة نوم الضيوف..
توسلنا بيها تجي يمنا ماقبلت..
ابوي كالعادة ولا حجه ويانا شي...
يوم ثاني داومنا ومن رجعنا لكينا امي تطبخ الغدا..
بلشت اساعدها وكالت عهد رايحة لبيت اخوها..
هي يتيمة وعدها بس اخو واحد متزوج..
بس طريقة زواجها ببابا منعرف شلون..؟

بنفس اليوم ابوي جهز الطابق الفوك كله..
وبقى يشتغل بي حتى تكعد بي عهد ويبقى الجو النا..
بيومها جنت كاعدة اني وسماء نسولف ..
راسلني رقم غريب..
سلم وشلونج اني مجاوبت..
كتلها سماء هذا رقم كالت يولي...
ورا شوية رجع ..
متجاوبين بس لا ضايجة لان هزمتج!!
صفنت بالاول هزمني شنو؟؟
باوعت ع صورته فتحتها هذا كرار!
شعنده يراسلني هذا؟؟
جاوبته..
عادي لكل جواد كبوة..
مضايجة من هزيمة..بس ضايجة من مضايقتك بالمراسلة الي...
لتضوجين اصلا راسلتج حتى اعتذرلج...
اوكي..شكراً مقبول اعتذارك..مع السلامة..
مع الف سلامة..
سديته وصفنت هذا شعنده مراسل ومنين اخذ الرقم..
يلا اكيد من فون حسام...
مرت كم يوم بس ماما صحتها تعبانة تكسر الخاطر..
ابوي اتخذ وضع سايلنت..
بقو كم يوم يكملون الفوك..
الحمعة اجه خالو اخذنا حتى شوي نفسية ماما تستعدل..
ولحد ورا العشا كاعدين  واجه كرار..
سلم ونظراته عليه يكص كص..
كرار شكله حيل وسيم ..
شعر عالي وبشرة حنطية..عيون كللللش حلوة ونظرات اذا ركز بيها بشخص يخجله..
طبعا هو جان يجي لبيت خالي بس ابد مملتقين سوا احنا..
بس المرة الفاتت جيته بالصدفة والتقينا..
وهالمرة اعتقد مو صدفة..!

كال حسام اريد شامية حتى السهرة تحلى..
رحنا للمطبخ كال خالو..
ابقو هناك وخلصونا من دوختكم ..
صدك بقينا بالمطبخ سوينا وحضرنا الدومنة وكرار بس يلصلص بعيونه..
كلت هالمرة مااخلي يهزمني لو يموت..
بلش اللعب وكال حسام اليخسر نفرغ عليه بطل ماي..
سماء كالت اني ممراهنة معلية..بسام نفس الشي وميقات هم..
باوعلي حسام؟؟؟كتله..
عادي صب فوكي خمس بطالة شنو خايفه مثلاً؟؟واضحك صفح..
كال كرار..نبلش لعد يلاااا هجوم...
بلشنا واني احاول اسيطر قدر الامكان وماانسحل..
مخايفة من الماي رغم شتا وباردة بس مقهورة من الهزيمة..
احاول اسيطر ومتوترة بس ماابين الهم بالعكس عود اني ريلكس..
واني بطني خبطت من القلق..
حاولت وزاغلت وغشيت وبالاخير قفلوها عليه واني اكثر وحدة عدها صايات وخسرت......
طبعا محضر البطل يمه حسام..
جره كرار كله اني السحلتها جييييب...
فتح البطل ورشني...
ورشه بس ع جهة صدري بس رشه وحده بوجهي...
ااخذتها بضحكة والكل حاسبها عادي شقا وضحك ...
بس كرار نظراته اليه غير...
اباوع عيونه تريد تاكلني..
وهذا حاجبه حرام مشفته نازل..
دومه طاير بالجو...
اني اصلا طبعي ماابرد بسرعة ابد..
صح من رش البطل كله حسيت برودة بس مو قوية...
اباوع كرار عيونه ع صدري ويضحك ويحجي وياهم..
اني حنت لابسه سويتر اسود وجوا كيمونه اسود وبيها فراولات ..
بس من رش الماي والسويتر مفتوح للنص ..
اكثر شي تبللت الكيمونة..وهي قماشها فيزون يلطش..
محد من الموجودين لاحظ كرار لان هو لوتي يعرف شلون يباوع بخلسة..
واني ماريد اكوم حتى ليكول انهزمت..
تضايقت من نظراته حيل وهو يباوع ويريد يبلش گيم ثاني...
كل الكدرت اسوي سديت سحاب السويتر لحد الرگبة بس بأنزعاج...
وي سدتي للزنجيل حيل انكرصت رگبتي بي..
سديته عليها..
بس شاغت روحي وعطت حيل..
كامو يريد يساعدوني بس احس الجلده وي السحاب..
نزلت دموعي من الالم واجت سماء بحذر فتحته ..
بس اني حيل تأذيت والمكان طلع منه دم..
راحت ميقات تجيبلي قطن ومعقم ..
واني مااكدر احجي احس تأذيت وانوب من تأذيت بقيت ارجف..
حسيت بالبرودة وصكيت من الرجفة..
صوت كرار نبهني ان هو جاي يباوعلي من كال...
كومي بدلي شتاء ترى دترجفين..
اني انتبهت للسحاب سماء الذكية فاتحته للنص ..صح الكيمونة مو دلع بس من الانشغال بتعقيم رگبتي..
جسمي مبين ..
اجت نظرات كرار بعيني انغثيت...
كمت للغرفة وبدلت ..
وبقيت ماصارلي واهس اكمل السهرة...
تمددت يم ميقات وسماء..
طبعا امي وخالي وزوجته نامو قبل الحادثة..
بقيت اسولف وي البنات ..اجاني مسج..

شلون صارت ركبتج خو متأذيج؟؟
لا شكراً كلشي مابيها...
اي زين متعرفين شصار بيه احس انعصرت روحي بالسحاب مو ركبتج...
كرار ليش تتجاوز؟؟تحب اطلع لخالو هسه واكله لو لحسام؟؟
متسويها اعرفج كتكوتة بريئة مو فتانة..
ضحكني من كال هيج غلست وسكتت..
سديت الفون ولحد مانامو البنات النوم طاير مني..
اجاني اشعار فتحته حسام يريد الشاحنة..
اوففف هسه وكتك حسام شيكومني...
اخذتها وطلعت للمطبخ لان كال جيبيها للمطبخ..
فتحت باب المطبخ وانجريت حيل من ايدي...

للحكاية بقية
بقلم شقراء(قمر كانون)
اعذروني غواليي بس النت بي خلل وماجاي اكدر انشر بس يتعدل يتحسن النشر..
وممنونة منكم على تفهمكم كلش رفعتو راسي..
اموت عليكم😘