رواية ??هجير الشتاء?? الفصل الخامس 5 - بقلم Shaqraa

هجير الشتاء
الجزء الثالث

اباوع كرار جرني وسد حلكي ..
بيت خالي عدهم استراحة من ضمن المطبخ ..
مثل الغرفة زجاجية بنص الحديقة وطالعه من المطبخ..
بيها مقاعد وميز وزرع ..
جان الضوا مطفي..والدنيا كمرة وباااردة وهوا شمال..
بقيت ارجف مدري من البرد لو الخوف...
جان حاط ايده ع حلكي وعيونه بعيوني كال...
اذا شلت ايدي وعطتي متلومين غير نفسج...
امج حتعرف وهي مريضة اكيد تخافين عليها..
بس احاجيج لان متقبلين تجاوبين مسجاتي...
هزيت راسي اي...
وخر ايده كال..
ليش متجاوبيني ومعذبتني؟؟؟
لح من شفتج وضعي تخربط دخت مااعرف شسوي..
حبيتج متت بيج عاد انطيني فرصه...
اني ارجف وراجعه ع السياج كلش طابكة بي ..
كتله ماافيدك لان ماافكر بهالشي ومو اني المناسبة الك...
اتركني اروح ولتعترض طريقي لا اضطر اكول لأهلي...
واليحب وحدة يااستاذ كرار يجي يخطبها ..
مو مثل الحرامية يتعرضلها...
دفعته وردت اكوم..

لزمني حيل...
متروووحين ..كليلي شنو السبب متريديني؟؟؟
يعني لو خطبتج اهلج يقبلون ينطوج لواحد مثلي؟؟؟
مااعرف ينطون او لا بس اني اصلا ماريد اتزوج...
مستقبلي اهم وارجوك لا تتحرش بعد..
جاوبيني تحبين احد؟؟
ميخصك ولو حبيت ماانشر حبي واسويلك تاك...
تقرب مني حيل عصرني خزرته ...
ابتعدد لا خلاص خلي عندك ذرة غيرة....
لزم حلكي حيل وتقرب مني بيده الثانية يلعب بشعري ويعت بي...
شنو هالشعر اليخببببل؟؟؟
طالعة تمووووتين...
وانفاسه بوجهي واحاول ابعد مااكو....
قرب شفته راد يبوسني رفسته حيل...
صح ماجنت اتخيل اسوي هيج لانه هالتصرف يمكن ينتج عنه دمار حياة..
بس ردت انقذ نفسيي..
عاط خفيف وردت اشرد وصلت للباب ولزمني قوي..
بس هاللزمة بحقد احسها...
لزم شفتي وجرها بيده قوي احسها انشلعت كلها بيده..
طكت لثتي دم وبقيت ارجف وابجي ..
اخذ دم باصبعة وضغطه ع ركبتي حيل ولحس الباقي بأصبعه..
زادت دموعي مستغربة ومرعوبة من تصرفه...
خزرني خزرة احس حيلي راح ..
كال ..
كرار الباله يجيبه ..
وفلت ايدي..

ركضت جوا ماحسيت نفسي الا بالفراش وابجي بصمت..
جسمي كله يرجف..
اريد ادفى ماكو ..
كمت لبست سترة فرو من كنتور ميقات..
ورجعت التفيت بالبطانية وارجف..
شلون تجرأ وسوا هيج..
بقيت بخوفتي الى ان نمت...
بعدها كعدت ع صوت سماء...
فتحت عيني احس حلكي يوجعني كلش..
تلمسته من جوا مورم...
كمت صبحت عليهم  بقو صافنين..
تالي انتبهت للسترة شفتهم يضحكون..
امي انتبهت لحلكي كالت..
شبي وجهج مورم من يم حلكج ولج..
ماعرف ماما نمت وكعدت هيج يوجعني كلش...
اشو تعالي بلة..؟
رحت يمها كالت هذا بس لا عاضته وانت نايمة..
مجروح ومورم...
شريذ اللثة الجوا جان مجروح وكلش مؤلم..
كالو استخدمي ماي وملح ..
فرشت اسناني وبعدين ماي وملح..
شربت حليب شوي هدا..
بس خايفة يتصورلي الكل يعرف شصار..

جان البيت هدوء بس احنا ..عرفت خالي رايح للسوك هى وحسام يجيبون مسواك وسمك مسكوف..
وكرار رايح لاهله...
كملنا اليوم يمهم للمغرب رجعنا لبيتنا ..
بطلعتنا بالسيارة يلا شفت فوني ..
شفت مسجات من كرار...
جاوبيني ترى اذا ماطعتيني راح تعبين..
ومسج ثاني..شسويتي بيه امس ذوبتيني..
حتى البيت كرهته ماودي ارجعله...
كلت بس اوصل للبيت انطي حضر..
لان بالسيارة ماكو نت وهو راسل المسجات مساع...
رجعنا وجانت عهد جايه ..
هي وابوي كاعدين بالحديقة..
فتنا بلا مانسلم بس ماما ماقبلت..
خلتنا نسلم ع بابا وعهد ودخلنا...
وبابا مثل الروبوت..
صافن بعهد وميدري يمه طشت لو رشت...
امي حاجتنا كالت معليكم بيها..
وابوكم احترامه واجب...
ماردنا نقهرها نعرف تريد مصلحتنا..
ماكلنا غير تأمرين...

مرت كم يوم منشوف عهد ابد...
ورا كم يوم ابوي سافر لدبي بخصوص بضاعة..
بس راح نزلت عهد مثل المتحلفة...
تتأمر وتعيط وميعجبها شي..
احنا مغلسين ولا نحجي اصلا وياها..
بس هي تعارك ذبان خشمها...
بوكت العشا ..
اني وسماء سوينا معكرونة وياها جبن موزريلا ولحم..
احنا نحب هيج اكلات ناكلها بلا خبز بالعشا..
وماما اصلا اكلها كلش قليل ومو دهون ميصير الها...
نزلت عهد واحنا ناكل..
كالت شدعوة متكولون تعالي اكلي؟؟حامل وبسرعة اجوع...
امي كالت..تفضلي الاكل هوايه ..
اجت كعدت امي باوعتلي..
كمت جبتلها ماعون وقسمتلها..
بعدني ممبلشة اكل خلصته..
احنا ثلاثتنا وحدة صفنت بوجه الثانية...
اني قربت البايركس يمها كلت هي تصب..
ناقص بعد اكعد اصبلها...
اكلت وشبعت بلا كلمة وحدة..
خلصته كله وكامت حتى بلا شكراً...
ردت احجي ماما كالت شتاء اني شنو معلمتكم؟؟مناخذ غيبة...اوكي....

طبعا حضرت كرار من كل البرامج وحتى الفون مو كلش استخدمه..
لان قربت نصف السنة...
عهد يوم ثاني راحت لاهلها...
ومن اجه ابوي جابها..
ابوي صار ميأذي امي..ولا يعاركها..
مكابل عهد وكاعد...
امي جانت تكتم بداخلها...وتنقهر بس متبين النا ابد...
من رجعت عهد وابوي يروح لشغله..
يوميه تنزل يمنا قبل ليجي بشويه تصعد...
احنا بالدوام نص وقتنا..بس امي الي تبقى وياها...
عرفنا هي مشوفه امي الويل..
تتعارك وياها وتعيرها ..وامي تسكت ومترد..
بيوم رجعت من وكت ..
لان قربت الامتحانات ودروسنا قلبلة...
وصادف خمس وجانت الدنيا تنكط والجو اظلم من الغيم...
طلعنا من وكت واجيت دخلت ركض للبيت حيل نعسانة بيومها ..
قبل لا افوت للمطبخ صوت عهد يرن...
ولج عجووووز ميريدج تطلكي وروحي بكرامتج ..شبيييج شبييج ميته عليه..
دشوفي ميشتريج بنعال شبيج لاطشة!!!!!!
احس الدم صعد براسي هاي هيج تحاجي امي ! !!!
حتى مسمعت جواب امي شنو..
فتت اركض امي واكفه ع السنك تنظف الخضورات..
وعهد متخصرة قرب عليها...
اجيتها رض بدون وعي دفعتها وكعت ع الكاونتر....
عاطت..اخخخ لج ... تريد تموتين ابني؟؟؟
مااهتميت الها ولا لأمي الي اجت تكر بيه وتصيح عوفيها...
دفعتها بالارض...
خنكتها حيل بيدي ثنينهم..
لج عار حرامية الرياجيل شلون تتجاوزين على امي؟؟؟؟
اليوم اطلع روحج...
ضلت تجر نفسها وخافت صارت صفرا...
امي عاطت بيه شتاااااء اذا متركتيها ا...بعد ممكلة تركت عهد وتفلت على بطنها...
راحت تركض مثل الطلقة...
امي تركتني وفاتت للغرفة..
رحت وراها طردتني...
ردت اعتذر منها لان تجاوزت وهي حاضرة بس ماقبلت...

بقيت بالغرفة صافنة وابجي ع وضع امي وشلون الحقيرة مأذيتها..
حتى مابدلت ملابس الدوام...
ورا وقت قليل اباوع الباب اندفر ..
وبابا اجه جرني ويسب ويضرب..
لج بت العار تريد تكتلين اخوج؟؟؟
شلون تمدين ايدج عليها؟؟؟؟
يكفخ بيه ويعيط اجت امي ع الصوت تركض...
اجت تدفع بابوي وتبجي..
حضنتني وصارت كدامه..
تركني وطلع من الغرفة..
بقيت ابجي بحضنها وهي تبجي بسكوت...
كعدتني وبقت تنصح بيه..
ماما اني معلمتج متتجاوزين ..
حتى لو هي غلطانة وماعدها اخلاق..
متعامليها باخلاقها ولا تفلين عليها بحضوري..
شفتي ابوج وردة فعلة؟؟؟
معناها مرته مسيطرة على عقله..يعني حالياً ابوكم هو والميت سوا..
لا تهتمين وشنوتسمعبن ذبي وراج..
احنا عايشينوي انسانة عدبمة اخلاق وقليلة اصل..
وهيج شخص عشرته مرة...
صبرو عليه يا ماما احاجي خالكم ..
يحاجي ابوكم ويخلينا بيت وحدنا..
مو مهم اني اشتري لو هو الخير هواي الحمدلله..
بس المهم يقبل نستقل وحدنا..
وساعتها نرتاح من هالمشاكل..
بس ياماما صبرولي..
اني صحتي تعبانة وحتى من رجعت لبيتي لام ماردت مشاكل من اولها..
بس الظاهر ماكو فايدة...
اعتذرت من امي وبستها وهي راحت كالت حكمل صلاة...
كمت اني رحت اشوف شنو بعد للغدا حتى اكمله ..
بس اصلي وابدل ملابسي...
شفت المرك جان شبزي وكامل ريحته تخبل..
طفيت النار ورحت انطي امي خبر اني طفيته ليبقى بالها...
فتحت الباب لكيت امي نايمة ع السجادة...
رحت يمها جنها نايمة ...
ماما..مااما..تسمعيني!!
احركها وكعت ايدها!!!!
ولج مااااااامااااا.......

للحكاية بقية
بقلم شقراء(قمر كانون)