رواية ??هجير الشتاء?? الفصل الثامن عشر 18 - بقلم Shaqraa

مساء الورد عليكم حبايبي رجعت وياكم وانشالله مستمرين
************
هجير الشتاء
الجزء السادس عشر

شنووو ؟تشاقين مو؟؟لا مااتشاقى..
بس هو قبل سنتين من سافرنا لايران..
اعترفلي...كال..
بما انج كبرتيو هالسنة حتداومين كلية..
واخاف اخسرج..
بس اني انتظرت الوقت المناسب حتى اصارحج بالموضوع..
سماء اني احبج..وصار هواي انتظرج..
قبل ليكمل كلامه اني ضحكت...
عبالي مقلب من مقالب حسام..
كتله لتنصب عليه هيج عابت متوب من سوالفك...
بس هو بقى جدي وكمل كلامه..
اني مااكن اله اي مشاعر وتعرفين احنا من صغرنا نعتبره اخونا..
اصلا احس حرام افكر بحسام غير تفكير الاخوة..
كتله ..احنا اخوان ومستحيل اكدر اصير..
غير اخت الك وبس.
اذا تحب اخوتنا تدوم تنسى هالشي..
واذا مصر معناها من اليوم اخلي حدود بتعاملنا ومااوصل لليتكم ابد..
لان ماريد كل متشوفني تحاول وياي ع فارغ...
هو من سمع هالكلام ..
كال انتهى هذا هو...
تبقين اختي الغالية..
وننتظر يمكن القدر قاسم غير مااحنا نريد...

اووف خطية تنقهرت عليه..
بس احنا منشوفه غير النا..بس خطية هو رايح زايد بمشاعره...
الله يعوضه بالتستاهله..
يمكن وحدة غيري تقبل وتحاول..
بس اني احساسي تجاه حسام ابد ميتغير..
اعتبره اخوي وبس..
معناها لهالسبب مقبل يجي..
يتحسس لان بيت رافع يعتبرها شغلة كرامة..
اعتقد هيج..
لعد عفيه سمسمة خلينا نفاجئهم باجر..
نسوي اكل ونروح مدام ازهر موجود...
اوكي يدلل الحلو ...

صار العصر يلا اجه رافع..
بس اني ع نار..
بقيت بالغرفة منتظرة..
الن ان ورا الصلاة صاحتلي سماء ورحت يمهم..
لكيتها بالمطبخ تسوي بيتزا..
ورافع كاعد ياكل رمان..
سلمت عليه وكعدت شوي سولفنا تالي كال..
وشوشة بالنسبة للموضوع الكلتي بي..
ها اي شنو صار..؟
حجيتها بخوف وتردد..!
ابتسم هو وعدل نظارته الطبية..
ليش مرتبكة شسالفة..
ترى اني سالت عنه باكثر من مكان ..بس الكل تحمد بي اصلا يحبوه..
تعرفين اذا ثنين يشتغلون نفس الكار..
تصير بينهم منافسة..
بس هو تدرين الصياغ نفسهم حمدو بي ونزهو..
حتى بالسوك من جنت اسال واحد ..
سمعنا طفل يبيع علج..
تعرفين ذولة يفترون ع المحلات والناس التدخللها..
هو جان يسمع كلامي ..
من خلصت كال..
عمو السلطان احسن رجال بالعالم هو بطل ..
يابه ضحكت من كال بطل..
ههههه اي يجوز بطل بالشرب..
يمعودة اذا ع هالشي هذا بيدج..لان حسب معرفت سابقاً
هو يشرب للونسة ميسكر كلش..
وميشرب ويطلع..
متشوفين الناس تمدحة ومجابو سيرة شرب..
زين شنو سابقاً منين عرفت؟
هيج كلفت صديق وحجالي..
اهاا..
مشكور تسلم رافع ..
تدللين خيتي انت..
واني حاضر وبخدمة العنونين..
يااا مو توه اكول انت ماكو منك...
هههههه اي عمو بطل اني ..ههههههه....

رغم سمعت كلام رافع بس مرتاحيت..
ولا اريد اغير قراري..
صار يوم ثاني ..
حضرنا حلويات واكل..
ورحنا لبيت خالو...
من شافونا حيل فرحو وتفاجئو..
بس حسام خجل من موقفه..
عباله يعني حنكله كشفنا كذبتك..طلع معندك شغل ..
بس احنا ماحرجنا ابد..
كعدنا بين سوالف وضحك..
سمعنا صوت ازهر من الدرج..
اهلاً اهلاً بالغنائم..
يبووو اني ختلت ورا ميقات..
اعرف بس يشوفني يعضني...
وصل يمنا سلم ع سماء...
مبرووك سمسم ..لج شنو صايرة عود مرة وكذا لابسة حجاب ههه...
جاوبته..اي كافي بعد كبرنا لازم نعقل...
هالحجي اني متمددة ورا ميقات ومرت خالو..

مااحس الا كمشني من راسي..
لج وشوشة شنو هذاا متحجبة ياااابة...
نكتت الموسم ..
اني سادة عيوني بايدي واضحك..
جرني من وراهم كمت...
باوعتله ..يبوووو اروح فدوة للخدود ولج الحجاب يجنن عليج...
حضنته حيل وبوسته..
عضني بخدي ماارتاح اذا ميعض...
وبقى مخليني يمه ويداهرني..
بقينا لليل كلش يلا ترخصنا ..
ومقبلو نرجع رادو نبات...
بس رافع جان جان علينا وماكدرت سماء تبقى..
سلمنا عليهم..
وازهر كال اني رايح عكب باجر..
ودعته سماء وطلعت..
واجيت اني حضنته حيل وبوسته..
وهو الخبيث قبل لا اوخر منه ..
عضني بزندي حيل وركض مني يضحك..لزمت ايدي واني اعيط..
وركضت ورا اريد الحكة ماكو..
وصل للباب وماكدرت احاجي ..
استحيت من رافع...

بقيت اتحلفله وهو يضحك علي..
بعدها رجعنا للبيت...
ويوم ثاني الصبح رجعت لبيتنا ..
لان ابوي البارحة راجع..
سلمو عليه سماء ورافع وراحو..
اني سلمت عليه وبعدها حضرت الغدا..
وعهد وياي..
الى ان كملنا الغدا وشربنا جاي..
جان كاعد يباوع اخبار..
رحت يمه وجانت مريام بحضنه..
كتله بابا ..عندي موضوع اريد احجي وياك بي..
بس بالاول اسمعني ولتظلمني وتتعصب..
باوعلي بتركيز..
كولي اسمعج؟
فركت ايدي وحدة بالثانية...
احم..بابا انت خطبتني لسيوان ومجنت موافقة..
وكتلي جربي تتعرفون ع بعض وتتفاهمون..
بس بابا متفاهمت ويا سيوان ..
قاطعني...اي؟؟وليش متفاهمتو؟؟شبي سيوان؟
بابا سيوان عايش حياته طول بعرض ..ومحاسبلي حساب..
يعني يطلع وي بنات وعايش..
بعد شيسوي بية متزوجني؟
خلي يطلع..شاب ويريد يعيش..
قابل يعتكف بالبيت مثلا؟؟
واذا صرتي شاطرة تالي وضبيتي ميشوف غيرج..
دشوفي عهد شلون مخليتني مو بحاجة احد..
من تزوجتها لليوم اني وفي الها..
اي بابا لان تناسبك....
باوعلي بغضب..اي وحتى انت سيوان يناسبج..
وعرسكم اصلا محددي والقاعة محجوزة..
لهذا سدي الموضوع وانسي...

كمت وكفت..حجيتها بقهرة وخنكتني العبرة..
اعرف شكد مااحجي ابوي مراح يقتنع..
كتله مراح انساه بابا...
عفته ورحت للغرفة..
بقيت افكر شسوي ؟اخابر خالو لو استخدم عهد..
خليني احاول بعهد..
واذا مقبلت اهددها بالسمعته...
انتظرت تصيرلي فرصة حتى احاجيها ..
رحت لغرفتي تمددت..وراها نمت..
من كعدت الساعة بالستة العصر..
جانت ايام شرجي صح البيت بارد بس واحد يحس نحول وحرارة...
رحت للحمام سبحت ..
لبست بدي كيمونة سودا قصير كلش وبي من كدام نجمة..
ويا برمودا ثلجي ..
رفعت شعري كبة عالية ..
احس انتعشت..
طلعت من الغرفة ادور ع عهد ماكو جوا..
صحت ع عهد ..
جاوبتني تعالي اني بالمطبخ..
صعدت ع الدرج اسمع صوت الاطفال يلعبون ..

فتت للمطبخ عهد واكفة يم الطباخ والاطفال بالكراسي مالتهم ..
رحت لمهيمن اخذته لان مريام شابعته تكفخ..
حضني من شلته واسمع صوت ..ايي عمو هيومي حظووظ !!!
التفتت سيوان واكف يم الثلاجة ومبتسم!
فزيت من شفته..
عزاا شجابك انت شبح شنو؟
ضحك وتقرب مني تبدلت ابتسامته بخزرة...
رجعي مهيمن وامشي اريدج..
موقفه يخوف ونظراته تزور بجسمي وتتفحص..
عهد اجت اخذت مهيمن كالت روحو كعدو بعيد عن ذولة القرود ..
ترى متكدرون تحجون شي من دوختهم...
سفت سيوان طلع كدامي...
التفتت لعهد..شبي؟؟
رفعت جتفها بمعنى مااعرف..
عفتها وطلعت مالكيته فوك ،.
نزلت جوا لكيته بالاستقبال...
اول مادخلت كام ..تقرب يمي وسد الباب وراي !
التفتت ع الباب جر ايدي بخزرة..
شنو خايفة؟؟لعد ماخفتي من زورگج؟؟
بقيت صافنة بوجهة ابتعدت كعدت ع القنفة..
اجه يمي واكف ع راسيي...
كومي واحجي وياي ..
كمت وكت كدامه ..شبيك سيوان ؟؟
واكف بهدوء غاضب..
دك باصبعة ع زندي احس اظفرة نبت بيدي..
شنو هذااا احجي؟؟؟؟؟
باوعت لزندي وتذكرت..
عضة ازهر بيدي..
احس تقويت شوية وحجيت..
ا..هذا ابن خالو تشاقى وياي وعضني..
حجيتها واني دايرة..
مااريد اباوع لوجهه واعرف شنو وقع كلماتي عليه..
الي ترجم ردة فعله..ايده الي عصر بيها حكي قوي...
ورفع وجهي بوجهه..
عضج؟؟
رجفت شفتي واني احجي ..يتش ا ا ق ى..
بس كملت كلمتي
..
حط شفته ع شفتي ..
احس نفسي فصلت عن العالم..
صرت خفيفة مثل الريشة وطرت...
تفاعلت ويا بقلة خبرة بس بكثرة رغبة وارادة..
ماعرف ليش سمحتله يتمكن مني ويملك احساسي..
بس حاولت انتشل نفسي من الاحساس الغركت بي..
-شتاااء-مو هذا ابو الخاين النصاب الكذاب!!شللون تسلمين نفسج اله...
دفعته واني ارجف..اباوع لنفسي البدي مالتي ماكو!!
وهو قميصه مفتوح!!
والزنجيل مالت البرمودا مفتوح!!
شوكت صار هالشي وشلون مقاومته!!
شنو اني ابد مو بوعيي مثل المخدرة...

دفعته وايدي ترجف
باوعلي بنظرات ذابلة ووجهه احمر ..
كمت اخذت البدي واني ارجف ..
اجه حضني من ظهري..
قويت نفسي ودفعته وماتركني بقى عاصرني..
همس باذني..
لتحرميني منج حبيبتي ..
حسيت نفسي ضعفت كدام همسته..
ماعرف شنو جاي يصيرلي ويا..
ليش هيج اتأثر واحس جسمي كله ذايب ومرتخي..
بس لازم اتقوى واواجهه..
جريت نفسي وطلعت ركض..
صارت بوجهي عهد طالعة من المطبخ واطفالها بالارض يلعبون..

وكفت كدامها واني اتنفس سريع..
باوعتلي ورفعت حاجبها مبتسمة..
شنو وشوشة شصاير اشو حمرة مثل الجمرة صايرة..
اجه الصوت من وراي ممزوج بضحكة..
بت عمي هي صدك جمرة هاهاي...
انغثيت منه كلش...
درت عليه وصرت بين عهد وبينه...
كلت لازم هسه استغل وجودهم سوا واهددهم بالسمعته..
شوف سيوان اني حاجيت ابوي ع انفصالنا..
بس هو رفض وصار ضدي..
طلك من ذاتك احسن لا افضحك انت وعهد يم بابا...
امممم ..تفضحيني!!!!
ليش شعدنا وتفضحيني اني وعهد؟؟؟
اعرف عنكم هواي اشياء تخلي بابا يموتكم..
هاك استلم حجت العنونة..
باوعتله بحقد...
انت ليش مستصغرني هاااا؟؟؟؟
تدخلت عهد واشوفها تخلط الوان وتهدا بسيوان...
التفتت عليها:..
كله منج اني الج الا افضحج يم بابا ..
عبالكم ماسمعتكم من اتفقتو عليه وسيوان هددج؟؟

حجه سيوان بثقة وهويضحك...
هاي انت تهددينا بالسمعتي وعبالج خايفين ؟
هها ها ها ...
كل يوم اكتشف انت ثولة اكثر من القبله...
لج بابا اني سمعتج الكلام بمزاجي..
عبالج مااعرف بيج جنت بالبيت وتسمعين؟
بقيت ارجف ششعرفك؟
اني السلطان متعبر علي سوالف طفلة مثلج..
وماانصاد بسهولة..
اي شلون عرفت ؟
عادي طفلتي مجرد ترجيع صغير بالكاميرا واشوف اذا طالعة لو لا...
ميخالف حتى لو تعرف موجودة..بس كلامك عن عهد بعده بصالحي..
اباوع لعهد ترجف وتتوسل بسيوان...
لتحجي لتهجم بيتي فدوة سيوان..
كلشي ولا يعرف خليل...

للحكاية بقية
بقلم شقراء(قمر كانون)