رواية ??هجير الشتاء?? الفصل السابع عشر 17 - بقلم Shaqraa

مساء الورد غنوجاتي..شلونكم جمعياً مشتاقتلكم ...

هجير الشتاء
الجزء الخامس عشر

افتر راسي من كلام الدكتورة..
كلتلها انشالله ..وشكرتها وطلعت...
لكيت عهد برا يم الاطفال ..شافتني كالت ..
مشكورة تعبتج..
كعدي ننتظر سيوان حيجي علينا..
عقدت حواجبي...سيوان؟!
ايي ابوج مخابرة يمر علينا ..يوديني اله للمحل ..
لان نريد نطلع ..
ابوج كال اخذكم تغيرون جو شوية..
اهااا ..يلا ننتظر شعدنا..
كعدت ع الكرسي يم عهد ..بس بالي كلش بعيد..
احتاريت شنو عهد مسقطة طفل؟
وحسب ماعرفت من خالو ..
زواج ابوي صار لبالضبط قبل ليصارحنا باربع اشهر..
لان هي من اجت حامل بثالث او برابع هيج شي...
بس بابا ما راد تعرف امي وتصير مشاكل انتظر فترة..
ومن عرف بالحمل ..
اعتبره وقت مناسب..
حسب ماعرفو خالو من خوالي البقية..
الي طلع عدهم علم بزواجه من الاول ...
لان اهل السوك ميخفى عنهم خبر..
لهذا حاجي كدامهم...

معقولة جانت متزوجة قبل بابا !اي يمكن
ماكو غير احتمال...
فززني من التفكير صوت عهد...
يلا شتاء سيوان وصل..
كمت واخذت الاطفال ماخليت عهد تدفعهم.،
طلعنا برا ..

شفته مرتجي ع سيارته ..
بس شافنا اجه سلم..
عيونه تتفحص بيه وهو يسلم ع عهد..
اندار عليه ..
اني مباوعت بوجهه اصلا..
شلونج مرتي؟؟
بعدج تتذكرين لو ناسية..اكول عهد اصعدي خليني انطيج اطفالج حتى افوت العربة..
صعدت عهد واني اخذت ميريام وهو اخذ مهيمن..
وداه لعهد..
وتقرب اخذ مني ميريام همس بأذني م.....!!
خرب شلون لسان زفر شايل ...
اخذها وداها لامي واني واكفه بصدمتي..
اريد اخذ جنطة الاغراض ..
مالت الاطفال مخليها بالسلة جوا..
رجع طلع الجنطة انطاها الي وكرصني بايدي..
احس جسمي تكهرب يومه!!

اخذت الجنطة ركض للسيارة ..
وهو طبك العربة حتى يخليها بالصندوك..
رحت صعدت بالورا..
عهد كاعدة ويمها الاطفال ..
كالت انطيني اسويلهم ممات خبصوني...
اني واكفه بالباب ..
وطلعت الممات والجنطة ع الكشن...
اجه صعد هو..
واني كملت الممه وخلتها بحلك ميريام لان خبصتنا..
سيوان يضحك ويسولف وي عهد..
لج عهد هاي بتج الب...خبصتنا...
يااا عزا هذا شلون هيج يغلط يبوووو...
بقت عهد تضحك..كلتله طالعة عليك من تجوع متتفاهم..
هم يسولفون واني كملت ..
وخليت الجنطة اريد اصعد..

كال...ماما وين يحب يوصل للبيت مال انت راجي في خدمة انت...
حجاها بلسان مكسر مثل الهندي..
بس اني اول مرة اضحك من قلبي من شفت سيوان لهسه...
وماكدر اضحك كدامه...
بس كاتمة ضحكتي كوة...
كال تعال كداااام...
نزلت كعدت كدام بس اريد انفجر من الضحك..
عهد حتى اطفالها بقو يضحكون مدري يناغون..
كد ماضحكتها عالية...
همسلي من قريب..
لو ضاحكة هواي احسنلج..
صرتي حمرة مثل الكرز ..
تخيلتج بفد موقف اففف...
بقيت اباوع للجامة..هذا كلشي عنده خيالات..
غلست عليه وهو رجع يسوق ويسولف..
بس اني شوي كسرت وياه..
مو قافلة كلش...

وصلنا لمحل بابا..
كال ابقي..اوصلهم وارجع..
بقيت كاعدة وهو وداهم شويه واجه...
اني اباوعله من بعيد يمشي..
خرب يومه ع هالاناقة..
قميصه ابيض كانف ردانه للذراع..
والدكم نصها مفتوحة..
طبعا بي طبع دومه نص الدكم مفتوحة..
وبنطرون جينز ..
والساعة والمحبس ..
ولابس الحلقة شكلها حلوو..
وصل وفتح الباب وبقى واكف..
مبتسم وعيونه تلعب..
ها كملتي رسم لو اصعد..ياا عزا ميفوته شي امداني غبية..
ابتسمت وانحرجت..
صعد وقبل ليشغل السيارة اندار علي...
وين تحبين نروح؟
واخذ كلينكس مسح وجهه وركبته ..
تقرب مني ودنك يريد ع اساس يفتح الجكمكة ..
بس من دنك لمحت بصدره اثر واااضح...
بس احس نغزة وقلبي ورجليه بادت..
شكد انقهرت ..واني اكول ابدي وياه بداية حلوة..
بس هيج شخص ميستحق حتى اجرب وياه...

درت وجهي ع الجامة ..سيوان رجعني للبيت..
مد ايده يريد يلزمني نترت بي وجريت ايدي...
لتلمسنيي..رجعني بسرعة...
عصر ايدي حيل..
دوري وجهج علي واحجي فااهمة..
درت عليه..
سيوان شرايد مني لخاطر الله رجعني للبيت..
ولج غير مرتي واريد احاجيج..
عطت بوجهه حيل..
ابد ممبين مهتم عندك مرة وتريد تحاجيني...
لانك اصلا مو بحاجتي..
لتعلين صوتج لا اش....
لج محد بعينج انت اشو جسرة وتصيحين...
اني جسرة بس مو قذرة..
دشوف الطبعة الي بصدرك ياقذررر...
ماحسيت الا فر وجهي براشدي...
من قوته اضربت بالباب مالت السيارة...
بقت دموعي تصب..مدنكة ماحجيت شي..
وهو هم سكت...

وكفت السيارة رفعت راسي ..
واصلين لبيتنا..كال..
تعالي ننزل ..
عفته ونزلت فتت ومستمرة ابجي ..
واحس الم راسي كلش قوي..
دخل كعد بالمطبخ..كال ..
انطيني ماي وتعالي لازم نحجي...
جاوبته واني اشهك..
ماعدنا حجي بعد..
ماابقى وياك طلكني وكلمن يروح لحاله...
شتااء كعدي وخلي اكل...
طلعتله بطل ماي خليته يمه..
ذبيت الشال لان اختنكت..احجي التريده اني اسمعك...

شنو انت غيرانه من شفتي الاثر؟؟
مو غيرانه بس انت مدام خاطبني لازم تحترمني..
يعني شنو تروح وي وحدة وتسوي وياها عيب ..
اولا عرفي شلون تناقشين تالي حاسبيني...
واني شاب والي احتياجاتي..
وانت مو مهتمة بيه كلش..
طبعا اروح ادور راحتي يم غيرج..
باوعت بوجهه بتركيز..
اولا اني مو طفلة ومااعرف اناقش..
ثانياً تدور حق واهتمام واحنا بعدنا مخطىوبين؟؟؟
ومنو كلج المخطوبين يسولفون قصص دينية؟
طبعا يصير بينهم هيج..
لعد هذا لسانج وجسمج الحاطته وتستعرضين..
اليشوف ... جنه فريز..
يكول هاي رجلها امه داعيتله ع الراحة...

كمت وكفت وخليت ايدي ع الميز..
اكلك انت ماخذني ع مود جسمي..؟
واني ممستعدة اعيش وي واحد ماهامة غير شهوته وبس...
تريد تشبع شهوتك عندك عاهرتك هواااي ويدورن امثالك...
اني اريد ارتبط بشخص يقدرني..
يفهمني من نظرة عيني..يعرفني اذا ضايجة اذا تعبانة قبل لا احجي..
مو اخذ واحد همه كله جسمي وشلون يشبع رغبته..
اهااا...
قصدج تردين حب مثل حبج لكرار مو؟؟؟؟
طز بكرار لك هذا شنو حثالة هذا زباااالة..
هذا نص رجال ..
ومو شتاء تقبل بنص رجال...
بس هو كال مو جنتو تحبون بعض ..ومرته طلعت حامل وانتهيتو؟
ههههههههههههه ه ه اي....
تعرف ضحكتني كلش..منو هذا الي احبه؟؟؟
هذا هواي عليه نظرة مني..
مجرد واحد جبان ..عجبه جسمي مثل ماعجبك..
راد يجرب وماكدر يحصلني..
تحجج بمرته وانسحب..
وبصراحة لا انت ولا هو تهموني بعد..
وخطوبتنا تنتهي وخلاص..

كام اخذ فونه والجكاير شالهم بيده...
ماكو شي ينتهي..
الظاهر انت مطفية ومتعرفين..
اني متفق وي ابوج ع مود الزواج..
شنو؟؟؟
وكيفكم تقررون ؟؟
لتناقشيني روحي ناقشي ابوج..
زواجنا 3-11...
عود حضري نفسج لان سلمت الفلوس لابوج صارلي فترة..
وجهازج اريده كله مستور ..
اي لبس تطلعين بي ميعجبني اشككه عليج فاهمة؟؟
راح اخذ بطل ماي ثاني وطلع..
خلاني صاافنة ..
يعني ابوي اني متعجية عليه..
ليش هيج يتصرف مااعرف...
وهذا عايش حياته بطيحان الحظ ويريد ارتبط بي..
لو يموت ماريده ..
لا اسم الله عليه من الموت...
بس هذا كرار النذل..
شلون يكول نحب بعض..مراح اسكتله مهما كانت النتائج..
بس يصير باجر واني اله..
بقيت انتظر ابوي يجي واحاجي بموضوع الزواج..
مقررة ارفض حتى لو حرمني دوامي..
ادخل خالي بالموضوع يوكفه عد حده...
صليت وسويتلي لفة جبن عرب ونعناع واكلت..
بقيت انتظرهم تاخرو ..
الى ان نمت...

كعدت الفجر بالاربعة..
افف شكد نمت وماحسيت..
طلعت غسلت وسويتلي جاي..
كلت انتظر ابوي حتى احاجي..
جان الضوا توة يطلع..
ماشغلت اضوي..
لان ضوا الفجر مريح للاعصاب..
واني كاعدة وصافنة اسمع اصوات همس وضحك..
هدئت اريد اعرف مصدر الصوت...
شوي واباوع شخص دخل ..
رفعت راسي انفتح الضوا..
ابوي شايل عهد بحضنه وهي لابسه شي احمر ..
من الصدمة ماركزت بس شفت اللون..
وحد ماعيني تشوف ماكو لبس..
صخاام صخنت من الموقف..
هو شافنني اخترع وانحرج..
هي فزت بحيث عاطت وشبكت ابوي ..
زين ماجلطتهم ههههه...
نزلت راسي كتلهم اسفة اخذو راحتكم..
رحت ركض لغرفتي..
بس مصدومة وخايفة ماعرف شبيه...
كل ماشوف هيج شي اخاف واحس صعبة...

بقيت بغرفتي حتى ماطلعت حاجيت ابوي...
بعدين طلعت حضرت غدا وخابرت سماء..
شولفنا سوا بس ماحجيتلها ع الصار وي سيوان..
ماردت اي شي ياثر ع قراري...
كملت الغدا واخذت الاطفال لعبتهم..
تالي نامو وديتهم رجعت لغرفتي...
قررت اخابر كرار وارزله...
دكيت عليه ..
جاوب مثل الغركان ويجر نفس..
ههه ع اساس ياثر بيه..
لو تموت مااهتملك..اني اتخبل من الرجال الجبان..
رد وصوته شبه همس...
شلونج شتاء شخبارج...

بخير اني ..بس بما انه انت ودعتني ولا صفينا حسابنا..
اليوم اريد اصفي حسابي..
لان تعرف حتزوج عن قريب..
شنو صاير شبيج شنو هالمنطق الجديد..
لا جديد ولا قديم..
انت شنو حاجي لسيوان بالضبط...
ولتكذب لان هو حجالي كلشي..
بس متوقعت انت تسويها..
جنت تقريبا احترمك..
اووف شتاء مقبولة منج لان انت غير عن الناس..
المهم احجيلي اريد اسمع...
بس اريد تحلف بغلاة بنتك الجاية بالطريق..
تدللين....
شوفي خطيبج من دخلتي جوا بيت خالج..
كال شتاء سولفتلي عن علاقتكم قبل وكلشي صار بينكم..
اني استغربت..
بس كلت يجوز لان حبيتيه حاجيتله كلشي..
كتله جانت بينا علاقة وحبيتها بس بعد مصارت..
ومرتي طلعت حامل ورجعت لعائلتي...
غير هالشي ماحجيت..
لان توقعتج كايلته احنا نحب بعض..يعني يمكن خفتي من سالفة اخذتج او لا..
هيج ردت ابررها..
بس وغلاة بنتي ماجبت سيرتج بشي مو زين..
وحتى خطيبج ماحجه كلمة بعد..
كال الماضي راح وهي مرتي ..ومااسمح لاحد يجيب سيرتها بحرف...
هههههههه طبعا كل يوم اكتشفك شكد جبان...
واحمد ربي مية مرة..
لان ماحبيتك ولا وثقت بيك..
الله يرحمج يا امي...
من رفضتك لان تعرف معادن الناس شنو...
مع السلامة جبان...
سمعت نبرة عصبية قبل لينطق غلقت الفون..
انطيته بلوك من كل البرامج...
احس ارتاحيت...
بس هذا سيوان الحقير باك لساني ولسانه..
رادنا نحجي بلا ميضغط علينا...
يلا المهم ريحت قلبي بهذا النص رجال...

انتظرت ابوي يجي حتى احاجي بموضوع زواجي..
العصر جنت متمددة بغرفت..
خابرني سيوان...
جاوبته..الو..؟
اهلا مرتي شخبارج شنو جهزتي بعدج؟؟
المن اجهز واحنا منتهين...
اهاا حاجيتي ابوج؟
لا اليوم احاجي...
يلا ع العموم اليوم مسافر لبنان محتاجة شي اجيبلج؟
ممحتاجة..
بس اكلك دربالك ع نفسك ترى الحرام يجر صاحبه للهلاك...
هههههه بعدج مقهورة ولج..
يروحلج فدوة كلهن..منو بيهن توصل لطعم شفايفج..
سيوان رجاءاً..
تعرف هالكلام مااحبه..
ماشي يصير خير..
يلا باي..باي....

سديته منه واني افووور...هسه اكيد يشبع بلبنان..
ميخلي بنفسه شي...
اني المخبلني شلون يمدحوه..
وهو شرب ونسوان مكتوبة بهويته..؟؟؟شلووون؟؟؟
معقولة محد يعرف؟؟
لازم اتاكد...
ولازم احاجي ابوي بالموضوع مال الطلاك...
انتظرت الوقت المناسب...
ورا العشا رحت اريد احاجي مموجود..
سالت عهد عنه ..
كالت سفر وي سيوان للبنان!!!
يا عزا هذا سيوان ساحر..
زين شوكت يجون؟؟
ميطولون خمس ايام ويرجعون ..رايحين بشغل..
اهاا..
عفتها ورحت للغرفة مسطورة..
اكول يحجي مترهي..
طلع ماخذ ابوي ويا..وماخذني ع كد عقلي ابن الذين..
يلا مو مهم انتظره يرجع...

يوم ثاني عهد كالت رح اروح لبيت اخوي..
اني رحت لسماء..
رحت لسماء تونسنا واخذنا رافع فرنا ماخله مكان..
لليل يلا رجعنا..
يوم ثاني حجيت لسماء..
اكلج سمسمة..اريد رافع يسال عن سيوان..
بس شي شخصي وبلا محد يعرف...
ليش؟؟
ولج مخبلني..مخلصها شرب ونسوان..والكل تمدحه وتكول بس هو وبس...
اوف شوف العوبة..يعني قابل يشرب بالمحل؟
لو يجيب النسوان ويسوي سهرة بنص السوك..
هالاشياء تصير بالخفية عزيزتي...
ومو بالمنطقة..
باماكن خاصة طبعاً...
ميخالف خلي يسال فدوة عفية لخاطري...
تدللين وخاطرج طيب...
اليوم يسال ويجيبلج خبر...

خابرته هو جان بالشركة...
كلها تدلل شكد متريد اسال ...
بقيت انتظر ع نار..
وملهية نفسي وي سماء نسولف ماخلينا شي ماخلينا احد ماقشبناه...
كتلها سماء..ليش منعزم الشلة التعبانة ..
صار هواي ممجتمعين...
اي بسيطة شكو بيها..
باجر نروح نتسوك ونحضر كلشي..
ونعزمهم..
اي بس نكلهم من اليوم...
اي خل نحجي بالكروب...
انتظرنا وقت جمعتهم..وسولفنا..
سماء عزمتهم وعرفو اني عدها تونسو...
وجان ازهر توة جاي...
كال بسام نجيب ازهر ونجي..

حسام مجاوب...
بعد مااتفقنا كلنا...حسام كال..
مااكدر اجي عندي شغل وي كرار ضروري...
توسلو بي وحاولو وياه ..
شكد اني قنعت بي ماقبل...
كال تعالو لبيتنا ..حتى الحك عليكم لو اجيت متاخر...
بالاخير تفركشت العزيمة...
لا يم سماء ولا ببيتهم..
وصار زعل بالكروب وكلها ضاجت...
حاجيت سماء ساكته..
يابه تعرفين ليش ميجي؟؟
بالاول كالت يجوز مشغول وتتهرب...
تالي ضغطت عليها ...
كالت شتاء ..
حسام يحبني وخطبني بس رفضته...

للحكاية بقية
بقلم شقراء(قمر كانون)