رواية حكايات من بيت جدي الفصل الحادي والستون 61 - بقلم مريم اماسي الليل

ميثم: شنو قصتج مو ذاك اليوم جنتي يم اختج بقيتي يمها يومين ... ورجعت وديتج لبيت اهلج ...
مصار كم يوم ...
نوران: طكت روحي ... من مشاكل امك وتلميحاتها على الخلفه ... اريد اروح ارتاح واغير جو يم نجوان
وابويه هم ما اله خلك صحته بالنازل ....
ميثم :لعد شعندج ببيت نجوان .. اوديج تشوفين عمي كم ساعة ونرجع
نوران: لا اروح ابقى يوم يم نجوان وراها نرجع اني وياها يم اهلي .. نبات يوم وبعدها تعال اخذني ...
دا اگلك ابويه مريض .. يعني مثل ما انت تحب اهلك اني هم احب اهلي واريد اشوفهم
ميثم :فهميني انت وضعج كله معاجبني .. هاملتني ..ورجعتي على اللغاوي وشگالت امك وسوت اختك وكل مره اگلج ... موضوع الخلفه هذا يمي اني قانع واعرف كله بيد الله ...
صاير هالموضوع حجه تبتعدين بيها عني ... حتى واجباتج تجاهي كزوج مقصره بيها ..
شنو الحل .. ترى اني تعبت
نوران: اني هم تعبت وبعد ما اتحمل ..انت تريدني اتغاضى عن منغصات امك واختك ...وكل الي تكدر عليه تذمر من تصرفاتي
ميثم : يعني شلون نبقى بهالغاوي والمشاكل الي متخلص .. امي ما اكدراوگف بوجهها گتلج الف مره
خليها تحجي المهم اني ...مقصر وياج لو اتأثر بكلامها
نوران: يجي يوم وتتأثر كثر الدك يجيب نتيجه
ميثم : استغفر الله ... ماكو روحه تريدين اني اوديج اشوفين عمي كم ساعة وارجعج
نوران: شنو هو سجن بس تريدني اگابلك واگابل اهلك وياريت عاجب .. اهلي هم الهم حق عليه اذا يصير بأبويه شي واني ما شايفته ابقى طول العمر شايله منك
هاي انانيه وحتى الله ميرضى بيها
ميثم : افف ماشي روحي يومين بس لاهلج مو يم نجوان ...
نوران : ميخالف اروح اشوف اهلي وترتاح نفسيتي حتى ارجع مثل متريدني ...
ميثم : خلي نشوف ولو انت كل مترجعين منهم مقلوبه
عليه
نوران : شتقصد
ميثم : اقصد نجوان تعبي براسج ... لان اعرف باقي خواتج رياجيلهن ميخلوهن حتى يباتن ببيت اهلج
بس نجوان تبقى تبات فماكو غيرها الي يقلب حالج ويحرضج عليه وعلى اهلي
نوران: مثل متقبل احجي على امك واختك ما اقبل تحجي على نجوان ... ترى شلت ذنبها لان هي بالعكس دائما تحمد بيك وانت اضوج منها
ميثم :اي صح مو اني ما اعرفها ... ومااعرف اطباعها
اختج لو فقيره مجان مكدرت على رجلها ومشته هو وجهاله بكيفها ... هاي عود هو معروف قوي والكل تهابه
نوران : على اساس انت اختك مو حل وربط رجلها بأيدها ... اختي فقيره متجي ربع گوه هويده ... ولسانها
ميثم : سدي الموضوع ... اني حذرتج اذا تسمعين كلامها انت تخسرين لان هالحال ما عاجبني ... فاهمه ... روحي باجر دا اشوف شنو حجتج وراها ...
نوران: خليني اروح كل اسبوع خميس وجمعه ابات يم اهلي ... مو اختك يوميه تجي يمكم ومرات تبات وهي بنفس البيت
ميثم : لا بله واني شنو علاقتي بأختي ... اختي رجلها قابل بهالوضع .. اما اني متفق وياج من البدايه ما احب المره الي تبات برا بيتها
نوران : هذا مو بيتي بيت اهلك من يصير عندي بيت ... ذاك الوكت لا تقبل ابات برا بيتي
ميثم : نوران احجي عدل لا اشوفج وجه ثاني ترى ... تماديتي ولسانج طالع
كاعده تعيريني بكعدتنا يم اهلي ... اذا خاله نگرج من نگر هويده شوفيها مو كاعده بيت عمي هي وبناتها بغرفه ... انت حالج احسن من حالها
نوران : ليش حالي احسن ... خواتك اثنينهن عدهن بيوت ... بأذني سمعت هالموضوع من امك
اخاف انت متدري
ميثم : وان يكن ... بعد كم سنه يله صار عدهم
انت هم يجي يوم ويصير عندج بيت ... ولو اريد باجر اخلي ابويه يشتريلي بيت بس ما اقبلها على نفسي ... دشوفيني اشتغل ويا ابويه وما مقصر وياج بشي وحتى لو يصير عندي بيت ما اترك امي وابويه ما الهم احد غيري
خليها ترجيه بأذنج ... مجبوره تتحملين هالوضع من البدايه مفهمج كلشي ومتفق وياج وجنتيَ موافقه ... هسه تغير الحجي
بسرعة حضريلي ملابسي دا اطلع ... ورايه شغل مو فاضي لمشاكلج ولهالمقارنات السخيفه... اظاهر انطيتج اكثر من قدرج لدرجه تذمرين من عيشه افضل من الي جنتي عايشتها مية مره
نوران : انت الي كاعد تعيرني بوضع اهلي ...
ميثم : انت جبرتيني احجي واذكرج بهالشي حتى تحسين بالنعمه الي انت متبطره عليها
من اخذتج جنت اعرف وضع اهلج ولو ادور هالسوالف مجان اصلا اتقدمتلج ... بس اظاهر الماديات تاكل وتشرب وياج ... وصلتي مرحله طغيتي والسبب مني طلعت عينج الدلال الزايد .. انگلب عليه بصوره عكسيه .. عبالي تقدرين
طلعت.. مغثوث من كلامها بقيت الوم نفسي اني الي انطيتها مجال وخليتها تتمادى ويايه ..
صعدت بالسياره .. ما انتبهت على سنان من دخل الا من دك على الجامه فتحتها
ها شلونك
سنان: الحمد لله شوف هالايام مختفي .. متمر
ميثم : والله ملتهي بشغله ويا ابويه يادوب ارجع من الجامعه ... ارتاح شويه واطلع لابويه
سنان: يله هانت بس هالسنه وتتخرج ان شاء الله
ميثم : ان شاء الله ... انت اخبارك
سنان : ماكو شي على حالي ...اخذ راحتك ... عبالي
هسه جاي للبيت كلت نروح سويه يم جدي .. يله توكل اشوفك غير وكت
ميثم : سلملي عليه لعد اشوفك بليل امرلكم ان شاء الله
سنان : ان شاء الله
دخلت للبيت غيرت ملابسي امي سألتني تتغدا
جاوبتها لا رايح يم جدي وبيبيتي اليوم اتغدا من البارحه گلتلي ينتظروني على الغدا
طلعت ... ودخلت
من باب مطبخ بيبيتي ... الله بالخير
ياسر : تعال بالهول كاعدين
سنان: دخلت السلام عليكم
ياسر : وعليكم السلام
محاسن : الله يساعدك حبيبي ... اصبلك غدا
سنان : اي والله يمه ولو راح اتعبج
ياسر : لا متعبها احضرلك الغدا .. لكن متعبها بحالك
شوكت الله يهديك وتزوج ...
سنان: بقلبي اها اذا هاي السالفه
يابه هالموضوع مو حجينا بي سابقا وعرفتوا ما افكر بي ولا ناوي اتزوج بعد المرحومه .
ياسر : بابا هاي سنه الحياة انت تريد توگف حياتك المرحومه راحت لدار حقها .. كدامك عمر خوما تبقى
بلا مره ولا اطفال شنو انت شايب وتوفت مرته حتى الشياب تزوج ورا وفاة نسوانهم
محاسن: خليت الصينيه على الطبله ... وليدي غير نريد مصلحتك انت بعدك شاب بأول عمره شكد تريد تبقى بلا زواج يجي يوم يمر بيك العمر وتحتاج ولد ولا بنيه يملون عليك حياتك وتتعب وتشتغل الهم هسه انت شنو حياتك من البيت للجامعه ومن الجامعه للبيت
يجوز هسه بعدك عقلك ميستوعب كلامنا بس محد دايملك يجي يوم تحتاج مره اشاركك الحياه وتستند عليها ويصير عندك اطفال يملون عليك الدنيا ويفرحون قلبك
سنان: فركت وجهي بأيديه ثنينهن اشاره لما بداخلي مراح احد يفهمه ولا يقتنعون بكلامي .. لان حجيته قبل هالمره ورجعوا فتحوا الموضوع مره لخ
اتنهدت ... يمه ماترهم اخش بخطيه انسانه ما الها مكان بقلبي ..يا مره تقبل تعيش ويا رجال ميكن الها اي مشاعر
ياسر: اخذ بت عمك ... هي افضل خيار الك
وفاهمه وضعك ... وهي الوحيده الي مساندتك وما تلگى راحتك الا وياها بعد شنو حجتك
سنان: يابه يعني انتوا صدك متفكرون بعذراء ... ليش اني اتزوجها والبنيه كدامها مستقبل وبعدها شابه وما بيها اي قصور دكتوره وحلوه شنو مخليها مثل الوقف الي ... يعني والله دتخلوني احس هالبنيه ظلمتوها بسببي ... والف مره گلت ما ناوي اتزوج أنهوا هالموضوع
محاسن: من شفته مغثوث اشرت لجده يترك الموضوع
يله وليدي براحتك ... دتغدا صدك اذا ماعندك شي العصر
اريدك توديني ... لبيت فاطمه ( اختي)
سنان: لا ماعندي شي شوكت تريدين اوديج ... بعيني
محاسن : تسلم عينك والله اليوم علمودك ركبت مركة السمج اكل حبيبي لا تضوج من كلامنا ...غير من محبتنا ننصحك
سنان: ابتسمت حتى ازيح حاله القلق الي شفتها بعيونها
عاشت ايدج يمه تدرين ما أقاوم طبخج
وما انغث لان اعرف ... تريدون مصلحتي ... وكلشي بأمر الله لا تشيلون همي اني مرتب حياتي ومرتاح على هالوضع
الحمد لله ...هاج شوفي قضيت على الاكل
اروح اغسل واتمدد ... حتى سوكت ما تجهزين .. اوديج لبيت بيبيتي فاطمه
محاسن: الف عافيه ...روح تمدد فوگ بغرفتك
عود اني اكعدك ...
سنان: اترخص يابه ...
ياسر: ما تشرب جاي
سنان: ان شاء الله من اكعد
محاسن: سمعه ميريد يتزوج .. بعد لا توگف حال البنيه وهاي الكليشه مال ياهو الي يتقدملها تگله ابن عمها رايدها بطلها ... سمعته بأذنك ميفكر بيها
ياسر: طبعا جايبين العناد منج وانطيتيهم عين ..بقيتي ادارين خاطره
محاسن: يا عيني عليك شلون قنوع ... والله كلها طالعه عليك الي براسكم براسكم لا يفيد بيكم خواطر ولا حجي
اروح احضر اموري ... احسن
ياسر: اتصل عليج وليد اليوم شخبارهم
محاسن: اي اتصل فدوه لعينه يوميه يصبح عليه زينين ... الحمد لله وسلم عليك
ياسر : الحمد لله ... الله يسلمه ..
سلوان : طلعت من الحمام ... وكفت كدام المرايه
امشط شعري ... لمحت الزنجيل على صدري اشبهه بداخلي (انت مثل الوشم الي يندگ بالصدر حتى من ضيعتك لكيتك من يوم الي رجعتك وخليتك برگبتي ما شفت راحه كأنه دعواتها عليه مراح تسكن ولا تنتهي ) تنهدت ... ياربي ضايع بهالدنيا ما اعرف شنو الي يريحني ولا شنو اريد
شفت هويده نايمه ... التفتت
العله مو بيها العله بيه ... اكو غلط ارتكبته من اول ما ارتبطنا ... خلاها بعيده عني ... صح كلام سنان ...
هي متحمله كل عيوبي ...اني الي موقانع بحياتي بسبب قلبي الي لليوم ما نسى ولا يريد ينسى ضيعته وضعت وياه
لو بس تتصل وطلعني من حاله التوهان الي اني بيها .. ياريت ما شلت التلفون ولا رجعت افكر واتأمل من جديد
اريد اطلع وميهلي ..اخاف تتصل مليت من الانتظاروالتفكير ...خلي ابدل واطلع ... التهي ويا الولد وانسى
غيرت ملابسي وطلعت...صارت نجاة كدامي كالعاده بكامل اناقتها شكلها جايه من برا
نجاة: هلو سلوان شلونك عمه
سلوان : جاوبتها من ورا خشمي ...الحمد لله
نجاه: شو لا تمر لا تسأل؟ ... ماطول شفتك اريدك تجيبلي من بيبيتك قنينة غاز ميثم وعمك ما موجودين
وراح يجوني خطار ...لازم اضيفهم
سلوان : اتجاهلت سؤالها ...هسه اجيبها دخلت لبيت جدي اخذت قنينه ...ودكيت الباب على بيت عمي
فتحتلي نجاة
اخذتها اوديها للمطبخ قريب ما اوصل للمطبخ صارت بوجهي نوران
ارتبكت من شفتها بدون حجاب وملابسها قصيره
صارت عندي حاله غباء ما اعرف أتصرف ارجع اكمل طريقي لو المفروض هي الي من شافتني تستر عن عيني ..كل هالامور صارت بلحظات واني كملت طريقي للمطبخ .. وبنفس احساس الخوف الي تملكني منها بالمزرعه ... خلاني بلا وعي اخاف اطلع واصادفها صحت بصوت عالي ... عمه تعالي افحصي القنينه ... وما كان ببالي .. حتى هالشي بس اريدها تجي حتى اطلع من المطبخ
بهالاثناء دخلت وهي لابسه عبايه وشال ...
نوران: شلونك سلوان
سلوان: هلو نوران ..
نوران: عفيه بس تأكد منها اخاف تسويلنا مشكله اذا تنفس
سلوان: لعد وين عمتي نجاة
نوران: ليش احسك ترتبك من تكون ويايه بنفس المكان ..
سلوان :على شنو ارتبك ... انتِ مثل اختي ..ابتسمتلي ابتسامه ما عرفت أفسرها
نوران : بس وضعك ما يوحي بهالشي ...
سلوان: مابيها شي القنينه ... اني اترخص
طلعت ..بداخلي شي خلى قلبي مقبوض..
لا هاي البنيه قاصدتني ... مو مثل ما احاول اكذب على نفسي وابرر... اني الي افتهم تصرفاتها غلط
طلعت ويا الولد انتبهت تجي على بالي ودماغي حافظ الصوره الي شفتها عليها بدون حجاب ولبسها
حرك شي بداخلي حاولت امحي هالصوره و اعترفت بيني وبين نفسي ...هالبنيه أتثيرني وشكلها عجبني ..
بيها فتنه وعرفت ارتباكي جاي من تأثيرها عليه ... حتى بأبتسامته حسيتها فاهمه الي بداخلي ...
بين وسوسه شيطان وتفكيري بيها وبين اتذكر هالانسانه متزوجه وزوجها ابن عمي والي ديصير ويايه خيانه لأقرب الناس الي ... حاولت الهي نفسي عن التفكير بيها وبتصرفاتها ويايه وشنو الي تريد توصله وهي مرتبطه واني مرتبط ...
ورا كم يوم ...
مثل كل يوم ارجع من الدوام انام واكعد العصر
نزلت يم اهلي بالهول ... فهمت التلفون اليوم ما سكت
ونفس المره السابقه يشيلوا وينسد بوجههم
هنا حسيت بترقب ... اريده يدگ حتى اروح اشيله
فصلت عن كل الي داير مدايري ... تركيزي كله ويا التلفون ...
انتظر اشيله وتطلع هي الي بالي دتتصل ...
بعد كم ساعة انتظار فقدت الامل ...
لليل ... انجمعوا بيت جدي وعمامي ونسوانهم وميثم
وسنان وعذراء... ارتاحيت من شفت نوران مو وياهم .. بديت اخاف من نفسي وتأثيرها عليه ...
رن التلفون ... شلته واجاني نفس الصوت الي جنت انتظره
رحت شلت سماعه الصاله ... ورجعت انطيت خبر المكالمه الي حتى محد يشيل سماعه الهول
الو
الو هلو سلوان
سلوان: بس اريد اعرف شلون تميزين صوتي من بين الي تسدي بوجههم
_القلب يحس والأذن تحفظ صوت الي تحبهم
سلوان: ركزت هالمره بالصوت والاسلوب ... ايقنت لا هاي مو الي بالي ... جريئه وصوتها يختلف مستحيل اصدك نسيت صوتها حتى لو انسى ما انسى اسلوبها والبراءه بصوتها والخجل بكلامها
مراح تگليلي انت منو
_اذا عرفت شنو الي يتغير ... ما اتصور يتغير شي
ولا راح تحس
سلوان: اعتبري فضول... شكلي مدوخج صار سنين ومامعبرج
_من سوء حظي اكو من دايخ بيه لكن قلبي ما دايخ غير بيك
سلوان: شعجب ما حاولتي كل هالسنين تتصلين مثل ما هسه دتتصلين
_جنت احاول انساك بس القدر مو قابل ينسيني اول حب واول حبيبي
سلوان: اخر مره شوكت شفتيني
_مصار هواي ...
سلوان: حيرتيني معناها انت لو ويايه بالدائره لو بنفس منطقتي
_ليش تريد تعرف شنو الي يهمك بهالموضوع
الافضل ما تعرفني ... لان طريقنا مابي التقاء
سلوان: زين من تعرفين ماكو فايده ليش مدوختني
_مدوخه عقلك بفضول تعرف اني ِمنو ... بس اني رايده قلبك مو عقلك يدوخ بيه
سلوان: لعد دتعبين نفسج قلبي انطيته لوحده من سنين واخذته وياها يعني سلوان الي تعرفي هسه بلا قلب
_ميخالف اني راضيه المهم اني ابقى احبك ... واسمع صوتك كل فتره كلش كافي عندي
سلوان: والله قنوعه ... شفايتلي اصير مثلج
_ليش انت ما قانع بحياتك .... لحظه اعتبرني صديقه وفضفض وياها
سلوان: انت تعرفين عني هواي امور ... واضح من كلامج
_صح اعرف بس شي قليل ... واحسك مامرتاح اكو شي بداخلك يعكس تصرفاتك كشخص مو سعيد بحياته
وقبل شويه عرفت السبب وحده حبيتها وماصارت الك صح
سلوان: تدرين بديت اخاف منج ... دا احس راح تجيني مشاكل من وراج
_ههههههه بس الي اعرفه انت مو جبان والي براسك تسوي ما تخلي اعتبار لاحد
سلوان: لاعاد متوصل للاعتبار ... اهلي الهم كل الاعتبار بحياتي ... بس ويا نفسي والغريب ما اخلي اعتبار صح ميهمني احد خارج سياج بيتنا
عوفج من حياتي ... انت سولفيلي شوكت حبيتيني
_ههههه ترى اعرف انت ذكي وتريد تجرجرني بالكلام ... بس ترى اني اذكى منك ... يعني واعيه لكل كلمه تطلع مني تخليك ... ما تتكهن اني ِمنو
سلوان:يعني اذا انطيتيني تفاصيل اكدر من عدها اعرف انتِ ِمنو
_اي بس مراح انطيك هالتفاصيل ... لان متوقعه يجي يوم تعرفني ...
سلوان: بقيت احجي وياها ... وكانت بالفعل ذكيه وماكره لدرجه ما انطتني اي شي يخليني اتعرف عليها
لكن الي حسيت بي وياها ارتياح وانشديت الها ولطريقة كلامها ... وبدون ما انتبهت سألتها شوكت
تتصلين مره لخ ... حتى انتظرج
_انتظرني باجر ... سلوان
سلوان_نعم
_احبك واموت عليك
سلوان:هههههه تدرين بديت ارسملج صوره بدماغي طول مدا تحجين ويايه
_عاد حلوه لو لا هههههه
سلوان: ويا هالضحكه اكيد حلوه
_يله انتظر مني تلفون باجر
سلوان _لحظه انت گلتي مو اي وقت تكدرين تتصلين في حال باجر ما كدرتي شلون اعرف اليوم الي تكدرين
وبعد ما اتفقنا على الموعد الي كان مو محدد لكن حددت ساعةتتوافق ويا وجودي بالبيت من ادك بهالوقت ... اعرف هي الي دتتصل
نهينا الاتصال ... وبداخلي دوامه مشاعر لهالانسانه
مجهولة الهويه ...
اخذت كل تفكيري وشغلت عقلي ... حتى اتعرف عليها ... ويا كل مره تتصل ... اتعلق بيا اكثر ....
مرت ٣ اشهر ...متواصلين بيها ... الى ان انقطعت
فتره ... خلالها حسيت مضيع شي ...أدمنت الكلام وياها
علقتني بيها لدرجه حبيتها ...وما تغيب كلماتها ولا الصوره الي رسمتها الها ... عن بالي
بدون ادراك ... عكست توتري وترقبي لاتصالها على علاقتي بهويده ... لدرجه الاهمال ... واتحجج عليها
بكل تصرف ... وما عاجبني حالها بكل الاحوال
واقارن كلامها وتصرفاتها ويايه
بكلام الي اسمها نور ...
  هويده: شوكت تروح للفاتحه..... حتى نروح اني وامي وياك
سلوان: ترى اروح ساعة وارجع .... ما ابقى ...
هويده : شلون يصير ... غير تبقى ويا ميثم والولد ...
سلوان: البارحه رحت ... وبقيت ويا طول الوقت ...
جدي والولد وعمامي موجودين ... عندي شغل ...
هويده : شغل لو طلعة .... مو عيب غير توگف وياهم
سلوان : اني شنو علاقتي هو ابو مرته ...اني ِمنو ينتبه  عليه اذا موجود لو لا
اروح اادي الواجب وارجع ... اذا تريدين تبقين ... عود ارجعي ويا سنان لو اي احد من عمامي ...
كلهم موجودين ...
هويده : اي طبعا انت شنو علاقتك ... الطلعه اهم
سلوان : هويده لا دوخين راسي ... الي يسمعج يگول شلون تحبين نوران ودورين خاطرها ...
هويده: الظرف هذا مابي احبها لو ما احبها ... هاي اصول لازم نوگف وياها ... الي متوفي ابوها ...
وهي مرت اخويه اذا مو لخاطرها لخاطر ميثم ...
سلوان: اي خلص ابقي انتِ أدي الواجب وارجعي
اني باجر هم اروح بالثالث ... عود ابقى الى ان  تخلص الفاتحه ...
هويده: بقلبي والله انت مو خالي وضعك بي أن
صارلك فتره مگلوب حالك   ... اوف بس لو اعرف علتك
امال: سلوان ماما ... تعال وليد على التلفون
سلوان : هسه نازل لحظه ...
يله كملي بسرعة بين ما اكمل مكالمه ويا وليد الگاج نازله ...
نزلت ... ها يوم انت هم راح تجين ويانا
أمال: اي ...
سلوان: زين والبنات وين راح يبقن ...
أمال: يم عذوره گالت جيبوهن يمي ....
سلوان: لعد حسبي حسابج ساعة وارجعكم ما نطول هناك
أمال: ان شاء الله
سلوان : الو
وليد: شلونك ابو السوس
سلوان: الحمد لله انت شلونك ...
وليد: الحمد لله ... خطيه هاي شوكت توفى ابو نوران
سلوان: اول البارحه بليل  ... شعجب متدري لازم ممخابر احد البارحه
وليد: لا والله ... اتصلت  العصر محد جاوب بقى بالي ... عاد قبل شويه اتصلت طلعتلي عذراء ... گالت .. جانوا بالفاتحه البارحه ... واليوم هم  بس هي باقيه بالبيت. كلت اتصل عليك افتهم ...
سلوان: هو الرجال مريض .. وجان كل فتره يسوي غسيل كلى اول البارحه ... اتوفى بليل
والبارحه كلنا بالفاتحه وهسه ... هم راح نروح ...
وليد: يعني باجر تخلص حتى ... اتصل على ميثم .. اخذ من خاطره
اذا هويده يمك ... مريومه تريدها ...
التفتت على مريم. ... بسرعة احجي لان ديريدون يطلعون للفاتحه
مريم : خليها لعد من ترجع هويده
وليد: اگلك ... اخذوا راحتكم هوزمن ترجع هويده خلي تتصل .. بمريم
سلوان: ان شاء الله ... سلملي على مريومه مع السلامه 
وليد:يوصل ...مع السلامه...
خليت السماعه وانداريت على مريم 
طلع مريض عنده فشل كلوي من زمان
مريم : ادري بي ... خطيه  سامعه كل فتره يسوي غسيل كلى ...الله رحمه من  عذاب الالم
وليد:  هاي شوكت سويتي ... حلاوة الجزر عاشت ايدج صايره ... ام بيت معدله
مريم: تنهدت شسوي ... من كعدت البيت مكابله الحيطان ... التهي بالمطبخ ...بداخلي ابتسم  لان استلم البسمار ويحاول يغشم نفسه  لازم الشوكه ومستمر ياكل بالحلاوه
راح تطلع ... التفت عليه بوجهه ابتسامه
وليد: مراح تبطلين ..هالمقدمه ... لا ماناوي  
بس خليلي من الحلاوه اودي لمحمد وارجع ...
مريم:يمكن محمد اخويه واني مبتليه بي  اسوي الشغله و ينكسر ظهري بيها تالي   ... تشيل نصها.  تنطيهيا
وليد: لج مو خطيه اعزب وماعنده احد ...يذكرني  بروحي من اجيت اول مره وحدي ...و ما اعرف اطبخ ..
الله يذكره بالخير عبد الرحمن ...دزه رب العالمين النا من السما وكعده ويانا  اني والولد بالشقه  ...طبخج لا شي يم طبخه...
مريم: ها  طبخي لا شي ويوميه مسويلك عزيمه .. لجماعتك همزين گتلي .. حتى بعد ما اطبخ ماطول ما عاجبك
وليد: هسه اني گلت ما عاجبني
مريومه گول الغربه رايدلها اصدقاء والي تساعدين بي غيرج ... يجي يوم ينرد بساعة شده حبيبتي ...شنو قيمه الاكل ...بس عند محمد وبعض الولد اله قيمه لان محرومين من أكلنا العراقي .. اخاف انت عبالج بس اني اعزمهم  ...ترى اغلب جماعتنا  بالممثليه
الي نسوانهم موجودات وياهم مثل حالتنا   ..يعزمون الولد ... وبرمضان يودولهم اكل...
مريم:همزين حلاوه الجزر سوتلنا موضوع نسولف بي ...
وليد: ولج انت  غير ظالمه ... ليش اني مو يوميه من ارجع من الدوام ... اكعد اسولف وياج  عن يومي بين متصبيلي الغدا ...
مريم : مو  والله طگت روحي ... مو گلت راح تعرفني بنسوان جماعتك ونسويلنا طلعه  وياهم وگف على السنك غسل التفت
وليد:باجر اتفق وياهم نطلع على نهايه الاسبوع ... ولو اني اخاف من لغاوي النسوان وحده تعبي  براس الثانيه نصائح وانت تخربين على النصائح هاي
من عدا شكد سامع يتخاربن من القال والقلت والنفاق 
مريم:  من هاي اگلك عرفني عليهن  تگلي ان شاء الله وراها  اطنش ....
بنظرات تودد... وابتسامه حافظه معناها
وليد: انطينيا لهذا ... وتعالي نتعرف اني وياج ...
مريم : راح تقلب الموضوع مداهر .. اخذ خالد مني ... ولزم كف ايدي
واخذني وياهم للهول ...  كعدت بصفه وهو يلعب ويا خالد ..
على القنفه لكن نظراته عليه  ...حس بيه مكتئبه من گتله ماطول دتلعب خالد اروح اتمدد ... ورا دقايق دخل ورايه للغرفه خلى الولد على الفراش وتمدد بصفي ...
سند خده على ايده
وليد: اي مريومه ... احجي شنو الي غاثج
مريم: ماكو شي بس تعبانه ...
وليد: مريومه ... اني حافظج ... اكو شي بهالراس گالب حالج
... يله اريد اعرف شنو الموضوع ...
مريم : شاكه ما متأكده اخاف اگلك وتنغث
وليد: احجي مريومه شصاير
مريم: يمكن حامل .... بالاول شفته گلب وجهه لكن من انتبه عيني تترقب رد فعله ... ابتسم
وليد: يعني راح تخلفيلي عايق لو عايقه مثل هذا
مريم : گول والله فرحان ... وليش تگول هذا ... والله احسك رجل امه
مو عنده اسم
وليد: ههههه والله بطني وجعتني اول ما انطيتيني الخبراتذكرت المعاناه
ومن گلت هذا جنت بعدني متأثر بيوم ولادته تذكرته وحقدت عليه على الي سوا بينا ...
تالي ابتسمت لان تخيلت راح تجي نسخه ثالثه منج بس بنيه ... ويصير عندي بدل العله ثلاث علل
مريم: مثل ما هو حافظ تصرفاتي اني هم حافظته ...فرحته كانت بقلق
حاول يلهي نفسه بخالد بقى يعلمه امك شنو ... وذاك
يردد ورا عله قلبك .... بلسان طفل ....التفت عليه يعله قلبي هالمره اشوفلي درب ... من تولدين ... ويمكن ارجعج لبغداد تحير بيج حسونه
ابتسمت لان عرفته قلق وبدا يخاف عليه
وليد: نامي لعد واحنه نروح نتصل على امي وعلى حسونه أبشرهم ...
مريم : دنتظر اسوي تحليل .... ونتأكد يله تتصل بقيت وحدي ورا ما طلعوا افكر... بالمستقبل واتخيل شكل بنتي ... الى ان غفيت ....وكعدت على صوت وليد
وليد: مريومه ...هويده على التلفون اكعدي حبيبتي حتى تكدرين تنامين بليل وهذا هم تعبني ... اخاف جوعان
مريم : نفس اعراض كل يوم خمول وصداع وألم بظهري ... بين الي اريد اگوم وبين حابه ابقى اكمل نومتي .... لكن اتذكرت ابني هسه اكيد يحتاج اغيرله وانطي اكل
غسلت وطلعت رفعت السماعه الو
هويده : هلو مريومه شلونج يا مسعده نايمه
مريم : اي والله جنت نايمه .... شكلي حامل
هويده : صدك .... ليش مو گلتي وليد ما يريد وميقبل ... نسوي طفل
مريم : ولو بيده مجان قبل .... بس رزق ربج ونعمته ... ما يكدر يعترض عليه باجر ياخذني اسوي تحليل دم .... واتأكد ان شاء الله
هويده : ان شاء الله ... الله يساعدج شلون راح تدبيرها بالغربه حامل وطفل وبيت ... والله اني بناتي خاله مساعدتني بيهن ... وهم خطيه تطبخ وموات تنظف ويايه من اشوفني تعبانه .... واجي تالي الليل انيم رانيا ومن التعب اخلي راسي على المخده بدقايق ما ادري بالدنيا ..
مريم : وريم
هويده : لا هاي صايره متريدني لو يم خالتي لو تنتظر ابوها يجي وتصعد تبقى بحضنه تتفرج ويا على التلفزيون ... لو يلعب وياها الى ان تنام ..
مريم : هم زين تريد ابوها ... ومتعلقه بي
هويده : ابوها مخبلني .... وتخبل عليه ما ادري شبي ... متغير وأوضاعه ما مريحتني
لج ميتحمل مني حجايه ... وكلشي ما عاجبه ... ابتلي افتح ويا موضوع حتى يتحجج ويتزعل ... على كلشي ينتقدني ... من اصفن بحاله اگول ورا هالسالفه ... مره گالبه كيانه
مريم : عزه وحجيتي ويا ...واجهتي .... بتصرفاته وليش مقلوب عليج
هويده : اگلها ميخليني افتح حلگي بحجايه .... ديگب بوجهي ... واني روحي ما حاملتها ... بلحظتها انقهر واكل بنفسي بس بعدين اگول طز ...
اذا يدور ورايه شراح اسوي ... قابل راح ينردع اذا حجيت ... بالعكس يزيد ما ينقص ... وصلني مرحله بعد ما يهمني ولا عندي مشاعر تجاهه ...
مريم : الله يساعدج ... شلون تتحملين وتكدرين ما تنفجرين هاي لو اني ... جان طگيت وكتيت كل الي بقلبي ....
هويده : شسوي قسمتي ... ونصيبي كله من جدي ... ابن العم لبت العم زرع هالفكره براسنا بدون ما نحسبها صح لو غلط اكو توافق لو لا ... يعني اني لو بهذا عقلي ... ورايدني سلوان ... ما اقبل بي لو تنگلب الدنيا ...بس بعد ما يفيد الندم لذلك ... بعد ما يهمني شيريد يسوي خلي يسوي ولا ادوخ نفسي بي
مريم : نفس هالمكالمه استقبلتها من هويده .... ورا كم شهر...
جنت گاعده المغرب وحدي اقرا كتاب ... وباديه عليه ملامح الحمل ...رفعت السماعه واتفاجئت بالموضوع الي بلغتني بي هويده
هويده : لج شفتي هاي الحقيره نوران طالبه الطلاك ... من ميثم ...
مريم : يا ستار شنو السبب ما تعرفين ....