الجزء٥١
ج٥١ المفروض نزل من قبل ما انزل الاتفاق بعد ما انزل بارت الا اكمل الروايه لكن هسه شفته منازل رجعت نزلته
#حكايات_من_بيت_جدي
الجزء٥١
اماسي الليل
حقوق النشر محفوظه
سلوان : التفتت اضحك لوليد اسولف
وليد: دخيل الله سد حلگك مصار يومين من تصالحنا
مريم : لا سولف الله عليك
سلوان : لا عمي شيخلصني منه.... اذا زعلتي
هويده : هي الشغله قديمه
سلوان : اي
قديمه من ايام المراهقه
هويده : لعد سولفها شكو دتزعل ....
وليد: اني اسولفها ... اكو وحده تعرفوها وهم
جانت وياكم بالمدرسه اني وسلوان انتبهنا عليها تباوع علينا بس منو المقصود منعرف
بس سلوان لزك يريد يصادقها ... واني مخلي عيني عليها ...
ما كدرت بوكتها غير اطلعها من عينه .... واخوفه بأبوها ....
اذا يعرف تصيرلنا مشكله ويا جدي .... المهم سلوان ضحك عليه وگلي شلتها من راسي ... اني هنا تحركت صرت روميو صادقتها ...تالي طلعت البنيه ناصبه عليه وعليه ... ومصادقتنا
بنفس الوقت ...
بوقتها افتهمنا الموضوع بي نصبه ....من بنيه فتنت عليها كالت ترى هي تسميكم زوج غربان
وتراهنت عليكم ...وبيوم عيد ميلادها تعزم البنات يمها وتتصل عليكم اتسمعهم شلون ضاحكه عليكم بنفس الوقت ...
بيومها اني وسلوان گضيناها نضحك على نفسنا هو يگلي يغراب تشتغل من ورايه واني اگله انت هم غراب وتشتغل من ورايه ... وبوقتها ما كدرنا نسويلها شي لا توصل السالفه يم جدي ... اخذنا المقلب ... عبره
... ومن يومها سلوان يعرف اسماء صديقاتي واني اعرف اسماء صديقاته حتى منتعرض لنفس الموقف
وهي الصلفه بقت كل متشوفنا تبتسم تستفزنا ...
ومن يومها صار لقب غراب ... مشترك كل واحد يسمي الخ بي
مريومه بداعت خالد مو تقلبين وجهج
مريم : ابتسمت لان فهم صفنتي ... جنت افكر واحْلُل كلامه)
البنيه الي فضحت صديقتكم اكيد هم صادقتها ...
وليد: لا والله جانت صديقه ولد صاحبنا
وهو خلاها تحجي الي تعرفه عن الموضوع وتحذرنا
سلوان : مريومه انت كاعده تحاسبي على سوالف صارلها اكثر من عشر سنين ... هسه لو نشوفهن بالشارع ما نعرفهن( البنات)
هويده : شكد كذاب خطيه ما يعرفهن ... شلون فقير
وليد: هههههه گوموا خلي نروح يم البقيه ... حتى تلتهي وياهم ترى مريومه شيطانها ابو دروب يعرف
شلون يخبلها عليه من تصفن گولوا قنعها بحجه قويه ...
حبيبتي باجر اخذج للساعة ... نتعشا قبل ما انسافر
مريم : ههههه يله خلي نرجع هسه يصبون الاكل ...
مشى بصفي شايل خالد ( نايم ) حسيته يسترق النظر
لوجهي ... (ردت ااريحه )
ولودي مو تنسى تاخذ ليف وصابون رگي
وليد: لا حبيبتي كاتبهن بورقه ....باجر من ننطلع ناخذ كل الغراض الي نحتاجها
سلوان: شوفي كاعد يمها ميرتاح الا وياها ... من احجي ويا بموضوعها
يبقى يضحك
هويده : ماطول شايل فكره الزواج من راسه ما اتوقع يتزوج
لعد شكد يحبها لشهد ... الله يرحمها
يمكن هاي لو انت على الاربعين تزوج
سلوان : لا عيب من الناس من تطلع السنه
ههههه
هويده : والله وفِي ... شدعوه جاي على نفسك
سلوان : ابتسمت ) انت موتي .... وشوفي الوفاء على اصوله كل خميس اسويلج ثواب ... وكل عيد ازورج
هويده : شكد لئيم ... اذا صدك تتمنى اموت ان شاء الله انت قبلي
سلوان :والله حرت وياج اشاقى ما عاجبج اسكت تگليلي تحجي ويايه بالگوه
هويده : عاد مو هيج شقى تريدني اموت
سلوان : يله ملازم ... نخليها اريد اتزوج هههههه
هويده : شقاك اليوم ثگيل ....ياحلو
سلوان: ليش اني حلو
هويده : متأكد مسامعها من وحده ... قبلي طلعت مصادق حتى براق
سلوان : ههههه شلون عرفتيها ....لا سامعها بس من اسمعها منج غير ... انت مرتي ماكو وجه مقارنه بينج وبينهن ...
هويده : عرفتها من گلت تعرفوها وبنفس مدرستنا وجبتوا سيره ابوها وجدي
ماكو غيرها ... ابوها يصير كرايب جدو
سلوان احجي الصدك انت تحبّني ....
سلوان : طبعا احبج بت عمي ومرتي وام بناتي بس لتگليلي سجل البيت بإسمي هههههه هو اول وتالي الج
هويده : شكد لئيم والله ما بالي ...
سلوان : مريت من يم سنان غمزتله .... وحاولت ابتعد عن المكان الي كاعده بي نوران كعدنا اني وهويده يم عذراء بقيت فتره ...
اتجنبها ...
الى ان انجمعنا ... قبل ميسافر وليد مريم بيومين رحنا لمطعم
اتعشينا سوا .... جانت تصرفاتها طبيعيه متوحي بشي
بيومها ... أنبت نفسي ... اني الي تفكيري ... مو راحه وافتهمت البنيه غلط .... رجعت اتعامل وياها طبيعي ... بس بداخلي تخوف حتى من احجي وياها ما اخلي عيني بعينها ....
مرت الايام ....
وبيوم ... جنت مبدل ملابسي اريد اطلع المغرب ... اروح ويا الولد
نسهر ... دك التلفون اكثر من مره ...
انتبهت امي من اشيله يسدوا الخط ... شفتها اتذمرت ...
گتلها اتركي اني اجاوب ...
اول ما دك ... شلت السماعه ... الو
اجاني صوت بنيه .... سألت بيت فلانه جاوبتها لا الرقم غلط
سألتني انت منو لعد
جاوبتها انت الي منو ...
صدمتني اني معجبه ...
ابتسمت عرفت وحده متقصده الرقم وتعرفه وهي الي اتسد الخط من اشيله امي ...
جاوبتها انت المن رايده ( للحظه شكيت الاتصال ممكن يكون لسنان ... بس اخويه واعرفه ماعنده هيج سوالف ... ما سواها من مراهق ... ما اتوقع يسويها بهالعمر ... بس گلت يجوز هي الي متقصدته )
ضحكت ... يله اتعرف عليك
جاوبتها ... وانت وين تعرفيني
لا اعرفك ...
ليش اني منو ومنين تعرفيني ...
انت سلوان صح ....
اتفاجئت وبقيت اركز بالصوت ما ميزته .... خفت لا تكون وحده من الي تعرفهم هويده ... وتريد تختبرني بالاخص بعد ما
بقت نفس المشاكل مستمره بيناتنا .... واتهمتني اعرف وحده من وراها
جاوبتها ... الرقم غلط واني مو سلوان .... سديت الخط
وطلعت ....
من رجعت بليل ... خلال ما مجتمعين كلنا .... امي ذكرت
التلفون اليوم ... ما بطل يدگ .... وشفت هويده تحجي وياها
وهم شايلته اكثر من مره ... وماكو جواب ...
شارك بالحديث سنان وابويه .... الي جان متهم ... من كلام امي ... وتلميحاتها ... ابويه ... بداخلي ابتسم
واعرف هالمره هو برئ .... بس من. هاي ... الي تعرفني وتلح
بالاتصال .... وتأكدت هويده ما الها علاقه بالموضوع ....
ثاني يوم الجمعه ...
انعاد نفس الفلم ... وكل البيت يرفعون السماعه وينسد الخط بوجههم .... حتى ابويه ...
الي مو من عادته يشيل التلفون .... شاله في سبيل يثبت
مو هو المقصود ... كدام امي ....
صار عندي فضول ... للظهر ... الكل نايمين ... دك التلفون ...واني وحدي اتفرج على التلفزيون ... رديت ... الو
اجاني نفس الصوت ...
_واخيرا رديت ... لا اتسده خليني اسمع صوتك ...
ضحكت ... انت ِمنو
_اني وحده قلبها معلك بيك من سنين وانت عديم الاحساس
ابتسمت ... منين تعرفيني ووين شايفتني
_مو لازم تعرف اني ِمنو ... المهم اني اعرفك ومن يوم الي شفتك ما كدرت انساك
وتعرفين اني متزوج وعندي اطفال
_اعرف
ها زين من تعرفين ... شمتوقعه مني ...
_ما اعرف بس اسمع صوتك كافي عندي ... اني مو دائما اكدر اتصل ... بس بيوم الي يدك تلفونكم بملحه ... انت جاوب ... اعرف هاي اني
ليش اني اعرف انت ِمنو حتى تگليلي اعرف هاي اني ...
اذا متگليلي انت ِمنو ما اجاوب
_حاليا ما اكدر ... اعتبرني زميلتك بالشغل ماعندك زميلات يتصلون عليك
لا ماعندي ... بقيت مركز بالصوت معقوله هاي هي ونسيت صوتها بعد هالسنين ...
اسلوبها ويايه مال وحده تعرفني ...وكالت من سنين ... ماكو غيرها تعرفني وحبتني من سنين
_راح اروح ... ما اكدر اطول اكثر ...مع السلامه
سلوان :دقيقه.... انسد الخط .....
من لحظتها... رجعتلي الذكريات .... وصرت اترقب ... التلفون يدك ... حتى اشيله
مرت اكثر من عشر ايام .... بهالايام .... سمعت خبر خلاني ...
ارجع للواقع .... وانسى انتظر هالاتصال ....
الخبر هو حمل هويده .... جان هذا الخبر دائما يخليني احس
بسعاده ... واحاول أقوم نفسي .... وأتأمل راح يجيني الولد الي جنت انتظره .....وملهوف عليه
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!