رواية حكايات من بيت جدي الفصل الرابع 4 - بقلم مريم اماسي الليل

#حكايات_من_بيت_جدي
الجزء الرابع
اماسي الليل
حقوق المشر محفوظه
مريم : بنفس الليله وليد حالته اتأزمت اسمع صوت گحته واسمع عمي معن وعمه سعاد يمه
نزلت من فراشي الغرفه ظلمه حاولت اوصل للباب على اطراف اصبعي حتى البنات ميكعدون فتحت الباب اتنصت  بقى مستمر يگح مختنگ
وخاله تردد اسم الله ..اسم الله
وهو يتذمر يريدهم ينزلون
(مابيه شي روحوا نامو اذا احتاج شي اخلي سلوان ينزللكم )
عمي معن  تعصب  ونتر بي
( بلا حجي زايد عشر دقايق الگاك مبدل دا اوديك للمستشفى )
بقيت فاتحه الباب خيط استرق السمع
شويه و لمحته نزل مغير ملابسه لازم صدره تعبان
من شفته بهالحاله دموعي نزلت لان بسببي صار بي هيج نزل اول
ثلاث بايات التف دينزل الباقي من الدرج  رفع راسه وصوب نظرته على باب غرفتنا  متأكده عينه ما شافتني بس قلبه حس بيه
رجعت لفراشي ادعي بقلبي يارب احفظهم كلهم اخوتي وخواتي احبهم نفس الشي بقيت انتظر شوكت يرجعون الى ان غفيت
كعدت الصبح على صوت عذراء:
مريومه يله كومي بدلي ...
مريم: ما بيه حيل اداوم البارحه بقيت سهرانه بس جيبولي الواجبات وياكم من فرح
عذراء:  ولج البارحه انت غايبه اليوم هم تغيبين
مريم : الله يخليج روحوا للاداره اخذولي اجازه گولوا مريضه
هويده :منو ينطيج اجازه بدون ولي الامر ست مريم
امشي عذراء راح نتأخر
عذراء: طلعت صار بوجهي سنان وكالعاده
يستقبلني بأبتسامه خجوله
شكد ما هو قريب عليه احيانا  احس يبادلني المشاعر لكن يخفي هالمشاعر لان خجول
لكنهالمشاعر  بالنسبه الي واضحه اكثر شخص يفتقدني  و يحب يكعد ويايه  لدرجه يندمج  بالحديث وابد ميمل اكثر شخص يفهمني وافهمه حتى شخصياتنا متقاربه لدرجه الشبه نمتلك  نفس الطموح ونفس التوجهات وواحد يستشير الثاني ويسمع النصح من اللخ ودائما يشركني بأمور مخطط الها بالمستقبل )
صباح الخير
سنان: صباح النور وليد شوكت ماخذي للمستشفى
عذراء: فزيت ليش اخذو مستشفى
سنان: لايبقى بالج ما ادري ماعندج علم  لذلك سألتج هسه سمعتهم جوه
جدو سأل
عذراء: خلي انزل اشوف شبي
سنان: اكلج صدك من اطلع العصر ذكريني اجيبلج الملزمه
لان والله دا انسى
عذراء.: دا انزل البايات التفتت اني هم نسيتها ان شاء الله اذكرك
نزلت دخلت للمطبخ ها بيبي شبي وليد
محاسن: لاتخافين بيبي مجرد يطمئنون ويخلوله اوكسجين ..
لان البارحه كم مره اختنك بالليل امج بقى بالها اخذوا للمستشفى
هسه قبل شويه اتصل ابوج كال بس يمر الدكتور يگلهم طلعوا  يرجعون
بعده ويا جدج على الخط 
عذراء: لعد اليوم ما اروح للمدرسه
محاسن: روحي بيبي قابل اذا غبتي  شراح تسويله حرامات انت شاطره يفوتج درس
أمال: عمه لاتخافين مابي شي
هويده:صباح الخير شو ماكو احد على السفره .
محاسن: صباح النور لا بيبي هسه يلتمون بس جدج ديحجي ويا عمج معن مريومه وين لعد
هويده : بيبي مراح اداوم اليوم .
محاسن: ليش شبيها
عذراء: ما ادري بس كالت البارحه  اتأخرت بالنوم
ياسر: ها جدو يله محاسن صبي راح يتأخرون جدو نادو  اخوتكم .
هويده : صعدت من راس الدرج ميثم سنان سلوان يله جدو ينتظركم جوه
سلوان : صباح الخير
هويده :صباح النور هاي شبي حنچك مجروح
سلوان: دنزلي جيبيلي بلاستر جروح اذيت روحي بمكينة الحلاقه .
ميثم : يله اجيت طلعت سديت الباب شفت سنان وسلوان ووهويده
سنان : دا انزل صار بوجهي سلوان ووهويده .
هويده : يله انزلو ينتظروكم
سنان: يله ميثم سلوان انتظرك لو تروح وحدك
سلوان : لا روحوا اني اجي وراكم
سنان : يله ميثم لعد خلي ننزل نتريك ونطلع حتى الحگ اوصلك لمدرستك واروح
ميثم : سنان اقرب شخص الي بالعائله صح بيناتنا ٦ سنوات بس يعاملني مثل صديقه اتأثرت بشخصيته وطموحه ,
مو مثل وليد وسلوان يعاملوني كطفل ويقللون من قيمتي لذلك جنت مبتعد عنهم ودائما اتواجد ويا سنان وارتاح لعذراء اكثر من خواتي
سنان: شد حيلك هالسنه انت بكلوريا حتى اطلع معدل وتروح كلية بغداد لو ثانويه المتميزين
ميثم: وانت هم بكلوريا شوكت اصير بگدك
سنان: حبيبي من تكبر تكول اريد ارجع بكدك انتَ اشرت عليه
انت هسه بأحلى عمر من تكبر تذكره
سلوان : تأخرت عليه هويده نزلت
لگيتها ددور على بلاستر صباح الخير
الكل صباح النور
قيصر : هاي شبي حنجك هذا موس الحلاقه
سلوان: اي عدلت لحيتي
قيصر: ليش لحيتك مو خفيفه بعدها شكو تحلقها لو هاي سوالف مراهقه
عود تحلق حتى تثخن لحيتك وشواربك
هويده: لگيت بلاستر اندار دا اخليلك انقهرت عليه لان عمي يفشله كدام الكل وهو چبير وميتحمل ينغث
يبقى ساكت ورا دقايق يكوم من المكان الي كاعد بي
سلوان : انداريت خلتلي هويده البلاستر جنت دائما اعيب على شكلها واگلها شكد قبيحه لكن هي اكثر وحده من البنات احبها واحسها قريبه عليه،متخاف  مني لكن من ارزلها تبقى ساكته بعدين تنتقم  مني بطريقه تستغل  اي فرصه يكون اخد الكبار موجود فما اكدر ارزلها او اردلها الانتقام
واحد من مواقفها للانتقام واحنه صغار جانت تقلد على شعري تسمي القنفذ لان واگف وبيوم ضربتها ورحت نمت  ... حسيت عليها مخليته مكص براسي تريد تكص شعري مسكت ايدها وجريته منها اضايقها اخيانا لان
احسها اكثر وحده فاهمه اني من برا غير عن الي بداخلي ...
تعرفني  متستر من نظراتها الي من انتقدهن بأمر يخص الدين او الالتزام احسها بمزاجها تسمعني
وتدري اني مامطبق شي من الي احجي )
ورا شويه دفعت الكرسي وگمت من السفره صعدت اخذت جنطتي وطلعت للمدرسه. بالطريق حسيت احد ورايه التفتت شفت وحده حلوه من وصلت بصفي بيناتنا مسافه  ذبيتلها حجايه
(شلون مصباح حلو )
(عابت هالشكول )
(حقج صدك عابت( اشرت على وجهي ) يم هالشكول( على وجهها) )شفتها ابتسمت سألتها شنو اسمج
اتجاهلتني بقت تمشي صارت كدامي
شوفي عندي امتحان  ليش تخليني افكر بأسمج وارسب ...
(واذا رسبت اني شكو ... ارسب )
(زين انتِ يوميه تمرين من هالفرع هيج وكت )
(كافي راح تبقى تمشي ورايه متروح لمدرستك )
(مو قلبي ضعيف يم هيج شكول )
هيام : ضحكت ( اني شايفته اكثر من مره ويا ولد بس مامتوقعه شخصيته هيج ،شكله جدي ما يوحي بهاللسان المعسول )
ترى اني مو فقيره هسه اكدر اوكعك بمشكله اصيح واگول يتحارش بيه
سلوان: ههههه اذا بهذا المربع مال منطقتنا محد يصدگج لان يعرفون ما اسويها يجوز اني أبليج اگول دا امشي وتحارشت بيه خصوصا هسه عرفتج و اتذكرت اخوتج ( كذبت حتى اجرجر لسانها )
هيام: ما عندي اخوه ذولي ولد رجل امي
سلوان : المهم اعرفهم ترى راح اوصل وما عرفت اسمج
هيام: روح بابا
سلوان : ترى هواي تعيقلتي براسي طولت خلگ وياج لان حلوه
باوعت للساعة شفت ما منها فايده راح اتأخر على الامتحان تالي
اذا طردني الاستاذ اخذ صفر من وراها وصلت لفرع المدرسه وهي كملت اعدادية البنات فرق شارعين وگفت اريد اشوف راح تكمل نفس طريق مدرسه البنات انتبهت على الوقت فات برجلي للمدرسه ركض دخلت على امل الاستاذ بعده ما داخل لكن لگيته واگف يم السبوره
يكتب بأسئلة الامتحان ما قبل يدخلني الا ذليت روحي
اخيرا دخلني  لكن الماده كلها طارت من راسي ما حليت مثل ما جنت دارس انبت نفسي كله من هالبنيه سطرتني
مريم : كعدت ب ٩:٣٠البيت فارغ نزلت لگيت عمه أمال دتنظف
صباح الخير عمه اني هسه انظف روحي ارتاحي
امال: صباح النور شنو هالجمال نياله الي ياخذج مريومه ويصبح بوجهج... ليش ممداومه مو حرامات تروح عليج دروس
مريم: والله عمه البارحه فزيت على الصوت الي بغرفة وليد سمعت عمو وعمه ويا بعد ما كدرت انام الا فايت وقت اذا اداوم اكضيها انام على الرحله ،صدك عمه شنو اخباره
أمال : هسه عمه على جيه ان شاء الله
نجاة: شو ممداومه مريومه ماما، امال شنو نطبخ اليوم عمتي تگول بكيفكم
امال: عمه مريومه لعد نظفي انت خلي اني اساعد امج بالطبخ اليوم عدنا خطار .
مريم: تريگت وطلعت اغسل الكراج وعيني على الباب شوكت يجون خلصت دخلت اكمل شغل البيت
شويه وسمعت صوت سياره دخلت للكراج ركضت صعدت بركباتي على القنفه فتحت طرف البرده شفت عمو معن وعمه سعاد ووليد نزلوا من السياره
خليت كف ايدي على قلبي براحه ( الحمد لله صار زين )
بيبي بيبي رجعوا
طلعت بيبي من الغرفه ... استقبلتهم بالهول
محاسن: ها ماما شلون صرت
معن: الحمد لله اموره تمام
وليد: قبلت بيبيتي الحمد لله يمه راح اصعد انام .
سعاد: دبقى انتظر موعد العلاج وتعال اسويلك اكل بعدها اصعد
وليد: ما اريد هسه عود دزي مريم اتصحيني  .
بعد ساعة عمه سعاد گلتلي اصعدي صحي  خلي ينزل ياكل
صعدت لنص الدرج سمعت اغنية يصبرني لاسماعيل الفروچي صرت ادندن ويا الاغنيه الي جايه من غرفته احب مكان الي بهالبيت عكس صاحبها سألت نفسي ليش احب مكانه واني اكره تصرفاته واطباعه
دكيت الباب 
فتحته لگيته  واگف يم الشباك ارتبك حسيت بي شمر شي ما ادري
وضعه اتخربط ...
وليد: هاي انتِ عبالي احد من الكبار .
مريم: عمه تگول تعال انزل اكل حتى تاخذ العلاج عكفت انفي مزعوجه
اكو ريحه بغرفتك مزعجه 
وليد: جنت ادخن من انزل نظفيها وخلي الشباك مفتوح
مريم : فتحت عيني متفاجئه وليش ادخن انت مو مريض
وليد: جاوبتها بدندنه ( يصبرني الما يدري بقصتي ويگلي تهون
عشره وشيبت بأولها تاليها شلون ،سألتها متأمل منها كلمه تريح قلبي ،
مريومه انت تخافين عليه .
مريم: ( حجيت بقلبي ادري بقصتك )
جاوبته اخاف عليكم كلكم اخوتي
وليد: ( احجي وياها بقلبي شسويلج بعد حتى اخليج تحبيني )
مريومه بعده اثر الضرب بأيدج علمود هيج دتلبسين بجايم طويله
مريم: نترت بي اي بعده ضرب مال ظالم
وليد: همزين بعدني محتفظ بالچفچير حتى كل كم يوم اجدد الاثر تبقين تلبسين طويل .
مريم: والله هالمره اگله لجدو بس تضربني ويله عمه تريدك انزل خلي انظف غرفتك .
صار قريب مني همسلي
(ترى غير قلبي ميخوفني ،تعالي اشتمي ملابسي بيه ريحة تدخين  .
رفعت راسي نظرته هاي مو دائما اشوفها بيها عاطفه وحنيه ،
اي ريحه قويه
وليد: دنزلي گليلها هسه يجي بين ما اغير  ملابسي
من طلعت مشت كم خطوه تبعتها  ناديتها
مريومه
مريم : التفتت لگيته منتجي بأيديه ومطلع راسه من الباب
جاوبته نعم
وليد: تدرين انتِ الهوا الي اتنفسه .
مريم : اتفاجئت بكلامه واني ادري الي بداخله من فتره لكن  ميحرك بيه شي
مجرد ابتسمت ونزلت يمكن لان مستگوي عليه احب اشوفه ضعيف بمشاعره ويايه بداخلي جنت فرحانه بهالاعتراف
حبيت الشخص الي جان قبل شويه يحجي ويايه بهدوء وحنيه
شاغله قلبه وتفكيره معنى مو روحي بأيده هو الي روحه بأيدي ،حتى لو اريد اضحك على روحي هالشخصيه مدوم اكثر من لحظات وراها يرجع لطبيعته المتسلطه وقساوته
ومخيب ظني للظهر ورا الغدا بالسطح دا ارفع  سلة الملابس انجر شعري
وليد: تعالي تعالي شعندج طالعه بالسطح .وهاي شلابسه
مريم : امي دزتني اشر الملابس
وليد: من احد يدزج للسطح مره لخ تنادين واحد من عدنا ومتطلعين هيج
مريم : اف اف شلابسه دشداشه جرني من شعري
وليد: لاتتأفئفين لا اطيح حظج انت حلوه اذا شافج احد بالسطح يلزك عباله عندج شي طالعه بنص الظهريه فوتي .
مريم : واني شعليه بلي يباوع يطبه مرض
وليد: لج اخ لو بيدي اشوه وجهج حتى ارتاح
مريم: عوف شعري لا والله اگله لابويه ولجدو عليك
وليد: جريتها دخلتها دفوتي وروحي گليلهم دا اشوفج نجوم الظهر
شفتها نزلت
دخلت للهول الفوگ يم الولد هاي مريم اذا شفتها طالعه بالسطح والله اخلص على حياتها لك انتَ غيره سز انتبه على خواتك
ميثم : شكو طالعة بالسطح شعدها
وليد : اشرالملابس مره ثانيه تطلع وياها فهمت
سلوان: شعدها طالعه هالغبره الظهريه دخلي تصبرلي هسه نازللها
نزلت نص الدرج  ناديت  مريم
مريم : نعم
سلوان: تعالي اصعدي اشرتلها بأيدي عاكد حاجبي .
مريم : بقلبي اف شراح يخلصها ويا ذولي صعدت نعم 
سلوان : لج اذا شفتج مخطيه السطح والله اشمرج منه فهمتي
مريم: والله امي گلتلي اشر الملابس طلعت بسرعه شريتهن ودخلت ماكو احد .
سلوان: مره لخ تجين على واحد من عدنا يطلع وياج  مفهوم 
مريم: هذا وليد حركك عليه والله ماجان احد ، لزمني من زندي
سلوان : فهمتي الي حجيته.
مريم: فهمت .
سلوان : ذني وين
مريم : بالغرفه.
سلوان امشي ناديهن بسرعة وتعالن للهول
مريم : دخلت لغرفتنا عذراء دتدرس و تسمع اغاني
وهويده دترتب كنتورها اف شكد اكرههم .
هويده وعذراء: شكو
مريم : سلوان يريدنا بالهول
هويده: شكو شصاير شيريد
مريم: هريت راسي اقلد   ديبيعون رجوله براسنا غير
عذراء: امشي يمعوده شيخلصها ويا هالمخابيل .
دكيت الباب
فتح سنان مستغرب اظاهر مو  وياهم هسه صاعد 
سنان: اكو شي
سلوان: تعالن تعالن  اخاف عمامي مخليكم على راحتكم
ترى اي وحده تغلط بيكم لو تسوي تصرف ميعجب بالقرآن محد يوگف بوجي اكسرها واكعدها بالبيت
خلينا محترميكم الي اشوفها بالسطح وحدها تجني على نفسها
هويده: منو طالع بالسطح .
وليد: هاي الغبره طالعه بنص الظهاري دخلي اشوفها بعد طالعة وحدها .
سنان: استغفر الله انت وياه كافي لا تجاوزون عليهن احجوا وياهن باسلوب روحوا يبنات للغرفتكم  وانت
مريومه بعد لاتطلعين وحدج تعالي عليه اني اطلع وياج
مريم : ان شاء الله وجهت نظره حقد لوليد .
مرت الايام وليد مخلي باله يمي اكثر من ما مخلي باله يم اخته عذراء جنت اضوج من حجايته ابد ما ارتاحلج اخذ لسانه عليها وكل مره اسمعها منه اكرهه اكثر
سنان: ماكان  عندي شي يشغل بالي غير ادخل مجموعه طبيه حرمت نفسي من ابسط الامور وهي الطلعة لباب البيت بالاخص الايام الاخيره من السادس حتى ما اضيع وقت وفرصه اندم عليها بعدين
جنت مأجل اعيش حياة الولد الي بعمري ورا ما ادخل كليه، اقرب شخص جان الي بالبيت عذراء
مستودع اسراري واحلامي اختي الي احس بحرصها عليه وخوفها مثل حرصها وخوفها على وليد كلامها خفيف على مسامعي ويوصل لقلبي بسرعة لان يطلع من انسانه مثقفه وواعيه قويه شخصيه لدرجه احس شخصيتي ضعيفه يمها واني الكل يضرب المثل بيه احلى كعده وسوالف من نلتقي بجدي  وبعمي معن
عذراء تسمي  هاللقاء لقاء العمالقه ( من باب المزاح لان الكل يمتلك شخصيه قويه ومتوالمين بالمواضيع الي اناقشها ونسولف بيها وواحد يتقبل افكار الثاني ) هالكعدات جانت متنفسي الوحيد بوقت استراحتي .
سلوان: دخلت البنيه الي شفتها الصبح دماغي بقيت كم يوم اتحجج انتظر الولد يطلعون حتى اطلع وراهم وحدي  مرت كم يوم الى ان التقيتها الصبح مره ثانيه الصبح
تمشي كدامي مسافه ، اسرعت بخطواتي الى ان وصلت  وراها بمسافه قريبه .
الواحد من يصبح بهالشكول نفسيته ترتاح
هيام: فزيت التفتت هاي انتَ
(لازم هواي يصبحون بوجهج تاه عليج الصوت )
(لا والله بس واحد مغثه شفته قبل كم يوم واليوم )
(ابتسمت يعني هسه تريدين تقنعيني انت ماعندج حبيب )
(وانت شعليك شكد فضولي )
(يجوز حبيتج )
(انتو متحبون انتو عدكم غايه براسكم ويا كل البنات لاتعب روحك ثلاث شباب كاعدين ويايه بنفس البيت ما كدروا عليه مو عاد انتَ).
اتفاجئت بكلامها ... اتذكرت كلتلي ماعندي اخوه ولد رجل امي يعني دتقصدهم بالكلام
سألتها (ليش يتحارشون بيج )التفتت عليه بخزره
(كافي ترى طولت خلگ وياك كتلك وفر تعبك )
شكلها ولبسها كصيف مثير يبرز مفاتنها ميوحي
هي هيج متنطي مجال لاحد
زين اذا اكلج ماعندي غايه وياج بس اصدقاء، رمقتني بنظره استهزاء
(والله !!! خوش درب بس هم ميمشي ويايه
لان ماكو صداقه بين ولد وبنيه احنه مكاعدين باوربا
طلعت روحي ترى عندي امتحان طيرت حتى الماده من راسي
كافي لاتمشي ورايه وترتني )
عرفت علتها هاي أتخاف باقي دماغها ويايه ومتحذره اخاف اسوي اي حركه هاي متعرضه لتحرش جسدي
لهذا السبب تتبع الاسلوب العنيف الهجومي بالكلام وتدعي هي قويه وصلفه حتى تخوفني واحذرها جاوبتها
(ماشي براحتج بعد ما الي شغله بيج بس مجبور اكمل طريقي وياج لان طريق مدرستي منا) ....
مشيت صرت كدامها حتى تطمئن بقت شاغلة تفكيري
صار عندي فضول اعرف قصتها
التقيتها كم مره وكل مره اتجاهلها،ومن تسمحلي الفرصه اراقبها ما شفت منها شي يثير التحفظ
بالعكس محترمه نفسها حتى عينها مترفعها، ومن يمر من يمها شاب  تمشي سريع هالبنيه حسيتها مثل اللغز اريد اعرف شكو وراها
الى يوم شفتها تمشي قبلي من وصلت قريب انتبهت تحرك ايدها على وجهه كل شويه
شكيت دتمسح دموع تقربت منها اكثر وصلت بجانبها بطرف عيني لمحتها  صدگ دتبچي
سألتها شبيج
(عوفني الله يخليك ترى ما ناقصتك )
"(والله ماعندي غايه وياج سألتج لان كلت اخاف تحتاجين مساعده)
( لا شكرا ما محتاجه مساعده)
(براحتج بس انت گلتي ماعندج اخوه اذا تحتاجين شي اعتبريني اخوج )
(التفتت عليه امنيتي اصدك اكو ولد حباب وماعنده حقاره ولا غايه ويا بنيه
وبداخلي اكلم نفسي اتمنى صدك عندي اخ يحميني ويكون الي سند ..
يجوز انت غريب عندك غيره احسن من امي ورجلها وولده ،
تريد تعرف اسمي هيام
(التفتت عليها مستغرب اني سلوان )
ما ادري بلحظتها ليش عرفته باسمي اتندمت على هالتصرف مشيت بسرعة صار ورايه
احس بديت اطمئن اله لان عنده احساس وميلح من اخر مر ه طلبت منه ميضيع وقته ما تعرضلي
واليوم حتى بعد ما غلطت وانطيته اسمي ما لحگني بقى يمشي بدربه
سلوان: هالبنيه شغلت تفكيري وزحف هالتفكير لقلبي
جنت ارتاح من اشوفها يوميه
كأنه هي هم حفظت وقتي الي اطلع بي لذلك دائما جنت التقي بيها
بقينا فتره بدون كلام مجرد نظرات سريعه تلتقي وكل واحد يكمل دربه
هيام: سلوان صباح الخير
ناديته  بخجل
سلوان: صباح النور بأبتسامه
هيام : محتاجه احد يسمعني
سلوان: هسه
هيام: لا اقصد بالتلفون
سلوان : اني اتصل لو انتِ
هيام : لا اني
سلوان : سجلي الرقم
طلعت دفترها وقلم مرتبكه رديتلها الرقم .
هيام: انت گلت احسبك مثل اخويه واني محتاجه اخ ينصحني
سلوان: اطمئني ما راح استغل الثقه .
هيام:شكرا
سلوان : ادللي، مثل كل مره تمشي سريع حتى تخلي بيناتنا مسافه
لكن هالمسافه ويا كل مره تبتعد تقربها من قلبي اكثر 
صارت الهامي وخيال ميفارك صفنتي افكر بيها و انتظرها ويا كل مره يرن التلفون ، اگول هيه .
جنت ما اتقرب من  التلفون الا انتظر اتصال هسه مگابله بس يرن  ارفع  السماعه على امل الاتصال منها لكن اتفاجئ بصوت غير صوتها
مرت كم يوم ما التقيتها قلبي متلهف وعيني مشتاقه لطيفها يمر من كدامي
غيابها شغل بالي حتى اثرت على دراستي مالي واهس بأي شي غبت عن المدرسه يوم وطلعت انتظرها براس فرع مدرستها
مر الوكت وهي ماكو لا اندل بيتهم ولا اعرف رقمها ماعندي طريقه توصلني الها واطمئن عليها
عرفت قلب سلوان صار يم هالبنيه حبيت لمحة الحزن الي بعينها حبيت اسلوبها الهجومي تغلف بي خوف ورهبه
بيوم وكت الظهر دك التلفون صرت ما اوصله لان فقدت الامل تتصل ... لكن هالمره انتبهت كم مره يرفعون السماعه  تنغلق
اتجهت للصاله بعدني خطوتين سمعت التلفون يرت  دخلت للصاله بسرعة رفعت السماعه الو
هيام : شكول
سلوان : ابتسمت هو وياج وين اختفيتي
هيام: سلوان ميخلوني اداوم بطلوني
سلوان: ليش .
هيام : لازم احجيلك قصتي يله تفتهم
سلوان : اريد اسمعها .
هيام : امي جانت مراهقه وحبت ابويه اكبر منها تقريبا ب١٣ سنه متزوج وعنده مره واولاد اهلها من عرفوا بعلاقتها اذوها ورادوا يزوجوها لابن خالتها انهزمت، اتصلت على ابويه بلغته ان هي بيت فلان ( صديق ابويه) انهزمت لان يريدون يزوجوها 
ابويه ما كان يحبها كانت مجرد نزوه يقضي وقت وياها وغلطه ندم عليها حاول يتركها لكن
هي بقت تلح  عليه بالزواج  وهو ميكدر يتزوجها لان يحب مرته ومايريد يهدم بيته 
امي هددته اذا ميتزوجها تتبلى عليه يم زوجته و تگلها قشمرني ونهزمت من اهلي لان يريدون يقتلوني واشوفها صورك ويايه، امي انسانه  صلفه ومو راكزه ابويه تورط بيها ولان  انهزمت اكيد اهلها راح يبلوا اله وممكن يبلغون عنه فينفصح امره
راد يطلع  نفسه من الموضوع راح لاهلها گلهم بتكم بفلان مكان واني ماعندي اي اتفاق وياها تنهزم واتصلت عليه هيج وهيج هددتني ( اهل امي عائله مفككه جدي سكير وخلفته بس بنات وكاضيها نسوان وشرب وبيبيتي مثل الخدامه لا تحل ولا تربط ) جريت نفس   وتنهدت بتعب سلوان بعدك ويايه
سلوان : مصدوم بالقصه ... وياج كملي
هيام: جدي  طمع بأبويه من شافه متمكن وابن عائله  گله اذا متزوجها اذبك بمصيبه انت قشمرتها وعندك علاقه بيها وهسه تريد تعوفها  وابويه لان انسان هادئ ومن اهل الله ماعنده تجارب سابقه  امي قشمرته جريئه جرت رجله بسوالفها ) المهم ابويه غلط غلطه عمره من عقد عليها ظنن منه ان هذا الحل الوحيد الي يطلعه من هالورطه المهم سكنها بشقه ملك و يمر عليها كل ميصير عنده مجال
ماكان مقصر وياها لكن بنفس الوقت بقت امي مجرد ورطه تورط بيها ودايخ بسببها لا أحد يعرف ويوصل لمرته فمن البدايه اتفق وياها ماكو اطفال لكن هي رادت تربطه اكثر صارت حامل بيه ومن عرف صارت مشاكل بينهم بهالفتره زعل وبقى فتره ميوصل
يدزلها مصرف بأيد بيبيتي امها وطلب منها تروح تسكن وياها
امي بوقتها ما وافقت يبقى  احد يمها لانه كانت مخليه عينها على
شاب جيرانهم اسمه ثائر متزوج وعنده ثلاث ولد صادقت مرته ودخلتله عن هالطريق وزادت العلاقه وصاروا يجون يمها وتروح يمهم
كدرت امي توصل لثائر وصارت بينهم علاقه 
ورا فتره مرته حست فضحتهم ووصلت خبر لابويه، ابويه لگاها من الله يلزم عليها لزمه حتى يسكتها ويخلص منها ،طلگ امي وگلها حتى الطفل ما اعترف بي ،شمعرفني منين شايلته انطاها فلوس وسكتها ، وهي اصلا سكتت لا حبت ثائر ورادت تخلص من ابويه حتى
تاكل عقل ثائر وتخلي يتزوجها بعد ما مرته بغبائها فضحته كدام اهله والجوارين طلگها واخذ امي بعد ولادتي بكم شهر
طليقته سوتها شغلة عناد
من تقدملها شخص  ذبت ولدها عليه وتزوجت
ثائر من اخذ امي شوفها نجوم الظهر لان ماعنده ثقه بيها يگومها بكتله ويكعدها بكتله وطلع قمرچي درجه اولى
سلوان : لحظه يعني امج مو شريفه ساقطه
هيام : هالكلمه قبضت قلبي لان ادري بيها حقيقه وهو راح يفتهم مثل ما كل الناس تفكر الساقطه تخلف ساقطه مثلها
شكد جنت مخنوگه واريد افضفض شفت ماكو داعي اكمل
غلقت الخط
سلوان: غلقت الخط واني مصدوم بالكلام يعني البنيه الي حبيتها من دون كل بنات العالم تطلع من بيئه قذره كلها انحراف وفساداستغفر الله ياربي يمكن انت دتعاقبني
على التستر الي اني بي
مرت ايام نفسيتي تعبت احبها مو بيدي واعرف لو اموت ما افكر اخذها بيوم من الايام حتى لو هيه شريفه من بيئه ساقطه والعرگ دساس
حاولت انساها لكن القدر وداني لحد بيتهم بوقت العصر كالعاده نلتم مجموعة شباب فريقين نلعب طوبه بالمنطقه بواحد من شوارعها
اثناء اللعب مامنتبه من طلعت لكن من خلت چيس الزباله بالباب التفتت دتدخل صارت بوجهي كلشي وكف
حركتي سكنت جسمي سكن لكن نبضات قلبي زادت سرعتها جنت مضيع شي ماخذ كل كياني مضيع وجه ما فارك خيالي من اخر مره التقيته ....
دخلت وغلقت الباب ما ادري واحد من الي ديلعبون يصير ابن رجل امها منتبه عليه من واني صافن بيها
ثاني يوم اني فوگ دا ادرس اندكت باب غرفتي
ميثم : مبتسم تلفون عليك
سلوان : منو
ميثم: ما اعرف اسمها
سلوان: نزلت سريع عرفت هي، الو
هيام: عفيه اذا سألك هاني تعرفني سوي نفسك متعرفني ولا شايفني
اني ادري بي يلعب وياك بالفريق خفت لا انت متعرف هو ابن رجل امي ويجرجرك بالحجي عليه
ترى والله يكلب حياتي جحيم
سلوان: دقيقه شنو الصاير فهميني
هيام : سلوان غير وكت عفيه بس سوي الي گتلك عليه
سلوان: هيام انطيني رقم بيتكم بس اسمع صوتج ترى دمرتيني من يوم الي شفتج كلشي بيج غامض علقتيني بيج واختفيتي
هيام : ما اكدر انطيك الرقم ولا اكدر اطول اكثر يله اروح مع السلامه
سلوان : هيام غلقت الخط خلتني بحاله اريد اشيل التلفون واركعه بالگاع
احجي ويا نفسي (شبيك سلوان هاي انت هيج يصير بحالك وتخلي وحده تلعب عليك متعرف منين ما منين ولا تعرف شتريد منك حالها وياك مثل الي ذبتلك الطعم وانت بلعته وتعلقت بيها
وتعرف ما الك وياها طريق كل واحد منكم من عالم ثاني شكو
تنطيها مجال، من اليوم تنساها وتنسى اي شي يتعلق بيها حتى اذا اتصلت متجاوب انت الي تلعب على اكبر واحد
تجي زعطوطه تلعب عليك
من اليوم تمسح اسم هيام من دماغك وتنسى بيوم شفتها
مرحله المراهقه كان الها اثر كبير بتكوين شخصياتنا كل الاحداث الي تمر
بهالفتره يكون الها حيز بتبلور الافكار القناعات احيانا نخطأ ونستفاد من الدرس واحيانا نستمر على نفس الخطأ واحيانا ممكن نتغير ١٨٠ درجه بعد سنين