رواية حكايات من بيت جدي الفصل الثالث 3 - بقلم مريم اماسي الليل

#حكايات_من_بيت_جدي
الجزء الثالث
اماسي الليل
حقوق النشر محفوظه
مثل صبح كل يوم يجمعنا بيت العائله
عذراء:(اهلنا علمونا ... على نظام نصعد لغرفنا ساعة٠٠ :٨ مساءا
لازم نتواجد بغرفنا بهذا الوقت وينتهي يومنا .... وتعلمنا نصحى من ساعة ٧:٠٠ صباحا .. سواء كان عدنا مدارس او لا ... جانت ايام العركه على الحمام الفوك ومنو يسبق الثاني يدخل يفرش اسنانه ويغسل وجهه... احلى عركات ... اني وسنان حاله خاصه ... نبقى ننتظر البقيه يخلصون ...بدون مشاكل
وليد:(جانت متعتي من اشوف مريم تدخل للحمام حتى تغسل وجهها .... ادخل وراها اسد البوري ... اتونس عليها بوجهها الصابون وتتلمس بأيدها مكان البوري حتى تفتحه .... وياها دردمه ... وتذمر لان تعرف اني الي افتعل هالامر ... جنت احب اعذبها على كد ما احسها تكرهني على كد ما احاول انتقم منها
احيانا اضم فرشة اسنانها ... من الليل واخليها تبقى ادور عليها ... وتكون اخر وحده ... تغسل ومرات تترزل لان تتأخر على الريوك
واحيانا انتظرها اتفوت للحمام ... بس اشوفها اسد الباب اطفي الضوه ... واخليها تصيح ... قمة الذل ... من احاجيها من ورا الباب .... تريدين اشغله بشرط ... تلعبين ويايه اليوم )تجاوبني بخوف
(شغله راح اگله الجدو عليك )
(عادي اگله ما ادري اكو احد طفيته ونزلت .... يله گولي اللعب وياك حتى اشغله)
(اللعب ... بس شغل الضوه راح تطلعلي الصراصر )
(گولي انتِ متكرهيني ترى راح يطلعلج الصرصر الجبير )
(ما اكرهك شغله ... الله يخليك اخاف من الظلمه )... جان يخليني اتوسل بي وبداخلي اكرهه ازيد
مجرد ما اطلع .... واوصل اول بايه على الدرج اصيحه ... وليد اكرهك ... وانزل ركض .
سلوان : هويده فضيها ساعة تباوعين على خلقتج بالمرايه فوك قباحتج ... فاهيه ... اريد اغسل
( ماتنزل تغسل جوه ... شسويلك ... انت تغار مني لان الكل يگولون عليه حلوه وانت محد يگلك حلو )
(فضيها دبلتي قلبي ثوله ... متولين تمشطين بغرفتكم
دخلت ودفعتها ... بقت تدفعني ... متنطيني مجال اغسل وجهي
وگفت فجاءه على جنب .
(انتظرته يخلي الصابون على وجهه...فتحت المي الحار
وانهزمت
بنص الدرج سمعت ... العيطه .... بقيت اضحك ... نزلت كالعاده
الكل ملتم على السفره ...
جدو وابويه يسولفون على الشغل
وكالعاده عمي معن ساكت .... وعمي قيصر يتذمر ... من تأخر الريوك ...
امي ونسوان عمامي ... يتراكضون بالمطبخ ... يكملون الريوك ويحطوا على الميز .... لان جدي ميحب الاكل بارد ... سألي اول ما جريت الكرسي
(جدو وين اخوتج ... ( ولد العم) ) جاوبته
(جدو هسه ينزلون .... دخلوا عذراء وسنان .... اكثر اثنين توأم متوالمين ... ينفعون اخوه اكثر من سلوان ووليد ...
كعدت وانتظر سلوان من يدخل ...و اشوف وجهه المصلوخ ...
شكد ما يحاول هو ووليد يفرضون نفسهم علينا
ميكدرون لكيدنا ... نظرات وليد لمريم ... نظرات قط وفار
دخل سلوان طبيعي ... كشرتله عن ابتسامه شماته ....
كعد كدامي واحسه يريد يشرب من دمي .... عمتي امال انتبهت عليه
( ماما هاي شبيها ايدك ... حمره ) جاوبها
ف(تحت المي الحار ما انتبهت )
(غير تنتبه حبيبي .... شو دا اشوفها ) قدم  عمي قيصر اقتراح
(الغوا المي الحار ليروحون يحترگون بي )
وليد: لا عمو نحتاجه ... مرات نكاسر المي ... لان بارده الصبح
وبداخلي ... ( احتاجه حتى اخبث على مريم )
سلوان : لا تلغو الصبح المي بارد ( بقلبي دصبريلي لا اشوه وجههج ...
بس انتظري ... )
سنان: جدو سولنا حمام ثاني ... واحد ميكفينا ... يكعدون يتعاركون عليه ...
محاسن: حبيبي جدك شهر الجاي ... ناوي يبنيلكم ... نص السطح
٤ غرف وحمامات ٢ ... قبل الشتا
سعاد: اي والله عمو كبروا ... الغرف متكفيهم
ياسر : ان شاء الله
معن بابا انت متواجد بالبيت اكثر من عدنا شوفلنا مقاول ...
ورتب ويا ...
ميثم : اني اريد غرفه وحدي ... هم كبار وميخلوني ... اللعب ...
ودائما يطردوني بالهول ....
عذراء : اني اريد ابقى ويا مريم وهويده بنفس الغرفه ....
هويده ومريم : اي جدو احنه بقينا بنفس الغرفه ...
ياسر: لعد نسوي للبنات غرفه چبيره ومن يخلص البناء يتحولون بيها وغرفتهن تنطوها لواحد من الولد ... خلوها لميثم ...
سنان : عمو معن شوكت نروح نشتري ... الكتاب الي گتلي عليه
معن: والله عمو ناسي ... يا يوم ماعندك واجبات اخذك ... اني هم ..محتاج كم كتاب ... مابقى شي على المناقشه
سعاد: ان شاء الله تخلص على خير عاد وتلتفتلنا ... وقتك كله ضايع بالدراسه
نجاة: الحمد لله ما احب الدراسه من يومي ... وكرهتها بالزايد من شفت معن ... ميلحگ حتى يكعد ويانا اغلب الوقت معتكف
سعد:همزين ميثم طالع شاطر عليك ما طلع عليه ... عاد هالولد ... يطلع براسه خير ...
ياسر: سنان طالع على عمه معن ... دائما يذكرني بي من صغير
سلوان: اني هم احب الدراسه ... ودرجاتي عاليه هم طالع على عمو معن
قيصر: شو ذولي كلهم على عمو معن واني وعمكم سعد شبينا ...
ياسر: متكيفون ولدكم عدهم طموح ... وشطار بالمدرسه ...
عذراء: اني هم مثل بابا ... اريد اصير مثله
معن: وانت ( وليد)
وليد: اني ما احب المدرسه اريد اصير ضابط مثل خالو شامل ...
معن: ههه ولدكم طلعوا عليه وابني طفر لخاله شامل ....
مريومه انت عمو شنو تريدين تصيرين ...
مريم: اريد اصير ام .... شفت الكل ضحك ...
ياسر: جدو هاي هينه .... بس اني اريدج تطلعين محاميه ويا هاللسان تكعد عدله
محاسن: اخذتكم السوالف وراح تتأخرون ...
شيطلعون خلي يطلعون بس الله يحفظهم .... يكبرون كلهم ازوجهم واكعدهم يمي ....
ياسر: يله جدو ... گوموا روحوا للمدرسه .... بابا معن هم يله توصلهم ... راح يتأخرون ....
معن: يله عمو .....

عذراء: جانت احلى ايام ... من نندحس بالسياره كلنا سنان وسلوان ووليد بالمتوسطه
واني والبنات وميثم بالابتدائيه ومن نرجع للبيت
الولد يصعدون لغرفتهم واحنه البنات نغير ملابسنا وننزل يم بيبي محاسن وامهاتنا بالمطبخ نكعد وياهن من  يسولفون ويشربون گهوه الى ان
تصير الساعة ب3.30 يرجعون عمامي وابويه بالبيت نلتم على الغده امي ونسوان عمي جانن متفاهمات وبينهن ود  وصداقه كل وحده بحالها
السبب الي مخليهن يتصافن جدي وخوفهن منه جان كلش حريص ما تصير  مشاكل بينهن لان يعرف من يتخاربن النسوان يتخاربون الاخوه والاحفاد جان مخليهن كل وحده ماخذه راحتها كأنه كاعده بيت وحدها عايشين حياتهم مثل ميريدون كل وحده من اول ما متزوجه مجتمع بيها بأول يوم زواجها گايللها يوم الي تصير مشكله اخذج بأيدي للمحكمه اخلي ابني يطلگج لو عنده منج  عشر اطفال  ينطيها شروط تلتزم بيها
وتتكيف  بهالبيت كأحد افراد هالعائله .... بالمقابل تحصل الاحترام والدلال من تكون مطيعه وتحب اهل هالبيت مثل متحب اهلها وبالفعل مشت حياتنا
مثل ما هو وبيبيتي مخططين.
جدي ميسور الحال حاله  وماله النا ولأهلنا لكن بقى مسيطر حتى على ابسط الامورمينطي مجال لاحد يتحكم  بهالفلوس والاملاك وبنفس الوقت ... علم عمامي وابويه يعتمدون على نفسهم ويشتغلون ويصرفون على زوجاتهم وابنائهم  بالاضافه الى مساعدته الهم
تعامله ويا ابويه يختلف عن عمامي حتى يقضي
اكثر الوقت ويا دائما جنت اشوفهم منعزلين بمكان يسولفون عن امور عامه
لان عمامي ملتهين واحد بعلاقات عائليه طبه وطلعه وواحد اغلب وقته مو بالبيت
مريم: جنت افتقد حنان الام  الي اشوفهعد  عمه امال وشلون مداريه ولدها واغلب الوقت متابعتهم ودائما تتفقدنا وايدها ما تخلى من صحن الفاكهه  لو
الكيك والعصير وتسألنا عن المدرسه
وعمه سعاد نفس الشي دائما اشوفها تمشط لعذراء
وتمشطلنا واغلب المرات هي تسبحنا  لان امي  من وعيت دائما
ملتهيه بنفسها وبمظهرها وبالصالونات والطلعات
وبيوم  من الايام بلغت ومجنت مفتهمه الي صار ويايه ...
رحت دكيت باب غرفه  امي ودخلت لگيتها لابسه فستان ازرگ ودترتب بشعرها ومكياجها ...
( ماما اريد احجي وياج )
(حبيبتي راح اطلع اني وبابا من ارجع )
جانت تحاجيني بس دماغها مو يمي ... يم فتحة العطر ...
الي تريد ترش منه على ملابسها ويا احمر شفاهها الي كاعده تعدل بي بطرف اصبعها..
ما انطتني اهتمام يخليني اتجرأ واحجيلها عن الشي الي صار بقيت احاول اشجع نفسي احجي لكن ردها خلاني اطلع واسد الباب بخيبه  وألم بصدري 
نزلت كعدت بالحديقه شفتها من طلعت هي وابويه
لحظتها  بچيت ما اعرف من التغير الي صار ويايه ما ادري بسبب الحرمان من عطفها وامومتها ...
شويه اجى يمي وليد
(مريومه وين جنتي صار ساعة ادور عليج ....
هاي شبيج ليش تبچين منو ضربج )
(محد عوفني )
(لج منو وياج )....
(عوفني معليك بيه ..... محد ضربني )...
(امشي فوتي شكو كاعده وحدج هنا )
( فوت معليك بيه ... ( بعصبيه) )
(امشي كدامي فوتي لا اكفخج )
(دخلت رحت ادور بيبي لگيتها طالعة كعدت بالمطبخ وحدي
دخلت عمه امال وكفت بصفي وهي تمشي كف ايدها على شعري
(مريومه عمه ليش تبچين وليد گلي مريومه ما ادري منو مضوجها )
(عمه محد مضوجني بس اريد احجيلج على شي )
كعدت بصفي وبقت تستمع ومبتسمه
(مريومه عمه ماما من تطلع وتريدين شي اني هم امج
تعالي احجيلي والي صار وياج شي طبيعي عد كل البنات يصير )
( لعد ليش مصار ويا هويده وعذراء هم اكبر مني بسنه )
(عمه عادي كل بنيه تختلف عن الثانيه يجوز هم فتره ويكبرون مثلج )
بقت توجهني  وتنصحني هالانسانه احتضنتني اكثر من امي صارت قريبه مني اي موقف يمر عليه واي امر احتاج بي نصيحه اسألها  لانها حنونه وصاحبه مبدأ وملتزمه  ولا يوم انتقدت امي او حاولت تقلل من قيمتها كدامي بالعكس دائما تبرر المستوى الاجتماعي لشغل ابويه يحتاج هالطلعات وهالعلاقات وامي مجبوره اتساير ابويه وتكون ويا بأغلب اللقاءات الي تحضرها   زوجات اصدقاءه .
   جانت تتوقع اني مامفتهمه امي عدها مرض الانانيه وحب الذات
هالامر خلاني دائما اطمح من اكبر ويصير عندي اطفال
ابقى طول الوقت وياهم اداريهم حتى لو على حساب راحتي  وحياتي.
كان هاليوم هو بدايه اكتشافي لمشاعر شخص تجاهي على كد كرهي اله على كد حبه الي 
انتبهت هو الوحيد من اغيب يفتقدني و يذكرني حتى بالاكل والشرب على قساوته ويايه لكن التمس حرص وحنيه بداخله حتى الاشخاص الحنان ويايه بهالعائله مو مثله
وگفته يمي بالحديقه   وقلقه عليه موقف انحفر بذاكرتي .
مرت الايام وصار وجوده بحياتي مثل الامان بالرغم  ما نتوافق ولا اكدر اتحمله لكن محبته الي و اهتمامه بيه وان  كانت مرفوضه بداخلي و ما اكدر ابادله هالمشاعر بس تسعدني كارضاء لغروري  وقوه التمس بيها نقطة ضعف بداخله اسمها مريم
كل يوم يمر وكل موقف يثبتلي تعلقه بيه لكن بين قسوه واهتمام ضيع مشاعري واتجاه هالمشاعرويا
وبيوم من ايام الصيف جنت راجعه من المدرسه ويا عذراء وهويده ... مر  شاب بطريقنا ... ذب حجايه
(احلى وحده بيكم البطه الي بالنص) اني بطبعي 
بسرعة اضحك ما جان قصدي اقل ادبي
لكن كلامه فاجئني وعذراء كملتها من گلتلي
(امشي بسرعة يبطه لحد يشوفنا ومن وراج نحصل كتله) ضحكت .... رجعنا للبيت مثل كل يوم غيرنا ملابسنا
بقينا بالغرفه عذراء اتمددت بفراشها 
(يابطه من تنزلين طفي الضوه )
هويده فتحت شعرها دتمشي اصابعها بي گبال المرايه صاحت
(لا عوفي مشتغل اريد افوت اسبح واظفر شعري هالايام ديوگع لان اسوي ذيل حصان )  جرت شعري عذراء
(يا بطه انت هم اظفري شعرج ليجيبلنا بلوه اليوم
مرت الحرشه بسلام لو سامعه واحد من الولد الله الله
دا اتخيل حالنا بس تدرون اني شايفه خلقته لهذا الولد وين ما اتذكر )
واني اسمع كلامها واتخيل
(كلها تهون الاسلوان ووليد ... شيخلصني منهم جان گلولي انت سويتي شي خليتي يتحارش بيج ) توجهت للباب
راح انزل يم بيبي للمطبخ اول ما طلعت رجعت مديت راسي الهن
(اخاف هذا گلي يا بطه يقصد سمينه الاغبر) ضحكوا البنات وعلقوا على كلامي بمزاح
التفتت لكيت وليد واگف وايده على باب غرفته
وگع قلبي لان من ملامحه خزرته وعكدت حاجبه عرفت سمع حافظته
طنشت وتصرفت طبيعي كملت طريقي  للدرج حتى انزل وقلبي يدك سريع بس لا راح يصيحني
وياي اول كم درجه ما ناداني انطلقت بسرعة البرق
اطمن نفسي  يجوز ما سمع
نزلت يم بيبي حضرت السلطه ايدي ترچف بالگوه ماسكه السكين كل شويه اضرب صفنه افكر بعگدت الحاجب والخزره 
كل شخص يدخل للمطبخ اجفز منت احس دكات قلبي من سرعتها وتقلصات بطني من الخوف والارتباك مسموعه
احجي بداخلي ( ياربي اذا سمع شراح يسوي بيه بقيت افكر المسافه الي جان واگف بيها يكدر  يسمع شي من احنه بالغرفه وسادين الباب 
( بعد ماجدد جدي البناء اني والبنات النا غرفتين وحده للمنام ووحده لكعدتنا مخلين بيها تخم قنفات وتلفزيون ومكتبه نسولف ندرس بيها وبداخلها حمام
والولد كل واحد غرفه وليد غرفته  الي بصف غرفتنامن جهة اليمين وغرفه  وسلوان من جهة اليسار  بصف باب السطح  حتى يگطعون علينا النفس...غرفة ميثم وسنان بنهاية الممر نفسها الغرفتين القديمه
كل غرفتين للولد گبالها حمام )
صار وكت الغدا والتمينا كلنا على السفره جنت انتظرينزل حتى من عيونه اعرف سمع لو لا
بس لمحته وصل باب المطبخ نزلت عيني لهيت نفسي بكلاص المي بدينا ناكل شفته طبيعي ارتاح قلبي رجعت الضحكه بوجهي
من فرحتي انطيت اجازه لهويده والعذراء
شغلت المسجل وكعدت انظف  المطبخ وحدي طايره بعد ما كملت
اخذت كوب چاي ( شاي) وتوجهت للهول ( غرفه المعيشه) اتفرج على التلفزيون كلهم نايمين
جريت ماعون حب الشمس مسترخيه مندمجه ويا التلفزيون الى ان  صار العصر
طلعت بيبي وياها جدي  لبيت اخوها وامي ويا ابويه معزومين  بقينا بالبيت الاحفاد وعمه امال وعمه سعاد بعدها 
الولد طلعوا كالمعتاد العصر بالمنطقه  ويا اصدقائهم ...
عمه امال اقترحت  نطلع للحديقه (جان وكت مغرب)
وطلبت مني  اسويلهم  گهوه( . اني جنت النادره الي الكل يصخرها ما جانت  نداره بكد ما هي تسخت حتى  اتحجج ما ادرس الى ان اتعلموا يصخروني اكثر من عذراء وهويده  )
طلعوا للحديقه واني دخلت للمطبخ ادندن حضرت الفناجين والكليجه والكرزات
دخل وليد انتبهت دخل  افتر بالمطبخ  معرفت شيريد  بقى واگف يشرب مي وراها فتح مجر الكاونتر ما انتبهت شنو  اخذ منه وطلع 
اخذت الصينيه وبطريقي سمعته ناداني
( مريومه تعالي)
جاوبته هسه اجي و بداخلي مطمئنه منه لان گلي مريومه ووجهه طبيعي
وديت الصينيه  ودخلت بسرعه اشوفه شيريد
حتى ارجع  اكعد ويا البنات
لگيته واگف براس الدرج اشرلي تعالي صعدت بس صار عندي وخوف من كلمة التعالي
اول ما صعدت جرني من شعري فوتني للهول الفوگ وعاف الباب مفتوح شفت بأيده چفچير
(تعالي يا بطه اليوم دا انهي حياتج )
( والله ممسويه شي )جر شعري ليجوه حتى ارفع راسي
(سؤال وتجاوبيني عليه منو هذا الي گلج بطه وجنتي تحجين ويا البنات عليه )
(والله ما اعرفه والقرآن ذب حجايه من دنرجع للبيت گال احلى وحده بيكم البطه الي بالوسط والله حتى ما اتذكر شكله) انجن
ضربني بالچفچير على ايدي من الاعلى
( لج اليوم على كد الصبر الي صار عندي  حتى الزمج اطلع روحج  )
جنت اضربها بقوه على ايدها احس نار تطلع مني
لج من الظهر لحد هالحظه جنت حتى البيت كارهه طلعت حتى ارجع اكضي بيج التوبه )
عاطت  متألمه اشرتلها بأصبعي بتهديد 
( والخلقج بس يطلعلج حس اضربج على راسج حتى اخلص منج )
من حرارة الضربات على ايدي فقد ت الاحساس  بالالم كاتمه صوتي بس الدموع تنزل من عيني  خايفه منه لا صدگ يضربني على راسي لان فقد مو بوعيه بقيت احلفله
(والله ما اعرفه واسأل البنات )
انتبه على نفسه من شاف مكان الضرب صار احمر غمض عينه وجان  يلهث جرني تعالي
(ادخلي غسلي وجهج وغسلي ايدج  الله ياخذني واخلص منج )
تركني ونزل
اغسل ايدي واشوفها بالمرايه حمره بقيت امسحها بالمي البارد اريدها تبرد الحراره الي دا احس بيها من الالم تضرب بقلبي
بداخلي متحلفتله بس يجي جدي الا اشوفه الضرب الي ضربنياه لا اخلي يطرده من البيت
بقيتخايفه  لا يحجي لسلوان وهم يجي يكتلني هذا بعد اتعس من وليد
رحت بدلت بجامه ردنها طويله بقيت شويه بالغرفه الى ان اهدئ  تروح الشهگه
بعدها نزلت  كعدت وياهم بالحديقه  الدنيا ظلمت محد انتبه على عيوني .
بقبت اترقب جية جدي دا اروح اشتكيله مر الوقت دخلنا للبيت
بدوا يحضرون العشه واني والبنات صعدنا نراجع دروسنا ردت احجي لعذراء بس گلت هسه تحجي لامها واكيد ميخلوني احجي لجدو
بقيت انتظر من صار وكت العشه نزلت لا بيبي ولا جدو ولا امي ولا ابويه بس عمي معن وعمه امال وعمه سعاد وسنان وسلوان بقت عيني على البابانتظره  شوكت يدخل حتى من يخلصون عشا اشكي لعمو معن
استغربت اكلنا وخلصنا ما اله حس بالبيت صعدنا كالعاده انام لان ورانا مدارس
عيني جافاها النوم  بقيت سهرانه انتظر جدي صارت ب12 نزلت للهول لگيت عمه سعاد قلقه تسولف ويا عمه امال ...
(بله هذا وين صار لج عيني اصعدي كعدي واحد من الولد يشوفه وين )
لمحتني نادت عليه 
(عمه اصعدي كعدي سنان )
صعدت دكيت الباب طلعلي سنان نعسان
( ها مريومه رايده شي )
(عمه تريدك تروح ادورعلى وليد ما رجع)
(هسه نازل بس اغسل)
(بقى بالي عليه شكد جنت حاقده عليه واريد انتقم منه نسيت كلشي خفت عليه كجزء من هالبيت وواحد من عائلتي طلع سنان ورا ربع ساعة رجع )
(راح يبات يم ولد صديقنا متخربط وماخذي للمستشفى وهسه مرجعي للبيت عمه لا تقلقين گالي راح  يتصل عليج ) مر سنان من يمي صعد ينام
بداخلي حسيت الشغله كذب صعدت للغرفه بقيت احلل الي سمعته من سنان  الى ان نمت
ثاني يوم صحيت تعبانه ونعسانه
والبنات فوگ راسي اسمعهم
( مريم يمعوده راح يفوت الوقت ... احنه راح نروح ونعوفج )
تحججت مريضه طلعوا وسدن الباب وراهن رجعت نمت
وليد: من ضربتها جنت اعاقبها لان احس شكد ما اني احبها واخاف عليها شكد ما هي تكرهني ومتعبه دماغي
من سمعت احد متحارش بيها انجنيت من افكر شلون نظرلها وشلون عجبته
اباوع عليها  من مشت للدرج ونزلت  الظهر جميله ضحكتها صوتها  رصعاتها مشيتها ودلالها نزاكتها
كل هالامور ثارت غيرتي عليها
بالسابق جنت اغار عليها غيره ابن عم على عرضه واخته لكن من كبرت صارت غيره رجال مخلي باله هالبنيه يجي يوم تصير بت عمه ومرته
شكد ما قسيت عليها قسيت على نفسي ما اتحملت الي سويته بيها كرهت قلبي وكرهت نفسي  وكرهت اليوم الي وعيت بهالدنيا وهي بت عمي
ثاني يوم الصبح رجعت للبيت ب٩:٠٠ الصبح تقريبا بوجهي للفراش ... حتى ما اتريكت وياهم
للعشره ونص كعدت سبحت ونزلت ناديت على امي اتسويلي
ريوگ. دخلت للمطبخ صارت مريم گبالي
ظهرها عليه واگفه على السنك
بيني وبين نفسي قلقت هاي ليش ممداومه
انتبهت لابسه بجامه ردنها طويله ومحد استقبلني برزاله
معقوله ما حجت لاحد حتى لعذراء
رحت دكيت الباب على امي مديت راسي من الباب يوم سويلي ريوك
(ابني مو مريومه بالمطبخ هسه عفتها خليها تسويلك بيضه )
بقيت ساكت شجاوبها اگلها مسگط ايد البنيه وما الي عين احجي وياها وفوگاها  طلعت ما شاكيتني لاحد ومطمطمه عملتي
سديت الباب  رجعت للمطبخ شافتني نزلت عينها تمسح  الميز
دخلت يمها بعين صلفه ولا كأنه مسوي شي مريومه سويلي ريوگ جاوبتني بنتر
(شتريد اسويلك )
عكدت حاجبي (اي شي )
(بقلبي والله لا انتقم منك بس انطيني صبر
طلعتله مربى وزبد خليتهن كدامه ادري بي ميحبهن رفع راسه مستغرب صبيتله الجاي
(بقلبي يالبطه والله گويه دخلي اداهرج شويه
جبرت نفسي اكل الزبد واحس معدتي تگلب بس سويتها شغلة عناد اخلي اللگمه وابلعها بالچاي )
(لزمتني الضحكه خلصت المطبخ من دا اطلع انداريت عليه عود شيل الماعون خلي بالسنك ) نتر بيه
(دتعالي شيلي اخاف نسيتي الچفچير ترى بعده فوك )
(ترى لا عبالك محجيت كاعد تهددني بالچفچير لان جدو مجان موجود اليوم اگله )
( بلغي يابطه واذا نسيتي اني اذكرج العصر قبل ميطلع ) مر من يمي وطلع
بقلبي يا الله شكد اكرهه ان شاء الله يموت واخلص منه
لا اسم الله ياربي كذب ما اريده يموت ورا شويه سمعته صاح 
(يمه لاتكعديني على الغده نعسان اريد اشبع نوم )
ورا ساعة صعدت انظف غرفتنا اتذكرت انتقم منه بعد ما كملت شغلي رحت نزلت السيركت مال الطابق الفوك حتى ينشوي بالحر
نزلت انتظر اسمع صياحه مرت اكثر من ساعة  يا الله شكد تمبل  محس بالحر بقى نايم  نزلت ونسيت بعد اصعد السيركت الى ان
انتبهت صار وقت
يرجعون الولد والبنات من المدرسه صعدت ركض صعدت  السيركت
بقيت كاعده ويا بيبي اصف الملابس وياها
سمعت صوت البنات رجعوا صعدت وراهم هلو شنو الاخبار اليوم بالمدرسه
(هلو مريومه نيالج اليوم ممداومه )
(جيبيلي مي مريومه ميته عطش بسرعة )
اهو هويده هسه جنت جوه ليش ما صحتيلي سمعنا  صوت وليد 
( عذراء انزلي جيبيلي دوا الربو من امي صدري مقبط )
التفتت لگيته ورايه بعدها النومه بعينه بقلبي يا  نسيت هذا عنده ربو وتحسس شفته الصبح  بالمطبخ من اخذ الدوا وصعد ينام من هاي ما حس على الحر.
عذراء:(هسه انزل اجيبه نزلت دورته بالثلاجه .... اخذته وصعدت ... لگيته لازم صدره مختنگ ....
شبيك ولودي ... اناديلك  امي )
(لا هسه اخذ الدوا شكلي عرگت ( تعرقت )  وبردت تأذيت
،وبداخلي الوم نفسي  لان اعرف السبب ،
عذوره راح انام لحد يكعدني )
بقى بالي يمه رحت على سلوان دكيت الباب
( ها عذراء)
(سلوان عفيه ابقى يم وليد ما اله خلگ هسه انطيته دوا الربو )
هسه رايحله طلعت فتحت باب غرفته
(شكو شبيك ولك )
(سد الباب لك البارحه محمد انطاني جگاره دخنتها واليوم من رجعت نمت حسيت نفسي عركان وراها اشتغلت المبرده
هسه احس بالگوه اتنفس )
(وانت شكو ادخن زقنبوت بله لو جايتك الحاله البارحه
وين تولي وين تلگى دوا وهذا محمد اني ولا ارتاحله شكو تمشي وياه )
:(لا خوش ولد بس انت تكرهه ما ادري شعندك ويا )
(دنام يويل ترى تعبان وورايه امتحان باجر لازم اكعد اقرأ
خلي اروح اجيب دوشك انام يمك اخاف يصير بيك شي
مديت راسي صحت عذراء اجاني صوت مريم
(نعم سلوان رايد شي عذراء جوه )
(مريم جيبيلي دوشك ومخده )
فتحت المخزن طلعت منه دوشك ومخده اخذتهن لگيت الباب مفتوح مديت راسي وخليت الدوشك بالكاع  اشرلي سلوان
(افرشي هنا ).
دخلت فرشته وعيوني على هذا مغمض وبالگوه يجر النفس شلون جنيت عليه اليوم صدك سوايه مال وحده تكره واحد طلعت الئم منه بس لا يصير بي شي
التفتت على سلوان سألته
( اسويله شي دافي يشربه)
(ما ادري اسألي عمتي )
طلعت وسديت الباب نزلت سألت عمتي طلعت  متدري بي تركت الي بأيدها  وصعدت تطمئن عليه
دخلت لغرفتنا لكيت  هويده گبال المرايه تذمرت منها
( اوي هويده متملين مثل الطاووس متباهي بجماله اطب واطلع الگاج گبال المرايه)
(شتريدين اسوي شكو عندي غير المدرسه ونفسي)
(من انت موجوده بالغرفه وسلوان صاح عذراء ليش مجاوبتي اني جنت دا ادرس بالغرفه الثانيه وسمعته وانت بصفه اطنشين )
(اوي مالي خلگهم ذولي الاثنين مامنهم بس المشاكل والرزايل)
(بله لو فاتح الباب وشايفج موجوده وما رديتي شيخلصج منه )
(هذا عنده اخت وذاك عنده ام اني شكو اتعب نفسي يرزلني عادي تعلمت عليه وضرب ميكدر يضربني مره جرب ونزلت لجدو طيح حظه وبقى اسبوع ميحجي وياه 
ثانيا انت شدعوه هيج تخافين منهم شكد جبانه )
(ما دري اخاف منهم بس احبهم لان هم هم يحبونا
ويخافون علينا كم مره من يطلعون يذكرونا ويجيبولنا وياهم اكل لو حلويات ومن اوصيهم على شي يجيبوليا ومن يطلعون يسألونا اذا نحتاج شي كل هذا ميغزر بيج )
(لا ما يغزر واصلا اني اسايسهم علمود مصلحتي من اصير حبابه وياهم معناها عندي مصلحه يمهم)
هي تسولف ويايه واني گاعده على فراشي صافنه عليها شلون هيج قويه
ومتنقهر على احد
يعني ضرب البارحه شوغ روحي بس ما اكدر احقد عليه ولا على اي واحد بالبيت  لان اعرف محد يكره الثاني وواحد يخاف على الثاني مرات حتى ننسى احنه ولد عم بساعة اللمه والضحك والشقى كلنا اخوه
ما ادري احسدها على قلبها ما ادري انتقدها على القساوه الي بي
نزلت اساعد عذراء وعماتي حتى يصبون الغده.
جان هذا اليوم الثاني وكرسي وليد خالي حتى  كرسي سلوان هم خالي  اليوم ما نزلوا يتغدون بقوا نايمين ياربي الكرسي الفارغ يسوي خلل بكعدتنا ياربي دائما لم شملنا ولاتفرقنا طول  العمر
سأل سنان عنهم اول ما دخل
(شو لا وليد ولا سلوان وينهم )
بيبي ولودي مريض وسلوان باقي نايم يمه )
قلق جدي وسأل
(هم الربو ...ادري بابا معن غير تاخذ ابنك للدكتور )
(بابا ميقبل هاي امه تلح عليه ميفيد ثانيا هاي صار له كم سنه ما اله علاج شغلة مزمنه صارت عنده  وادويته نفسها قابل الدكتور شراح يسويله 
(والله عمو هو كبر ويهمل نفسه اني من جان صغير محافظه على صحته هسه ما اسيطر عليه هسه امال سوتله  شي دافي شربه ونام )
( عمو هسه على البابونج يصير احسن ،
لاتخافين سعوده ان شاء الله ماعنده غير العافيه )
سنان: ورا ما كملنا الغده صعدت مريت على وليداطمئن عليه
لگيته نايم دخل ورايه جدو سألني
(ها جدو بعده نايم )
(اي جدو نايم تريد اكعده )
(لا اني اكعده )
دخل جدي كعد على حافة الفراش بأيده هز وليد حتى يصحي   
فتح عينه بتعب
(ها بابا شلون صرت )
(الحمد لله جدو لايبقى بالك ان شاء الله هاليومين اصير احسن)
(جدو بعدك صغير لاتهمل نفسك وتستهين بالحاله العندك واخذ العلاج بوقته
التفتت على المتغطي جوايه
هذا رفيق الدرب بالسراء والضراء نايم يمك
ابتسم وليد وعلق سنان
( جدو متوالمين واحد يرتاح للثاني )
(والله يابه خوش صديق عايف فراشه ونايم بالگاع علمودك هذا حزام ظهرك )
سلوان: مغطي راسي سمعت جدي جاوبته هم هيج حزام ظهر مينراد تكسر ظهري من النومه بالگاع
كعدت شلونك جدو
(ابتسمت لمنظرهم وملامحهم شارب كل واحد منهم  بادي يخط
عرفت ذولك الصغار كبروا حسيت  صار فتره طويله ما كاعد وياهم وحدنا مثل ايام قبل من هم صغار )
(الحمد لله جدو)
(شو انتو صايرين متذكرون جدكم لا تجون تكعدون ويايه مثل قبل شنو كبرتوا ومليتوا كعدت الشايب )
وليد: (لايابه لان نشوفك ملتهي بشغل وتجي تعبان نخليك براحتك )
سنان: (اني المفروض مستثنى من هالحديث قبل يومين جنت وياك بالغرفه )
ياسر: (بس انت وفي بيهم ذولي صايرين عصابه بابا ابن عمكم ميثم ديربالكم عليه صح صغير بس علموا الصح والغلط لاتخلوا بعيد عنكم دخلوا بينكم علموا يصير رجال)
سنان: (جدو لاتخاف عليه ترى هو سبع بس بعد يكبر يتغير يگوم يفتهم اكثر حاليا من  دا ادرسه اشوف عقله واعي ويفتهم )
هويده : صعدت لغرفتنا ورا ما كملت تنظيف ويا البنات شفت جدو والولد ملتمين بغرفة وليد مديت راسي
جدو زعلت عليك شو بس تكعد وياهم
ياسر: التفتت مبتسم بابا انت اكثر واحده خاتله بالبيت
ما اشوفج بس على السفره
رويده : دخلت و أتقصدت ادوس على رجل سلوان بحجة مشفتها .
جدو ابقى بالغرفه حتى اتكفى شر بعض الناس قصدت وليد وسلوان
ياسر: شبيهم العصابه وياج
هويده: مو بس ويايه ويانا كلنا كاعديلنا على الكلمه والنفس
ياسر: جدو غير يخافون عليكم انتو خواتهم لازم تسمعون كلامهم هم اكبر منكم
هويده: شفت سلوان مبتسم ويأشرلي بحنجه معناها بسيطه
يله جدو كافي تكعد يمهم تعال يمنا هسه البنات يصعدون
ياسر: اذا اجي يمكم اتفركولي رجلي 
هويده : طلعت لساني لسلوان
اي جدو نفرك رجلك قبلت  جدي من خده 
ياسر : يله جدو ذولي كعدتهم تملل مابيها دلال
عذراء : سمعت  هويده تادي علينا
عذراء  تعالي انت ومريومه جدو يمنا راح ينام بالغرفه.
محاسن : ها اشتغلت سوالف الضراير بيبي انوب مو وحده ثلاثه 
مريم : بيبي ارتاحي من جدو احنه اليوم ناخذه النا
صعدنا لكينا جدو متمدد على فراش عذراء يضحك .
ياسر : هلا ببنياتي تعالوا يمي غرفتكم حلوه مو مثل غرف العصابه
مريم: عذراء تفرك راسه واني ايده وهويده رجله دوخنا بسوالفنا بقينا ندلل عليه ونقبل ايده وراسه
ياسر: وين اكو احلى من هالبنيات حبابات وحلوات جدو اريدكم ترفعون راسي صيرن سباعيات وحافظوا على نفسكم .
عذراء: لاتخاف اصلا احنه زلم حتى العصابه متكدر علينا هههه
ياسر: ادري جدو شفت هالملعونه( هويده ) مردت رجل الولد من فاتت
هويده: ضحكت جدو انت لو تدري بلي يسوو بينا جان كلت حقكم
مريم: لا جدو كذابات هم يحبونا صح يضوجونا ويحاسبونا على كلشي بس حنان علينا
عذراء: جدو بس سنان حباب بيهم وميثم
ياسر : جدو هم اربعه  معناها جوارينكم موخوش اوادم
عذراء: لا والله جدو كلش مو خوش اوادم  نريد نتحول جوه يمكم حتى يخافون ابنيلنا غرفه بالحديقه الخلفيه بصف غرفتك حتى بعد شحده الي يطلع صوت هههه
مريم: اي جدو صدك حتى يوميه نجي انفركلك ..
ياسر : اذا هيج لعد  من باجر ابنيلكم غرفه جوه وخلي العصابه فوك يتلاطمون وحدهم .