رواية حكايات من بيت جدي الفصل التاسع عشر 19 - بقلم مريم اماسي الليل

#حكايات_من_بيت_جدي
الجزء التاسع عشر
اماسي الليل
حقوق النشر محفوظه
مريم : يمكن القرب احيانا يبعثر التفكير الصح
والانسان يبقى يكابر وممكن الثقه الزايده تخلينا ناخذ اكبر صفعه ألم
سلوان : يمعود فضها عندي امتحان اول محاظره
هويده: مريم وين
مريم : بصوت صحت هياتني بس افرچ اسناني واجي
التفتت نزل يدندن كل ميشوفني يسوي روحه مندمج حتى يجاهلني
(هالتصرفات جانت تخليني اغتاض لدرجه احاول ارده بدون ما افكر بالنتيجه يطلع مني الكلام بتهور )
احيانا اتندم واحس دا ازيد الطين بله لكن من اشوفه باقي على موقفه اگول طز المهم اطلع الي بقلبي هو بالحالتين ما منه رجعه ،جانت  عيونه مرايتي من اشوفه يبقى يلح بنظراته معناها طالعه حلوه و احسه يريد ينفجر بس يمثل عدم الاكتراث
لكن اعرفه مغثوث  من يبقى يتحجج وينتر بهويده وسلوان على اتفه الاسباب  وكم مره اصيد نظراته  بالمرايه لكن من المحه يشغل  نفسه
احيانا  ابقى اباوع عليه من اشوفه يسوق وهو شارد عينه على الطريق مرات احسه يسرح   يفكر بيه ومرات اخاف يكون سرحان  بغيري 
هالشي من اتخيله يألمني لكن  بيني وبين نفسي اگول شريد اسوي اذا گلبه صدك قلب عليه وحب لارا من تجيني هالافكار يبقى شعور الانتقام يلازمني جنت اتقصد اغثه بكلام او اهتمامي بنفسي )
يله اني خلصت طلعنا للسياره شفته همس لهويده من صعدنا
هويده:  همست لمريم (طلعي القميص فوگ التنوره كصيفه ).
مريم : ما اكدر اطلعه  هسه تعقج .
هويده:  طلعي حتى لو بس هسه كدامه  ما النا خلك لغاوي
مريم : اف عبالك اخويه لو ابويه لو رجلي يتحكم بيه عندت ما طلعته التفت عليه شافني ممطلعته فتح باب السياره دينزل 
وليد: هاك المفتاح روح انت وهويده حتى لاتتأخر  على امتحانك  وانتِ  انزلي 
سلوان : شبيك شكو .
وليد .: بعدين نجي .
مريم : عندي مختبر ما اكدر  اتأخر .
وليد:  بعصبيه انزلي لطلعين حسي،نزلت دخلت واني وراها  نترت بيها بعصبيه ،ربع ساعه الكاج كدامي غاسله وجهج ومبدله ملابسج انتظرج بالهول .
مريم : ما التفتت بقى يحجي وهو  ورايه دخلنا للهول هو بقى واني صعدت اريد انفجر
  دخلت للحمام ودماغي يشتغل احجي ويا نفسي يعني يحجي شي ويسوي شي ثاني( بعد من اليوم انت غريبه) تالي بكلشي يدخل خلي اشوفه من راح يخطب هم راح يسوي هيج
ويا الافنديه كادر بس عليه مجرد يريد يغثني ،الصابونه بين ايدي اتمنى هاي رگبته هسه، غسلت وجهي ورحت  بدلت بس القميص وخليته فوك التنوره 
نزلت ما لكيته  بالهول طلعت للكراج لگيته واگف يدخن رحت  وگفت گباله حتى يشوف الملابس تعجب حضرته ، عاگده  حاجبي  يله خلصت ،اخذ نفس من چگارته ونفث الدخان بوجهي كحيت نفضت  الدخان انت مو طبيعي والله بلاني بيك ،ابتسم ابتسامه استفزازيه
وليد: امشي جيبي لفكسي على القنفه انتظرج برا .
مريم : رحت جبته انطيتهيا  طلعنا  نمشي للشارع ناخذ تكسي .
وليد: من اليوم القميص  ينذب فوك التنوره وتعلمي تاخذين تنانير وقمصان  بيها عرض مو لازم مكمطه بيها .
مريم : هو هذا سايزي واني مو سمينه .
وليد: ابتسمت اني وين جبت سيره سمن گتلج كصيفه اخذي اوسع .
مريم : والله شايفه ست لارا هم مكمطه وماخذه راحتها ما تدخل بلبسها  ثانيا انت مو گلت  بعد حالج حال الغريبه شكو تدخل بلبسي .
وليد: لا بربج واطلعج فرجه للعالم واني اكعد اتفرج عليج مكيف الشباب تباوع على عرضي  حتى لو حجيت تبقين بت عمي حالج حال عذراء اختي .
مريم : جاوبته بأستفزاز بس اني مو اختك .
وليد:  بت عمي يعني اختي .
مريم : اي تمام  احنه اخوه والاخ المفروض  ما يصفن بوجهه اخته  بمرايه السياره ويسرح بيها  ولا من يشوفها تبقى عينه عليها وين متروح  ولا  يلبس زنجيل بحرفها Mالمفروض تلبس حرف A اختك اسمها عذراء
اتفاجئ وابتسم وبدون ما يكدر يخفي ابتسامته ، صعد اصابعه على الزنجيل يتلمسه من فوگ القميص ما جان مبين للذلك عرف اني شايفته  سابقا التفت عليه مبتسم وعيونه تضحك
وليد: شنو هالثقه الزايده  ليش تخيلتي اسمج لا انت غلطانه معناه محاسن ومعن .
مريم : رفعتله  حاجبي يجوز اني غلطانه بس انت اكيد متضحك على روحك وتعرف منو المقصود .
وليد: وين تريدين توصلين ليش ما تصيرين  سباعيه وتحجين الي بداخلج حاليا .
مريم : الي بداخلي حاليا هو الي بداخلك .
وليد: واني شنو الي بداخلي .
مريم : تغثني ( نظرلي نظره هادئه )
وليد:  بس هذا الي شايفته .
مريم : تصرفاتك تكول هالشي  سكت وصلنا لراس الشارع وگفنا  ننتظر تكسي تمر وگفت ورا بعد متر   من شاف ولد مرو اشرلي اجي بصفه
وصلني للقسم وابتعد بدون حتى ما ينطق بكلمه  جان بيومها عدهم احتفال يوم الجامعه واتفقت ويا هويده امرلها، طلعت من المحاضره و رحتلها
جان السنتر مليان طلاب و الاقسام محتفله حتى جايبين دي جي بقيت ادور عليها بقسمها ما لگيتها سألت  صديقتها نور  
نور : مريم تلگيها يم التمثال دياخذون صور عند  جوزيف المصور هسه شفتهم دينتظرون سراهم .
مريم : شكرا ، توجهتلهم الى اقتربت ولمحتهم شافتني هويده اشرتلي ،
هلو
هويده:هلو  تعالي حتى ناخذ صوره اني وياج ورا ما نخلص اني وسلوان
سلوان : هذا هم گلي هسه اجي وين راح،  راح يوصل  دورنا
هويده : هسه شفته ويا جماعته هنا
مريم : التفتت على اتجاه هويده لمحته  كاعد ياكل ويتفرج على الطلاب، اشرت لسلوان 
ذاك كاعد هناك، راح سلوان ينادي  بقى واگف گباله يسولفون بين ما  يكمل الاكل 
هويده: مريم  انت تحبي لوليد مو .
مريم: اي احبه .
هويده : لعد ليش هذا حالكم  متشوفي شكد يحبج ويخاف عليج شدعوه متتنازلين ترى اني اعرف من سلوان متأذي من اطباعج ويا ،
وسلوان ينتقدج وما عاجبته تصرفاتج لكن اني  ما انطي مجال ووليد هم گايله انت لاتدخل  ولا اتغثها وله اكثر من مره يريد يرزلج بس وليد يوگف بوجهه ويمنعه ، ترى اليوم بقى يحجي عليج طول الطريق گلي ترى اني لو ما وليد ادري بي ينتبه عليها اخلي عقلي وياها اتوبها من العناد، گتلج طلعي القميص طلعي كدامهم  تدرين بيهم ما يتحملون  ونحسين .
مريم : هذا هو التسلط  الي اصد وليد  بسببه ذولي متعلمين يمشون  حجايتهم علينا هو ابن عمي واني ما خلصانه  من تدخلاته عاد يصير رجلي يخنگني .
هويده: ليش سلوان هسه خانگني مو مخليني على راحتي بس اني اراعي مشاعره واللبس شي ما اخلي احد منهم ينتقدني ليش اني مو وياهم صارسنين  محد گلي شخاله بوجهج لو شلابسه ولا يدخلون
بس انت مثل مگال سلوان دتسويها  شغلة عناد تعرفي ينغث بهالامور ،بس ترى  اذا تبقين بهالوضع تالي تبزعي ويروح يخطب غيرج .
مريم : هويده اني وياج نختلف انت مو عاطفيه ما تتأثرين  اني ما اتحمل ،كل موقف يأثر عليه قبل جنت على يقين هو يحبني بس من نزل وطلب من جدي يخطب وجدي رفض اذاني وبديت اشك مشاعره تبدلت ويايه من دخل جامعه والتقى بلارا اصلا شخصيته وتصرفاته متناقضه ساعة يحسسني  امشي بدمه وساعة احسه مو الي على شنو اتنازل اذا اني ما متأكده هو بعده رايدني ماكو  واحد ينوي يخطب وحده ويحب وحده ثانيه ورايدها .
هويده : انتو الحجي ضايع وياكم اني ما ادوخ نفسي بينكم وين متوصلون اوصلوا اني لخاطر سلوان نبهتج ما اريد يصير بينج وبينه موقف
وسدي الموضوع اجوي
سلوان: يله حبيبتي تعالي ناخذ صوره حتى وراها تجون انتَ ومريم ناخذ جماعيه
مريم : اللقطات الي اخذوها جانت كلش حلوه هو هم يتفرج عليهم ما نطق بكلمه اشرلنا سلوان رحت وگفت بصف هويده اتوقعت راح يوگف بصف سلوان وگف بصفي بصوت ناصي همسلي .
وليد: هاي اخر صوره  اوگف بصفج تنضاف لالبوم صورنا .
مريم : ليش راح اموت .
وليد: لا مو انتِ.
مريم :اكتفى بهالجواب اخذنا الصوره واخذنا اني وهويده سوى
و هو وسلوان وحدهم وراها راح واني بقيت وياهم
دماغي يفكر بمو انتِ شنو  قصده،قلقت  عليه اخاف بي شي بقيت مشتته  گلت بالرجعه اسأله .
وليد: من نزلت ويايه من السياره حسيت  مدا اعاقبها دا اعاقب نفسي من اريد الفظ اسمها ابقى صاحي حتى يطلع مريم مو مريومه اضبط نظراتي حتى ما تلمحها صرت اخجل ابين تعلقي بيها حالي مثل الاسد المجروح يغصب نفسه يبين قوي وهو متألم  بكبرياء امثل الراحه والتجاهل واني قلبي معلعل وعيوني مجافيها النوم  تعبت من المكابره كلت خلي اللين  انطيها فرصه اخيره بقيت انتظرها بالهول سرحت بخيال اصعد احضنها
مشتاقلها ومشتاق اشوف ضحكتها ويايه واگلها مريومه كافي تعبتيني تدرين بيه ما اتحمل هالبعد والزعل بيناتنا حسيت قلبي قنع عقلي صعدت كم درجه حسيت على نفسي ونزلت طلعت بالحديقه بس بعدني مخدر بالتخيلات
صار عندي احساس احنه بعدنا مستمرين وهي بعدها خطيبتي من نزلت مغيره ملابسها وصارت گبالي نفثت بوجهها ال دخان احس انفث ألم وقهر منها طلعنا وحجيت وياها بهدوء حتى اخليها ترتاح واسحب  الي بقلبها بلكت تريحني بحجايه جابت سيرة لارا خلتني اثكل وياها جان بودي من گلتلي الاخ ميباوع على اخته بالمرايه اجاوبها انت مو اختي انت قلبي وروحي لكن
لزمت نفسي  بأبتسامه نهتها من جاوبتني  الي بداخلي نفسه الي بداخلك جريت نفس تخيلت راح تگلي احبك بكد متحبني صدمتني بكلمة( تغثني )
عرفت اضحك على روحي مريم ما منها أمل واني وصلت مرحله بعدما اتحمل هالمشاعر خلص تعبت اريد التهي عنها قررت اصر على موضوع الخطوبه  وانهي هالموضوع وابدي ويا لارا بلكت بمرور الايام اصير مثل سلوان قربه من هويده خفف من معاناته وبدا يحبها ويتعلق بيها .
سنان: يله حبيبتي ماعندج شي نطلع للخط
شهد: لا ماعندي شي يله حتى ترجعني ورا الغدا من وكت .
عذراء : صعدت بالخط سلمت لكن ، بالي مشغول صار كم يوم  بطلب تمار  طالب ماجستير ويايه بالكليه طلب يتقدملي ولحد اليوم ما بلغت اهلي  لان اني نفسي ما مقرره الرد شنو اوافق وقلبي ويا غيره اخاف حرام لو ارفضه وابقى اكمل دراستي ساعتها اذا اني من قسمته ما اخذ غيره لو اطلب منه  ينتظرني لحد ما اكمل الطب وراها اقرر ،اف دماغي مشوش مدا اعرف اقرر صح .
سنان: عذوره وين صافنه دا احجي وياج وانت سرحانه .
عذراء: العفو ما انتبهت بالي يم الامتحان شنو گلت .
سنان: دا اسألج على ميثم البارحه شوكت جاب البليارد ونصبها
يم الدرج .
عذراء:  جابوها ورا العشا   افتهمت مشتريها من صديقه، هو وسلوان ووليد بقوا يلعبون لتالي الليل انت ما سمعتهم  .
سنان: لا والله كملت دراستي ونمت.
شهد: حبيبي انت عازل وحدك عن اهل البيت متدري بيهم .
سنان: لا والله ما ادري  ملتهي ادرس عندي امتحان وراها نمت
بس اليوم اللعب وياهم .
عذراء: هسه تتونس لان هم البارحه انطلقوا بليل حتى بطنهم انطلقت كل شويه صايحين وحده من عدنا  جيبيلنا فلان شي .
شهد: دا اتخيل منظرهم شكد حلوه اللمه .
عذراء: ان شاء الله  ما بقى شي وتجين يمنا ساعتها يبزعوج بالصخره
بس ياخذون عليج .
شهد: هههه الله يحفظهم .
عذراء: صعدت بدلت ونزلت يم شهد نسولف وبيبيتي وعماتي بالمطبخ يحظرون الغده حتى
بس اشوف سياره وليد دخلت للكراج  انطيهم خبر يصبون
مريم : انتهى الدوام وانتظرنا اني وهويده    يم السياره وبالي اول ما اشوفه اسأله  عن معنى مو انتِ ، لمحته  من بعيد ديمشي ويا لارا وولد، راح الولد وهو بقى واگف وياها يسولف ويضحك وهي هم تضحك   يم كوستر اظاهر هذا خطها ركزت بشكلها العام عدنا نفس الجسم والشعر تقريبا بس هي اقصر مني ووجهه هم حلو ملامحها طفوليه جذابه حسيت الغيره اكلت روحي ،وبداخلي اگله يطبك مرض اني  صارلي كم ساعه دايخه بيك وانت كاعد تتمضحك متونس كعدت على بنيد السياره اراقبه مبين يحبها وجهه مرتاح من يحجي وياها والابتسامه ما فاركت  وجهه بس ويايه حواجبه معكوده ،وهو ديحجي التفت على اتجاه السياره عرفته شافني وعرف منتبهه عليهم حسيته ارتبك كم دقيقه  سلم عليها هي صعدت الخط وهو اجى   مخلي ايده بجيب بنطرونه  شفت نظراته يمي لفيت وجهي اتفرج على العالم .
وليد: هلو سلوان بعده .
هويده : اي بعده ما ادري شعجب اتأخر .
وليد: شفتها گالبه وجهه عليه فتحت السياره وگعدت وهي گبالي كاعده على البنيد  ركبت  هويده .
هويده: وين صار سلوان والله ميته من التعب بس اريد اوصل للبيت
وليد: هسه يجي ميتأخر اكيد عنده شغله شغلت اغاني دقايق ولمحت سلوان من بعيد ابتسمت على صفنتها ، ضغطت على الهورن خليتها تفز وتوگف كدام السياره مفزوعه التفتت مخليه ايدها على صدرها خزرتني معصبه  اشرتلها بأيدي يعني يله اركبي  .
مريم : صعدت  اغلي نترت بي ،متعرف تفتح الجامه وتگلي تعالي لو هو شغل مغثه بس .
وليد: ما جاوبتها مركز بكلمات اغنية كاظم تريد اسامح
  بسهوله تريد اسامح وانسى ألامي وأجيك
كم جرح خليت بيه تريد احسبهن عليك
البنيته وياك راح راح وانتهى ويا الزمن
عمري ما اندم عليك وارجع بلهفه وشجن
انت من هذا الطريق وأنا من ذاك الطريق
صعبه انا وياك نمشي تحتضن ايدي ايديك
عمري ما فكرت لحظه اجرح احساسك بكلمه
حتى من تجرحني انت اسكت وبعيوني بسمه
اليوم كلشي انتهى والزمن خلى النهايه
انا لو ادري بخداعك انسحب من البدايه
انا راح أبدأ حياتي وماكوشي يربطني  بيك
حتى اجمل ذكرياتي ابد ما تسأل عليك
ليش من تتعب تجيني ويمتى ما تحتار اشوفك
اني هم مثلك اعاني وعندي اصعب من ظروفك
روح بعد ما اكدر اسمعك ،روح ولا يخدعني دمعك، روح كل عذابي من اديك)
صعد سلوان
سلوان : اتأخرت عليكم جنت استنسخ التفتت على هويده مرجعه راسها ومغمضه عينها نعستي
هويده : راح انام بالسياره من التعب والدوخه .
سلوان: هسه نوصل وترتاحين اخبارك ابو خالد .
وليد: لاجديد من عفتكم كضيتها ويا الكروب وهسه قبل لا تجي جنت ويا أشور ولارا .
مريم : بقى طول الطريق  يسترق النظر واني گالبه وجهي عليه.
عذراء: شفت سياره وليد دخلت للكراج ناديت  بيبي وصلوا
مريم وهويده  : هلو شلونج
شهد: هلو الحمدلله .
سلوان : هلو شهوده  صار فتره منشوفج .
شهد: والله سلوان امتحانات وما الحگ اعذرني، اسال عنكم ويطمني سنان دائما .
وليد: مساء الخير شلونج شهد  ان شاء الله بخير .
شهد: مساء النور الحمد لله بخير .
سنان : ورا الغدا نلعب بليارد .
وليد: فاتتك سهرة البارحه ، نادت  بيبيتي
محاسن: بيبي يله اصعدوا غيروا ملابسكم  حتى نصب .
وليد: رحت سلمت ودخلت بوست بيبيتي وامي
شاورت بيبيتي هاهيه نويت اخطب احجي ويا جدي بهالموضوع قنعي .
محاسن: بيبي دنتظر خلص الكليه وانطي نفسك فتره ترتاح وتعرف تختار صح.
وليد: لا هاهيه وابويه وامي من احصل موافقه جدي افتح وياهم الموضوع من  اخذ موافقتهم بسرعه اخطب .
محاسن: بكيفك بيبي انت اعرف بمصلحتك اليوم احجي ويا ورا الغده
هويده : التمينا على الغده لا ول مره انتبه على القسمه والنصيب ،اني الي ما جان بالي سلوان صرت اله وعذراء حبت سنان  سنين المسكينه وصار من نصيب شهد ووليد ومريم وصلت خطوبه وتالي كل واحد بحاله وبعيد عن الثاني .
سلوان : وين صافنه .
هويده : صافنه بحال صاحبك واختي .
سلوان : عوفيهم لا دوخين  راسج بيهم  فتره ويرجعون  تالي يتزوجون قبلنا هههه.
هويده : ميخالف المهم مينكسر خاطر بيبي دائما تگول ان شاء الله انتِ ومريومه تبقون يمنا لان عذوره بعد سنان اخذ شهد فأكيد قسمتها غريب .
سلوان : المهم اني وياج  نبقى  سوى.
نجاة: عمه شهد صرتي بنتنا  بعد لا تخجلين  اخذي راحتج بعد كم شهر وتجين بيناتنا .
ياسر: لا صارت من عدنا انت هم بنتي صار عدنا اربع بنات
شهد: لا جدو ما اخجل منكم انتو اهلي .
ياسر : اي عفيه .
سنان: ميثم ورا الغدا نصعد نلعب بليارد .
ميثم : ماشي بس حضر روحك للخساره .
سنان: انشوف .
سلوان: لا اكيد مو تشوف البارحه سوه نفسه ميعرف يلعب قشمرنا تالي طلع  الاخ مكابل البليارد  ببيت حسنين .
ياسر: جدو انت بدل هالبليارد ما تنتبه على دروسك .
ميثم : جدو لا تخاف   مرتب وقتي تجيك النتيجه بمعدل انقبل  هندسه ميكانيك لو كهرباء حتى اختص بهندسه الطيران .
سنان: جدولا تخاف  عليه يطلع راس اني وعذراء مقيمي  يطلع اكثر من الهندسه
ياسر:ان شاء الله .
عذراء: والله ميثوم گدها ميخلي تدريسي يروح هباء اذاما طلعت  معدل كايلتلك نتخارب .
ميثم : لا ما نتخارب  اني وياج .
هويده : سلوان فدوه عندي ملزمه مأشره بيها بالخط الاحمر ورايدين مني موضوع على الماده اريد انام مبيه حيل اكتب انت اكتبلي حبيبي
سلوان : ميخالف ورا ما اخلص لعب ويا الولد اكعد اكتبلج بس اكو شي بالمقابل مو صحيح.
هويده : ابتسمت المقابل اسهل من الكتابه ،عفيه مو اسوون صوت اريد اصعد انام فدوه انت نبههم .
سلوان : ميخالف انبه الولد اذا طلع صوتهم بس راح نلعب بعيد عن غرفتكم .
هويده: راح اصعد انام وبدربي اخليك الملزمه بغرفتك گمت من السفره الحمد لله من رخصتكم اني اروح انام .
مريم : بقينا  اني وعذراء وشهد انظف المطبخ وجدوا وعمامي وعماتي بالهول ينتظرون الجاي والولد گالوا نصعدلهم الجاي فوك
عذراء: هاي التمبل نامت ، من تكعد نخليها تسويلنا كيكه ولحم بعجين .
مريم : ما طلبتي شي، هاي ماتعب روحها هسه تكلج وحده منهن،
عوفيها خلي نصعد نكعد بالهول نرتاح فد ساعتين وننزل انسويهن .
شهد : حتى نتفرج على الولد من يلعبون هاي اول مره ادري سنان يحب هيج سوالف اريد بله اشوفه من يخسر او يربح شلون يستقبل النتيجه
عذراء: اصعدوا اصب الجاي واجيكم .
شهد: صعدنا وگفنا على صفحه نتفرج عليهم، ابتسم سنان من شافني مركزه وياه سألني منو الاضبط اضرب هاي لو هاي جاوبته السوده ضربها ودخلت
مريم : صار الدور لوليد دنگ ديضرب بين الزنجيل معقوله صدك حرف الميم حرف عمي لو بيبيتي واني ما بقى الي مكان بقلبه، صعدت عذراء الجاي التموا كلهم بالهول فتحت النلفزيون سويت نفسي دا اتفرج مامتحمله اسمع ضحكته ولا مزاحه  ويا الولد واني داحس قلبي مفطور منه من لمحته  ويا لارا لهذة اللحظه احس نفسي مخنوگه وكارهته
يمكن فكره التشابه الي بيناتنا خلتي افكر هو مجان حابني الي حب شكلي من لگى البديل كدر يبدلني اظاهر جنت واهمه نفسي بي  بالنتيجه لعب بمشاعري وخلاني اتعلق بي مادري اللومه ما ادري اللوم نفسي ما عرفت اتصرف ويا ولا افهمه ضيعته مني لو هو اصلا مجان يحب مجرد تعويد
وفكره انزرعت من احنه صغار ما كدرت  ابقى ويا هالافكار ما اريد  ابقى اتذكر وگفته ويا لارا وضحكهم وگفت .
عذراء: راح تنامين .
مريم : لا راح انزل اسوي الكيك واللحم بعجين .
عذراء: انتظري شويه ننزل سوى  اساعدج .
شهد: خلي ننزل وياها .
مريم : لا ميحتاج ابقوا اني عاجبني اللهي نفسي بيهن نزلت اول درجه نزلت دموعي اريد ارتاح مقبوض صدري  ما اعرف اتصرف  ولا افكر استسلمت  اخاف اتأمل واتقربله ويكون حاسم الي بيناتنا ويصدني ساعتها فوگ الي بيه احس ذليت نفسي وكبريائي .
شهد : كعد سنان بصفي .
سنان: شو انتِ  من اشوفين عذراء تنسيني .
عذراء: ابتسمت بدينا الغيره عيني اني اعرفها قبلك يعني الاولويه الي وگفت هسه اتنازلك عنها لان انزل اساعد مريومه .
شهد: ابتسمت اوگفي انزل وياج اساعدكم .
عذراء: لا ابقي يم سنان لان بس اخلص ارجع احتكرج منه، ابتسم سنان .
سنان:فد شويه اشوفج المفكره الي سويتها من اول يوم شفتج يوميه اكتبلج بيها خواطر واشعار تشرح حالتي بكل يوم يعني من تشوفين الخاطره بيها سعاده معناها بيومها حسيت بشي منج فرحني ومن تشوفيها كئيبه  معناها جنت فاقد الامل  تحسين بيه .
شهد: سنان  اريد اشوفها هسه صار عندي فضول اريد اعرف شكد تألمت مني وشكد فرحتك تدري مرات احس اني مقصره وياك لان احسك تحبني اكثر .
سنان: اني محاس بهالتقصير مجرد انت الي وقلبج ويايه احس ملكت سعاده الدنيا كلها ومرات احس وصلت مرحله اريد احبج اكثر بس بعد قلبي انملئ .
سلوان : باوع العالم كاعده عصافير واني مرتي عدها النوم اهم مني .
وليد: هههه يويل تغار من اخوك  لعد اني حالي اتعس من حالك تايه لا مره ولا حبيبه اعزب
سلوان : امشي خلي نروح لغرفتي اكتب التقرير مال هويده  ونسولف
وليد: الله عليك انت امداريها لان اتحبها لو تحس بتأنيب الضمير وتحاول تعوضها .
سلوان :  تنهدت ما ادري والله بس  الي متأكد منه احبها لكن بعدني افكر ب هيام قبل يومين طلعت بنص الدوام رحتلها للكليه شفتها من بعيد ورجعت .
وليد: وليش تروح تشوفها  وتعذب روحك .
سلوان: ما ادري احس من هلگد ما اشتاقلها اختنك اعكسها على هويده بتصرفاتي ابقى متنرفز واتحجج عليها فأروح اشوفها ارتاح ارجع طبيعي مستحيل اكدر انساها لحد هسه دماغي ميستوعب هي اتزوجت ورجال غيري اخذها من اتخيلها وياه ويجمعهم غرفه وفراش واحد اتضايق .
وليد: سلوان يعني اني اذا اخطب لارا وقلبي يم مريم
راح اصير مثلك .
سلوان : تضحك على روحك يمكن اني اهون منك لان أكن مشاعر لهويده من احنه صغار هي قريبه عليه وبالرغم احبها لكن بنفس  الوقت احس بتأنيب الضمير تجاهها  بسبب هيام  المفروض ذيج غريبه عني وهاي صارت مرتي قلبي الها .
انت لارا ماعندك مشاعر غير صداقه وشخص ترتاحله اكيد مراح ترتاح لان قلبك يبقى ويا مريم .
وليد: لك انت والله تحير مره تفكيرك نظيف ومثالي ومره واحد
ابو نزوات ومتستر وابو نسوان وشرب ما ترسى على حاله موجه توديك وموجه اتجيبك .
سلوان: ابتسمت عود من اني افهم روحي وراها انت تفهمني اني هم ضايع ويا نفسي ما اعرف شريد ولا شنو الي يريحني .
عذراء: ها مريومه شنو اسوي وياج .
مريم : اخبطي الكيكه انت ِ.
عذراء: شبيج شو ضايجه اكو شي .
مريم : لا سلامتج مابيه شي بس اخوج راح يجيب اجلي.
عذراء: ابتسمت شمسوي .
مريم : عذراء يمكن صدك يحب هاي الي اسمها لارا اليوم شفته وياها احس لهسه قلبي يوجعني من وراه .
عذراء: والله مريومه ما اعرف شگلج اسألي احد يفتهم اني عن تجربتي عرفت نفسي كلشي ما افتهم بهالامور ولا اتكهن لان مرات الانسان يوهم نفسه بتصرفات الغير ويترجمها على مزاجه اني جنت كل تصرف من سنان اترجمه اعتراف بالحب لان اني اريد اقنع نفسي هو يحبني مثل ما اني احبه لكن الي اكتشفته قلبه ما حس بيه اصلا 
انت هم خلي كل التوقعات كدام عينج حتى متنصدمين يمكن
تتأذين على جرعات احسن من ما تاخذين  صدمه ما تستوعبيها  وتبقين تعانين منها مثل حالي لهذة اللحظه انسى شهد صارت  اله
لسى دماغي يتعامل وياه كشخص مو مرتبط ويتخيل شهد صديقتنا اني وياه متشوفيني عادي اتعامل وياهم ولا عندي مشاعر غيره وعقلي ميريد يصدك ويستوعب متعايش بالخيال وبالشي الي هو  يريده هسه من  بعيده عنهم ودا اسولف وياج يرجعلي عقلي واميز  الحقيقه الي بيناتهم .
مريم : تنهدت عذراء انت قويه مو مثلي اني عاطفيه
وعاطفتي تخليني اصير ضعيفه يعني اذا تأكدت وليد صدك يحب
لارا ينهيني وما اكدر ابين عادي ما مهتمه راح اتأذى ويبين عليه
عذراء: عادي تنجبرين تسيطرين على مشاعرج وتصرفاتج الكبرياء يلعب دور چبير ينطيج قوه بلحظه تغير قناعاتج
هويده : دكيت الباب على سلوان  صاح ادخل لگيته كاعد يدرس  وگفت ورا لفيت ايدي على رگبته قبلته  من خده گملت التقرير .
سلوان : كملته صحي النوم، سلوان ما مر عليج بحلم بطيف .
هويده: ابتسمت سلوان والله جنت تعبانه اني ما اتحمل ما انام الظهر .
سلوان : متتحملين متنامين الظهر ومتتحملين تسهرين ورا العشره
ادري واني شوكت اشوفج وانت عندج دراسه واني هم عندي .
هويده : هسه متفرغتلك رزل براحتك واخر شي راح تتعب وهم انام بالعشره لان مو بيدي دماغي متفرمت ،وگف وجرني  لحضنه .
سلوان: ترى والله اليوم غرت من شفت شهد كاعده ويا سنان  واني مرتي عايفتني ونايمه متگولين عندي رجال ميرتاح اذا مو اني كدام عينه .
هويده : ادلل عليه وانت متعذر  وتگول خطيه مرتي متتحمل الشمس والتعب وترجع دايخه تنام حتى ترتاح وتصحصحلك .
سلوان : ابتسمت لا اعذر اذا تكعد مثل العروس وتدلل عليه وطيرلي عقلي وتعوضني عن تعب كتابة التقرير .
هويده : انفاسه على خدي وهو يقبلني ، حبيبي ترى انت استغلالي .
سلوان : كلش .
مريم : مرت كم يوم
التزم الصمت ويايه جان هادئ لكن  حسيته دائما شارد البال اغلب الوقت اشوفه  يدخن ويمشي بالحديقه الخلفيه ما عرفت  الي جان يفكر بي الا ورا ايام
الكل كاعدين بالهول  كالعاده كل يوم يشربون چاي بعد الغده 
واني وعذراء دنظف المطبخ واگفه على السنك سمعت عذراء بصوته
عذراء: ها ولودي شو واگف بالباب تريد شي .
وليد: لا سلامتج،  شفتها ( مريم) التفتت شافتني ورجعت  انطتني ظهرها جريت نفس بتنهيده ( بعد انتهى اول وتالي راح تعرف خليها تعرف منك .
احسن مما تسمع من البيت ) جاوبت عذراء
حضري نفسج هاللايام تروحين ويا امي وبيبيتي تخطبولي لارا  جانت ايدها تتحرك بلحظتها وقفتها عن الحركه
لكن ما التفتت، يا الله قلبي  هذا شبي انقبض  وخاف عليها مو هي الي رادتك تروح لغيرها ما اتحملت  الموقف صعدت لغرفتي .
عذراء: انصدمت من الخبر وبالي يم مريومه اكيد اتأذت من سمعت .
مريم : حسيت بألم اجتاح جسمي وخدر بأطرافي صدمني ب الخبر  ايدي متاخذ على الحركه والدموع بدت  تنزل على خدودي مكدرت التفت اشوفه يعني مجان يكذب من گلي يحبها وعنده علاقه بيها ياربي اريده يطلع حتى اصعد بعد رجلي متحملني احس الدنيا گامت تفتر بيه غثيان  وألم براسي وبجسمي ،لا بقلبي احس برهبه وخوف سببلي ألم ببطني  حسيت بأيد على ظهري
عذراء: حبيبتي لاتنقهرين كلشي قسمه ونصيب صيري قويه  مثلي  وتذكري گتلج الدنيا متوگف على احد يجي يوم  ننسى وتتغير حياتنا .
مريم : مسحت دموعي عذراء كملي عفيه انتِ اريد اصعد ارتاح بعد ما اكدر اوگف
عذراء: روحي قلبي .