رواية حكايات من بيت جدي الفصل الثامن عشر 18 - بقلم مريم اماسي الليل

#حكايات_من_بيت_جدي
الجزء الثامن عشر
اماسي الليل
حقوق النشر محفوظه
سلوان : دخلت للهول لگيته منزعج ها شرايد  مني
وليد:  نصعد فوك ورا مانشرب الجاي ونحجي
سلوان: امشي هسه اخلي هويده اصعدلنا الجاي فوك
وليد: امشي صعدنا لغرفتي دخل وسديت الباب  شوف لك تجر عدل وتبطل سوالفك المكسره لو اطلك  هويده
سلوان : هاي شبيك يويل شطلك هويده ويا سوالف
وليد: شوف ترى البارحه من سكرت خرطت الاول والتالي اخاف عبالك تبقى تضحك عليه ترى صرت مكشوف بس اسألك من جنت تكعد ويا عدنان وتضحك وانت مصادق مرته ماجنت تخجل من نفسك ( اتفاجئ)
سلوان : هاي السالفه مو هسه من جنت صف اول كليه كم شهر وتركتها .
وليد: والله شهم لك اني من البارحه لليوم مصدوم بيك هلگد
نگس
سلوان : كافي لك ترى انطيتك مجال شنو علاقتك اصادق فلانه علانه هي لو شريفه ما عرضت عليه نفسها هي ساقطه وتعرف نص ولد المنطقه بس انت غشيم متعرف بالنسوان
خليك على بت عمك احسن الك من دروب البنات .
وليد: هي مو شريفه انت هم تصير مو شريف لك جان استحيت وغزر بيك الولد كم مره طالعين ويا وماكلين سوى
عبالك اخلي نايم وهالچلبه مخليته مضحكه هالايام اگله انتبه على مرتك .
سلوان : لك  انت الي يشوفك يحوفك ثاريك مطفي لك بابا  اگلك ساقطه  يعني مخليه بالها يجوز احد يحجي لرجلها
اول مراح ترد تگله تحارش بيه لو تهجم عليه ولان ما انطيته  مجال هددني يذب تهمه عليه هاي اقل ما بيدها تتهمك، تالي توكع نفسك بمشاكل، انت شعليك ثانيا هي لا اطب  ولا تطلع على كد توصل للباب هذا يصدك بيك لو يصدك بمرته
ترى محد يتقبل تحجيله وتنبهه على مرته يستشرف براسك لان هو من مخليها بيت بوحدها اكيد عنده ثقه بيها لو يشك جان كعدها ويا اهله
وليد: مو انت وياها نفس الطينه  القذره فتعرف شلون تفكر اني ماعندي هالدروب فما اعرف شلون تفكرون الله يطيح حظك شكد نزلت من عيني انت راح تعبها لهويده  انت البارحه گلت راح اعوفها
عوفها ليش تأذيها وياك
سلوان :  جنت سكران ما ادري بروحي ثانيا هاي سوالف قديمه حاليا   ماعندي شي من  يوم الي عقدت وكافي تلغي  لتروح تجي وتسمع لغوتك  ترى كاعد اسمعك بمزاجي لان انت الوحيد اتقبل يحجي ويايه بهيج مواضيع
محد وصي عليه ههههه  ثم انت هسه منبوذ يعني حتى لو تفضحني كدام جدي مايصدكك  وبت عمك لتخاف عليها مريحه دماغها اهم شي عدها راحتها واني ممقصر وياها مريحها الي تريده ديجرالها  لك بابا ليش انت عبالك اني من اختاريتها ما اعرف بيها توالمني(  ابتسمت)
لك هاي يسموها غلطه الشاطر بالف وله اني انضرب على راسي واخذك ويايه وافضح نفسي كدامك شلون فاتتني .
وليد: والله لو ادري بيك هيج نمونه جان اني ما اجيت ولا سمعت اللغوه  مالتك شوف لك اني مو فائز اصفگلك شرب يطبك مرض بس علاقات محرمه خاف من الله يجوز تطلع مترجع شتگابل رب العالمين بوجهك المصخم لو تنفضح شتسوالك وانت مسوي نفسك نبي الي يشوف صلاتك وقرأنك  يحلف براسك  مع الاسف عليك يعني حتى خوف وخجل من رب العالمين ما عندك
سلوان : هو لان يحلفون براسي محد يصدك اني اسوي هيج شي
لا تخاف  ماعندي شي هسه والله دا احاول اصلح حالي  اني ما ضاحك على بنيه شريفه لو بت عائله  الي اعرفهن كلهن ساقطات من قبل ما اعرفها لاعبه لعب تفرني وتفر عشره مثلك .
وليد: كافي الحجي وياك ضايع اذا انت هيج واصل مرحله ومقتنع
حرام اتعب نفسي وياك  امشي ولي اشرب جايك بغرفتك .
سلوان : لك ترى جفصت هواي خليني محترمك كلمن يطلع على ابو وعمه اخاف انت اشوف عمي معن مستقيم متأثر بي اني متأثر بأبويه شايف سوالفه كلها بعيني
وعمك سعد ذاك اليوم فتنا للنادي تالي الليل  شفته ويا وحده رجعنا  ركض اني وفائز خفت يشوفني بس طير علينا الليله لك بابا  اذا الكبار عوج تحاسبني الي صدك اخاف يصير حجي كدام هويده البارحه سهرنا ويا ولد واخذتنا لسوالف ولو متأكد هي متسأل بس للحذر .
وليد:  انت وربك تنجاز  ابقى برر لنفسك وقشمرها بهالسوالف شكو مدوخ نفسي وياك امشي صيحها شوف الجاي وين صار
شويه وندك الباب فتحته مريم
مريم : هاك
وليد: بصوت ناصي اليوم ما انام اذا ما طبعت اصابعي على وجهج  (ابتسمتلي بأستفزاز  ) انزلي ما اريد
سلوان : مريومه جيبي .
مريم : دخلت خليته على الميز وهو واگف بالباب
وليد: هينه
مريم : من طلعت التفتت وهمستله (  دير بالك لا تغص  )
صار عصبي سد الباب ديلحگني نزلت بسرعه
كم درجايه سمعته .
وليد: بسيطه بعيني .
مريم : بقيت طول اليوم ابقى ويا الكل  حتى ميشوفني وحدي ويضربني
لليل شفته بالهول ويا سلوان كاعدين على القنفه كلت خلي اصعد ماطول ملتهي وصلت لنهايه الدرج حسيت  نجر شعري فزيت
هو
وليد: تعالي .
مريم : والله اذا ضربتني اعيط وانزل اگله لجدي جرني للهول ..
وليد: شوفي حذرتج وما تحذرتي  مراح امد ايدي عليج لان بعد ماتهميني من النهايه ما الج علاقه بيه لسانج ما يطخ  لساني خلقتج ما اريد اشوفها فهمتي لان كارهج وكاره اسمع صوتج لو بيدي حتى البيت ما ابقى بي  حتى لا انجبر اشوفج و اذا كتلج  ذاك اليوم مجبور اتعامل وياج لان بت عمي من اليوم انت غريبه ما اعرفج ولا تعرفيني واذا وصلتي يمي لو حجيتي حجايه اندمج ماشي
مريم : ماشي خلي تشبع بيك ست لارا .
وليد: قريبا ان شاء الله نزلت وتركتها .
مريم : مرت الايام بقينا كل واحد ما اله علاقه بالثاني
بدا الدوام وتحدد ت مشية سنان 
كلهم  متهيئين جدو وعمامي والولد متقوطين دينتظرون بالهول حتى يطلعون
جنت واكفه بصف هويده وبيبي من دخل وليد گلتله  طالع عريس التفتت عليها مبتسم
(عن قريب ان شاء الله تروحين تخطبيلي) جان متقصد يسمعني
بدون ما احس جاوبته (اي والله اتزوجوا عاد حتى نتونس بعرسكم) بيبي كرصتني
وليد:  العروس تريده المهر والعرس  بالقاعة يعني مراح تتونسين بس تتفرجين .
مريم : بقلبي اف شكد مكروه اغثه يغثني اكثر من طلعوا بيبي صاحتني للغرفه
محاسن : ولج شلون بيج الا تشوفي  خاطب هاي الي وياه يله تتندمين وتلزمين لسانج لج بيبي ليش تستفزي انت صدك مقابله بخطبتكم خلي افتهم
اذا انت مرايدته على شنو بعد جدج شالع قلبه وميخلي  يخطب اذا الرفض منج
مريم : جاوبتها خلي يخطب اني شعليه بي .
محاسن : ها ولج ثاريج انت شالعه قلبه واني عبالي هو مزاجي ابقي هيج متشوفي الا خاطب .
عذراء: بعد خمس ايام  تحددت الخطبه وعقد الشيخ  ما لحگنا نسوي حفله لسنان بسبب دوام  الكليه والدراسه جانت المراسيم بسيطه توجهنا كلنا لبيت شهد
بيومها جان مرتبك طلب مني اكون قريبه عليه و اوكف ويا بأعتبار هي صديقتي بداخلي ما اريد مشاعري تخذلني ويأثر هالشي على تصرفاتي و ما اريد اخذله بنفس الوقت
وصلنا لبيتها بيبيتي وعماتي اطلقوا الهلاهل استقبلونا اهلها .. دخلنا للهول والزلم والشيخ بالصاله لحظه الي طلبوا من شهد توكف ورا الباب حتى تردد ورا الشيخ
طلبت مني اوگف بصفها جانت اتشع سعاده مكدرت احس بغيره لان  احبها حسيتها اختي
ويا كل كلمه ترددها احس قلبي يريد يعصف بمشاعر الالم لكن اخمدها اكذب اذا اگول بداخلي مجان اكو احساس
صعب ويضايقني بس جنت اصارع هالاحساس اعتبرت عقدهم
علاج للمرض الي عندي اعرف  راح ارفض مشاعر التعلق برجل متزوج  هالشي محرم بقانوني
اعرف مستحيل اكدر امحي مشاعر الحب لكن عندي أمل بيوم تتبدل وتصير اخويه من التقي بشخص ياخذ قلبي ومشاعري وينسيني معاناتي
تم العقد عمتي امال دخلته يمنا حسيت العرق يتصبب من جبينه  وبقى يمسحه بالكلينسه الي بايده من الخجل  صافحها بالايد جنت قريبه منهم من همسلها 
سنان : ان شاء الله وفيت بوعدي
شهد : ابتسمت بخجل ارتباكه ربكني اكثر لان كل العيون علينا كعد بصفي
امه طلبت منه يقبلني من جبيني  رفض جاوبها   بصوت ناصي (شي خاص بيني وبينها
عندكم  سهله بس انا عندي مو سهله صارلي هواي صابر واحرك باعصابي ولازم نفسي عنها لان أحسها شي اطهر وأنقى  من علاقه بين جسدين الحمد لله بدت علاقتي بيها بالنور والامور  الخاصه بينا  هاي طقوس العشق  محد يعرفها غير اللي جربها مثل الزاير  يروح يزور من بعد مدة طويلة مو يروح ملهوف ومشتاق وعنده طقوس انا هيج ) حسيته تقصد يسمعني هالكلام   كرساله حتى اخذ راحتي  بالتعامل وياه بدون خوف وخجل وبالفعل
ارتاحيت لان بلحظتها ما بقى بيه قطره دم بيه
بس حسيت بكم الحب
الي بقلبه الي حتى استحيت من نفسي خفت لا ما اكدر احبه نفس هالحب
ويحسني بسبب خجلي بارده المشاعر وياه
خاله امال مازحته (  نسيت ابني فيلسوف) وضحكت هو هم ابتسم
ورا يومين طلعنا اخذنا النيشان ويا امي وامه واخذلي
كلاده مداليه الله بظهرها حفر اسماءنا وتاريخ اليوم الي التقينا بي
اول يوم داومنا بي بعد العقد  لان مسوينا نيشان فاجئني متفق ويا عذراء وزملاء النا مرتبين حفله بسيطه  بالجامعه ...
على خجلي وارتباكي بس من قرالي قصيده  حب بلا حدود
بقيت مصدومه بالعاشق الي كدامي
يا سيدتي:
كنت أهم امرأةٍ في تاريخي
قبل رحيل العام.
أنت الآن.. أهم امرأةٍ
بعد ولادة هذا العام..
أنت امرأةٌ لا أحسبها بالساعات وبالأيام.
أنت امرأةٌ..
صنعت من فاكهة الشعر..
ومن ذهب الأحلام..
أنت امرأةٌ.. كانت تسكن جسدي
قبل ملايين الأعوام..
يا سيدتي:
لا تهتمي في إيقاع الوقت وأسماء السنوات.
أنت امرأةٌ تبقى امرأةً.. في كل الأوقات.
سوف أحبك..
عند دخول القرن الواحد والعشرين..
وعند دخول القرن الخامس والعشرين..
وعند دخول القرن التاسع والعشرين..
و سوف أحبك..
حين تجف مياه البحر..
وتحترق الغابات............
يا سيدة العالم
لا يشغلني إلا حبك في آتي الأيام
أنت امرأتي الأولى.
أمي الأولى
رحمي الأول
شغفي الأول
طوق نجاتي في زمن الطوفان...
15
يا سيدتي:
يا سيدة الشعر الأولى
هاتي يدك اليمنى كي أتخبأ فيها..
هاتي يدك اليسرى..
كي أستوطن فيها..
قولي أي عبارة حبٍ
حتى تبتدئ الأعياد
فرحت واحس قلبي طاير بسعاده اكبر من اي سعاده
حسيتها من يوم الي عرفته
بيومها  حسيت شكد يضغط على روحه في سبيل يفرحني لان هو   شخصيته خجوله ما توقعت ممكن  يسوي حفلة بين اصدقائنا  ويصرح بمشاعره كدام الكل فقط  لان مره گتله  شكد أتمنى الناس اللي حوالينا يعرفون شكد انت تحبّني مثل ما انا آدري و واثقه الظاهر جان يسجل بكلبه كل أمنياتي حتى يحققها
عذراء: جنت ويا بكل خطوه يسويها مشاركني فرحته وامنياته
والامور الي ينوي  يفرح شهد بيها
جنت بمجرد ما اشوفه يضحك والبسمه على وجهه ارتاح
احس الراحه تنتقل الي وفرحانه لان دائما بأفعاله يحسسني اني بالفعل توأم روحه حتى لو بمشاعر اخويه لكن هالشي عندي چبير واله طعم ثاني
رتبت ويا حفله بالجامعه رادها مفاجئه الها وبالحقيقه شكد اعرف هو يحبها  واعتبر نفسي اكثر انسان تعرفه
لكن من القى القصيده فاجئني حسيت هالانسان مو سنان الي اعرفه سنان ثاني الحب غير حتى اطباعة  حبه الها منحه  قوه ميكدر يكتم الي بصدره يريد يعبر الها باقصى طاقه
جانت الكلمات طالعه منه بأحساس كل الي حاضرين التمسوها
وحركت مشاعرهم تخيلت الي دتحس بي شهد وهي تبادله نفس المشاعر مثل امواج نسيم هادئه تتحرك من شفايفه ونظراته تخترق قلبها حسيت برجفه قلبها من رجفه قلبي
بدون احساس تأثرت بمنظرهم وبداخلي تمنيت الله يسعده وياها ويبقى يشع أمل وحب تغلب على خجله وارتباكه طلع الشخص  الي بداخله شخص جرئ بمشاعره وحبه
مرت الايام والشهور
واجى اليوم الي اتفاجئنا بموافقه جدي على خطوبه وليد من البنيه الي ويا بالكليه