رواية حكايات من بيت جدي الفصل الثاني والعشرون 22 - بقلم مريم اماسي الليل

#حكايات_من_بيت_جدي
الجزء الثاني والعشرين
اماسي الليل
مريم :شكد جنت كارهته وقلبي مليان منه لكن من غاب  عن البيت ايام حسيت بمكانه الخالي  قلبي مشتاق للعصبي حسيت شكد خسرت بالعناد بديت الوم نفسي ليش اتقبل الكلام من الكل ومنه لا ليش احب اغثه واثير غضبه صح هو عصبي بس ميثور بدون سبب غيرته وحرصه عليه تحركه ليش دائما انسى الامور الايجابيه الي بي ليش نسيت هو الشخص الوحيد الي اهتم بيه طول هالسنين هو الوحيد الي يساندني ويحس بيه ومن اتمرض هو الوحيد الي يسألني اخذتي الدوا
حتى من يفقد اعصابه ويايه احس بداخله يتأذى ويحاول وراها يطيب خاطري حتى ينسيني افعاله ، دموعي تنزل  بحرگه لان اعرف خلص فات الندم بعد خطبها احس قلبي ما متحمل فكره صار لغيري راح يحب ويهتم بغيري راح ينساني وافقد اهتمامه وعاطفته
بيومها فكرت بانانيه( هو الي ميصير لغيري راح اسوي كلشي يخلي يرجعلي واذا خطب ماطول قلبه ويايه
لاهو يرتاح ولا اني ارتاح ولا لارا ترتاح)
مرت الايام واني  انتظر جيته جان عندي دافع اروح احجي ويا
نفس الكلام الي اتمنيت اكدر احجي من اجاني للمطبخ قبل ميطلع مريم تبقين بت عمي وعزيزه عليه ويربطنا دم
جان يطيب خاطري ووصلي الي بقلبه راح ابقى حبيبته
ومينساني لان الي يربطنا نفس الدم الي يمشي بجسمي يمشي بجسمه ونفس الحب ياريت تنازلت وتلاحكت انتشل هالحب قبل ميضيع  وينتهي
قررت ابطل استفزه واتعامل ويا طبيعي مثل قبل،  ما برد قلبي غير توجهت لرب العالمين صليت ودعيت ياربي
وكلتك امري ومعترفه بغلطي اذا هو مو نصيبي اجعله نصيبي  رجعه الي
على عيوبه قانعه وقابله ياربي حتى لو كاتبلي الافضل اني اريده هو ما اتخيل حياتي بدونه ولا اتقبل رجال غيره 
جان اكو أحساس بداخلي احسه يرجع كلامه قبل لا يطلع طمني
قررت احضر خطوبته حتى لايصير بيناتنا تصادم اكثر جان بنيتي ارجع اتقرب منه ،بهالايام صرت ما افكر بعقلي نسيته
جان يحركني قلبي ، من رجعت من الصالون وادري بي بالبيت اكو حسره بقلبي وملامه (لو ماشيه ورا قلبي جان اليوم اني العروس)
من نزلت وصار گبالي نظراته رجعتلي الروح بعدها نفس النظره ،ابتسمت واحساس بالتفائل زاد راح يكون الي  ما يصير لغيري بس احتاج اصبر لحد ارجعه ، اصبر نفسي (اتحملي اليوم وصيري طبيعيه ماطول تعرفين قلبه وياج ولاخر لحظه حجاها  يرجع )
من وصلنا لبيت لارا وشفت نظره الاعجاب بعينه تحطمت امالي   ما بقى عندي اي احساس احس قلبي تفتت من القهر وگف كلشي حولي من بدا يلبسها الذهب لمسة ايده لايدها
وهو يخلي الحلقه بأصبعها  حسيت خلى طوگ بركبتي خنگني
وروحي راح تطلع حسيت بضياع ما اتحملت بس حسيت ادموع تنزل على خدي ما جان  منتبه لان مرتبك وخجلان من انطوا التراجي يلبسها اعتذر انطاها لامه تلبسها التفت التقت نظراتنا غمض عينه وتنهد جان صوت الموسيقى والكل يرگصون وصوت الهلاهل تضرب براسي بعد ما اتحمل ابقى واتألم اكثر  طلعت برا اريد اتنفس اعاتبه   بقلبي  ودموعي اتزيد (هذا الي ردته تقهرني تخليني احس شكد اذيتك وخليتك تتألم ارتاح هسه انطيتك فرصه اشوفني شكد ضعيفه ومكسوره )
هويده : شبيج مريومه ليش هالدموع  وليش طلعتي مو گلتي ما اتأثر واريد اشوف خطوبته حتى اقتنع خلص سالفتنا انتهت .
مريم : اكذب على روحي ما اتحمل اشوفه يصير لغيري لو بيدي ادخل هسه واحجي كدام خطيبته اگلها ترى يحبني الي .
هويده : مريومه بلا خبالات مو كله من ايدج هسه صار عزيز مو جان كدامج  وانت اتصدي .
مريم : هو خلاني اشك عنده شي وياها وشكيت بعده يحبني جنت اتعمد اعانده و اثير عصبيته  حتى احس بحبه .
هويده : لج بابا مو صارلكم سنه ونص  من اختلفتوا وكل واحد
بجهه معرفتي اتقربي منج ولا تتفاهمون على سبب خلافاتكم اثنينكم اغبياء خلص تتحملون نتائج عنادكم وغبائكم حضرتج ما اتحملتي تشوفي  يخطب وحضرته ما اتحمل  يشوف دموعج صاحني اطلع وراج، لكن تحملتوا واحد  يعاند بالثاني وتنتظرون منو الي يتنازل للثاني امسحي دموعج وامشي ندخل خلص انسي وتعلمي صار لغيرج لاتصيرين  ضعيفه وتبينين مكسوره الحياه متوگف على احد مثل ما هو اختار يكمل حياته ويا غيرج انت هم انسي يجي يوم تكملين حياتج ويا غيره   مسحت ادموعها حبيبتي لا تنقهرين بعد امشي خلي اركصج اني وعذراء حتى انتقم منه .
مريم : كلام هويده رجعلي عقلي دخلت وياهم  شفت بيبيتي حست اكو شي من سألتني  اتحججت (ما ادري ايد منو من الي يركصون
فگست عيني وبقت تدمع طلعت غسلتها )
حسيت الكذبه ما قنعتها ،عرفت السبب وليد لان وراها بقت مغثوثه ما فرحانه لان اول ما دخلنا  جانت متوقعه من تصرفاتي متقبله موضوع خطوبته لكن من دخلت  وانتبهت عليه انقهرت وتغيرت ملامحها طول الوقت ، اما هو مكدرت بعد اباوع بوجهه لكن  احس بنظراته بقيت اركص ويا البنات وعماتي  مذبوحه بداخلي حتى من گامت خطيبته حاولت اجاملها على اعصابي  لان ادري ما الها ذنب بس مو بيدي احس فرحتها وضحكتها  اني دا ادفع ثمنها بالغصه الي بصدري حسيتها ماخذه  موقف مني لان اني الوحيده الي ما باركتلها من لبسها  النيشان لان جنت  برا حسيت اكثر من مره من التفت نظراتها عليه تتفحصني خفت انتبهت على نظرات وليد الي   لان اني بقيت  حذره طول الوكت دايره وجهي عنه ، قنعت  هي اله وهو الها قصتنا صارت  ماضي وانتهى .ومن اليوم ان شاء الله   اكدر اعلم نفسي اكمل حياتي بعيد عنه ،
لكن لا هو كدر ولا اني كدرت بقى بعد النيشان فتره حياته روتينه ينام ومن يصحى اشوفه  من ينزل على الغدا مباشره بدون ريوگ وراها يبقى بالهول الجوه ويا الولد
للعصر يبدل ويطلع مرات وحده  لان سلوان يشتغل وياابويه بالمقاولات ورا الدوام والاغلب  سويه  وما يرجعون  الا ورا الوحده
بهالفتره حاول يتجنبني  واسلوبه ويايه جاف مرات ينجبر يسألني على احد او من اكون بالمطبخ ويريد اسويله اكل او جاي يطلب اني هم على كد الكلمه بعد فتره رجعنا للدوام جنت متوقعه راح يوصلها ويانا لكن افتهمت أهلها رافضين   لان بس خطوبه ماكو عقد لذلك بقت  بالخط، رجع روتين الدوام  نفسه اروح يم هويده نهاية الدوام وهو يبقى ويا لارا قريب من  خطها الى ان تصعد  يجي يمنا من يجي سلوان ونرجع للبيت جانت اكو مواقف  تصير بينهم  من يضحك وياها  لو توگف قريب منه  تشاوره لو يشاورها اريد اموت ارجع للبيت اكضيها دموع جوه المخده ، لكن الي يريحني ويطمني قلبه بعده الي  ،ولا مره شايفته لازم ايدها من يتمشون ومن مره لمحتها  دتنطي الجنطه واللفكس حتى يشيلهم عنها ما قبل  فهمت من اشرلها على الباص وصعدت دقايق ونزلت بدون الجنطه واللفكس فهمت هو گايللها   خليهن بالباص لو على المصصبه ، بوقتها  ارتاحيت لان عرفت هو هذا طبعه ويا الكل مو بس ويايه مثل ما جنت  متخيله .
بعد مرور اربع اشهر تقريبا بيوم حنة هويده وسلوان  اني وعذراء بقينا سهرانات بالهول الفوك  البيت كلهم نايمين حتى العروس  نامت لان تعبت ووراها كعده من الصبح  تروح للصالون  مندمجين ويا احداث الفلم على نهايته قريب الساعة وحده بليل سمعنا  وليد وسلوان  يتمضحكون  ببدايه الممر
(لج والله ذولي ما ينعرفلهم ضحكه ولا عصبيه )
عدراء: الله يهديهم  بله العريس فرحان باجر عرسه اخويه شبي فرحان على الواهس
مريم : فرحان بعرس صديقه مأزره بالفرح والحزن شكد يختلفون عن سنان وميثم 
بلحظتها مد راسه سلوان مريومه لو عذوره  منو تنزل تسويلنا اكل
عذراء: اني هسه اسويلكم .
مريم : اختفى سلوان ونزلت عذراء، بقيت وحدي بالهول اتفرج الفلم مامنتبهه فزيت على صوته ماد راسه من باب الهول .
وليد: مريومه  انزلي جيبيلي مي .
مريم : نزلت لكيت عذراء واگفه على الطباخ دتگلي سألتها اجي اساعدج
عذراء: لا ميحتاج 
مريم : اخذت المي وصعدت دكيت الباب صاح فوتي جان لازم راسه وواگف يم الشباك حسيته دايخ 
هاك ،اخذ الگلاص مني التفتت اريد اطلع حسيت بأيده حاوطتني يهمس  باذني  وگف قلبي من الخوف ...نترت بي (وخر شدسوي )
وليد:  مريومه ما تعبتي شوكت تتنازلين ادري انت هم متأذيه مثلي
مريم :  وخر ايدك لا تضوجني ليش خطبتها لعد اذا تحبني ،ابتعد يضحك لكن بقى ماسك بكف ايدي
وليد:  انت جبرتيني اخطبها بس اذا تجين تقبليني  منا( اشرت على شفايفي )  وتگولين  اريدك ما تتزوجها لان احبك واذا ما سويتيها  اتزوجها  حتى لو ما احبها  .
مريم : تدري  احبك  وما  اكدر اسويها( ابتسم ) ولاتتبع  ويايه هالاسلوب
وليد: سويها   وخلي شفايفج على شفايفي حتى اصدك  تحبيني .
مريم : قلقني حسيته مو على بعضه ولا نفس تصرفاته ورزانته شكيت بي شي
جاوبته انت تريد تزوجها  (واني اسحب ايدي من ايده )
خليت هالشرط الصعب تدري ما اكدر اسوي ،بسرعة فتحت الباب سمعته ورايه
(لج والله ما اريدها اريدج انتِ  )طلعت دخلت للغرفه  قلبي يدك تمددت بفراشي افكر بكلامه وراها دخلت عذراء مكدرت احجيلها الي صار سألتها وليد وسلوان ديتعشون ...
عذراء:بس سلوان  طلع من الحمام كتله العشا بالهول راح لغرفه وليد
شو رجع كعد وحده دياكل من دا الملم هوستنا اني وياج گلي هذا اخرج التنمبل نايم لگيته .
مريم : بقيت للصبح اتذكر كلامه يعني هو لا يحبها ولا رايدها يمكن هذا السبب  من قبل فتره عمه سعاد بقت تلح عليه  تريده يعقد   عصب جاوبها بعد مامستعجل يعني اليوم دينطيني اخر فرصه افففف  شلون مخبل ما لگى
شرط غيرهذا.
صحيت  ثاني يوم الصبح كالعاده من طلعت من الغرفه باوعت لباب غرفته اتذكرت  تهديدالبارح قلبي صار  يدك بسرعه نزلت التهيت ويا عذراء  بالتنظيف لان هويده وامي راحوا قبلنا للصالون بعدها   عمه سعاد نادت  عذراء  تصعد تصحي وليد حتى هو يوصلنا للصالون
كمزت من مكاني
اني صاعده وبدربي اكعده، ومجان بالي اصلا اصعد افكار براسي ما سكتت لحظه قررت اصعد احجي وياه فتحت باب غرفته لگيته  نايم على بطنه وايده جوه المخده
تقربت منه  ،لا ما اخلي يصير لغير وحده بيدي انطيته للارا وبيدي ارجع اخذه حتى لو انانيه بس بعد ماعندي طاقة تحمل يبقى بعيد عني ولا بقت عندي دموع  تريح قلبي تقربت  منه نزلت شفايفي على گصته، فزيت  من التفت وجهي قريب  على وجهه بلحظه هو هم فز ابتعدت لزم ايدي
وليد: فزيت على خيال فوگ راسي التفتت لگيت وجهها قريب على وجهي ،
شكو  مريومه ،جاوبتني بعصبيه
مريم :لا اداهرني  وتنصب عليه ما اكدر اسويها من شفايفك قَبَلتك  من گصتك يله اوفي بوعدك وافسخ الخطوبه مثل ما وعدتني البارحه
وليد: ابتسمت هاي شبيها مضروبه براسها حلمانه ،لا والله اني المضروب براسي البارحه جنت ويا سلوان وفائز وولد شربت وياهم الله يطيح حظك وليد شمخربط ويا مريم ردت اتلاحگ النفسي واعرف شمسوي بديت احتال عليها ابوگ لسانها وافتهم
(دقيقه انت ليش عصبيه اني عد وعدي بس انت هم لازم اتسوين الشرط )
مريم : انت اتريد اذلني من طلبت هالطلب  نزلت دموعي هسه عرفتك كذاب
انت تريد تعقد على لارا  مو مثل ما فهمتني  متريدها بس والله اذا صدك هالشي ببالك  اني اخرب عليكواروح عليها اگلها  خطيبج گلي بس تگولين  عوفها اعوفها، ومن هاللحظه والله
وليد: جريت ايدها بلا حلفان ولج ،من انتِ هيج تحبيني ليش شلعتي قلبي واذيتيني
مريم : انت هم اذيتني من رحت خطبت مثل الواحد الماصدگ
وليد:  حبيبتي دنزلي هسه بعدين نتفاهم ونتعاتب ووراج شرط حتى اوفي بوعدي
مريم : روح اتزوج لان مراح اسوي الشرط  ويله گوم دتودينا للصالون .
وليد: اليوم تهديلا تثبرين  روحج زايد العرس بقاعه خليني هادئلا تقلقيني .
مريم :  لارا راح تجي .
وليد: مريمتي متأكده انت متعرفين لو مسامعه شي .
مريم : مثل شنو .
وليد: لا هيج انزلي سويلي اكل بين ما ابدل حتى اخذكم بقيت صافن الله لا يوفقج مريومه  هسه يله ريحتي قلبي
صار سنتين مرمرتيني ودخلتيني بدوامه تخاربت  من وراج ويا البنيه وظلمتها ويايه واذيت اعز صديق عندي بدون ما ادري كله من عنادج وراسج الگوي ما بقيتي  ذره عقل براسي بس والله هالمره راح اربيج
اول ما نزلت شفت بيبيتي من يوم النيشان زعلت عليه ولليوم وجها ثگيل عليه وعلاقتنا مو مثل قبل تحجي ويايه من ورا خشمها، متعلمه من ياسر
عدها نفس القفله من يقفل على واحد
محاسن: يله فضها دتوصلنا نايم للظهاري.
وليد:  ضحكت گلت خلي اريح قلبها حسونه قلبج اسود يعني لو تمشين حفيدتج براسي لو تزعلين يعني تحبين مريومه اكثر مني .
محاسن: ماكو داعي بعد نحجي بهالموضوع سويت الي براسك اني نصحتك والظاهر نصيحتي طلعت مو بمحلها مشت خطوبتك هاي صارلها كم شهر .
وليد: حسونه اتخاربت ويا خطيبتي صار  اسبوع وشويه كل واحد  بصفحه وهم من ورا حفيدتج  ،وقبل ٣ ايام طلبت مني اخلي امي تتصل على اهلها تنطيهم علم نفسخ الخطبه اتفق وياها  ورا عرس سلوان وهويده اخليها تتصل
وماطول ما اجوي البارحه يعني صار عدهم علم فاريد منج باجر انت تتصلين عليهم وحفيدتج راح تبقى يمج بصفه چنه .
محاسن: والله بيبي تريد الصدك فرحت بهالخبر يعني صح البنيه يمكن هسه مغثوته منك بس احسن الها لان ماطول انت قلبك يم بت عمك وهي هم تحبك لا البنيه ترتاح ولا انت ترتاح وياها وتالي تظلمها اكثر .
وليد: اي بس هالمره راح اربيها لمريومتج ولو هي شكلها تربت ههه.
محاسن: والله اني اكسرلك راسها اذا غثتك بس انت هم شويه تعلم تعاملها بلين تاخذها بالعيني والاغاتي وانتظر شهر يله تفاتح جدك بموضوعها لان هسه تقوم القيامه من يسمع بيك فسخت .
وليد: ترى والله بزعني بكلشي يدخل ولده على كد يده كلشي بمزاجه يريدنا احنه هم بمزاجه محد خرب سالفتي ويا مريم غيره شكد دكيت رجل ردت نلبس حلقات ونعقد ركب راسه الا اتخاربنا يله ارتاح ولا جان اني قبل سنتين عاقد عليها ومشيها على مرامي بلا هالفره هاي .
محاسن: والله بيبي انت هم مو خير طالع عليه هم تريد تمشي الي براسك ما گتلك لا تستعجل  وتخطب بعدها بت عمك صغيره وما تفتهم  اتحملها تخبلت لان سمعتها تگول ما اريده تالي خليت دمعتها تنزل بيوم نيشانك والله قلبي انمرد لو ما عيب الا اخرب الخطبه  تذكر من  رجعت گلتلك بيبي انت تحبها وهي تحبك ليش تتأذى وتأذيها وياك وتظلم البنيه لارا
قفلت قفلة جدك هسه يله الله هداك وگمت تفكر صح
وليد: ادري استعجلت بس ما ندمان على الاقل حسيت ورا هالسالفه
مريم تغيرت وغرورها قل صارت تصرفاتها ارزن  والله حسونه تريدين الصدك اني من شفت نفسي تورطت بالخطبه گلت حتى لو لازم اتزوج لارا هم ارجع واخذ مريم من ياسر بالغصب فوك لارا ولا اخلي ينطيها لغيري .
محاسن: لعد هالمره خليها بعينك حتى متصير لغيرك ترى جدك اذا قفل وما قبل ينطيكياها لو تطلع روحك ميتراجع
وليد: لا هالايام اتلوگله واتقربله يله افاتحه بالموضوع وقبلها امهدله لو يجلطني لو اجلطه .
محاسن : ههه دروح اكل بسرعه حتى تودينا .
مريم : من رجعنا من الصالون لگينا هويده وامي راجعين وكاعده بالصاله تنتظر  وعمامي وابويه وجدي بالهول
والعريس متهيئ وينتظر فوگ ويا الولد  .
وليد: ها ولك اليوم صرت عريس صدك بايع ثگل ههههه .
سنان: كلش عقلان مدا اعرفه والجماعه مسوين عليه حجر اول ما فتنا گلوله بوجهك فوگ .
سلوان : غير امي وعمتي غير سوالف تعبانه عدهن شاتلين هويده جوه واني فوك 
وليد: خلي اروح ابدل واجيكم .
عذراء: مريومه سديلي قفل الزنجيل حبابه .
مريم : دقيقه بس اللبس الفرده الثانيه وينه انداري وشيلي شعرج
قفلته عذوره الله عليج طالعه حلوه .
عذراء: اذا انت مو حلوه لعد منو الحلو امشي مريومه والهوا بظهرج
يله خلي ننزل خطيه يم هويده اول ما نزلنا جربت اهلهل هلهوله فاشله
هاي لخاطرج هدهد
هويده : هههههه  اموت عليج جان عاجبني ابچي على فراگكم بس اتذكرت يومين وراجعتلكم الي راح يتغير بحياتي بس الغرفه
مريم : اذا تزعلين ويا سلوان جربايتج موجوده اختي همزين مراح تفارگينا " حضنتها .
هويده : شاورتها انت هم راح تبقين بهالبيت وليد فاسخ خطوبته بس مو تحجين اليوم الصبح قبل لا اطلع للصالون سلوان گلي .
سلوان : ترى كافي خلي ننزل هم يله اسلم على جدي قبل ميطلعون للقاعه
سنان : يله خلي انداي  امي گلتلي من تريدون تنزلون انطيني خبر 
صحت وينج يوم .
امال : ها ماما
سنان : يله يريد ينزل مستعجل ابنج ، واني هم يله اروح اجيب مرتي وارجعلهم
امال: عمه سعوده نجو تعالوا راح ينزل العريس .
وليد: صفيت بصف سلوان احجي بصوت ناصي يويل مو تشرب شي لاتروخ  تخرط وتخربط كدام هويده خليك صاحي .
سلوان : لا تخاف  ابو خالد ك محسب هيج حساب .
سنان : يله عريس خلي ننزل.
وليد: ميثوم انت اخو العروس اني اشوف لو تنزل يم جدي وعمامي احسن
ميثم : اخو العروس واخو العريس ماكو فرق هي لايصه منكم واليكم مشيها ابو خالد .
سنان: هههه والله مينلام تايهه السالفه مابيها اصول كلها راح تطلع من نفس البيت وترجع لنفس البيت .
سلوان : بيبيتي وامي وعماتي تلگوني بالهلاهل اشرتلهم استعجلوا حتى يوخرن من كدام الدرج دخلت للصاله اول مره احس بأرتباك يمكن لان بت عمي قبلتها  من راسها هدهد طالعة تخبلين .
هويده :  راد يحضني سلوان لاتنسى  روحك كلهم يمنا
سلوان : دمشي نسلم على جدي اخذت ايدها وطلعنا
هويده : تلگانا جدو بأبتسامته من يكون فرحان قبلنا  ايده
وقبلني من راسي وحضني
ياسر : اوف بنيتي كبرت وصارت عروس راح  اشتاقلها اول مره راح تغيب عن البيت
سلوان : جدو يومين  ومرجعلكياها ...
ياسر : جدو دير بالك على بت عمك ما اوصيك عليها
سلوان : اطمئن اخليها بعيني .
هويده : بيبيتي جانت طايره اكثر من جدي شفايفها ما فاركت خدي وخد سلوان
وراها انقسمنا نصين نص يروح للقاعه يستقبلون الناس  ونص يبقون ويانا بالزفه وللمصور بعدها  نروح للقاعه ،سنان وشهد وعذراء ومريم بسياره
ووليد ويا عمتي سعاد وعمي معن ..وعمه أمال واني وسلوان وحدنا بسياره الزفه هو يسوق اول ما صعد بصفي قبلني  من خدي .
سلوان : هاي حتى تخفف توتري
هويده : هههه عيب سلوان .
سلوان : هدهد اليوم صرتي الي ك من اليوم صرنا واحد مابيناتنا لا خجل ولا زعل ولا كرامه ماشي
هويده : ان شاء الله
مريم : اني وعذراء بيبيتي اعتمدت علينا نتأكد من البيت قبل لا نطلع وليد بقى ينتظرنا نطلع حتى يقفل من طلعت اتحارشت بي
ابو خالد طالع حلو ابتسم  بس مكدر يحجي لان عذراء طلعت ورايه ما ادري سمعتني لو لا
وراها وصلنا للمصور اخذنا وياهم صور عائليه وليد وگف بصفي بيني وبين عذراء وبصفها شهد وبعدين سنان من جهة اليسار بصف هويده  ومن اليمين بصف سلوان عمه امال
وامي وابويه من طلعنا ننتظر العرسان برا
سنان گال بنات انتظرونا بالسياره محلوه وگفتكم والولد جماعة سلوان موجودين ....
شهد: براحتك بعد احسن حتى ناخذ راحتنا
عذراء : بقينا ننتظر بالسياره نسولف  ، ابويه مد راسه من الشباك
معن: شلونهم الحلوات ...
الحمد لله
عذراء: تعال بابا اصعد ليكدام  ارتاح بينما يخلصون ، يمهم امي وعمتي
معن: اخاف اكطع سوالفكم
شهد: لا عمو اخذ راحتك .
معن:  مريومه شنو هالجمال بعد راحت البَطريقة( البطريق )  حبيبة عمها
كبرت وصارت مره
مريم : ابتسمت عمو بعدك تذكر هاللقب .
معن: انت تذكرين شلون طلعته عليج لو ناسيه .
مريم : اتذكر جنت سابحه وعمه سعاد لبستني بجامه بازه صعدت لبست فوكاها بلوز وقمصله ونزلتلكم منفوخه وجنت سمينه شلتني گلتلي شلون بَطريقه حلوه ومشت عليه
معن: صح
وليد: يله بابا طلعوا .
مريم : وصلنا للقاعة كعدنا على الميز مالتنا الشباب كلها تركص الا ولدنا يستحون واگفين يصفگون ويا الشباب حتى العريس جماعته يركصوا .
محاسن: ذولي صدك جدهم ياسر بحياته ماعرف يهز چتف ههههه
عذراء: حجاية بيبيتي خلت حتى جدي يضحك گلها اليوم بعنادج
راح اركص
وصدك راح يم الولد وسلوان يصفك وصاح عمامي دكولهم چوبي بدوا يركصون جان منظرهم يشرح القلب ابويه وعمامي وجدي بنصهم والولد وسنان وسلوان وميثم بطرف ووليد بالطرف الثاني مترأس الرگصه ويفر بسبحته اما بيبيتي بقت تحرك بشفايفها كالعاده تقرا المعوذات تخاف عليهم من الحسد .
سنان : ها حبيبتي متونسه
شهد: اي والله الله يفرحكم دائما
سنان: امشي ناخذ صوره ويا العرسان
شهد: يله اخذنا صور ويا سلوان وهويده خاله امال جانت
واگفه تتفرج علينا  لزمتها العبره نبهت سنان عليها نزلنا  يمها حضنها وبوسها اخذناها  ورجعنا اخذنا صورجماعيه  سلوان بقى حاضنها بالصور حسيت هالمره شكد ضحت وتعبت ،وهالتعب مغزر بولدها شكد انسانه  هادئه وقلبها طيب الكل تحبها وتحترمها .
عذراء : كاعدين اني ومريم بصف بيبيتي ومن عزفوا سلو
العرسان يتمايلون كدامنا مثل العصافير
شو عمي  سعد اخذ مرته  والكرايب كلمن اخذ مرته ودخلوا يركصون ما حسينا الا ب وليد اجى مد راسه بيني وبين بيبيتي
وليد: حسونه ابنج يرفع ضغطي عليمن مطلعته يعني عمتي نجاه اني اغار عليها اكثر منه يعني هو الي عنده هيج مره حلوه غير يغطيها بعيونه من الاوادم لو يفتحلي باب
محاسن : ها من هاي جاي ترجف ثاريك تخاف لا من ورا ألامايه  ينتبهون على البنتايه لان تشبهها
وليد: بس انت فاهمتني عينج على حلالي اخاف احد ينضرب على راسه ويفكر يخطبها لو تصرفين لو تخليني اني اتصرف بين ما ارتب اموري واحجي ويا جدي
محاسن: روح  تونس وريح بالك محد ياخذها غيرك والي يجي نطرده
عذراء: اتفاجئت بكلامه ويا بيبيتي سألت بيبي اكو شي ,گلتلي فسخ  ويريد مريم
اكذب اذا اكول من سمعت يريد مريم ما فرحت طرت من الفرح لان شفتها  شكد تعذبت من خطب هسه اكيد تفرح من تعرف هو هم يحبها ورايدها
مريم: من خلصت الحفله وزفينا العرسان للفندق سنان  رجع شهد واهلها  واحنه  رجعنا لبيتنا صعدت هلكانه دخلت للغرفه لكيت عذراء مبدله ومتمدده .
عذراء: هلكنا اليوم
مريم : اي والله اني فوك التعب جوعانه لان هناك ما اكلت على الريوك راح انزل اسوي اكل اسويلج ويايه
عذراء: لا قلبي ما اريد بس راح اكلج شي سمعته من بيبيتي ابو خالد فاسخ وراح يرجع يخطبج من جدو
مريم : ابتسمت ادري هويده هم گلتلي نسيت اگلج أنخبصنا
عذراء: راح اصيرين مرت اخويه مريومه ان شاء الله وتجيبون بنات وولد يشبهوج انت ووليد يمه صدقه لحبايب عمتهم
مريم : هههه دخلي تصير بالاول وبعدين اتخيلي
عذراء: لا ان شاء الله .
مريم : طلعت من الغرفه سمعته صاح مريومه
التفتت متمدد على القنفه اشرلي تعالي مديت راسي من الباب نعم وگف
وليد: تعالي يبطه عمي سعد من خلف هالخلقه  مارحم بحالي .
مريم : ابتسمت راح اسوي اكل اسويلك ويايه
وليد: تعالي  اكعدي دا احجي وياج
مريم : دخلت صار  گبالي مخلاني اكعد  لزم وجهي وقبلني  من راسي .
وليد: اسمعي كلامي مريومه اني لو ما اخاف عليج واحبج ما انغث ولا اعصب كافي عناد وكبرياء راح اكلج شغله بس مو ضوجين واوعدج  ما اسويها بعد تحرم عليه ليوم الدين اني البارحه ما ادري بنفسي اخاف سويت شي ضوجج  لو حاولت اضايقج ولا ادري شنو حجيت لان جنت شارب
مريم: لا مسويت شي حضنتني ومن گتلك وخر لا تضوجني ابتعدت  بسرعة  بس الشرط ضوجني والحمد لله طلعت مو واعي اذا تحبني لاتتقرب  لشي يغضب الله اني ادري بيك انت ما ادور  هالسوالف ليش تخلي الشيطان يلعب بعقلك
وليد:  مريومه انتِ الشيطان الي لعب بعقلي  بس اليوم انگلبتي ملاك راح اتوب على ايدج بس لاترفعبن  ضغطي اريدج تبقين بهالعقل مريومه
مريم : نعم
وليد: مشتاق اضرب هالخدود
مريم :  ضربني ،ضحكت فلا تجوز
وليد: دنزلي سويلنا اكل مالاربع  نفرات الخدود ضعفانه مو مثل قبل

قبليني وأمريني ... وتوسلي لي ان اخذلها
ان أتركها .... وننتهي
عقل مخمور وقلب مكسور
ردتتها ولا اعالم ماذا قلت وما فعلت
نمت وصحوت وعلى جبيني قبله
تفاجئت وتنهدت ... اسردي
لي مالذي يدور في رأسك  يا شهرزاد
قالت تنتفض الم تقل لي قبليني وعانقيني .
وأمُريني
ابتسمت بمكر وتذكرت .. الوعد هو الوعد
لاعلى الجبين .. انما كان على محراب مبسمي
ثارت  وارتعدت .... وبطهاره
ابتعدت وقلبي معلق  بأطراف ثوبها ...
لا تدري اني نهيت وانتهيت.
كلمات اماسي الليل