رواية حكايات من بيت جدي الفصل السابع والسبعون 77 - بقلم مريم اماسي الليل

#حكايات_من_بيت_جدي
الجزء٦٠
اماسي الليل
عذراء: بعد ما امي وخالد نامو .... من الفرحه النوم جافاني شريط ذكريات بكل يوم حلو جمعني بسنان
لوهله تذكرت يوم عيد ميلادي من قبل كم سنه تذكرت من غمضت عيني وتمنيت هالانسان هو الي اكمل حياتي ويا فتحتها شفت وجهه مثل النور الي نعكس عليه نور الشموع بالظلام
غمضت عيني اريد اخلي بداخلها احس بنبض قلبي المتسارع من السعاده الي انحرمت منها صار سنين كأني اليوم مولوده من جديد
تحركت من فراشي بحركه صبيانيه رحت فتحت الكنتور طلعت
ايه الكرسي الي هدانياها لبستها حتى احس بي من اليوم ويايه من حقي أبوح وأعلن حبي اله بدون خجل ولا قيود
طلعت كل الكتب الي كان يهدينياها بأعياد ميلادي
اخذت كتاب قصائد نزار قباني ورجعت تمددت على فراشي اتصفح بي ... ابحث عن قصيده أترجم الحاله الي اني بيها

احبه لا ادري ما احب به
حتى خطاياه ما عادت خطاياه
الحب في الارض بعض من تخيلنا
لو لم نجده عليها لأخترعناه
ماذا أقول لو جاء يسألني
ان كنت اهواه وانا الف اهواه
سديت الكتاب وضميته بقوه على صدري .....
ياربي تمم سعادتي وجازيني عن صبري خير
يارب انت اعلم بلي بقلبي وشنو هالانسان مكانه بهالقلب وبحياتي
ياربي احفظه الي وقربني منه ويجعل بينا موده ورحمه وملكني قلبه .... هالكلمات نغزت قلبي تذكرت حبه للمرحومه وعشقه الها
ما اريد أفكر هو اختارني بقناعة بدون مشاعر واكدر سعادتي
بديت اخاطب ربي بداخل نفسي
يا اللهي
اني قانعه حتى لو بجزء من قلبه اريد احس بمحبته يارب انت قادر تقلب القلوب سكني قلبه وعقله اخذ من حبي اله وازرعه بقلبه محبه الي
بقيت سرحانه أفكر بالموضوع وسوسة الشيطان غلبت عقلي بغيره اريد أتملك قلبه واقنع نفسي هاي مو انانيه الانسانه الي حبها راحت لدار حقها حتى لو يحتفظ الها بمشاعر المفروض راح يكمل حياته ويايه بكامل مشاعره المتبقيه
من التعب بالتفكير غمضت عيني وبدأ النعاس يتسلل حتى يغرقني بحلم وردي واني اتخيل صورتي بفستان العرس وشلون راح التقي بهاليوم
سلوان : هويده راح يطلع الفجر واني صارلي كم ساعة اقنع بيج
شنو الي تريدي كوني صريحه ويايه
ترى تعبتيني انت لو ما بت عمي وأم بناتي وغاليه عليه ومتمسك بيج ترى غيري واحد يشوف وضعج وحاله الهجر الي احنه عليها راح يصير سنتين ما ينتظر كل هالمده
جان شاف حياته بس انت تعرفين اني ما اكدر أفرط بيج وببناتي
هويده : اها متفرط بيه لا فرطت بس متكدر تفرط ببناتك
ياريت اكدر اصدكك انت عدمت كل الثقه الي منحتكياها بس كافي كاتمه سرك واشوف الملامه بعين الي حولي ما يعرفون بحقيقه الامر يريدون يصلحون الحال بيناتنا بكلمه يله كل الرياجيل تغلط ميدرن بغلطه رجلي وابن عمي مو بس بحقي بحق كل نَفَر بالعائله
سلوان : انت كل ما اريد انسى الموضوع ترجعيني للوحله الي جنت بيها كافي الله يرضى عليج كتلج غلطت وندمان ومستعد اصلح غلطي واعوضج عن كل تصرف سئ بحقج بس انطيني فرصه لا تبقين الأبواب مغلقه بوجهي
حتى ربج يغفر ومن يوم الي عاهدته ما ارجع للدروب العوجه تقبل توبتي ومحصني ولليوم ما تقربت للحرام وانتِ تدرين حتى الشرب تركته يعني تغيرت
ليش قافلة عليه هالقفله ماكو شي زين سويته طول عشرتنا يوكف بعينج ويحلي قلبج يلين عليه ترى بالقرآن تعبت
هويده ترى اني مريض ما الي خلك وميحتاج مرتي يمي انت كم مره دريتي بيه اتخربط وأنام بالفراش لو غيرج وحده بقلبها ذره
حب لرجلها جان سألتي والمفروض متسألين تجيبين بناتج وتحسن لبيتج اداريني واني بهالشده
هويده : لان اعرف مابيك شي وسألت سنان اكثر من مره يگول ما معروف السبب على الأغلب حصى الدكتور يگول تهيج عليه تأذي
فيحس بألم
سلوان : ترى اني من قهرج تمرضت ....
هويده : ها قهري والله انت قابليه الله يعينك على نفسك وتكبرها حتى ما تغلط نفسك
بس ترى انت الي تخسر اني ما اخسر طول ما بناتي يمي هم ثمره تعبي بالسنين الي عشتها وياك يعني ما ندمانة بيوم اتزوجتك ولا مجان الله انطاني بناتي الي هم احلى شي صار بحياتي
سلوان : شهقت وزفرت ... بداعت البنات خلينا انام وانتوا بحضني اليوم نكمل حجينا الصبح ترى والله تعبان ومحتاجكم
قريبين مني ... لج بابا والله احبج لاتصيرين حقوده
هويده : اوف يله امشي نام بس من هسه اكلك بناتك ينامون بيناتنا لا ترسم أمور بدماغك
من نكعد الصبح ونكمل حجينا ذاك الوكت نقرر وضعنا
سلوان : ان شاء الله يله گومي لا شيطانج يكعد وتبدلين عليه
تكمله الجزء تنزل بعد ما اكمل كتابتها
يوم غد بأذن الله