رواية حكايات من بيت جدي الفصل التاسع والثمانون 89 - بقلم مريم اماسي الليل

٦٥
سلوان : مر الْيَوْمَ والثاني وماكو خبر منها .... عرفت تريد توصلي أنفذ شروطها ترجع غيره لا
بلحظه عناد وملل وضيق بالنفس ركبت راسي ... وطويت صفحتي ويا هويده وقررت امشي بأجراءات الانفصال بعد العمليه
اتصلت على سنان آلو
سنان: ها حبيبي اخبارك شو ما مريت الْيَوْمَ
سلوان : والله ما لحكت طلعت  من الدوام متأخر تالي اكلت بالطريق ورجعت للبيت
سنان: شوكت ميصير عندك  مجال وياريت لو اجيب وياك تقاريرك
حتى اعرضها على دكتوره ويايه بالمستشفى
سلوان :لا ميحتاج دا اراجع دكتور ونصحني اسوي عمليه اشيل الحصى
وارتاح  واني ناوي اسوي العمليه بأقرب وقت
بس احدد الموعد انطيك علم
سنان : اي والله استعجل بيها صار شكد الح عليك الحمد لله من قنعت
سلوان : لا هاهيه اطمئن
ان شاء الله المغرب امر ....
سنان: تمام حتى نتعشى سويه
مريم : ها جدو شو كاعد وحدك ... جلست قريب منه
ياسر: والله يا جدو ... صافن بهالبيت الي كان مليان بناسه ... احسه فرغ عليه
_ مريم : ليش احنه مو موجودين
ياسر_ لا حبيبتي انتو خير وبركه بس هم يجي يوم وتسافرون
مكانكم يخلى ....
هذا البيت راحت حلاوته ويا صاحبته وقلبي بعدها ما عرف طعم السعاده
مريم : الله يرحمها ويحفظك النا  .... جدو شنو رآيك نتعشى بالزوراء اليوم
نغير جو
ياسر:خلي يجي وليد ونقرر .... جدو شو صار فتره متروحين لاهلج
مريم: والله جدو امي اخر مره گلتلي بعد لا تجين .... انقهرت منها وكلت بعد ما اروح بس اتصل عليها اطمئن
ياسر: ليش جدو شنو الي صار
مريم: لان خالد يضرب رانيا ومعن يضرب يحيى .... اخر مره صار البيت هوسه والصغار يبجون  امي اتضايقت من ولدي  وحجت هالحجايه انقهرت منها عاتبتها گتلها انت متحبين جهالي وتفرقين لان متحبين ابوهم
ومن ذاك اليوم لليوم كل ما اتصل انتظر منها تسألني شوكت تجين ليش متجين ... متحجيها  كلت خلص بعد ما اروح
ياسر: جدو ادري بأمج مو خيره بس انت بتها يعني هي اكثر وحده بالدنيا تحبج لا تشيلين عليها بقلبج الام ما تتعوض مهما كانت
شوفي ابوج وعمج ... صاروا اجداد لكن من بعد عين امهم من يدخلون هنا للبيت   احسهم ايتام بدونها ... يفتقدوها ويذكروها دائما ويترحمولها
الدنيا ما تسوى ساعة زعل ... من ينفقد عزيز ذاك الوقت الانسان يگول ياريت ما فوتت ساعة ويا بزعل او عتاب ....
ثانيا جدو ولدج شدعوه هيج مجاليب شويه ضبيهم ... انت ابوهم الي مينكدرله ضبيتي
ولده ما كدرتيلهم ....
مريم: والله جدو لا اكدر على الاب ولا على ولده .... هم نعمه ابوهم مينكدرله ... هسه شوفهم  شكد تعبوني بالوكاحه   دخلي يجي من الدوام صوتهم ما تسمعه
ياسر: بابا تدرين حجاياتج شكد اذكرني بالمرحومه طول العمر الج
هواي ماخذه منها  حركات وطريقه الكلام
مريم: ابتسمت يمكن لان اغلب الوقت وياها تعلمت منها كثير امور
وليد يگلي حتى بالطبخ نفسج مثل بيبيتي
ياسر: والله بهاي صدگ .... لعد حضريلنا اكل من ايدج الحلوه
حتى نتعشى بالزوراء اليوم
مريم : بعيني
ميثم: يوم شو مريم صار فتره ما تمر
نجاة: دتتصل يوميه ... ملتهيه ويا ولدها متلحگ تمر ... خليها احسن النا والها
ولدها يقلبون البيت من تجي ...هسه قابل هي بعيده شو بنفس البيت بينا كم متر
ميثم: ميخالف بس مريومه حساسه اخاف انت مسمعتها حجايه مو عوايدها هيج تقطع فد مره
نجاه: شمسمعتها ... قابل هي متدري بولدها مزعجين ... يتولون اطفالكم
بسط
ميثم : يوم هم اطفال ... ثانيا شنو فرقهم عن ولدنا ... دتصلي عليها خلي تجي العصر
نجاه : عود العصر اتصل اگلها تعالي
مريم : مثل يوميه يرجع وليد من الدوام ... يعم الهدوء بعد الغدا
يصعد خالد ومعن ويا
واني اكمل المطبخ
وليد: يله تعالوا بصفي ناموا ... الي اسمعله حس ينبسط
خالد: بابا ماما كالت راح نروح للزوراء
وليد: هاي شوكت
خالد: ما ادري
مريم : اول ما كملت شغلي وصعدت للغرفه لگيت الولد نايمين وهو
متمدد على القنفه يتفرج تلفزيون
شو منايم
وليد: ابنج سطر راسي بالاسئله
شمذكره اليوم بالزوراء
مريم : يا نسيت اكلك جدو مكتئب وخطيه يبقى طول النهار وحده
كلت نطلعه يغير جو ... نتعشى هناك  حتى نفسيته ترتاح
كلت انطيك خبر يله انطي خبر لبيت عمي ولعذراء وسنان وللبقيه منو يريد يجي ويانا من اهلي حتى يتونس على اللمه
وليد: هاهيه لعد رتبي امورج وانطي خبر للكل
مريم : لعد خلي انزل اتصل بعذراء ... قبل لا ينامون
نزلت ماكو صوت بالبيت غير صوت المبرده
رفعت السماعه ... لدقايق بقيت انتظر ماكو رد وبا ما دا اخلي السماعه
سمعت الو
هلو عذوره خو ما نايمين وكعدتكم
عذراء: هلو مريومه لا والله منايمه ... سنان طلع ويا عمي لفاتحه
واني دا انظف البيت ....
مريم : اكلج راح نروح للزوراء تجون ... نبقى لليل نتعشى ونرجع
عذراء: والله علواه  بس خلي يجي سنان واسأله ... زين شنو اسوي
اكل ... اذا وافق
مريم : كلشي لا تسوين اني وعمتي سعاد دنحضر ....
عذراء: لا راح اسويلكم  مقبلات حتى لو ما اجينا امر انطيجياها اخذوها وياكم  راح اسويلج زلاطه التمر وحب الرمان
شوفي شلون ادللج
مريم : ههههه دقنعي وتعالي الله عليج والله نتونس وجدو ضايج 
عذراء: اي والله خطيه دنلتهي عنه ... هالدوام  ماخذ يومنا ...
خلص قلبي ... بس يجي سنان اردلج خبر
مريم : ان شاء الله
عذراء: بعد اكثر من ساعتين ... واني واگفه يم الخلاط وصوته العالي ما حسيت
الا بلمسه كف على خصري ... رعبتني بجفله ...
اوه سنان فززتني .... والله قلبي راح يوگف ... اخذني لحضنه
سنان : بشنو سرحان هالراس ... مديت ايدي طفيت الخلاط
عذراء: خليت كفوفي على صدره وابتسمت ... بلي چفلني وغيابه خلاني اشتاقله ( ابتسم )
سنان: ها لعد من هاي قلبي ما طاوعني اروح لمكان ثاني ... لفيت السياره ورجعت للبيت ثاري ام بيتي مشتاقتلي
عذراء: انت هم مشتاقلي لا تتحجج ... مريم اتصلت تكول راح يطلعون يتعشون بالزوراء ... بيك حيل نروح وياهم
سنان: انت عاجبج نروح ... نروح
عذراء: اذا بيك حيل والله عاجبني ... نغير جو
سنان: هاهيه لعد رتبي امورج ...
عذراء: لعد روح نام وارتاح حتى على الموعد اكعدك
_ سنان : ماشي
عذراء: رجعت اتصلت بمريم ...
اكلج منو بعد يجي
مريم : اهلي هم انطيتهم خبر ... گالوا يجون
عذراء: اي خوش لمه حتى نتونس ... اكلج ليش متخلين وليد يتصل بسلوان
هم يجي ... بلكت هناك هو وهويده يتصافون ...
مريم : والله اني غسلت ايدي منهم ... ما اتصور بعد يرجعون سويه انت يمكن متدرين بالمستجدات حسب ما فهمت هي شارطه عليه شرط وهو منطيها عرض وهي مقابله تريده الا ينفذ شرطها وهو گايل لوليد ...
اني الي عندي حجيته غيره ... اطلگ
عذراء: اوه والله ذولي امرهم عجيب ... ولا كأنه كبار وبينهم ثلاث بنات ...
دا احسهم مزعطه كل واحد يريد يمشي الي براسه
مريم : الله يهديهم على العموم ... هسه انطي خبر لوليد يتصل عليه ويشوفه
_ بعد ساعات الكل متحضر وملتمين بالكراج ... الولد ينقلون الغراض بالسياره ... والنسوان كل وحده حايره بأطفالها اذكر  الثانيه اذا نست شي
عذراء وسنان حالتهم ووضعهم يوحي بأن هم  عرسان جدد  مامخبوصين مثلنا ... للحظه شفت اطفال بينهم ابتسمت لهالحدس ...
تقربت مني هويده
_ ها شو صايره حركاتج مال مخابيل
_ هههه ليش
_ شو صافنه وتتبسمين
_ لا والله صافنه بعذراء وسنان وللقدر الي جمعهم ... وتخيلت بينهم اطفال
اكثر من ٢
_ لعد حدسج مو بمحله ذولي يسوولهم واخد اثنين ويكعدون ... لا شغلهم ولا تفكيرهم يوحي بكثره الاطفال
_ الله الي يعلم شنو كاتبلهم من رزق ...
يجوز انت هم يجي يوم وعقلج يرجع لمكانه ... وتخلفين بعد
_ قصدج اذا انضربت بعقلي ... ورجعت لسلوان اصلا
والله قلبي ميرف عليه بقدر شعره ولا عندي مشاعر حنين اله كل الي اتذكره من يخطر على بالي بس اذيته الي لا غير
واذا شفتيني رجعت فأعرفي هو بالنسبه الي ميت بس افكر ليش فلوسه وتعب وصبر السنين عليه يروح لغير بناتي
_ والله يا اختي ... امرج عجيب كلش تغيرتي ... صايره عندج قساوه من ورا التفكير بالماديات ترى الفلوس متجيب الراحه ولا السعاده صدگي ...
اذا متفكرين بنفسج فكري بهالبنات ...
_ كلشي ما عليهن عايشات احسن عيشه
_ اي صح بس لان ابوهن على راسهن وما مقصر عليهن ولا ناسيهن
خافي من يوم يبزع ويروح يتزوج ويلتهي بزوجته واكيد هم يصير عنده اطفال ساعتها يقصر وبناتج الي يدفعون ثمن عنادكم
_ اوي مريم شلون مواضيع سخيفه تفتحين ... طالعين دنتونس بلله
لا تغثيني ... وتجيبيلي سيرته
خو ما راح يجي
_ الي فهمته من وليد لا گايله عندي شغل
_ احسن يسوي فضل  يخليني مرتاحه وميشوفني وجهه ...
_ هم صدك اني شكو مدوخه نفسي بأمركم كل واحد اعرف بمصلحته
_ اي عفيه حيري برجلج وبولدج ...
_ هو هم هيج
وليد : يابه انت اصعد ويا سنان اريحلك ... من دوخه الصغار
عذراء: انتبهت على خالد واگف على صفحه ... نفس وگفة ابويه الله يرحمه
مخلي ايدي الاثنين ورا ظهره ومقدم رجل على الثانيه
رحت لعنده ... ها عمه حبيبي تجي ويانا اني وياك نكعد ورا وجدو وعمو سنان ليكدام
هزلي راسه
_ بس گولي لابويه اخاف ميقبل
_ ابتسمت ... ابو خالد ...  راح اخذ جركايه ويانا اكعده بصفي
_ هو اني دزيت جدي وياكم حتى يخلص من هوستهم
ياسر_ لا بابا شريد منهم هم ونستنا
وليد_ يله لعد براحتكم ... روح ويا عمتك بس اسمع الكلام واكعد بالوسط مو يم الباب والشباك
بلمحه البصر شفته فرح وركض لامه  نزل راسها وهمس بأذنها ....
شفتها ابتسمتله وجاوبته ... روح حبيبي
يويل انت ابن امك ...
مريم : خطيت بأتجاه وليد مبتسمه .... وانت شوكت تبطل تغار من ولدي مو عجزت
وليد: ترى هواي تتعيقلين عليه يبطه .... منو الي معجز  امي راح تصعد ويانا ولا جان شوفتج الشباب على اصوله ارجعلج ذكريات السنين الي راحت
_ ههههههه شسوي تفتحلي اغاني وتبقى تباوعلي من المرايه
_ دصعدي اخ يا علة قلبي ...
_ بعد ما تحركت كل السيارات واحنه بالطريق ومعن بحضني ...
واسولف ويا عمتي ... معن يريد يروح يكعد يمها ...
_ خلي يجي يكعد بحضن امي
_ استغربت قبوله رفعت عيني للمرايه
بس لمحني غمزلي ... وهو مبتسم گلي
_ خليج مركزه ويا ابنج ....
_ فهمت يقصد نفسه .... بادلته الابتسامه ....
-يوم بلا زحمه طلعيلي من الجكمجه كاسيتات .... انطيها لمريم
شوفيلي كاسيت اسماعيل
_ بداخلي اضحك ... هذا من كل عقله يغار من ولده عليه انطيته الكاسيت
شغله حسيت كل اغنيه تذكره بشي طلعت يصبرني ... خلته يبتسم ويندار عليه
_ بشنو تذكرج هالاغنيه
_ عمتي ابتسمت ....
جاوبته مبتسمه ما اتذكر
_ التفت صدك متذكرين
_ عمتي طبطبت على رجله بكفها تذكر تذكر .... بس انتبه على الطريق
مبين جنت مسويلك طلابه وياها وخليتها تزعل منك
_ اخ يمه متدرين هاي جنتج ... شلون لوعته لقلبي ... حتى شيب طك براسي من وراها
_ عمه الله عليج اني ورا الشيب الي براسه لو وراثه
_ لا عمه من ياسر وارثه ....
_ هسه نرجع للسؤال ... تذكرين الموقف
_ اي اتذكره ....
_ شنو
_ شنو القصه اليوم شمذكر
_ عود تستحين من امي ومن هالسوالف لو ما جنتي تتلوگيلها علمودي
_ شكو بيها غير احبك ....
_ اي عفيه عمه ... ريحي قلبه صار ساعة يفرهت منا يجيبها منا
يريدج تكليله احبك
_ والله بس انت تفهميني .... يمه هاملتني حايره بولدها ...
بالغرفه تعد عليه النفس من تنيمهم تخاف لا اقلق راحتهم
واني من انام يركصون فوم راسي
وخو بسالفه الاكل كدامج تعبي كروشتهم واني متدري بيه اكلت لا
خلت الماعون كدامي وخلص تأدي واجب
_ التفتت عمتي عليه تضحك
عود من تأكلين الولد بدربج لگمه اله ... وتكفي الشر
_ همزين عمتي عايشه ويانا وتشوف من تدخل الولد صوت مينسمعلهم ومن تنام ميوصلون يمك
وثانيا اني الاكل اغلب المرات اسوي الي انت تحبه ... وولدي ياكلون منه
ثانيا غير بعدهم صغار انتبه عليهم ... انت مينخاف عليك بالاكل عايزه اوكلك
_ ايباه لعد قبل ما نتزوج تجيبين وتخلين بحلگي ... لو نسيتي ايام المزرعه
بأيدج توكليني اللحم بعجين .... ثاري جنتي تقشمريني حتى انفگج
_ شسوي غير بايره محد جان يخطبني ... كلت هذا ابن عمي همه على بطنه ... خلي اقشمره بلكت ياخذني
والحمد لله الاكل جاب نتيجه ....
سعاد _ ههههههه والله ذكرتوني بمناكركم ايام قبل .... وطلايبكم بس الي اختلف مريومه
حوصلتها صارت اكبر وتتحمل مداهرك ...
وليد _ هاي اني .... متأكده
مريم _ والله حرت وياك اكلك نفگتني متقبل .... اذا اكلك كتلت روحك هم مراح تقبل
شنريد اجاوبك گلي واني حاضره
_ احجي الحقيقه وگولي كتلت روحي عليك ....
_ كتلت روحي عليك ... واجيتك من سويسرا ... وعاديت البيت حتى اخطبك هههههه
ابتسم ...
_ يمه ما اكدرلها لبت نجاه ...
سعاذ _ اي صح
_ هاي يمه انت ويايه عليه
سعاد _ لا وياك ... ادري بيك متكدرلها
مريم _ التفتت عليه عمتي ...
سعاد _عمه خلينا طالعين نتونس ... امشي على مرامه هذا ديدورلج حجه
مريم _ ادري بي ... (عگد حاجبه )
وليد _شتدرين ؟
مريم _ادري بيك جوزائي .... كل ساعة بحال ... قبل شويه تغمز
هسه عگدت حاجبك
طگها بضحكه لان فضحته كدام عمتي فشل ....
التفت عليه مبتسم ... بسيطه
سعاد _ من نرجع عود ... هسه طالعين خلي نتونس ....
وليد _ صار يمه لخاطرج راح امشي هالتهم
اول ما شفت امي التفتت على الشباك
غمزتلها بالمرايه
ابتسمت مديتلها اصابع ايدي الي بجانب الباب
لمستها ... بعده الاحساس القديم نفسه ... يمكن هسه اكثر لان هي
صارت تحبني اكثر وتبين هالحب بأستمرار ... عاطفتها تسد الفراغ
الي حسيت بي بعد وفاه بيبيتي الله يرحمها
_ عذراء: اول ما وصلنا ... بدينا انرتب الكعده ... اتجمعنا سويه
مفتقدين هاللمه من فتره ...
سوالف وضحك تشهد عليها ... قشور حب الشمس ... وقطع الشاميه الي انسلت من بين ادينا وتناثرت بالمكان الي كاعدين عليه
وابتسامة جدي وعيونه تفتر علينا واحد واحد فرحان بجمعتنا ... وباله يم الصغار لا احد منهم يستغل انشغالنا وياكل من الحب لو قشوره
اخر شي انتبهت عليه لمهم يمه وبدا يكرزلهم ... وينطيهم اللب
اتخيلت هم يجي يوم ويكون طفل من هالاطفال ابني ... ويحصل من هالرجال كميه عاطفه ما تنفذ ... كادره توسع العالم كله
سنان: ها حبيبتي
عذراء: تخيل يجي يوم وابنك كاعد ويا هالدعاسيق ... خبلوا لجدو
دا احسهم دجاج ويتعاركون على الاكل كلها فاتحه حلوگها مديلحگ عليهم
سنان : هههههههه خليت ايدي على كتفها وقربتها مني ابني اني اكرزله ... واشيل حمله عن جدي
دشوفي اهلهم ليش يدرون بيهم عبالك الطلعه الهم هم الصغار وديونسون نفسهم
الله بالخير عليكم ... ترى جدي تعب من مجاعة افريقيا
كل واحد يحير بأبنه ويكعد يكرزله ....
هويده : جدو حير بس ببناتي ...
وليد: ابوهم جاي فد شويه هو يحير بيهن ....
شفت لمحه المفاجئه الغير ساره على ملامحها
سنان: اخاف لعد وصل ومديندل
وليد: لا اتفقت ويا راح نكعد بهالمكان قريب على المي ... وانطيته علامه داله
التفتت على مريم ... امشي ناخذ الصغار ونتمشى لحديقه الحيوان نونسهم
_يله ... معن على ايد وليد وخالد ايده بأيدي من الجهه الثاني ... خطينا كم خطوه
التف كف ايده على كف ايدي ....
_ يا علة قلبي تدرين شكد احبج .... بكد ما احب هالزوج
بس انت لئيمه تحبيهم اكثر مني ...
_ والله احبك مثلهم ...
مرينا من يم اقفاص الحيوانات ... الى ان وصلنا
يم الشاذي .... بدا وليد يشمرلهم شاميه ويتغالبون
منو الاسرع ... يلتقط قبل الثاني .... خالد بيده شعر بنات
( غزل البنات ) كوره بأيده .... وقذفه من الفتحه ...
_ بابا هذا مياكل شعر بنات
_ بلمحه احد الشواذي التقط الكره .... منظره وهو متلذذ بيها وضحكاتنا مستغربين ولمحه الفرح على وجه خالد ... وانحناء حتى يصير بمستوى الولد وبينهم وهم يكورون ويشمرون
انطبعت بدماغي .... كذكرى حلوه جمعتنا .... واب مثالي الي ولولده
بداخلي دعيت الله يحفظه النا ويبقى دائما سند النا بهالدنيا ...
خليت ايدي على كتفه ... وهو يداعب الولد ويمازحهم ... رفع كفه ومسك كفي ... حسيت بكميه راحه وسعاده تفوق الخيال واي سعاده ثانيه بهالدنيا

التكمله انزلها ... وقت ثاني بعد ما اراجعها
حاليا هالجزء اريد تنطوني رآيكم بي .... بصراحه
حتى اذا اكو خلل او حسيتوا اقل من المستوى اعيد صياغته

_