رواية حكايتي مع النصيب الفصل الأول 1 - بقلم نور الشمس

..باهي باهي اگعد يمه عود انت مخلي تنبيه كل شويه يدگ وانت نايم  اگعد يمه الساعه سته الصبح هم يلله تروح شغلك

..أي يمه گعدت رفعت الغطه ..صباح الخير يمه

..صباح العافيه بعد امك ..تعال تريگ جاهز الريوگ

..استكان چاي بس مااريد ريوگ

..بهاء مو زين عليك يايمه شغلك تعب وانت ع الجكاره والچاي شيضل بيك شلون تسند نفسك

..مااشتهي يمه بعد شواي بالشغل نتريگ ..گعدتي حسين دوامه الصبح اليوم

..هسه گعدته وجاي يبدل هذا اخوك هم شلعة گلب گالب وجهه عليه يريد يشتري بلي وانه مارضيت

..وينه هوه گليله انه اجيبله يدلل بس بالعطله مو هسه..صحت بصوت حسوون تعال

..صباح الخير ..باهي شلونك

..هلا يگولون ضايج ابو عليوو هههه

..اي مو حقي جماعتي عدهم واني ماعندي اضل هيج دوم اختلف عنهم

..ولك شمقصرين وياك هاي انت المدلل وبعدين انت ليش تباوع وتحس بنقص عشنه بعمرك مايوم باوعنه الغيرنه ولاقارنت روحي وي واحد كل واحد يمد رجله على گد غطاه وجنه قانعين انت شو كلنه ندلل بيك ودائما تحسسنه مقصرين بحقك كلاوجي انت عليمن طالع ههههه

..ابتسمت خجلان مو هيج والله انتو مامقصرين بس انه احب بزودكم ادلل جاغير انتو اخوتي الكبار وانه زغيركم والله حاسبكم اباء مو اخوان خاصتا انت وضياء

..ضحكت خوش صبغ من الصبح وتدلل البلي جايك والنتيجه هيه الي تحدد نوعه كل ماتجتهد اكثر يجيك اخر اصدار ينزل

..ضحكت بفرحه والله اكلهن اكل الكتب تدلل

..جاخوش نشوفك وتدلل ..يمه انه طالع الولد وصلوو  بالباب رمشو عليه

..الله وياك يمه الله يرزقك ويفتحها بوجهك

                    ___________

اني بهاء عمري ٢٧سنه ثالث واحد بتسلسل اخوتي
علاء الجبير عمره ٣٠ صيدلاني متزوج غريبه وطالع ماعايش ويانه من تزوج تزوج ابيت وحده ومرته حبابه خوش بنيه بس مانمون عليها بشي عدهم ولد واحد اقل السنه عمره

وضياء عمره ٢٩سنه مهندس كهربائي متزوج جديد زوجته بت عمي نحبها كلنه ونعزها نعتبرها اخت النه وبيناتنه ميانه زوجته اسمها لمياء

اما الثالث اني الوحيد الي شاذ عن اخوتي اموت من المدرسه اشتغل كلشي بس لاالزملي كتاب
گوه والف ياعلي تخرجت من اعدادية الصناعه قسم كهرباء صح ماارسب بس ع گد النجاح ماتعب روحي بالقرايه عكس اخواني رغم اني بسرعه استوعب لو متعب روحي وقاري مثلهم چان طلعلي طبيه
بس ابد مو هامني ولا نادم ع الدراسه اي شغله اخلي ايدي بيها انجح وابدع بشغلي كل الصنعات اعرفها حداده اسطى بيها بعد مااشتغلت فتره طويله بالحداده واشتغلت بالبناء بعمر زغير ايام ماچنت ادرس واشتغل
اشتغلت كلشي اني طبعي مااحب اگعد واحنه محتاجين واحب يوميه اشتغل شغله واضبطها وبعدها ارجع الشغلتي القديمه اذا مليت من الشغله الجديده وهكذا
اخر شي من تخرجت اشتغلت وي خلفه سيراميك
بقيت وياه سنه هوه من شافني ضبطت الشغله عرف الناس عليه وخلاني اطلع بيوت ومن هاي كلها عرفتني وصار الشغل عليه هواي اكثرهم حته لو عندي شغل ولازم بيوت يأجلون شغلهم ينتظروني  لأن شغلي كلش زين ومعروف بالمنطقه وحته مناطق ثانيه عادي عندي استعداد اشتغل بأي محافضه المهم اشتغل ومااگعد
ماانسه فضل ابو علي الخلفه عليه السواه محد يسوي اكثرهم يتحيزون ويخافون المنافسه وهوه الرزق بيد الله هسه اني اي واحد اشوفه مستعد يستقل بشغله اساعده بس الوياي ثولان صارلهم اربع سنين ومن اكلفهم يسوون وحدهم حته اشوفهم ينزون
الولد الوياي مو غربه ولد عمي اثنين وواحد ابن خالتي
هسه تگولون يشغل بس الگرايب ياعمي هيه كلشي صارت واسطات حته العماله
ذولي خطيه هم ماعدهم ومحتاجين والشاب اكبر دمار اله كعدته بدون شغل وافلاس جيبه
الكعده تموت والجيب من يفرغ يخلي هواي شغلات تجي بالبال واكثرهن مومالات الله والي يخلي الشيطان ويركز وياه يروح بيها
عاد الأقربون اولى بالمعروف بس يامعروف غير يفتوون الچلوه
اول فتره عذبوني هسه لا كلشي اطلب يسوونه بس انه اريدهم يصيرون خلفات وهمه ولايمهم يردون دوم وياي
نرجع العائلتي

..الرابع من اخواني صفاء هذا طالب كليه مرحله ثالثه

..والخامسه بنيه هذي تدرس اعداديه اكثر وحده احبها ومتعلق بيها نونه هيه الغاليه عندي وعند اخوتها يمكن جي الوحيده بنيه بينه وهيج  مدلليها

.السادس حسين هذا ازغر واحد عدنه هذا المدلل من صدگ كلشي ماشفناه بزغرنه شوفناه اله ملابس العاب طلعات عوضنه بي حرمانه من كلشي
هذا بالحقيقه مو اخونه هوه ابن خالي الله يرحمه استشهد وهوه بالگماط بقه عند امه سنتين ومن  هيه من كيفها جابته الخوالي محد طالبها بس يمكن شرط اهلها لو رجلها
بعد مابقه اسبوع ابيت خوالي محد اله امي جابته ويانه وصار اخونه السادس يعرف كلشي يعرف احنه شنو بالنسبه اله بس مايگدر يفارگنه يوم حته من خوالي يردوه يروح ساعات يشوفهم ويرجع
            ______________________

طلعت اليوم متوجه البيت بمنطقتنه استلمته البارحه وصاحبه مامستعجل عليه گال الزموو وخلصوو على راحتكم
وهذا الشي يفيدني بهالحاله اگدر استلم بيت ثاني وياه واشتغل يوم هنا ويوم هنا
حاچيت علي الي هوه ابن خالتي يصير
..ابو حسين ماوصيك الخبطه عليك اول البارحه انطيتها الحيدر وماضبطها كل واحد صار سنين منكم مچلب شغله ضبطوهن كلهن يلله تبادلون

..صار تدلل باهي ..الخبطه عليه ولايهمك

حيدر..ولك انت تريدني اظل دوم انه انگل طاسه وتالي اگضي عمري هيچ

.ضحكت والله علما تكمل عيادتك وتفتحها.. ابن الأوادم دكتور انت وماراضي هاي بعد هيه الناس كلها محتاره بعيشتها اقتنع وگول الحمدلله لو بيك خير طوور روحك محد كاضك الزم ايدك ولم فلوسك سويلك شغله اريح الك اذا تعبان ومال

..بروح اهلك خاف الزم ايدي ولك غير عمك بالباب يتلگاني يتقاسم اليوميه وياي تگول مشاركني

..ههههههههه خايب غير ماعنده ويصرف عليكم ولك انت والله بطران اتمنى ابوي عايش والله انطي يوميتي كلها بس احس بوجوده ولك صار سنين من مات وانه مشتاقله واشتاقله يوم بعد يوم احمد الله يخوي

..الحمدلله شگايل اني والله يرحم عمي برحمته

..امين ..يلله وصلنه شكلوو الصونده وخبطوو بين ماتكملون اشوف البيت واقيسه من جديد

بدينه شغلنه ومشيت هواي بالشغل ماردنه ريوك وخلينه جوعتنه ع الغده فد مره

شويه وخابرت امي

..الوو
..هايمه گولي خو ماكو شي

..يمه خابرتك اريد اريح بالي مو صفاء ع اساس اليوم يجي من بغداد وتأخر وبعده ماجاي هاي مو عوايده ساعه صارت ١٢ وهوه ماكو وجهازه مغلق

..لاتخافين يمه الغايب عذره وياه اذا جهازه مغلق شسوي هسه اني عليمن اخابره

..يمه عندي رقم صاحبه اخلي نونه تودي الك

..صدگ جذب يمه جاماخابرتي انتي ينعجب بصوتج ويخطبج

..الغسل اني وين وانت وين خفت اخابره يمه گلبي مامرتاح

..هههه لاتخافين انتي بس لاتقلقينه اريد يوم گلبج مرتاح ماكوو ودي خل اخابر

وصلني الرقم واتصلت

..الوو

..هلا حبيبي انت حسن صديق صفاء جعفر

..اي حبيبي اتفضل منو وياي

..اني بهاء اخو صفاء ع اساس اليوم يجي واتاخر وبالنه يمه كل مره من وكت يجي

..لتخاف حبيبي جايين احنه بالطريق اتأخرنه اليوم احنه  اخرناه انطيكياه تحاچي

..مايحتاج گلبي بس گله خل يخابر والدته بالها يمه لو اني اخابرها اخذ راحتك انت وياه توصلون بالسلامه

والله ياامي اطفال احنه عدها. كل واحد لحيته وشاربه انوب قشمرتني خلتني اخابر صدگ
شكو عليه صفاء

خابرت امي

..الووو

..هايمه بشر

..خير يمه ماكو شي جهازه مغلق وجايين بالطريق جماعته مأخرينه

..الله يبشرك بالخير

سديت التليفون ورجعت الشغلي شكد اضوج من يگطعون شغلي عليه واتأخر ابرد من ارجع كوه عليه
طبكت غرفه وطلعت للباقي بين مانحل بتلاثه الضهر وياي الولد شكلهم يسوون

صارت الضهر والخبطه خلصت
گتلهم خبطوو حته وراها نتغده ونرجع نكمل
طلعت بالباب اشوف شغلهم يگضوها ضحك وياخرونه

..بهاء الله عليك اطربنه خل نسمع
..علاوي اشتغل وانت ساكت هيه مال اجرلك موال هسه حاجيته وهزيت ايدي ..كمل شغلك واخبط حته اكمل شغلي اني

..چا انت كاضني طبعا اكمل
بس الله عليك ..خلي نطرب وياك سمعنه

..الخاطرك بس ..شتريد تسمع

..الله اريد سامحيني تعرفني اموت على هاي الأغنيه

تدلل

غنيت

سامحيني سامحيني .سامحيني
ياملذتي بهالحياة المالي بيها
چنت رغبه
سامحيني
غنيت الأغنيه كلها كمل الخبطه
اني كملت وهوه اشرلي
باوعت بنيه حلوه تطلع اعداديه هيج شي من عمر نونه
شفتها واكفه وصافنه عليه
ضحكت على منضرها غمزتلها بطرف عيني وگتلها  اعيدلج
ماجان ابالي اتحرش لا بس ردت احرجها ونجحت البنيه صارت حمره وطارت واني ضليت اضحك
هذي شبيها
الولد ضحكوو عليه وگالوو

حيدر.. النه الله بس هاي بنت منو هيچ صفنت عليك

..مالك علاقه ابنات الناس سمعت صوتي وعجبها مو قصدها مبينه البنيه مو هيج نوع بس اني حرجتها خطيه

..والله اني منك اشكل وياها وهاي بكلمه تذوب

..ذابت ضلوعك اشتغل زين وعوفوو بنت العالم مبينه مو متقصده كافي بعد

هدى ..

رجعت من الدوام واليوم صديقتي راحت البيت عمتها من الدوام وبقين اني وحدي
من رجعت بالساحه الي مقابيل بيتنه قريب الها بيت وبي عمال
بس شنوو اني سمعت صوته ونسيت روحي
من غمزلي ماعت روحي ورجعت متصفصفه

..ويلي يربي شبيه اني ليش هالفهاوه دوم ابقه بهيج مواقف فاعيه لو شايفني واحد من اخواني غير ابتلي
بس اني هم حقي غير صوت يوگف الطير البالسمه
اني سامعه واحد يشبه صوته بس منوو

فززني صوت امي

..ولج هدى شبيج صار ساعه منتبهتلج اجيتي شبيج واكفه بالطرمه ومخروعه

..ها لايمه ماكو شي بس انطوني هواي دروس وتعبت

..الله كريم تعالي ارتاحي بين مايجون ابوج واخوانج ونتغده

رحت ابدل وصوته يرن بأذني شگد حلوو حرانات عامل هذا المفروض شخص معروف ع هذا الصوت

يتبع ..