رواية حكايتي مع النصيب الفصل الثاني 2 - بقلم نور الشمس

بدلت واطلعت هنوب الأغنيه ضلت ابالي كل شويه اغني بيها
امداني هوه هذا صوت وصوته صوت
صوت امي وعاني
..هدى اخذي السفره فرشيها
..صار يمه اخذت السفره وشفت اخواني ويلي لو لاگفني واحد منهم يمه خاصتا احمد هذا مايتفاهم ابد

خلصت غده غسلت مواعين الغده ورجعت الغرفتي اقره شوكت تجي سرى تخلصني من شغل البيت
مامتعوده هيه تعرف امي شتريد
سمعت امجد صاحني
..هدى
..هااا
..تعالي اكويلي القميص
..اووف شوكت تزوجون واخلص
..وياخبل هذا اليتزوج
..ليش عيني تبقون هيج مگابليني وگاعدين وتعالي اكوي وتعالي غسلي
..وتردين اتعب مرتي الحلوه واكلها تعاي اكوي
..رفعت حاجبي لا والله
..اي والله ..اوووف غير اعرفها هيه وين هسه شكاعد تسوي فدوه العينها
..هسه تطلع حوله
..حته انتقم منج بساعتها ليش تفاولين عليها هاي الغاليه بعد بيتي هيه
..من هسه ذبحت روحك
..اي ولو اجت بعد مااعرفچ اتبره منچ
..خلف الله عليك جيب القميص وروح كفيني شرك
..ههههههه انتي الروح والريه هداوي شعندي غيرج بس تبقه مريتي العزيزه مديت الها الساني وضحكت
..والله ياربي دتعيين انت وعود بعدين فكر اتزوج بعدين ميزوجوك گبل احمد أيس
..مامستعجل انه خليها مدلله بحضن امها الغاليه بنت الغاليه
..فتحت عيني يااا هيه ياهي
..مااعرفها بس وين ماتكون ربي يسعدها ويزيدها جمال مريتي الي مسمايه بأسمي
..الله يشفيك
..ولچ السانچ طولان
..خل اكويلك راح تطفه
..بالخوف تجرين عدل
..ضحكت غالي مجودي ادري بيك ماتأذيني
..ديلله روحي

كويت الملابس وحضرتهن
ومر يومي بين قرايه واخواني احمد وامجد الي كل شويه طالبين طلب سرى اختي الأكبر مني متخرجه وهيه معودتهم ع الدلال ومن تروح يطيح كلشي براسي
امي ماعليها بس بالطبخ واني اسوي كلشي وتگول شمسويه والله بهذي الفقره اشعر بالظلم ودي يمي منظمة حقوق انسان اشكي الها حالي وتحكم بحق اهلي الحكم العادل اووف يردوني انجح وبمعدل عالي ويردوني مااقصر لاوياهم ولا بشغل البيت

نمت واني كل شويه اطرد صوت الي غنه من بالي ويلي شهالصوت اس مامتوقعه اكو بحياتنه هيج اصوات كل بالي الأصوات الحلوه بالتلفزيون وبس
لا وانوب شلون غمزلي ويگلي اعيد فلك طرني شگد فاهيه مشيت بدون مااكول شي لو ابرر هوه شعليه بيه اوكف والا مااوكف شدعوه هالغرور بصوته والله ياربي
بس هوه مو بس صوت طول بجسم بس ماانتبهت على وجهه وملامحه
اووو شيوخره من بالي طردت افكاري ونمت بعد محاولات

بهاء..

خلصنه شغل الضهر ورجعنه للبيت دخلت البيت

..السلام عليكم
..عليكم السلام هلا يمه
..هلا بيك يمه ارتاح
..اروح اغسل واجي اتغده مييت جوعان درت على لمياء بعد اخوج اغسل واطلع اذا ماتصير زحمه اريد تحضريلي غده
..من عيوني بهاء تدلل جنك على غده مرتب
..سالمات عيونچ مشكوره ..صدگ صفاء اجه
..اي يمه نايم
..هلا بي براحته اشواي اشوفه
غسلت وطلعت لگيت الغده جاهز تغديت ونونه جابتلي الچاي
..نونه شلونچ بالدوام
..الحمدلله كلش زينه
..ماطالعه عليه حرامات شبيكم ولا واحد بيكم عليه
..همزين يمه نعمه من ماطلعوو عليك
..هايمه ليش هاي عود انه اقرب واحد الج تاليها هيج تحچين
..اعرف قصدك ع الدراسه وانت زين بكلشيا لا بيها مافلحت خلي الباقين ينجحون
..والله ونجاحهم عاد فادج علاء بشهادته ..لو ضياء حصل شي تعيين بعده مامتعيين
..عساه سالم يمه ليش تعيرني بأخوك هم بيته وهوه شريد منه
..مامعيرج انتي جاي تگولين مافلحت وخليتيني احجي بعدين تدرين بيه اشاقه وي نونه بس ماادري ليش دوم تحسسوني بيه نقص وانه اشوف العكس انه الحمدلله عايش وفلوسي خير من الله وماعازهن عليكم بطلي تشوفيني بهالعين عفت الچاي وگمت اروح انطمر احسن
..بهاء يمه والله علمودك الشهاده غير كلهم هسه اتباها بشهايدهم بس انت حرامات من اگلهم صناعه گوه صوتي يطلع
..من قهري صفنت عليها هاي امي دوم هيج مو اول مره دوم تحسسني بنقص وچني مفشلها من دون اخواني والي يحز بكلبي علاء الصيدلاني التعبت عليه ومتباهيه بشهادته يجيها بالشهر مره ومايوم شفته انطاها مصرف وضياء الهسه مامتعيين يشتغل شهرين وي شركه تلاثه ويگعد سته ومصرف البيت واحتياجاتهم كلها انه شلتها حته عرس ضياء العشه والنيشان مني
اخواتي كلهم يحبوني ومقدرين تعبي اعرف بس امي مامحسستني بهالشي تحبني واموت على تراب رجليها بس توصل للشهاده عبالك جبتلها العار حته وجهه ينعقج بعد ماصفنت بوجهه محتار شحچي
گتلها بعد لاتجيبين اسمي ليش صوتچ گوه يطلع الغيني چنج ماعندج ولد
گلتها بحديه وطلعت الغرفتي

نورس..يمه ليش هيج ماتبطلين من بهاء شناقصه هسه وبعدين صدگ حجيه اهل الشهايد بيش احسن منه ابنج الجبير وين صارلج عشرين يوم شايفج جايج اكو يوم انطاج مصرف والله تفتين الگلب انتي

..نوينه انچبي انتي مالچ شغل عود سمعي حچيه وگعدي مثله هوه خلفه وانتي صيري خياطه وكيفي بحچاياته

..شوفي امي هوه غير يشاقه وياي اصلا منو غيره مشعني ع الدرلسه كل درس اخذ بي درجه زينه تجيني هديه انتي والله تتحيزين وهذا الشي حرام وظلم

..نورس كافي انلصمي اتحيز شني كلكم نفس المعزه

..بس وي بهاء  انتي تختلفين ومحد مهتم بيج غيره هم حظه هذا

..ولج غير علموده

..دوم هيه يايمه يعني يظل هيج عمره كله والله ماطلع صيدلاني لو مهندس

لمياء ..عمه بهاء يتحسس وانتي تدرين بي هوه اكو احن منه عليج وعلى اخوانه خطيه جاي تعبان وانقهر

..صرتن كلجن براسي حنينات واتنصحن مايزعل مني اشواي من يگعد اراضي

بهاء..
رحت الغرفتي واني مقهور احس الأكل الأكلته صار سم بمعدتي هاس انه لو ضجت تصير الحرگه بمعدتي
تمددت زخليت ايديني جوه راسي وافكر اني صدگ افشل وامي فشلانه مني ليش شبيه جاي اطوطح تالي الليل سكران واستحت مني
لو عطال ولازملي ركن وسوالفي مخجلاتها
شو جبت عمري اشتغل حته تعوف شغلتها وماارتاحيت لمن ارتاحت هيه وصاؤت حالها حال النسوان واحسن كل زياره اگلها روحي ومصرفها الي تريده وازيده اضعاف
عمره وديتها قماش اگلها اشتري احسن وارقى نوع شمقصر انه وياها
احلامي الچنت احلم بيها بطفولتي من اشوفها تعبانه وملابسها عتيگه واشوف النسوان تكشخ انقهر واگول شوكت اكبر واشتغل اكثر حته ماخلي امي تحتاج وتخبز للعالم
صح امي تعبت علينه اشتغلت خبازه
تخبز بحر الشمس وبعز البرد حته توصلنه وتتباها بينه يمكن حقها انه الوحيد المارفعت راسها بشهاده بس مامحتاج انه ولامقصر عليهم ولا اخلاقي بيها شي بالعكس كلها الناس تحبني ماجبتلها مذمه
هالأحساس يذبحني من اشوف امي مو راضيه عليه الهذا السبب وابالها اني اشجع اخواني حته مايدرسون وتخاف مني عليهم بالعكس انه اشجعهم والياخذ درجات زينه اجيبله هدايه لو انطي فلوس حته صفاء جبير وشاب وهم كل مايعبر مرحله هديته تجي مره تليفون مره حاسبه يطلبني بلسانه ويدلل عليه
نمت من التفكير والتعب كعدت لگبت روحي مكسر ومكالمات هواي جايتني باوعت
الساعه تسعه حيل نايم كل هالوكت
شفت المكالمات ذوله جماعتي مابيه ابدل واروح اتصلت وگتلهم عذروني مابيه اليوم اسهر وياكم
نزلت من غرفتي لگيت الكل گاعدين غسلت ورحت اسلم ع الولد مجتمعين

..هلا بهاوي وين يمعوود كل هذا نوم

..هلا بصافي شلونك مشتاقلك اجيت وهم لگيتك
نايم وانه من التعب نمت
درت وجهي شلونك ضاوي

..هلا باهي بخير انت شلونك ظل بالي عبالي مريض شني هالنومه مو عوايدك

..لا والله تعبان وماحسيت بالوكت

نونه..بهاء اسويلك عشه

..لا نونه ماريد معدتي توجعني

..بهاء يمه زعلان عليه

..ابتسمت لايمه عليمن ازعل جديده هيه السالفه تعودت دنگت وطلعتلي جگاره شعلتها

..بهاء اخذت ٩٠بالرياضيات

..عفيه السبع ابقه هيج ويجيك الردته
گمت انه اترخص

صفاء ..يمعود ماشفناك

..تعبان باجر عكبه تشوفني حته جماعتي خابروني ومالي خلك اطلع

ضياء ..درت على لمياء شبي بهاء
..اشرتله ماادري مااحب اتدخل بهيج شغلات خاف عمتي تضوج وادخل بمشاكل انه بغنى عنها

..نونه شبي بهاء
..والله ياضاوي مشكلة كل مره شنو يضوجه غير كلام الوالده

..شگتله انه هوه هم مدري شلونه

ضياء ..يمه مو كافي هالسالفه تنعاد كل فتره انتي هم متعافيه على بهاء

..ماكلت شي انه والگلته صح شصاير لو هسه خريج وشهادته بدل هالظيم هذا عماله وتعب

..وهوه وين ابو الشهاده شمحصل صدگ تحجين يمه هاي انه گدامچ شني فرقي عنه بالعكس هوه احسن شايله بيت كامل
بعدين ابالج اهل الشهايد مايشتغلون الله وكيلج مهندسين صاروو سواق تكسي وغيره وغيره عوفي الولد لادم تسمعينه هالحچي

..بس طلعوو منها انتوو وهوه مايگول يعرف قصدي

صفاء ..يمه بهاوي مايستاهل والله اكول شبي ضايج

..اگوم احسن صرتوو عليه كلكم حنان هوه يعرف قصدي ومايزعل انتو شكوو مدخلين

..انوب انتي زعلانه تعاي يمه غير نگلج الصح

ثاني يوم الصبح گعدت ع المنبه هالمره يمكن لأن شبعان نوم

لگيت امي اباب غرفتي

..صباح  الخير يمه

..صباح الخيرات بعد امك يمه مانمت البارحه ولاغمضتلي عين جي ضوجتك

..لايمه لايظل بالج الگلتي هم حقج بي انه الوحيد المارفعت راسج بشهاده وتعبج راح هيج وياي

..لامو هيج والله انت رفعت راس واتنومس بيك كدام اهلي وكرابتي بس علمودك جنت اتمنالك شهاده تلوكلك هذا اليحز بگلبي وكل مره احچي بس مو قصدي ازعلك

..لايظل ابالج حبيبه ..ماازعل انه وان زعلت هم مايطول زعلي تدريني مااكدر بدونچ اروح الشغلي لا اتأخر

..بعد امك انت تعال تريگ

..مااريد يمه بس چاي اشرب

شربت الچاي واجوني الولد وطلعت وهالمره ماطلبوو گبل لايطلبون من قهري موال يجر موال
بدينه بشغلنه وطلعت للولد ردت منهم شغله شفت البنيه طالعه من اهلها للمدرسه هاي نفسها الي البارحه صفنت شو من شافتني تمشي وعينها عليه شبيها هاي
دنگت راسي ورجعت اكمل شغلي هاي البنيه معقوله هيط كل التشوفه ماتشيل عينها منه شبيها هاي تاخذها صفنه وترجعها صفنه
وانه شعليه وبالي يمها ختولي
كملت شغلي وصار وكت الغده وهم طلعت يمهم يخبطون حته نتغده ونكمل الشغل نلگه الخبطه جاهزه
بين ميكمل الخبطه مثل كل مره اسمعهم

لتگول احبك عيب موش انت التگول العيب
وعيونك بعدني ازغير واستعجل عليه الشيب

بياض البالشعر موشيب هذا حكمك القاسي
لكاني بيوم اسولف بيك اجاني وچلب راسي

محد ماوگف وياي لاناسك ولاناسي

موشفت الوجه تعبان حسبالك كبر سني
تجاعيده وهموم البي منك اجي مو مني

اذا انت بسعاده تعيش تره انه القهر كاتلني

يمه يايمه يايمه اخ يايمه

حيدر.. الله عليك شني من صوت

علي..انت ماتطرب هيچ لو من فرحه لو من ضوجه گلي شخيرك

يحچون وبالي مو يمهم بالي يم هاي الي بطت مشيتها وعينها عليه من اول مادخلت الشارع وانه اغني وعيني منها اخرت مشيتها وظلت عينها عليه
هاي شبيها ماتنزل عينها مني هذي وحده من الثنين لو وكحه ومايهمها الناس لو فقيره وماتعرف اداري الوضع
ظليت عيني منها وصلت قريبه النه اشرت الها براسي
نزلت راسها ومشت حيل
هاي شبيها واني ليش مركز وياها يطبها طوب
بس عيب لو شافها احد يكول هاي البنيه مو راحه وهيه مامبيين عليها هيج
وجهه بريء بس صفناتها هواي

دخلت جوه كملت شغلي وبالي يمها معجبه بيه لو هيه هيج كل واحد ماتشيل عينها منه

يتبع..

البارت بدون مراجعه لأن واعدت نور وابرار وباقي البنان انزله قبل اثنعش وفيت بس جنكم على سحگات اقروها وغلسوو