رواية حكايتي مع النصيب الفصل الخامس عشر 15 - بقلم نور الشمس

تحن والليل يتغنه بحزن ونك
وتفز مرعوب ودموعك يغرگنك
المصيبه الحسبه ماتنگضي بچم اخخخ
والبگلبك بقن بس اليغثنك

_______________________

گعدت الصبح من وكت وگعدت علاوي حته نطلع للشغل

..علاوي اگعد يمعوود خل نروح عمار خابرني منتظرنه

..فتحت عيوني مستغرب بهاء زين انت يمعوود ارتاح اليوم

..گوم يخوي ماكو راحه راحتي بشغلي ..شفت علي رجع نام گوم لك شبيك أنت.. البارحه لشوكت باقي سهران

..شويه واگوم بهاء ماتخلينه نأجل الشغل اليوم

..علي اذا مابيك حيل ابقه نروح انه وعمار مااحب اكعد انه لو كعدت ابرد والرجال اعتمد عليه اكمل الشغل بعدين مابيه شي صرت احسن

..يلله گايم

طلع علي كدامي يغسل.. خالتي جانت كاعده شلت فراشي اريد ارتبه جاي اسفط بي فاتت خالتي

..عوفه يمه عوفه البنات يشيلنه ..شلونك اليوم

..الحمدلله خاله زين لايظل بالچ بسيطه

..الريوگ جاهز بين ماتغسلون اجيبه الكم

..خاله والله مااتريگ انه بس چاي اشرب لااتعبين روحج
..اليوم الخاطري اتريگ وانتبه على صحتك البارحه امك خابرتني وضايجه وتبجي عليك مانامت لمن طمنتها انت نمت يلله عافتني كل شويه متصله عليك انت هم اتحملها هيه مو قصدها هيه تگول كلشي اتمناه بي وظلت شهادته غصه بگلبي لأن ذكي واتعمد يترك الدراسه مو مجبور ولا مايستوعب

..اسمع خالتي واتنهدت هذا هوو خاله براحتها بعد شبيدي على روحي وشبيدي عليها صار هواي اريد ارضي الكل اريد اشوف روحي بعيونهم بس هسه لا مااهتم اهم شي راضي عن نفسي وامي براحتها بعد هاي قناعتها

ماحچت شي خالتي بس حسيتها ضايجه عليه وتريد تفهمني امي تحبني ادري بيها تحبني ماكو ام مااتحب ولدها بس يبقه احساسها اتجاهي يحرگ گلبي وروحي

شربنه چاي ع السريع وطلعنه

بديت بشغلي وانه ادعي كون الله يبرد گلبي ومااهتم
يعني انه شجابني البيت ابصفهم اشتغله انه اريد انسه

صارت ساعه تسعه الصبح اريد اگص السيراميك ولازم المولد تشتغل علي يخبط وعمار مايعرف يشكلها يشلع گلبي علما يشغل المولد ويشكل الكوسره
طبقت المثل اليگول تعب اقدامك ولااتعب السانك
اروح انه اشكلهن احسن
شغلت المولد ورفعت راسي اريد اخذ بلك الكوسره اشكله
طبگت سياره وطلع احمد ووراه بنيه دنكت كملت شغلي عرفتها هدى 
گلها صعدي.المحكمه هسه هوسه نلگاها
وسامر وراه طريق طويل
سمعتهم كملت شغلي ودخلت جوه مااهتميت بس ظل بالي مشغول وفضول بداخلي سامر منوو وهذا احمد بي شي مو طبيعي يمكن مريض يوم يعارك يوم يسلم
حاولت مااهتم
كملنه شغلنه بالليل رجعت هالمره للبيت لگيتهم كلهم گاعدين بالهول سلمت وطلعت صاحني صفاء كتله اريد اغسل  اخذت ملابسي ورحت اسبح بعدها نزلت جوه
دورت المطبخ شبي اكل مالگيت طلعت بيض فتحت الطباخ
وگليت بيض احسن شي اخدم روحي مااريد اي شي من احد لا امي ولاغيرها نورس مااصيحها امي تريدها تقرأ اروح اتأمر على لمياء هم عيب ومايحقلي اصلا امي واختي موجودات وانه مارايد منهن شي خو ماتخدمني هيه
طفيت الطباخ خليت الاكل بالصينيه وطلعت خبز وگعدت اكل جوعان وتأخرنه بالشغل العصر ودينه اكل من المطعم وانه من شفت هدى واخوها وهمه راجعين ومبينه فرحانه انسدت نفسي الأفكار تروح وتجي ابالي لو ادري ليش اهتم الها ختولي .. بس مامتوقع هيج عادي هدى تطلع وي رجال غيري وانه ماانقهر او قهر عادي مو شي كلش صعب
اكل والافكار هذي كلها تدور براسي اسأل نفسي واجاوب واحجي همومي واهون عليه علي هالأيام مو فارغلي تذكرت حيدر الله يرحمه جنت من اضوج اوديله رساله ومن يخابر اتصل الگاه انتظار شويه ويتصل هوه يگلي الخاطرك عفت الماعوفها
هسه عافني وعافها
دفعت الصينيه ماالي نفس اكل ولا اكدر ابلع لگمتي
دخلت امي للمطبخ عينها عليه وماحچت جنها هيه الزعلانه بگلبي گلت هاي فوكاها انتي الماراضيه
ضياء صاح بهاء وينك جاوبته هناا بالمطبخ
طلعت باكيتي ودخنت
سلم عليه وگمتله باوسته عينه على صينيتي
گال هاي شتاكل ومنوو سوالك

..مااشتهي انه سويت عبالي اكل بس ماردت

..صحت لمياء هاي ليش بهاء مسوي الروحه اكل ليش ماحاسبين حسابه شوفي شيريد وسويله

لمياء..ياا هاي ليش بهاء غير تگول شتريد اسويلك شنو اني شعليه وتزعل عليه غير انت اخوي واكثر من مره گايلتلك شتريد انه موجوده

..ماتقصرين ام نور انه اشتهيت اسوي

..لمياء..ضيقت عينها وضحكت اشتهيت موو أگول مامخلي بيها شي ماجنها باقيه نفسها ..بعدين انت عوف هذا اللقب مال ام نور هوه وينه بعدين حته لو اجه وره سالفتك ذيج عن الاسم ومغامرات اخوك قبل مااسمي لو اموت

..ضحكت والله من كملت ماردتها بالاول اشتهيتها بس هسه مااشتهي ..بعدين الأسم بيش غاثچ هسه ضياء يمچ والج

ضياء..هههههههه ولك انت لو تتركني بحالي وتعوف الزن براس لمياء الله يرضا عليك وتدخل الجنه

..ههههههههه وشلونك انت عاد وادخل الجنه من وراك
بعدين ياظالم حقها تنقهر من هيه زغيره وهيه يمك وتفتر وراك وين ماتروح وانت محتار بنور وساره

لمياء ..هلا هلا ساره منوو انوب سهله ضياء صدك هيچ انت. عفته ورحت للغرفه

ضياء..بربك ماتجوز مني انت من تجوز مني والله هم ذولاك الناس يرحمونك ومايحچون

..هههههههه صحت لمياء تعاي يمعوده احس بالذنب اليوم اذا ضياء بات بره الخاطري فوتي

ضياء..عود حليتها هسه ههههه
گعدت يمه بهاء شلون صرت

..شتشوف انت

..انه اشوفك سبع ومايأثر بيك شي

..مابيه شي گدامك مثل الصل ماعليه تنهدت لازم دريت

..اي سمعت بيها عاقده

..علي گلكم

..لا نورس سمعتها حچت الأمي ولمياء

..وهيه منين درت وهمه معطلين شنوو تتواصل وياها

..والله ماادري خاف صديقاتها گاللها

.. ماادري بس ع اساس جهازها مغلق اشوي افتهم منها خاف احاچيها هسه امك تعتبرني خطر على مستقبلها احسن شي انه وياكم نتزاعل حته الوالده ترضا بعد تعرف اهم شي رضاها

..شلك بهاي انت ماتعرف امي

..هوه لأن اعرفها جاي احجيلك ..شفت امي اباب غرفتها تعمدت احچي حته تسمع
من حچيت اجت هيه سويت روحي مامنتبه
كمل ضياء حجيه گلي اي وانت البارحه ضغطك معلگ وعلاء كل شويه يخابر يوصي عليك وكل شويه معاتب امي عباله بسببها طلع الي ابالك غير شي

..لا والله مو منها الي صعدن ضغطي هواي مو سبب واحد بس اكثرهن من رجعت وسمعت امي تحچي عليه وتگول الوحيد المارفع راسي وتعرفني مرت علاء ماتعرفني زين وانه استحي منها ومامتخالطين بيناتنه عيب هيج دوم ترخص بيه مو زغير انه
واذا ابالك على عقدها تره والله مو ذاك القهر عادي عندي حته لو مامخطوبه واهلها هم يرضون انه مااخطبها البيناتنه انتهى من البدايه انه غلطت اعتبرها غلطه وانتهت

..شفت امي واكفه بالباب تسمع ومبينه مقهوره حقك والله مااكدر الومك بس انت تعرف هيه تعبت علينه ومن حقها تشوف تعبها يعني علمودك

..مقدر تعبها وعلى راسي امي حاس بقيمتها وعندي تسوه الدنيا امنيتي مثل مااشوفها تشوفني امنيتي يوم تگول ابني افتخر بي هاي امنيتي يمكن صعبه عليها بس مو صعبه عندي من اشوف امي تسوه الف دكتوره مامهتمه بولدها وعائلتها مثل مااشوفها تسوه الف متعلمه هامله عائلتها وماتتعب عليهم انه عندي امي تسوه كلشي درت عليها هاي هيه يمك
وتسمعني قبل سنين اول ماكبرت وصرت اعتمد على روحي ومو عامل عادي وصار دخلي خير من الله من اجيتها وگتلها يمه من اليوم تبطلين بعد ماتخبزين جنتو انتو ادرسون وتردون مصرف ملازم واكل وكلكم اقسام وبغير محافظات يجيكم اكلكم ومصرفكم جاهز جانت كوه ادبرهن وانه اساعدهه ..بده يعله صوتي انفعلت وانه احجي من تذكرت ..من شفت شغلي قوي اجيتها وگتلها بطلي من اليوم بعد ماتخبزين اول حچايه منها گالت كبرت وصرت تستنكف مني شلون اعوف شغلي واخوانك يدرسون درت عليها تذكرين شجاوبتج لو نسيتي گتلج يوميتي من ايدي الأيدج منا لمن يكملون وگمت عليج بست كل جويه بيدج بوكتها گتلج مامستنكف منج وذني جوياتج وسام الي امي تعبتي علينه وكبرتينه بالحلال وعمري مااستنكف منج بس ردتج ترتاحين تزورين تعمرين من اليوم بعد ماكو تعب والگلته من گلبي والدليل العقدت البارحه وعبالكم ضايج عليها اخوها بنفسه اجه وراد يساعدني ومتأكد لو الح عليهم اكثر من مره ينطونها تدرون ليش عفتها حجايه وحده گالت
ليش ماگتلي امك خبازه جا متعلقت بيك لان ادري اهلي ماينطون من هذا اليوم گتلها البيني وبينج انتهى الي تشوف نفسها اعلى من امي التعبت علينه ماتصير الي مره
كل هذا وامي تشوفني مارافع راسها
ماادري جايج يوم اطوطح بتالي الليل سكران
جبتلج حجايه تفاشلتي وغريب وي قريب من وراي كلهن ماسويتهن بعد لشوكت اظل زغير بعينج
مليت وانه اريد ارضيج وارضي الكل مليت وانه عايش الغيري مليت وانه احس روحي شمعه اضوي الغيري واحترگ
كافي عاد كرهت روحي والله اختنگت ومن اليوم هذا بعد مااهتم الاي حچايه مادام طلعت البگلبي وانه راضي عن نفسي بعد مااهتم 

ضياء..بهاء على كيفك شبيك انت.. حاجتني امي
عوفه خليه خليه يطلع البگلبه كلهن الگلتهن حافظتهن واعترف لو ماانت انه الهسه اخبز بس تشوفه عليه هواي السويته بي منيه على امك يصير تعيرني بوكفاتك وياي انه امك والسويته واجب عليك ماتنشكر عليه واذا على حچيي متمنيتلك الزين يمه بالعافيه عليك فلوسك من اليوم لاتصرف شي مادام صار بيها عار عوفنه محد يموت من الجوع

..درت على ضياء ابتسمت بقهر سمعت تسمع حجيها ماكو فايده والله هذا الموال ماينتهي لمن الله ياخذ روحي يلله ارتاح
اخذت جگايري وطلعت سمعت ضياء وامي تعاركوو
وصوت صار عااي صفاء نزل يضيح شكوو جاوبته بنتر وخر عني انت
صارت بوجهي نورس طالعه من غرفتي
مااهتميت الها فتت للغرفه وقفلت الباب صاير نار
وانه ليش مهتم ع اساس بعد ماكو حجايه تأثر عليه ومااهتم الاحد
بس مو بيدي والله قهر الظلم مو حلوو وخاصتا من الأهل
طلعت تليفوني اسمع فتحت اليوتيوب بعد المقاطع مامحمله اجاني اتصال من رقم غريب مالي خلگ اجاوب اكيد على شغل تركته من انگطع الاتصال رحعت حملت مقطع اتصل من جديد انه اريد اسمع حته ارتاح وكل شويه متصلين كلت اجاوب اخلص
جاوبت

..الووو

..بهاء شلونك

..صوتها عرفته بس م نفس ذيج اللهفه بيه من جنت اگلها يبعد العمر انتي..تنهدت شرايده ليش متصله

..ادري بيك تدري بيه عقدت

..وتردين اتباركلج هسه تدللين الف مبروك والله يسعدكم

..الله يباركلك يعني مو ضايج عادي عندك

..الله يسعدج هدى..فتحت الجگاره اخذتلي نفس  ليش مخابره هسه انتي شنو تردين تشوفيني بياساعه مقرر انتحر علمودج بربج هدى اطلعي من راسي تره عندي هموم تشييب الراس وانتي اخر همي

..يعني مامهتم اصلا انه غبيه وحبيتك شعرفت منك غير صوتك كلكم هيج انتو الشباب ولابيكم واحد وفي  عود ماوصيك هم اعرفلك بنيه وگلها احبج وانت ماتعرف الحب اصلا

..ضحكت بصوت عالي هوه انتي غبيه غبيه هاي منتهين منها لو ماغبيه جان ماشفتي نفسج عليه لأن امي خبازه طلعتي كل همج المضاهر وهذا قياس الاغبياء ..اما سالفة الشباب احنه مانوفي ع اساس مخابرج انه ابلغج بعقدي هوه منو العاقد انه لو انتي تعرفين انه اشك بيكم شي انتو مرضا يمكن اخوج يوم يتعارك ويوم يسلم وانتي هسه جاي تسولفين بعقدج وتسولفين ع الوفه والشباب مايوفون اكو خلل تره هاي بس انتو هيج لو وراثه عدكم بالعائله

..تعرف شي شگد تحملت بسط علمودك وشكد انهنت بس لو ادري بيك هيچ جان من البدايه ماشفتك ولاحبيتك

..والله هاي امنيتي هم لو ماشايفج ولاحابج من البدايه بس گليلي التزوجتي امه وزيره لو شنوو ..جنت مقهور تصنعت البرود بس حته اقهرها

..تعرفه كلش زين الي تزوجته

..منين اعرفه ع العموم مايهمني وهسه روحي وبعد لاتخابرين صرتي بذمة رجال وهم انتبهي خو مابعدج تتصفنين

..حرامات والله همزين الله خلصني وماتورطت طلعت مو حابني ولا انه ابالك انه المفروض اعرفك من اوصيلك تخلصني ويكلولي كلناله ومااهتم تعرف الحد العقد البارحه عيني ع الباب عبالي تسوي شي علمودي ماراح اتصل بعد بس اكلك حرامات ضنوني بيك طلع الحجي صح

..اوگفي لاتسدي موصيه منوو انتي ومنو كلج مامهتم فهميني بعدين ياحجي
كطعت الاتصال رجعت اتصل من جديد مغلق
حاولت اكثر من مره مغلق
يابه ختولي هسه انه على شنو مهتم يطبها مرض جايه تذب اللوم عليه هوه منو الباع كلش كافي استنكفت مني كافي عليه عمر بعين امي زغير اروح اتزوج وحده هم مو بعينها انه ولاعين اهلها شني مكتوب عليه هالقهر
شمرت الجهاز اريد انام مااكدر اجتني رساله من ياسمين

..شلونك بهاء شلون صرت اليوم

رديتلها

..من الله بخير

..ومن عباد الله

..ههههه عباد الله مطيحين حظي حشاچ ..عوفچ مني وعدتيني تحچيلي البارحه ووعد باجر احجيلج المضوجني

..حشاك الله يكفيك شرهم وينطيك خيرهم ..
اني سالفتي طويله مو مال كتابه

خابرتها

..الوو
..هلا شلونج ولو ادري بيج زينه اختصري ودخلي بصلب الموضوع

..ضحكت شبيك مستعجل على كيفك انت سألتني شعجب خلوج ترحين يم بيت عمي وانه اجاوبك هذي الحيه مرت ابوي من سمعت بيك محاجي ابوي وكايله اترك سالفة الزواج تخبلت ظلت تغلط وتصييح عليه وتصيحلي المخبله بشنو شايفه روحج على اخوي لاول مره ابوي يتعارك وياها ويضربها حته اني تفاجأت.. الوو انت وياي

..وياج بس جاي ادخن اريد اسمع كملي

..اي هيه من ضربها لمت ملابسها وملابس خواتي وكالت بعد ماابقه ابقو انت وبنتك وولدك ماقبل تطلع  گالتله لو انه لو بنتك بالبيت

..اي

..اي وقرر ابوي اروح يم عمامي وتبقه هيه

..والله صدگ تحجين

..اي والله

..يعني عمي الخاطرها طلعج

..هذا الصار

..وهسه انتي مرتاحه محتاجه شي

..الحمدلله هنا احسن بهواي تعرف كلش كافي اتذكر حيدر بكل مكان عايشه واتخيله وياي نزلت دمعتي وانخنك صوتي ..يمكن انه صدگ راح اتخبل بهاء انت هم تحس بي مييت يعني مصدگ شو اشوفه بكل مكان يوميه احلم بي راح يصير سنه وانه مااصدگ مييت شلون اكدر اصدك هوه مييت

..جريت حسره ..مو سهل فراگه انتي الله يساعدچ شوفي تدرين الگبل نص ساعه تمنيته موجود بيه تعب وهموم جانن بوجوده خفاف نفس المشاكل صايره وياي وهوه عايش جنت من احجيله ارتاح مابيدنه شي الله يرحمه

..هيه هاي الكلمه بالذات من اسمعها عليه يغييم گلبي الهسه احس من اكول الله يرحمه جني افاول عليه ماجنه هوه مييت اشوف الكل مقتنع بموته ليش ماجاي اقتنع انه

..بعدج مامستوعبه الله يكون بعونج ياسمين ..ع العموم انه ماناسي الزياره هذا الخميس انروح انشاء الله ان وانتي وعمامي بس لغينه الروحه الجماعيه

..ها ليش

..هيج احسن
اگلج شي قبل شويه خابرتني

..منوو هدى ؟

..اي اكو غيرها بلوه

..ها شتريد مو عقدت هيه

..مخابره تكلي الولد مابيكم وفي وصوجي حبيتك بس گالتلي بالأخير حجي مافهمته هم تعرفين شي عنه او سامعه من البنات انتوو مو سوه

..شنوو الحجي تعرف انه من زمان انگطعت منهن من تركت الدوام ليش ماسألت نورس

..اسالها بعدين او مراح اسأل اصلا مو هامني عادي

..شكالت هيه

..مااعرف تگول وصيتلك وكالو مامهتم وحرامات حبيتك وحجي مافهمت منه بس تريد تذب الصوج بيه وفعلا هيه حته لو موصيتلي مادام قللت من قيمتي بعد ماافكر بيها خلص

..اذا مو مهتم هذا هوو الله يسعدها ليش تفكر بيها انساها الله يعوضك الاحسن ان شاءالله تستاهل وحده تقدرك انت

..الله يخليج اشكرج  ..عمي وعمتي زينين محتاجين شي امرلكم باجر

..سلامتك باجر تعال شوفهم الظاهر همه يشوفون حيدر بيك ..اليوم مشتاقيلك وعمتي كالت لو بيه حيل انه اروح اشوفه

..الله كريم باجر اجيهم انه هم مشتاقلهم والله

..بهاء الله عليك ارسل الي المقاطع العندك اله اريد اشوفهن

..شلج بيهن اتعبين نامي احسن

..لا فدوه بغلاته عندك صار شكد اريدهن منك ومتردده اطلبك جنت اخجل بس هسه احنه بحكم اخوه واصدقاء طلبتك

..ارسلهن عادي بس تتأذين صدگي يوميه مشلوع گلبي بيهن

..عادي ماكو اذيه اكثر من البيه

..شويه ويجنج انتبهي على نفسج

..مع السلامه

..الله وياج

سديت الخط ورحت اشوفهن وارسلهن الها
اكو مقطع ذكرني جانت هيه زعلانه عليه وطلب مني اغنيه سامحيني هوه حيل يحبها وگال هذا وكتها وانه اغني يگلي لو تنطيني صوتك نص ساعه بس اغنيلها وارضيها بوكتها شايفها مطلعه راسها من الباب تصيح وره خواتها واكو ولد بشارعهم هوه ضايج وغالط عليها
وهيه زعلانه عليه وبالليل يريد يرضيها
من لح اغنيله گتله عوفها وهيه ترضا
جان علي يصورنه بجهازي
يگلي وانت مصدك اعوفها اكدر انام وهيه زعلانه
انه لو شفته تنزل دمعتي لو وصلها شيصير بيها
هذا المقطع عفته مارسلته ودزيت الباقيات
رجعت افكر بحجي هدى وارجع اكول مايهمني ماكوالا اسأل نورس وافهم الصار
نمت وانه ابالي الف سؤال يدور

يتبع ..