رواية حكايتي مع النصيب الفصل الثالث 3 - بقلم نور الشمس

هيه هيچ على كل واحد تصفن لو عاجبها صوتي زين ليش هيج تصفن من تشوفني المفروض تنزل عينها
اطرد الأفكار من بالي وارجع افكر بيها لگيت نفسي سارح بملامحها طولها متوسط سمره بس شكلها يجذب
هالمره اني انتظرها اريد اشوفها اكو فضول بداخلي اريد اركز بملامحها
خلص الشغل ورجعنه للبيت مثل كل مره
اغسل واتغده واخلي مرطب الأيديه ورجليه قبل ماانام لأن السمنت يخشن الأيد وياكل جلدها طبعي حيل اهتم بنفسي ومضهري ويوميه بعد ماانام ساعتين اگعد ابدل واطلع وي جماعتي الي همه ولد عمي واصدقائي من نفس المنطقه لو نگعد بگهوه لو نروح ع الشط نگضيها ضحك وسوالف صادق يقرالنه شعر
ومرات بعد مايتحايلون عليه اغنيلهم
صوتي كلش حلوو بشهادة الكل واني مو الوحيد بالعائله عدنه ضياء صوته هم حلوو
وامي هم بس مسامعين صوت امي بس بالحزن لو ذكرت ابوي واهلها
بالليل خابروني الولد بدلت وطلعت بيومها الجوو كاسر حلوو لاحار ولا بارد رادوو الگعده ع الشط
رحتلهم لگيتهم گاعدين ع الثييل ومعمرين النراگيل
اني اشرب بس جگاير ونوع واحد مااگدر ابدله

هلا بالشباب
..هلا بهاء ليش تأخرت
..گعدت متأخر بين مابدلت وحضرت نفسي واجيت شلونكم
..بخير اذا انت بخير ..متانينك تسمعنه
..لا اليوم اني اريد اسمع منك صادق غير يوم اعوضكم
صادق ..تدلل بس خل تكمل الگعده
..باوعت شو لاحيدر لا علاوي ذولي وين ..شني الجماعه وين
..ماادري خابرناهم گالوو جايين شو صار ساعه وهمه ماكوو
..طلعت تليفوني واتصلت

..حيدر وينكم

..جايين تأخرنه بشغله

..خو ماكو شي

..لا يظل بالك ماكوو شي ..شغله عدنه ونريد نگضيها

..مگضيه ان شاءالله ..اذا ماتگدرون براحتكم لاتجون ولاتنسون شغلنه باچر مانروح النفس البيت نطلع للبيت الورانه

..لو نكمل البيت اللازمينه مو احسن

..ابو البيت مامتوازي عليه گال براحتكم وهذا ابو البيت الورانه مستعجل يريد يعرس گبل محرم

..الله يسهله هذا هوو مثل ماتريد

كملنه سهرتنه بين ضحك وشقه ونسمع شعر
اجواء حلوه نستني كلشي حته روحي ..
رجعت للبيت كملت السهره وي الولد امي والبنات نايمات صفاء يگل الضياء لحگ فوت الغرفتك لاتصير بثنعش وينقفل الباب عليك اني رديت عليه شني موعد سندرلا شتقصد بهاي ظلينه نضحك وهوه يضحك اخر شي گال هاي من قهركم اني هم تايه راي وگاعد يمكم اگوم اشوف خيري احسن
ضحكنه عفتهم وصعدت خليت راسي ع المخده واجت البنيه ابالي لو اعرف اسمها
وانه شعليه بس ليش افكر بيها
هالاسبوع ماراح اشوفها اكمل شغلي بهالبيت وعود ارجع لهناك وهالمره انه اريد اصفن عليها اريد اشوف شني البيها يجذب شو تعجبني رغم تصرفها مو بالعه
ماادري شوكت نمت گعدتني امي مثل كل يوم لأن متأخر بالسهره
طلعت الشغلي وبديت اطبگ
وبين ضحك وشقه وجرة موال يخلص وكتنه
خلص الشغل طلعنه بطلعة المدارس لمحت نونه من بعيد وظليت عيني منها
هالبنيه مو بس اخت روحي من الدنيا
شافتني ابتسمت الي وگفت انتظرها

..هلا نونه

..هلا حبيبي بهاء شلونك هاي اليوم شجابك على طريقي

..شغلي قريب المدرستچ وصادفت طالع

..تعال تعال لاتمشي كدامي بمسافه قرب عليه خلي اتباها بيك باچر يسألوني الحلوو وياج منين

...هههههه ياحلوو بس لا انه فوگ ملاحي الأصلي ملاح الأسمنت وملابسي ولفة الغتره ذني الي تتباهين بيهن

..ياااا غير تخبل انت ماشايف روحك عسل وربك عسل

..امشي امشي خاينه شو عفتي صاحبتچ واجيتي

..غير هيه مگيوله من لگه احبابه نسه اصحابه وانت احبابي كلهم

..ويلي ويلي وره هالحچي عندج طلب لو منج ال الله

..لاوالله موخوش تشك بنواياي طبعا محبه مو اكثر

..ديلله وصلنه

..انت شو اليوم متأخر شعجب

..مو ماخذين الشغل قطعي والولد مستعجل على بيته
..الله يوفقك ويعينك

..بعد اخوج انتي ويحفظج الي ..سوي غدانه سوه

..تدلل

هدى ..

طلعت الصبح للدوام عيني ع البيت اليمنه ويلي فارغ مامبيين جايين بس لا بعد مااشوفه ابو صوت الحلوو
رحت للدوام وحجيت الصديقتي على صوته وصفنتي
طلعت من الدوام بطلعتي شفته يمه احس اطرافي جمدن هوه لو لا
زين هذي نورس شيصيرلها هوه اووف ياربي بس لاخطيبها واني ليش گلبي تعلگ بي
وصلت البيت واني مو مركزه ولا اعرف شلون رجليه اخذتني
احس نار بگلبي كل مااتذكر نورس وابتسامته الها
يربي يخبل طول بعرض ملامحه بعد احلى لحيه خفيفه عيون كحيله سماره يخبل حنطي مايا للسمار
اني ليش اركز وياه وليش انسه كل مبادئي وانسه العيب والحرام اووف هم حرام عليه النظر شمسويه هوه بس اشوفه
ماكو شي يشيله من بالي بس اللحظه الي اذكر بيها احمد اخوي ويلي لو يدري بأفكار اخته
ظل كل فكري يمه وشجابه من يم المدرسه ونورس شتصير اله الي اعرفه هيه مامخطوبه بس يجوز اقاربها معقوله اخوها
لازم اعرف عنه شي
طلعت كعدت وي اهلي احمد چان يحچي انو اهل صديقه يريدون يشيلون قريب علينه ومتفاجأ اليوم لمن عارف البيت الهم
اني من اسخافه البيه راسا خليت خشمي وياهم گتله اي هوه هذا البيت الي بي عمال يطبكون سيراميك الهم
گال اي هوه
گتله اي اكو عامل بيهم يغني صوته يخبل
خزرني بعينه واني من خزرني يلله صحيت على نفسي
جاوبته واني امتمت واگطع بالحچي عبالط الساني انعگد گتله اي مو هوه من اطلع دايما يغني اگول منين هذا الصوت بعدين عرفت منهم
سكت ماعقب على كلامي
واني اطرافي بردن من الخوف شگد فاهيه ورعنه خرب بليسي شلي علاقه اني وهاي امي ناهيتني ادخل بحچي ابوي واخواني بس شسةي للساني
گمت منهم ورحت هناك الغرفتنه لو تجي سرى ادري شنو اتبنتها خالتي
هيه هم حظوظ هاي لو اتي جان احمد كال شكو باقيه وخل تجي ولو هيه خالتي ماعدها ولد بس بنات وابنها مسافر يجيهم بالسنه حسنه
لزمت كتابي واقره وكل شويه الگي نفسي اغني سامحيني
الله شيصير لو الي اتزوجه عنده هيج صوت ومن ازعل عليه يرضيني بهالأغنيه
غير اسامحه من صمصوم گلبي
هزست راسي ابعد افكاري واضحك على خبالي كملت قرايه ونمت واني افكر لازم اعرف شنو علاقة نورس بي
اني ونورس نفس الصف حبابه بس علاقتي بيها مو كلش قويه يعني مو مال اني اروح اسألها نورس صح حبابه بس اهلها مدلليها كلش واني مرات احسها مغروره لذلك مااختلط بيها
داومت ثاني يوم وماكو غير هالفكره ابالي

_______________________

بهاء..

مخلص وكتي بين البيت والشغل والطلعه ومن ارجع هم احب اگعد وي اهلي وخاصتا اخواني حلوه جمعتنه ضحك وشقه وسوالف ماتخلص
مرات امي هم تكعد ويانه تونسنه بحچيها الحمدلله مرتاح وعيشتنه حلوه ماكو شي ينغص عليه غير امي من تحسسني بتقصيري واني اشوف نفسي مابيه قصور ماكو شخص كامل صح بس مابيه ذاك العيب الي يخليها تخجل مني وهم انسه بسرعه يومين اضوج وتروح الضوجه وارجع وياها طبيعي
مرن يومين واني بعدني مامكمل البيت رغم هواي جاي اضغط على نفسي حته اخلصه مااعرف الخاطر ابو البيت جي مستعجل لو الخاطر روحي احس التفكير دمرني كل مااصفن تجي ابالي البنيه اكو شي بداخلي مااعرف شني بس هالمره اذا بقت واگفه وعينها عليه احاجيها واريد اعرف هيه هيج عادي عدها لو بيه شي يجذبها ارجع واكول اني ليش مهتم شايف بنات هواي بس ماكو وحده خلتني افكر بيها هالگد
الي تسوي عدنه عيب وبناتنه ماتسوي وكل هذا واني ماكارهه ولا ابالي اجه انو هيه البنيه خفيفه ولازم استغلها لا دائما ابالي ابررلها انو هيه مو قصدها او ماتعرف بيها شي يعكس برائتهه
رجعت من الشغل غسلت وطلعت مخلي الخاولي على متني وشعري منكوش تعبان وعيوني گوه فاتحهن
هالمره حته غده مااريد اريد بس اوصل فراشي
حاجتني لمياء

..بهاء اسويلك غده

.مشكوره اك نور مااشتهي تعبان

نورس..هاي شنوو شو ام نور

..ضحكت هوه كل ضياء ابو نور لقبه وهيه ام نور لمياء ثگيل شو ماارتاحله اسمها

لمياء..ههههه لمياء ثكيل عندك وام نور خفيف يعني

..اي والله خفيف ههههه

نورس..صدگ باهي عندي وياك موضوع رفعتله حاجبي

..خير ان شاءالله يخص شنوو

..يخصك انت والمعجبات

..احچي عدل اني منيلي معجبات وهالسوالف مو يمي وعيب تسولفين بيها وياي مو تشوفيني اشاقه وياج لهنا نختلف

..على كيفك شدعوه هيج رزلتني والله اليوم وحده بصفي سألت عليك ورادت تعرف اتي شنو اقربلك بالبدايه ضاجت عبالها خطيبي لو تريد تخطبني من عرفت انت اخوي حيل فرحت وطلبت معلومات اكثر عنك مو مني طلبت المعلومات من صديقتي بس اني سألتني عليك

..نشفت شعري وضحكت وهاي منين بعد عادي انطيها رقمي وگليلها اني بأنتظارها

..ياا ياا واني اكول انت العاقل لا والله البنيه مؤدبه مو مال هيج سوالف صح سألت عليك بس هيه حبابه اعرفها يعني لتحاول بس عجبتها اعجاب

..واني شحصل من الاعجاب اروح انام احسن

ثاني يوم رحت للشغل وچان اخر يوم الي بهاللبيت كملته
الضهر خلصن جكايري والولد يشتغلون گتلهم اجيبلي جگاير واجي
طلعت وشكلي مخربط من الشغل والتطبيگ
جاي اعبر الشارع اروح اشتري لاگتني البنيه وگفت اباوع الها وهيه من شافتني اباوع نزلت عينها مااعرف لييش بقيت مركز بيها رجعت تباوعلي حاچيتها من قربت عليه

..انتي دوم هيچ تباوعين براحتج وعيونج ماتنزل

..تبنجت من سمعته حاجاني باوعتله واشرتله براسي بمعنى لا

..چا ليش هيچ نزلي عينچ بنت الناس اليشوفچ يگول مو راحه

..من سمعته مشيت بسرعه وعيوني دمعت صدگ اني شبيه حلوه هسه من اخذ نظره عليه

بيومها اني شارد بالي ولادرس انتبهت عليه وصديقاتي عرفني ضايجه بس ماحچيت شي
ودي احاجي نورس واكلها اعتذريلي من اخوج اني مو هيج بس ماادري لوشفته شيجيني بس ماعندي شجاعه احچي هيج

رجعت للبيت واني كارهه نفسي بيومها حته غده مااتغديت تحججت منشوله ومالي خلگ
اجت امي انطتني علاج وتقنع بيه اكل ماردت
العصر احمد وامجد سألو عليه واجو شافوني بطبيعتي مااتمرض قليل كلش وحته من اتمرض مااعزل نفسي احب وياهم اتواجد
چانو مستغربين البيه بس بقيت امثل عليهم المرض
ابوي كلي خل امج تاخذج للطبيب ورفضت ثاني يوم ماداومت
وراها اجن جمعه وسبت عطله بالأحد داومت شكد كرهت نفسي وعاقبتها وقررت مااعيدها
أول ماشفت الباب مفتوح ومقابيله خبطه گلبي دگ
احس شي مو بيدي يجبرني اباوعله وامتع عيني بشوفته
مشيت وعيني ع الباب بلكي المج منه ولو شي بسيط

امشي وعيني مركزه للباب ودي اشيل الحواجز واشوف طوله
فززني صوت
..يمعوده كبالج طابوگه لتعثرج ركبتج انكسرت
باوعت هذا هوه يحجي وجكارته بحلكه تنحرك وي شفايفه وشايل بأيده مكينه اعتقد ينگص بيها السيراميك
ماكو شي يشرح احساسي بوكتها مامو شي اصعب من واحد يحس نفسه رخيص وهوه الي مرخص نفسه
بقيت واگفه وعيوني تدمع هوه عافني يريد يدخل
حجيت بصوت منين اجتني الجراه مااعرف

..تره اني مو هيج والله مو رخيصه اني ولا مامربايه

يتبع ...
البارت بدون مراجعه