رواية حكايتي مع النصيب الفصل الثاني عشر 12 - بقلم نور الشمس

رجعت ذاكرتي وي هدى جريت حسره اخ ياگلبي شتتحمل خذل الحبيب الك وموته بگلبگ وانت تحاول تكرهه بس مو گادر ولا گادر تتقبله بحياتك بعد
لو تتحمل فراگ الصديق الي طغى على كل جروحي والامي اه ياصاحبي اه  وجع فرگاك اقوى الأوجاع
جريت حسره وانه اتذكر كلام امجد
البنيه راح تموت منو يموتها وشمسويه هيه لحظات وان افكر احس گلبي مثل جناح الطير رفرف على طاريها والخوف سيطر عليه  اووف ياهدى گتلج عينيني وصيري وياي تحملي بس اني تخليتي عني وماتستاهلين حته التفكير بيچ
اريد انساج وانسى كلشي يتعلق بيچ اريد طريقه تمووت گلبي كون مايتأثر بطاريج ولا يحن الذيج اللحظات الي شفتچ بيها
حته لو مانسيت اتناسه وهالگلب مثل مادگلچ اجبره يدگ الغيرچ وينساج وينسه كلشي
تذكرت حيدر بعد شكم يوم الأربعينه ياهدى ياحب الي شاغلني
رحت الأمي اسألها شنو لازم نجهز وهنه شني يحتاجن
الي  قاهرني الفلوس الي انطيتهن العرسه انصرفن بفاتحته نار وبصدري تلهب صارت الجگاره ماتفارگني والأكل گطعته وأكضي ليلي گاعد اتذكر لو اسمع قصائد واشعار كل ضني تريحني بس هيه تزيد اوجاعي وبالنهار اطلع احاول اشغل نفسي يجيني علاوي يشكيلي واشكيله مرورة فگده ..مر اكثر من شهر عبالك دهر
بقيت ابات ابيت عمي  بالليل والنهار ارجع الأهلي
صار يوم الأربعين وطلعنه الفجر سيارتين كبار سيارتنه بيها اني واخواني وامي ومرت عمي وعمي وياسمين وحوراء ولمياء 
والسياره الثانيه بيها بيت عمي ابو اكرم وولد عمي ابو حازم وبناتهم واقاربنه هاي عاداتنه بالأربعين هواي ناخذ من اقاربنه
هذا اليوم تجدد كلشي بذاكرتي من اول شبابي وهوه جان طفل الحد اخر يوم من بسته بالمغيسل وصلنه وزرنه وتعبنه كلش صار العصر ردنه نرجع كلها صعدت واكتفت حته عمتي ام حيدر لأن تخربطت شلتاها وخليناها بالسياره بس ياسمين كلهن حاجنها وهيه متريد تگوم اخر شي عمي ابو اكرم صار اعصاب وگام يصييح عليها وهيه مو مهتمه
حاچتها لمياء
..ياسمين كومي حبيبه گومي شني الفايده لو بقيتي للصبح قابل يطلعلج يحاجيج كافي جاي تأذيه هيج ينشلع گلبه عليچ
تحاجيها لمياء وهيه تزيد بچيها
چنت اسمع واحس روحي تلوب اتخيل حيدر لو سمعها لو شافها بهالحال شنو موقفه هوه من يزعلولهم عصريه يظل يلوب مايرتاح الا يصالحها
بهالموقف كسرت خاطري حيل وحسيتها اكثر وحده متأذيه وهيه الخسرانه حته اكثر من عمي وعمتي صح ماكو الم اكثر من الم ام على فقد ابنها بس المثل ياسمين شخص تحسه املها الوحيد وعت ع الدنيا وهوه يحبها وهيه تحبه وهمه الاثنين البعض
كلش صعب بليله ويوم تفاركه وتنتهي احلامها
صوت عمي شتت بالي وعاني من تفكيري شفت دموعي نازله مسحتهم بطرف ايدي وعيني على عمي الي اجه متوجه الها بعصبيه رافع ايده يريد يضربها
لزمه ضياء وهوه يهدي رحتله عمي گول ياالله
خطيه ياعمي مو قليل البيها جاوبني بعصبيه

..ختولي هالكلبه خجلتني گدام اهلنه والسواق الغرب معطليهم والله ست ياسمين ماشبعانه زياره شدعوه هيج احن من امه هيه لو احن من ابوه
جاوبه ضياء
..عمي لاتلومها ياسمين هم الله يساعدها مو شويه الهيه بي حاول تتحملها هالفتره
چنت اسمعهم وعيني عليها مو مهتمه اصلا ولاچن احد محاچيها
عبالك بعالم وحدها مدنگه ع القبر وتبچي بحرگه ولادارت على ابوها لو علينه
عمي گال مو هيچ والله مو هيج هسه لو متزوجها ومخلفه منه هم ترحم نفسها وترحمنه خبلتنه لاليلنه ليل ولا نهارنه نهار تبچي اربع وعشرين ساعه حته اخوانها ملوها البيت صار يخنگ كلنه متأذين عليه تعرفني شكد احبه ومتأذي عليه بس الي جاي تسوي مو معقول مو معقول ابد
چان مقهور ويحچي گتله عمي عيب من عمي ابو حيدر ومن عمتي لايسمعون حقها يعني شتريد منها تنسه هيج بسرعه

..مو تنسه بس تتحمل تصبر وراها مشوار طويل وبعدهي طفله مراح تبقه هيج العمر كله

..من جاوبني هيج عرفت قصد عمي ..گتله ميخالف بس هذا مو وكته انطوها مجال تستوعب ياعمي انه رجال ومامتحمل افراگه وهوه صديق واخ الي هيه هم الله يساعدها مو زين منها يعني الأثنين زواجهم الجمعه يستشهد عوفها عمي ربع ساعه ونگومها انه احاچيها بس لاتقهرها مو ناقصه هيه ولا هوه يرضا عنك هيچ تعرفه شلون روحه بيها وتدري شكد يحبها لاتأذيها وهيه يمه
دنگ عمي ومسح عينه بطرف ايده عرفته مقهور عليها بس مرات واحد مايعرف يتصرف او يحجون يمه اشخاص يغيرون فكرته ويملون گلبه وهذا الصار وياه اكيد مرته حاجيه يمه لأن يگول اخوانها ملوو والبيت كئابه عمي شمعرفه وهوه يطلع الصبح يجي بالليل
ضياء حاول يشغل عمي ولمياء تحاجيها حته تكوم هيه ونورس انوب امي نزلت تنعي الها والبنيه ملخت روحها صحت عليها يمه فدوه اروحلج وكتج هذا مو صعدتي انتي شنزلج نحاول نقنعها وانتي تزيدينها

..يمه فطرت گلبي ماكدرت اظل اكعد وانه اشوفكم تتحايلون عليها وماتكوم صحتها يمه ياسمينه گومي لاتغرب الدنيا مو زينه المگبره المغرب

..شفتها رفعت راسها وتترجاهم يبقونها بس تعرف هالشي مستحيل باوعتلي گتلها والله تأذينه هيج كافي ياسمين گومي

..بس وين اشوفه بعد محد يجيبني والله بعد مااشوفه ادري

..ليش كل فتره نزور وتشوفينه بس لاتسوين هيج ويخلونج كلنه نجي نشوفه

..محد يقبل والله ماشفته يتهدد عليه ابوي

..ياسمين مقهور عليج ..گومي وعد عليه انه اجيبج والله اجيبج انتي وامي والبنات بس گومي

..وعد بهاء واعده هوه گله اجيبها الك

..خنگتني العبره صفنت شويه وجاوبتها وعد اوعدك حيدر اجيبها الك ياسمين كافي لاتخلين عمي يفقد وهنا يسوي مشكله عيب من عمي ابو حيدر ومن عمتي

هزت راسها وگامت لزمتها لمياء وصعدن

رجعت وحدي ع القبر ردت اودعه من صدك وانطي وعد احميها واجيبها اله ومااخليها تحتاج شي بجيت تخيلته يمي كون احظنه وكلشي ماريد صعدت اخر شي وحركت السيارات
ورجعنه
مرت الأيام ورجعت الشغلي وذبيت حيلي كله بالشغل
مرات اخذ بيوت قطعي واذا عمالي وياي وافقوو نبقه الحد الليل نطبگ حته نخلص شغلنه اسرع صح تعب بس احسن النه نخلص بيوتنه اسرع وصار طلب علينه بقه علاوي وياي وجبت وياي عامل جديد اسمه عمار هذا الولد هم حباب كلش بس بعده توه شاب وابوو مستشهد بانفجار اهله ابغداد قبل من مستشهد ابوو عمامه متخلين عنه وجاي وي امه الخواله حسب مااعرف همه عائله بس مااعرف تفاصيل اكثر يعني كل الأعرفه هوه الوسطاني بيهم
رجعت الهي نفسي واشغلها بالموالات لو غنيتهن وانه اشتغل ارتاح احس اطلع الهموم الي بگلبي بيهن

بهاي الفتره بيت عمي ماتركتهم ابد بالليل انه يمهم ابات بس كل هاي الاشهر وانه مااتجرأ واجيب ملابسي واستقر يمهم صعبه اشغل مكان ابنهم بس مااكدر اعوفهم اكثر من مره عمتي تتخربط يصعده ضغطها واخذها للمستشفى بالليل لو محد يمهم منو الهم
حته مصرفهم من عندي ومسئولياتي زادت امي اخواني همه بس سبحان الله جان رزقي هواي وهواي طلب عليه رغم اكو خلفات هواي غيري بس انه مااتأخر بشغلي ومن اشتغل اشتغل بضمير مااكمل شخلي شلون ماكان
عمي يراجع بمعاملة التقاعد وهذي سالفتها سالفه معامله تتأخر واتعب بس تنجبر العالم تمشي بيها
ماكو تسهيلات كلشي بيها تعقيد
ياسمين رفصت اي مبلغ من عندي او من نورس مااعرف هيه مرتاحه لو لا مرات احب افوتلهم اسلم على عمي واشوفها بس خفت عليها من مرت ابوها مستعده تتبله عليها بس حته تخلث منها او تقهرها المشكله كلنه نعرف شنو حياتها زشلون مو مرتاحه ومرت ابوها شكد خبيثه بس ابوها مو عارف هالشي يتصوور بنته بجنه وهيه ابيته
نورس دائما تجيها ياسمين السنه هذي ماكملت مدرسه تركت وعرفت عمي شاد وياها ومعاقبها على الدوام وتركه من نورس جانت تشكيلها من تروحلها
وانه حالي مشووش مااعرف احس اشتغل واتعب بس بدون هدف بدون تفكير انه وين من كل هذا ماافكر بروحي ليش تفكيري بس بغيري
بس شفكر وانه اصلا مااعرف شريد
يوميه هالسؤال اسأله الروكي من ارد انام ومن اگع
الصبح انسه كاشي وارجع اتصرف مثل مامتعود
بيوم اجاني شغل ورحت اشوف البيت شفته يمشي وامشي وراه احس رجليني ثگلت ياما جابتني رجليني الهذا الدرب چنت اجي بلهفه وهسه مو طايقه عفيه دنيا شني البيج مضموم محد يعرف من اجي وانه ملهوف جنت اتصور اببه ظوم هيج بس هسه لا حته واهسي من الشغل راح
گلت بس اذا الي ابالي صح اتعذره واگله غيري يطلعلك بس ليش اتهرب انه مشيت وياه وكلساع اسأل نفسي انه ليش اتهرب شني منين خايف خايف من گلبي يخوني ويدگ الها من جديد لو خايف اضعف وارجع اتانيها وهالمره انه اصفنلها مو هيه
بس انه ماضن ظلت ابالي ولا اظن گلبي يريدها جرحتني وكسرت گلبي ومادامه انكسر الي انكسر مايتصلح ومايرجع ايدگ الها انه متأكد
وانه افكر انتبهت الروحي امشي سريع والرجال الجاي يدليني صاير وراي استحيت منه ووگفتله
شعلت الجگاره وجريت نفس من شفت بابهم گبالي وگاعد بي احمد وامجد
من شافني امجد گام يسلم واحمد بقه على گعدته
الرجال توجه البيت بصفهم ما يفصل بينهم بس السياج
سلم عليهم ردوو السلام
تردتت اسلم على امجد الگام لو اتركه لأن شفت احمد متوتر ومو رايد شوفتي وانه نفس الشعور شفت امجد مبتسم وكلت السلام ال الله سلمت من بعيد وفتت شفت الشغل وابالي ارفض الشغل مااريد القرب منهم
بس فكرت انه هذا شغلي وهيه الظاهر مالها مكان بگلبي لأن عادي وانه بصفهم مااحس بمشاعر يعني احساسي بالخذلان جان اكبر من احساسي بالحب قبل من جنت اجيها اوگف مقابيل بيتهم واحس گلبي يطير يمهم هسه لا ماكو هالأحساس بس احن اللحزاتي گبل وياها واحن الاحساسي الجان غير من اجي هنا بمنطقتهم احن الدگات گلبي الي جانت دگتهن خاصه من تجي ابالي
طلعني من صفنتي صوت الرجال چان يريدني اقيس واتفق وياه ع السعر
اتفقت وطلعت وانه بالطريق اتصل بيه رقم شكيت بهدى اتصلت ماردت اجاوب صار اتصال اكثر من مره
جاوبت
..الوو
..اجاني صوت مكسور وجانت تبچي
..بهاء الحگ عليه محد غيرك يخلصني

يتبع..

البارت بدون مراجعه حبايبي مشتاقه الكم والتعليقاتكم الحلوه بس عفيه لتكتبون كملي اني اكمل والله بدون متكولون
بعدين اتعرفوني وضعي ونزلت الكم اعتذار بعد ليش هالتعليقات الي تكول فضيها يمعوده والي تكول ماطلعوو خطار ياعيني بشر حالي حالكم اني معرضه الكلشي مو الة كتابه
وسبق ونوهت انو الي ميحب التأخير وميتحمل خل ينتظرها تكمل احتمال عندي ضرف يمنع كلشي يصير حته لا ازعلكم ولتزعلوني
خلوني على راحتي ماريد اختمها واضيع حلاوتها الهسه متندمه لان اختصرت هواي من قصة امقت اعرافهم لاكنها حيتني