رواية حكايتي مع النصيب الفصل الحادي عشر 11 - بقلم نور الشمس

               ها ياصاحبي ذاك المسامر فض
              يوم الشفت نعشك حمل وگوض
              جفن الفاگده غمض وجفن عيناي
                           ماغمض
              گضوو ربعي وحرگني الشوگ
                 وصرت دخان ماانكض
                وراه بكل طريقه ابچيت
                 بس الحادي ماريض
            ______________________

شلناه وطلعنه من البيت چنت مامركز بشي بس الي اعرفه اني شايله على چتفي چنت ناوي اشيله بس بحنته مو بتشييعه چنت اتمنى اسمع صوت الهلاهل بدل اصياح امه وخطيبته اتذكرت مايوم يگول خطيبتي چان يگول مريتي حته انه من احچي بيها اضحك واگله مريتك
مشينه واصواتنه علت واحنه نشييع
تعدينه الساحه والشارع وصعدنه الشارع العام چنت فوگ انه يمه صاعد اباوع ع الطريق ورجعت اباوع ع التابوت مغطه بالعلم يعني صدگ هسه هوه شهيد وانه رايح بي للنجف وهيچ گاعد كلشي مابيه
لاگلبي وگف لاعيني انعمت ليش ولامره اتخيل انه بدونه ذوله الأثنين علي وحيدر خلصت عمر كامل وهمه وياي سنين شبابنه كضيناها سوه جنت اشوفهم اكثر من اهلي نطلع الصبح ونرجع العصر نرييح وانام ساعه ساعتين ونرجع نطلع ونگعد سوه وبيوم الماعدنه شغل لو انه يمهم لو همه يجوني واكثر شي نخلصها ابيت عمي ابو حيدر ماعنده احد
شلون انسه كل هذا شني من طاقه عندي الي تخليني گاعد هيج بصفه بدون مااسوي اي شي
اكو حسره بگلبي اريدها تطلع اريد اصييح بأعلى صوتي اريد اسوي شي يريحني ماكو مااگدر احچي شي وخانگني خلصت الطريق كله وانه اتذكر هنا گعدنه هنا ضحكنه هيج حجينه وهيج جنه نتمنى وصلنه النجف زورناه الأمام وجان التشييع يلوگله
رحنه للمقبره كلشي حاظر دفنه ونريد نرجع صعدوو قسم بالسيارات وبقينه انه وعمي اخر شي واخواني هم گوه نريد نوخره عنه
احس حيلي مهدوم اشوف عمي اگول اذا انه هيچ هوه شگاعد يحس وحيده ياربي وحيده لاعنده ولد ولابنيه غيره ليش مو انه بمكانه اخواني خير من الله وماعندي شي اخسره ماكو احد وراي لاخطيبه ولا ام ولا ابوو امي عدها اليكفيها
رحت عليه حاچيته
..عمي گوم شد حيلك وگوم

من شافني بجه بصوت عالي عرفته لأن انه اقرب واحد اله
حظنته وبچيت وگوه سندناه وصعدنه بالسيارات ورجعنه
طبينه المنطقه العصر العالم كلها تلگتنه وصلنه للباب وطلعتلنه امه موقف ابد ماانساه
چانت تعاتبنه شلون نعوفه كلنه ونجي ليش محد منه رد عليه الوحشه
مره جبيره وگلب والده وعلى فطرتها ماتدري وجودنه مايفيد بشي وهوه يم ربه الي ارحم منه كلنه ..وراح مظلوم وشهيد ان شاءالله
دنگنه وماحچينه چانت بس اصوات بچينه تنسمع
رجعت للبيت غسلت وبدلت لبست اسوود ورجعت للفاتحه چانت بحسينيه
صارن النسوان وحد والزلم وحد بقينه بس الطبخ ابيت عمي ابو اكرم
اول يوم رجعت نص الليل انه واخواني للبيت بس لمياء اجت وي ضياء وگالت عمتي ماتترك ام حيدر تكول هالايام ابقه ورادت اخذلها ملابس هيه ونورس بقت علمود ياسمين
سألها حيدر شلونها ياسمين
گالت اليوم مرتين تخربطت بس محد موجود ناخذها ومرت ابوها ماقبلت نصيح عمي لو اكرم وسوتلها سالفه حته عمتي عاركتها تقصد امي گالتلها ماتخافين الله بيها كافي بهذا الوضع وانتي حاطه راسج براسها راددتها بس عمتي صاحت عليها صوت سكتها
انه اسمع وبالي يم حيدر جانت نيته يخلصها بس الظاهر مكتوب عليها العذاب
ضياء گلها وتالي ظلت محد اخذها
گالت لا توگع وتتخربط نرشها مي وتتحسن شويه وترجع
گتلها من تحتاجون شي وخاصتا ياسمين حاچينه احنه انه ضياء صفاء لاتحاچين ابوها ولا مرته من زمان هيه غاسله ايدها منهم
حاجيتها وصعدت الغرفتي تعبان
بس خليت راسي ع المخده  اختنگت گمت گعدت على حيلي وظليت ادخن اتذكر ايامنه كلها عبالك فلم ويمر على بالي لقطه لقطه جبت جهازي وفتحت الصوور كل طلعه هوه وياي حته صورنه بالشغل حته بگعداتنه انتبهت على شغله مامنتبه الها قبل ليش يگعد بصفي دائما ليش دوم احنه سوه ليش هيج تعلقني بيك وتتركني هنا حسيت اگدر براحتي ابچي واحچي
بچيت بصوت عالي وطلعت كل العبره الي متكسره بصدري باوعت الصووره وظليت احچي ووياه واعاتب
طلعت رسائلنه چان هنا يوصيني على مصرف انطي الياسمين وچان يأكد عليه اخلي نورس تشوفها خاف اهلها يأذوها
منو بعدك يحميها وهيه المنو عايشه لو ميته وياك احسن چنت اگله لو الموت بي مبادل چا بدلتك بروحي
طلع الضوه وانه ماشايف النوم بدلت وطلعت الهم للفاتحه هناك بالحسينيه صار الضهر وقررت ارجع و ابقه ابيت عمي يم الطباخ خاف يحتاجن شي واكثر شي ابالي ياسمين حته خاف تتخربط مثل ماگالت لمياء
اريد اشوف ابوها شني دوره ماحرگني الا هوه
اباوعله بين الزلم كشخه وواگف واليشوفه يگول ماكو منه ليش وي بنته هيچ يعني شلون مرت الأب تطغى هيچ اذا مامنطيها هوه مجال
بقيت يم الطباخ نساعده انه وحازم وشكم واحد من ولدنه
من تخلص صلاة الضهر يجون الزلم من الفاتحه الي همه عمامنه وخوالنه وخواله هوه يعني مو غربه والعصر يرجعون للحسينيه يستقبلون الناس جيران عمي فتح بيته العمامي وصار غده الزلم عدهم وگفة الجار والناس الطيبه بافراحنه واحزانه نفتخر بيها
مر اليوم الثاني مثل القبله ورجعت بس هالمره بس خليت راسي نمت من التعب
تحلمت بي بس مااتذكر شي بس وجهه وذيچ ابتسامته ماجان يبتسم هيچ بس من يجيب طاريها
گعدت محتصر اكثر وشوفته زادت شوگي اله
طلعت الهم  وانه ابالي معقوله فرحان انت ومرتاح وبس احنه المتعذبين اتذكر هوه جان دوم يگول احنه هم نتحاسب بالأخره احنه اشايفين يمكن هناك اريحله
مرت الساعات ملتهين وحته تفكير مافكرت من الهوسه يمكن هيج احسن واريح الي
وگفت اباب بيت عمي ادخن وعيني على بيت عمي ابو حيدر هوسه ونسوان طابه وطالعه صار صوت صياح قوي بس عادي هيه الفاتحه شبيها يعني
اكو مره چبيره من جيرانهم مااعرفها بس شايفها بالمنطقه چانت تسلم علينه من نگعد هتا بالباب مرات
صاحت يمه يالوليد انت الحگ على بنيتكم ماتت
مافهمت شتحچي تقدمت عليها
شني ياهي من البنات طلعتلي لمياء تبجي بهاء الحگ
ياسمين ماتت مدري شبيها
..شني ماتت وين هيه
فتت للطارمه چانن امطلعاتها للهوه يمكن
چانت متمدده وراسها بحظن مرت ابوها ونورس تغسل الها بس من شفتها خفت لاصار بيها شي شفتها زرگه چانت
صحت عليهن لفنها خل ناخذها طلعت للشارع چانت سيارة علاء موجوده بالباب بس هوه ماكوو اتلفت ادور عليه لمحته كتله لو تجي وياي لو تنطيني سويجك ع السريع
ماكتله ليش هوه جان يحچي ومشغول شمره عليه اخذته شغلت السياره ونزلت لفنها بعبايتها شلتها وخليتها بالسياره صعدت مرت ابوها وياها ولمياء
وصلنه الطورائ شافو حالتها كالوو انهيار عصبي ويرادلها راحه ومهدئات كتبولي العلاج
وانطوها ابر ومغذي خلصت وطلعنه باوعتلها ملامحها مختفيه ولاعبالك ياسمين
دنگت راسي ومشيت شغلت السياره صعدن انه بقيت ساكت ماحچيت شي وصلنه الصيدليه نزلت اخذتلها العلاج ورجعت من نزلن وصيت لمياء عليها وكتلها شتحتاجون كليلي

صاحني عمي ابو ياسمين كال شبيها ياسمين شگالك الطبيب
حچيتله دنگ راسه مقهور ماحچه شي
مر اليوم هوسه واخر يوم يصير ثگيل وختمه بيها خلصت العالم احنه ميتين من التعب واليوم اخر يوم كلها راحت حته عمامنه واقاربنه بقينه بس احنه وعمي ابو حيدر وعمي ابو اكرم والولد واخوتي واكرم وازهر ولد عمي توهم شباب اكرم ١٧وازهر ١٦
اليوم لازم ندخل ونسلم على عمتي ونشوف الفاتحه شكلفت حته نتقاسمهن ونشيلها بيناتنه
من دخلنه صارت مناحه وامي ماتسكت صوتها يبچي الصخر واحنه تعبانين ومهمومين كلنه انكسرنه عليه خلصن بچي وامه صاحتني يمها گالت انت من ريحته عمه فدوه لاتگطع بينه بستها براسها وكتلها ماعوفكم ابد
خلصنه الحسابات كلها وعرفنه شگد كلفت وشگد صرفنه
نريد نطلع وعمي ابو اكرم گال العلاء
عمي اريدك تجي وياي للبيت تخلي الياسمين مغذي وتنطيها ابره التفت عليه مو هيج علاجها شكالك الطبيب
فهمت علاء ع العلاج وطلعت بالحديقه شلون عافتهم ورجعت شصار لو بقت اليوم هيج هنا يمهم
بس هيه مريضه شتسويلهم تنهدت انه من اشوفها اتذكره اكيد همه يرتاحون الها هاي محبوبته من الزغرطلعت لمياء تريد تطلع وي ضياء صحتها سألتها
گالت يوو الله يساعدها منهاره وگوه اخذتها مرت ابوها سحل لمن كالتلها ابوج يكول يلله راحت رادت تبقه يمهم
گتلها وليش ماخلتها
گالت انه ادري تكول حته اداريها هنا كنو الها
جريت نفس كتلها هم صح
گالت تجي انت مو اذا تريد راح نروح انه ونورس وضياء وصفاء طلع هسه
بس عمتي راح تظل علمود عمه ام حيدر
گتلها انه اظل هنا حازم سألني انت تبقه لو ابقه انه يم عمي گتله روح ابنه مچلب بي خطيه بس هوه باله يم عمي ..حازم يصير اخو لمياء ابن عمي هم ..

گالت اي هذا مصيبه متعود عليه كلش.. فدوه بهاء عينك على عمي احس واگف على شعرايه
ظليت يمهم وبالنهار اروح للبيت ابدل واغسل واشوف شمحتاج وارجع بعد السابع خفت الناس وحته امي رجعت للبيت بقوو وحدهم
وهالمره عمي حاجاني گلي عمي روح اذا تريد ماعلينه لو نموت جامظلينه لليوم جامتنه بساعة السمعنه الخبر گتله مااروح انه يمكم هالفتره
كلها
اجيهم المغرب وابقه الثاني يوم الصبح اطلعمن وكت ارجع البيتنه لأن يجن نسوان العمتي وياسمين هم تجيهم بالنهار بس جانت لمياء تجيهم تطبخ الهم وتنظف وترجع لو نورس يتعاگبن اكثر شي لمياء لأن نورس عدها دوام
باقي الأربعينه شكم يوم اتأخرت بالنومه يمهم ماادري ليش احس تعبان وايام السهر بيها اخذ من حيلي حيل
گعدت ع السريع غسلت وبدلت صبحت عليهم وشفت شمحتاجين وطلعت
وي طلعتي لاكتني ياسمين جايه لافه شالها وعبايه لابسه وكلها اسود بس قرص وجها طالع من شافتني نزلن دموعها وانه هم اجه حيدر على بالي مرت من يمي تعدتني صحتها سلمت عليها وگتلها شتحتاجين كليلي ماردت ولاحجت  بس هزت راسها ودموعها نزلت  

طلعت منهم للبيت وانه بطريقي لاگاني امجد مااهتميت مشيت وهوه صاحني

..بهاء الله يساعدك

..الله يسلمك ..ظليت اباوعله اكو عنده حچي بس ماادري شيدور براسه گال
.. اعرف مو وكتها والله يساعدم على مصيبتكم تره انه اجيت بالفاتحه وسالت عليك مالكيتك كالوو عنده شغل هناك

..الله يخليك ماتشوفون شر ردت امشي صاحني

..بهاء عندي حچي وياك

..اتفضل احجي

..ولو مو مناسبه هنا احچي بس انه اشوفك خوش ولد وعاقل واعرف البشر انه يعني انت الناس كلها تحمد بيك وتتشرف بيك انه ماالگه احسن منك بس انطيني مجال انه اساعدك ووياك مو عليك ان شاء الله تصير الك بس تسوي مشاكل

..صفنت عليه كتله شني مشاكليش وشنو. اليصير الي 
اذا تقصد ع الخطوبه سالفه انتهت تره اختكم ردت جواب بيد اختي رفضت وانه هذا هوو انسحبت مو جبر الزواج بعدين هسه مو وكته هذا الحطي اصلا الموضوع مايهمني صار شفته تفاجأ كال

..يعني انت ماموصي حچي الأحمد وگايل غصبا عنه اخذها واختكم هيه رايدتني

..مو ثوبي هذا اعرف الاصول هوه اخوها وماكو شي غصبا عنه قسمه ماصارت ليش چلبتوو يعني هاي العالم كلها هيج من تخطب لو بس انه زين انت تشوفني هسه بحال هالسوالف

..يمعوود راح اتخبل شني اليصير وشنو قصدهم بهاي سوالفهم الينيه راح تموت واحمد على ساعه يهد عليك شنو اليصير واحنه ماندري بي

.. چنت مامهتم انه وناسي موضوعهم اصلا بس هيه اتذكرها نوبات تمر هيج نسمه على بالي واتذكر هيه ماتستاهل وفراگ حيدر غطه على كلشي گتله
مااعرف انه اليصير لس ابعد احمد عني تره على يوم ابتلي بي والله واختكم خل عدكم ثقه بيها انه لاشايفها ولا واصلها خطبت وماصارت لاتفضحون ارواحكم وتسوونها عدها علاقه كوه ..حسيته ضاج من حجيي عفته وكملت طريقي زين منو الي جاي يوصل كلام معقوله اياد بس انه ماعندي شي وياه ومااعتقد هوه يعرف بوضعي هسه وماتاركنه هوه وگف ويانه انعادت عليه ذكرياتي ورجعت ابالي ورجع بالي يودي ويجيب

يتبع ..

البارت بدون مراجعه السحگ اعتبروو لغز وحلوو هههه
لأن هسه كتبته ع السريع اليوم مو فارغه اني بس الخاطركم فرغت نفسي كد الكتابه