رواية حكمت محكمة الحب الفصل الثالث والخمسون 53 - بقلم زينب العبيدي(زينبيه)

مراحب حبيبات القلب

#حكمت_محكمة_الحب
#بقلم_الزينبيه
#بارت_٣٩

في امان الله

التفتت عليه قبل مايطلع شال جنطته وي ماعدل ضهره شبكته وحطيت راسي على ضهره

التفت علي ابتسم وباستي بكصتي وكرصني من خدي وهو يكول يا ياب شكد احب هذا الكيمر مايصير اخذ منه بالجنطه

ضحكت وبست ايده

-ياله ياب الله وياج عينج على حبيبه

-لاتوصي حريص الله ومحمد وعلي وياك حبيبي

نزل واني نزلت وراه وكا العاده راح الغرفة الحجيه باسها على راسها في امان الله يمه

-باسته على راسه وهي تكول امودع بالله ورسوله وليدي

باس حبيبه على راسها وهي باست ايده

وراح طلعت وراه الحجيه بالكوه تمشي وبيدها دولكه المي اتشمره بالطريق وراه

واني وراها التفت علي كال فوتي جوه ياب

وراح و وي شمرت المي طاحت الدولكه ونكسرت من ايد الحجيه

لطمت صدرها وكالت يمه وليدي

وصاحت عليه سلطاان يوم

التفت عليها كالتله لاتروح يوم بداعتي عليك لاتروح خايفه من روحتك هااي

اتقرب عليها وباس راسها وهو يكول يمه شالقضيه اذا مكتوب الي شهاده هنيالي واذا مكتوبه الي رجعه ارجعلكم يمه الموته وحده بس تعددت الاسباب اروح اموت اهناك ولا على فراشي تروح روحي

دنكت الحجيه وتشبكت برجليه وبجت وهي تكول يمه هنيالك جا وانه ونسوانك وبيتك واخيك شراح يصير بينه من بعدك

دنك بسرعه كومها يمه شسالفه هاي اول مره يصيرر هييج وتمنعيني لا حجيه انتي ربيتي رجال والواجب ينتظرني باس ايدها وراح

هذا كله شفته بعيوني ضاع فكري بهاي اللحظه وضليت ابجي ليش الحجيه منعته يروح ياترى شراح يصير معقوله هي هاي وبعد ما اشوفه لا لا اسم الله وبعيد الشر

دخلت كبل للسجاده توضيت وصليت ركعتين لوجه اله بنيه حفض زوجي وحمايته من كل شر

ضليت كل يوم اتصل عليه لان خايفه من المنظر الشفته بهذاك اليوم

وبيوم اتصلت عليه

رد علي الو ها ياب

-شلونك حبيبي خوب ماكو شي يمكم

-ماكو شي اطمني حبيبتي

-اشتاقيتلك اشوكت تجي والله راح اموت من القلق

-نويرتي حبيبتي ماضل شي عكب باجر وانه يمج اذا انتي مشتاقتلي اني ميت شوك الج

ضليت ابجي

-لالا اذا تبجين اسده والله

-لاعفيه والله مو بيدي

-يله حبيبتي راح اسده هسه باليل احاجيج

-خوش احبك

-لك ياب لك الحك الابنك راح يموت طول بعرض يخرب من كلمه احبك كرت عينك

-هههههه احبك

-لج امشي كافي لا اجيج من التليفون اله اكرهج بيه ههه روحي ياب روحي

-ههههه الله وياك

سديت التليفون وكمت اكمل شغلي وبنص شغلي واصفن وتجي بالي صوره سلطان او موقف من مواقفي وياه

ليش هواي جاي افكر بي وليش هواي قلقانه حطيت ايدي على بطني وضليت ابجي ومادري شنو السبب

مرن اليومين وعلى اساس سلطان اليوم يجي وكالعاده لازم يوصل الضهر بس عبر الضهر وهسه ب٦ العصر ياربي ليش اتاخر

كل احنه قلقانين وكل واحد صافن ويحجي بداخله والتلفزيون ع الاخبار والاوضاع مو زينه

ساعه تروح وساعه تجي ياربي حيل اتاخر الساعه ب٩ واحنه نفس كعدتنه

الحجيه كالت يوم حنين خابري المهند بلكي يعرف اخو ليش ما اجه الهسه وليش مادايرد على تليفونه

كامت حنين تتصل على مهند

وشوي ورجعت تكول هو الثاني دايتصل عليه وماكو منه جواب

حبيبه ياربي سترك مو عادته يتاخر

كمت اني وطلعت برا بالطارمه لان احس صدري قبط بعد والنفس بالكوه اجره والعبره خنكتني

طلعت وجهي للسمه نزلن ادموعي رببي اله هو لاتاخذه مني هلمره صدك اتيتم ربي اخذت بنتي ضوه عيوني واخذت امي الي ماشبعت منها واخذت ابوي الي ما احتواني الاهي كل هذوله فدوه يرحون بس رجعلي سلطان ربي ما اتخيله يخليني احسه هو ابوي هو اهلي احس يمه با امان اللهي مايرضيك اتيتم مرتين ولايرضيك اضل وحيده ربييي رجعه الي ياراد يوسف اليعقوب ترجع سلطان ضوه عيوني

التفتت للباب سلطان فدوه تعال ادخل علي وكحل عيوني والله اذا رجعت بعد ما ازعلك واسوي كلشي الي تريده واخذ حجايتك تعااال فدوه ((احجي واني دموعي تصب))

ضليت عيوني للسمه وادعي ومره للباب وانتظر

شوي انفتح الباب يمه يافرحتي ركضت واكول الحمدلله

بس للنص و وكفت هذا مو سلطان هذا مهند

باوع علي وكال ها ما اجه

هزيت راسي بلا واني ابجي

-لاتبجين نواره صدك جذب ذكري الله يجوز عطلانه بيهم السياره يجوز صارله ضرف وتااخر شوي

-ياربي يكون مثل ما كلت مو شي ثاني مو شي ثاني ربي فدوه اروحلك رجعه

-تعاي تعاي دخلي جوه وهسه يطب علينه

-لا خليني هنا اريد اول مايطب اتلكاه

-على راحتج بس لاتبجين

كعدت واني حاطه راسي ابين رجلي وانتظر

حسيت ايد انحطت على جتفي كمزت وصحت سلطاان

حبيبه لا ماما هاي اني يله يروحي كومي اكلي لكمه وروحي الغرفتج الساعه ب١٢ كومي نامي

تحجي وعيونها مغوركات دموع

-وسلطان ما اجه ولا اتصل

هزت راسها بلا وطاحت دمعتها

-لعد خليني هنا وانتي روحي نامي بعدين انتي شكومج ياماما وعمليتج ماطابت روحي خلي انتظره

-اذا ماتكومين وياي راح اكعد يمج الساعه ب١٢ وانتي برى لايصير بيج شي

بعد ماجبرتني ماما حبيبه كمت وياها

صعدت الغرفتي واني ادعي وابجي هسه

وكلساع اباوع من الشباك

لحد ما ضليت اغفي وافز اغفي وافز

كعدت واول ماكعدت التفتت على الجربايه بلكت الكاه بس اتضل البلكت كلمة تمني

كمت نزلت جوه ودخلت للحجيه واريد اسالها عن سلطان واخباره

بس لكيت الجواب بدموع الحجيه وهي تكول يوم وليدي شصار بيك شعطلك عن الجيه

كمشت كلبي ياربي لا كلبي ضل يلعب سلطان مامنه جيه يمكن

كمشت التليفون اتصلت عليه مغلق بلعت ريقي ياربي لالا مو شرط كلشي جائز يجوز اكو ضرف قوي منعه ينزل

كتبتله رساله سلطان حبيبي مو كتلي ترجع وينك لعد تعب كلبي واني اتاني لاتخليني قلقه عليك انت كتلي ارجع ولازم من امس يمي وكلبي مايحمل تتبعد عني ولاساعه زياده

ضلينه بقلق وبدموع مر يومين وسلطان ماكو واني دموعي ما نشفت صرت اتمنه يرجعلي بلا ايد اوبلا رجل عسى ما مقعد على كرسي بس ما انحرم منه للابد وما اشوفه بعد

هنا فاجئه اندك الباب فرحنه كلنه لدرجه كل احنه طلعنه للباب بس قبل لانوصل للباب اتذكرت ان سلطان يسحب السيم الي مشكل بقفل الباب ويدخل هو ومهند ميدكون الباب

فتحت الباب الحجيه واحنه وراها شفنه رجال عسكري وبيده جنطه اااخ ربي هاي جنطه سلطان بس هو ماكو كلبي وجعني

الحجيه هايمه تفضل اكول يمه عندك علم عن سلطان

الولد دنك وعيونه مدمعه

صرخت عليه لك لا ليششش تبجيي

فتح الجنطه وطلع علم عراقي وكال مبروك خاله ابنكم انزف عريس للجنه

صرخت الحجيه يمااااه سليطين يمااااا يبووووي ابني

صرخت عليه هييييي انت شتحجي شنو انزف عريس للجنه هو عنده مره وكال راح يرجع هو كلللللي

ماما حبيبه صرخت خووويه شلووون مسسستحيل سلطان مامات صدكني مامات

الولد ياريت ياخالتي بس مع الاسف القائد الي هو سلطان والفرقه مالته نصهم اتحاصروا والمنطقه استولو عليها الدواعش والجيش ماكدر يوصل الها للاسف وره يومين لمن تراجعو الدواعش وتقدم الجيش لكينه كل الجثث محروكه واغلبهم صايرين رمااد مامبين منهم حتى عضم

ضلينه انصرخ واني اتخبلت يمااااه سلطااااان راح سلطااان لا لا اررريد اهلي اريده ماراح كال ارجع كال ارجع كال ارجععععع

اووووف ربييي اخذ كلشي مني بس حبيبي رجعه الي معقوله هاي هي اخر شوفه جانت اله بالباب واخر صوت اله جان يوعدني برجعته وجذب علي

لطمت لطمت على وجهي زوركت عيوني وشلعت شعري واني انشغ وتطلع الكلمه من كلبي ي ي يماااا سسسلطاان يااابه سسسلطان حبيبي سلطاااان اكيد ما عفتني اكيد داتجذب علي

يمكن شويه و وتجي اني م ماراح اصدك مموتتك م ماراح الطم ر راح اتانيك ب بغرفتك ر راح البسلك واتعدل و وان انتظرك

ت تجي تحضني وتكعدني على رجلك
و وتحط ايدك ع على بطني(وي كل احجايه اشهك ويطلع اسمه من كلبي يشك كلبي ويجرحه)

ااااخ يالحاله الي صارت بينه ياكسرتنه وياضيمنه
ياحرماني ويايتمي

البيت انهدم ركنه وفجئه صار اضلم وموحشش حيل حتى حياطينه ذبلن

الحجيه ااخ ياحال الحجيه الي ماتت وهي عايشه ماتت بموت ابنها

مهند ياكسرت ضهره ويافقدان اخييه الوحيد

صديقه محمد الي من سمع بالخبر طاح بالجلطه

حنين راح ابوها الرباها راح من عدها الامان

حبيبه هه شسولف عن هل مره الي شافت انواع العذاب شافت الضيم كله بس جان مصبرها على هذا كله صويحبها مثل ماتسمي ويسميها

اني شحجي عن نفسي وشكول ماضلي بالدنيه حضن ولاضلي بالدنيه ضهر راحو كل اهلي وشحال اليرحون اهله بالجمله اي هو جان كل اهلي
شلون انساه انساه وهو ابوي وهو يعلمني صح و غلط انساه من جان صديقي واخوي وساندني لو انساه وهو حبيبي وزوجي وانسه دفو حجاياته وغزله وخوفه علي عمري خلص من بعده وشيبت واني بعز شبابي

مرت ايام العزاء واحنه حالنه ماينحسد عليه ولانتمناه لاالعدو ولا الصديق

خلصت الفاتحه وياضلمت البيت بعده ويادمعه ما جفت

ااااخ عاشرتني دموعي وعاشرتني الونه والذكريات واني امشي واتلمس هنا كعد هنا نام هنا اكل

بس تليفونه اخذه مهند من عدنه لان بي صوره وصار يكابل الصور كليوم ويقفل على روحه غرفته وينحب واحنه نسمع صوته وننحب وياه

لزمنه عده اني وماما حبيبه جان مهند خطيه يطلع من غرفته الشغله من شغله الغرفته على مودنه

كل احنه تغيرنه بعده الحجيه صار٢٤ ساعه مريضه اني كطعت الاكل ماماحبيبه وحنيين كذالك

مرت اشهر واجت اشهر خلصت العده وصار على استشهاد سلطان ٥اشهر

واني دخلت بشهر السابع وبيه ولد عافلي قطعه منه وراح اني ماتكمل فرحتي لو يروح ضناي لو يروح ضواي

كليوم اسولف للطفل وهو ابطني عن ابوه وابجي واتذكر حلات حجاياته

حنين حامل بشهر ٣ وبهذاك اليوم اخذتها ماما حبيبه للدكتوره لان وضع الحمل موزين وتنزف

والحجيه اخذها مهند علمود الضغط معلك عدها

ضليت اني الوحدي بالبيت كمت انضف وعيوني تصب ودا امسح بالصاله وما اشوف من ادموعي

شفت واحد واكف باب الصاله الي يجي من الطارمه واحد واكف على عكازات وشعره كوشه شكبرها ولحيه شكبرها وضعيف كلش

صرخت اول ماطاحت عيني عليه بس لحظه لحظه هذا طيف سلطان

تقربت واني ابجي واكول سلام قولا واني ابجي

ابتسم وادموعه صبن وكال تعاي ياب

س س سلطان وماحسيت على نفسي اله واني بحضنه ويضرب بيه ويغسل وجهي

فتحت عيوني س سلطان ا انت لو شنو

شبكني حيل حسيت راح ادخل بصدره اي هذا دايشبكني لك هذا مو حلم مو شبح

صرخت سلطااان وضليت اشهك س سلطان ش شلون اجيت و وليش كالو متت

مسح دمعات طايحه من عيونه ومسح دموعي وهو يكول اني تاسرت وصوبوني ٧ طلقات عذبوني هواي رادوني افضح وافشي اسرار الجيش واساعدهم ماجنت اكدر اوصل الكم خبر عني لمن الجيش العراقي حرروا المنطقه كدرو ينقذوني بعد اصابات جبيره

واخذوني عالجوني فقدت الوعي ٢٠ يوم ومن كعدت ردت اوصللكم خبر بس جابوني الكم بدل الخبر جزاهم الله خير

امي شلونها مهند وحبيبه وحنين انتي يابعد سلطان شلونج والطفل

بجيت شبكته واني شاده حيل على قميصه لمشكك كل احنه اتاذينه من بعدك كل احنه راحت روحنه بروحتك ضلم البيت وانتكس

اتبعدت من يمه بسرعه سجدت بالكاع واني ابجيي من كل كلبي اللهي شكرا الك رجعتلي ضواي رجعتلي اهلي عرفتك ياربي ماراح تحرمني لان انت احن من الوالده على ولدها عرفت راح تفرحني بنهايه تعبي عرفت راح تعوضني عن كل عذابي

ما اوصف فرحتي بهذاك اليوم مثل الي بي مرض خبيث وكل ضنه ايموت وفجئه يكله الدكتور انت مابيك شي بمعجزه من الله هيج حالتي جانت شي مامتوقعته مثل المعجزه وصارت وياي بس ماكو شي بعيد عن رب العالمين احلى شي صار وياي هو رجعته الي وشوفته كبالي

ويافرحت الحجيه من شافته ضلت تعثر بااطراف دشداشتها وتحاول تمشي بخطوات سريعه الابنها تضمه وتشمه بس العمر والمرض خذه قوتها

وماما حبيبه الي شبكته حيل وهي تكله مااصدك انت كبالي بعد مادفنتك بكلبي وسويتلك عزه بروحي

ومهند الي شمر روحه بحضنه ويشهك مثل الطفل وحنين مثله وهي تصيح يابه سلطان اصدك اني مو يتيمه اصدك رجعتلي

وبعد شوط كلش جبير من البجي بجي الفركه واللقاء بجي الفرح

كام سلطان سبح وزين بس جان مايمشي على رجله رافعها ويمشي على عكازه

ومن خلص اجه حط راسه بحضن امه مثل الطفل ونام واحنه داير ميدوره

واني اتامل كل شبر منه بي هواي كدمات ضعفان وذبلان خذه روحي ولاشفته بهذا المنظر

مرت ايام واخذه مهند للدكتور طلع عنده كسر كلش عميق بالعضم

وره ايام سووله عمليه وحطوله بلاتين برجله ولازم ٦ اشهر ينام بالافراش

جابو للبيت مهند و اولاد خالته وياه
نيمو بغرفة الحجيه

اجيت اسلم عليه وجانت يمه ماما حبيبه وحنين ومهند والحجيه

وكفت بالباب ومبتسمه ودموعي اتطيح

باسني بالهوه بدون محد ينتبه

اجيت بست ايده الحمدلله على سلامتك

مسح ادموعي هو الله يسلمج ياب

ضلينه كاعدين شوي كامت الحجيه تتوضه وتصلي مافي ذمتها قبل لاياذن المغرب

حبيبه جوعان اسويلك شي تاكله

سلطان ياريت مشتهي شوربه من ايديج الطيبه ياطيبه

حبيبه تتدلل

حط ايده على عيونه وسوه نفسه نايم بس جان كامش ايدي

كام مهند وراه حنين

ردت اكوم سحب ايدي وكعدني

همسلي لعد اني المن سويت روحي نايم حتى تكومين لو يكومون هما

ابتسمت سحبني حيل ويحجي بااذاني مشتاقلج الحد السكر وشتاقلج الحد الاوعي

حجيت بااذانه مو اكثر مني

-خرب احتركو الجابوج اشوتعاي وقربني عليه وضل يبوس بيه ويشتم بيه

صاحت الحجيه الله اكبر الله اكبر

ضحكنه اثنيناتنه

خلصت صلاه وهي تصيح هسه انتم بس وكت الصلاة تنجلبون شياطين خوما شياطين

سلطان ههههه حجيه غير نستغل فترة انشغالج انتي ماتنشغلين بس بالصلاة

ضحكت اني

الحجيه خل اخلص واطلع تاني شوي اصبر

سلطان اكول حجيه بالج ويانه لازم انتبهي الصلاتج وعوفينه احنه ابليس كاعد ابينه هسه

الحجيه استغفر الله ماعاد استحيت انت كلش ورجعت اتصلي

سلطان حجيه محروم صار هواي ماماكل كرز هههه

-ضربته على كيف استحي شوي

-يامستحه هاي خليتها الج ورجع ايبوس بيه

مرت الشهور واني ولدت صار عندي ولد ويافرحت سلطان بي ويافرحت ماما حبيبه بي

وره كم شهر ولدت حنين وجابت ابنيه

وكملت الفرحه وصاروا اطفال ثنين بالبيت ورجعتله الحياة بعد ما جان بلا طعم لان هم زينت الحياة الدنبا ياربي لايحرم كل طالب ذريه هذه كانت سنه ٢٠١٤

حال الابطال في سنه ٢٠١٩

سلطان صار عشق عمره نواره ويغنيلها دائما يشيب الراس ياعشك الزغيرات
وطلع تقاعد بسبب رجله

نواره مايحتاج انفسر فرحتها بعد ما لكت عائلتها كلها بنفر واحد والله جازاها بعد الضيم الشافته

ابنهم صار عمره ٣ سنوات ونص وعدهم نونه جديده عمرها هسه ٤ اشهر
طبعا ابن نواره مايكل الها ماما لا كله نونه ويكول هاي احتي يعني اختي وبيبه ماما يعني حبيبه ماما ههههه

حبيبه هل انسانه عاشت طيبه وراح تضل هيج مثال للمرأه الصابره الخلوقه العفيفه الواعيه

محككككككمه

حكمت محكمة الحب حضوريا
على قلبي بالعشق مدى الحياة
بعيدا عن كل الفروقات
محتضنا تلك اللحظات
بين طفولتي وتلك الشيبات

رفعه الجلسه

القصه تحمل الكثير من العبر الواضحه

🌹النهايه🌹

اتمنه عجبتكم القصه

جابو كما تعودتو
١..اكثر ششخصيه حبيتوها واكثر شخصيه كرهتوها

٢..الموقف الي حبيتو والموقف الي كرهتوه

٣..قيمو القصه من ١٠

والى لقاء اخر بقصه

هديه في حي الرجال

تحياتي #الزينبيه