رواية حكمت محكمة الحب الفصل الأربعون 40 - بقلم زينب العبيدي(زينبيه)

شلونكم حبات كلبي

والله العضيم كلش مريضه الله شاهد ومن امس اجيت يم اهلي وكلش تعبانه ومابيه حيل اكتب وهذا الي كاتبته مال اول امس

٢٤٥٠كلمه قراءه ممتعه

بقلم

البارت

كام من مكانه وكال يله كومي خلي نطلع

-ما اتحرك منا والله شنوو فهمني كسرت ركبتك على هذيج شكوو عينك عينك ولاجن اني كاعده يمك منووو هاي هااا عجبتك اكيد عجبتك

-صوتج وللتضلين تنعثلين مشبه عليها حسربالي وحده جارتنه قبل

-صدكت استاذ سلطان

-كومي يله كومي

-كمت وقبل لا نروح شفته التفت باوع عليها انقهرت كلش جانت واكفه يم طاوله وداتشرب عصير وياها بنيه صغيره

باوعتله راح يمشي بكل برود ولاجن دايباوعلها مشه وكال يله

حسيت كلبي احترك ياربي وهيج اعوف السالفه ونظراته هاي ولاكن شي صاير

رحت على لبنيه بحركت كلب وكلتلها العفو انتي منو

باوعت علي وابتسمت شنو اني منو ي

-اقصد انتي عراقيه

-اي وانتي همات امبينه عراقيه

باوعت على سلطان شفته من بعيد يخزر بيه ويااشرلي بايده تعاي

مسح على لحيته بمعنه يتوعدلي ويكلي اصبريلي

اتسحبت وكلت للبنيه اسفه ازعجتج

شفتها مدت شفايفه ورفعت اجتافها وكالت لا عادي مصار شي

جانت كلش حلوه عيونها كلشش كبار ويلفتن الانظار ولونهن عسلي وطويله ورشيقه بس تارسه يعني موعلى ضعف

ضليتاباوعلها بغيره وكره قبل لااروح وبعدها رحت واني دا امشي واباوع السلطان وجها مايكصه السيف شفته بسرعه دار وانطاني ضهره

وحسيت ايد انحطه علي التفتت وهي نفس البنيه

و مبتسمه وكالت هذاك الرجال مو اسمه سلطان حجتها وهي امفهيه

-وانتي شكووو شلج با اسمه هاا اشوفج رايحه زايد ثكلي شوي جنت احجي بعصبيه وصوت عالي

عافتني وراحتله ولاجن داحجي وياها

فتحت عيوني على كبرهن يااا شهل صلافه

-وتبعتها اني هاي صدك ماتستحي بس شنو الفلم وين عرفت اسم سلطان

صرت يمها لمن وصلت

وكالت سلطان هذا انت

التفت عليها وباوع علي وخزرني وكال بكل برود اي سلطان

-ماعرفتني اكيد صايره حلوه ههههه

-لاصغرن بيج ماعرفتج

-اني ود شوف انت ماميزتني بس اني عرفتك مامتغير هواي نفسك هذاك ابن ال١٩ بس طولان ومعانيك اكثر رجوليه

-اهاا هلابيج ود اي ماعرفتج متغيره

-لعد حبيبه وين ما اشوفها وهذي بنتك اكيدد وبعد شكم طفل عندك

جنت فاتحه حلكي وعيوني واني اباوعلهم ماخذين راحتهم سوالف حسيت راسي شب نارر واني ضايعه بيناتهم لان هما ثنينهم اطوال ويمهم طالعه ما ابين

-حبيبه بالعراق وهاي مو بنتي زوجتي وماعندي جهال بس نواره حامل حاليا

-شنوووو زوجتك الثانيه شلون وحبيبه وبعدين هاي مو صغيره عليك وليش ماعندك اطفال تعال تعال اكعد عليك الله سولفلي

-اعتذر منج وده اقصد ود بس مستعجل وباجر ورانه رجعه للعراق واريد اروح انام من الصبح طالعين والهسه

'انت شتحجي بعد غياب عشرين سنه تريد هيج تروح والله لوتنام اهنا هم ماتروح تعال عليك الله خلي اعرفك على زوجي واطفالي

وراحت كدامنه

باوعتله وخزرته وهو عصر ايدي حيل اررتاحيتي عمه لهل اعيون دوري وجهج

منو هايي استاذ سلطان

-جارتنه قبل

-جاره وبس

-خزرني وكال امشي

-وين نمششي خلي نروح للفندق لو تريد تسترجع الماضي

-الماضي انتي رجعتي بابغبائج ياتبن

-هااا يعني اكو ماااضي طلعن اسوالفك سلطان باشه

-مال بوكس وافر حلكج هسه امشي كدامي

ورحنه كعدنه واني ماده البوز شبر ونص وسلطان كلساع يخزرني

ود اي سلطان سولفلي شلون اتزوجت هذه الكتوكته

-اني مو كتكوته رجائا ولاتشبهيني بالدجاج ودرت وجهي

ضحك سلطان وهي فتحت عيونها وحلكها وبعدين هم ضحكت

سلطان بعد اتزوجتها شنو الشلون

ود اقصد اكيددد حبيتها مو انت ماتقتنع بوحده لازم اتدور ثانيه

سلطان شكالولج عني وما اقتنع بوحده

نواره ليش هو ديج مثلا وعنده قطيع دجاج

ود هههههه انتي قافله ع الدواجن اليوم

سلطان باوعلي وبالكوه حاصر الضحكه لاتطلع امبين صار احمر

-منو القافل ع الدواجن اني لو انتي

ود اها سوري.. اي سلطان ماكتلي حبيتها موو

حجيت بنفسي خرب شلون اتجاهلتني بنت الدجاجه

سلطان لازواج تقليدي

ود يعني شللون اني ادري بيك متزوج حبيبه وقافل عليها

سلطان حبيبه مايصير عدها اطفال وتزوجت نواره

ود ياحرام لعد شصار بحبيبه

-ماصار بيها شي ماما حبيبه تموت علي واني اعشقها وتضل هي امي وتاج راسي

ود بل بل اللسانج يابنت هههههه شكلت اني وبعدين تعاي ياحلوه اشو تكوليلها ماما

سلطان نواره يتيمه وحبيبه ربتها مثل امها

ود وانت ابوهاا ههههه

سلطان اكيد نواره بنيتي قبل ماتكون زوجتي وام بيتي

ود واااي شكد تحبها لعد

-اكيد يحبني ليش مو زوجته لايكون انتي زوجج مايحبج هاا او يمكن انتي ماتحبي او...

قاطعتني ود وهي تكول بل بل هاااي شبيج ههههه ليش هيج تحجين سريع كان واحد يركض وراج

سلطان من رخصتج وده يله نواره

ود لحظه سلطان لو اكلك سلطاني لان انت داتكلي وده وتعرف محد جان يصيحني بهل اسم غيرك واني جنت اكولك سلطاني تذكر

سلطان لا افضل تكولين خويه او سلطان كافي واذا على وده هو اسم مو مشكله اذا كتلج وده او ود بس الهاء زايده ماكو شي ثاني يزيد

ود اها تمام ماكلنه شي بس لحظه بس حتى يجي زوجي الله عليك خابرته والله عيب تروح وهو مشايفك

سلطان بس بسرعه لان متاخر ونواره تعبت حامل موزين عليها

ود فدوه يخاف عليج بزونه

-انتي ماتجوزين مني هاا ماتجوزين مره دجاجه مره بزونه ياخوفي تكليلي جلب بعد شوي

ود هههههههه لالا انتي فضيعه عمي ورده شتردين بعد

-(لا ماخرت اله مزروفه) عساس شسويتي من كلتيلي ورده شبهتيني بنبته وتارسها الطين وبالكاع والحشرات تفتر عليها اسمي نواره نواره وبس لو سمحتي ودرت وجهي

سلطان دار وجها كلش من يمنه وبس اجتافه تهتز يضحك اي شعلييه

واني كلبي مشتعل وهاي جنها جني مخترع من روحه

ود اي ماكتلي سلطان بعدك ببغداد ونفسه بيتكم لو غيرتو

-احمم ليش ناويه تجين عزيزتي مع الاسف مهند اتزوج وترس البيت جهال ماكو مجال بي صدكيني راح يخبلونج لو اجيتي عاد جان ابدي تزورينه بس يله ميخالف كافي شفناج اهنا

ود هههههههههه يخرب عقلج والله ما اجيكم شعندي اني مقيمه بالكويت صارلي ٤ سنوات وقبلها جنت بدبي سنتين

-احسن

ود اي سلطان مجاوبت

سلطان رفع وجها وكال اي نفسه كلشي ماتغير ورجع يطكطك على نقاله

ود سلطان دعوفه لهذا من ايدك يارجال شنوو خل انشوفك يمعود ماكتلي ليش جايين للكويت

-اعرف وحده جانت كلشش فضوليه وهواي تسال تدرين شصار بيها ماتت ديري بالج حبيبتي خاف يحوشج المرض هذا

ضحك سلطان فتح الكشره واخيرا

ود ههههههه ياسبحان الله نفس الضحكه هاي شنو سلطان حتى ضحكتك ممتغيره

حجي اني اللهم صبرج ياروح ليش هي الضحكه تتغير ليش نغمات هي نغمات مثلا خوش على هل حجي كلمن يختار النغمه اقصد الضحكه لتعجبه

ود دمج عسل وربي

-بلا زحمه عليج تعرفين العسل شنووو العسل فضلات النحله رجائا هواي تجاوزتي لحد الان جنت احجي بعصبيه

سلطان هههههه نواره اعصابج ياب موزين عليج

ود هههههههه حبيتج وربي

حجيت واني اهمس يحبج ابليس وربعه

سلطان همسلي اضاهر عندج عرف وي ربعه

-همستله اييي شلون ما اعارفهم وزوجي مستشار مالته وسئول عن ربعه كلهم

ودرت وجهي

ود اي عيني صار همس لازم الشغله ضروريه

-على فكره اني هم اعرف وحده جانت هواي تدخل عصها باشياء ماتخصه وهم صابها جنون البقر ديري بالج يعمري

ود مقبوله منج الحلوه اي سلطان ما عرفتك هاي بنتي نسرين عمرها ٩ سنوات وعندي بعد توئم احزر شنو مسميتهم

سلطان شحزر مثلا يامكثر الاسامي

ود الظاهر انت كلشي ناسسي اتذكر زين قبل ٢٠ سنه ههههه

سلطان اسف ماجاي يحضرني قبل ٢٠ سنه

-هسه كولي وفضيها اله يحزر شعدنه حزوره باليره

ود مثل الاسماء الي جنت اتحبهم لمن يجوك ولد سند وليث

سلطان اها حلو

حجيت اني والغضب يطفر منعندي مثل الشرار
على فكره سلطان بطل يحب هاي الاسماء ويع يحب اسم سيف وحنسمي النونو سيف

ود فديتج وفديت النونو هو انتي الوحدج نونو

-اكيد نونو موانتي جبيره هواايه اقصد عجوز لذالك يمج اني نونو

ود هههههههه يخرب عقلج كلش ضايجه مني الظاهر تعرفين الي جان ابينه لذالك احسج مو بالعتني

اني لمن سمعت هيج عيوني تلقائيا اتجهن السلطان الي هو بدوره مغلس ويطكطك ع النقال وبسرعه ضمه وكال يله نواره امشينه اسف ود زوجج هواي تاخر

-لحظه حبيبي علويش مستعجلين ورانه ليل طويل خلينه كاعدين يم وده شويه والتفتت عليها اي اعرف الي بينكم اصلا كلشي يسولفلي سلطان (حجيت هيج حتى اسحب حجيها)

ود اووف سلطان شحجيلج عنه والله عاد جان كولش وكيح ههههه صدك سلطان بعدك وكيح لو ثكلت هههههه

-انتي صدك وحده ماتستحين لج ماعيب شهل حجي هذا بس نو صوجج صوج الغشيم الخذاج وحده خفيفه وكمت

ود لحظه هاي شبيج مو انتي كلتي كلشي تعرفين

كام سلطان يله امشي

رفعت حاجبي وباوعتله لاضل روميو ضل كمل وكاحتك

خزرني وكمشني من ايدي ومشه

سحبت ايدي من يمه بعد ما ابتعدنه هواي عن ود كتله اتركني لاتكمشني ماتصورتك هيج

سلطان شنو الي ماتصورتي مراهق حالي حال كل واحد حبيبي ياب مالج حق تحاسبيني على سوالف الماضي اصلا قبل لاتصيرين انتي جانت هاي السوالف

سكتت ما حاجيته واني اضغط على اسناني واعصر بايدي

وصلنه للفندق دفعت الباب حيل وشمرت حذائي وعبايتي الاسلاميه بلكاع وشالي عالجربايه ودخلت للحمام

غسلت وجهي احس نفسي كلش ضايجه واريد ابجي ابدي اكمشه واشبعه كتل كرهته

طلعت واني اباوعله بنضرات حقد جان داينزع ملابسه

-شيلي ملابسج عيب اتشمريهن بالكاع هيج هاي سوالف الخارمات

-كيفي اني خارمه انت مالك علاقه وضليت اهمس سرسري ابو النسوان

-هههه ولج منو سرسري شو ماتعرفين تحجين

-هاا شنو حجيت جذب سرسري ابو النسوان

-وللج شهل حجي عيب تكليلي سرسري طاح حضج

-ها لعد شتسمي حجي ود ها يله احجي كلي مو هي تكلك وكح

-صار كبالي هاا هيج

-اي هيج ولو انت سباعي صدك كلي شنو جنت تسويلها هاا يله كلي ماكالت وكح من فراغ

-سباعي هههههه اي اني سباعي وراح اكلج لان سباعي ولو ما سباعي ما احجي بس سباعي مو بيدي السبوعيه تمشي بدمي هههههه احترك مصنمج منين جبتي هل مفرده

-اي اي غير موضوع واشرد

-ما اشرد اني سباعي جنت اسويلها هيج وتقرب علي حصرني ع الحايط وحط ايده ع الحايط وايده الثانيه ع خصري وتقرب يبوس بيه

-يمااااا عززااااا وتكول موووو سررسري وخر من يمي اكرهك سرسري ابو البوس وخر اكرهك

-ههههههه استغفرالله اجذب عليج واكلج ماجنت اسوي شي يله خل اجذب ماجنت اسوي

-ما ما اكرهك وخر بعد شنو يله احجي يله

-لابس هيج ترى اني مو كلش سرسري وسط بس هاي قبل من جنت مراهق واحبها

-حبتك حيه مراسين راس اللك وراس الها شكد كرهتك

-ليش حبيبي هاي قبل ومايحقلج تحجين بيهن جنت احبها ونيتي بيها زواج والله بس صارت ضروف وعافتني وعفتها وحاليا هي ماتعنيلي اي شي وماحركت بكلبي شعره اكلج هو كلبي ترى بي شعر مو كلب عادي

ضحكت وبسرعه رجعت عصبت ما والله مااحبك واذا قبل

-ترى كلش قبل يمكن جان ابوج استوه مزوج امج يعني انتي جنتي بعييد

-لابالله بعيد كتلي جنت بالمريخ موو

-لاا بعيييد اهناك كلشش بعيددد بنت اليهود احبج حتى من جنتي بعيد

-حبك عكرب رمل اسود بكد راسك

-هههه ولج اشو هواي خذيتي راحتج وجاي تتجاوزين

-عوفني اتجاوز اصلا اني ضايجه منك ابو الحضن والبوس اكرهك

-يمعوده وداعتج جانت قبل هاي السولف بعدين احنه جنه عفطيه ماملتزمين هذاك الالتزام وماعدنه مثل جيل هل وكت توعيه بلتلفزيونات ومشايخ وساده تنصح وتعلم حلال وحرام والاهل جانو على فطرتهم صدكيني مايعلمون وحتى الي جنه انسوي من بياض كلب وماعدنه دغش انحب من صدك ومن بستها بهذيج الايام جانت حبيبتي وناوين نزوج

-لاتكول بستها لاتكووول

-لزكتي مابايسها عمي احترك عقلج شكد طفله

-طفله هااا لمسوي هذا كله وتكول طفله موحقي اضوج

-لاموحقج كتلج انتي جنتي حتى ماجايه للدنيه وحتى حبيبه مامتزوجها

-زين هسه انت تقبل اكلك واحد بايسنيي تقبل

-غير اعدمج بوياااي هاي شفايفي بس الي

-لاوالله لعد انت منو التجي تخوط بشفايفك

-هههههاااا تخوط ولج شنو تخوط بنت المهتلف

-اي تخوط يعني تبوس والله يا الله

-صدكي محد بس بس انتي وحبيبه و وده وسعاد وهيام وزهراء وفاطمه والله لايجذبني يمكن زينب جوارينه هاا ونسيت اسماء اقاربنه وهند صديقتي بالجامعه وغير الي ناسيهن

-لطمت على خدودي حيل عززا العزاك سليطين عزااا اليوم احرك الكويت على راسك وين تروح مني وكمزت عليه واني اضرب بي حيل حيل على راسه وعلى صدره مو حلك خلاط خلاط شكلت الروحك من بوست بنات بغداد كلهن هاااا

-كمشني حيل من ايدي كافي ولج كافي شكلت الروحي غير انجرب كل طعم شنو قابل انضل كله على الكرز وعصر اشفايفي حيل

وخر من يمي اكرهك احلف والله هلكد بايس بنات احلف

-خاف احلف ويطلعن اكثر ويصير ذنب علي

-خايف من الذنب هااا لعد الي مسوي مو ذنب ورجعت اريد اضربه وكمش ايدي جتفني وكعدني بحضنه

-اشو انتي صايره شرسه بزونه انتي بزونه

-ما احبك

-ولج والله اجذب عليج شكلولج حلك لو فاتحه سبيل منو التجي ابوسها والله جذب علواه

-هاا علواه

-اقصد عيع شهل لعبان نفس هههه اني شعندي غير الكرز بويه غير انسحن اموع بالكرز احترك الخلفه هل كرزايات وباسني

عضيته وخر من يمي بعدني ضايجه

-لعد خل انام تعبت

-نام بس فكني منك سرسري ابو البوس

وراح سبح وطلع لف راسه ونام

وشوي ونمت اني

كعدتي الصبح وهو يعصر بخشمي ويكول نويره نويرتي يله ياب اتاخرنه

كعدت وجنت نايمه وبالعرض وراسي على بطنه اسبح بالنوم كالعاده

فتحت عيوني باوعتله

انطاني بوسه بالهوه احبج

ابتسمت وعدلت نفسي وشبكته شبكني هو حيل

وشوي وكام يله ياب جهزي بسرعه لانتاخر على المطار

كمت حضرت ملابسه وملابسي ورتبت الجنط وبعدها كملنه لبسنه وطلعنه اتريكنه بالفندق جوه وطلعنه للمطار

ونفس المعانات مالت الطياره على ما وصلنه اني يبس دمي وسلطان يشاقيني ويسولف وياي حتى ينسيني

وصلنه للعراق واجه علينه مهند من نزلنه خابره سلطان

سلم علينه وهو يكول والله كالوها دخول الحمام مش زي خروجه راحت نواره شكلورجعت شكل الله يالشغل حاسبها صح اخوي

طلعت اللساني اعيب على مهند عابت

مهند عابتلج انتي يالحلوه

واخذنه للبيت استقبلتنه الحجيه و ماما حبيبه وهي تكلي لج موحلو البيت بلياج

وحنين اجت باوستني وهي مبتسمه الحمدلله على سلامتج

ضليت صافنه الله يسلمج حبيبتي واحجي بنفسي شهل تغير معقوله لمن عرفت اني مالي دخل بلعبه وسن او ايه صارت تتعامل وياي بحب

باوعت الماما حبيبه هي ضحكت وكالت ماتتصورين شلون حنين جانت ضايجه عرفت البزون ماتحب غير خانكها

ضحكنه اني وحنين ياسبحان الله حنين تضحك وبوجهي شهل تغير

ومرت ايام واجتي اشهور صار حملي بشهر السابع وبيه بنيه

بس كلش احس نفسي مابيه اسوي اي شي وبسرعه اتعب لذالك كال سلطان لاتشتغلين اي شي بالبيت وبس ارتاحي

جانو الكل مهتمين بيه ماما حبيبه الي طايره من فرحتها وما احجي عن الحجيه وفرحتها وكل شويه تكول ما اصدك اشوف ابن سلطان وحتى حنين تعاملها هواي تغير وياي وصارت طبيعيه

وسلطان يافرحته لمن يحط ايده على بطني ويتحسس حركت الطفله ومرات يحجي وياها واني اضحك عليه

وبهذاك اليوم جانت الحجيه هواي تعبانه ضغطها مرتفع كلش اخذنها بالليل للمستشفى ونضمو ضغطها بس هم تعبانه لكن احسن شوي رجعناها ع البيت والصبح اجني خواته السلطان يشوفنها وسناء هماتين واختها ام سناء واختها الثانيه ام علي والبيت متروس ماشاء الله

اني جنت كلش تعبانه بس نزلت اساعدهم بالخفايف انكسر خاطري على ماما حبيبه خطيه حيل تعبانه محد وياها بس حنين وملاك رادت تساعد

بس ماما حبيبه مخلتها لان حامل بشهرها وهمات تعبانه كلش

نزلت للمطبخ وبدت لمناغز بس نايمه وهنيال حضها شكبره وخوش سحر مشتغله ومن هذا الحجي

اني اسمع من اذن واطلع من اذن مثل ماكلي سلطان

وكملنه الغده وصبينه جانو قسم منهم ديصلن ويصلن فرض ويسولفن ساعتين

ورحت اني الغرفه الحجيه كلتلهم يله صبينه غده

بس سناء ومهى ماكو يمكن ديصلن بالاستقبال

رحت للاستقبال وبالفعل جانن موجودات اهناك

فتحت الباب وجان باب الاستقبال من ينفتح ابد ميطلع صوت

فتحته ومحد انتبهلي

واسمع مهى تكول ها خذيتي

سناء اي

مهى اخاف احد شافج

سناء لا ابد اطمني محد شافني

مهى لعد ضميهن زين لحد يشوفهن وان شاءالله هلمره تضبط

سناء لاتخافين ضامتهن والله يسمع منج وتضبط والباقي علي

يتبع......