رواية حكمت محكمة الحب الفصل الثاني والأربعون 42 - بقلم زينب العبيدي(زينبيه)

شلونكم حبات القلب

٣١١٦كلمه قراءه ممتعه

#حكمت-محكمة_الحب

بقلم #الزينبيه

البارت #٣٢

بس جان مو الوحده سناء ورا وهي لابسه بدله بيضه عاديه وصابغه وجهه صبغ بالمكياج

عكدة حواجبي واني اباوع الها واباوع للجنطه بيد سلطان التفتت على ماما حبيبه شكو ماما شصاير حجيتها بخوف وكلبي معصور

ردت عليه ماما حبيبه وهي ترفعلي جتافها بمعنى ما ادري

الحجيه وهي تضرب على فخذها وتحجي بخوف شكو يمه سناء امج بيها شي شصاير احجي

حنين يوم ما اتصور اكو شي موزين الوجه والمكياج مايدل على ان اكو شي محزن

سناء ياخاله شهل حجي بشنو مفاوله ع امي

الحجيه وهي تصيح جا شصاير فهمووني

سلطان اعصابج حجيه لايرتفع ضغطج اني اتزوجت سناء ومنا ورايح هذا بيتها

اني مجرد سمعت الحجي ضربت على اخدودي وماما حبيبه لطمت صدرها حيل

حبيبه تحجي وهي منفعله هذااا الجنت خايفه منه شفتي نواره تذكرين من كتلج اتصفينه بالشارع اذا خذاها سلطان

والخفت منه الليله وكعت بي بس شلوووون سلطااان فهمنييي اكو غلط بالموضوع لازم اكو غلط بالموضوع فهمني شلون صار هيج وفجئه تزوجت ومحد يدري بيك وبدون سابق انذار واني الي ادري بي سناء اخر همك

اني جنت بعدني تحت تأثير الصدمه مامستوعبه الي حجاه سلطان فاتحه حلكي وايدي على خدودي وماما حبيبه منفعله وتصيح وتبجي

سلطان اششششش ولا كلمه كلمه زايده من عندج تعتبر اخر كلمه الج اتكافي الشر وسدي حلكج

الحجيه يمه فهمنه شلون صار هذا كله يمته اخطبت ويمته اتزوجت ولك انته مساع نزلت من الواجب وهسه طبيت علينه وانت متزوج

سناء شدعوه عليج ياخاله بدل ماتكوليلنه مبروك

الحجيه اكول مبروك ساعة الادري شلون صار هذا كله وليش اتزوج

سلطان مليت من النسوان العندي احسهن مو ثوبي وتعبني وسناء انسب وحده الي ارتاحيتي يايمه

مهند ياخويه احجيلنه حجي منطقي كل احنه ندري حبيبه ذهب ونواره دره شنو المليت من عنده وهاي زوجتك هستوك اتزوجتها ماصار سنه وحامل والحمد الله وتحبها تموت عليها وهم حبيبه ماتبدلها بنسوان الدنيه احجيلي حجي منطقي ترى مايصير من حقنه عليك نعرف شلون ويمته وليش اتزوجتها

صاح سلطان بعصبيه وصوت عالي شنو هووووو اليييش كتلكم اتزووجت ومحد اله دخل بيه ومو من حق احد لا انت ولا غيرك ولا عشره مثلك تسألون وتتدخلون بحياتي شي واحد اريدكم كلكم تعرفونه صغيركم وجبيركم مره ورجال سناء صارت زوجتي على سنة الله ورسوله وهذا البيت بيتها اي شي يضوجها اي شي يزعجها اي واحد يتعرضلها معناتها ايهيني اني واليهيني مصيره الشارع كلكم بدون استثناء

والتفت على سناء يله حبيبتي صعدي فوك وشوفي ياغرفه تعجبج انفرغها الج

هذا الحجي كله اني جنت جامده بمكاني حتى ما ارمش شنو الي دايصير وليش كل هاي الاسئله اتدور ابراسي

مهند بس سلطان انت تدري هنه غرفتين فوك غرفة حبيبه وغرفة نواره وغرفة المخزن وين تريد تكعد سناء

سلطان اكعدها بالمكان الي يريحها حتى لو رادت غرفتك هم تطلع منها

مهند ياريتها تختار غرفتي اقلها اني رجال وعزابي واكدر انام يم الحجيه بس صعبه على حبيبه ونواره يطلعن من غرفهن

اتجاهل مهند وصعد

حبيبه جانت تلطم على صدرها وهي تكول سوتها ام السحوره الله لايوفقج ياسنيوه الله لايراويج يوم حلو بحياتج

صارت اكبالي وهي تكلي ماما نواره سمعتي داتستوعبين الي صار
بعدتها من طريقي مثل المبرمج وصعدت بدون مالتفت عليهم وهم يصيحون علي شكو وين صاعده نزلي

صعدت ولكيت هاي الحيوانيه واكفه باب غرفتي وتكول السلطان اريد هاي الغرفه

اهنا انفجرت الصدمه وصارت حاله هستيريه

وركضت سحبتها من شالها وهي واكفه لجججج انتتتي

شنووو حسبالج دخلتي هذا البيت وخذيتي سلطان راح تعيشين مرتاحه لا ياحبيبتي ماحزرتي طلعي من البيت بكرامتج لاوروح امي اطلعج سحل الساقطه

ضلت تصرخ واني اجر بشعره

بس ماحسيت اله واني انرفع من الكاع وشعري ايريد ينقلع من مكانه وشمرني بالكاع

وراد يرفسني بس ماما حبيبه ركضت وجانت هستوها صاعده وشمرت بنفسها كبالي ورفسها بضهرها

وجان يصيح لجججج انتي خبله تبن حيوانه تضربينها وبوجودي اليوم احركج حرك وا ارتاح

وضل يصيح ويضرب بيه وبحبيبه ومهند بالكوه
دفعه وبالكوه كدر يوكعه بالكاع

والي يزيد القهر الحيوانه سناء تضحك واكفه باب غرفتي

ومهند جان يصيح وسلطان يصيح

وسناء الحيوانه فاتت الغرفتي وطلعت كل ملابسي وشمرتهن بالكاع وداستهن برجليها

واخذت شكو شي موجود على ميز التسريحه من مكياج عطورات وهاي السوالف وكسرتهم كلهم

كمت من مكاني واليشوفني مو اني نواره اجتني قوه من الله ولاجني حامل كمشت شعرها ودنكتها المستواي لان هي طويله وطكيتها براسي

وصرخت هي واني افتحت اصابعي وحطيتهن بعيونها وضلت تصرخ وكامشه عيونها وتغلط ودفعتها حيل وحطيت الملابس على وجها اخنك بيها واكتم صوتها

واصيح موتي يالحقيره موتي يالعانسسسس يالبايررره لج انتي حاسبه نفسج مره وتتزوجين انتي الجلب مايرضا بيج بسحورتج جبتيلج رجل بسسس لا مايفيد الرجال الي تجيبينه بسحورتج

رفستني لزكتني بالباب مالت الغرفه كمشت شيشة العطر وكمت هي شافتني سحبتني من شعري واخذت الشيشه من ايدي ودفعتني برا الغرفه

ورادت تشمر علي العطر بس اجتي ماما حبيبه الي جانت ايدها على ضهرها من اثر ضربة سلطان وبالكو تمشي

كمشت العطر من سناء وكالت مهنايه سناء بس والله والي اسمه الله ما افكج لو اعرف اشبع كتل ما اخليج اتشوفين يوم حلو

عاد اهنا كبت سناء وكالت بسيطه طلعتجن من هذا البيت على ايدي ودفعت ماما حبيبه وكعتها بالكاع

هنا ماحسينه اله وحنين سحلت سناء سحل بالكاع من شعرها وداست برجلها على راسها وكالت اذا هاي ايدج انمدت على حبيبه والله والله اكسرها وجربي عيديها

ومن جها ثانيه الجو محترك ابين سلطان ومهند امصايح لحد ما سلطان سحب اسلاحه وراد يرمي مهند

لولا لطف الله ركضنه كل احنه حتى الحيوانه سناء

واني وحنين كمشنه مهند وصرنه كباله

وحبييه كمشت السلاح وتعلكت بي

وسناء كامشه سلطان من ظهره

ومهند يدفع بينه عووووفنه خلنننه يكتل اخووو اخووو وحيييده علمود جلبه ماتستحي

وسلطان يكله والله ماجلب اله انت وكل الي بهذا البيت اليوم اسبحك بدمك تبن ابن التبن

وبالكوه سناء الحقيره هدته ودخلته للغرفه

ومهند من لاشعور بجه ومسح اعيونه بسرعه

خذت راسه ماما حبيبه وباسته على راسه وكالتلها لايمه لاتبجي اخوك مو قصده ولايدري بروحه الرجال مسحور ومعمي على عينه واله بربك تشوف سلطان صاحي بهذا تصرفه

مهند لج حبيبه راد يرميني ورفع ايده وضربني وغلط علي وسبني

حبيبه وبرايك هاي سوالف سلطان

مهند لاوالله مو تصرفاته

حبيبه حسبي الله عليها

بهذاك اليوم صار هواي اشياء انكسرت هواي كلوب اتحطمت هواي خواطر

نزلت واني دمعي مانشف اتحسر وحسرتي تحرك كون كامل اااخ ما الحك ارتاح شوي واتهنه اله تطلعي سالفه

وماما حبيبه الي كضت اليوم تضرب صفنات وبالها مشدوه احس بيها تريد تبجي بس تكابر

وحتى حنين جانت تبجي بهذاك اليوم

ومهند الي بس نزل دخل الغرفته واني متاكده منه نزلت ادموعه مثلنه مامتعود على اخو يهينه ويضربه والاقسى راد يكتله خلاص وبدم بارد وعلمود مره

والحجيه اتصلت على اختها اتعاتبها وكالت الها ليشش خيه حتى ماكلتونه اتزوجون سناء السلطان حتى بدون ماكلتولنه وشلون قبلتو تنطونها الرجال متزوج اثنين وبتكم بعدها بنيت بيت

واختها تكللها والله يا ام سلطان ياخيه سلطان باس حتى الايادي بس علمود ياخذها وتوسل لحد ما ذل نفسه شترديني اكسر بابن اختي وسناء ماتعز عليه
واذا انتم ماتدرون فا عاتبو هو مو تعاتبونه احنه ندري بيكم على اساس تعرفون بسالفه الزواج

وضلن وحده تعتب والثانيه اتبرر وكلام ام سناء بحق سلطان يصدم

يعني صدك اتغير مو ١٨٠ درجه لا ١٠٠٠ درجه

اتاكدنه الي بي سحر وهلشي واضح وضوح الشمس

بوكتها كل احنه ماتعشينه

غافلتهم وصعدت كلبي ماينطيني اعوفهم احس روحي محتركه بنار يمه معقوله سناء سناء وسلطان
ااخ سلطان زوجي اني حبيبي الي وبس شلون انسد عليهم باب واحد احس كلبي ايريد ينفجر ودموعي مانشفت

كعدت الم بملابسي وابجي وابجي واني اسمع اصوات ضحكهم وهل كلبه سناء شلون تصيحله حبيبي وحياتي

واني اعض على شفتي وابجي وكامشه بطني يمه بغرفتي ياربي وعلى فراشي اااخ وتحط ملابسها بكنتوري

كمت دكيت الباب بلا شعور

صاحت سناء منوو

مارديت بس ادك بالباب

فتحت الباب دفعته ودخلت

لكيته متمدد على الجربايه صرت اكباله وكمشته من قميصه

لك اصحه عفيه هاي ساحرتك سلطان فدوه اسمع مني هاي ساحرتك اصحه حبيبي

كمش ايديه حيل وشمرهن وهو يصيح شيليهن لا اكسرهن

-لك سلطان وين راح حبك الي مو اني نواره ام بنتك حبيبي كمشت ايديه وحطيتهن على بطني واني ابجي

اجت الحقيره سناء دفعتني وخري من يمه انتي والله لزكه

جريت شعرها اني لزكه لو انتي بايره وعانس وام السحوره

سحبني سلطان من شعري ودفعني حيل وداس على ايدي حيل وهو يصيح اكسسسرها والله اكسسرهااا اذا مديتيها

وكومني من شعري ودفعني برا الغرفه وسد الباب

ضليت انحب وابجي واني بالباب

ابد ولارف كلبه الي ولا انكسر خاطره علي تمنيت يجي ويشبكني ويمسح ادموعي ويكعدني على رجله يحجيلي حجي حلو

ما استوعب الي صار

مرن ثلاث ايام وسناء شايخه بالبيت الامر الناهي وبزود سلطان كلشي مسموح اله اتسوي

وسلطان كاعد بالبيت هاي ٣ ايام وماطلع من غرفته وسناء مكابلته وما يريد ايشوف ولايسمع من احد غير سناء الجايفه

اني حالتي لا يحسد عليها القهر كاتلني والغيره شاعله بركان بيه ويادمعه مانشفت واباوعلهم من ابعيد لبعيد واسمع حجيهم وحجايات الغزل الي جنت اسمعها هسه صارن السناء

وكل احنه مانحجي وي سناء الحقيره حتى خالتها ماتحاجيها

بس غصبن علينا انسويلها الغده والعشه والريوك

لحد ما يوم ثالث اجت ماما حبيبه وكالت سالت وحده وسولفت حالت سلطان ودلتني على شيخ يفتح ويعالج بالقران

-ماما بس هذول يخوفون

-حبيبته صحيح احنه مانعرف سالفت السحر وسوالف الموزينه بس يا امي السحر مذكور بالقران والكل داء دواء يجوز الله يجعل علاج سلطان عند هذا الشيخ

-خوش ماما لعد اروح وياج

-الله كريم العصر انروح

وكا العاده دخل سلطان مثل المبرمج وصعد الغرفته لاسلام ولاكلام ولاحتى نظره حتى امه بس يرفعلها ايده بمعناتها السلام وحلكه مايفتحه بكلمه

وصبينه غده وكملنه نزلت سناء اخذت الغده وهي كاشخه ومتمكيجه واني عيوني تتبعه ودمعه طاحت من عيني واحس كلبي تعب من القهر

مشتاكتله ٦ ايام ماحاضنته ولا نمت على ايده ولاسمعت كلمه ياب الي احبها ولاحجي الغزل الي يرضي انوثتي واحس نفسي بي ملكه زماني

مايعبر يوم اذا ما اتذكر ايامي وياه وشلون يعاملني بحبه

صحيح قسى علي مرات بس دائما جان يجيلي ندمان ويراضيني

رغم اني الي اغلط بحقه واني الي اعانده بس جان حضن دافي الي ملجئي

ما اكلت كا العاده لكمتين وكمت دخلت الغرفه الحجيه اهنا انام يمها من خذت سناء غرفتي مهند لح علي هواي اخذ غرفته ماقبلت حتى ماما حبيبه وحنين هواي رادني اجي وياهن بغرفهن بس ما قبلت اتمددت وابجي

وللساعه ب٣ حسيت البيت صار هدوء وحتى الحجيه نامت

طلعت من غرفتي صعدت الدرج على كيف احس بروحي تتكطع احبه مو بيدي وما اكدر اتخيل هل حيوانه سناء تنام بحضنه وبغرفتي هاي الي جانت تتمنه نضره منه هسه صارت نايمه بحضنه ااااخ كلبي يوجعني من افكر بهذا الشي

صعدت اتقرب حطيت اذني يم الباب ماكو صوت

سمعت صوت مي بالحمام اكيد لو هي لوهو دايسبحون

لان ضوه الغرفه مالت ماما حبيبه مطفي

ياربي بس يسمع مني بس احجي ويا شوي بلكي يصحهمن سكرت السحر هاي وينقلب السحر على الساحر

شوي وانفتح باب الحمام رحت باوعت دايفرج اسنانه وهو واكف كبال المرايه ولاف الخاولي على خصره

بس شفته طاحن ادموعي اجيت شبكته من ضهره واني دموعي اتطيح صدك مشتاقتله وياي بنفس البيت ومحرومه من شوفته هو كل اهلي هو زوجي وحبيبي

حط ايده فوك ايدي وحجه وهو بحلكه المعجون

شبيج حبيبتي

فتحت عيوني كال حبيبتي الي لو يتهيألي

دنك يغسل حلكه بالمي وغسل فرجته ورجعها بالعلبه وسحبني من ايدي صرت كباله

وبسرعه عكد حواجبه انتي شلون وياج شكووو تصعدين اهنااا اكرهج اكره هذا الشكل ودفع وجهي بجف ايده ترى باعي اني ما ذابحج لحد الان وخلصان منج كله علمود الطفله الي ابطنج

-بس ياسلطان انت مسحور وهاي مستغلتك فدوه اصحه اني نواره حبيبتك

-وخرري من وجهي لا اشوه وجهج حبيتي والما حبيتي بالطكاك الي يطكج واني لا مسحور ولا اكلان تبن سناء من الاول حبيتها وردتها بس الله بلاني بيج

وعافني وراح

حجيه يوجع كلبي بسصبرت على نفسي وكلت مو بوعيه سلطان مستحيل يتصرف بهذا الشكل او يحجي هيج

نزلت حطيت راسي ع المخده ونزلت ادموعي كاالعاده

وللعصر اجني خوات سلطان الكبار مهى ومنى ومنار وام سناء ونسوان خوانها على اساس يتباركولها

فا ماما حبيبه كالت يله لبسي بسرعه خل انروح للشيخ قبل لايبدن بمغثتهن

لبست وكملت وخذت ماما حبيبه الاذن من سلطان وكالتله رايحين للدكتوره

وانريد نطلع وصااحت سناء ووووين

التفتت ماما حبيبه باوعتلها من فوك لي جوه وطلعت

صاحت بسسسيطه ادبسزيات تتجاهلني بسيطه

-شفتي يوم اول تالي احنه اتهين بينه هاي الزباله

-ميخالف ياماما يوم الك ويوم عليك خليها ماخذه راحتها نست ان الله فوك راسها

رحنه للشيخ ودخلنه يم زوجته سلمنه عليها كلش خوش مره استقبلتنه

وشوي ودخل علينه رجال جبير لحيته وشعره بيض ولابس دشداشه بيضه

اول مادخل كال الله بالخير

ردينه الله بالخير والكرامه

الشيخ شلونجن بنياتي

حبيبه والله ياشيخ الله يسلمك بس كلش مو زينات حاليان

الشيخ لحظه لاتحجين شي التفت على مرته جيبي القران وكلاص مي دافي

راحت مرته جابت القران وكلاص مي دافي

سمه باسم الله وضل يقره ايات ويصللي على محمد ويستعيذ من الشيطان تقريب خمس دقايق

وبعدين رفع راسه الماما حبيبه هو شسمه وشسم امه

اتعجبنه لان عرف الموضوع خاص برجال

كالت ماما حبيبه اسمه سلطان ابن فضيله

فتح القران وضل يتلو ايات من صفحات متفرقه

وبعدين سد الكتاب

ونفخ بالمي وانتظره الحد ماصفه مايه وكال استغفر الله ولاحول ولاقوه الابالله سمعي يابه هذا سلطان مو بس مسحور لا هذا مسطور سطر بالسحر وسحر كلش قوي على الاغلب سحر صابئي والمسويه السحر وحده قريبه منه كلش اواثنين وحده بيضه وثانيه حنطيه وبايدها حرك او وحمه

حبيبه اي هذا بنت خالته الي اتزوجها هستوه واخته يمكن ...زين شيخ شلون انفك هذا السحر وتكدر تبطله

الشيخ مع الاسف مااتصور اكد على هيج نوع من السحر القوي يرادلها واحد اقوه مني راح ادليكم على هذا الرجال الخير هو من اهل النجف بس يجي كل خميس البغداد
واني كل الي اكدر اساعدكم بي هذا المي تحطون بي سبع ورقات سدر وتقرون عليه هاي الايات الي تلكينها بهذه الورقه اتفضلي بنيتي

اخذتها ماما حبيبه وانطته افلوس للرجال واخذت عنوان الرجال الثاني ورحنه على البيت

واول مادخلنه للبيت كبل سناء صاحت حبيبه انتي وهاي يريدجن سلطان فوك

صعدت ماما حبيبه بدون ماتلتفت عليها كلش واني صعدت وراها دخلت للغرفته ودخلت اني وراها

حبيبه نعم سلطان شكو كالو تصيحنه

كام بسرعه وهو يصيحح ويييين جنتتتي وليشششش طلعتييي

حبيبه بس اني كلتلك راح انروح للدكتوره علمود نواره وانت قبلت

سلطان اني كلتتتتت روحن ولج اني كلتتت وكمش شعرها ودفعها الكنتور

صرخت بوجها ماما حبيبه كاااافي اصحه اصحه باع حالتك صاير بس تكتل وتكسر الخاطر تلعب بيك لعب سناء توجهك يمنه ويسرى مثل مايعجبها

سلطان لجججج كااافي سدي حلكج حيوانه ونزل عليها راشديات وضرب وخشمها طك دم واني احاول افكه من يمها بس ما اكدر وكلساع يلزكني بالحايط واحصل دفعه

وسناء الحيوانه تباوع وهي بالباب ومجتفه ايديها
وتضحك

ولمن اشتفه منها دفعه من الباب وهو يلهث وجها احمر

والتفت علي انتي الله يا انتي ضاملج ضمه

طلع سناء وسد الباب بالقفل

واني ارجف وارجع ليوره ب بس س سلطان انت انت تدري ان اني حامل ولا لازم اروح للدكتوره

سلطان لا زم تروحين موو سحبني من ملابسي وشككهن وضليت بس بالداخليات وربط ايدي ورجلي بالملابس لمشككه

واني ابجي واقاوم حاولت اقاوم بس لا هو اضخم واقوه مني بهواي

طلع القداحه من جيبه ودور بالمجر طلع شمعه وشغلها وضل يقطر بيها على جسمي واني اصرخ من حروره الشمع وهو بمعاني وجها الراضيه والبارده مامهتملي ابد كنما ارهابي او مجرم كدامه اني وهو دايسوي شغله من تعذيب حتى يعترف

احس كلبي الي ينجوي بالشمع مو جسمي

بجيت وبجيت لحد ما نشفت دمعت اعيوني واختفه صوتي على كد ماصرخت ضليت جثه هامده احس بالوجع بس ماكو صوت يطلع ولادمع ينزل

وهو مستمر شعل شمعه لخ ونفس الشي

ولمن شافني ما اصرخ ولا ابجي كمش راسي وركعه بالكاع اكثر من مره لحد ماطلع صوتي واني اصرخ وابجي

وهل حجي ماما حبيبه كسرت الباب من الدك وتصيح بس هو ابد مامهتم وصاحت على الي كاعدين جوه محد رد عليها كلهم متشفين بينه وشمتانين عد حنين الي صعدت بس شبيدها تسوي والحجيه الي تصيح وهي جوه بس منو يسمعها

ولمن شفه كلبه مني سحبني من شعري وشمرني بره وطحت بالكاع باوعت على سناء وهي واكفه فوك راسي وتضحك ااااخ تمنيت اموتها واعذبها وافترسها مثل الاسد بس حيل مابيه

عبرت وداست على ايدي وهي تمشي ودخلت الغرفتي وسدت الباب عليهم

وماما حبيبه ركضت علي شبكتني وكومتني الغرفتها

وحنين ركضت جوه جابتلي ملابس ومرهم مال حروق

واني اناشغ وحنين وحبيبه يبجن وياي مابيدهن شي

مرت ايام وسوينه الي كال عليه الشيخ بس هذا زاد مانقص نفس الشي

وراحت ماما حبيبه الهذا الشيخ الدين الثاني بدون محد يدري بيها وكال الها نفس حجي الرجال الاول وهم انطاها مي اتشربه منه وحروزه تحركهم وكت المغرب واتحطهم بالمي الي يسبح بي هو

وبالفعل سوينه خلينه الحرز بعد الحرك بتانكي المي الفوك والمي الي لازم يشربه بتانكي مال مي الشرب

وانتضرنه نتيجه بس ماكو ابد اي نتيجه

و مرن شهرين واني دخلت بشهري وصرت على ابواب الولاده

وبهذا الشهرين شبعنه كتل وخصوصا اني جان يتفنن بتعذيبي من جوي وضرب وحبس بدون اكل وشرب ويربطني وضرب بالنطاق مثل المجرمين مابكلبه رحمه ابد

صار مثل الوحش  بس يعارك ويكتل ويغلط بالطابه والطالعه

حتى على امه مد ايده

وبس يم سناء يرخه ويتروض

شبعت ضيم جنت افكر اطلك لان كلش تعبت بس اتراجع واكول لا هذا ابو بنتي ويجي ويوم الله يكشف سناء مالازم اخسره ان الله مع الصابرين هو بلا وعي ديسوي هيج

وبهذاك اليوم وهستوني ماكله كتلت موت كالعاده دخلت الغرفه الحجيه وعلى فراشي ابجي مثل كل يوم

و وجع ببطني يموتني بس اتجاهلته وجانت الساعه ب١ باليل

وبده يقوه الوجع كلش والساعه صارت ب٣ ماتحملت ضليت ابجي واتلوه بوجع وكعدت الحجيه وهي تسمي وتقره علي

كلتلها يوم راح امووت والله بعد ما اتحمل

كامت وهي تكول ياربي لطفك يوم هاي ولاده عندج خلي اصيح الحبيبه

وكفت يم الدرج وتصيح واني كمت وراها اتلو وابجي

تمنيته ينزل ويشيلني للمستشفى تمنيت اشوف فرحته هذيج نفسها لمن جان يحط ايده على بطني ويحجي وي الطفله

طلعت حنين وهي تكول للحجيه ها يوم خير

الحجيه يمه صعدي كعدي حبيبه هاي الطفله جاي تطلك المكروده

صعدت حنين تركض والحجيه راحت المهند اتكعده

واني اصيح وابجي

نزلت حبيبه تركض وعبايتها بايدها وتلف بشالها بالمكلوب خطيه وهي تصيح على مهند يله ماما هنودي بسرعه

وتصيح على حنين حتى تجيب جنطه ملابس الطفل وملابسي

وتسمي وتقره علي وتكلي لاتخافين ان شاءالله ساعه وسلامات حبيبتي ربي يلطف بحالتج ودعتج بايد واحد احد

جنت ابجي ومتوجعه بس ابتسمت لمن شفته وراه ماما حبيبه اي هو سلطان مد ايده الي واني شمرت نفسي عليه مثل الطفل من يشمر نفسه باحضان امه

وشالني بس ابد ماباوع بوجهي

بس قبل مانطلع صاحت عليه سناء من وراه وين رايح سلطان

سلطان اخذهم للمستشفى

سناء ماله داعي مهند موجود انطي السويج

سلطان بس

سناء يمعود داتعال عليمن معكر نومتك علمودها تعال

نزلني بالكاع وراح صعدلها مثل طفل مطيع وراح الامه صدك اتمنيت بهذيج اللحظه اموتها لو اموت اني وارتاح

خذوني للمستشفى وطول الطريق ماما حبيبه تدعي وتبجي

وصلت للمستشفى والوجع جان مايوصف ماكو مثله وجع كسرت كلبي هم زايد علي الامي وجمله وحده جنت اردد بيها الحكلي سلطان لك انت نايم اهناك واني هنا راح اموووت

وبعد ٤ ساعات من الطلك والام الولاده جبت ابنيه

طلعوني ويافرحتي بيها واني اباوعلها مثل الملاك نايمه بصفي وبيييضه كلشششش بحيث شكلها ملائكي وبجيت واني اباوعلها واحجي بنفسي

وينك تعال شيل بنتك الي انتضرتها ٢٠ سنه تعال شوفها واذن باذنها

وشبكتني ماما حبيبه وباست راسي وجنها تعرف بشنو دا افكر كالت ميخالف ياماما الله ان شاءالله يشفي ويرجعلج ويرجع البنته ويسعدكم صدكيني الله مايضلم ولا يساعد الظالم ويجيلها يوم ونشوفها باارذل حالاتها

وبعد ساعتين كملنه اجرائات البيان والجناسي واجرائات الخروج ومهند يركض بيهن خطيه

طلعنه ماما حبيبه شايله الطفله وكلساع تبوسها ومهند يدفعني بالكرسي المتحرك

سندني وكعدني بالسياره

ورحنه على البيت واول ماوصلنه........

يتبع........