الحلــــــــقه الخامــــــــــــــــسه
رواية... هل كانَ حُلماً...؟
{ العِراق-المُصغَر ... التوباز }
بقلمي ... لؤلؤة_البِحار ...
___________________•
حره... سكتت وكملت اكل كتله... شوف لهيتني ومااخذتني للمدينه
رشاش... مانلحك ع غير يوم
سكتت
مر وقت ودانمشي طبينا لمكان حلو تقريبا بيه بساتين وماحسيت غير سياره سوده شخطت كدامنا
اني صرخت حطيت ايدي ع اذاني وكفت سيارتنا
حسيته وهو يحط ايده ع كتفي وگال
رشاش... اسم الله
نزلت اديه و باوعتله هو يباوع لگدام ومبتسم گال
:- اهدي وابقي هنا لاتنزلين
وفتح باب السياره وصاح:- هلا بالصايعين
وطلع باوعت للسياره الكدامنا سوده نزلو منها شباب لابسين الزي الاسود هو وكف كدامهم شفت واحد تقدم سلم عليه
ركزت بيه هذا كسار تحاضنو واسمعه يگول
رشاش... هلا بالصايع صاحب الصايع
اسمع واحد يكوله... ها نسيتنا ابو السباع
حضنهم وكاللهم :- ولدي السباع انتو ببطن عيني
كسار كله... شو خلي اشوف عيونك خاف الگه غير ناس
رشاش كله... انجب حبيبي
انتبهت ع كلب اسود شكله كلش يخوف لازمه واحد بالحبل گعد رشاش ع ركبته كدام الكلب وضل يسولف ويضحك وياهم ويلاعب الكلب واني بداخلي اكول
:-هذا شلون يكدر يلمسه ميخاف يعضه
ركزت ع شكلهم ماتنلام رغوده من جانت تحبهم صدگ شكلهم هيبه سمعته گللهم
رشاش... البقيه بالواجب؟
كسار گله... اي نحن ما مثلك نسخت
جاوبه رشاش... اكل خرا يولو...
ديكمل كله كسار... بس لا تاكلني بلسانك جاي اتشاقه
ضحك التفت على واحد كله... شلون صار ابوك؟
جاوبه... والله سيدي على نفس وضعو بين البيت والمستشفى
حط ايده ع كتفه وكال... بحيل الله يرجع اقوى من قبل
ضلو يحجون اني طلعت الجبس وكعدت اكل واتفرج شكلهم حلو
لشوي شفتها فرصه
فتحت الجكمجه ادور ع موبايل ماخذ موبايلاته
بس شفت موبايلي فتحت بسرعه دااتصل على رتيل شفت الموبايل مابيه خط
تذكرت من كسره ضجت كلت لو ماكاسر الخط جان اتصلت
ضليت ادور بالسياره ملكيت شي باوعت شفته جاي باتجاهي وجماعته صعدو السياره
رجعت الموبايل ورجعت ع اساس دااكل ليز فتح باب السياره ودخل كال
:-گتلج نوصل يم خالتي وانطيج تخابرين اخوتج جاي تدورين هينا شكو... وسد الجكمجه عدل
حره... هينا شنو؟ عوجت حلكي كال
رشاش... تعلمي... وحرك السياره
حره... لا اني ابقى احجي بغدادي احلى وانت هم احجي مثلي
رشاش... انجبي وتعلمي
هزيت ايدي كتله... يعني شبيهم هذول... واشرت ليكدام
رشاش... شني؟
حره... هذول شنو الا يقطعون الطريق خبلوني
رشاش... انتي جبانه صيري سباعيه
حره... غير هم شخطو كدامنا يكول دايكتلونا
رشاش... لا ولدي هذول
حره... حتى جبسي وكع حسبي الله
ضحك... هذا كل همج
باوعتله كتله... وبعدين ليش تكول ولدي تحسسني انك عجوز ترا بعدك شاب
رشاش... اي والله ثلاثيني جاد
ضحكت كتله... رشاش لعد انت مو كلت لاختي اهلك بالانبار؟
رشاش... اي
حره... لعد شو جايين لتكريت؟
رشاش... خالتي بتكريت نبقى يمها فتره
حره... ليش؟
سكت مجاوبني
مر الوقت وغربت الشمس اني بس اشوف هيج منظر انعس لا اراديا واحس بشعور حلو حطيت راسي ع الجامه واباوع الى ان غفيت
فزيت عليه وهو يگرصني بزندي ضربته بايده كتله... شكو تكرص
ضحك كال... وصلنا كعدي
اباوع للمكان زراعي كتله.. الله الهوى يجنن هنا
سمعته ضحك كال... هاي خالتي
التفتت كتله... وينها
اشرلي على بابهم بيضه وهي فاتحتها وگاعده ع كرسي وتدخن ويمها نسوان اثنين ويدخنن نفس حالتها
واسمع اصواتهن يحجن
اني بلعت ريگ گتله
... شو مبينه تخوف
رشاش... بالعكس كِلش تنحب
وكف السياره يمها وفتح الباب هي كامت كالت
... هلا بابو السباع يمه هسه تكحلت عيني... وباسته براسه
والنسوان هم هجمن يسلمن عليه وكالن الها يلا... احنا نروح
كلتلهن... يا وين بعد وكت
هنه جاوبنها... لا هم يلا ورانا كعده الصبح... تعاي ام جنيد يلا
.. وراحن
رشاش اجه باتجاه الباب فتحه وخزرني واشر عليها وابتسم مجامله بمعنى سلمي اني جريت نفس وكلت... ياالله
نزلت ولزمت ايده خايفه ومتوتره شافتني نزلت كالت
... يااحح ... وباوعتله... هاي منييي؟؟
اني بلعت ريك هو جرني من كتفي عليه كاللها... مرتي
گلتله... ايا كو**د تزوجت وماكتلي اليوم الا اشگك
رشاش... فضحتينا نحجي جوا
كلتله... اي دخل السياره جوا لتخليها برا الثيران هواي لا يشخطوها
رشاش... ماشي... باوعلي كال... يلا روحي ويا خالتي
لزمته من ايده بقوه وفتحت عيوني واشرتله بمعنى... عليك العباس لاتعوفني وحدي
هو ابتسم وباوع لخالته كلي بهمس :-روحي لاتخافين دقايق
بعده ديكمل و مااحس غير و هي تجرني من ايدي الثانيه بقوه شهكت وابتسمت مجامله كالت
... شني يمه خايفه اكلج تعاي تعاي خندحگ اختيار ابو السباع حلو لا
تحجي وتجر بالكلام وجرتني طبينا جوا كالت ... انتي شسمج
كلتلها واني اباوع للبيت... حره
كالت... شكد عمرج
حره... مواليد ٢٠٠٠
كالت... ياح صغيره على وليدي
ابتسمت مجامله انتبهت على بيتها زراعي مثل بيوت الريف كلش حلو التواليتات بالبدايه وحدهن ومساحه كلش جبيره وبيها زرع واسمع صوت دجاج بعيد
والمكان كلش واسع واكو غرفه وحدها والمطبخ وبعد وياه الهول والاستقبال متصلات ببعض
دخل السياره رشاش وقفل الباب واجه يمنا كالت... بغداديه؟
هزيتلها راسي باي كالت... وعِلِيي احجي خنسمع صوتج شني خرسه
اني فتحت عيوني ع وسعها كلت هاي شنو تغلط عليه باوعت لرشاش بعصبيه ضحك كللها
رشاش... خاله تحققين واحنا ع الباب خلي نفوت ندحگ دربنا
كالتله... ابد خلي افحص شو بلا
اني لزمت ايد رشاش كالت... شني يمه ماشبعانه منو عندي غرفه اكعدكم بيها وشبعي حضن و...
دتكمل كللها... هوب هوب يمعوده... وضحك
حسيت باحراج كالت... گلبي بس خلي نشوفج
وجرتني وكفتني يمها كالت... اي عيني شني هاي مكرشه
فتحت عيوني متفاجئه وباوعت لبطني حطيت ايدي عليها هزيت راسي لااا كالت
... هم هزت راسها
رشاش كللها... هي هاي مرتي هادئه ماينطلعلها صوت بس من تتعود عليج الله يساعد راسج
ضحكت خالته كالت... اي هاي نقطه حلوه احب هيج بنات شو يمه
باوعتلها كالت... حيل ضعيفه جايبها والجو بارد شون....
دتكمل كللها... خاله لسانج بروح ابو شهم
گلتله... ياح شبيك اليسمعك عبالو جاي اشرحلها
هو خزرها وابتسم مجامله تلمست شعري كالت... حلوه حلوه ذوقك حلو
رشاش... خاله شني هي مسواك اكله شبيج
كلتله...لا يمه غير نعرف شلونو ذوقك
رشاش... شلونو بعد دحكي الوجه يشع اكثر من الگمر
باوعتله وابتسمت هي كالت بابتسامه :-الولد طايح وانه جاي انطيك رايي المامنو فايده جان كتلي امداك يبن صبيحه
ضحك كللها... ابن صبيحه شعليه
كالتله.... غير ارعن... باوعتلي كالت :-ادخلو ادخلو البيت بيتكم
دخلنا للهول مالتها بيه ديوان كعد رشاش كعدت يمه كلتله
... عجل ماعزمتني ع العرس يمصخم يمگموع
رشاش... ماسويت عرس بعدني
كالت... هاا دقيقه دقيقه هاي الگلي عنها اخوك حازم
اني باوعتله بادلني النظره وابتسم كال :-حازم مايضل شي بلسانو
گالتله... هم يرادلو يضم عليه غير اكص ع..
قاطعها ... لاتكملين بروح ابو شهم لاتضيع اخلاق مرتي
ضحكت كالتله... بعدني ماحاجيه وياها شي شبيك
اني كاعده بس اوزع ابتسامات غلبني التعب والاستغراب كوا مفتحه عيوني وخالته بس تسأل بيا
كامت داتحضر الاكل گلت اگوم وياها فشله وحدها
وگفت شلت الحجاب من على راسي وباوعت لرشاش هو باوعلي ابتسم شمرت الشال عليه ضحك
دانزع الصايه گال
رشاش... استري علينا يبنيه
حره... ليش متزوجه خالتك؟
رشاش... متوفي زوجها
حره... يعني بس هي هنا عايشه ماكو رجال غيرك يجي لهنا؟
رشاش... اي
حره... لعد دخلي انزع حيل اختنكت منها مقيدتني
صفن عليه نزل راسه وكال... استغفر الله
نزعت الصايه لابسه جواها بنطلون وبلوز خفيف
هو باوعلي صفح درت وجهي بكل كبرياء ومشيت
دخلت للمطبخ لكيتها محضره هوايه اكل لحم ودجاج وتمن واشكال شافتني كالت
... يا ليش كمتي هاي كملت ماعدي شي
حره... لا خاله خلي اساعدج
... بس صبي تمن
صبيت تمن اجه رشاش يساعدنا نقلنا الاكل وكعدنا نتعشى وخالته كل شويه وگالت
... وكلها بعد خلي تسمن شويه هيج اريدك تتبنها بالاكل
وهو ماصدك يجيب باللحم ويحطه كبالي وكلما اريد اكوم تلزمني متخليني تالي كتلهم
... كافي ارحموني مااكدر بعد والله
كملنا وشربنا جاي وخالته ماتركت احد ماحجت عن اخباره
اني كاعده بصف رشاش وهي كباله اريدها تكولي روحي نامي ماكو تحجي هوايه واحسها كلش نشيطه وعندها حيل بحيث كل شويه تكوم وترجع
وحتى بعد ابد ماسألته عني وعن زواجنا وليش مسوالي عرس وهالشي فاجئني
داتحجي عن ابن صبيحه تكوله
... تعارك ويا حازم اعمى مايدحگ ضرب سيارتو
حره... اني هنا بعد ماكدر اجمع حطيت راسي ع كتفه وكمت اشخر مو مال اتحمل اكثر
حسيت عليه وهو يشيلني بس مابيا اگعد
هاي اول مره اتعب هيج حتى اخواني ماحاجيتهم ذبيت روحي
فزيت من نومي ع صوت الديك يصيح كمت شلت البطانيه اريد اصلي گوا شلت روحي
باوعت فراشي صاير ببداية الغرفه ورشاش نايم بنهايتها
صفنت.. ياا هذا شبيه؟
ليش فارش هناك؟
هزيت ايدي وكمت باوعت لابسه بلوزة رشاش فوك ملابسي
فركت شعري هاي شنو منو لبسها الي
باوعتله شفته مامتغطي اخذت البطانيه غطيته بيها وفتحت الباب رحت للحمامات
توضيت ورجعت للغرفه صليت كملت صلاة تذكرت خواتي حيل مشتاقتلهم
ركضت يم رشاش گرصته حيل من زنده هو فز گال
... اشتعلو اخوتي
حره... انطيني موبايلك احجي ويا رتيل
هو صفن عليه فرك عيونه وگال... دنعل ابوج لا ابو رتيل يولو ببيش الساعه هسه
حره... اذن الفجر يلا انت هم كوم صلي
رشاش... صايره مُتقيه
حره... من زمان
رشاش... اسكتي والحجاب الي البارحه فرفحتي لان لبستيه
حره... لا هذا شي يختلف عن شي
رشاش... كافي تجذبين على روحج
حره... يلا انطيني موبايلك
رشاش... خلي انطمر هسه... ودار وجهه
كتله... اي انطيني موبايلك وانطمر
فز باوعلي وكال بحده... حرررره
اني نزلت راسي كال... ملاحظه نفسج شلون جاي تتجاوزين؟
كتله... اسفه
مجاوب كال... اكوم اصلي
صدك راح توضى وصلى واني گاعده بفراشه منتظرته يكمل
كمل واجه كعد يمي طلع موبايله اتصل على رتيل مرتين متجاوب كتله
... يا هاي ليش
رشاش... يمكن نايمه
حره... اتصل بعد هسه تجاوب
جر نفس... حره بعد وكت خلي تصير السبعه كلش زحمه هسه تتصلين
حره... مو هي تكعد من وكت
رشاش... وماجاوبت يعني نايمه
نزلت راسي بضوجه كال... كومي نشوف شروق الشمس ونضيع وقت.. كام ومدلي ايده
لزمت ايده وكمت كال... لبسي حجاب
حره... ليش
رشاش... دنصعد للسطح
وكفت بمكاني راح للجنطه اخذ الحجاب وخلاه ع راسي وكلي... يلا
مشينا وصعدنا للسطح وكفنا نباوع لجمال شروق الشمس الي يشوف الشروق بمكان كله زرع وطبيعه يحس بجمالية النعم الي الله انطانياها ويتذكر الجنه
گتله... الله شگد حلو المنظر
رشاش... تحليها شوفت وجهج گبالي الصبح
ابتسمت گتله... هالمكان يجنن وبالدنيا تخيل لعد شگد حلوه الجنه
ابتسم گال... اكو اماكن كثير احلى منو
حره... وين صايرات؟
رشاش... اربيل السليمانيه دهوك ديالى هم بيها مناطق زراعيه حلوه وكثير اماكن هاي بالعراق
حره... لعد عليك العباس اخذني لهناك
رشاش... من بطن عيني اخذج الها ان شاء الله
كعدت بالكاع گعد يمي گتله... تدري بيوم الي رحت للنجف تتذكر؟
رشاش... ماانسى هاليوم
حره... من اخذتني للمستشفى شفت حلم
رشاش... شنو هو
... جنت ببستان يجنن والهوا النقي هيج يسوي واهس للحياة وااشرله
رشاش... كلش تحبين هيج اجواء ... هزيت راسي كال... اي كملي حلمج
حره... وهناك شفت حياة
.. ابتسم كتله... جان مبين عليها الراحه وانطتني سبحه
سكتت خنگتني العبره جريت نفس كتله... تدري اني دائما لما اشوفها تگولي اذكري الله
رشاش... سبحي واشكري الله دائما
هزيت راسي گتله... هو اني هم هيج دااسوي
.. گتله.. كل سنه بهيج وقت اني وحياة واگفات ع التنور
حضني وباسني بعيني غمضت گال... كل هذا انتهى انسي ذيج الايام
حره... مستحيل انسى... باوعتله گتله... مااريد انسى ذكرى بيها حياة
مد ايده مسحلي دمعتي گال... كِلشي مكتوب يمكن لو ما حياة ماجان انه وانت هسه سوا
حره... شلون يعني
سمعت صوت خاله تگول... ياا ولكم وين خاتلين
ضحكت گال... گومي لا ننكتل
گمنا ونزلنا من السطح واحنا ع الدرج كالت... هاا وين جنتو... باوعت لرشاش كلتله... شعدك وياها ع السطح اعترف
ضحك كللها... ندحك شروف الشمس
باوعتلي وكالت... تعاي افحصج شو مامصدكتو
جرني گللها بضحكه... حرمتي ترا هي
باوعتله صفح وجرتني كالت... تعاي نتريك وانطيج فد عشر نصايح لسحل الرجال
رشاش... بعدني هينا ترا
كلتله... ادري شني خايفه منك احجيها كدامك تعاي يبعد جبدي تعاي
كعدنا ناكل كالت وهي تصب جاي... اسمعي يمه اهم شي تلبسين رجلج
اني ابتسمت وباوعتله هو باوع لخالته كالت
... اسمعي مني ماعليج بيه هذا
حره... كملي كملي نصايحج تعجبني
كلتلي... هذا المصموط النازل تالي وكت
حره... شنو؟
كالت... الموبايل ديري بالج تخليه يحطله رمز وبس يحطله معناها جاي يخونج
حره... اي هم صح
هو ياكل ويباوع باستغراب كالت... واهم شي التنظيف يوم عليج ويومين عليه
رشاش كاللها... بس لحضه قبل لاتكملين ارجعي غيري العنوان كتبي كيفية الطلاق بيومين كلش اضبط
ضحكت بصوت عالي وكرصتني بزندي بكلبي كلت... شبيهم هالعائله كلها تكرص
كالت.. جاي اتشاقه لا تكيفين و ديري بالج على رشاش ترا ماكو منو
حره... ان شاء الله
كملنا نظفنا سويه ماصدكت اكمل واركض للغرفه لكيته كاعد كتله... يلا خابر اختي... كعدت يمه اتصل عليها كالت
رتيل... الو
حره... الو
رتيل... حره
يايمه شلونج ولج... وبجت
بجيت وياها كتلها... بخير وانتو
رتيل... ناقصنا شوفتج
هو كام طلع برا الغرفه بجيت كالت :-ضربج اذاج احجيلي
حره... لا والله ماضربني
رتيل... وينكم انتو هسه
حره... بتكريت
رتيل... شعنده هناك
حره... يم خالته
رتيل... وخوما اذتج
حره... لا والله حبابين
.. بجت كتلها... زين ومقدام وينه شلونه مشتاقتله حيل
رتيل... دايدور عليجن يريد يرجعجن
حره... اكيد رشاش ميقبل
رتيل... نرفع عليه دعوه وناخذج
حره... رتيل احنا مو گده
رتيل... وشلون اخليج وياه!
حره هذا ماينوثق بيه
حره... لا لتخافين اني اثق بيه
رتيل... صدك تحجين؟؟؟
سكتت كالت... احجي حره
حره... هو رغم كلشي سواه بس يخاف عليه ويعاملني معامله حلوه ومن يشوفني زعلانه يرضيني
رتيل... يعني تردين تقنعيني ماضربج؟
حره... لا هو ابد ماضربني
رتيل... تحجين هيج علمود ماازعل مو؟
حره... لا والعباس مامد ايده عليه صح رزلني بس ماضربني
رتيل... خايفه عليج منه حره
حره... بس يهدد صدكيني ميأذيني
رتيل... مقدام دايموت من القهر
حره... كوليله اني بخير
رتيل... لعد موبايلج وين؟
حره... كسر الخط
رتيل... ليش؟
حره... ضاج وكسره
رتيل... حاقده عليه حقد
حره... لتخافين كلش حباب
رتيل... اوف يربي
حره... بس عمران قبل لااكمل كالت
... خلي يولي تعارك وياه مقدام
حره... ليش؟
رتيل... هو اتفق ويا رجلج
حره... ياا معقوله عمران حباب!
جرت نفس... ايي طلعت الناس كلها مصالح
حره... و عمران شنو مصلحته
رتيل ... رشاش كله اني اوكفلك لان ادري بيك بريئ واطلعك من السالفه مثل مقدام بس بشرطين تتعاون ويانا وثاني شي تنطيني حره
اني سكتت كالت... هسه هو وينه انطينياه خلي احاجيه
حره... طلع حتى نحجي براحتنا
رتيل... زين ودراستج شلون
حره... ماادري والله
رتيل... لازم تكملين اني واخوج صار سنين مشلوعه كلوبنا حتى تكملن خوما بالنهايه ماتكملين مثلنا
حره... لا اني احجي وياه
رتيل... ماشي واصلا مقدام حجه ويا اخوانه
حره... صدك؟
رتيل... اي وجانو حيل حبابين وكلوله نحلها بهدوء والتريده يصير
حره... عزا شوكت صار كل هذا
رتيل... وهاي سالي
حره... شبيها؟
رتيل... شاكه بروحها حامل
حره... عزاا مو وكتها
رتيل... كلش اوف
حره... وعثمان شلونه وياها
رتيل... عثمان زين حتى من تحاجيه يتعذر اهون من رجلج شايل خشمه
حره... لا يحب يتشاقه وياج
رتيل... كافي تدافعيله حره
سكتت شويه وكتلها... مراوي و امي شلونهم
رتيل... امج مو بالبيت مثل ومراوي بخير داتلعب ويا الجهال برا
حره... بوسيليها
رتيل... صار وانتي هم ديري بالج على نفسج
حره... ماشي وانتي هم
رتيل... لحي عليه حتى ينطيج تحاجيني لو يجيبلج موبايل
حره... تمام
رتيل... يلا بيباي
حره... هلا بيج
وسديته كعدت وحدي افكر حسيت باشتياق الهم كرفصت على نفسي وكعدت ابجي وافكر بحالي
اني مثل المشى بطريق مو طريقه وصفى لوحده
حايره بيا اتجاه امشي وخايفه وخايفه اتقدم لو ارجع وشراح يصير؟
خايفه من اهل رشاش غربه ومااعرفهم وخايفه اعوف رشاش وارجع ومااگدر اتحمل فراگه...
يمكن العالم تستغرب شلون بقيت احبه؟
والگاله مبررات ع كلشي؟
بس عادةً الناس البسيطه مثلي حتى البسمه بوجوهنا بوقت حزنا نتذكرها وماننساها
لانها دعم فشلون لو واحد مثل رشاش؟
سندني وقواني بوقت اني مجنت طايقه نفسي بيه
هيج ناس ميتعوضون والحيره الاصعب جانت "شسوي؟ "
انفتحت الباب شلت راسي شفته اجه باتجاهي گعد بصفي گال
:-ليش تبجين
مجاوبت گال... بسبب مشاكلي اني واخوتج؟
گتله... اي
مد ايده مسح دمعتي وابتسم گال... راح احلها صدكيني
حره... مشتاقتلهم
رشاش... كلما اروح لبغداد اخذج الهم
حره... اخذني هسه
رشاش... لا اخذج اعرفج على اهلي بالاول واهلج اخليج تزوريهم
حره... وعد؟
رشاش... وعد كلما اروح لبغداد اخذج
هزيت راسي كال... ليش تبجين ع ابسط الاشياء
سكتت كال... يلا كومي يم خالتي
حره... اريد ابقى وحدي
رشاش... انجبي وكومي
جرني كتله... تعبانه مابيا اجامل
رشاش... سالفة التختل وتكعدين وحدج بطليها
وجرني طلعنا من الغرفه كال... غسلي وجهج وتعاي يلا
صدك غسلت ورحت وراه ومر هاليوم عادي لليل سبحت واخذت موبايله حجيت ويا رتيل طب جايب بطانيتين ترخصت منها وكمت
فتحت الدواشك حتى ننام فرشت دوشك بعيد شويه عن الثاني كتله
... البارحه شبيك فارش هناك
ابتسم كتله... شبيك
رشاش... ولا شي
حره... ايي؟
رشاش... افكار ما حلوه تربعت براسي
حره... شنو من افكار ؟
رشاش... انسي وجر الموبايل كال :-خلصتي
حره... اي
كام يخابر برا اني بقيت وحدي نايمه واباوع للسگف اجت على بالي حياة وسمرا ابتسمت وغمضت عيوني نزلت دموعي على خدي
للحظات كل ذكرياتنا الحلوه مرت گدامي
صوت ضحكنا يرن بإذني ...
احلامنا وطموحنا ببالي ...
من اتذكر موقف يضحك ابتسم
ومن اتذكر انهم انقتلو تنزل دمعتي
الفقد صعب حيل صعب غمضت عيوني واني احس حرگه بحنجرتي الى ان غفيت انعاد عليه شريط جنت نايمه بنفس برودة هالجو
وصحيت ع ايد حياة وهي تحطها ع كتفي وتگول
... اگعدي ياكسلانه
لما فتحت عيني جان دنيا الفجر باوعت الكل نايم حتى رتيل گتلها
... عزا بعينج حياة بعد وكت هسه مكعدتني
گالت... شفت بيج كابوس مو حلو ابد
كتلها... شنو هو؟
كالت.. ميصير احجيه حتى ميتحقق
باوعت بعيوني كتلها... شبيج
لزمت ايدي كالت... خلينا سوا بكل يومنا.. ابتسمت..حتى اذا راد يصيبج اذى يصيبني بالاول
ابتسمت وحضنتها گامت گالت... يلا گومي نتريك ونعجن ونخبز لجيرانه
گتلها... اوكي جريني... ومديت الها ايدي
مدت ايدها لزمت ايدي وسحبتني
فزيت من نومي باوعت حواليه هذا جان حلم حطيت ايدي اتلمس وجهي الدموع ع خذي ماناشفات
بجيت سمعت صوت برا لنار وحطب گمت واني حاطه ايدي ع گلبي هالحركه احسها تخفف من حرگة گلبي باوعت من الشباك
شفت رشاش وخالته فاتحين حطب برا وحاطين الجاي ويدخنون ويسولفون
ابتسمت الاجواء حلوه فتحت الباب ع كيف سمعتها تگوله
... لو مخلي المشيه تروح لاهلها والله جان نحلت وسويت احلى عرس
كللها... خاله ماترهم وهي انهزمت شيشيل الحچايه الي بحلگ عمامي
گلتله... هم صح وهذا عمك سمير يابه فلا اطيقه
طلعت وكفت بالباب هو باوعلي ابتسم اسمعها تگوله
... بس هم لو گايللها انــ.... قاطعها كال
رشاش... گعدت ام التوت تعالي
واشرلي بمعنى تعاي رحت گعدت يمه باوع بوجهي اختفت ابتسامته ولزم ايدي
قربت ايدي الثانيه ع النار اتدفى خالته كالت
... باجيه خاله؟؟
هزيت راسي بلا كالت... خشمج وعيونج مبينه باجيه
سكتت كالت... ليش يمه اذاج هذا الخبل
ابتسمت كتلها... لا
كالت... عجل شبيج؟
حره... ماكو شي
هزت راسها كالت... مامشكله باجر اخذج لمكان تنسين بيه الزعل
حره... وين
گالت... عدنا بستان هينا قريب كلش حلو تحبين انتي الزرع وهالسوالف؟
حره... كلش.. ابتسمت كتلها... جنا اني وصديقتي كلما نضوج نگعد بحديقتهم
گالت... جبيره؟ هي حلوه بيوت بغداد
حره... لا بيوتنا ماجانت حلوه... وباوعت لرشاش يباوعلي مستغرب
كالت خالته... ما مشكله البيوت حلاتها باهلها
نزلت دمعتي مسحتها كتلها... اكيد
حسيت رشاش وهو يحضني و مسح على كتفي كالت خالته
... فدوا شلون حلوين جنكم عصافير الحب
ابتسمت الها هي كاعده تدخن كالت :-هاج دخني.. ومدت ايدها كالت :-تروح الضوجه عنج
مديت ايدي دااخذ رشاش بسرعه اخذها كللها ... لا خاله شهالحجي صدك تحجين
كلتله بضحك... اي يمه شكو بيها خطيه البنيه ضايجه اخذيلج نفس
ودتفتحلي جكاره كللها... لا خاله ديري بالج بالقران ازعل وبعد مااطب لبيتج
باوعتله كتله... شبيك هو نفس
خزرني كال... ديري بالج تفكرين بيها
وباوع لخالته كللها... خاله ترا هاي ماتفتهم ضحك والله هسه تصدك وتگعد تدخن
حره... سويتولي واهس وعلي
هو خزرني كللها... ها شكلت
هي ضحكت كالت... وعلي... هزت راسها وابتسمت كالت... يابه بحرب داعش من جنا نساعد الجنود جانو يجونا ضباط معدلين
الله يحفظهم وهم يكولون نفس حجاياتج وعلي والعباس
ابتسمت رشاش كللها... سباع ولد سباع
ضحكت كلتله... ولدك ابو السباع
ابتسم كللها... وهذا الكلب ابن الدعشي هم بعد طلع صوتو؟
كلتله... يكدر يحجي غير اشك ط***زو
اني ضحكت حيل كالت... ياح دحج لهاي الفطيره شني تضحكين على هاي مستغربه من هالحجي صدقه
ضحكت باوعت لرشاش اني هم باعتله حط اصبعه ع شفايفه بمعنى اش كالت
... ترا رجلج هينا يسمو معفطجي المنطقه
ضحكت بصوت عالي كتلها... صدك والله
هزت راسها باي كللها... ولا تسدين حلگج يفرحه
كالت... ابد... جرت نفس وطفت الجكاره وكالت... انه نعست اروح انام يلا ولو عني
تالي وكتي اكعد ويا حبيبين يخاف عليها وتخاف عليه كدامي
ضحكت كامت وضربتني على ضهري بخفه وكالت... الحزن مايفيد يمه اضحكي هي شباقي بيها هالدنيا الكل عندو همومو بالله الكريم محد مرتاح
ابتسمت كالت... تصبحون على خير وراحت سدت باب الهول
جرني من خصري عليه باسني من راسي وكال... ليش جنتي تبجين
حره... مبجيت
رشاش... انجبي لاتجذبين شبيج احجي
ابتسمت كتله... حياة
رشاش... هنيالها بيج
بجيت كال... هم بجت حاطه حنفيه بنص عينج رحمه لدينج
حره... مشتاقتلها شبيك
حضني ضليت ابجي وهو يمسح على شعري كال... شبيج تكأبتي ماجان بيج شي
حره... قبل لا انام كلشي يرجع ببالي حتى صوت سوالفنا وضحكنا اسمعه وكان بنات كاعدات يحجن بصفي دااحن لكل لحضه عشناها
رشاااش مااكدر انساها ابد
مسح دموعي كتله... اشوف ذكرياتنا وكان دااعيشها اليوم احلامي بيها... بجيت كتله... مخنوكه حيل
حضني كال... دكتورج النفسي شنو شخص حالتج
حره... اضطرابُ الكَرب الحادّ (ASD)
رشاش... وليش مااستمريتي بالجلسات
حره... مااريد
رشاش... ما على كيفج لازم ترجعين وتتعالجين حتى تكملين حياتج بشكل طبيعي
حره... طبيعي ويا اي شخص يشتاق لشخص ثاني هيج شي
جر نفس كال... رغم هذا تعالجي حتى تعيشين بصوره طبيعيه
حره... رشاش... اخذني لقبرها باجر
رشاش... باجر مااكدر بس اخذج هالاسبوعين
حره... ماشي
باسني براسي گلي... دموعج تأذيني كِلش
حره... انت هم بجيتني
باسني بعيوني گال... اعوضج وعد
حطيت راسي ع صدره گتله... وسالي شوكت تخليني التقي بيها
رشاش... عثمان كال اجيبها لهنا بس هسه يكول حامل
حره... يعني تاكدو
رشاش... اي يوم الالي واذبح طلي
حره... لا سالي بعدها صغيره مو مال طفل
رفع وجهي كال... يعني قصدج انت هم مو مال تجيبين طفل هسه
ابتسمت گال... يلا گومي ننام بالغرفه هينا برد الجو
گمت طبينا للغرفه گال... باجر يجي اوس اخوي الصغير
كعدت على فراشه مددت رجليه وارتجيت على الحايط كتله... اخوتك محبوبين
كعد يمي حط راسه ع رجليه كال :-تعبوني كلش
حره... ليش
رشاش... يتعاركون واصحاب مشاكل وتعال يا رشاش الحگلنا
ابتسمت كتله... لعد وابوك واخوانك البقيه
رشاش... ابويا صعب مايحب احد من اولادو يسوي مصايب وبكر اخويا حاير بعيشتو
حره... هو اكبر منك
رشاش... اي
حره... الله يحفطهم
رشاش... امين شكر حياتي
ابتسمت وارتجيت ع الحايط كتله :-اخواني هم مثلك هيج يحبونا
ابتسم كرصني بخدي كال... لاتفكرين بمشاكلي وياهم تنحل وداعتج
حره... لعد رجعني يمهم وتفاهمو
رشاش... لا انتي حرمتي ومحسوبه عليه وين مااروح انتي وياي
حره... زين ودراستي شلون
رشاش... انقلج لاحسن مدرسه
جريت نفس نام ع المخد مدلي ايده كال... تعالي
نمت على ايده وتغطينا ونمنا ماكعدنا الا لوقت الظهر
كعدتنا خالته ع الغده كمت مشطت وغسلت وتغدينا وكملنا
رشاش طلع الظهر
اني كعدت اكل جبس اجت خالته كعدت يمي كالت
... يولو تستاهلين والله وطاح بعشگج وليدي
ضحكت گالت... ماشاء الله عليج مره معدله وحبابه
حره... فدوا اروحلج خجلتيني بكلامج الحلو
گالت... اسمعي مني بالقران رشاش ذهب مايتعوض ديري بالج تعوفي لذيج وهاي
حره... منو تقصدين
كالت... الحيايه هواي اسمعي مني واكسبيه ترا محد يكدرلج دامو بظهرج سبع وگد حجايتو
حره... زين خاله اهله زينين
گالت... عندج عمتو راس البلا انتبهي منها اهم شي اكسبي رشاش والبقيه طز بيهم
حره... خايفه والله
كالت... ابد لتخافين اسمعي مني اهتمي بيه ولاتقصرين وياه بشي وشوفيه شلون يداريج مثل المي بالصينيه
وهو من غير شي عاشگج لاتضيعيه حتى لو غلط
ترا ترا غيرج صارلها سنين تتمناها
حره... منو؟
سكتت كتلها... لو بنتج بمكاني شتنصحيها؟
گالت... تكسب رشاش
حره... زين ووضعي شفتيني لا عرس لا شي
فرح... هسه يسويلج رشاش صدكيني مايحب احد يقلل من قيمتو والي يقلل من قدرج معناها هو الينعاب
هزيت راسي كتلها... ان شاء الله
ضلت تحجي وتنصحني وتوصيني اهتم بنفسي وبلبسي واتدلع
واذا غلط وياي اخذ حقي بس بطريقه ذكيه
وهواية حجي الى ان سألتها گتلها
... ماعندج اولاد؟
فرح... عندي ٣ولد و٢بنات
حره... وينهم؟
جرت نفس بحزن... كلهم انكتلو بوكت داعش
حطيت ايدي ع كلبي كتلها... الله يساعدج
فرح... اييي
حره... وحتبقين وحدج
فرح... مااعوف هالبيت الي بيه كثير ذكريات من ولدي مصبرتني اعيش
حره... شلون متحمله
فرح... يمه هي فكرت انهم عايشين احسن مني تشفي الكلب
حره... الفراگ صعب
فرح... وانه اشوفهم يصلون ياكلون يدعون وياي بعدين حبيبه هو العمر شباقي بيه شكد نطول ١٠سنين؟
كولي ٢٠سنه نتحملهن والاخره تبقى النا
حره... ياريت عندي صبرج
ابتسمت كالت... تكتسبيه بمرور الوقت.. باوعت للساعه كالت... يلا كومي لبسي لبين مايجي رجلج حتى اخذج للبساتين الي هناك
حره... ماشي
كمت لبست بلوزه وبنطلون طب رشاش باوع كال
... شني ماترحين ويانا؟
حره... اي طبعا اروح
رشاش... عجل شو لسه مامبدله؟
حره... ليش وهذول شوفهم يخبلن
رشاش... ادري بيهن يخبلهن لهذا ماتروحين بيهن
حره... ترا عقدتني
اقترب مني كال... حره حبيبتي هو ما عناد انه جاي احجي لمصلحتج انه احس بالاهانه والنقص لما احد غيري يشوفج بهاللبس تقبليها؟
حره... بس من حقي البس واتكشخ
رشاش... اي كدامي ياعمري البسي الترديه بس برا لا بعدين منو مفهمج الكشخه بس باللبس الضيك
بالله الكريم البنيه المحتشمه هيبه من تمشي ع الكاع
وانه اريدج هيج تصيرين
جريت نفس كال... يلا غيري ملابسج
لبست صايه وطلعنا اخذتني للبساتين الي هناك راحه نفسيه كلش فرحت بهاليوم
ورشاش يمشي وكلما يشوف ورد يگول
... هاي بجمالج
من يشوف فراشه يگول... هاي رقيقه مثلج
ولما يشوف المي الصافي يكول... بنقاوتج
تغيرت نفسيتي ١٨٠درجه ورجعنا للبيت اول ماطبينا للهول سمعت واحد كال.... بعععع بصوت عالي
اني صرخت رشاش كله... وسم يولو شوكت تعقل
هو وكف بهداوه يباوعلي متفاجئ طبت وراي خالتي ميل كل جسمه باوعلها وگللها
... هلا بخالتي... وركض حضنها واسمعه يكوللها... شنهي منهي
ويباوعلي ويرجع يحضنها بلع ريك ووكف كدامنا اني ورشاش وكال
اوس... منو انتي... باوع لرشاش... هاي منو ابو السباع... وياشرله بحواجبه يرفعهن ويرجع ينزلهن
ابتسم رشاش وكله... حرمتي ام التوت
هو فتح عيونه على وسعهن كال... ياهلا بمرت اخوي عندج اخت؟؟
كله رشاش... وحده واذا شافتنا تلزم الي برجلها
اما الثانيه طفله فمترهم حبيبي
ابتسم وضحك كال... هلا بيج اني اوس اخو رجلج
ابتسمت كتله... هلا بيك
اوس... راح تعيشين ببيتنا وتسود عيشتج
بس لتخافين بالماسحه والمي واجلفها ان شاء الله وترهم
وياشر لرشاش بمعنى فلوس
كله رشاش... انجب دامها عايشه وياي فتعيش احسن عيشه
حجه بصوت ناصي... اثنين لتصدكين بيهم الي يريد يبيعج شغله ويمدح بيها والرجال من يوعد شريكتو بالسعاده
اني ضحكت جرته من بلوزته خالتي كالتله... كافي ابتدينا بالتحريض
ضحك رحنا صبينا اكل والي فهمته باجر رايحيين ع الانبار
كملت عشى وصبينا جاي وضلينا نحجي
اوس كلش مرح وكانما عايشه وياه من سنين بسرعه ذبيت ميانه وياه لحد ما نعست ورحت لغرفتي انام
فزيت الصبح ع گرصة رشاش بزندي باوعتله كال... صلي وبدلي لازم نروح لاهلي
وفعلا صلينا وتريكنا وخالته توصي بيا وبيه على بعض وكل شويه وكالتله
... انتبه من الحيايه
رحت للغرفه دااجيب الجنطه درت وجهي شفت رشاش جر ايدي باسها وباسني من راسي كال
رشاش... حره اعرف شكد تأذيتي مني وبالله الكريم مااريد ااذيج اكثر
بس مهما يكون الي راح تشوفيه وتسمعيه ببيت اهلي لاتحكمين بلا ماتسمعين مني ممكن؟
هزيت راسي باي كتله... رشاش خوفتني
تحسسني اهلك
قاطعني... لاتخافين لما تكونين وياي
اخذ الجنطه ولزمني من ايدي ومشينا سلمت على خالته وصعدت ليورا واوس ليكدام ومشت السياره والتوتر والخوف كلما يمر الوقت يزيد الى ان وصلنا للانبار
نزلت يم بيت كلش كبير وحلو ومرتب ومبينين اهله ناس عدهم فلوس خير الله
تفاجئت لما رشاش كال وصلنا يعني هالبيت اله نزلت هو لزم ايدي وفتنا للبيت وورانا اوس
دگ الباب فتح الباب رجال ضحك كله
... ياهلا... وسلم عليه كال... اخو رجلج حازم البيت بيتج دفري الباب وفوتي
ضحكت وطبيت واني لازمه بايد رشاش شفت رجال جبير وبصفه مره مبين عليها ملامح الكبر
بعدني مامسلمه نزلت مره حلوه من الدرج وبيدها طفل هي شافتني صرخت
... هااااي منوووو عمووو
والطفل الصغير اجه يركض على رشاش ويكول.
... اجه بابا اجه بابااا
بسرعه انقبض كلبي من هالحجايه واختنكت وباوعت لرشاش... يتبع...
____________________
اسفه ع التأخير فراشاتي
لتنسون التصويت والمتابعه
والاهم ارائكم للقصه
وشكرا من الگلب للبنات المتفاعلات بالقصه
حبيباتي انتو
قراءه ممتعه
تصبحون على خير ❤
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!